خواندنا خوە گوری زیندانێ کر

خواندنا خوە گوری زیندانێ کر

ئه‌ڤرۆ نيوز:

پارێزەرەکێ دادگەھا دھۆکێ راگەھاند کو کەسەکێ زێرینگر دکانا خوە دائێخست چونکی کارەب چوو و دەرکەقت پشتی زڤری دیت کەسەکێ ئەڤ تاریە یا بۆ خوە ب دەرفەت دیتی و دکانا وی یا شکاندی و نێزیکی کیلو و نیڤێن زێران ھەموو یێن برین و گۆت: پشتی چەند رۆژان تاوانبار ھاتە دەستەسەر کرن و دانپێدان کرکو وی کریارا دزیێ یا ئەنجام دای، دادگەھێ ژی ب سزایێ سێ سالان حوکم کر.

پارێزەر عەمار حەسەن عومەرل دادگەھا دھۆکێ بۆ ئەڤرۆ دیار کر کو کەسەکی دکانەکا زێرنگریێ ھەبوو دەمێ نیڤرۆ کارەب چوو بوو ئانکو ماوێ بێھنڤەدانا موەلیدێ کارەبێ بوو تاری بوو و گۆت: خودانی ژی دکانا خوە گرت و دەرکەفت پشتی زڤری دیت کەسەکی ئەڤ تاریە یا بۆ خوە ب دەرفەت دیتی و دکانا وی یا شکاندی و زێرێن وی ھەموو یێن برین، پشتی ئەڤی کەسی سکالا ل دادگەھێ تومار کری و ڤەکۆلین و دووڤچوون ھاتینە کرن دو کەس ھاتنە دەستەسەر کرن کو گومان ل سەر ھەبوون ئێک ژ وان رەت کر کو وی ئەڤ کریارە ئەنجام دابیت، لێ ئەڤ کەسێ دیتر کو وی ژی دکانەک ھەبوو ل ھەمان جھێ وێ دکانا زێر لێ دزین، بەلێ وی کارێ دەستی دکر دانپێدان کر کو وی ئەو دکان یا شکاندی و زێرێن دزین و ھەموو برینە و کرینە د کیسەکی دا ئەو ژی نێزیکی کیلو و نیڤێن زێران بوون.

پارێزەری ئاشکراکر ژی کو ئەڤ زێرە کرنە د ترومبێلا خوەدا و چوو پشت سکرێ دھۆکێ ئەڤ زێرە ھەموو کرنە دناڤا گورێن زەلامان دا و زڤری ڤە، پشتی چەند رۆژان ئەڤ کەسە ھاتە گرتن و کەسێ دیتر چ ل سەر نەچوو و تاوانباری ب خوە ژی گۆت ئەڤی کەسی چ نەکریە من دزیا کری.
پارێزەری زێدەتر گۆت: پشتی ھەردو ھاتینە رەوانە کرن بۆ دادگەھێ ل دووڤ مادێ 444 ئەو کەسێ رەت کری کو وی کریارا دزیێ ئەنجام دابیت چ ل سەر نەچوو دادگەھێ ئازاد کر، ئەو تاوانبارێ دیتر ژی دانپێدان ل بەرامبەری دادگەھێ کر کو وی کریارا دزیێ یا ئەنجام دایی و گرۆڤە ژی ل سەر ھەبوون.

پارێزەری گۆتژی: پشتی خودانێ زێران گەھشتیە زێرێن خوە تاوانباری زەرەر گەھاند بوو زێرێن وی و خار کربوون ب وێ زەرەرێ بھایێ زێری دھیتە خار، بەلێ کەس و کارێن تاوانباری پارە ژ پێش وێ زەرەرێ دانە خودانێ زێران وی ژی داگێران ژ سکالا یا خوە کر.

پارێزەری ئەو چەندە ژی دیار کر کو دادگەھێ ژی ب سزایێ سێ سالان حوکم کر، چۆنکی ب رۆژ کریارا دزیێ ئەنجام دابوو و زوو دانپێدان ب کریارا خوە کر و کەسێ سکالا ل سەر تومارکری داگێران کر و ژبەرکو زوگرد بوو و قوتابی بوو، لەوا دادگەھێ ئەڤ کاودانە بەرچاڤ وەرگرتن ھەتا حوکمێ وی ل سەر کێم کری.

کۆمێنتا تە