شۆره‌ش دره‌وه‌كا ب شاخه‌!

شۆره‌ش دره‌وه‌كا ب شاخه‌!

31

ده‌مێ شۆڕه‌شا فره‌نسى ل سالا 1789 ب پشكداریا پرانیا ته‌خوچینێن جڤاكى سه‌ركه‌فتن ب ده‌ستڤه‌هیناى، خه‌لكێ وى وه‌لاتى ب گه‌رمى ئاهه‌نگێن دیرۆكى گێڕان؛ وه‌ها هزركر كو زۆرداری و گه‌نده‌لیا ((شاه لویسێ 16)) ب دووماهى هات.. گه‌له‌ك پێڤه‌نه‌چوو، سه‌ركرده‌یێن وێ شۆڕه‌شێ، نه‌مازه‌ سه‌ركرده‌یێ ناڤدارێ شۆره‌شگێڕان ((رۆپسبیرى)) هه‌مان ره‌فتارا دكتاتۆرێ به‌ریا خوه‌ دوباره‌كر و ژێ ده‌ربازكر و نێزیكى 20 هزار كه‌سان سێداره‌دان! لێ ملله‌ته‌ك هشیار و خودان ئیراده‌ كو زولما لۆیسى قه‌بوول نه‌كرى، هه‌مان دكتاتۆریا ((رۆپسبیرێ)) پێشه‌وا ژى قه‌بوول نه‌كر و شۆڕه‌ش به‌رده‌وام بوو، ((رۆپسپیرێ)) پێشه‌وا، پشتى هینگێ پێنچ سه‌ركرداتیێن دى ژى، وه‌ك لۆیسى ب مافێ گه‌ل را گه‌هاندن و ژناڤبرن، هه‌تا فره‌نسى وه‌ك نموونه‌یێن گه‌لێن هشیار و خوه‌دى ئیراده‌ ب دروستى ب مافێن خوه‌ را گه‌هشتین؛ هه‌تا نها ژى پرانیا گه‌لێن بنده‌ست و ریفرۆمخواز ل جیهانێ، سه‌ربۆرا گه‌لێ فره‌نسى دكه‌نه‌ نموونه‌ بۆ خوه‌ ئازادكرنێ!
بیرا من دهێت، ده‌مێ به‌رى پتر ژ 30 سالان ئه‌م قوتابى بووین ل ناڤه‌ندا دهۆكێ، ده‌مێ ئه‌م دزڤڕینه‌‌ گوندى، هنده‌ك جاران پێشمه‌رگه‌ مێهڤانێن گوندى بوون. د سه‌مینار و گه‌نگه‌شه‌یێن خوه‌ یێن جه‌ماوه‌رى دا، ب گه‌رمى باسێ شۆڕه‌شێ بۆ مه‌ دكر و نموونه‌یێن شۆڕه‌شێن جیهانى دئینان؛ وه‌سا خۆیا دكر كو نێزیكه‌ شۆڕه‌شا بزاڤا رزگاریخوازییا كوردى دێ ب سه‌ر رژێما (به‌عسا عه‌فله‌قى) كه‌ڤت، ره‌وش دێ ئارام بت، كورد دێ حوكمى ب یه‌كسانى ل دووڤ بلۆكێ سۆسیال (ماركسى) كن، شه‌هیدێن سه‌ر به‌رز، پێشمه‌رگه‌، ته‌خێن زه‌حمه‌تكێش و هه‌ژار و نه‌داران به‌رى هه‌میان دێ ب مافێن خوه‌را گه‌هن، دنیا دێ بته‌ شاما شه‌ریف و ئێدى قانوون دێ حاكم بت!
هه‌یڤ هاتن و سال ده‌ربازبوون، سه‌رهلدانا دیرۆكى یا سالا 1991 ده‌ستپێكر، هه‌ر وه‌سا دگه‌ل دا، سه‌رهلدانا پرۆستۆریكا میكائیل گۆرباچۆفى ل سۆڤیه‌تا جاران دژى سیسته‌مێ (ماركسى و لینینى) ده‌ستپیكر و ئێكه‌تیا سۆڤیه‌تا یا پشتى پتر ژ 70 سالان حوكم كرى پارچه‌پارچه‌ بوو، شكه‌ستن هینا.
دیار بوو هه‌ر ل رۆژێن ئێكێ یێن سه‌رهلدانا باشۆرێ كوردستانێ كو شۆڕه‌ش و سه‌رهلدان ل جیهانا گه‌لێن نه‌هشیار و بێئیراده‌ و ب درووشمێن ته‌یسۆك سه‌رخوه‌ش دبن، دره‌وه‌كا ب شاخه‌ و كه‌س خودان په‌یاما مرۆڤایه‌تیێ بۆ رزگاركرنا ملله‌تێ خوه‌ نینه‌، به‌لكى هه‌ر ئێك بۆ خوه‌ شۆڕه‌شێ دكه‌ت و هه‌ر وه‌ك قانوونا دارستانێ ئه‌و دگه‌هته‌ مافێ خوه‌ یێ خودان هێز بت و پتر شاره‌زایى د هونه‌رێ جه‌مبازیێ، گه‌نده‌لیێ، مه‌لاقیێ، دوروویاتیێ و دره‌وان دا هه‌بت.
پشتى 27 سالێن ئازادیێ، واقعێ هه‌رێما كوردستانێ ئه‌ڤه‌ هه‌مى باشتر زه‌لال كر كو هه‌ر ئێك تنێ بۆ خوه دكه‌ت، هه‌كه‌ وه‌سا نه‌با تنێ حزبه‌كا كوردى یا خودان دیرۆك و ده‌ستهه‌لات و جه‌ماوه‌ر دا پیچه‌كا داگێڕانێ (ته‌نازلێ) بۆ هه‌ڤڕكێ خوه‌، سه‌خمه‌رات به‌رژه‌وه‌ندیا گشتى كت، لێ هندى هه‌ر جه‌ماوه‌ره‌كێ بنده‌ست، ئیراده‌یا گه‌لێ فره‌نسى یا به‌رى پتر ژ 200 سالان نه‌بت و پرسیارا مافێن خوه‌ نه‌كه‌ت، ئه‌ڤ حزبێن هه‌نێ و هه‌ر حزبه‌كا دى حوكمى ل هه‌رێمێ بكت، دێ به‌رده‌وام په‌رژه‌وه‌ندیێن خوه‌ یێن كه‌سۆكى و به‌رته‌نگ ب ناڤێ وى خه‌لكێ هه‌ژار و نه‌دار، ل ژێر درووشمێن قه‌به‌یێن كوردایه‌تیێ پارێزن و دێ كوردستانێ ل دووڤ حه‌زا خوه‌ به‌ره‌ڤ ئاقاره‌كى نه‌دیار بن و ئاڕیشه‌ نینه‌، كاره‌ساته‌كا دن ژكاره‌ساتێن (1975ـ 1988ـ2014) خرابتر ب سه‌رێ ملله‌تى بهێت؛ گرنگ ئه‌وه‌ هه‌ر ئالیه‌ك بشێت پتر بیرێن پترۆلێ و كۆمپانى و به‌رهه‌ماندنێ ب ده‌ستڤه‌ بینت… پرسیار ئه‌وه‌: ئه‌رێ هه‌كه‌ شۆڕه‌ش ل وه‌لاتێن نه‌هشیار و بێئیراده‌ دره‌وه‌كا ب شاخ نه‌بت دێ چ بت؟!

کۆمێنتا تە