دو پارتى و دو ئێكه‌تى و مانا ل ژێر چاڤدێریا چڕ!

دو پارتى و دو ئێكه‌تى و مانا ل ژێر چاڤدێریا چڕ!

39

راسته‌ به‌رى 16ى ئوكتۆبه‌را ره‌ش ژى هه‌رێما كوردستانێ گۆتارێن دو (پارتى) و دو (ئێكه‌تیان)، هه‌كه‌ پتر نه‌بن هه‌بوون؛ لێ نۆكه‌ ئه‌ڤ گۆتارا پتر ژ حزه‌بكێ د هه‌یكه‌لێ سه‌ره‌كى یێ حزبه‌كا مه‌زن دا زێده‌تر دیاربوویه‌ و ئێدى ناهێته‌ ڤه‌شارتن و ب ئاشكرایى، تایبه‌ت د تۆڕێن په‌یوه‌ندیێن جڤاكى دا هه‌ر ئالییه‌كێ خوه‌ ب ئه‌لهۆیێن حزبێن خوه‌ نیاسن، ئالیێ دى ب خیانه‌تێ و دوبه‌ره‌كیێ و خوه‌فرۆشیێ تاوانباردكه‌ت. به‌رامبه‌را بالێن دن د هه‌ردو حزبان دا كۆترێن ئاشتیخوازن و ب شێوازه‌ك دبلۆماسى و سه‌رده‌مانه‌، ب هه‌ڤرا داخوازییا دانوستاندنێ دگه‌ل به‌غدایێ و هه‌موو لایه‌نان دكه‌ن؛ پێخه‌مه‌ت زڤڕاندنا ره‌وشا جاران و راستڤه‌كرنا شكه‌ستكا ده‌ستهه‌لاتێ كرى كو هه‌ر وه‌ك دو حزبێن جودا و نه‌ دگه‌ل بالێن دن یێن ئه‌لهۆ كو تنێ باوه‌رییا د ناڤبه‌را وان دا مایى باوه‌رییا به‌رژه‌وه‌ندیێن به‌رته‌نگن!
ئه‌ڤ ره‌وشه گه‌له‌ك جاران ژ تۆڕێ، جڤاكى ده‌ردكه‌ڤت و‌ ب رێكا ده‌زگه‌هێن راگه‌هاندنێ دیاردبت، ده‌مێ داخویانییا ئالییه‌كێ حزبه‌كێ یان هه‌ردو حزبان پێكڤه‌ به‌لاڤدبت كو داخوازێ ژ حوكمه‌تا به‌غدایێ دكه‌ن دانوستاندنان دگه‌ل بكه‌ن و ئه‌و رێزێ بێجوداهى ل هه‌مى بڕیارێن دادگه‌ها فێدرالى دگرن. لێ ئالیێن دى یێن هه‌مان حزبان ل سه‌ر گۆتارا خوه‌ یا دژوار یا به‌رى 16ى ئوكتۆبه‌رێ به‌رده‌وامن و هه‌مان گۆتارێ به‌لاڤه‌دكه‌ن؛ هه‌ر وه‌ك هه‌رێما كوردستانێ بۆ چوار گۆشه‌یا ڤالا نه‌زڤڕى و ئه‌ڤ كاره‌ساتا مه‌زن ب سه‌رى نه‌هاتى!.
هه‌لبه‌ت ئه‌ڤ دوگۆتاریا د حزبه‌كێ دا، ب دیتنا یار و نه‌یاران، نها خزمه‌تا چاره‌سه‌ركرنا ئاریشه‌یێن ناڤخوه‌یى و دگه‌ل به‌غدایێ ناكه‌ت، به‌لكى دێ پتر ئالۆزیان په‌یدا كه‌ت و بیاڤێ فێلبازى و ئالۆزكرنا كێشه‌یان ب ده‌ست به‌غداڤه‌ به‌رده‌ت، ژ به‌ر كو ئه‌و نها سه‌ره‌ده‌رییا سه‌ركه‌ڤتى دگه‌ل شكه‌ستى، د گه‌ل هه‌رێما كوردستانێ بكاردئینن و ئارمانجا وان ئه‌وه‌ هه‌رێما كوردستانێ هه‌كه‌ بشێن وه‌ك هه‌ر ده‌ڤه‌ره‌كا ئیراقێ لێبكه‌ن و سه‌ره‌ده‌ییا پارێزگه‌هان دگه‌ل بكه‌ن و هه‌یبه‌تا وان هزر ژێدكر وه‌ك جاران نه‌هێلن.
به‌رده‌وامییا سیاسه‌تا دو حزب د حزبه‌كێ دا و تاوانباراكرنا هه‌ڤدو ب خیانه‌تێ، ره‌نگه‌ ئه‌ڤا مایى ژى ژ ده‌ست حزبێن هه‌رێمێ بچت و ئێدى په‌شێمانى فایده‌ ناكت.. راسته‌ زیان دێ گه‌هته‌ هه‌مى حزبان، لێ زیانا مه‌زن ئه‌وه‌ كو ب خه‌لكێ نه‌هشیار و بێئیراده‌ دكه‌ڤت؛ ژ به‌ر كو د زنجیرا روودان و قه‌یرانێن به‌رده‌وامێن هه‌رێمێ دا، د درێژییا 26 سالان دا، گه‌له‌ك كێم ده‌نگێ خه‌لكى بلند دبت، هه‌كه‌ ئالییه‌كێ سیاسى بۆ خوه‌ مفاى ژێ نه‌بینت، وه‌ك خوه‌پیشاندانێن به‌رییا چه‌ند سالان ل سێلمانیێ دهاتنه‌ كرن كو گۆڕانێ و كۆمه‌لێ پترییا وا دلڤاندن، وه‌كى دى ڤى خه‌لكى ئه‌و ده‌ستپێشخه‌رى نینه‌ پرسیارا مافێن خوه‌ بكه‌ت و به‌رهه‌ڤبن قوربانییان بده‌ن.
مه‌ره‌ما من بهتر ژ نڤیسینا ڤان رێزكان ئه‌وه‌: تنێ هه‌ڤگرتنا گۆتارا كوردى همبه‌ر یارونه‌یاران د به‌رژه‌وه‌ندییا كوردان دانه‌، تایبه‌ت د ڤێ ره‌وشا نها هه‌رێما كوردستانێ تێدا ده‌ربازدبت. بڕیار هه‌ر بریارا حزبانه‌، بلا ب ئێك ده‌نگ نها دانوستاندنان دگه‌ل به‌غدایێ بكه‌ن دا كو ب كێمى بشێن ژ ژۆرا چاڤدێریا چڕ ده‌ربكه‌ڤن، یان ژى سه‌ره‌رایى هه‌میێ، بێژنه‌ به‌غدایێ و جیهانێ: مه‌ ریفراندۆما كرى و بڕیارا گه‌لێ مه‌ بوویه‌ و ئه‌م لێڤه‌ نابین و هوین چ دكه‌ن وه‌ بكه‌ن و د كووده‌رێ را زراڤه‌ بلا د وێرێ را بقه‌تیێت؟! هه‌كه‌ چو ژ ڤان هه‌ردو هه‌لوه‌ستان نه‌بن، ئه‌ڤ هه‌لوه‌ستێ نها هه‌ر بالێ حزبه‌كێ بۆ خوه‌ داخویانیان دده‌ت و كه‌س ب كه‌سێ نه‌كه‌ت، دبت ئه‌ڤ ره‌وشا هه‌یى ژى به‌ره‌ڤ ئاقاره‌ك وه‌سا بچت كو د خه‌یالان ژى دا خه‌لكه‌ك باوه‌رنه‌كه‌ت؛ چونكى مه‌ هه‌میا دیت چاوا ئه‌مریكا ل كه‌ركووكێ و ده‌ڤه‌رێن دى رۆناهییا كه‌سك بۆ (حه‌شدێ و هێزێن ئیراقێ) هه‌لكر ب پشته‌ڤانیا ئیرانێ؛ هه‌تا 51% ژ ئاخا كێشه‌ ل سه‌ر داگیركرى.

کۆمێنتا تە