كورد چ جارا نه‌بووینه‌ و نابنه‌ ئێك

كورد چ جارا نه‌بووینه‌ و نابنه‌ ئێك

21

هزره‌ك
كورد چ جارا نه‌بووینه‌ و نابنه‌ ئێك
د. ره‌شید فندی
ئه‌ڤه‌ ده‌مه‌كێ درێژه‌ پشتی هه‌لبژارتنێت په‌رله‌مانێ ئیراقێ، مشتومر و بگر و ڤه‌كێشه‌كا زێده‌ یا هه‌ی و داخواز تێته‌ كرن، كو هه‌می پارتێت كوردان و كوردستانیان ئێك هه‌لویست بگرنه‌ به‌ر و ب پرۆژه‌ بچنه‌ به‌غدا دا سه‌نگا وان زێده‌تر بیت، نه‌مازه‌ هژمارا وان یا كێم نینه‌ ل په‌رله‌مانی و دێ شێن كارێت باش كه‌ن، هه‌كه‌ !! ببنه‌ ئێك. لێ دیرۆكا مه‌ دیار كریه‌، كورد چ جارا نه‌بووینه‌ ئێك دا ڤێ جارێ ببن، له‌وما د بێژم ئه‌ڤ ڤه‌هێلانا كاری، یا بێ مفایه‌ و چو ئه‌نجامێت باش نابن. ل هه‌می دنیایێ وه‌سا یه‌، پارته‌ك یان دوو سێ پارته‌ك، ژ وان ئه‌وێت بسه‌ركه‌فتین، دێ بنه‌ ئێك و هه‌ڤپه‌یمانیێ كه‌ن بۆ كارێ پێكئینانا حكوومه‌تێ و یێت دی ئه‌ڤێت سه‌ركه‌فتن ب ده‌ستڤه‌نه‌ ئینای دێ بنه‌ ئۆپۆزوسیون. ل ده‌ف من سه‌یره‌، هه‌ر كه‌سه‌كێ ل ته‌له‌فزیۆنێ باخڤیت یان ل رۆژناما بنڤیسیت، دێ بێژیت هه‌كه‌ كورد ببنه‌ ئێك یان ئێك كوتله‌، نزا دێ چكه‌ن و چكه‌ن ؟ ئه‌ڤه‌ هه‌می راسته‌، به‌لێ پسیار ئه‌وه‌، ما كورد كه‌نگی بووینه‌ ئێك دا ڤێ جارێ ببنه‌ ئێك، مێژوویێ هه‌میێ بخوونن، و بێژن كا كورد كه‌نگی بووینه‌ ئێك؟ كیش رۆژێ كیش چه‌رخی كیش ده‌می، دا ڤێ جارێ ببنه‌ ئێك؟ بلا ئه‌م وه‌كی جڤاكه‌كێ شارستانی بین وه‌كی ڤێ دنیایێ هه‌میێ، پارتێت سه‌ركه‌فتی، مافێ هه‌ی حكوومه‌تێ پێكبینن یان كوتله‌یه‌كێ چێكه‌ن بۆ هه‌ڤپه‌یمانیێ د گه‌ل كوتلێت شیعا یان سوننا لبه‌غدا بۆ دانانا حكوومه‌تا ئیراقێ ویێت نه‌هێن ژی بكه‌یفا وانه‌ و د شێن ببنه‌ ئۆپۆزوسیۆن. بلا ئه‌م ژ بیر نه‌كه‌ین، ده‌مێ ئه‌م د بێژینه‌ هه‌می پارتا وه‌رن دا حكوومه‌تێ پێكڤه‌ درست كه‌ین، دێ وان ژی مه‌رجێت خۆ هه‌بن و دێ هه‌ست ب گرنگیه‌كا زێده‌ كه‌ن و دێ داخوازێت زێده‌ هه‌بن بۆ پشكداریێ د حكوومه‌تێدا و هه‌ر ئێك ژ وان دێ وێ وه‌زاره‌تێ وه‌كی ملكێ خۆ یان ملكێ حزبا خۆ هه‌ژمێریت. مه‌ ئه‌زموونا وێ پشكداریێ یا به‌ری نوك هه‌ی، سه‌ر ده‌مه‌كی هه‌ر وه‌زیره‌ك هه‌كه‌ پارتی با، جێگرێ وی د ڤیا ئێكه‌تی بیت و به‌رۆڤاژی و هه‌ر ئێك ژوان وه‌زاره‌ت بخۆ ڤه‌د كێشا و وه‌زاره‌ت تووشی ئیفلیج بوونێ د بوو و هه‌ڤوه‌لاتیێ ساده‌ د بوو قوربانی. ل بیرا منه‌ من وی ده‌می گۆتاره‌ك نڤیسی ومن گۆت حزباتیێ د وه‌زاره‌تا دا نه‌كه‌ن دا كارێت هه‌ڤوه‌لاتیا برێڤه‌ بچن و خه‌لك یی َژ وی گوتاری رازی بوو. له‌وما فه‌ره‌ پشتی هه‌لبژارتنێت 30 ی ئه‌یلوولێ ئه‌و دوو پارتێت ل هه‌لبژارتنا بسه‌ر د كه‌ڤن حكوومه‌تێ ئاڤا بكه‌ن و یێت دی ژی ببنه‌ ئۆپۆزوسیۆن. هه‌بوونا ئوپۆزوسیۆنێ ل هه‌ر جڤاكه‌كێ دیمۆكرات كاره‌كێ ساخله‌مه‌ و یێ فه‌ره‌ ژی، چنكی كارێ په‌رله‌مانی بگشتی چاڤدێریا كارێ حكوومه‌تێ یه‌، نه‌مازه‌ ئۆپۆزۆسیون. ئه‌گه‌ر ئه‌م چاڤه‌رێی هندێ بین كورد جاره‌كێ ببنه‌ ئێك، چو جارا نه‌ بووینه‌ ئێك ونابن ژی، لێ هه‌ر ده‌م هێزا بالا ده‌ست حوكمران بوویه‌، هێزا دی ژی یان ئۆپۆزوسیۆنا ئیجابی بوویه‌ یان سه‌لبی، هیڤیدارم ئۆپۆزۆسیۆنا مه‌ هه‌رده‌م ئیجابی بیت.

کۆمێنتا تە