NO IORG
Authors Posts by عه‌بدوللتيف ئه‌حمه‌د ئه‌ره‌دنى

عه‌بدوللتيف ئه‌حمه‌د ئه‌ره‌دنى

عه‌بدوللتيف ئه‌حمه‌د ئه‌ره‌دنى
24 POSTS 0 COMMENTS

33

بێگومان پشكداریا شاندێ حوكمه‌تا هه‌رێما كوردستانێ ب سه‌رۆكایه‌تیا “نێچیرڤان بارزانى” سه‌رۆكێ حوكمه‌تا هه‌رێما كوردستانێ و جێگرێ وى قوباد تاله‌بانى د كۆربه‌ندێ ئابووریێ جیهانێ دا ل سان پترسبۆرگ ل رۆسیا و ئه‌و پێشوازیا گه‌رم و دیدار و كۆمبوونێن سه‌رۆكێ حوكمه‌تێل دگه‌ل سه‌رۆك فلادیمێر پۆتین و لاڤرۆڤ وه‌زیرى ده‌رڤه‌ و به‌رپرسێن دی یێن رۆسیا, مزگینیه‌كا نوو و ئۆمێد به‌خشه‌ بۆ گه‌لێ كوردستانێ, ژ به‌ر كو “نێچیرڤان بارزانى” ب شاره‌زایا خوه‌ شیایه‌ به‌رێ مه‌زنترین كۆمپانیێن جیهانێ بده‌ته‌ وه‌به‌رهێنانێ ل كوردستانێ.

د ئه‌ڤێ كۆربه‌ندێ دا ژماره‌كا گڕێبه‌ستان ل گه‌ل مه‌زنه‌ كۆمپانیێن رۆسى و جیهانى هاتنیه‌ ئیمزاكرن و یا ژ هه‌میان دیارتر كۆمپانیا وه‌به‌رهێنانێ د وارێ وزه‌ و پترۆلێ دا “كۆمپانیا ڕۆزنه‌فت” بوو, بێگومان راكێشانا ڤان كۆمپانیایێن (زه‌به‌لاح) بۆ كوردستانێ نه‌ كاره‌كێ هندێ ب ساناهیه‌, چونكو هه‌كه‌ گرێنتیه‌ك نه‌بیت بۆ وان كۆمپانیان ل كوردستانێ ئه‌و نه‌ دنه‌چارن سه‌ر و سامانێ خوه‌ بینه‌ د جهه‌كی دا وه‌به‌رهێنانێ بكه‌ن, ل ڤێره‌ سه‌نگا كوردستانێ دیار دبیت بۆ جیهانێ, چ ژ لایێ ئارامیێ ڤه‌ و چ ژ لایێ هه‌بوونا سامانێن هه‌مه‌جۆر ڤه‌ ل ژێر ئاخا وێ و چ ژ لایێ جهێ وێ یێ ستراتیژیێ و گرنگیا وێ بۆ وه‌لاتێن زلهێز, دیسا نیشانه‌كا باشه‌ بۆ كوردستانێ بخوه‌ ژى, كو سیاسه‌تا حوكمه‌تا هه‌رێما كوردستانێ ل سه‌ر ئاراسته‌یه‌كا ڕاست و دورست برێڤه‌ دچیتو ژ ئارمانجا خوه‌یا هه‌ره‌ مه‌زن نێزیك دبیت كو ئاڤاكرنا ده‌وله‌تا كوردستانی یه‌, هه‌بوونا چه‌ند مه‌زنه‌ كۆمپانیایێن جیهانى ل كوردستانێ مینا (ئیكسۆن موبیل و گازپرۆم و رۆزنه‌فت), پێشى كو خاله‌ك بیت بۆ بلندكرنا ئابوورێ كوردستانێ, گرێنتیه‌كه‌ بۆ خه‌لكێ كوردستانێ كو ئێدى وه‌لاتێ مه‌ ناكه‌ڤیته‌ ژێر په‌ستال و كونترولا چ وه‌لات و چ كه‌سان, چونكو ئه‌و كۆمپانیایێن وه‌لاتێن مه‌زنن و د نه‌چارن ل به‌ر سینگێ هه‌ر وه‌لاته‌كێ دلێ خۆه‌ ببه‌ته‌ ئاخا كوردستانێ براوه‌ستن و به‌ره‌ڤانیێ ژ به‌رژه‌وه‌ندیێن خوه‌ بكه‌ن، ژ به‌ر كو هه‌ر كۆمپانیایه‌ك ب هزاران ملیار دۆلاران دێ ل كوردستانێ مه‌زێخیت و وه‌به‌رهێنانێ پێ كه‌ت.
ئه‌ڤ وه‌ربه‌هێنانه‌ دێ گه‌له‌ك ده‌رگه‌هێن ئابوورى ل كوردستانێ بۆ خه‌لكێ كوردستانێ ڤه‌كه‌ت و حوكمه‌تا كوردستانێ ژ قه‌یرانا ئابوورى قورتال كه‌ت و هه‌ر وه‌سا بۆ خه‌لكێ كوردستانێ ب گشتى ده‌رگه‌هێن ژیانێ دێ ڤه‌كه‌ت و ده‌لیڤێن كارى دێ بۆ خه‌لكێ مه‌هێنه‌ دیتن واته‌ ژیانا خه‌لكێ ڕۆژ ب ڕۆژێ دێ به‌ر ب باشیێ چیت و دێ ژڤى بازنێ ل دوور خوه‌ زڤرینێ ده‌ركه‌ڤین و ژ ڤێ راوه‌ستیانا چه‌ند ساله‌كه‌ ژ ئه‌گه‌رێ برینا بۆدجا هه‌رێما كوردستانێ ژلایێ به‌غدا ڤه‌، دیسا ژ ئه‌گه‌رێ شه‌رێ داعشى و زۆریا ئاواران یاخه‌لكى كوردستانێ تووشبوویێ دێ قورتال بین، هه‌ر وه‌سا پرۆژه‌ و كارێن ماینه‌ راوه‌ستیا و نیڤه‌رۆ دێ ده‌ست ب كارێن خوه‌ كه‌نه‌ ڤه‌ و ئاڤه‌دانى و پێشكه‌فتن دێ كه‌ڤیته‌ د كوردستانێ دا.
دوور نابینین پشتى راكێشانا ڤان كۆمپانیان بۆ وه‌به‌رهێنانێ ل هه‌رێما كوردستانێ كو ده‌لیڤه‌ و باوه‌رى بۆ هنده‌ك كۆمپانیایێن ژ وان بچووكتر ژى بروخسیت ئه‌و ژ به‌رێ خوه‌ بده‌نه‌ كوردستانێ وه‌به‌رهێنانێ تێدا بكه‌ن, چونكو گرێنیتیا وان كۆمپانیایێن مه‌زنن یێن پێشى وان هاتینه‌ د هه‌رێمێ دا وه‌به‌رهێنان كرین, یا خۆیایه‌ كوردستان یا ده‌وله‌مه‌نده‌ نه‌ك ب تنێ ب سامانێ زێرێ ڕه‌ش (پترۆلى) نه‌خێر, ب سه‌دان جۆرێن گانزا د ئاخا كوردستانێ دا هه‌نه‌ پێدڤى ب وه‌به‌رهێنانێ نه‌, دیسا كه‌رتێن گه‌شتیارى و چاندن و ئاڤه‌دانى….تاد, هه‌مى پێدڤى ب وه‌به‌رهێنانێ نه‌.
كوردستان به‌ر ب قووناغه‌كا نوو یا پشتى شه‌ڕێ داعشێ پێنگاڤان دهاڤێژیت, و ب دیتنا من دێ قووناغا وه‌رار و گه‌شه‌یا ئابوورى و ئاڤه‌دانیێ و قووناغا به‌ر ب ده‌وله‌تبوونێ بیت, ئاسۆیێن نوو دێ ده‌رگه‌هێن خوه‌ بۆ كوردستانێ ڤه‌كه‌ن, ئه‌ڤه‌ ژى هه‌مى ب بزاڤ و شاره‌زایى و بسپۆرى و خه‌مخوریا ئه‌ندازیار و سیاسه‌تمه‌دار و نه‌خشه‌دارێژێ ئابووریا كوردستانێ “نێچیرڤان بارزانى” هاته‌ به‌رهه‌م, ئه‌و كه‌سێ ئاراسته‌یا ڕاست هه‌لبژارتى و گه‌میا كوردستانێ به‌ر ب كه‌ناریێن ئارام برى, ل سه‌ره‌ڕاى وان هه‌مى به‌ربه‌ستیێن ژ لایێ حوكمه‌تا عێراقێ و هنده‌ك وه‌لاتێن هه‌رێمى، دیسا نافخوه‌یا كوردستانێ ژى بۆ حوكمه‌تا هه‌رێما كوردستانێ هاتینه‌ دانان بۆ ژناڤبرنا ئه‌زمۆنا ئابووریا هه‌رێمێ, به‌لێ ب هیمه‌تا خه‌لك و سه‌كردایه‌تى و حوكمه‌تا كوردستانێ, هه‌مى هه‌ول و بزاڤێن وان ب به‌ر ئاڤێدا چوون و كوردستان ژ لایێ ئابووری ڤه‌ نه‌كه‌فت و رێیا خوه‌ كه‌لاشت و هه‌ر خوه‌ ل سه‌ر پیان گرت و قووناغێن سه‌خت و ب زه‌حمه‌ت برین و زالبوو ل سه‌ر هه‌مى پلان و نه‌خشێن نه‌حه‌ز و دوژمنان, ئه‌ڤرۆكه‌ ژى به‌رهه‌مێ وێ زالبوونێ پشكداریه‌ د كۆربه‌ندێ ئابووریێ جیهانی دا ل سان پترسبۆرگ و ئیمزاكرنا گرێبه‌ستانه‌ ل گه‌ل مه‌زنه‌ كۆمپانیایێن جیهانێ و یا ژ هه‌میان دیارتر كۆمپانیا “روزنه‌فت” بوو, كو ئه‌ڤه‌ نیشانێن هندێ نه‌ كو كوردستان به‌ ب ئاسۆیه‌كێ نوڤ پێنگاڤان دهاڤێژیت.

20

ئێك ژ مافێن ڕه‌وایێن هه‌ڤولاتى ده‌نگێ وى یه‌, ڤێجا بۆ هه‌ر كاره‌كێ پێدڤى ب ده‌نگێ وى بیت ل وى ده‌مى هه‌ڤولاتى هه‌مى مافێن هه‌ین ب ئازادانه‌ و وه‌كو تاك به‌شدار بیت, د هه‌ر پڕسه‌كا نه‌ته‌وه‌یى دا گرێدایى چاره‌نڤێسێ وى ونفشێ وى بیت, چونكو هه‌تایێ هه‌تایێ پارته‌ك یان لایه‌نیك ب تنێ ل سه‌ر ده‌ستهه‌لاتێ دا نامینیت, به‌لێ هه‌ڤولاتى هه‌تا هه‌تایێ دێ د گۆره‌پانێدا بیت, له‌وما چاره‌نڤێس و بریارێن نه‌ته‌وه‌یى و چاره‌نڤێسى گرێدایى هه‌ڤولاتیانه‌ نه‌ك پارت و لایه‌نێن سیاسى, ب تنێ لایه‌نێن سیاسى ڕێكخه‌رن, وجه بجهكار هه‌ڤولاتینه‌.
ئێك ژ بابه‌تێن هه‌ر گڕنگ و گه‌رموگوڕ نوكه‌ د گۆره‌پانا گوردستانێدا بابه‌تێ گشت پڕسیێ یه‌, كو هه‌مى دانوستاندنێن لایه‌نێن سیاسى و كه‌نالێن راگه‌هاندنێ پێڤه‌ دمژوولن و هه‌تا شوڕبوویه‌ د ناڤ جادێ ژی دا و ڤه‌گڕتیه‌, ل هه‌ر جهه‌كى گه‌نگه‌شه‌ و دانوستاندن ل سه‌ر ڤێ پڕۆسیسێ یه‌, ئه‌ڤه‌ ژى مافه‌كێ دستوورى و یاسایێ هه‌ڤولاتیه‌, ل ڤێره‌ دبینین گه‌له‌ك پارت و لایه‌نێن كوردستانێ یێن سه‌د ئیشك و كوڕیشكان ل ڤێ پڕسێ دده‌ن و هه‌ر وه‌كو ئه‌و بریارده‌رن ژ پێش هه‌ڤولاتى ڤه‌,هند یێن گرێده‌ن ب لیژنێن گشت پڕسیێ ڤه‌ و هند یێن گرێده‌ین ب ده‌ڤه‌رێن ڤه‌قه‌تیایى ژ كوردستانێ ڤه‌ و هند یێن گرێده‌ن ب نه‌كراكرنا په‌رله‌مانى ڤه‌, هه‌لبه‌ت هه‌ر ئێكى مه‌به‌ستێن خوه‌ یێن تایبه‌ت ل پشت نه‌هڤرابوونا ڤێ پڕۆسێ هه‌نه‌, ئه‌ڤه‌ و زێده‌بارى به‌رژه‌وه‌ندیێن وه‌لاتێن هه‌رێمى و ده‌ستێ وان دگه‌ل پارت و لایه‌نانێن كوردستانى.
گومان تێدا نینه‌, هه‌نده‌ك لایه‌نێن كوردستانى نه‌ خودانێن خوه‌ بریارێ نه‌, به‌لكو بریار ل هنده‌ك وه‌لاتێن دى ژپێشڤه‌ دهێته‌ دان و پێ دهێته‌كرن و پاشى ئه‌و ل دووڤ (ئه‌جندایێن) وان وه‌لاتان برێڤه‌ دچن, چ پێ نه‌ڤێت وان وه‌لاتان, نه‌ دوهى و نه‌ نوكه‌ ونه‌ سوباهى نه‌ڤێت كورد ڤێ گشت پڕسیێ ئه‌نجام بده‌ن و هندى بشێن دێ ئاسته‌نگ و به‌ربه‌ستان ئێخنه‌ د رێیا ئه‌ڤێ پڕۆسێ دا, چونكو ب ئه‌نجامدانا گشت پڕسیێ باش ئه‌و دزانن ئێدى هێدى هێدى ده‌ستێن وان دهێنه‌ قوتكرن و نه‌شێن وه‌كو به‌رێ یان وه‌كو وان دڤێت مایتێكرنێ د كوردستانێ دا بكه‌ن, چونكو ئه‌و دزانن پێنگاڤا پشتى گشت پڕسیێ ده‌وله‌تبوونا كوردستانێ یه‌, ل وى ده‌مى كوردستان دێ بیته‌ وه‌لاته‌كێ خودان سه‌روه‌رى و ل دووڤ یاسا و ڕێسایێن نیڤنه‌ته‌وه‌یى دێ سه‌ره‌ده‌رى دگه‌ل هێته‌كرن وڕێ بۆ چ وه‌لاتان ناهێته‌ دان مایتێكرنێ دكێش و بێش و هه‌ر تشته‌كێ گرێدایى ب كوردستانێ ڤه‌ بكه‌ن.
ژ لایه‌كێ دی ڤه‌ ئه‌و پارت و وه‌لایه‌نێن به‌ربه‌ستان دئێخنه‌ د رێیا گشت پڕسێ دا, ئه‌و دزانن پشتى ڤێ پڕۆسیێ دێ ڕۆلێ وان كز بیت و هێدى هێدى دێ به‌ژه‌وه‌ندیێن خوه‌ یێن تایبه‌ت چ یێن دارایى و چ یێن ده‌ستهه‌لاتێ ژ ده‌ست ده‌ن, ئێدى وه‌كو به‌رێ نه‌شێن بالا ده‌ستیا خوه‌ ل سه‌ر خه‌لكى و ده‌ڤه‌رێ ب چه‌سپینن, دیسا ئه‌و باش دزانن كو پشتى سه‌روه‌ریا كوردستانێ دێ یاسایه‌ك هێته‌ دانان و هه‌مى چالاكى و ده‌رچوون سه‌ره‌دانێن وان دێ سنۆردار كه‌ت و ئه‌گه‌ر پێگیرى ب وێ یاسایێ نه‌كر دێ ب(خیانه‌تكار) هێنه‌ ل قه‌له‌مدان, له‌وما ئه‌و ب هه‌مى شیانێن خوه‌ دێ بزاڤێ كه‌ن گشت پڕسى نه‌هێته‌ كرن, چونكو ئه‌و خوه‌ ب خودانێن ڤى خه‌لكى نزانن, به‌لكو به‌ژه‌وه‌ندیى و بازڕگانیا وان گه‌له‌ك گرنگتره‌ ژ مافێن هه‌ڤولاتیان و به‌رژه‌وه‌ندیا گشتى و گشت پڕسى و ده‌وله‌تبوونا كوردستانێ.
لێ دڤێت به‌ڕك ژ بن وان بهێته‌ ڕاكێشان و نه‌بنه‌ میراتگرێن خه‌لكى, ئه‌ڤرۆ خه‌لك ب گشتى یێ چاڤدێریا كاودانان دكه‌ن و خه‌لك گه‌له‌ك و گه‌له‌ك یێ ب له‌زه‌ ژ بۆ ئه‌نجامدانا گشت پڕسیێ, چونكو ده‌هان ساله‌ خه‌لكێ كوردستانێ خه‌باتێ دكه‌ت و قوربانیان دده‌ت, داكو ڤێ پێنگاڤێ بهاڤێژیت, ئه‌ڤه‌ مافه‌كێ ڕه‌وایێ خه‌لكى یه‌, بۆ چ پارت و لایه‌نان نینه‌ ببنه‌ ڕێگر و به‌ڕبه‌ستان دانن داكو نه‌هێته‌ ئه‌نجامدان، دۆخ یا به‌رهه‌ڤه‌ و زه‌مینه‌ یێ خۆشه‌ و باوه‌ر ناكه‌م چ جاره‌كا دیتر ده‌رفه‌ته‌كا هۆسا بهه‌لكه‌ڤیت بۆ مه‌ كوردستانیان, ل سه‌ره‌ڕایى هندێ ژى هه‌لویستێ وه‌لاتێن ئوروپى و ڕۆژئاڤا و ئه‌مریكا و هنده‌ك وه‌لاتێن عه‌ره‌بان گه‌له‌ك دباشن و پشته‌ڤانن و هنده‌ك ژى هێژ دودلن, به‌لێ ئه‌گه‌ر هاته‌ كرن, ئه‌ز باوه‌رم هه‌مى دێ هێنه‌ گوهارتن و دێ بنه‌ پشته‌ڤان بۆ ده‌وله‌تا كوردستانێ.
دڤێت ڕاپڕسى بهێته‌كرن ب هه‌ر ڕه‌نگه‌كێ بیت, ئه‌ز باوه‌رم ئه‌ڤ پارت و لایه‌نێن كوردستانى یێن نوكه‌ هه‌ڤڕكیا گشت پڕسیێ دكه‌ن, پشتى ئه‌نجامدانێ و بده‌ستڤه‌ئینانا پتر ژ 95% ده‌نگێن (به‌لێ), دێ ژ نوو هێن و خوه‌ كه‌نه‌ خودانێن ڕاپرسیێ و دێ دوورشمێن نه‌ته‌وه‌یى بلندكه‌ن و دێ ژبیر كه‌ن كو وان گه‌له‌ك به‌ربه‌ست دانابوون بۆ نه‌ئه‌نجامدانێ, به‌لێ ل سه‌ر دفنا وان هه‌ر ڕاپرسى هاته‌ كرن.
فه‌ره‌ به‌رى گشت پڕسیێ ڕایا خه‌لكى ب ڕێیا ڕاگه‌هاندنێ چ كه‌نالێن تێلفزیۆنى یان ڕۆژنامه‌ و رادیۆ بهێته‌ وه‌رگرتن ب تایبه‌تى ل ده‌ڤه‌رێن ژ كوردستانێ ڤه‌قه‌تیایى, هه‌ر چه‌نده‌ گومان تێدا نینه‌ هه‌مى پشته‌ڤان خوازیارن ڕاپڕسى بهێته‌ كرن.
له‌وما داخوازا ژ سه‌رۆكاتیا هه‌رێما كوردستانێ و سه‌رۆك مه‌سعود بارزانى و سه‌رۆكایه‌تیا حوكمه‌تا هه‌رێما كوردستانێ دكه‌ین, ب چ ڕه‌نگان پاشگه‌ز نه‌بن, ئه‌ڤرۆ به‌رى سوباهى بریارێ بده‌ن, و وێ ڕاپرسیێ بكه‌ین و ده‌وله‌تا خۆه‌ ڕاگه‌هینین, و هه‌ر پارت و لایه‌نه‌ك یان هه‌تا ده‌ڤه‌ره‌ك ژى پشكداریێ نه‌كه‌ت, دێ د دیرۆكا كورستانێدا ب(خیانه‌تكار) و دووڤه‌لانكێن دوژمنێن كوردان هێنه‌ ل قه‌له‌مدان, مه‌ ب تنێ پێدڤى ب ڕایا گشتى و یا خه‌لكى هه‌یه‌, نه‌ك حزب و لایه‌نان.

36

ل بیرا مه‌یه‌ پێشى چه‌ند ساله‌كان وه‌لاتێ تركیا ب هه‌مى شیانێن خوه‌ڤه‌ دژایه‌تیا كوردان دكر تا وێ ڕادێ سه‌ركردێن وان دگۆت، هه‌كه‌ وه‌لاته‌كێ كوردى ل باشۆرێ ئه‌فریقیا بهێته‌ پێكئینان ئه‌م د ئاماده‌ینه‌ ڕێگریێ لێ بكه‌ین و ژناڤببه‌ین، ئه‌ڤ هه‌لویستێ ڕه‌ق یێ تركیا چه‌ندین سالان دهاته‌ په‌یره‌و كرن دژى نه‌ته‌وا كورد، لێ پشتى سه‌رهه‌لدانا سالا1991ز, ب تایبه‌تى پشتى حوكمه‌تا هه‌رێما كوردستانێ هاتیه‌ پێكئینان و كۆمپانیایێن وه‌لاتێن بیانى هاتینه‌ د ناڤ كوردستانی َدا و وه‌به‌رهێنان لێ كرین و زێرێ ڕه‌ش ل ژێر ئه‌ردێ وێ هاتیه‌ دیتن و ده‌رئینان, ئه‌ڤێ چه‌ندێ گوهارتنێن بنه‌ره‌تى د هه‌لویستێن تركیان دا په‌یداكرن و هێدى هێدى هه‌لویستێن وان یێن ڕه‌ق به‌ر ب نه‌رماتیێ ڤه‌ چوون و كۆمپانیایێن وان هاتنه‌ د كوردستانێ دا ژ بۆ وه‌به‌رهێنانێ و د كه‌رتێن ئاڤه‌دانیێ و پیشه‌سازیێ و..هتد دا كاركرن، ب سیاسه‌تا ڕاسته‌قینه‌ یا سه‌رۆك بارزانى، هه‌مى ئه‌گه‌رێن دبوونه‌ ڕێگر ل به‌رامبه‌ر دانپێدانا تركیا ب كوردان هاتنه‌ ڤه‌وژارتن و راكرن, تركیا بوو هاریكار و ڕێخۆشكه‌ر ژ بۆ هنارتنا په‌ترۆلا كوردستانێ بۆ جیهانا ژده‌رڤه‌، دیسا ڕێكه‌فتنه‌كا پێنجى سالى د ناڤبه‌را حوكمه‌تا هه‌رێما كوردستانێ و تركیان دا هاته‌ موركرن و چه‌ندین جاران سه‌رۆك بارزانى و سه‌رۆك وه‌زیرێن هه‌رێما كوردستانێ سه‌ره‌دانا توركیا كرن, وه‌كو سه‌رۆك وه‌لات پێشوازى لێ دهاته‌ كرن و ئالایێ كوردستانێ ل كێله‌كا ئالایێ توركیا د وان هه‌ڤدیتنان دا هاتنه‌ دانان و سه‌رۆك وه‌زیرێن تركیا ژى چه‌ندین جاران سه‌ره‌دانا كوردستانێ كریه‌ و زێده‌بارى هندێ ژى وه‌زیر و كاربه‌ده‌ست و كه‌سێن دیتر یێن پایه‌ بلند د حوكمه‌تێن هه‌ردو وه‌لاتاندا سه‌ره‌دنا ئێكودو كریه‌. ل ڤێره‌ دێ هێنیه‌ سه‌ركاكلكا بابه‌تێ خوه‌, ئه‌و گوهۆرینا د هه‌لویستێ تركیان دا په‌یدابووى، نه‌ك تنێ بۆ هه‌رێما كوردستانێ بوو، نه‌خێر چاكی و باشیا وێ بۆ كوردستانا باكۆر بخوه‌ ژى بوو، چونكو پشتى هینگێ و ب ڕاسپاردێن سه‌رۆك بارزانى، گه‌له‌ك ئاسانكارى بۆ كوردێن باكۆر ـ تركیا هاتنه‌كرن و ڕێ بۆ وان هاته‌ خۆشكرن كو ب كوردى باخڤن و كه‌نالێن كوردى ڤه‌كه‌ن و جلكێن كوردى بكه‌نه‌ به‌رخوه‌، هه‌تا خواندن و نڤێسین و په‌روه‌رده‌ ژى ب كوردى هاته‌كرن و هه‌تا وێ ڕادێ شیان پشكداریێ د په‌رله‌مان و حوكمه‌تا تركیا دا بكه‌ن, نزێكى 60 په‌رله‌مانتار شیان بچنه‌ د ناڤ په‌رله‌مانێ تركیان دا و هه‌مى سه‌رۆك باژێرڤانیێن باژێرێن كوردستانێ بوونه‌ كورد و ئه‌ڤه‌ هه‌مى ب خێرا په‌ترۆلا هه‌رێما كوردستانێ و سه‌رۆك بارزانى و سیاسه‌تا حوكمه‌تا هه‌رێما كوردستانێ بوو. سه‌رۆك بارزانى چاوا به‌رێ خوه‌ ددا هه‌رێما كوردستانێ و پارێزگارى لێدكر هه‌ر ب وى ڕه‌نگى به‌ره‌ڤانى ژ كوردستانا باكۆر ژى دكر, ڕۆژ ب ڕۆژێ كاودانێن وان به‌ر ب باشیێ ڤه‌ چوون, به‌لێ ژ ئه‌گه‌رێ سیاسه‌تا وان یا شاش و گوهدانا وان بۆ “جه‌میل بایك”ى كو ئه‌و بخوه‌ كه‌سه‌كێ (عه‌له‌وى) شیعه‌ مه‌سه‌به‌، هاته‌ هاندان ژ لایێ ئیران و عێراقێ ڤه‌ داكو وێ پێشكه‌فتنا ل كوردستانا باكۆر و په‌یوه‌ندیێن وان ب هه‌رێما كوردستانێ ڤه‌ تێكبده‌ن و ببڕن, چونكو ئیرانێ دزانى هه‌كه‌ كورد ل باكۆر بگه‌هنه‌ مافێن خوه‌ دێ كوردێن ئیرانێ ژى پێنگاڤێن ب وى ڕه‌نگى هاڤێژن، مخابن (بایك) ئه‌و كر یا ژ وى هاتیه‌ خواستن، چونكو یا ب دلێ وى ژى بوو, و وى هزردكر هه‌كه‌ هه‌ده‌په‌ ب هێز كه‌فت دێ بیته‌ شوونگرا په‌كه‌كێ ل تركیا له‌وما ب هاندانا كوردان و هه‌ده‌پێ ڕابوو و یا ژ وێ وێرانتر سیاسه‌تمه‌دارێن كوردستانا باكۆر و خه‌لكێ وێ وب تایبه‌تى ئه‌ندامێن هه‌ده‌پێ كه‌فتنه‌ ل بن باندۆرا وان و گوهێ خوه‌ دا په‌كه‌كێ و ڕابوون ب كولانا خه‌نده‌كان د ناڤ باژێرێن خوه‌ دا و هه‌مى تاخ و كولان كرنه‌ چه‌په‌رێن شه‌رى و ب فیتا (بایكى و په‌كه‌كێ)، پولیس كوشتن و به‌رامبه‌رى حوكمه‌تا تركیا ڕاوه‌ستیان, ئه‌ڤه‌ گه‌له‌ك یا ب دلێ ئیرانێ و عێراقێ بوو, هه‌تا گه‌هشتیه‌ وێ ڕادێ حوكمه‌تا تركیا بیر ل ڤه‌گه‌ریانا خوه‌ ژ پرۆژێ ئاشتیێ كر و ده‌ست ب گرتنا ئه‌ندام ولاینگرێن هه‌ده‌پێ و كوردان كر, سه‌رۆكێ هه‌ده‌پێ و ئه‌ندام په‌رله‌مانێن كورد پارێزبه‌ندى ل سه‌ر ڕاكرن و گرتن و دادگه‌ه و زیندانكرن, دیسا هه‌مى سه‌رۆكێن باژێرڤانیان هاتنه‌ لادان و ل شوونا وان (قه‌یوم) هاتنه‌ دانان, ئها بایكى و په‌كه‌كێ ئه‌ڤه‌ دڤیا. پشتى هه‌ده‌په‌ و سه‌ركردێن وێ بێهیڤى بووین و ب سه‌ر شاشیا خوه‌ هه‌لبووین ژ نوو هه‌وارا خوه‌ ئینانده‌ به‌رسینگێ سه‌رۆك بارزانى كو چاره‌كێ بۆ وان ببینیت, “ئه‌حمه‌د تورك”ى گۆت، بارزانى سه‌رۆكێ گه‌لێ كورده‌, ب راستى یا سه‌یره‌ ل ده‌مێ بارزانى ل به‌رفره‌هیێ سه‌رۆكێ گه‌لێ كورد نه‌بوو و وان ل گه‌ل هنده‌ك پارتێن كوردستانێ و ئیرانى و عێراقێ قولپ ل دژى بارزانى گرێدان و ب بارزانى ب سه‌رۆك نه‌دزانى و نوكه‌ پشتى وه‌ریسێ خه‌ندقاندنێ كه‌فتیه‌ حه‌فكا وان و ژناڤچوونا خوه‌ ل پێش چاڤێن خوه‌ دیتى ژ نوو گازیا ڕادهێلن و داخوازا هاریكاریێ ژ سه‌رۆك بارزانى دكه‌ن, ناهێته‌ ڤه‌شارتن سه‌رۆك بارزانى ل پێشده‌م چه‌ندین جاران ئه‌و هشیاركربوون و ئامۆژگارى ل وان كربوو, به‌لێ وان بارزانى ب هه‌ڤالێ تركیا وه‌كو دوژمن دزانى, د ئاماده‌ نه‌بوون پێشوازیا سه‌رۆكى بارزانى بكه‌ن و بیرا مه‌ هه‌میان ل سه‌ره‌دانا سه‌رۆك بارزانى دهێت بۆ باژێرێ ئامه‌دێ ل ده‌مێ سه‌رۆك وه‌زیر ئه‌ردوغان هاتیه‌ پێشوازیا سه‌رۆكى، سیاسه‌تمه‌دارێن هه‌ده‌پێ و سه‌ركردێن وێ بانگه‌شا (حاشا) خیانه‌تێ بۆ سه‌رۆكى دكر و د ئاماده‌نه‌بوون پێشوازیێ لێ بكه‌ن و نوكه‌ سه‌رۆك سه‌رۆكێ گه‌لێ كورده‌. ئه‌م دزانین ئه‌و دبێ نان و خوێ نه‌، لێ ئه‌ز باوه‌رم سه‌رۆك ل ڤێ جارێ ژى دێ ل هه‌وارا وان چیت, هه‌ر وه‌كو چاوان ب هاریكاریا نێچیرڤان بارزانى “ئه‌حمه‌د تورك” ژ زیندانێ هاتیه‌ ئازادكرى، بارزانى دێ بزاڤا ئازادكرنا ئه‌وێن ماین ژى كه‌ت،

هه‌مان هه‌لویستێ به‌رێ دێ وان به‌رامبه‌رى سه‌رۆكى كوردستانێ و حوكمه‌تا هه‌رێما كوردستانێ هه‌بیت, هه‌ر وه‌كو چاوان نوكه‌ یه‌په‌كێ و په‌كه‌كێ و لایه‌نگرێن وێ دژى سه‌رۆكى و حوكمه‌تا هه‌رێما كوردستانێ دراوستن و دئاخڤن.

24

ل ده‌سپێكا شه‌رێ داعشێ بۆ سه‌ر كوردستانێ, سه‌رۆكێ فره‌نسا (فره‌نسوا ئولاند) سه‌ره‌دانا كوردستانێ كر، ل وى ده‌مى چ ده‌نگێن نه‌رازیبوونێ نه‌ ژ چ كه‌نالان و نه‌ ژ چ تۆرێن جڤاكى بلند نه‌بوون، به‌لكو هه‌مى د سۆپاسدار بوون، سه‌رۆكه‌كێ وه‌كو وه‌لاتێ فره‌نسا سه‌ره‌دانا كوردستانێ بكه‌ت، چونكو كوردستان د مه‌ترسیێ دابوو و پارت و لایه‌نێن ئه‌ڤرۆ دئاخڤن، به‌رژه‌وه‌ندیێن وان كه‌فتبوونه‌ د مه‌ترسیێ دا، ده‌ستێن هه‌میان ل سه‌ر ئه‌ڤراز بوون دا كو حوكمه‌تێن ئه‌ورۆپا یان ئه‌مریكا د هه‌وارا كوردستانێ بهێن، وه‌لاتێن جیهانێ د هه‌وارا كوردستانێ هاتن و ب هاریكاریا وه‌لاتێن ئورۆپى و ئه‌مریكا نه‌كو ب تنێ مه‌ترسیا داعش ل سه‌ر كوردستانێ هاته‌ لادان, به‌لكو ئه‌و ئه‌ردێ داعشێ گرتى, هه‌مى پێشمه‌رگه‌ى ب خوینا خوه‌ ڤه‌گه‌راند و دیسا 95% ده‌ڤه‌رێن ڤه‌قه‌تیایى ژ ئه‌ردێ كوردستانێ ب زه‌ندوباسكێن پێشمه‌رگه‌ى هاته‌ ڤه‌گه‌راندن، و نوكه‌ وه‌كو نه‌خشه‌ ئه‌ردێ هه‌رێما كوردستانێ هاته‌ دیاركرن.
ل ده‌سپێكا سالا2017 بۆ جارا دوویێ سه‌رۆكێ فره‌نسا سه‌ره‌دانا كوردستانێ كر و پێشوازیه‌كا گه‌رم و پروتۆكولى لێ هاته‌ كرن، ناڤبرى ل گه‌ل سه‌رۆكێ هه‌رێما كوردستانێ سه‌ره‌دانا به‌رۆكێن شه‌ڕى ژى كر, دا كو ژ نێزیك هایدارى ره‌وشا ده‌ڤه‌رێ و به‌رۆكێن شه‌رى ببیت, ئه‌ڤه‌ جهێ سه‌رفه‌رازیا خه‌لكێ كوردستانێ بوو.
لێ یا سه‌یر ئه‌و بوو هنده‌ك لایه‌ن چ د كه‌نالێن راگه‌هاندنێ دا, یێن دیتن و بیستن و خواندنێ یان د تۆرێن جڤاكی دا, كه‌فتنه‌ پرۆپاگندێ دژى ئه‌ڤێ سه‌ره‌دانێ و هێرشكرنه‌ ل سه‌ر سه‌ره‌دانكرنا سه‌رۆكێ فره‌نسا و بزاڤا هه‌میان ئه‌و بوو ڤێ سه‌ره‌دانێ بێ نرخ و بها بكه‌ن, یا ژبیركرى ئه‌ڤه‌ هه‌ر ئه‌و سه‌رۆكه‌ یێ د گه‌رمه‌گه‌رما شه‌ڕێ داعش دا سه‌ره‌دانا كوردستانێ كرى و ل وى ده‌مى هه‌مى دسۆپاسدار بوون بۆ ئه‌ڤى سه‌رۆكى.
نزانم وان چ ل به‌ره‌ یان چ مه‌ره‌م پێ هه‌یه‌, ئه‌رێ چونكو ب دلێ ئاغایێن وان نه‌بوو؟, و ل پایته‌ختێ خولامێن ئاغایێن وان پێشه‌وازیه‌كا گه‌رم لێ نه‌ هاته‌ كرن، ئه‌و هاتینه‌ ئاگاداركرن كو دژایه‌تیا خوه‌ بۆ ئه‌ڤێ سه‌ره‌دانا ده‌رببرن، یان وان پێ نه‌خۆشبوو كو ژ لایێ سه‌رۆكێ كوردستانێ ڤه‌ (مسعود بارزانى) پێشوازى لێ هاته‌ كرن، له‌وما ئه‌و پرۆپاگندا ب هێز ئه‌ڤه‌ چه‌ند ڕوژه‌ د تۆرێن جڤاكی دا سه‌رهلدایه‌.
وه‌كو ئه‌م هه‌مى دزانین وه‌لاتێ فره‌نسا ئێك ژ وان وه‌لاتێن هه‌رده‌می یه‌ ل نه‌ته‌وه‌یێن ئێكگرتی و هه‌ر وه‌لاتێ فره‌نسا بوو ل سالا1991ز, خوه‌ ل كوردان كریه‌ خودان و د هه‌وارا كوردان هاتى و به‌رده‌وام هاریكاریا كوردستانێ كریه‌ و به‌رى هه‌مى وه‌لاتێن جیهانێ د شه‌ڕێ داعشێ دا د هه‌وارا كوردان هاتیه‌ و ل پلا دوویێ دهێت پشتى ئه‌مریكا كو هاریكارى و چه‌ك و ته‌قه‌مه‌نى و كه‌لوپه‌لێن سه‌ربازى پێشكێشى كوردستانێ كرین، دژاتیا ڤێ سه‌ره‌دانێ ب دیتنا من دژایه‌تیكرنا پرۆژێ سه‌ربه‌خوه‌یا كوردستانێ یه‌, چونكو ژ سه‌ره‌دانا سه‌رۆكێ فره‌نسا دیار دبیت, كو ئه‌ڤه‌ دانپێدانه‌ ب ده‌وله‌تا كوردستانێ به‌رى بهێته‌ راگه‌هاندن.
ژ لایه‌كێ دى ڤه‌ سه‌ره‌دانا سه‌رۆكێ فره‌نسا بۆ به‌رۆكێن شه‌رى, ته‌كه‌سكرنه‌ ل سه‌ر گرنگیا رۆلێ پێشمه‌رگه‌ى ل ڕۆژهه‌لاتا ناڤین, كو پێشبینى دهێته‌ كرن ڕۆژه‌كێ ژ ڕۆژان هێزا پێشمه‌رگه‌ى و وه‌كو هێزه‌كا گاریگه‌ر بچیته‌ د ناڤ هێزێن ناتویێ دا و دێ بیته‌ ئێك ژ وان هێزین به‌ره‌ڤانیێ ژ مرۆڤاتیێ و ته‌په‌سه‌ریا گه‌لان دكه‌ن، هه‌ر وه‌كو چاوا ئه‌ڤرۆ سه‌ربازێن وه‌لاتێن ئه‌ورۆپا و ئه‌مریكا هاتینه‌ كوردستانێ و به‌ره‌ڤانیێ ژ مرۆڤاتیێ دكه‌ن, هه‌ر ب وى ڕه‌نگى پێشمه‌رگێ كوردستانێ ژى دێ چیته‌ هنده‌ك وه‌لاتێن بنده‌ستكرى و به‌رڤانیێ ژ مرۆڤاتیێ دكه‌ت, چونكو پێشمه‌رگه‌ى سه‌لماندیه‌ هێزه‌كا مرۆڤ دۆست و مرۆڤ پارێزه‌ و هه‌مى پره‌نسیبێن مرۆڤاتیێ ل ده‌ڤ هه‌نه‌، سه‌رۆكێ فره‌نسا ب ئه‌ڤى چاڤى به‌رێ خۆه‌ دده‌ته‌ هێزێن پێشمه‌رگه‌ى, لێ مخابن هنده‌ك لایه‌نێن ناڤخوه‌ى ب چاڤێ دوژمنان به‌رێ خوه‌ دده‌نه‌ پێشمه‌رگه‌ى.
دڤێت لایه‌نگر و دۆست هه‌ڤالێن وان لایه‌نان ڤێ چه‌ندێ بزانن, كو ئه‌و كه‌س رێڤه‌به‌ریا وان دكه‌ن, ژ پره‌نسیبێن شۆره‌شگێریێ و وه‌لاتپارێزیێ نیشتیمانبوونێ ده‌ركه‌فتینه‌ و بووینه‌ بازرگان و بۆ خوه‌ بازرگانیێ ب لاینگر و دۆست و هه‌ڤالێن خوه‌ دكه‌ن, ئه‌و بزاڤێ دكه‌ن هه‌مى پێنگاڤ وكارێ بۆ سه‌ربه‌خوه‌یا كوردستانێ دهێته‌ كرن, ل به‌ر چاڤێن لاینگرێن خوه‌ به‌روڤاژى بكه‌ن وب هه‌مى شیانێن خوه‌ دژاتیا ڤى پرۆژه‌ى دكه‌ن و سۆته‌مه‌نیا وان ژى خه‌لكێ سڤیل و بێ گونه‌هه‌, چ جار جار خه‌لكى بنێرنه‌ سه‌ر جادان یان بهێنه‌ هاندان ب رێیا تۆرێن جڤاكى و نڤێسینان كار دژى حوكمه‌تا هه‌ولێرێ بكه‌ن.

32

هزركرن د هه‌لۆیست و بێده‌نگیا سه‌رۆك كۆمارێ عێراقێ دا د. فوئاد مه‌عصۆم، مرۆڤى حێبه‌تى دكه‌ت و ڤه‌دچنیقیت ب تایبه‌تى ل ده‌مێ بیرا مرۆڤى ل سه‌رۆك كومارێ عێراقێ دهێت، یابوویه‌ جهێ پرسیارێ, كوردان بۆچى شه‌ڕ ل سه‌ر وى پۆستى دكر ل ده‌مێ سه‌رۆكه‌كێ بێ ده‌ستهه‌لات و بێ هه‌لۆیست وێ كورسیێ پر بكه‌ت، ئه‌رێ گه‌له‌ك باشتر نه‌بوو هه‌كه‌ كوردان شه‌ڕ ل سه‌ر كورسیا سه‌رۆك په‌رله‌مانى كربایه‌؟.
ل ڤێره‌ پرسیاره‌كا دیتر سه‌رهلدده‌ت و مرۆڤ به‌رده‌وام ڤێ پرسیارێ ژ خوه‌ دكه‌ت سه‌رۆك كۆمار ب خوه‌ یێ بێ ده‌نگه‌ یان هاتیه‌ بێده‌نگ كرن، ژبه‌ركو سه‌رۆك كۆمار بلندترین پۆسته‌ د كۆمارێ دا ل سه‌ره‌ڕایى هندێ كو ده‌ستهه‌لاتا وى ده‌ستنیشانكریه‌, به‌لێ هه‌ر چ نه‌بیت مافێ (ڤیتۆ) كرنێ و هنده‌ك ده‌ستهه‌لات هه‌نه‌ ل به‌رامبه‌رى هه‌ر قانوونه‌كێ بكار بینیت، هه‌كه‌ چ نه‌بیت وه‌كو داخۆیانى بهێته‌ به‌لاڤكرن.
یان پشتى سه‌رۆك كۆمار گه‌هشتیه‌ كورسیا سه‌رۆك كۆماریێ خوه‌ بێده‌نگ كربیت داكو ته‌خشان وپه‌خشانێن وى ژێ نه‌هێنه‌ برین وه‌رگرتن و نه‌كه‌ڤنه‌ د مه‌ترسێ دا، بلا چ ب سه‌رێ وێ نه‌ته‌وه‌ێ بهێت یا ل سه‌ر خوین وده‌نگێ وان چوویه‌ ل سه‌ر وێ كورسیێ و خوه‌ بێده‌نگ كربیت ل سه‌ر هه‌ر تشته‌كێ ل به‌رامبه‌رى كورد و وان پرسێن گرێدایى ب كوردان ڤه‌ دا كو ژ ده‌ستنه‌ده‌ت, یان ژى سه‌رۆك كۆمارى خوه‌ فرۆتیه‌ و هاتیه‌ بێده‌نگ كرن چ ژ لایێ پارتا وى ڤه‌ یان هه‌ڤپه‌یمانێن وێ چ ل به‌غدا یان ل سلێمانیێ و ل به‌ارمبه‌ر دا تشته‌ك پێ هاتیه‌ گۆتن و دان, ئه‌ڤه‌ دو پرسیارن وپێدڤى ب به‌رسڤدانێ نه‌؟.
ئه‌م هه‌مى دزانین كو ده‌ستهه‌لاتا سه‌رۆك كۆمارى بلندترین ده‌ستهه‌لاته‌ د وه‌لاتیدا ل سه‌ره‌ڕاى كێمبوون سنۆرداركرنا ده‌ستهه‌لاتێن سه‌رۆك كۆمارى ل دووڤ دستوورى، لێ هه‌ر هنده‌ك ده‌ستهه‌لات هه‌نه‌ شۆل ل سه‌ر بكه‌ت، ب تایبه‌تى یێن گرێدایى ب نه‌ته‌وا وى ڤه‌.
مخابن نه‌ ب ڕه‌نگه‌كى فه‌رمى و نه‌فه‌رمى و نه‌ نڤێسكى و نه‌ ب گۆتن مه‌ نه‌ دیتییه‌ هێژ سه‌رۆك كۆمارێ مه‌ داخۆیانیه‌ك دایى یان ڕایه‌ك پێشكێشكرى یان نه‌رازیبوونه‌ك دیاركرى یان هه‌لۆیسته‌ك وه‌رگرتى ل سه‌ر هه‌ر پرسه‌كێ, ئه‌رێ ب ڕاستى وه‌لاتێ عێراقێ چ پرس و ئاریشه‌ و كێشه‌ تێدا نین، ئه‌رێ وه‌كو مه‌زن دبێژن (شاما شه‌ریفه‌), ئه‌ڤه‌ هنده‌ چار سال ده‌ربازبوون هێژ سه‌رۆك كۆمارى چ تشته‌كى نه‌گۆتى, یان خۆه‌ خشیم دكه‌ت و دبێژیت، هه‌ما هندى به‌حس مه‌ نه‌هێته‌كرن كه‌سێ شۆل ب من و كورسیا من نینه‌, ئه‌و كورسیا سه‌دان جرجر و گه‌نگه‌شه‌ ل سه‌ر هاتینه‌ كرن هه‌تا دوباره‌ ب ده‌ستكوردانڤه‌ هاتى،لێ ئه‌ڤرۆ كورسی وه‌كو تابلۆیه‌كا بێ گیان د نیڤا كوچكه‌كا په‌په‌ووك لێ دخوینیت لێ هاتیه‌, نه‌ كورسیك خوه‌ دلڤلڤینیت و نه‌خودانێ كورسیكێ مێشا ژ خوه‌ دره‌ڤینیت.
ب ڕاستى دڤێت سه‌ركرداتیا كوردان گیانى (روحێ) بده‌ته‌ وێ كورسیكێ و بده‌ته‌ كارى و ل ئه‌گه‌رێن وێ بێده‌نگیێ ڤه‌كۆلیت، چونكو هه‌كه‌ سه‌رۆك كۆمارى ب ئه‌ڤى ڕه‌نگى بیت, پێدڤى ناكه‌ت كورد ئێدى بخوه‌ گه‌نگه‌شێ ل سه‌ر ئه‌ڤى پۆستى بكه‌ن, بلا ئه‌و ژى بۆ عه‌ره‌بان بیت، لێ ئه‌ز باوه‌رم هه‌كه‌ ئه‌و پۆست بۆ عه‌ره‌بێن شیعه‌ یان سونه‌ بایه‌، نوكه‌ هزاران جارا سه‌رۆك كۆمار هاتبایه‌ ده‌نگ ل سه‌ر بچووكترین كێشه‌ و بزاڤ كربایه‌ بۆ لایه‌نێ خوه‌ به‌رى بۆ وه‌لاتێ عێراقێ تشته‌كى ڤه‌گه‌رینیت و دا پشكداریێ د هه‌موو پرسێن وه‌لاتی دا كه‌ت، وه‌كو سه‌رۆك كۆمارێ كورد نه‌ دكه‌فته‌ (چلخانى) و هشیار نه‌دبوو.
وه‌لاتێ عێراقێ ولاتێ شه‌ڕ و كێشه‌ و ئاریشه‌یان، رۆژانه‌ ب سه‌دان روودان داخویانى ژ لایێ هه‌مى به‌رپرسێن عێراقێ ڤه‌ ژ بلندترین دامه‌زراو و ژ ئه‌ندام په‌رله‌مان و وه‌زیر و كاربه‌ده‌ستێن حزبى و له‌شكرى و هه‌تا دگه‌هیته‌ بچووكترین فه‌رمانبه‌ر حوكمه‌تێ و وه‌لاتى هه‌ر ئێكێ مایكه‌ك بچیته‌ به‌ر ده‌ڤى ب سه‌دان ڕایى و گۆتن هه‌نه‌ ل سه‌ر كاودانێن عێراقێ بێژیت، ب تنێ سه‌رۆك كۆمار نه‌بیت چ نینه‌ ل سه‌ر كاودانێن عێراقێ بێژیت.

23

هه‌ردو په‌یامێن جه‌نابێ سه‌رۆك بارزانى چ یا ب هه‌لكه‌فتا ئازادكرنا باشیكێ پێشكێشكرى و چ ئه‌و په‌یاما ئاراسته‌كرى بۆ لایه‌نێن سیاسى ژبۆ چاره‌سه‌ریا كێشێن ناڤخۆیى یێن حكوومه‌تا هه‌رێما كوردستانێ، هه‌ر په‌یامه‌كێ تێگه‌ه و رامان و ئارسته‌یه‌كێ تایبه‌ت ب خوه‌ ڤه‌ دگریت، ئه‌گه‌ر ئه‌م هوورتر به‌رێ خوه‌ بده‌ینه‌ په‌یامێن جه‌نابێ سه‌رۆكى و شرۆڤه‌ بكه‌ین دێ بینین كو سه‌رۆك بارزانى د په‌یاما خوه‌ یا ل باشیكێ پێشكێشكرى ب رۆن و ئاشكرا وێ په‌یامێ ئاراسته‌ى هنده‌ك لایه‌نێن سیاسیێن ده‌ستنیشان كرى دكه‌ت و دیسان د ئاخفتنێن جه‌نابێ سه‌رۆكى دا دیار دبیت كو پێشوه‌خت سه‌رۆك بارزانى ل سه‌ر هه‌مى وان پیلان و كۆده‌تایێن هاتینه‌ دارێژتن ژبۆ نه‌هێلان پارتى و حكوومه‌تا هه‌رێما كوردستانێ و تێكدانا بارودوخێ ته‌ناهیێ ل كوردستانێ ئاگاداره‌، به‌لێ بێ ده‌نگى و بێى كو شه‌رێ برا كوژیێ ل كوردستانێ ژێ په‌یدا ببیت پیلان و كۆده‌تایێن وان هه‌مى ژناڤبرن و یا گرنگ ئه‌و بوو ژناڤبرنا وان هه‌مى پیلانان چ كارتێكرن ل سه‌ر ئازادكرنا ئاخا كوردستانێ و شه‌رێ داعشێ نه‌كر، رێك ئه‌ڤه‌ بیرا مرۆڤى ل شه‌رێ ناڤخۆیى دئینیت د سالێن نۆتان دا ل ده‌مێ هه‌مى هێزێن پارتى دچه‌په‌رێن به‌رگیریێ دا ژ پشتڤه‌ (په‌كه‌كێ) هێرش كریه‌ سه‌ر بنگه‌ه و باره‌گایێن حكوومه‌تێ و پارتى ل وان ده‌ڤه‌رێن ل ژێر ده‌ستهه‌لاتا پارتى ڤه‌، هه‌مان تشت به‌لێ ب جۆر و شێوازه‌كێ دیتر و ڤه‌شارتیتر، نوكه‌ و د دو سالێن چوویی دا پێشمه‌رگه‌ و خه‌لكێ كوردستانێ یێ مژویلى به‌رگێریێ بوو ژ ئاخا كوردستانێ، دێ بینین ل پشترا هنده‌ك لایه‌ن بزاڤا كۆده‌تا و پیلان گێرییان دكه‌ن ل سه‌ر پارتى و حكوومه‌تا هه‌رێما كوردستانێ، به‌لێ وه‌كو جه‌نابێ سه‌رۆك بارزانى گۆتى، گه‌له‌ك (مین و تى ئێن تى) هاتبوونه‌ چاندن و دانان ل سه‌ر رێكا مه‌ و مه‌ هه‌مى راكرن و یێن مایی ژى دێ راكه‌ین و كاروانێ ئازادیێ و سه‌ربخۆیا كوردستانێ دێ یێ به‌رده‌وام بیت، ئه‌ڤ په‌یامه‌ هه‌لگرا واتایه‌كا كووره‌ چ یا سیاسى یان له‌شكرى و هه‌تا جڤاكى ژى، چونكی ژلایێ سیاسى ڤه‌ ناڤ و ده‌نگیا كوردستانێ و جهێ كوردان د هه‌ڤكێشێن جیهانا ده‌رڤه‌ دا و ئه‌و پێشوازیا ل سه‌ر ئاستێن بلند ل سه‌رۆك بارزانى و نوونه‌رێن حكوومه‌تا هه‌رێما كوردستانێ دهێته‌ كرن، ئه‌ڤه‌ بوویه‌ جهێ دل نه‌ره‌حه‌تیا وان لایه‌نان و ب هه‌مى شیانێن خوه‌ڤه‌ ل ده‌رڤه‌ كار كریه‌ داكو ژ ئاستێ سه‌رۆك بارزانى و نوونه‌رایه‌تیا حكوومه‌تا هه‌رێما كوردستانێ كێم بكه‌ن، لێ چ ب ده‌ستێ وان ڤه‌ نه‌هات، له‌وما هند كین د دلی دایه‌ به‌رامبه‌ر بارزانى و حكومه‌تا هه‌رێما كوردستانێ، ژلایێ له‌شكه‌رى ڤه‌ پێشمه‌رگێ كوردستانێ وه‌كو سومبوله‌كا نه‌ته‌وه‌یى و جیهانى هاتیه‌ نیاسین و هه‌مى جیهان رێزێ ل ناڤێ پێشمه‌رگه‌ى دگریت، دیسان پێشمه‌رگه‌ى گوه ل پیلانێن وان لایه‌نان نه‌گرت یێن گه‌له‌ك بزاڤ دكرن داكو دووبه‌ره‌كیێ بێخنه‌ د ناڤ پێشمه‌رگه‌هێ كوردستانێ دا و بكه‌نه‌ دو پشك، ل ڤێره‌ ژى (سه‌رتیرا وان ب به‌رى كه‌فت)، ژلایێ جڤاكى ڤه‌ وان لایه‌نان بزاڤا هندێ دكر دوبه‌ره‌كیێ بێخنه‌ د ناڤبه‌را خه‌لكێ سلێمانیێ و هه‌ولێرێ و دهۆكێ دا و رێ خوه‌ش بكه‌ن بۆ دو ئیداره‌یێ و شه‌رێ برا كوژیێ ئه‌ڤێ ژى سه‌رنه‌گرت، وه‌كو جه‌نابێ سه‌رۆكى گۆتى، هه‌مى ئه‌و (مین و تى ئێن تى) یێن هاتینه‌ چاندن هاتنه‌ راكرن، ژلایه‌كێ دی ڤه‌ په‌یاما باشیكێ، په‌یامه‌كا ئارامكه‌ر و دلڤه‌كه‌ر بوو، ژبۆ خه‌لكێ ده‌شتا نه‌ینه‌وا و ب تایبه‌تى بۆ وان ده‌ڤه‌رێن پرانیا وان كورد تێدا دژین كو ئێدى ئه‌م هه‌وه‌ ناهێلێن و ئارام بن دێ ماف و قه‌ره‌بوویا زیان ڤێكه‌فتیێن هه‌وه‌ بۆ هه‌وه‌ هێته‌ زڤراندن و هه‌ر كه‌سێ دژایه‌تیا كوردان كربیت و شه‌ره‌فا كچێن كوردان پیس كربیت لێ نابۆرین و دێ تولا وان ڤه‌كه‌ین، واته‌ ئه‌ڤ تولڤه‌كرنه‌ نه‌ ب تنێ ب شه‌رێ ئازادكرنا مووسل و ب دووماهى هاتنا داعشێ دێ ته‌مام بیت، نه‌خێر به‌لكو دێ دووڤچوونا وان هه‌مى تاوانباران كه‌ین ل هه‌ر كوژیه‌كێ دونیایێ ئه‌و لێ بن.
په‌یاما سه‌رۆك بارزانى بۆ ئالیێن سیاسى، ب راستى وه‌كو ئه‌ز دخوینم بیرا من ل (خگبه‌ الوداع) یا پێغمبه‌رى(س.خ) دئینیت ل ده‌مێ گۆتیه‌ موسلمانان(الیوم اكملت لكم دینكم)، مه‌به‌ستا من ل ڤێره‌ ئه‌وه‌ جه‌نابێ سه‌رۆك بارزانى، گه‌میا كوردان گه‌هانده‌ كه‌نارێ ئارام و گرنتیه‌ك په‌یدا كریه‌ كو ئێدى به‌ر ب راگه‌هاندنا ده‌وله‌تا كوردى دچین و چ مه‌ترسى ل سه‌ر كوردان نینن، ئێدى كوردان هه‌ڤال و پشته‌ڤان هه‌نه‌ به‌ره‌ڤانیێ ژێ بكه‌ن، واته‌ وى ژى ئه‌ركێ خوه‌ یێ نشتیمانى بجه ئینا.
نوكه‌ ته‌په‌ د گوره‌پانا ئه‌حزاب و لایه‌نێن سیاسی دایه‌ و بۆ دوست و دژمنان دیار بوو كو نیه‌تا سه‌رۆك بارزانى د به‌رێ و ئه‌ڤرۆ دا هه‌ر سه‌ربخۆیا كوردستانێ و ئارامیا خه‌لكێ كوردستانێ یه‌ و ئێدى نه‌ چ كه‌س و نه‌چ لایه‌ن و حزب نه‌شێن بێژن، دڤێت سه‌رۆك ده‌ست به‌ردارى كورسیكێ ببیت، هه‌رچه‌نده‌ ئه‌ڤه‌ چه‌ندین جاران سه‌رۆكى ئه‌ڤ داخوازیه‌ كر، به‌لێ چونكی كه‌س دخوه‌را نابینیت جهێ وى پڕ بكه‌ت، له‌وما چ پێشنیارێن ئاڤاكه‌ر ژ لایێ چ لایه‌نان ڤه‌ نه‌هاتنه‌ پێشكێشكرن، دیسان په‌یاما سه‌رۆكى یا ڤێ جارێ یا جودا بوو، چونكی وه‌كو دیار دڤێت سه‌ر ژنوو كوردستان بهێته‌ ئاڤاكرن مه‌به‌ست لایه‌نێ سیاسیێ كوردستانێ یه‌، نه‌ك ئاڤاهى، چونكی دبێژیت حكوومه‌ته‌كا نوو بهێته‌ دانان و په‌رله‌مان بهێته‌ كاراكرن و سه‌رۆكه‌كێ نوو بۆ هه‌رێمێ بهێته‌ دانان هه‌تا هه‌لبژاردنان، واته‌ وه‌كو هنده‌ك نه‌زانان هزر دكر كو سه‌رۆك و مالباتا بارزانى ب تنێ به‌ره‌ڤانیێ ژ ده‌ستهه‌لاتا خوه‌ دكه‌ن، وه‌سا نینه‌، سه‌رۆك و مالباتا بارزانى ژبۆ خاترا نه‌ته‌وه‌ و ولاتێ خوه‌ ده‌ست به‌ردارى هه‌ر تشته‌كى دبن، لێ دڤێت دووباره‌ ژبیر نه‌كه‌ین پشتى هه‌مى (مین و تى ئێن تی) یێن هاتینه‌ چاندن ل سه‌ر رێكا ئازادى و سه‌ربخۆیا كوردستانێ هاتینه‌ راكرن، دووباره‌ دێ هێنه‌ چاندن.
ب دیتنا من چ سه‌رۆك بۆ هه‌رێمێ ناهێنه‌ دانان، چونكی چ لایه‌نێن سیاسى، ئه‌و كه‌سێن جهگریا سه‌رۆك بارزانى بكه‌ت نینن، به‌لێ دبیت هنده‌ك گورانكارى د حكوومه‌ت و په‌رله‌مانی دا بهێنه‌كرن، په‌یام په‌یامه‌كا رۆن و ئاشكرا و ڤه‌كرى بوو بۆ هه‌مى لایه‌نێن سیاسى ل كوردستانێ، لێ وه‌سا هزر دكه‌م دێ ب شێوازه‌كێ دیتر ئه‌و لایه‌ن سه‌ره‌ده‌ریێ دگه‌ل په‌یاما سه‌رۆكى كه‌ن ودێ بۆ به‌هانه‌ و ئه‌گه‌ران دروست كه‌ن و هه‌ر دێ پیلانگێریێ كه‌ن و مینان د رێیا ئازادیا كوردستانێ دا چینن.

46

نه‌ینه‌وا یان نه‌ینه‌ڤا، یان نوو ئاڤا، ئه‌و باژێرێ كه‌ڤنێ دیرۆكى و به‌رى هزاران سالان هاتیه‌ ئاڤاكرن و ل سه‌رده‌مێن كه‌ڤن و هه‌تا ئه‌ڤرۆكه‌ گرنگیا خوه‌ هه‌بوویه‌ د وه‌لاتێ عیراقێ دا ب گشتى و بۆ كوردستانێ و ده‌ڤه‌رێن كوردان ب تایبه‌تى، د كه‌ڤن دا ڕیكه‌كا سه‌ره‌كى یا بازرگانیێ بوو ل ناڤبه‌را وه‌لاتێن عه‌ره‌بى بۆ توركیا و ئیران و هه‌تا ئاسیا و ئورۆپا و به‌رى ناڤێ وێ ببیته‌ مووسل ناڤێ ڤى باژێرێ نه‌ینه‌وا بوو.
مووسل ژلایێ ئیدارى ڤه‌ پارچه‌كه‌ ژ پارێزگه‌ها نه‌ینه‌وا و باژێرێ نه‌ینه‌وا ل سه‌ر ده‌مێ ئاشووریان هاتیه‌ ئاڤاكرن ل باسكێ چه‌پێ یێ رووبارێ دیجله‌ى، لێ ئه‌و جهێ دبێژنێ مووسل یان ل باسكێ ڕاستێ هاتیه‌ ئاڤاكرن ل به‌رامبه‌ر باژێرێ نه‌ینه‌وا و ل چه‌رخێ بیستێ مووسل به‌رفره‌ه بوو و باسكێ چه‌پێ نه‌ینه‌وا كو لایێ چه‌پێ یێ رووبارێ دیجله‌ بوو ئێخسته‌ به‌ر سنوورێ خوه‌.
ئه‌گه‌ر به‌رێ خوه‌ بده‌ینه‌ دیرۆكا ئاكنجیێن باژێرێ مووسلێ دێ بینین كو د كه‌ڤن دا ل باسكێ چه‌پێ كورد تێدا ژیاینه‌ و هه‌تا به‌رى داعش ل سالا2014، مووسل داگیر بكه‌ت پتر ژ70% خه‌لكێ باسكێ چه‌پێ كورد بوون و گه‌له‌ك تاخێن باسكێ چه‌پێ كوردان و كوردێن شه‌به‌ك ئاڤه‌دان كرینه‌ و ب سه‌دان سالان لێ ژیاینه‌، پشتى داعشێ مووسل – نه‌ینه‌وا داگیر كرى كورد نه‌چاربوون جه و مالێن خوه‌ بهێلن و ئاواره‌ ببن یان كو ب جۆره‌كێ دی بێژین هاتنه‌ ده‌رێخستن ژ سه‌ر مالێن وان و كه‌ف و گوڕێن كوشتن و ژناڤبرنێ لێ هاتنه‌كرن، ژبه‌ر كو كوردان ل وێرێ چ به‌ره‌ڤانكه‌ر نه‌بوون و نه‌شیان خوه‌ ڕاگرن نه‌ینه‌وا به‌ر دا، هه‌ر چه‌نده‌ ب تنێ هنده‌ك بنگه‌هێن (حزبى) یێن كوردان لێ هه‌بوون، به‌لێ ئه‌وان ژى چ چه‌ك و له‌شكر نه‌بوون د ناڤ مووسل دا كو به‌ره‌ڤانیێ ژ كورد و كوردێن شه‌به‌ك بكه‌ن و هه‌ر زوو داعشێ ده‌ست ب سه‌ر باژێری دا گرت.
نوكه‌ ئۆپه‌راسیۆنا ڕزگاركرنا مووسل ده‌ست پێ كریه‌، به‌لێ ڕێ بۆ پێشمه‌رگه‌ى نه‌هاته‌ دان كو بچیته‌ د ناڤ باژێرێ مووسل دا و ئازاد بكه‌ت و هێل و سنوور بۆ پێشمه‌رگه‌ى هاتنه‌ دیاركرن، كو نابیت ژ وێرێ وێڤه‌تر بچن، له‌شكرێ عیراقێ ژخالێن پێشمه‌رگه‌ى به‌ره‌ڤ مووسل چوون بۆ ئازادكرنا وى باژێرى، هه‌ر چه‌نده‌ هه‌مى هێلێن به‌ره‌ڤانیێ ژ لایێ پێشمه‌رگه‌ى ڤه‌ هاتنه‌ ڕاكرن هه‌ر چ (تى، ئێن، تى) یێن هاتینه‌ دانان ئه‌و تونێل و خه‌نده‌كێن داعشێ كولاین هه‌مى ژ لایێ پێشمه‌رگه‌ی ڤه‌ هاتینه‌ ڕاكرن، واته‌ ڕێ خۆش كر بۆ له‌شكرێ عیراقێ و د قانوونێن له‌شكری دا هێلا سه‌ره‌كى یا ده‌ستپێكێ و به‌ره‌ڤانیێ یا ب زه‌حمه‌ته‌ و ئه‌گه‌ر هاته‌ ڕاكرن ئێدى ب ساناهى پێشڤه‌چوونێن له‌شكرى ده‌ست پێ دكه‌ن.
ب دیتنا من دڤێت كورد هه‌تا رووبارێ دیجله‌ى چووبانه‌ و دڤێت كوردان پێداگیرى ل سه‌ر هندێ كربا هه‌تا رووبارێ دیجله‌ ئه‌گه‌ر ب تنێ ژى نه‌بانه‌ دگه‌ل له‌شكرێ عیراقێ دپشكدار بانه‌، چونكی ب سه‌دان هزار كورد ل باسكێ چه‌پێ نه‌ و هه‌ر وه‌كو سنوورێ جوگرافى و دیرۆكى ژى كورد هه‌تا ڕووبارێ دیجله‌ دچن، پرسیار ئه‌وه‌ پشتى شه‌رێ داعش دێ چ روو ده‌ت ئایا دێ كوردێن ل باسكێ چه‌پێ ڤه‌گه‌رنه‌ سه‌ر مال و جهێن خوه‌؟ و ئه‌گه‌ر ڤه‌گه‌ریان كى دێ زێره‌ڤان و به‌رڤانیێ ژوان كه‌ت؟، ئه‌گه‌ر خودێ نه‌كه‌ت تووشى رێكخراوه‌كا دیا تیرۆرێ و كوشتنێ بوون، یان عه‌ره‌بێن سونه‌ ڕێ نه‌دا كوردان ڤه‌گه‌ڕن و بێژن، چونكی ب تنێ مه‌ ئازاد كریه‌ ب خوینێ!، و ل وى ده‌مى كى دێ خوه‌ ل كوردێن باسكێ چه‌پێ نه‌ینه‌وا كه‌ته‌ خودان؟.
دیسان ئه‌گه‌ر مووسل هاته‌ پارچه‌ پارچه‌ كرن ئایا ئه‌و پارێزگه‌ها ل باسكێ چه‌پێ دهێته‌ چێكرن دێ ژلایێ كێ ڤه‌ هێته‌ بریڤه‌برن كوردان یان عه‌ره‌بێن سونه‌ دێ بالا ده‌ست بن؟ یان دێ بیته‌ پارێزگه‌ها ده‌شتا نه‌ینه‌وا، یان پارێزگه‌ها برا مه‌سیحیان؟، له‌وما دڤێت هزر د ئه‌ڤێ چه‌ندێ دا بهێته‌ كرن و ب هه‌ر ڕێكا بیت دڤێت كورد ده‌ست به‌ردارى باسكێ چه‌پێ نه‌بن، چونكی ده‌ست به‌ردان واته‌ ژده‌ستدانا ڤێ پارچا ئه‌ردێ كوردستانێ.

41

وه‌كو دیار هه‌ر جاره‌كا كێشێن كوردان دگه‌هنه‌ رێكێن بن به‌ست و هه‌مى ده‌رگه‌هێن چاره‌سه‌ریان دهێنه‌ گرتن و هه‌ر وه‌فده‌كا دچیت بۆ چاره‌سه‌ركرنا كێشێن هه‌لاویستى ژچا و قه‌هوه‌ ڤه‌خوارنێ زێده‌تر ب ده‌ست خوه‌ڤه‌ نائینیت, و جاره‌كا دی هه‌مان كێشه‌ و به‌لكو توندتر سه‌رى هل دده‌ت و ل ده‌مێ پارت و لایه‌ن و سیاسه‌تمه‌دارێن چ حزبى و چ یێن سه‌ربخۆ بێ هیڤى دبن هینگێ (ته‌پكێ) دهاڤێژنه‌ دگۆره‌پانا سه‌رۆك بارزانی دا و داخوازێ ژێ دكه‌ن رێكه‌كێ بۆ چاره‌سه‌ریا وان كێشان ببینیت, نه‌كو ب تنێ ل كوردستانا عیراقێ به‌لكو ل پارچێن دی یێن كوردستانێ چ ل توركیا یان سووریا یان ئیرانێ, سه‌رۆك وه‌كو ئه‌ركه‌كێ نشتیمانى خوه‌ ل وان كێشان دكه‌ته‌ خودان، به‌رى چه‌ند ڕۆژه‌كا وه‌فدێ كوردستانا باكور ب سه‌رۆكاتیا سه‌لاح الدین دمیرتاش سه‌ره‌دانا سه‌رۆكى كر داكو پشته‌ڤان و هاریكاریێ وان بیت و بزاڤێ بكه‌ت دووباره‌ پرۆژێ ئاشتیێ ل توركیا ده‌ست پێ بكه‌ته‌ڤه‌, هه‌ر چه‌نده‌ تا به‌رى نوكه‌ ژى ژ سه‌رۆك بارزانى و پارتى دبێ (منه‌ت)بوون, و ب هه‌مى شیانێن خوه‌ دژایه‌تیا بارزانى و پارتى دكر ب هاریكاریا هنده‌ك پارتێن ناڤخۆیى ل هه‌رێما كوردستانێ، لێ ده‌مێ هه‌مى ده‌رگه‌ه ل به‌رسینگێ وان هاتینه‌ گرتن ژنوو قه‌ستا زه‌لامێ چالاكیێن ب زه‌حمه‌ت (رجل المهمات الصبعه‌) سه‌رۆك بارزانى كر.
سه‌رۆك بارزانى هیچ جاره‌كێ گوه نه‌دایه‌ ته‌ندروستى و ماندیبوون و هه‌ر جۆره‌كێ مه‌ترسیا ل سه‌ر ژیانا وى بیت، چونكه‌ وى خزمه‌تا گه‌ل و وه‌لاتێ خوه‌ ب پله‌ ئێك دانایه‌ و ل بیرا مه‌یه‌ ل سالا 1991, ده‌مێ چوویه‌ به‌غدا بۆ دانوستاندنان دگه‌ل حكوومه‌تا عیراقێ و هیچ گرێنتییه‌ك نه‌بوو كو ب ساخى بزڤریته‌ڤه‌، به‌لێ سه‌رۆك بارزانى گۆت، ل سه‌ر خاترا گه‌لێ خوه‌ دێ چم و ده‌ستێ خوه‌ كه‌مه‌ د ده‌ستێ دوژمنێ خوه‌ دا و گلاسه‌كێ ژه‌هرێ یه‌ دێ ڤه‌خۆم، بێگومان ئه‌ڤه‌ ژ بۆ خاترا گه‌ل و وه‌لاتی بوو, نه‌كو كه‌سایه‌تیا خوه‌ و ده‌ستكه‌فته‌كێ كه‌سایه‌تى بوو.
دووباره‌ و هه‌ر جاره‌كا حكوومه‌تا عیراقێ ل كێشه‌كا بێ چاره‌سه‌ر مایه‌ ئاسێ ده‌نگ و هه‌وارا خوه‌ گه‌هاندیه‌ سه‌رۆك بارزانى، نوكه‌ و پشتى هه‌مى ده‌رگه‌هێن دانوستاندنێ د ناڤبه‌را حكوومه‌تا هه‌رێما كوردستانێ و حكوومه‌تا عیراقا فیدرال دا هاتینه‌ گرتن، یان ژى خاڤى كه‌فتیێ و گه‌له‌ك لایه‌نێن ناڤخۆیى یێن كوردستانى وه‌كو سه‌ر ئێك زێده‌كرنه‌كا سیاسى بابه‌تێ سه‌ربخۆیێ و گشت پرس و هه‌تا كێشا نه‌فت و غازێ و قه‌ریرانا ئابوورى و شه‌رێ داعشێ دژى پارتى بكار دئینن و بزاڤێ دكه‌ن داكو هیچ جاره‌كێ ئارامى و ئێكبوونا بیرورا و به‌رژه‌وه‌ندی نه‌كه‌ڤنه‌ د ناڤبه‌را حكوومه‌تا عیراقێ و حكوومه‌تا هه‌رێما كوردستانێ دا و دیسان وه‌سا ل قه‌له‌م دده‌ن ئه‌و گۆتنێن پارتى و بارزانى دبێژیت ل كوردستانێ، هیچ بنه‌مایه‌ك ژبۆ نینه‌ و ب تنێ كوشتنا ده‌مى و ل به‌ربه‌رزه‌كرنا خه‌لكى یه‌.
ڤێ جارێ سه‌رۆك بارزانى ب كۆمه‌كا یاریكه‌رێن شاره‌زایێن یاریا سیاسى به‌ره‌ڤ به‌غدا چوو, داكو ل پێش چاڤێن وان هه‌میان و د ناڤ كۆچك و ته‌لارێن حكوومه‌تا عیراقێدا بێژینه‌، كاربه‌رده‌ستێن حكوومه‌تا عیراقێ, به‌لێ مه‌ سه‌ربخۆیى دڤێت, به‌لێ ئه‌گه‌ر هوین دستوورى بجه نه‌كه‌ن, ئه‌م نوكه‌ دئاماده‌ینه‌ گشت پرسیێ بۆ ده‌وله‌تبوونێ بكه‌ین, به‌لێ ئه‌م ئاماده‌ینه‌ سه‌ربه‌خویێ رابگه‌ینین و دیسان بێژن ئه‌م بێ رێكه‌فتن به‌شداریێ د ئازادكرنا مووسل دا ناكه‌ین، لێ مخابن هه‌تا نوكه‌ ژى راگه‌هاندنا هنده‌ك لایه‌نان بزاڤێ دكه‌ن ڤێ سه‌ره‌دانێ بێ بها بكه‌ن و وه‌سا دده‌نه‌ خویاكرن كو چ ده‌ستكه‌فتى یان ژى هه‌ر ئه‌ڤ سه‌ره‌دانه‌ نه‌ یا دان پێدان كریه‌, وان یا ژبیر كرى كو سه‌رۆك و نوونه‌رێن چار پارتێن سیاسى یێن مه‌زن د گوره‌پانا سیاسیا كوردستانێ دا هه‌ڤالینیا سه‌رۆك بارزانى دكه‌ن و دیده‌ڤانن ل سه‌ر وان دانوستاندن و گۆتنێن سه‌رۆكى گۆتین, وان یا ژبیر كرى كو ل سه‌ر ئاستێن بلند سه‌رۆك وه‌زیر و سه‌رۆك كۆمار و پارتێن بهێزێن حكوومه‌تا عیراقێ پێشوازیه‌كا گه‌رم ل سه‌رۆكى و هه‌ڤالێن دگه‌ل دا كریه‌ و وان ژبیر كرى به‌رى سه‌رۆك بچیته‌ به‌غدا چه‌ندین وه‌زیرین ده‌وله‌تێن زلهێز سه‌ره‌دانا سه‌رۆكى كریه‌ و هنده‌ك ب ته‌لفۆنێ دگه‌ل ئاخفتینه‌, وان یا ژبیر كرى كو ئه‌ڤه‌ هه‌مى به‌لگه‌ و گرۆڤه‌نه‌ كو سه‌رۆك سه‌رۆكێ هه‌رێما كوردستانێ یێ یاساییه‌ و هه‌ر چه‌ند ئه‌و بێژن یا بێ مفایه‌, ئه‌ڤرۆكه‌ ئه‌و گرێكێن ب ددانا نه‌دهاتنه‌ ڤه‌كرن ب ده‌ستان هاتنه‌ ڤه‌كرن, ئه‌و پرۆژه‌ و پیلانێن نه‌یارێن پارتى و بارزانى دارێژتى هاتنه‌ ژناڤبرن كو سه‌روبنێن هه‌مى وان پرۆژان دژى پارتى و بارزانى هاتبوونه‌ دارێژتن، به‌رى كو دژى نه‌ته‌وا كورد بن, كورد فرۆشێن ئه‌ڤرۆ هه‌ر (خیانه‌تكارێن) دوهینه‌, ئه‌و ته‌پكێن بۆ پارتى و بارزانى دكولن هه‌ر ئه‌و ب خوه‌ دێ كه‌ڤنه‌ تێدا.
سه‌ره‌دانا بارزانى گه‌له‌ك ئاسته‌نگ ڕاسته‌ ڕێ كرن، گه‌له‌ك گۆتنێن كو هنده‌ك سه‌ركردێن كوردان نه‌دوێران ل مالا خوه‌ بێژن ده‌رهه‌قى حكوومه‌تا عیراقێ دا, بارزانى ئه‌و سنوور شكاند و به‌رامبه‌رى وان گۆتن و ئه‌و هێلێن سۆر هه‌مى به‌زاندن ژبۆ خاترا گه‌ل و وه‌لاتێ خوه‌ هه‌رچیا ژ ده‌ستان بێت دێ كه‌ت, له‌وما ئه‌م باوه‌رین سه‌ره‌دانا بارزانى دێ یا سودبه‌خش بیت بۆ كوردستانیان و هه‌مى خه‌لكێ عیراقێ و ئه‌ڤه‌ دێ بیته‌ قووناغه‌كا نوو بۆ سه‌رده‌مه‌كێ نوو و ب تایبه‌تى قووناغا پشتى داعشێ, ئارمانجا بارزانى ب راشكاوانه‌ ده‌وله‌تبوونه‌ هیڤیا وى یا هه‌ر مه‌زن كوردستانه‌كا سه‌ربخۆیه‌, ئه‌ڤ ئارمانج و ئومێده‌ ب ئێكبوون و ئێكرێزیا كوردان دهێته‌ كرن و ئه‌ندازیارێ ئه‌ڤێ ئێكبوون و ئێكرێزیێ سه‌رۆك بارزانیه‌.

59

د ناڤینا هه‌یڤا بۆری دا كۆده‌تایه‌كێ ل كۆمارا توركیا هه‌ڤسنور سه‌رهلدایه‌, دبیت بۆ دیرۆكا وه‌لاتێ توركیا ئه‌ڤه‌ نه‌تشته‌كێ نوو و نه‌هزركرى و ژ نیشكه‌كێ ڤه‌ بیت, چونكی وه‌لاتێ توركیا یێ ناڤداره‌ ب ئه‌نجامدانا كۆده‌تایان و ب تایبه‌تى پشتى ب دووماهیك ئینانا ده‌ستهه‌لاتا ئمبراتۆریه‌تا ئۆسمانى و گهۆرینا سیسته‌مێ وه‌لاتى بۆ كۆماری و هه‌تا نوكه‌ چه‌ندین كۆده‌تا ل وى وه‌لاتى چێ بووینه‌.
لێ پرسیار ئه‌وه‌ ئه‌ڤان كۆده‌تایان و گهۆرینا سیسته‌مێن ده‌ستهه‌لاتێ چ تشته‌كێ باش بۆ كوردان تێدا هه‌بوویه‌ و ئایا كورد دگه‌ل هه‌ر كۆده‌تایه‌كێ و ده‌ستهه‌لاته‌كا نوو شیاینه‌ خوه‌ بگونجینن، یان ب تنێ كورد وه‌كو ئامیره‌كی بۆ سه‌ركه‌فتنا كۆده‌تایان د وى وه‌لاتی دا هاتینه‌ بكارئینان؟؟.
دیرۆك بۆ مه‌ خویا دكه‌ت هه‌ر ده‌ستهه‌لاته‌ك و ب هه‌ر ره‌نگه‌كێ هه‌بیت چ ب كۆده‌تا یان ب هه‌لبژاردنان هاتبیته‌ سه‌ر ده‌ستهه‌لاتێ ل توركیا كورد وه‌كو كه‌رسته‌كی بۆ سه‌ركه‌فتنا خوه‌ بكار ئیناینه‌ و پشتى كارێ وان ب دووماهی هاتى وه‌كو به‌رێ كورد پشتگوهخستینه‌ و زوو ژ سۆز و په‌یمان و رێكه‌فتنێن خوه‌ لێڤه‌ بووینه‌ ئه‌وێن داینه‌ كوردان, دبیت هنده‌ك ژ وان ده‌ستهه‌لاتان هنده‌ك تشتێن كێم بۆ كوردان كربن, به‌لێ نه‌دئاستێ پێدڤى دابووینه‌ و ل شوینا باشى و چاكیا كوردان قڕكرن و ڤه‌براندن و سیاسه‌تا توندوتویژیێ به‌رامبه‌رى كوردان بكار ئینایه‌.
كۆده‌تایا ل تیرمه‌ها سالا 2016 هاتیه‌ كرن, بزاڤه‌ك بوو هاتیه‌ كرن ژبۆ ڤه‌گه‌ریانا ده‌ستهه‌لاتا له‌شكرى و سه‌ربازى و ب دوماهی ئینانا سیسته‌مێ حكوومه‌تا دیموكراتى ل توركیا, ئه‌ڤه‌ نه‌به‌ره‌ڤانیكرنه‌ ژ توركیا و ده‌ستهه‌لاتا وێ دكه‌م نه‌خێر, به‌لكو ئه‌ڤه‌ ڕاستیه‌كه‌ هه‌مى كه‌س دزانن چونكى ڤه‌گه‌ریان بۆ ژێرده‌ستهه‌لاتا له‌شكرى ڤه‌گه‌ریانه‌ بۆ توندوتیژیێ و رامالینا هه‌مى بنه‌مایێن دیموكراتیێ و په‌یره‌وكرنا سیاسه‌ته‌كا هوڤانه‌یه‌, كه‌سێ وه‌كو كوردان سه‌ربۆرێن ته‌حل نینن دگه‌ل سیسته‌م و ده‌ستهه‌لاتا له‌شكرى, به‌لێ ده‌ستهه‌لاتا له‌شكرى بیرا مه‌ ل وى ده‌مى دئینیت ل ده‌مێ جه‌ندرمان مه‌رج ل سه‌ر زكێ ژنكێ دكر, كانێ چ تێدایه‌ كوڕه‌ یان كچه‌ و چه‌قو دهاڤێته‌ زكێ ژنكێن كوردان و دراندن, ل بیرا مه‌یه‌ هندى ده‌ستهه‌لاتا له‌شكرى ل سه‌ر ده‌ستهه‌لاتێ ل توركیا, ناڤێ كورد و كوردستان و ئاخفتن و جلكێن كوردى قه‌ده‌غه‌ بوون, ل بیرا مه‌یه‌ هه‌مى ناڤێن باژێر و گوند و ناڤێن كه‌سان نه‌دبوو ب كوردى بان، یان ب كوردى هاتبانه‌ نڤیسین, ل بیرا مه‌یه‌ ل ده‌مێ سترانا كوردى هێلایه‌ د حه‌فكێن سترانبێژان را و گه‌له‌ك كار و كریارێن دی یێن هوڤانه‌ ده‌ستهه‌لاتا له‌شكرى دژى كوردان په‌یره‌و كرینه‌, ئه‌ڤه‌ بوون قانوونێن ده‌ستهه‌لاتا له‌شكرى, پشتى هاتنا پارتا (داد و گه‌شه‌پێدان) یا ئه‌ردۆغانى بۆ سه‌ر ده‌ستهه‌لاتێ هنده‌ك گورانكاریێن بنه‌رتى بۆ دوزا كورد هاتینه‌ كرن, ئه‌ڤرۆكه‌ هه‌ر كه‌سه‌ك یێ سه‌ربه‌سته‌ ب كوردى باخڤیت و ناڤێن كوردى دانیته‌ سه‌ر زاروكێن خوه‌ ستران و هه‌لبه‌ستان ب كوردى بێژن و بنڤیسن و ب كوردى بخوینن و جلكێن كوردى بێ ترس بكه‌نه‌ به‌رخوه‌, سه‌رۆك باژێرڤانى و ئه‌ندام په‌رله‌مان و وه‌زیر ژ كوردان رابوینه‌ و پشكدارن د حكوومه‌تا توركیا دا ئه‌ڤرۆكه‌ 180 پلا سیاسه‌تا توركان به‌رامبه‌رى كوردان هاتیه‌ گوهارتن و ئێدى كێشا كوردى ب ئازادانه‌ ل توركیا دهێته‌ به‌حسكرن و كار ل سه‌ر دهێته‌ كرن, بلا ژبیر نه‌كه‌ین رۆلێ حكوومه‌تا هه‌رێما كوردستانێ و سه‌رۆك بارزانى و پێگه‌هێ هه‌رێما كوردستانێ د ئه‌ڤێ گورانكاری و هه‌ڤكێشێ دا هه‌بوویه‌ و ئه‌گه‌ر ئه‌و سیاسه‌تا ئه‌ڤرۆكه‌ دهێته‌ برێڤه‌برن ل كوردستانا باشوور نه‌بایه‌, ئه‌ز باوه‌رم ئه‌و گورانكارى و لێك تێگه‌هشتن ژى چێ نه‌دبوون, به‌لێ پشتى كورد ل هه‌رێما كوردستانێ شیایین پشكداری بریار و كۆمبوونێن نیڤده‌وله‌تى ببن و رێكا خوه‌ كه‌لاشتى و كێشا كوردان ژ كێشه‌كا ناڤخۆیى كریه‌ كێشه‌كا جیهانى و چاره‌نڤێسى و مرۆڤایه‌تى, ئه‌ڤێ چه‌ندێ كارتێكرن ل سه‌ر وه‌لاتێن ده‌روبه‌ر ژى كر و ب تایبه‌تى توركیا, له‌وما توركیا نه‌چار بوو لێزڤرینه‌كێ د سیاسه‌تا خوه‌ دا بكه‌ت, چونكى به‌رى هینگێ وه‌لات و كاربه‌ده‌ستێن توركیا دئاماده‌ نه‌بوون نه‌كو ب تنێ ناڤێ كوردان ل سه‌ر ئه‌زمانێ خوه‌ بینن, به‌لكو دگۆت, ئه‌گه‌ر كیانه‌كێ كوردى ل باشوورێ ئه‌فریقیا بهێته‌ چێكرن ئه‌م دئاماده‌ینه‌ ژناڤ ببه‌ین.
دبیت هنده‌ك پارت و لایه‌نێن كوردى ل باشوور هه‌بن و حه‌ز كربایه‌ كۆده‌تایا له‌شكرى ل توركیا سه‌ر گرتبایه‌, ب تنێ داكو كه‌یفا وان بهێت, چونكى ئه‌و وه‌سان هزر دكه‌ن ئه‌گه‌ر ده‌سهه‌لاتا توركیا ژناڤ چوو دێ لایه‌نه‌كێ كوردى ل هه‌رێما كوردستانێ ژناڤ چیت, به‌لێ وان هزر د ئه‌نجامێن وێ یێن خراب و مال وێران دا نه‌كر بوو, چونكى هندى هند كه‌ربوكین یا د دلێ وان دا, وان دڤێت ب تنێ لایه‌نه‌ك ل ده‌ڤه‌ره‌كا ده‌ستنیشانكرى ژناڤ بچیت بلا چ بهێته‌ سه‌رێ كوردان بۆ وان نه‌خه‌مه‌, وان هزر نه‌دكر ژناڤچوونا ئه‌ڤێ ده‌ستهه‌لاتا ل توركیا و ده‌ست ب سه‌رداگرتنا له‌شكرى، واته‌ هه‌مى ده‌ستكه‌فتێن كوردان چ ل هه‌رێما كوردستانێ یان ل باكورێ كوردستانێ دا كه‌ڤنه‌ به‌ر مه‌ترسیه‌كا مه‌زن و ئه‌گه‌ر خوه‌ مه‌ تا راده‌كێ پاراستنا نیڤده‌وله‌تى ژى هه‌بایه‌ د ئه‌ڤێ قه‌یرانێ دا دا تووشى مه‌زنترین نه‌خۆشیێن مرۆڤایه‌تى بین, چونكی ئه‌گه‌ر چه‌ند هه‌یڤه‌كان ده‌رگه‌هێن سنوورى هاتبانه‌ گرتن و دوورپێچ ل سه‌ر سه‌رێ مه‌ هاتبایه‌ دانان, بێگومان دا پشت و پشت چین و ئه‌ڤا مه‌ هه‌ى دا ژ ده‌ست ده‌ین. ئه‌ڤجا دڤێت هه‌مى لایه‌ن بزانن ژناڤچوونا ده‌ستهه‌لاته‌كێ ل وه‌لاته‌كى چ كارتێكرنێ ناكه‌ته‌ سه‌ر لایه‌نه‌كێ هه‌رێما كوردستانێ، چونكى هێژ ئه‌و ده‌ستهه‌لات ل وى وه‌لاتى نه‌بوو و ژدایك نه‌ببوو هه‌ر ئه‌ڤ پارته‌ هه‌بوو و خه‌بات و قوربانى ددا و گه‌له‌ك پیلانێن ژ كۆده‌تا مه‌زنتر هاتینه‌ دارێشتن به‌لێ هه‌ر مایه‌ ل سه‌ر پیا و ژناڤ نه‌چوویه‌, چونكی ره و ریشالێن وێ ژ ئاخ و ئاڤ و خه‌لكێ كوردستانێ نه‌.

41

رێكه‌فتنناما سایكس پیكوَ ئه‌ول به‌ری سه‌د سالا هاتیه‌ كرن، ئه‌ڤرۆكه‌ ب داوی هات، ئه‌ڤه‌ چه‌ند هه‌یڤه‌كه‌ ده‌زگه‌هێن راگه‌هاندنا كوردی ل هه‌ر چوار پارچێن كوردستانێ ب گشتی و ل هه‌رێما كوردستانێ ب تایبه‌تی گرانیا خوه‌ به‌ردایه‌ سه‌ر ئه‌ڤێ رێكه‌فتنێ و گه‌له‌ك بابه‌ت و مێزگه‌رد هاتنه‌ كرن ل سه‌ر شاشێن تله‌فزیوَن و هه‌تا رۆژنامه‌ و گوڤار و رۆژناما ئه‌لكترونی و تورێن جڤاكی ژ ئه‌ڤێ هه‌وێ بێ بار نه‌بوون، لێ بتنێ وه‌كو مه‌ گوتی یێن كوردستانی، ل ڤێره‌ بوَ مه‌ دیار دبیت، دبیت ب دیتنا مه‌ كوردان ئه‌ڤ رێكه‌فتن نامه‌ ب داوی هات بیت، ژبه‌ركو ئه‌م كورد زیان به‌خشێن ئێكێ بوینه‌ ژ ئه‌ڤێ رێكه‌فتننامێ، به‌لێ ئایا ئه‌و وه‌لاتێن دیتر یێن كه‌فتینه‌ به‌ر چه‌قوَیا ئه‌ڤێ رێكه‌فتننامێ چ زیان به‌خش و چ سودمه‌ند، هه‌وه‌كا وه‌كو یا كوردستانی بهه‌لكه‌فتا ب دوای هاتنا سه‌د سالیا رێكه‌فتنناما سایكس پیكوَی رێكخستیه‌ چ ب خوه‌نیشاندان یان مێزگه‌رد و بابه‌ت نڤێسین؟ دبێژم نه‌خێر، نه‌كو نه‌نڤێسیه‌ به‌لكو هه‌ر های ژ هندێ نینه‌ و ئه‌گه‌ر ڤه‌كوَله‌ره‌ك یان رۆژنامه‌ڤانه‌كی به‌حسێ وێ رێكه‌فتننامێ و سه‌د سالیا وێ كربیت، بێگومان مه‌ ئه‌و كێشایه‌ دبابه‌تیدا و دبیت مه‌ رێ بۆ خوه‌شكر بیت و ل به‌رنامه‌كێ راسته‌وخۆ مێهڤان كربیت داكو ل سه‌ر رێكه‌فتنناما سایكس پیكوَ باخڤیت و هنده‌ك جاران دیتن و نێرینێن وان نه‌رێنی بوینه‌ و هنده‌ك جاران ئه‌رێنی بوینه‌. ژلایه‌كێ دیتر ڤه‌ مه‌ نه‌دیت چ لایه‌نێن ئه‌و رێكه‌فتننامه‌ په‌سند كری یێن فه‌رمی وه‌كو نه‌ته‌وه‌ێن ئێكگرتی یان قوَلپا گه‌لان(عصبه‌ الامم) یان كوَمه‌لا مافێن مرۆڤی یان ئێكه‌تیا ئه‌وروپا.. . هتد، چ داخویانی نه‌ به‌لاڤكرن ل سه‌ر ب داویی هاتنا رێكه‌فتن ناما سایكس پیكو. وه‌كو به‌ری نوكه‌ مه‌ گوتی ئه‌گه‌ر ب خوه‌ داخویانیه‌ك ژی ژكه‌سه‌كێ سه‌ر ب وان ڤه‌ هاتبیته‌ دان مه‌ كێشایه‌ د ناڤ بابه‌تی د،ا برێكا مێزگه‌رده‌كێ یان ڤه‌كوَلینه‌كێ و وی ژی وه‌كو بیر و بوَچوونێن خۆه‌ وه‌كو تاكه‌كه‌س به‌رچاڤ كرینه‌ و نه‌ك لایه‌نه‌كێ فه‌رمی، واته‌ ب دیتنا ئه‌وان ئه‌و رێكه‌فتننامه‌ ب سه‌د سالان داوی ناهێت و نه‌هاتیه‌.
چ پێ نه‌ڤێت مه‌ گه‌له‌ك پێخوه‌ش بوو لایه‌نكێ (ده‌ولی) و خودانێن بریارێ تشته‌ك ل سه‌ر سه‌د سالیا سایكس پیكو گوتابایه‌ ڤێجا چ ئه‌رێنی و چ نه‌رێنی بایه‌، هینگێ نه‌ته‌وا كورد، داشێت بریارێ ده‌ت، به‌لێ جهێ داخێ یه‌ ئه‌ڤه‌ نه‌هاته‌ كرن.
دیسا ئه‌و (لوَبیا) ئه‌ڤه‌ چه‌ندین ساله‌ كورد و سیاسه‌تمه‌دارێن كوردان بزاڤێ بۆ چێكرنا وێ دكه‌ن تا نوكه‌ بێده‌نگه‌ و چ هه‌لویستێن روَهن و ئاشكرا ژێ دیار نینن.
ژ ئه‌ڤێ شروَڤه‌یا سه‌ر پێ یا ل سه‌ر هاتیه‌ كرن خویا دبیت هێژ سایكس پیكو یا به‌رده‌وامه‌ و چ گوَڕانكاریێن نێزیك و چاڤه‌رێ كری رووناده‌ن، وه‌كو دبێژن نه‌ ئه‌وان وه‌لاتان و نه‌ ئه‌وان كه‌سان های ژ رێكه‌فتنناما سایكس پیكوَ نینه‌، نه‌كو ئه‌ز یێ ره‌شبینم ئه‌ڤێ چه‌ندێ دبێژم نه‌خێر، به‌لێ رۆژه‌ڤا ئه‌ڤرۆ ئه‌و چه‌ند لێ دهێته‌ دیتن و خواندن.
وه‌كو به‌ری نوكه‌ مه‌ گوتی، نه‌ته‌وا كورد زیان به‌خشێن ئێكێ نه‌ ژ ئه‌ڤێ رێكه‌فتننامێ، و به‌ری ئه‌ڤ رێكه‌فتننامه‌ بهێته‌ كرن، كورد نه‌ وه‌لاته‌ك سه‌ربخوَ بوون و نه‌ خودان قه‌واره‌كێ سیاسی و سنوور دیار كری بوون، داكو دووباره‌ داخوازا ڤه‌گه‌راندنا وی قه‌وارێ سیاسی بكه‌ن، به‌لكو وه‌كو ئه‌ڤرۆ كورد هه‌ر دپارڤه‌كری بوون د ناڤبه‌را ناڤبه‌را ئوسمانیا و صه‌فه‌وییان دا، و رێكه‌فتنناما سایكس پیكوَ ئه‌و دپارڤه‌كرن جاره‌كا دیتر پارڤه‌كر ڤنه‌ و سنوور بۆ كێشان.
ژ هینگێ وه‌ره‌ ئه‌م كورد بزاڤا راكرنا ئه‌وان سنووران دكه‌ین و تا نوكه‌ ئه‌م نه‌شیاینه‌ بتنێ ئێك (كێلكا سنووری) ژ جهێ وێ لاده‌ین، ژبه‌ر كو ئه‌و (كێلك) ب بریاره‌كا نیڤ نه‌ته‌وه‌یی و فه‌رمی هاتینه‌ دانان، له‌ورا دڤێت هه‌ر ب وی ره‌نگی ب بریاره‌كا نیف نه‌ته‌وه‌یی بهێنه‌ راكرن، چونكه‌ نوكه‌ چه‌ندین وه‌لات میراتگرێن رێكه‌فتنناما سایكس پیكوَنه‌ ل سه‌ر كیستێ(حساب) كوردان، كورد ژی ئه‌ڤرۆكه‌ وه‌كو پێدڤی بزاڤا نه‌هێلان و راكرنا وێ رێكه‌فتن نامێ ناكه‌ن، دبیت ب راگه‌هاندنێ و بابه‌ت نڤێسینێ هه‌موو پالپشت بن وحه‌ز بكه‌ن ئه‌و كێلك بهێنه‌ راكرن و داوی ب نه‌خوه‌شی و زۆلم و زوَریا ل سه‌ر كوردان بهێت به‌لێ ژبنڤه‌ (نه‌ ئه‌و سووكه‌ و نه‌ ئه‌و بازار) و ته‌ڤنه‌كێ دیتر رادچینن.
نوكه‌ كورد نه‌كو بوینه‌ دوو جوین به‌لكو بوینه‌ چوار پێنج جوین و هه‌ر ئێك وه‌كو خوه‌ بۆ به‌رژه‌وه‌ندا پارتا خوه‌ كار دكه‌ت، و بێ دوو دلی دبێژم، دبیت هنده‌كان بڤێت هه‌تا هه‌تایێ رێكه‌فتنناما سایكس پیكوَ یا به‌رده‌وام بیت، چونكه‌ ب نه‌مانا رێكه‌فتنێ به‌رژه‌وه‌ندیێن وان ژی دێ تێك چن، ئه‌گه‌ر وه‌سا نه‌بیت ئه‌ڤه‌ چه‌نده‌ سه‌رۆك بارزانی به‌حسێ ریفراندوَمێ و سه‌ربه‌خوَیا كوردستانێ دكه‌ت، بۆچی هه‌موو لایه‌ن پشتگیریێ لێ ناكه‌ن و بێژن، ئه‌ڤه‌ سه‌د ساله‌ ئه‌م دبن زوَلم و زوَریێ ڤه‌ و شه‌رێ ده‌روونی ب هه‌موو ره‌نگان دگه‌ل مه‌ دهێته‌ كرن، ژ ئه‌ڤێ زێده‌تر چ ناهێته‌ سه‌رێ مه‌ و دا ئه‌ڤێ چه‌ندێ بكه‌ینه‌ راستی و ریفراندوَمێ بكه‌ین یان هه‌ر پێدڤی ب ریفراندوَمێ ناكه‌ت دڤێت ئێكسه‌ر ده‌وله‌تا سه‌ربه‌خۆیا كوردستانێ راگه‌هینن، به‌لێ موخابن ب بهانێن جورا و جور هند دبێژن، هێژ ده‌م نه‌هاتیه‌ مایه‌ و هند دبێژن مه‌ سنوورێن ئاڤی نینن. . ، هتد. گه‌له‌ك وه‌لاتان سنوورێن ئاڤی نین و ده‌وله‌تن، ئه‌ڤرۆكه‌ ژی وه‌كو به‌رێ نینه‌ ب چه‌ند چركه‌یه‌كا ده‌نگێ هه‌ر گه‌له‌كێ سته‌م دیتی دگه‌هیته‌ جیهانێ هه‌مووێ، له‌وما دڤێت سه‌رۆك بارزانی ده‌وله‌تێ راگه‌هینیت خوه‌ ئه‌گه‌ر ل سێ پارێزگه‌هێن كوردستانێ بیت، ئه‌گه‌ر نه‌ دوور نینه‌ رێكه‌فتننامه‌یه‌كا دیتر یا خراب تر ژ سایكس پیكوَ ل سه‌ر كوردان بهێته‌ كرن.

website security
Facebook Auto Publish Powered By : XYZScripts.com