هونه‌رمه‌ند و نڤێسه‌ر و حوكمه‌ت

هونه‌رمه‌ند و نڤێسه‌ر و حوكمه‌ت

19

كارزان فه‌قى

چه‌ند گرنگه‌ سه‌ركرده‌، سیاسه‌تڤان و لێزان بیت، ب هه‌مان شێوه‌ دڤێت و پێدڤیه‌ ژى ئابوورناس و بسپۆر بیت، چه‌ند ل سه‌ر ده‌ستهه‌لاتدارى پێدڤیه‌ شیره‌تكارێن سیاسى و ئابوورى ل ده‌وروبه‌رێن وى هه‌بن، دو جاران هنده‌ك ژى پێدڤیه‌ هونه‌رمه‌ند و هونه‌ر دۆست ل ده‌وروبه‌رێن وى هه‌بن، كه‌واته‌ ده‌ستهه‌لاتدار ب تنێ ئه‌و نینه‌ د سیاسه‌تێ و دبلۆماسیه‌تێ شاره‌زا و لێزان بیت، هه‌روه‌سائه‌و كه‌س نابنه‌ خزمه‌تكار كو ب ته‌نێ ژ سیاسه‌تێ بزانن و ب ته‌نێ سیاسه‌تڤانان ناس بكه‌ن، به‌لكو تاچ راده‌ ناڤێ سیاسته‌ڤانان ژبه‌ر كریه‌، ب هه‌مان شێوه‌ دڤێت ناڤێ به‌رهه‌مێن هونه‌رمه‌ند و نڤێسه‌ران ژى بزانیت، رۆهنتر بێژین، مه‌زاختنا بۆدجه‌ى بۆ چێكرنا جاده‌یه‌كێ ژ لایێ حوكمه‌تا هه‌رێمێ چه‌ند گرنگه‌، چاپكرنا په‌رتوكان و هاریكاریكرنا نڤێسه‌ر و هونه‌رمه‌ندان گرنگتره‌، د مه‌هه‌كێ دا سه‌رۆكێ حوكمه‌تێ چه‌ند گۆتارێن ئابورى دده‌ت، پێشوازى ل شاندێن چه‌ند وه‌لاتان دكه‌ت، گرنگه‌ دوجاران هنده‌ نڤێسه‌ر و هونه‌رمه‌ندان ژى ببینیت، له‌وار هیچ جهێ گازندێ نینه‌ سه‌رۆكێ حوكمه‌تێ پێشوازى ل گه‌نجه‌كێ سترانبێژى وه‌كو (نه‌ڤید زه‌رى) بكه‌ت. به‌لكو ئه‌و روودان ل ده‌ڤ هونه‌رمه‌ندان جهێ دلخوه‌شیێ بوو، بۆ ڤێ یه‌كێ و سه‌رۆكێ حوكمه‌تا هه‌رێمێ مه‌ گه‌له‌ك نموونه‌ هه‌نه‌، ل ئكتۆبه‌را بۆرى فلمه‌ فه‌ستیڤالا نێڤ ده‌وله‌تییا سلێمانێ هاته‌ كرن و 75% مه‌زاختیێ وێ فه‌ستیڤالێ ژلایێ سه‌رۆكێ حوكمه‌تێ نێچیرڤان بارزانى ڤه‌ هاته‌ دابینكرن، ئاخر ئه‌گه‌ر ئه‌م ب شێوازه‌كێ دى هزر بكه‌ین، دكارین بێژین ئه‌و كوژمێ بۆ فلمه‌ فه‌ستیڤالا ناڤده‌وله‌تیا سلێمانێ هاتیه‌ مه‌زاختن مه‌ دكارى ژ بۆ فلانه‌ گوندى فوتابخانه‌یه‌كێ دابین ئاڤا بكه‌ین، لێ راست و دروستتر ئه‌وه‌ كو ئه‌م چه‌ند پێدڤى ب قوتابخانه‌یان بین، دو جاران هنده‌ ژى مه‌ پێدڤى ب سینه‌ما و هونه‌ر و نڤێسه‌ران هه‌نه‌. دیده‌ڤانێن گرنگیدانا سه‌رۆكێ حوكمه‌تا هه‌رێمێ ب بیاڤێ هونه‌رى و هونه‌رمه‌ند و نڤێسه‌ران گه‌له‌كن، د پرتووكا 101 رۆژ ته‌نیایى هه‌لۆ شێركۆ بێكه‌سی كو به‌حسێ سێ هه‌یڤێن نه‌خوه‌شبوونا نڤێسه‌رێ كورد شێركۆ بێكه‌س دكه‌ت، زۆر ب ئاشكه‌رایى په‌سنا سه‌رۆكێ حوكمه‌تێ دكه‌ت كو هیچ ده‌مه‌كى ل ده‌مێ نه‌خوه‌شبوونا بابێ وى، ئه‌و ب ته‌نێ نه‌هێلاینه‌ و به‌رده‌وام ل سه‌ر هێلێ بوویه‌ و سلامه‌تیا شێركۆ بێكه‌سی خواستیه‌ و به‌رهه‌ڤیا هه‌موو تشته‌كى نیشادایه‌، ل ڤێرێ نڤێسه‌رێ پرتووكێ ل هه‌مبه‌ر په‌سنا نێچیرڤان بارزانى، گازنده‌یان ژ سه‌ركرده‌ و سیاسیێن سلێمانى و ئێكه‌تیێ دكه‌ت كو سه‌ره‌راى خه‌باتا شاخ یا شێركۆ بێكه‌سی، لێ سه‌ركرده‌یێن ئێكه‌تیێ ل ده‌مێ نه‌خوه‌شبوونا شێركۆبێكه‌سی هیچ پرسه‌ك ژ وان نه‌كریه‌. بۆ نها ژى نموونه‌یه‌كێ زندى و نوو هه‌یه‌، ئه‌و پرسا نه‌خوه‌شبوونا هونه‌رمه‌ندێ كۆمێدیێ ده‌ڤه‌ران به‌هدینان (خه‌لیل قه‌دشی) ـه‌، ره‌وشا وى یا ساخله‌میێ تێكچوویه‌ و ل رۆژێن بۆرى ژى سه‌رۆكێ حوكمه‌تا هه‌رێمێ ئه‌ركێ چاره‌سه‌ركرنا نه‌خوه‌شیا وى و هنارتنا وى بۆ ده‌رڤه‌ى وه‌لاتى ب ستۆیێ خوه‌ڤه‌ گرت، ئه‌ڤه‌ وێ ئێكێ دگه‌هینیت كوچه‌ن گرنگ و پێدڤیه‌ پرسا مووچه‌یێ مامۆستایان بهێته‌ چاركرن، ب هه‌مان شێوه‌ هه‌ول دده‌ت هونه‌ر و هونه‌رمه‌ند و نڤێسه‌ر بێ كێماسی و پر چالاكى بن.

کۆمێنتا تە