NO IORG
Authors Posts by عه‌بدولعه‌زیز محسن

عه‌بدولعه‌زیز محسن

عه‌بدولعه‌زیز محسن
6 POSTS 0 COMMENTS

10

عبدالعزیز محسن بارزانى
رێنجبه‌ر جمیل
• پشكا حه‌فتێ:
پۆلینكرنا ده‌ستهه‌لاتان ده‌ستنیشانكرنا ئه‌رك و رۆلێ هه‌ر ده‌ستهه‌لاته‌كێ ژ بۆى خزمه‌تكرنا به‌رژه‌وه‌ندیا گشتى نه‌كاره‌كێ هندێ ب ساناهى یه‌ ، لێ ئه‌گه‌ر ب پلان و به‌رنامه‌ هه‌ر ده‌ستهه‌لاته‌ك ل دووڤ پێدڤى و داخوازیێن خه‌لكى به‌رنامێ خوه‌ دارێژیت، هه‌لبه‌ت دێ پێگڤه‌ گرێدانه‌ك د ناڤبه‌را وێ ده‌ستهه‌لاتێ و خه‌لكى دا دروست بیت، به‌لێ ب مخابنى ڤه‌ د ڤى چارچووڤه‌ى دا هزر وه‌كو پێدڤى ل سه‌ر نه‌ هاتیه‌كرن ژبه‌ر هندێ باراپترى ده‌ستهه‌لاتان وه‌كى خوه‌ بخو كار دكه‌ن، له‌ورا هه‌رده‌م دووراتیه‌ك د ناڤبه‌را وان و خه‌لكى دا هه‌یه‌ ده‌مێ دووراتى هه‌بیت كێماسى په‌یدا دبن ده‌مێ كار ل سه‌ر كێماسیان نه‌هێته‌كرن دبنه‌ ئاریشه‌ ده‌مێ ئاریشه‌ نه‌هاته‌ كونترۆلكرن چ سنۆر نامینن و هه‌ر ئێك وه‌كى خوه‌ ره‌فتارێ دكه‌ن دوى ده‌مى دا هه‌مى ده‌ستهه‌لات هه‌مى خه‌لك پێگڤه‌ زه‌ره‌رمه‌نده‌ مه‌ دڤێت به‌حسێ رێزبه‌ندیا ده‌ستهه‌لاتان بۆ هه‌وه‌ دیار بكه‌ین.
1ـ ده‌ستهه‌لاتا یاسا دانانێ.
2ـ ده‌ستهه‌لاتا جێ به‌جێكرنێ.
3ـ ده‌ستهه‌لاتا دادوه‌ریێ.
4ـ ده‌ستهه‌لاتا راگه‌هاندنێ.
5ـ ده‌سهه‌لاتا رێكخراو و كۆمه‌لێن مه‌ده‌نى.
نوكه‌ مه‌ دڤێت ل سه‌ر سێ ده‌ستهه‌لاتان پاسێ بده‌ین و ده‌رباز ببین و به‌حسێ ده‌ستهه‌لاتا چارێ بكه‌ین ده‌ستهه‌لاتا چارێ ژى دهێته‌ دابه‌شكرن و پۆلینكرن ل سه‌ر ئه‌ڤێن ل خوارێ.
1ـ روژنامه‌ و گوڤار واته‌ خواندن.
2ـ تله‌ڤزیون واته‌ دیتن.
3ـ رادیۆ واته‌ بیستن.
4ـ سوشیال میدیا واته‌ تورێن جڤاكى.
هه‌كه‌ بهێت هه‌ر ئێك ژ ڤانه‌ ئه‌م ل سه‌ر براوه‌ستین ره‌نگه‌ هه‌ر ئێكى پێدڤى ب چه‌ند گۆشه‌ و گۆتاران هه‌بیت داكو بشێن خالێن ب هێز و لاواز د ناڤ هه‌ر ئێك ژڤانه‌ ده‌ستنیشان بكه‌ین خالێن ب هێز په‌رجان بكه‌ین خالێن لاواز ل چاره‌سه‌ریان بگه‌رین، چونكو ده‌ستهه‌لاتا چارێ كاریگه‌رى و كارتێكرنه‌كا ئێكجار مه‌زن ل سه‌ر هزر و هه‌ست و ره‌فتارێن هه‌ر تاكه‌كه‌سه‌كى هه‌یه‌، ژ به‌ر هندێ ژى دڤێت هه‌مى ده‌مه‌كى گه‌له‌ك ب باشى بزانن.
دێ چاوا ئه‌و مادێن ل به‌ر ده‌ستێ وان ئاراسته‌ى رایا گشتى كه‌ین؟
وه‌ دێ چاوا هزر د وێ چه‌ندێ دا كه‌ن كو بابه‌ت و پرسێن نه‌ته‌وه‌یى و نشتیمانى ژێكجودا كه‌ن؟
وه‌ دێ چاوا به‌رژه‌وه‌ندیا گشتى ل به‌رچاڤ گرن نه‌خاسمه‌ د بابه‌ته‌كێ مینا ریفراندۆم به‌ر ب سه‌ربه‌خوه‌یا كوردستانێ؟
نوكه‌ ئه‌ز وه‌كو عه‌بدولعه‌زیز دێ ڤان پرسیاران ئاراسته‌ى كاك رێنجبه‌رى كه‌م بۆ هندێ هێشتا بابه‌ت ب هزر و بۆچوونێن جودا جودا بهێته‌ زه‌نگینكرن و شرۆڤه‌كرن داكو خوانده‌ڤان ژى بابه‌تى زێده‌تر ل سه‌ر هزره‌كێ بخوینیت و وه‌ربگریت.
پ 1/كاك رێنجبه‌ر تو وه‌كو مامۆستایه‌كێ زانكۆیێ شاره‌زا د وارێن یاسایى دا تو رۆلێ ده‌ستهه‌لاتا چارێ چاوا دبینى؟
رێنجبه‌ر: هه‌لبه‌ته‌ هه‌ر ده‌ستهه‌لاته‌كێ رۆل و ئه‌ركێ خوه‌ هه‌یه‌ ده‌ستهه‌لاتا چارێ ژى كو ل سه‌ر میدیایێ ب گشتى هاتیه‌ په‌سه‌ندكرن دڤێت ئه‌ڤ ده‌ستهه‌لاته‌ هه‌مى ده‌مه‌كى د خزمه‌تا به‌رژه‌وه‌ندیا گشتى دا بیت و هه‌ول بده‌ت ببیته‌ پره‌كا راستگۆیى و وێره‌كیێ د ناڤبه‌را خه‌لكى و ده‌ستهه‌لاتێ دا، چونكو ده‌ستهه‌لاتا چارێ دشێت راسته‌وخوه‌ و نه‌راسته‌وخوه‌ بچیته‌ د ناڤ هه‌ر ماله‌كێ دا و كاریگه‌ریێ و كارتێكرنێ ل مه‌ژیێ هه‌ر تاكه‌كه‌سه‌كى بكه‌تن، ژ به‌ر هندێ دڤێت هه‌ر روودانه‌ك و پێشهاته‌كێ ب درۆستى هه‌لسه‌نگینیت و یا پێدڤى و پێدڤیتر د به‌رژه‌وه‌ندیا گشتى دا بۆ بكه‌ت، نه‌خاسمه‌ هه‌كه‌ پرسه‌كا نشتیمانى هاته‌ پێش نموونه‌ بۆ ڤێ چه‌ندێ میدیا دڤێت بۆ پرسا ریفراندۆم به‌ر ب سه‌ربه‌خوه‌یا كوردستانێ د وى ئاستێ به‌رپرسیاره‌تیێ دا بیت و ئه‌ڤێ پرسا نشتیمانى ب راستگۆیى یا نه‌ و شه‌فافانه‌ ڤه‌گوهێزیت.
پ 2/كاك رێنجبه‌ر چ ئه‌رك دكه‌ڤیته‌ سه‌ر ملێن ده‌ستهه‌لاتا چارێ كو میدیایه‌ بۆ هندێ گرنگیا پرسا ریفراندۆمێ بۆ خه‌لكى شرۆڤه‌ بكه‌ت؟
رێنجبه‌ر: كاك عه‌بدولعه‌زیز د رستا پرسیارێ دا تو دبێژى (گرنگیا) پرسا ریفراند‌ومێ واته‌ ئه‌ڤ پرسه‌ پرسه‌كا گه‌له‌ك گرنگه‌ ، له‌ورا ژى دڤێت میدیا دچارچووڤێ گرنگیا ڤێ پرۆسێ دا گه‌له‌ك ب گرنگى ئه‌ڤێ پرسێ بۆ هه‌مى ته‌خ و چینان شرۆڤه‌ بكه‌ن و د رێیا خه‌لكێ شاره‌زا و بسپۆرێن تایبه‌تمه‌ندێن جودا جودا ئه‌ڤێ پرسێ د رێیا ریپۆرتاژ و مێزگه‌ردێن خوه‌دا بۆ خه‌لكى ئه‌وا پێدڤى بكه‌ت وى ده‌مى دێ ب دروستى ژى ئه‌رك و رۆلێ میدیایێ دیار بیت و به‌رچاڤ بیت وه‌ خه‌لك دێ خوه‌ د ناڤ میدیایێ دا بینن پاشى دێ پێگڤه‌ گرێدانه‌ك د ناڤبه‌را خه‌لكى و ده‌ستهه‌لاتێ دا دروست بیت ئه‌گه‌رێ سه‌ره‌كى ده‌ستهه‌لاتا چارێ و میدیایه‌.
دووماهی ئه‌م پێگڤه‌ گه‌هشتینه‌ وى ئه‌نجامى كانێ گرنگیا ده‌ستهه‌لاتا چارێ چى یه‌ و هه‌كه‌ بڤێت دشێت چ رۆل بگێریت و ئه‌و رۆلێ دگێریت دێ چاوا كارتێكرنێ ل بارا پترى تاك و جڤاكى كه‌ت واته‌ ده‌ستهه‌لاتا چارێ ب هه‌مى رێك و میكانزمێن خوه‌ڤه‌ دشێت كاریگه‌ریه‌كا ئێكجار مه‌زن هه‌بیت نه‌خا سمه‌ د پرۆسه‌یه‌كا مینا ریفراندۆم به‌ر ب سه‌ربه‌خوه‌یا كوردستانى،َ چونكو دڤێت هه‌مى لایه‌ك ژ قووناغا ئاخفتن و تیۆرى ده‌رباز ببن بۆ قووناغا كریار و پراكتیكى و بۆ ڤێ چه‌ندێ میدیا دشێت كار ئه‌كته‌ره‌ك گه‌له‌ك كاریگه‌ر بیت دڤێ پرۆسا نشتیمانى دا داكو ئه‌و ژى بشێت بچیته‌ د ده‌رگه‌هێ سه‌رفه‌رازیێ دا نوكه‌ ب تنێ یا ماى ببێژین به‌لێ هزار جاران به‌لێ بۆ ریفراندۆم به‌ر ب سه‌ربه‌خوه‌یا كوردستانێ.

13

پشكا پێنجێ ـ رۆلێ پێشمه‌رگه‌ى
پێشمه‌رگێ دوهى ل سه‌ر ئاستێ كوردستانێ ناڤه‌كێ گه‌له‌ك مه‌زن و گرنگ و پیرۆز بوو، لێ قاره‌مانى و به‌رخودان و خۆگوریكرن ئیراده‌ و باوه‌ریا وى وه‌لێ كر كو ب ناڤوده‌نگیا وى سنۆرێن كوردستانێ و عیراقێ رۆژهه‌لاتا ناڤین ده‌رباز بكه‌ت بۆ هه‌موو جیهانا ئازاد و ئه‌ڤرۆكه‌ ده‌مێ ل باژێره‌كێ ئه‌ورۆپى ل باژێره‌كێ ئه‌مریكى ئێك دبێژیت ئه‌ز پێشمه‌رگه‌ مه‌ خه‌لكێ بیانى ب گرنژینڤه‌ و عه‌شقه‌كا زێده‌ وێنه‌ و سێلفیان ل گه‌ل دگرن، چونكو پێشمه‌رگێ كوردستانێ ل پێش هه‌موو مرۆڤێن ئازادى خواز جیهانا ئازاد به‌رگرى ل مرۆڤ دین ئاین پێكهات و مرۆڤاتیێ كر وه‌ شیا رێكخراوا تیرۆرستیا داعش ئه‌وا هه‌موو جیهان تووشى له‌رزۆكێ كرى ب كارێن خوه‌ یێن دڕندانه‌، به‌لێ پێشمه‌رگه‌ى ئه‌و راوه‌ستاندن ژناڤبرن ئه‌ستۆره‌یا وان تێك شكاند پێشمه‌رگه‌ ب بیروباوه‌رێن خوه‌ ب چه‌كه‌كێ گه‌له‌ك سڤك ب پوستالێن خوه‌ یێن پیرۆز داعش هزرا داعش بۆ داعشیا بۆ هه‌موو جیهانا ئازاد بنئاخكرن، دوهى رۆلێ پێشمه‌رگێ كوردستانێ د شه‌ڕێن پارتیزانى دا د بزاڤا رزگاریخوازا گه‌لێ كورد و خه‌لكێ كوردستانێ دا شیا به‌عسیا بنئاخ بكه‌ت، ئه‌ڤرۆكه‌ ژى پێشمه‌رگێن كوردستانێ یێن بووینه‌ ناڤوده‌نگ و ره‌نگه‌كێ نیڤ ده‌وله‌تى كو د ناڤه‌ندێن بریاردانێ دا به‌حس ل سه‌ر قاره‌مانیا وان دهێته‌كرن، به‌لێ هێشتا رۆلێ وان تمام نه‌بوویه‌ ئه‌ڤرۆكه‌ ژى ئه‌م چاڤه‌رێ دكه‌ین نه‌ به‌س ب لویلیا تڤه‌نگا خوه‌ ب خوین رێتنا خوه‌ ب قه‌هره‌مانیا خوه‌ ب به‌رخودانا خوه‌، به‌لكو بتنێ ب ده‌نگێ خوه‌ ببێژن به‌لێ بۆ ریفراندۆما سه‌ربه‌خوه‌یا كوردستانێ دێ سنۆرێن كوردستانێ هێنه‌ ده‌ستنیشانكرن دێ ناسناما كوردستانێ هێته‌ دیاركرن دێ پارێ كوردستانێ هێته‌ دیاركرن دێ پاسپۆرتا كوردستانێ هێته‌ دیاركرن، دێ كوردستان ل پرا بچووكیێ تورك فارس عه‌ره‌ب ده‌رباز بیت دێ كه‌رامه‌تا خه‌لكێ كوردستانێ هێته‌ زڤراندن دێ ب ده‌نگێ خوه‌ كوردستان ل هه‌موو گورگێن درنده‌ هێته‌ پاراستن و هه‌كه‌ پێشمه‌رگه‌ نه‌بن، دێ گورگ خه‌لكێ كوردستانێ خۆن ژ به‌ر هندێ بۆ زێده‌تر رۆنكرن و شرۆڤه‌كرنا ئه‌ڤى بابه‌تى ئه‌ز وه‌كو عه‌بدولعه‌زیز دێ ڤان پرسیاران ئاراسته‌ى كاك رێنجبه‌رى كه‌م داكو هێشتا بابه‌تى شرۆڤه‌ بكه‌ت.
پ 1/ كاك رێنجبه‌ر تو رۆلێ پێشمه‌رگێ كوردستانێ د پرۆسا ریفراندۆما سه‌ربه‌خوه‌یا كوردستانێ دا چاوا دبینى؟
رێنجبه‌ر: به‌لێ گومان تێدا نینه‌ كو ئه‌گه‌ر پێشمه‌رگه‌ نه‌بان ئه‌ڤ بارودۆخێ نوكه‌ دروست نه‌دبوو ئه‌گه‌ر پێشمه‌رگه‌ نه‌بان بویك و زاڤایه‌ك نه‌دشیان شه‌هیانا خوه‌ بكه‌ن، زارۆ نه‌دشیان بچنه‌ قوتابخانان نه‌ساخ نه‌دشیان بچنه‌ نه‌خۆشخانان، خه‌لك ب گشتى پێكهاتێن دینى نه‌ته‌وه‌یى نه‌دشیان مومارسا بیره‌وه‌ریێن خوه‌ یێن ئاینى و نه‌ته‌وه‌یى بگێرن خه‌لك ب گشتى نه‌دشیا ژیانێ به‌رده‌وام بكه‌ن، چونكو پێشمه‌رگه‌ى هه‌موو پێكڤه‌ دپاراستن به‌ره‌ڤانى ل كوردستانێ و ل هه‌موو كوردستانیان دكر، لێ ئه‌ڤرۆ ژى پێشمه‌رگه‌ دشێت ب ده‌نگێ خوه‌ كو به‌لێ یا وى ل لیلیا تڤه‌نگا وى گه‌له‌ك شرینتر بیت و ببێژیت به‌لێ و سه‌د جارا به‌لێ بو ریفراندوما سه‌ربه‌خویا كوردستانێ.
پ 2/ باشه‌ پێشمه‌رگه‌ بتنێ دشێت بێژیت به‌لێ بو ریفراندومێ یان دشێت هێشتا رول هه‌بیت؟
رێنجبه‌ر: به‌لێ نه‌ بتنێ ب ده‌نگدانێ دێ رولێ هه‌ر تاكه‌ كه‌سه‌كى ب دوماهیك هێت نه‌خاسمه‌ پێشمه‌رگێن كوردستانێ ، به‌لكو ژبلى ده‌نگدانێ چونكه‌ پێشمه‌رگه‌ یێ پیروزه‌ خه‌لك ب پیروزى به‌رێ خو دده‌نێ ئه‌وى كارتێكرنه‌كا پیروزا هه‌ى ل سه‌ر خه‌لكى ، له‌ورا دڤێت پێشمه‌رگه‌ بێژیته‌ هه‌موو پێكهاتێن كوردستانێ ئه‌ز ب تڤه‌نگا خو توژى ب ده‌نگێ خو ئه‌م هه‌ردووك پێگڤه‌ بو دروستكرن و راگه‌هاندنا ده‌وله‌تا كوردستانێ .
دوماهیك ئه‌ز و رێنجبه‌ر گه‌هشتینه‌ ئه‌وێ باوه‌ریێ كو پێشمه‌رگێ كوردستانێ دشێت روله‌كێ ئێكجار مه‌زن بگێریت بو پرۆسا ریفراندوما سه‌ربه‌خویا كوردستانێ وه‌كو چاوا پێشمه‌رگه‌ى رول گێرا قاره‌مانى نیشا دا بو ناڤه‌كێ جیهانى دروو ب روو بوونا شه‌رێ داعش دا وه‌ بو ئه‌گه‌رێ هندێ كو هه‌موو خه‌لك بێژیت ئه‌م هه‌موو پێشمه‌رگه‌ینه‌ ،له‌ورا نوكه‌ژى داخواز ل هه‌موو خه‌لكى دهێته‌كرن ببێژن به‌لێ بۆ ریفراندوما سه‌ربه‌خویا كوردستانێ.

 

پشكا شه‌شێ: رۆلێ شۆفێرێن ته‌كسی
درووشمه‌ك هه‌یه‌ دبێژن (السیاقه‌ فن و زوق و الأخلاق) هه‌كه‌ هه‌ر مرۆڤه‌ك نه‌خاسمه‌ ئه‌وێ شۆفێر بیت و ترومبێلێ بهاژۆت، دڤێت گه‌له‌ك ب هویرى و ب كویرى ب باوه‌رى هزرا خوه‌ د ڤى درووشمى دا بكه‌ت، په‌یڤ بۆ په‌یڤێ رامانا وێ بزانیت و ببیته‌ پشكه‌ك ژ ژیانا وى، بۆ نموونه‌ دڤێت شۆفێر بزانیت كانێ شۆفێرى چى یه‌، نه‌خاسمه‌ شۆفێرێ (ته‌كسیێ) ته‌كسى و شۆفێرێ وێ، دو لایه‌نێن پێكڤه‌گرێداینه‌ د هه‌مان ده‌م دا، هه‌كه‌ وان بڤێت بۆ ژیانێ دئه‌رێنى بن دشێن رۆله‌كێ گه‌له‌ك مه‌زن و كارا بگێرن هه‌كه‌ وان بڤێت دێ شێن بنه‌ كار ئه‌كته‌ره‌كێ گه‌له‌ك كارا بۆ سه‌رخستنا هه‌ر پرۆسه‌كێ د ژیانا مرۆڤاتیێ دا، چونكو ته‌كسیێ و شۆفێرێ ته‌كسیێ پێكڤه‌گرێدانه‌كا راسته‌وخوه‌ ل گه‌ل خه‌لكى، هه‌یه‌ ژ به‌ر هندێ شۆفێرێ ته‌كسیێ بۆ پرۆسا ریفراندۆما سه‌ربه‌خوه‌یا كوردستانێ ژى دشێت رۆله‌كێ ئێكجار مه‌زن بگێریت و ب هه‌مى قووناغێن پرۆسێ مینا گرنگیا پرۆسێ، هشیاریا خه‌لكى، هاندانا خه‌لكى، ده‌نگدانا خه‌لكى ب به‌لێ، دا كو شۆفێرێ ته‌كسیێ ژى وه‌كو هه‌ڤوه‌لاتیه‌كێ كارا د چارچووڤێ هه‌ستكرن ب به‌رپرسیاره‌تیێ بۆ خزمه‌تا گه‌ل و نیشتمانێ خوه‌ ناڤێ خوه‌ د مێژوویا سه‌رفه‌رازیێ دا تۆمار بكه‌ت، بۆ هندێ جاره‌كا دى بیرا هه‌مى خوانده‌ڤانان ل درووشمێ سه‌رى بینینه‌ ڤه‌، دێ چاوا شۆفێرێ ته‌كسیێ ب ره‌نگه‌كێ هونه‌رى رۆل هه‌بیت د پرۆسا ریفراندۆما سه‌ربه‌خوه‌یا كوردستانێ دا؟.
دێ چاوا ب ره‌نگه‌كێ زه‌وقى رۆل هه‌بیت د پرۆسا ریفراندۆما سه‌ربه‌خوه‌یا كوردستانێ دا، دێ چاوا ب ره‌نگه‌كێ ئه‌خلاقى رۆل هه‌بیت دپرۆسا ریفراندۆما سه‌ربه‌خوه‌یا كوردستانێ دا.
ده‌مێ شۆفێرێ ته‌كسیێ ئه‌ڤێ چه‌ندێ ب ئه‌ركێ خوه‌ بزانیت دێ شێت رۆلێ خوه‌ ژى ب سه‌ركه‌فتیانه‌ گێریت وه‌ دێ شێت ئه‌وى درووشمى سه‌د ژ سه‌دێ جێ به‌جێكه‌ت بۆ هندێ بابه‌ت زێده‌تر بهێته‌ زه‌نگینكرن دێ نوكه‌ ڤان پرسیارێن ل خوارێ ئاراسته‌ى كاك رێنجبه‌رى كه‌م:
پ1/ رێنجبه‌ر تو رۆلێ شۆفێرێ ته‌كسیێ چاوا دبینى بۆ ڤێ پرۆسێ؟
رێنجبه‌ر: هه‌لبه‌ت هه‌ر تاكه‌ كه‌سه‌كى، هه‌كه‌ بڤێت دێ شێت رۆله‌كێ گه‌له‌ك مه‌زن و كاریگه‌ر گێریت نه‌خاسمه‌، د روودان و پێشهاتێن نیشتمانى نه‌ته‌وه‌یى دا به‌رژه‌وه‌ندیا گشتى شۆفێرێ ته‌كسیێ ژى ئێك ژ وان تاكه‌ كه‌سانه‌ كو رۆژانه‌ دانوستاندنێ ل گه‌ل چه‌ندین ته‌خوچینێن جودا جودا دكه‌ت وه‌ ل جهێن جودا جودا، ژ به‌ر هندى دشێت رۆله‌كێ ئێكجار مه‌زن بگێریت د هه‌مان قووناغێن پرۆسێ دا.
پ2/باشه‌ چاوا رۆلێ خوه‌ بگێریت بۆ هندێ به‌رچاڤ رۆنى ل ده‌ڤ په‌یدا بیت دێ یێ سه‌ركه‌فتى بیت؟
رێنجبه‌ر: بێگومان گه‌له‌ك رێك و ئالاڤ و ئامراز میكانزم هه‌نه‌ ژ وان.
1ـ شێوازێ ئاخفتن و سه‌ره‌ده‌ریكرنێ.
2ـ پێشكێشكرنا پۆسته‌ر و پروشۆران.
3ـ هه‌لكرنا ستران و ڤیدیۆیان.
4ـ گه‌هاندنا خه‌لكى ب خۆبه‌خشانه‌.
5ـ نڤیسینا درووشمێن به‌لێ بۆ ریفراندۆمێ د ناڤ ته‌كسیێ دا و ل سه‌ر جهێن جودا جودا.
ئه‌ڤه‌ هه‌مى هنده‌ك رێكن گه‌له‌كێن دژى هه‌نه‌ كو دشێت رۆلێ خوه‌ بگێریت.
دووماهیك وه‌سا دیاره‌ ئه‌ز و رێنجبه‌ر پێكڤه‌ گه‌هشتینه‌ ئه‌وێ باوه‌ریێ كو هه‌مى مرۆڤان هه‌ر تاكه‌ كه‌سه‌كى هه‌ر ته‌خه‌كا جودا جودا د ناڤ سه‌كته‌رێن جودا جودا دا دشێت باشترین رۆل بگێریت و هه‌بیت د پرۆسا ریفراندۆم به‌ر ب سه‌ربه‌خوه‌یا كوردستانێ شۆفێرێن ته‌كسیێ ژى ئێك ژ وان كار ئه‌كته‌رێن گه‌له‌ك كارایه‌ و دشێت رۆله‌كێ ئێكجار مه‌زن بگێریت بۆ ڤێ پرۆسا نیشتمانى گرێدایى ژیان و ژیار و كه‌رامه‌تا مرۆڤێ كورد و كوردستانى، ژ به‌ر هندێ شۆفێرێ ته‌كسیێ مه‌ بو ته‌ رۆلێ ته‌ ده‌ستنیشانكر، تو ژى بێژه‌ (یاالله‌) زه‌ندوباسكان لێ هه‌لبكه‌ و ناڤێ خوه‌ د دیرۆكا سه‌رفه‌رازیێ دا تۆمار بكه‌.

12

 

• پشكا سیێ:
ئافره‌ت دهێته‌ نیاسین كو نیڤا جڤاكى یه‌ ، لێ چالاكڤانێن مافێن ئافره‌تان دبێژن نیڤا دى ژى هه‌ر ل سه‌ر ملێن وانه‌ ژبه‌ر هندێ نوكه‌ هه‌ر دو نیڤ دێ چاوا ئافره‌تا كوردستانێ ب هه‌موو پێكهاتێن خوه‌ یێن ئایینى نه‌ته‌وه‌یى ڤه‌ دێ شێن بنه‌ ئه‌و كار ئه‌كته‌ر كو ب دروستى رۆلێ خوه‌ د پرسا ریفراندۆم به‌ر ب سه‌ربخوه‌بوونا كوردستانێ بگێرن، داكو هه‌ردو لایه‌ن ب دروستى ب به‌ر ئافره‌تێ بكه‌ڤن ئه‌وا دبێژن ئافره‌ت نیڤا جڤاكى یه‌ نیڤا دى ژى هه‌ر ل سه‌ر ملێن وێ یه‌ ژبه‌ر هندێ بانگه‌وازیا مه‌ بۆ ئافره‌تا خویشك و ئافره‌تا دایك ئافره‌تا خێزان ئافره‌تا خوانده‌ڤان ئافره‌تا نه‌خوانده‌ڤان ئافره‌تا پله‌دار ئافره‌تا نه‌ پله‌دار ئافره‌تا دمالێ ڤه‌ هه‌موو پێگڤه‌ دێ چاوا شێن ئه‌وى رولى گێرن كو نه‌ ب تنێ ئه‌و پشكداربن د پرسا ریفراندومێ دا، به‌لكو دێ چاوا شێن هه‌موو جڤاكى پێگڤه‌ هانده‌ن داكو ببنه‌ پشكه‌ك ژ پشكداریا ریفراندۆم به‌ر ب سه‌رخه‌بوونا كوردستانێ دا، داكو ب دروستى رۆلێ وێ ئافره‌تا دوهى ب نان و پارزینكا خوه‌ خزمه‌تا پێشمه‌رگه‌ى دكر ئه‌و ئافره‌تا نامێن پێشمه‌رگه‌ى د گه‌هاندنه‌ رێخستنێن نه‌هێنیێن ناڤ باژێرى ئه‌و ئافره‌تا بابێ خوه‌ ل پێناڤى كوردستانێ ژ ده‌ست داى ئه‌و ئافره‌تا برا و زه‌لام و كورێ خوه‌ ل پێناڤى رزگاریا كوردستانێ ژ ده‌ست داى ئه‌ڤرۆ نه‌هێله‌ جاره‌كا دى هه‌ر ئه‌و ئافره‌ت به‌رى ته‌ پشكداریێ د ڤێ پرۆسێ دا بكه‌ت، به‌لكو رۆلێ ته‌یه‌ ده‌ستێ وێ بگرى وێژى ل گه‌ل خوه‌ ببه‌ى داكو دوهى یا وێ ئه‌ڤرۆیا ته‌ سوبه‌هیه‌كا باش و گه‌ش تۆمار بكه‌ت دێ ئه‌ڤى بابه‌تى د رێیا ڤان پرسیاران دا هێشتا ئازرینم ل گه‌ل برایێ خوه‌ كاك (رێنجبه‌ر جه‌میل).
پ 1/ژبلى ئه‌ڤا مه‌ گۆتى چ دى پێدڤى یه‌ ئافره‌ت بكه‌تن؟
رێنجبه‌ر: ب خۆشحالى ڤه‌ ئافره‌تا كوردستانێ جێواز ژ هه‌موو ئافره‌تێن جیهانێ د لۆتكا په‌روه‌ردێ ره‌وشت پاكیێ دا هه‌یه‌ ل سه‌ر ده‌مێن سه‌ختێن بزاڤا رزگاریخوازا گه‌لێ كوردستانێ مل ب ملێ زه‌لامى خه‌بات كریه‌ نموونه‌یا ئافره‌تا كوردستانێ بوویه‌ جهێ سه‌رسورمانا مه‌زنا سه‌ركردێن وه‌لاتێن جیهانێ، له‌ورا بێگومان د پرسا ریفراندۆمێ دا ئافره‌تا كوردستانێ دێ رۆلێ خوه‌ گێریت تایبه‌ت د هاندانا گه‌نجان دا ژبۆ سه‌ر سندوقێن ده‌نگدانێ هه‌لبژارتنا سه‌ربه‌خوه‌یێ و هه‌روه‌سا ئافره‌ت دێ دوپات كه‌ت پشكداریا خوه‌ كو رێژه‌یا نیڤا جڤاكى پێك دهێت ئه‌ڤێ پرسێ ب به‌لێ خوه‌ ئێكلا كه‌ت.
پ2/ مامۆستا رێنجبه‌ر تو رۆلێ ئافره‌تا خوانده‌ڤان چاوا دبینى یان ب رامانه‌كا دى ئه‌ركێ ئافره‌تا خوانده‌ڤان چى یه‌ بۆ هاندانا ئافره‌تا نه‌خوانده‌ڤان و ئافره‌تا د مالێ دا،داكو پشكداریێ د ڤێ پرۆسێسسێ دا بكه‌ت؟
رێنجبه‌ر: وه‌كو مه‌ ل سه‌رى ئاماژه‌ ب رولێ ئافره‌تا كوردستانێ كرى د دیرۆكێ دا كو مل ب ملێ زه‌لامى ڤه‌ دپرسێن نیشتمانى دا خه‌بات دكر وه‌ ژبه‌ر سته‌م و زۆرداریا رژێمێن به‌غدا زۆربه‌یا ڤان ئافره‌تان ده‌رفه‌تا خواندنێ بۆ نه‌ ره‌خسا بوو، لێ هشیاریا وان یا نیشتمانێ د ئاسته‌كێ هه‌ره‌ بلند دا بۆ ئه‌نجامێ خه‌باتا وان ئه‌ڤرۆ ب سه‌دان ئافره‌تێن خوانده‌ڤان د ناڤ جڤاكى كوردستانێ دا هاتنه‌ به‌رهه‌م، له‌ورا فه‌ره‌ ل سه‌ر ڤێ ئافره‌تا خوانده‌ڤان د ئاستێ به‌رپرسیاره‌تیێ دا بیت و بشێت ئه‌ڤ كاروانێ ده‌یكا وێ یا پێشمه‌رگه‌ رێخستى بشێت به‌رده‌وامیێ بده‌تێ هه‌روه‌سا فه‌ره‌ ل سه‌ر راستیا ئه‌ڤى بابه‌تى ب شێوه‌كێ زانستى ئه‌كادمى بۆ وان رۆنكه‌ته‌ ڤه‌ و هه‌ردو ئافره‌ت مل ب ملێ ئێك به‌ره‌ڤ سندۆقێن ده‌نگدانێ ڤه‌ بچن و سه‌ربه‌خوه‌یێ بهه‌لبژێرن.
ل دووماهیێ ئه‌م گه‌هشتینه‌ وێ باوه‌ریێ كو ئه‌و رۆلێ ئافره‌ت دشێت بگێریت وه‌كو چاوا د هه‌موو شۆره‌شان دا گێرایى چو ته‌خه‌كا دى نه‌شێت ئه‌وى رۆلى بگێریت ئه‌ڤرۆ ژى دروست بوون و سه‌ربخوه‌بوونا كوردستانێ چاڤه‌رێ ئافره‌تێن كوردستانێ دكه‌ت.

 

• پشكا چارێ:
دبێژن پیرێ ته‌ عاقل یان ته‌ سه‌ربۆر؟ د به‌رسڤێ دا پیر دبێژیت ئه‌گه‌ر سه‌ربۆر ب سه‌رێ من هات ئه‌ز بخوه‌ دێ ئاقل بم ئه‌م وه‌سا تێدگه‌هین كو بۆ پرسا ریفراندۆما سه‌ربخوه‌یا كوردستانێ پیره‌ك یان دانعه‌مره‌ك یان رامانه‌كا دى خودان سه‌ربۆره‌ك د ژیانێ دا زێده‌تر كه‌سه‌كێ دى حه‌ز دكه‌ت رۆژا ریفراندۆمێ بهێت ده‌نگێ خوه‌ ب به‌لێ بۆ سه‌ربخوه‌بوونا كوردستانێ بده‌ت گه‌له‌ك جاران مه‌ د ناڤ رێوره‌سمێن جڤاكى و ئاینى دا گوه ل گه‌نگه‌شه‌ و دانوستاندنێن دانعه‌مران دبیت ب تایبه‌ت ده‌مێ ده‌ستێن خوه‌ هه‌ردویان پێگڤه‌ بلند دكه‌ت و بۆ خوه‌ دوعا ژ خودایێ مه‌زن دكه‌ت و بێژیت یا ره‌بى خودێ مرن یا ب حه‌قه‌ هه‌رده‌مه‌كێ بهێت بخێر بهێت، لێ خودایێ مه‌زن ته‌ هند عه‌مر دابا داكو ب تنێ مه‌ پشكدارى د ریفراندۆما سه‌ربخوه‌یا كوردستانێ دا كربا، مه‌ ب به‌لێ یه‌كا ل شه‌كرێ شرینتر ل شه‌ربه‌تا مێویژا ب تامتر مه‌ گۆتبا: به‌لێ بۆ ریفراندۆمێ، ده‌مێ مه‌ گوه ل دانعه‌مره‌كى دبیت ئه‌ڤێ دوعایێ ژ خودایێ مه‌زن دكه‌ت گه‌له‌ك پرسیار خوه‌ ل سه‌رێ مه‌ دده‌ن ژ وانا دانعه‌مره‌ك حه‌ز دكه‌ت بمریت، به‌لێ پشتى ریفراندۆمێ باشه‌ پرسیار ئه‌وه‌ ده‌مێ دانعه‌مره‌كێ ئه‌ڤ هزره‌ ئه‌ڤ هه‌سته‌ ئه‌ڤ ره‌فتاره‌ ئه‌ڤ تێگه‌هشتنه‌ ئه‌ڤ عه‌شقه‌ بۆ دروستبوونا ده‌وله‌تێ هه‌بیت، دڤێت گه‌نجه‌ك چاوا هزر بكه‌ت دڤێت گه‌نجه‌ك چ بۆ ریفراندۆمێ بكه‌ت؟، به‌لێ دوهى یا مه‌ ب قه‌هره‌مانى و به‌رخودانا ڤان دانعه‌مران ئه‌ڤرۆ دروستكرى یه‌ ڤان دانعه‌مران بۆ زارۆیان، بۆ سنێلان بۆ گه‌نجان، بۆ ئافره‌تان و بۆ هه‌موو ته‌خ و چینێن جڤاكى و هه‌موو پێكهاتێن كوردستانێ، دڤێت رۆل هه‌بیت د سوبه‌هى ژى دا، ب تنێ ب به‌لێ بۆ ریفراندۆما سه‌ربخوه‌یا كوردستانێ، ژ به‌ر هندێ ژى ئه‌ز وه‌كو عه‌بدولعه‌زیز دێ نوكه‌ چه‌ند پرسیاران ژ هه‌ڤالێ خوه‌ كاك رێنجبه‌رى كه‌م:
پ 1/ كاك رێنجبه‌ر تو چ دبێژى بۆ رۆلێ دانعه‌مره‌كى د ڤێ پرۆسێ دا؟
رێنجبه‌ر: گومان تێدا نینه‌ دانعه‌مرێ ئه‌ڤرۆ باب، باپیر، خال، مام، كه‌سوكارێن مه‌ هه‌موویانه‌ ژ به‌ر هندێ ئه‌وان چاوا رۆل هه‌بوویه‌ د دروستكرنا مالێن مه‌دا وه‌سا ژى وان دڤێت رۆل هه‌بیت د دروستكرنا مالا مه‌ژى دا، كو ئه‌و ژى ده‌وله‌تا كوردستانێ یه‌، ئه‌ڤه‌ تێگه‌هشتنا وانایه‌ هه‌موو ته‌خ و چینێن دى یێن جڤاكى ب رێزگرتن و چاڤه‌كێ مه‌زن به‌رێ خوه‌ دده‌نه‌ دانعه‌مران.
پ 2/باشه‌ هه‌ر دانعه‌مره‌كى ژبلى ده‌نگدانێ دڤێت چ رۆلێ دى هه‌بیت د ناڤ خێزانا خوه‌ دا، بۆ هاندانا وان داكو پشكداریێ د پرۆسا ریفراندۆمێ دا بكه‌ن؟
رێنجبه‌ر: وه‌سا دیاره‌ دانعه‌مران نه‌ ب تنێ رۆله‌ك هه‌یه‌ نه‌ ب تنێ دڤێت ده‌نگێ خوه‌ ب به‌لێ بده‌ن، به‌لكو دڤێت هشیاریێ ژى په‌یدا بكه‌ن، دیسا دڤێت كوڕێ خوه‌، كچا خوه‌، بویكا خوه‌، زاڤایێ خوه‌، نه‌ڤیێن خوه‌، ئه‌وێن مافێ ده‌نگدانێ هه‌ى هان بده‌ت هشیار بكه‌ت داكو پشكداریێ د ڤێ پرۆسێ دا بكه‌ن و ببنه‌ هه‌ڤپشكێن سه‌ركه‌فتنا وێ.
دووماهیێ نوكه‌ ئه‌ز و رێنجبه‌ر گه‌هشتینه‌ ئه‌وێ باوه‌ریێ كانێ رۆلێ دانعه‌مره‌كى چه‌ندێ مه‌زنه‌ دپرۆسا ریفراندۆما سه‌ربخوه‌بوونا كوردستانێ دا؟، چونكو دروستبوونا ده‌وله‌تێ یا هه‌موو ته‌خ و چینایه‌ بۆ هه‌موو ته‌چ و چینایه‌ بۆ هندێ هه‌موو پێكڤه‌ د به‌خته‌وه‌ربن، دڤێت هه‌موو پێكڤه‌ پشكداریێ تێدا بكه‌ن، لێ سه‌ركێشیا هه‌موویا پێكڤه‌ دڤێت دانعه‌مر بن داكو وان رۆل د دوهى و ئه‌ڤرۆ و سوباهى دا هه‌بیت، هه‌موو ده‌مه‌كى بۆ هه‌ر سه‌ركه‌فتنه‌كێ پێشه‌نگ بن و ئه‌و ئاخفتنا مه‌ ل ده‌ستپێكێ گۆتى پیرێ ته‌ عاقل یان ته‌ سه‌ربۆر ئه‌م هه‌موو پێكڤه‌ ب خوه‌ عه‌قلى ل سه‌ربۆرا دانعه‌مران وه‌رگرین (25/9/2017) رۆژه‌كه‌ چاڤه‌رێ ل مه‌ هه‌موویا دكه‌ت كو ب تنێ ب به‌لێ ببینه‌ خودان ده‌وله‌تا كوردستانێ.

6

پشكا ئێكێ:
ئه‌وا مه‌ د نامه‌ و ئارمانج و چالاكى و ئه‌نجامێن گۆشا ئێكێ دا دایه‌ دیاركرن كو دێ رێك و میكانیزمێن جودا جودا هێنه‌ بكارئینان بۆ نیشادان و ئاراسته‌كرنا هه‌ر تاك و ته‌خه‌كا جڤاكى دیاركرنا رۆلێ وى بۆ پشكداریكرنێ د پرۆسێسا (ریفراندۆم به‌ر ب سه‌رخه‌بوونا كوردستانێ دا)، ئه‌ڤ گۆشه‌ دێ یا تایبه‌ت بیت ب رۆلێ زارۆیى، لێ یا گرنگه‌ بۆ خوانده‌ڤانى دیار بكه‌ین و خوانده‌ڤان گۆشێ ب دروستى و هه‌تا دووماهیێ بخونیت داكو نه‌بیته‌ ره‌خنه‌گره‌كێ وێرانكه‌ر ل سه‌ر گۆشێ كو هزر بكه‌ت، چێنابیت زارۆ د پرسێن ڤى ره‌نگى دا بهێنه‌ بكارئینان ئه‌م ل دووڤ رێكه‌فتنێن مافێن زارۆى و نیڤده‌وله‌تى و تێگه‌هشتنا جڤاكى بۆ زارۆى و به‌روڤاژى وێ دێ درێژه‌پێدانێ دا بۆ هه‌وه‌ دیاركه‌ین، د ڤێره‌ دا مه‌ دڤێت ئه‌م ئه‌ڤێ گۆشێ وه‌كو چو گۆشه‌كا ته‌ به‌رى نوكه‌ خواندى نیشا ته‌ نه‌ده‌ین، له‌ورا ئه‌ز وه‌كو (عه‌بدولعه‌زیز)، دێ نوكه‌ چه‌ند پرسیاره‌كا ل (رێنجه‌رى) كه‌م كانێ دێ چاوا به‌رسڤا من ده‌ت.
پ 1/ زارۆك كییه‌؟
رێنجبه‌ر: زارۆ هاتیه‌ پێناسه‌كرن ل دووڤ رێكه‌فتناما مافێن زارۆى یا سالا (1989) د مادێ ئێكێ دا كو هه‌ر كه‌سێ ژیێ (18) هه‌ژده‌ سالیێ تێنه‌په‌راند بیت ب مه‌رجه‌كى كو ل دووڤ یاسایێن ناڤخوه‌یى یێن وه‌لاتێ وى یێ ئه‌هلیه‌تا وى ته‌مام نه‌ ببیت.
پ 2/باشه‌ زارۆى ماف هه‌یه‌ پشكداریێ د ڤێ پرۆسێسێ دا بكه‌ت؟
رێنجبه‌ر: ژ رویێ یاسایى ڤه‌ زارۆى مافێ ده‌نگدانێ د ئه‌ڤێ پرۆسێسێ دا نینه‌، ژ به‌ر كو پشكداریكرن د ریفراندۆمێ دا ئێكه‌ ژ مافێن سیاسى یێن مرۆڤى.
پ 3/ ل دووڤ وان رێكه‌فتنێن ته‌ به‌حسكرین زارۆى ماف نینه‌، لێ پرسیاره‌كا دى دروست دبیت، باشه‌ رۆلێ وى ب دووماهی دهێت یان ژى دێ شێت ئه‌و ژى ب جۆره‌كێ دى پشكداریێ د ڤێ پرۆسێ دا كه‌ت؟.
رێنجبه‌ر: رۆلێ زارۆى د ئه‌ڤێ پرۆسێسێ دا ب دووماهیك ناهێت، ژبه‌ر كو د هه‌مان رێكه‌فتنا مادا د ماده‌یێن (12، 13) دا هاتیه‌ كو پێدڤى یه‌ رێز ل بۆچوونا زارۆى بێته‌گرتن و هه‌روه‌سا گوهداریا دیتن و حه‌زێن وى بێته‌كرن، له‌ورا پێدڤى یه‌ هزر و بۆچوونێن زارۆیان ل سه‌ر ئه‌ڤێ پرۆسێسێ ب رێزڤه‌ بهێنه‌ وه‌رگرتن، هه‌روه‌سا پێدڤى یه‌ ل سه‌ر مه‌ وه‌كو گه‌له‌كێ خودان قوربانى و به‌رخودان ئه‌م زارۆیێن خوه‌ فێرى پشكداریكرنا پرۆسێسێن دیمۆكراسیێ دا بكه‌ین هه‌ستێ نیشتمانپه‌روه‌رانه‌ ل ده‌ڤ په‌یدا بكه‌ین ژبه‌ركو زارۆ به‌رێ بنیاتێ هه‌ر جڤاكه‌كى یه‌، ژ بلى ڤێ چه‌ندێ ژى د كورده‌واریا مه‌ دا دبێژن زارۆ فێقیێ هه‌ر ماله‌كێ یه‌، ئه‌وى فێقى كارتێكرنه‌كا مه‌زن ل سه‌ر دایك و باب و خووشك و برا و خێزانێ ب گشتى هه‌یه‌، ره‌نگه‌ تو یێ خوانده‌ڤان پرسیار بكه‌ى چاوا دێ به‌رسڤا من ده‌ى وه‌كو (عه‌بدولعه‌زیز) ئه‌و بیت كو لڤینێن زارۆى ب تایبه‌تى یێن هونه‌رى مینا سترانا وان بۆ هاندانا جڤاكى ب ره‌نگه‌كێ گشتى دێ هشیاریه‌كا مه‌زن په‌یدا كه‌ت و ئه‌وێ ماف هه‌ى دێ هه‌ست ب وێ به‌رپرسیاره‌تیێ كه‌ت كو دڤێت پشكداریێ د ڤێ پرۆسێ دا بكه‌ت، دیسا شانۆیێن زارۆیان جلوبه‌رگێن زارۆیان ئه‌و په‌یڤێن ژ ده‌ڤێ زارۆى ده‌ردكه‌ڤن مینا (ئاخ، ئالا، زمان، شه‌هید، پێشمه‌رگه‌، هتد…)، دێ كارتێكرنه‌كا راسته‌وخوه‌ ئێكجار مه‌زن ل سه‌ر ئه‌وێ ماف هه‌ى هه‌بیت كو پشكداریێ بكه‌ن. د ئه‌ڤێ پرۆسێ دا، چونكو هه‌كه‌، ژ به‌ر خوه‌ ژى نه‌بیت ژبه‌ر زارۆ و ئایندێ زارۆى یه‌ كو ئه‌گه‌ر وى ناسناما عیراقى هه‌بیت دێ زارۆیێ وى ناسناما كوردستانێ هه‌بیت ئه‌گه‌ر وى پاسه‌پۆرتا عیراقى هه‌بیت دێ زارۆیێن وى پاسه‌پۆرتا كوردستانێ هه‌بیت وه‌ دێ زارۆیێ وى ب پارێن كوردستانى قه‌ستا دوكانێ كه‌ت و جپسا پێ كریت.
• دووماهیك:
ئه‌ز و رێنجبه‌ر گه‌هشتینه‌ ئه‌وى ئه‌نجامى كو زارۆى راسته‌ مافێ ده‌نگدانێ نینه‌، لێ خودان رۆله‌كێ مه‌زن و هه‌ستیاره‌ د ئه‌ڤێ پرۆسێسێ دا وه‌ دێ شێت ب شێوازه‌كێ دى رۆلێ خوه‌ گێریت، له‌ورا گرنگه‌ رێز ل دید و بۆچوونێن وى بهێته‌گرتن و ب ئه‌مانه‌ت سه‌ر په‌روه‌رده‌كا نشتیمانى بێته‌ په‌روه‌رده‌كرن.
(ئه‌ز و تو ئه‌م و هین ئه‌م هه‌موو پێگڤه‌ خوه‌ به‌رهه‌ڤ بكه‌ین بۆ ریفراندۆم به‌ر ب سه‌رخه‌بوونا كوردستانێ).

 

• پشكا دووێ:

گه‌نج ئه‌و توێژا گه‌له‌كا گرنگ و كاریگه‌ره‌ دناڤ هه‌ر وه‌لات و ملله‌ت و جڤاكه‌كى دا ل دوویڤ وان ئامارێن رێكخراوا توانا سازیا لاوان ل هه‌رێما كوردستانێ هاتینه‌ راگه‌هاندن ژى كو (62%) خه‌لكێ هه‌رێما كوردستانێ گه‌نجن (51%) ره‌گه‌زێ مێ نه‌ (49%) ره‌گه‌زێ نێرن ئامارا گشتى ژى وه‌سا به‌حسكرى یه‌ كو رێژا (62%) دناڤبه‌را ژیێ (15 سالى تاكو 25) سالى نه‌ ئه‌ڤ ئاماره‌ دلخوشیه‌كا ئێكجار مه‌زن ل ده‌ڤ مروڤى په‌یدا دكه‌ت ، لێ چه‌ند پرسیاره‌ك دروست دبن ئه‌ڤ رێژا (62%) چه‌ند شیاینه‌ پرسێن نیشتمانى و نه‌ته‌وه‌یى ببنه‌ پشكه‌كا گرنگ ژ هزر و هه‌ست و ره‌فتارێن وان ، چونكه‌ ئه‌گه‌ر پرسێن نیشتمانى بۆ وان دگرنگ بن ئه‌م ب باوه‌رین ئه‌ڤ رێژا گه‌نجا بۆ پرسا ریفراندوم به‌ره‌ڤ سه‌رخه‌بوونا كوردستانێ دێ پشكا شێرى ب به‌ر وان كه‌ڤیت و ئه‌و دێ شێن ئایندێ كوردستانێ ل سه‌ر ده‌ستێن خو ئاڤا كه‌ن وه‌ دێ شێن پشتى راگه‌هاندن و دروست بوونا ده‌وله‌تێ خالێن لاواز و بهێزێن كوردستانێ ژێك جودا كه‌ن وه‌ دێ شێن خالێن بهێز په‌رجان كه‌ن و یێن لاواز ژى به‌رنامه‌ و پلانێ بۆ دانن وه‌ میكانزم و ئالاڤێن جودا جودا بو په‌یداكه‌ن ، داكو وان ژى بێخنه‌ دخانا خالێن بهێزدا نوكه‌ دێ ڤان پرسیارێن ل خوارێ ئاراسته‌ى ماموستایێ گه‌نج(رێنجبه‌ر جه‌میل شێخو) كه‌ین كانێ دێ چاوا به‌حسا رولێ گه‌نجان د پرسا ریفراندوم به‌ره‌ڤ سه‌رخه‌بوونا كوردستانێ كه‌تن:
پ 1/كاك رێنجبه‌ر ل گور باوه‌ریا ته‌ دڤێت گه‌نجى چ رول هه‌بیت دڤێ پرسا گه‌له‌ك گرنگ دا؟
رێنجبه‌ر: گومان تێدا نینه‌ كو گه‌نج دناڤا هه‌ر وه‌لاته‌كى دا وه‌كو ستوینا سه‌ره‌كى نه‌ بۆ ئاڤاكرن و راگرتنا هه‌ر ملله‌ته‌كى گه‌نجێن كوردستانێ چاوا بخوینه‌كا گه‌رم د شوره‌شێن رزگاریخوازا گه‌لێ كوردستانێ دژى رژێمێن دكتاتورێن ئێك ل دوویڤ ئێكێن به‌غدا رولێ خو دیتى یه‌ چاوا ل سه‌رهلدانا پیروز دا رێژا هه‌ره‌ زورا گه‌لى بووینه‌ چاوا ئه‌فسانه‌یا داعشێ ل سه‌ر ده‌ستێن گه‌نجێن كوردستانێ ژناڤ چو بێگومان و بێ دودلى گه‌نجێن كوردستانێ دێ خودان رولێ هه‌رێ مه‌زن بن د پرسا ریفراندومێ دا و سه‌ربه‌خویا كوردستانێ دا ژبه‌ركو ، به‌رپرسیاره‌تیا مه‌زن ل سه‌ر ملێن گه‌نجانه‌ وه‌ ده‌وله‌ت بۆ وانه‌.
پ 2/ د تورێن جڤاكى دا گه‌نجان بیروبوچونێن ژێك جودا هه‌نه‌ نه‌خاسمه‌ ئه‌ڤێ پرسا گه‌له‌كا مه‌زن نیشتمانى پێگڤه‌ گرێدده‌ن ب كێمیا كاره‌با نیشتمانى یان گیروبوونا موچه‌ى تو وه‌كو گه‌نجه‌ك و وه‌كو ماموستایه‌كێ زانكویێ چ دبێژى بۆ ڤێ چه‌ندێ؟
رێنجبه‌ر: بوچوونا من ئه‌ڤا دتورێن جڤاكى دا دهێته‌ به‌حسكرن نه‌ رایا گشتى یا راسته‌قینه‌یا هه‌موو گه‌نجێن كوردستانێ یه‌ سه‌ره‌راى ئه‌وێ گازندێ یا گه‌نجێن مه‌ دكه‌ن ل ڤێره‌ پێدڤى یه‌ ئه‌م دووپرسا ژێك جودا بكه‌ین پرسا كێم و كاسیێن حكومه‌تێ و ب تایبه‌ت به‌رامبه‌ر ته‌خا گه‌نجان وه‌ پرسا ده‌وله‌تبوونێ كو یا گرێدایى چاره‌نڤیسێ هه‌موو گه‌لێ كوردستانێ د پرسا ئێكێ دا پێدڤى یه‌ گه‌نج جێوازیێ بێخیته‌ دناڤبه‌را داخوازیێن خو یێن ره‌وا و نه‌ره‌وا دا سه‌باره‌ت داخوازیێن ره‌وا هیچ كه‌سه‌ك نه‌شێت دژى ڤان داخوازیا راوه‌ستیت دپرسا دووێ دا پێدڤى یه‌ گه‌نج بزانیت كو ده‌وله‌ت بۆ هه‌موویانه‌ ب تایبه‌تى بو جیلێ ئاینده‌یه‌ وه‌ گه‌نج د ئاینده‌یى دا ل بن سیبه‌را ئالایێ كوردستانێ پتر دێ شێت مافێن خو یێن ره‌وا ب ده‌ستڤه‌ ئینیت.
واته‌ ل دوماهیكێ ئه‌ز و رێنجبه‌ر گه‌هشتینه‌ وێ باوه‌ریێ كو گه‌نج كاینه‌كێ ئێكجار مه‌زن و گرنگ و كاریگه‌ره‌ د هه‌ر لڤینه‌كێ دا، ژبه‌ر هندێ ب هه‌موو بیرو باوه‌رڤه‌ دێ بێژین كو دپرسا ریفراندوم به‌ره‌ڤ سه‌رخه‌بوونا كوردستانێ دا دێ هه‌لگرێ سه‌ركه‌فتن و سه‌رفه‌رازیێ بیتن و دێ شێت مه‌زنترین سه‌ركه‌فتن د مێژوویێ دا توماركه‌ت و گه‌نجێ مه‌ ئه‌گه‌ر ده‌مه‌كى جیلێ شوره‌شێ بیت و ده‌مه‌كێ دى جیلێ سه‌رهلدانێ بیت گه‌نجێ ئه‌ڤرو دێ جیلێ ده‌وله‌تبوونێ بیت.

18

• ناما گۆشێ:
عه‌بدولعه‌زیز محسن بارزانى سه‌رۆكێ ئنستتیۆتا دهۆك بۆ ره‌وشه‌نبیریا گشتى و
رێنجبه‌ر جه‌میل شێخۆ مامۆستایێ زانكۆیا دهۆكێ
ب هه‌ڤپشكى دنڤیسین
ژبه‌ركو ریفراندۆم ئامرازه‌كه‌ ژبۆ دیاركرنا مافێ چاره‌نڤیسێ گه‌لێ كوردستانێ و د ڤێ پرۆسێسێ دا گه‌ل خودانێ بریارێ یه‌، له‌ورا ئارمانجا مه‌ زێده‌تر هشیاركرنا ته‌خ و چینێن جودا جودا یێن جڤاكى یه‌ ل سه‌ر هه‌موو ئاستان، ژ پێخه‌مه‌ت سه‌ركه‌فتنا پرۆسێسا (ریفراندۆم به‌ر ب سه‌رخوه‌بوونا كوردستانێ).
• ئارمانج:
1ـ به‌لاڤكرنا ره‌وشه‌نبیریا گشتى سه‌باره‌ت پرسا ریفراندۆمێ.
2ـ دیاركرنا رۆلێ هه‌ر ته‌خه‌كێ ژ ته‌خێن جڤاكى دچارچووڤێ پرۆسێسا ناڤهاتى دا.
3ـ ریفراندۆم وێ ئارمانجا ستراتیجى ده‌سته‌به‌ر دكه‌ت ئه‌وا زێده‌تر (100) سه‌د ساله‌ گه‌لێ كوردستانێ خه‌باتێ بۆ دكه‌ت و د پێناڤێ وێ دا قوربانیێ دده‌ت.
4ـ هشیاركرنا جڤاكى ب ره‌نگه‌كێ گشتى هه‌ستكرن ب به‌رپرسیاره‌تیێ ل ده‌ڤ هه‌ر تاكه‌كێ، لێ دێ به‌رخودانا پێشمه‌رگه‌ى مسۆگه‌ر كه‌ت.
5ـ هاندانا سازیێن اگه‌هاندنێ بۆ پێگڤه‌ كاركرنێ ل دۆر هه‌مان پرسێ.
6ـ شرۆڤه‌كرنه‌كا ئه‌كادیمى و زانستى خواندنا تێگه‌هشتنا جڤاكى سه‌باره‌ت پرۆسێسا ریفراندۆمێ و سه‌رخوه‌بوونا كوردستانێ.
7ـ دیاركرنا مافێ گه‌لێ كوردستانێ ژبۆ دیاركرنا چاره‌نڤیسێ د هه‌موو قانوون و په‌یمانێن نێڤده‌وله‌تى دا.
8 ـ هاندانا رایا گشتى بۆ دروستكرنا باوه‌ریێ د ناڤبه‌را وى و ڤێ پرسێ دا.
9ـ چاوانیا پشكداریا ده‌نگده‌رى و گرنگیا وى د ئه‌ڤێ پرۆسێسێ دا.
10 ـ ئه‌گه‌رێن جودابوونا هه‌رێما كوردستانێ ل ده‌وله‌تا عیراقا فیدرال.
• چالاكى:
ئه‌و شێوه‌ و شێوازێ چالاكیان د رێیا نڤیسینێن جودا جودا دا ده‌ستنیشانكرنا رۆلێ هه‌ر تاكه‌ك و ته‌خه‌كى د ڤێ پرۆسێسێ دا دێ بیته‌ ناڤه‌رۆكا ئه‌ڤێ گۆشێ كو تێدا ئارمانجێن ل سه‌رى دیاركرى دێ د رێیا نڤیسینان دا وه‌كو چالاكى هێنه‌ جێبه‌جێكرن.
• ئه‌نجام:
دێ چاوا ئه‌ڤ پرسه‌ بیته‌ پرسا هه‌ر تاكه‌كى كو هه‌ست ب به‌ر پرسیاره‌تیێ بكه‌ت، كو ده‌وله‌ت و دروستبوون و راگه‌هاندنا وێ نه‌ به‌س ب تنێ مافێ وى یه‌، به‌لكو ئه‌ركێ وى یه‌ ژى د ڤى چارچووڤه‌ى دا د جێبه‌جێكرنا ئه‌ركێ خوه‌ دا مافێ وى مسۆگه‌ر دكه‌ت.

57

ـ
د رۆژناما ئه‌ڤرۆ دا به‌رپه‌رێ دوویێ و ژمارا (2082) ل رۆژا پێنج شه‌مبى و رێكه‌فتى (30/3/2017) دیداره‌ك هاتیه‌ ئه‌نجامدان ل گه‌ل رێزدار (سه‌ربه‌ست تروانشى) به‌رپرسێ لقێ ئێك یێ پارتى دیمۆكراتى كوردستان. پشتى من ئه‌ڤ دیداره‌ زێده‌تر ل جاره‌كێ خواندى گه‌له‌ك سه‌رنجا من راكێشا، چونكو گه‌له‌ك ئاخفتن ئه‌و بوو ئه‌وا گه‌له‌ك جاران نیڤا دلێ من هه‌وار دكه‌ت، لێ كێم كه‌س هه‌بووینه‌ گوهداریێ بۆ بكه‌ن. من دڤێت ببێژم ڤه‌كرنا ده‌رگه‌هى ل خه‌لكى ژ لایێ به‌رپرسێ لقێ ڤه‌ چاره‌سه‌ركرنا (30 %) ژ داخوازى و ئاریشێ یه‌، رێزگرتن (30%) دێ چاره‌سه‌ركه‌ت، گوهداریكرن (30 %) دێ چاره‌سه‌ركه‌ت ب تنێ (10%) دێ مینیت ل گۆر باوه‌ریا من ژى چ جاران (10%) نابیته‌ ئاریشه‌ به‌لكو ب لێك تێگه‌هشتنێ ئه‌و ژى چاره‌سه‌ر دبیت، واته‌ خه‌لك و حزب دێ بنه‌ دو لایه‌نێن پێگڤه‌گرێدایى كو ئه‌ڤه‌ راستیا رێبازا پیرۆزا بارزانیێ نه‌مره‌ . د پرسیارا ئێكێ دا ژ ئه‌ڤێ دیدارێ، به‌حسێ وه‌رگرتنا پۆستێ به‌رپرسێ لقێ و به‌رنامه‌ و چالاكیێن وى دكه‌ت؟ سه‌ربه‌ست تروانشى دبێژیت ل به‌راهیێ به‌ژنا خوه‌ ل هه‌مبه‌رى گۆرێن شه‌هیدان دچه‌مینم و رێز و ته‌قدیرێن مه‌زن بۆ كه‌سوكارێن وان. ده‌مێ من خواندى كو ل ده‌ستپێكێ ناڤبرى خوه‌ بۆ گۆرێن شه‌هیدان دچه‌مینیت ئه‌ز زێده‌ زێده‌ دلخۆش بووم، چونكو هه‌ر ده‌مێ مه‌ شه‌هید و قاره‌مانێن خوه‌ ژبیركرن ب پشتراستى ڤه‌ دێ بێژم وى ده‌مى حوكومرانیى دێ كه‌ڤیته‌ به‌رگومان و تێبینیان و كه‌سوكارێن وان شه‌هیدان ژى هێدى هێدى دێ خوه‌ ل بازنا حزبایه‌تیێ دووركه‌ن، چونكو دێ بێژن ماده‌م شه‌هیدبوونا باب و برا و زه‌لام و كه‌سوكارێن مه‌ بهێنه‌ ژبیركرن ئه‌م نه‌چار نینه‌ ل سه‌ر رێبازا وان به‌رده‌وام بین و چونكو ئه‌م ژى دێ هێینه‌ ژبیركرن. ژ به‌ر هندێ خۆچه‌ماندن بۆ گۆرێن شه‌هیدان ب هه‌موو باوه‌رى ڤه‌، ئه‌ڤه‌ مه‌زنترین سه‌رمایه‌ یه‌ و دێ رۆژ ب رۆژێ خه‌لك ل بازنا حزبى خوه‌ نێزیك كه‌ت و دێ د به‌رهه‌ڤ بین كو هه‌ر ده‌مه‌كێ خوه‌ گۆرى بكه‌ن. له‌ورا دڤێت ئه‌م هه‌موو گه‌له‌ك ب باشى بزانین ده‌مێ ل ده‌ستپێكا هه‌ر چالاكى و دانوستاندنه‌كێ ده‌قیقه‌كێ ل سه‌ر گیانێ پاكێ شه‌هیدان رادوه‌ستین وى ده‌مى قاره‌مانى و به‌رخودان و خۆراگرى و ئیراده‌ و خزمه‌تكرنا كه‌سوكارێن وان هه‌موو پێگڤه‌ بهێنه‌ بیرا هه‌ر كه‌سه‌كێ، چونكو هه‌كه‌ ئه‌م دوهى نه‌خوینین بۆ ئه‌ڤرۆكه‌ چجاران د سوبه‌هى ناگه‌هین. دیسا به‌رپرسێ لقێ ئێك دبێژیت دێ گرنگیێ ب بۆچوونێن خه‌لكى ده‌ین. ئه‌ز دبێژم د بنیات دا حزب بتنێ و بتنێ وه‌كو ئامراز هاتیه‌ دامه‌زراندن داكو ئارمانجا سه‌ره‌كى و گشتى جێ به‌جێ بكه‌تن ، بۆ ئه‌ڤێ مه‌ره‌مێ دڤێت (100%) گرنگیه‌كا گه‌له‌ك مه‌زن ب بۆچوونێن راست و دروست و كورد په‌روه‌رانه‌ یێن خه‌لكى بهێته‌ دان. چونكه‌ دڤێت به‌رپرسێ لقێ و سه‌رۆكێ كوردستانێ و سه‌رۆكێ حوكمه‌تێ و وه‌زیر و پارێزگار و هه‌موو به‌رپرس گه‌له‌ك ب باشى بزانن خه‌لكى هه‌میان چاڤ هه‌نه‌ دبینن و گوه هه‌نه‌ گوه لێ دبن و عه‌قل هه‌یه‌ تێدگه‌هن، ئانكو نه‌ كه‌سێ كوره‌یه‌ و نه‌ كه‌سێ كه‌ر و لاله‌ و نه‌ كه‌سێ بێ عاقله‌. هه‌ر ده‌مێ ئه‌ڤه‌ بۆ به‌رنامێ كارى پشت راستم دێ سه‌ربه‌ست تروانشى نمره‌كا پیڤایى دێ خزمه‌تكرنا خه‌لكى دا تۆمار كه‌ت، چونكو مه‌زنترین سه‌رمایه‌ بۆ حزبێ خه‌لكه‌ دیسا ناڤهاتى به‌حسێ دلسۆزى و خه‌مخۆرى و دادپه‌روه‌رى و یه‌كسانیێ دكه‌ت. ئه‌ڤه‌ چار تێگه‌هێن ئێكجار گرنگن د ژیانا هه‌ر كه‌س و سازیه‌كێ دا. هه‌رده‌مێ دادپه‌روه‌رى په‌یره‌و كر دێ یه‌كسانى هه‌بیت. وى ده‌مێ دێ خه‌لك ل دۆرماندۆریێ حزبێ كۆم بیت و چونكو دێ هزرا هندێ كه‌ن كو هه‌موو هیڤى و ئۆمێد و داخوازیێن وان بتنێ و بتنێ د رێیا پارتى ب ده‌ستڤه‌ دهێن و دێ هه‌مى كاره‌ك ژى ب دلسۆزى و خه‌مخۆرى برێڤه‌چیت. دیسا ناڤبرى دبێژیت دێ ب ئاشكه‌را بێژین باش و باشه‌ و خراب و خرابه‌ حه‌ق و حه‌قه‌ و نه‌حه‌ق و نه‌حه‌قه‌ ئه‌ز سه‌ربه‌ست تروانشى پشتراست دكه‌م هه‌ر ده‌مێ ب ئاشكه‌را و ب شه‌فافیه‌ت ئه‌ڤ چه‌نده‌ هاته‌كرن دێ هند خه‌لك ل ته‌ و حزباته‌ كۆم بن كو چجاران ته‌ ئه‌و هزر نه‌دكر، چونكو مه‌زنترین ئاریشا خه‌لكى بتنێ ئه‌ڤه‌یه‌ و گه‌له‌ك ژ خه‌لكى گه‌هشتینه‌ ئه‌وێ باوه‌ریێ كو خه‌لكێ به‌رپرس ب باشى كارێ خوه‌ ناكه‌ن و باش و خرابیان ژێكجودا ناكه‌ن و ل دووڤ به‌رژه‌وه‌ندیێن خوه‌ كاردكه‌ن ده‌مێ ئه‌ڤ چه‌نده‌ بهێته‌كرن وه‌كو چاوا ل ده‌ستپێكا هاتنا ته‌ بۆ لقێ ئێك خه‌لكى وه‌كو كه‌رنه‌ڤال پێشوازى ل ته‌كرن، دێ ئه‌ڤ كه‌رنه‌ڤاله‌ یا به‌رده‌وام بیت و هه‌موو ده‌مه‌كێ دێ خه‌لكى ل دۆرماندۆرێن خوه‌ حزبا خوه‌ بینى كو ل گۆر باوه‌ریا من نوكه‌ قووناغ وێ چه‌ندێ دخوازیت. سه‌ربه‌ست تروانشى دبێژیت دڤێت كادرێ پارتى بۆ هه‌موو قوناغان یێ به‌رهه‌ڤ بیت: هه‌كه‌ كادرێن پارتى و جه‌ماوه‌رێ پارتى بزانیت كانێ پارتى خودانا چ دیرۆكه‌كێ یه‌. وى ده‌مى ب سه‌رفه‌رازیه‌كا ئێكجار مه‌زنڤه‌ دێ بێژیت بۆ من شانازى یه‌ كو ئه‌ز پارتیمه‌، به‌لێ مخابن هنده‌ك به‌رپرسێن پارتى، پارتى ل پێش چاڤێن خه‌لكى ره‌شكریه‌. له‌ورا گه‌له‌ك گرنگه‌ جاره‌كا دى باوه‌ریێ بۆ خه‌لكى ب زڤرینه‌ڤه‌ و داكو خه‌لك و پارتى ببنه‌ دو بازنێن پێكڤه‌ گرێدایى داكو وى ده‌مى هه‌موو كادر و ئه‌ندامێن پارتى خوه‌ ب شاگردێن رێبازا پیرۆزا بارزانیێ نه‌مر بزانن داكو بۆ خه‌لكى بهێته‌ دوپاتكرن كو كه‌س ل كادر و ئه‌ندامێن پارتى ب ئه‌خلاقتر نینه‌ وێ گاڤێ دێ مانشێتێ دیدارێ هێته‌ بیرا هه‌موو كه‌سه‌كێ ده‌مێ سه‌ربه‌ست تروانشى دبێژیت (حزباتى هه‌كه‌ بۆ خزمه‌تا خه‌لكى نه‌بیت چو رامان تێدا نینه‌) هه‌مى ده‌مه‌كێ هه‌مى خه‌لك دێ بێژن ئه‌م هه‌مى پێشمه‌رگه‌ینه‌ و جانفیداینه‌ بۆ كوردستانێ و ریبازا پیرۆزا بارزانیێ نه‌مر د دیدارێ دا به‌حسێ په‌یوه‌ندیا حزبێ و حوكمه‌تێ دهێته‌كرن ئه‌ز دبێژم هه‌كه‌ كێماسیێن پارتى كادرێ حزبێ بیت بارا پترى و پشكا مه‌زنا كێماسیان بۆ كادرێن حوكمه‌تێ دزڤریت، چونكو پارتى حزبا ئێكێ یه‌ و حوكمه‌ت پێكئینایه‌ و له‌ورا دڤێت میكانیزمه‌كێ په‌یدا بكه‌ت دێ چاوا دووڤچوون و هه‌لسه‌نگاندنێ بۆ كادرێن خوه‌ یێن حكومى كه‌ت داكو ل رێبازا پیرۆزا بارزانیێ نه‌مر خافل نه‌بن و ب به‌رده‌وامى خزمه‌تا خه‌لكى بكه‌ن، وه‌كو چاوا (بارزانیێ نه‌مر دبێژت: شانازى یه‌ مرۆڤ خزمه‌تكارێ ملله‌تێ خوه‌ بیت) دڤێت ب دروستى رێك ل هه‌موو زێده‌گاڤیان بهێته‌ گرتن داكو كه‌سایه‌تیا حزبێ وه‌كو باوه‌رى بۆ خه‌لكى ب زڤریته‌ڤه‌ و هه‌رده‌م خه‌لك ب هه‌یبه‌ت ڤه‌ به‌رێ خوه‌ بده‌ته‌ پارتى. دیسا به‌حسێ دامه‌زراندنا سه‌ركردایه‌تیا پارتى ل به‌هدینان هاتیه‌كرن. ل گۆر باوه‌ریا من هه‌كه‌ ئه‌ڤ سه‌ركردایه‌تى یه‌ زێده‌تر بۆ هه‌ماهه‌نگیێ بیت د ناڤبه‌را لقێن پارتى دا و د ناڤبه‌را حزبێ و حوكمه‌تێ دا و د ناڤبه‌را حزبێ و خه‌لكى دا و هه‌موو بزاڤ ژى بتنێ خزمه‌تكرنا خه‌لكى بیت ئه‌ز باوه‌رم به‌هدینان پێدڤى پێ هه‌یه‌، لێ هه‌كه‌ بۆ رازیكرنا هنده‌ك كه‌سان بیت كو ببیته‌ ناڤه‌كێ گران و گونده‌كێ وێران نه‌بوونا وێ گه‌له‌ك باشتره‌ ژ هه‌بوونا وێ. دیسا به‌حسێ ئالوگورێن ناڤ ئۆرگانێن حزبێ هاتیه‌كرن ئه‌ز دوپاتیێ دكه‌م چو جاران چێ نابیت چو به‌رپرسه‌ك ل (4) سالان ده‌رباز ببیت هنده‌ك جاران كارى و قووناغێ پێدڤى ب هندێ هه‌یه‌ كو كه‌سه‌ك زێده‌تر ل (4) سالان ژى بمینیت. لێ ئه‌ڤه‌ دڤێت گه‌له‌ك كێم بیت . دیسا دبێژن دڤێت ئالوگۆر بهێنه‌كرن لێ دێ گه‌له‌ك باشتر بیت گوهۆرین بهێنه‌كرن، نه‌ك لێك گوهۆرین، چونكو خه‌لك ل لێك گوهۆرینێ گه‌له‌ك بێزار بووینه‌. بۆ ئه‌ڤێ چه‌ندێ دڤێت جیلێ نوى ل به‌رچاڤ بهێته‌ وه‌رگرتن و ئه‌ڤ گوهۆرینه‌ ببنه‌ ئه‌گه‌رێ ئاشبوونا ناڤخوه‌یا حزبێ و دیسا حزبێ و خه‌لكى. ل دووماهیێ دێ بێژم ئه‌ز وه‌كو دلسۆز و خه‌مخۆره‌كێ رێبازا پیرۆزا بارزانیێ نه‌مر و كادرێن قوتابخانا پارتى و خودانێ چه‌ندین شه‌هیدان. دڤێت زه‌ندو باسكان لێ هه‌لبده‌ین و ل پشت پشتا جه‌نابێ سه‌رۆك مه‌سعود بارزانى را بوه‌ستین، داكو جه‌نابێ وى ب پشته‌ڤانیا هه‌موو خه‌لكى و جه‌ماوه‌رى و نه‌ته‌وا و ئایینان و كه‌سایه‌تیان ده‌وله‌تا كوردستانێ رابگه‌هینیت و هه‌موو خه‌لك تێدا هه‌ست ب هه‌بوونا خوه‌ بكه‌ت و یێ سه‌رفه‌راز و به‌خته‌وه‌ر بیت. چونكو چاره‌سه‌ركرنا هه‌مى ئاریشان بتنێ و بتنێ راگه‌هاندنا ده‌وله‌تا كوردستانێ یه‌ پارتى بۆ ئه‌ڤێ مه‌ره‌مێ كاركریه‌ و كار دكه‌ت و دڤێت یا به‌رده‌وام بیت، له‌ورا یا گرنگه‌ هه‌مى كادرێن پارتى به‌رى خه‌لكێن دى یێ به‌رهه‌ڤ بیت. من دیتن و بۆچوونێن خوه‌ ل سه‌ر دیدارا كاك سه‌ربه‌ست تروانشى دیاركرن هه‌ر ئێكى تێبینیه‌ك هه‌بیت دشێت به‌رسڤا من بده‌ت. لێ ب مه‌رجه‌كێ رێڤینكێ رێبازا پیرۆزا بارزانیێ نه‌مر بیت چونكو ئه‌ز (100 %) پشته‌ڤانێ هه‌موو گوتنێن كاك سه‌ربه‌ستى مه‌ و دێ ئاینده‌ ژى دا دێ كه‌مه‌ كریار و دێ ب چاڤێن خوه‌ بینن. ل گه‌ل رێزگرتنى..

website security
Facebook Auto Publish Powered By : XYZScripts.com