ئیبراھیم سەلمان پتری ٥٠ سالانە خزمەتا ھونەرێ کوردی دکەت

ئیبراھیم سەلمان پتری ٥٠ سالانە خزمەتا ھونەرێ کوردی دکەت

18

ئەڤرۆ، سالار محەمەد دۆسکی:

ھونەرمەندێ دووری وەلات ئیبراھیم سەلمان کو بۆ دەمێ پتری ٤٠ سالانە دبیاڤێ ھونەرێ درامایێ و ئەکتەریێ دا کار دکەت، نوکە ل دەرڤەی وەلاتی دژیت د دیدارەکا رۆژناما ئەڤرۆ دا بەحسێ ژیانا خوە یا سەخت و دژوار و چەند وێزگەھێن خوە یێن ھونەری یێن گرنگ دکەت.

ھونەرمەند ئبراھیم سەلمان بۆ بەرپەرێ ھونەری ل رۆژناما ئەڤرۆ گۆت:  ل رۆژا ١٥/٤/١٩٥٤ ل گوندێ زاویتە ژ دایک بوویمە، دەمێ بۆ جارا ئێکێ چوویمە خواندنگەھێ خەلکی جلکێن جەژنێ کربوونە بەر زارۆیێن خوە شریناھی بەلاڤ دکرن و خواندنگەھێ کورسی نەبوون، بەلکو مەحفیر بوون و ل سەر د روونشتنە خوارێ، ل رۆژا ٢/١٢/١٩٦١ ژ گوندی رەڤین و بەر ب دھۆکێ ھاتیە و پشتی دو حەفتیان چووینە مووسل و پشتی چەند ھەیڤان بەر ب باژێرێ بەغدا چووین، ل دەسپێکا سالێت شێستان ژیانا پتریا خەلکێ کورد ل بەغدا گەلەک یا سەخت بوو، چونکو پتریا وان ژ بەر کاودانێن بەرتەنگێن وی سەر دەمی رەڤی بوونە بەغدا، ھەمان دەم ھاتنا کوردان بۆ بەغدا باشیێن خوە ژی ھەبووینە و زارۆیێن کورد دچوونە خواندنگەھان، ل قووناغا ناڤنجی ل بەغدا من پشکداری د چەند شانۆگەریەکان دا کر ل یاریگەھا شەعب ل بەغدا، دەمێ بەیانا ١١ ئادارێ ل سالا ١٩٧٠ چێبووی بابێ من بریار دا مالا خوە بینینە دھۆکێ، دەمێ زڤرینە دھۆکێ قوتابی بووم ل ئامادەیا کاوە ل قوناغا شەشێ زانستی وێ سالێ قوتابیان بریار دا شانۆگەریەکێ دروست بکەن و ئەز وەک ئەکتەر تێدا ھاتمە ھەلبژارتن و (دەشتی فەق شھاب) دەرھێنەرێ مەبوو و ئەف شانوگەریەک ب ھەلکەفتا ھاتنا نەورۆزێ بوو و رۆلێ من یێ (زحاکی) بوو و رۆژەکێ  بابێ من پرسیار ژ من کر کا چەوا ب رێڤە دچیت من گۆتێ یێ پرۆڤا دکەم بۆ شانۆگەریەکێ و ئەز رۆلێ (زحاکی) دگێرم، پشتی وی ئەف چەندە زانی گەلەک بێ زاربوو و ئاخینکەکا کوور راھێلا، گۆت کورێ من ھیڤیا تە مە تو سەرێ مە بلند بکەی و ھەکە تو بوویە لێبووک دێ چەوا سەرێ خوە بەرامبەر خەلکی راکەم و من گۆتێ سەرێ تە شور نابیت بڤی کاری بەلکو ئەڤە خزمەتا مللەتێ مە دایە و دێ سەرێ تە پێ بلند بیت و دناڤبەرا مە دا بوو شەر و رۆژا ٢٠ و ٢١ و ٢٢ ئادارێ ل سالا ١٩٧٢ شانۆگەری ھاتە پێشکێشکرن، رۆژا ئێکێ پارێزگەر و چەند بەرپرسێن گرنگ و فەرمانبەر و مامۆستا ھاتنە پێش و رۆژا دووێ بۆ ژنکا بوو و رۆژا سیێ بۆ قوتابیان و پالە و جۆتیاران و خەلکێ دی بوو  و ھەرسێ رۆژا ئامادەیا کاوە تژی بوو و دەمێ بوویە رۆژا ژنکا گەلەکا زارۆکێن خوە ل گەل خوە ئینابوونە پێش شانوگەریێ تشتێ وێ شانوگەریێ ژ بیرا من نەچیت دەمێ کاوەی دکوشتم و سەر کورسیکێ دکەفتم خەلکی گازیدکر ب کوژن و خلاس نەبیت و رۆژا دووماھیێ خەلک ھاتنە سەر دەپێ شانۆیێ و ھندەکا ب دروستی دڤیا پێل من بدانن، لێ رابووم و ھندەک ئەکتەران بەرەڤانی ژ من کرن، دیسا تشتێ ژبیرا من نەچیت ل رۆژا ئێکێ یا پێشکێشکرنا شانوگەریێ خەلکی گەلەک دیاری بوومن ئینان، پشتی وێ شانۆگەریێ دەمێ زارۆکان ل کولانەکێ دیتبا مە ب دیلوکێن منێن وێ شانوگەریێ گازی من دکرن، پشتی ڤی کاری گەلەک ژ خەلکی دەست خوشی ل بابێ من کر و پەسنا من بوو کربوون و کەیفا وی ژی گەلەک بڤێ چەندێ ھات و گۆت تە سەرێ مە بلندکر، پشتی ئەزموونێن ویزاری ب دووماھی ھاتین، بەر ب بەغدا چووم  و من کار کر وەگ فوتوگرافەک و ھەتا رۆژا راگەھاندنا ئەنجاما زڤریمە دھۆکێ و دەمێ چوویمە ژوورا رێڤەبەری، وی گۆت تو چەوا سەرکەفتی مە قەد باوەرنەدکر دێ سەرکەڤی، چونکو تە چ جارا نە دخواند و ھەر دەم ل گەل مامۆستایان یێ ب شەر بووی و ھەر دەم ل ئاھەنگ و دەواتا بووی، بەلێ راستی تە سەرێ خوە و بابێ خوە بلندکر و من تەماشەی ئەنجامێ خوە کر من ٦٣ دەرخست بوو وەک تێکرا نمرا، من گۆتێ ھەر شەڤ بەری بانگێ سپێدێ من سێ دەمژمێران دخواندن و نیڤرۆیان من د ناڤ چەمێ مەتا خوە وان دا دخواند ھێشتا خەلکێ نڤستی و مامۆستا و رێڤەبەری گەلەک کرنە کەنی و پشتی من ئەنجامێن خوە برینە مال گەلەک کەیفا ھەمیان ھات و پشتی من بریار دای بچم ئەکادیمی یا ھونەرێن جوان بخوینم بابێ من خەمگین بوو دڤیا بچمە کۆلیژا پۆلیسان.

 

ھێشتا گۆت: دەمێ چوویمە ئەکادیمی یا ھونەرێن جوان وێ سالێ قوتابیان تێکرایێن نمرا یێن بلند وەرگرت بوو وێ سالێ نەھاتمە وەرگرتن، لێ مە و ھندەک ھەڤالێن حەزا ھونەری ھەین و نەھاتینە وەرگرتن مە خوپیشاندان بەردەاوم کر و ھەتا رۆژناما جمھوریە یی ل سەر مە نڤێسی، رۆژەکێ وەزیرێ خواندنا بلند سەردانا ئەکادیمیێ کر و من ھەڤالێن خوە ئاگەھدارکرن ل سەر سەردانا وی بۆ ئەکادیمیێ وەزیر ل گەل جێگرێ راگری بوو و ئەز چوومە بەراھیێ و من گۆتێ ھونەرێ دخوینا مە دا و ھونەری چ پەیوەندی ب تێکرا نمرا ڤە نینە، جێگرێ راگرێ کۆلیژا ھونەری کو مامۆستا سامی عەبدولحەمیدە بەرەڤانی ژ مە کر و پشتی وەرزیر دەرکەفتی ب ٣٠ خولەکان ناڤێن مە ھاتنە ھەلاویستن و ھاتینە وەرگرتن ل گەل چەند ھەڤالان و مە دەست ب خواندنا ئەکادیمی کر ل بەغدا.

وی دەمی غازی بامەرنی ئەکادیمی ب دووماھی ئینابوو و وانە ل باژێرێ سلێمانیێ دگۆتن و ئەحمەد محەمەد عەلی ئەسکەندەر ل پولا چارێ بوو، ھاشم عەلی مندی ل پۆلا دوێَ بوو و فازل جاف ل پولا ئێکێ وبوو، ژبلی ئەڤان قوتابیان ئەم ئەڤێن مای خەلکێ بەھدینان بووین.

پشتی چەند ھەیڤەکا و ل ئاھەنگا نەورۆزێ من ھەڤنیاسین ل گەل رێڤەبەرێ رادیۆیا کوردی ل بەغدا کر، ناڤێ وی (عەبدوللا موسا) بوو خەلکێ زاخۆ بوو و ھاتمە وەرگرتن وەک ئەکتەر کو ئێڤاری یا ل رادیۆیێ کار بکەم وی دەمی ئەحمەد ئەسکندەر و ھاشم عەلی مەندی ژی کار دکر و ھاشمی پرۆگرامێ تەلەڤزیونی ژی ھەبوو و گەلکە جارا من و ئەحمەد دگەل کارکریە و من کارەک لبن ناڤێ (چ دووماھی دێ بۆ ڤێ شانوگەریێ دانی؟) نڤێسی و ھەر دەرھێنانا من بوویە و ئەحمەدی ھەر  دو رۆل ئینان ل ھەیڤا ھەشت سالا ١٩٧٨ ل تەلەڤزیونا مویسل بەلاڤ بوو و خەلکێ دھۆکێ دیت، ل سالا ١٩٧٩ من کارەکێ ھونەری بەرھەڤکرن بناڤێ (لێبوک داستانا مەم و زینا دگھوریت) چاپکر و ھەر ھەیڤەکی ھاتمە دھۆکێ و مە پرۆڤە ل سەرکرن و بەری بھێتە پێشکێشکرن، ئەز و رێڤەبەرێ لاوان کو وی سەردەمی محەمەد بریفکانی ھاتینە گازیکرین بۆ ھەولێرێ و ژ من ھاتە خواستن ڤەگەرمە بەغدا ل مالا خوە و نابیت ئەف کارێ ھونەری بھێتە پێشکێشکرن، ناڤێ ھندەک ئەکتەر و ستافێ وێ شانوگەریێ ھێشتا ل بیرامنن(جلەلادەت، سالم جاسم باجلوری، خالد دۆسکی، کەریم بەدەل، نھایە مائی، جەلادەت مائی) گەلەکێن دی و ھەکە شانوگەری ھاتبا پێشکێشکرن دا بیتە تشتەکێ دیرۆکی چونکو دو کچێن دھۆکێ پشکداری تێدا ھەبوو.

ل سالا ١٩٨٠ من مونودراما (ترس) نڤێسی و دەرھێنانا  و پێشکێشکر و ل رۆژا ٢٧- ٢٨ ئادارێ ل ھولا سلێمانیێ پێشکێشکر و ھونەرمەند ئەحمەد سالار ب رۆناھی و دەنگی ھاریکاریا من کر، زەلامەکێ سەدامی گەف ل من کر کو دڤێت بچمە بەغدا ھەکە من ڤێت نەھێمە کوشتن دڤێت ڤەگەرم، ھەر ھەمان شانوگەری ل سالا ١٩٨٢ ل باژێرێ ئەمستردام ل وەلاتێ ھولەندا من پێشکێشکر و دیرۆکا کوردستانێ بتابلو و موزیکەکا زندی من پێشکێشکر و رۆژنامێن ھولەندی ل سەر نڤێسی و رادیۆ و تەلەڤزیونێ بەحس کر و ئالایێ کوردستانێ بۆ ماوێ دو حەفتیان ل سەر ئاڤاھیێ تیاترویێ بلند ھاتە ھەلاویستن.

کۆمێنتا تە