NO IORG
Authors Posts by ئازاد گوله‌یی

ئازاد گوله‌یی

ئازاد گوله‌یی
46 POSTS 0 COMMENTS

10

ئه‌ڤرۆ ل ڤییه‌نا لالیۆن ٢٠١٨
دیرۆكه‌ك بۆ رۆژنامه‌ڤانیا وه‌رزشی یا كوردی تۆماركر
ئه‌ڤرۆ: ئازاد گوله‌یی/ لیۆن. فره‌نسا

گه‌له‌ك جاران دبهیستین كو فلانه‌ده‌زگه‌هێ راگه‌هاندنا كوردی و بۆ جارا ئێكێ كاره‌ك ئه‌نجام دا، چ ل سه‌ر ئاستێ كوردستانێ یان ده‌ڤه‌رێ یان ژی ژده‌رڤه‌ی كوردستانێ، له‌وما ئه‌ڤرۆ ئه‌مژی ب مافه‌كی خوه‌ یێ ره‌وا دزانین كو بێژین مه‌ژی وه‌كو رۆژنامه‌ دیره‌كه‌ك بۆ رۆژنامه‌ڤانیا وه‌رزشیا كوردی تۆمار كر، ب رێیا پشكداریا مه‌ وه‌كو ئێكه‌مین رۆژنامه‌یا كوردی و ب ره‌نگه‌كی فه‌رمی هاتیه‌ داخوازكرن ژ لایێ ئێكه‌تیا فوتبۆلا ئورۆپی ڤه‌، داكو ل یاریا دووماهیا یۆرۆ لیگێ د ناڤبه‌را هه‌ردو تیمێن مارسیلیا فه‌ره‌نسی و ئه‌تله‌تیكۆ مه‌دریدا ئیسپانی ل رۆژا چارشه‌مبیا بۆری ل یاریگه‌ها لیۆن ب ئاماده‌بوونا ٥٨ هزار پشته‌ڤانا و ٣٣٠ ده‌زگه‌هێن راگه‌هاندنێ یێن جیهانی كو رۆژنامه‌یا مه‌ ئێك ژ وان بوو و جهه‌كێ تایبه‌ت ل یاریگه‌هێ بۆ نوونه‌رێ وێ هاتبوو ته‌رخانكرن، وه‌كو ئێكه‌مین ده‌زگه‌هێ راگه‌هاندنا كوردی ل یاریگه‌ها ڤینالێ یا مه‌زن ئاماده‌ دبیت..
ئه‌ڤرۆ چاوا پشكدار بوو؟
وه‌كو هه‌ڤكار و نوونه‌رێ خۆبه‌خشێ روۆنامه‌یا ئه‌ڤرۆ ل ئورۆپا و ئه‌ندام د هه‌ردو ئێكه‌تیێن ده‌ولی فیفا و یۆیفا و سه‌ندیكا رۆژنامه‌ڤانی یا سۆیسری و جیهانی دا، زۆر داخوازنامه‌ بۆ دهێن، ڤێ جارێ من بریار دا ئه‌ز ب ناڤێ رۆژنامه‌یا ئه‌ڤرۆ پشكداریێ د فینا لا لیۆن دا بكه‌م و ناڤێ وێ بكه‌مه‌ د ناڤا فایلێن ڤی ده‌زگه‌هێ مه‌زنێ وه‌رزشی ل جیهانێ دا وه‌كو تاكه‌رۆژناما كوردی، له‌وما من داخوازا خوه‌ ب ناڤێ ئه‌ڤر‌و پێشكێش كر ب فه‌رمی و وانژی داخواز ژمن كر كو ئه‌ز بۆ وان نڤیسینه‌كا فه‌رمی بوو ژ رۆژنامه‌یا ئه‌ڤرۆ ببه‌م داكو بشێم ب ناڤێ رۆژنامێ نه‌ك ناڤێ خوه‌ یێ تایبه‌ت وه‌كو هه‌ر جار پشكداریێ د ڤێ چالاكیێ دا بكه‌م، منژی نڤیسینه‌كا فه‌رمی ژ رۆژنامێ و ب ئیمزا سه‌رنڤیسه‌ری بۆ هنارت و ره‌زامه‌ندی هاته‌كرن داكو رۆژناما ئه‌ڤرۆ پشكدار بیت و ب ڤێ رێكێ مه‌ شیا ناڤێ ئه‌ڤرۆ بده‌ینه‌ ل گه‌ل ٣٣٠ ده‌زگه‌هێن ب فه‌رمی پشكداری د ڤێ فینالێ دا كری تۆمار بكه‌ین..
ئه‌ڤرۆ ده‌رگه‌هه‌كێ مه‌زن ڤه‌كر بۆ راگه‌هاندنا كوردی؟
بێگومان ڤان جۆره‌ پشكداریا د هه‌لكه‌فتێن مه‌زنێن جیهانێ دا، چ وه‌رزشی یان هونه‌ری یانژی جڤاكی و ره‌وشه‌نبیری بن مفایێن خوه‌ یێن هه‌یین، چونكی هندی مه‌ بیره‌ ده‌زگه‌هێن مه‌یێن راگه‌هاندنێ یێن كوردی پووتێ وانی هه‌ره‌مه‌زن و سه‌ره‌كی بۆ سیاسه‌تێ و سیاسه‌تمه‌دارا یه‌ و گوهۆرینا ڤێ چه‌ندێ كار پێ دڤێت، ژ به‌ر كو وه‌رزشێ ژی جه‌ماوه‌ره‌كی مه‌زنێ هه‌ی ل كوردستانێ و د هه‌ژی هندێ نه‌ئه‌م وه‌كو میدیایێن وه‌رزشیێن كوردی خوه‌ ب هاڤێژینه‌ ڤان كاران و ژ نێزیك و ب زمانێ وان هه‌لكه‌فتێن مه‌زنێن وه‌رزشی بۆ ب ڤه‌گوهێزین و هه‌می تشت ژی ب هزر و پاش پێنگاڤێ و پاش جێبه‌جێكرنێ دهێنه‌كرن ئه‌نجامدان و مه‌ وه‌كو رۆژنامه‌یا ئه‌ڤرۆ هزر و پێنگاڤا ئێكێ هاڤێت و نوكه‌ چاڤه‌رێی هندێینه‌ ده‌زگه‌هێن دی ژی یێن راگه‌هاندنێن كوردی ڤان جۆره‌ پێنگاڤێن مه‌زن و دیرۆكی وه‌كو ئه‌ڤرۆ بهاڤێژن.
كۆنترۆلێن ئێمناهیێ؟
هه‌لبه‌ت فینالا لیۆن ئاماده‌كاریێن باش و مه‌زن بۆ هاتبوونه‌كرن ژ لایێ ئه‌منی ڤه‌، نه‌خاسمه‌كو فرنسا تووشی چه‌ندین كارێن تیرۆرستی ببوو ل ڤان سالێن دووماهیێ. هه‌روه‌سا چونكی یانه‌كا فره‌نسی یا كو دهێته‌ هژمارتن ئێك ژ هه‌ڤركێن دژوارێن یانه‌یا لیۆن ئه‌وا دا یاریا دووماهیێ ل یاریگه‌ها وێ هێته‌ ئه‌نجامدان و دهاته‌چاڤه‌رێكرن كو هه‌می پشته‌ڤانێن لیۆن دا پشته‌ڤانیا یانه‌یا ئه‌تله‌تیكۆ مه‌دریدا ئیسپانی كه‌ن دژی یانه‌یا وه‌لاتێ خوه‌ كو مارسیلیا بوو!! لێ ژ به‌ر كو هه‌ڤركێن ئێكن ژ مێژه‌ و ل یاریێن وان شه‌ر و پێكدادان دهێنه‌ ئه‌نجامدان و یاری دراوه‌ستن، له‌وما ده‌زگه‌هێن ئه‌منی یێن فرنسا ئاماده‌كاریێن باش كربوون و شیان ل دووماهیێ یاریێ و پشته‌ڤانا بپارێزن سه‌ره‌رای هندێ كو هنده‌ك جاران پشته‌ڤانێن مارسیلیا یاریێن ئاگری دهاڤێتنه‌ د ناڤا یاریگه‌هێ دا و د ده‌ست نه‌خۆش بوون بۆ پۆلیسان د ناڤا یاریگه‌هێ دا و ل ده‌وروبه‌رێن وێ ب تایبه‌ت ئه‌و پشته‌ڤانێن پلێتێن یاریێ ب ده‌ستنه‌كه‌فتین، چونكی هه‌می پلێن به‌ری هینگی هاتبوونه‌ فرۆتن و یا ژهه‌میان ئه‌رزانتر بهایێ وێ ١٤٣ یۆرۆ بوو.
مه‌كی دیت و نیاسی؟
هه‌ر وه‌كو مه‌ به‌ری نوكه‌ ئاماژه‌ پێ دایی، جهه‌كی تایبه‌ت بۆ رۆژنامه‌یا ئه‌ڤرۆ ل ل گه‌ل ده‌زگه‌هێن راگه‌هاندنێ ل جهێ تایبه‌تێ میدیایێ هاتبوو ته‌رخانكرن و پشتی ئه‌م چووین مه‌ باجا خوه‌ یا كو به‌ری هینگی ب وێنه‌ڤه‌ و ناڤێ ئه‌ڤرۆ ل سه‌ر بۆ مه‌ هاتبوو ئاماده‌كرن وه‌رگرتی و ل گه‌ل دا فلاش میمۆریه‌ك و پرتووكه‌كا تایبه‌ت ب قاره‌مانیێ ڤه‌ و كاغه‌زه‌كا ناێن یاریكه‌رێن سه‌ره‌كی و یه‌ده‌كین هه‌ردو یانا تێدا داینه‌ مه‌ و رێیا تایبه‌تا میدیاكاران نیشا مه‌ دا داكو بگه‌هینه‌ د ناڤا یاریگه‌هێ دا و میكس زۆن و هۆلا كۆنفرانسان نیشا مه‌دای، مه‌ ژماره‌كا مه‌زنا میدیاكارێن به‌رنیاس دیتن كو هاتبوون داكو بۆ كه‌نالێن جودا جودا یێن راگه‌هاندنێ وێ یاریێ بڤه‌گوهێزن وه‌كو شرۆڤه‌كار و پێشكێشكار، هه‌روه‌سا مه‌ ژماره‌كا رۆژنامه‌ڤانێن وه‌رزشی یێن به‌رنیاس ل جیهانێ دیتن و خوه‌ بۆ ئێكودو دا نیاسین و هه‌ر كه‌سێ مه‌خوه‌ وه‌كو ده‌زگه‌هه‌كێ راگه‌هاندنا كوردی بۆ دابا نیاسین دا بێژیت، ئێكه‌م جاره‌ دبینم هوون پشكداریێ د ڤان جۆره‌ چالاكیان دا دكه‌ن!، مه‌ژی ب كه‌نی دگۆتێ دێ ژ ئه‌ڤرۆ وێڤه‌ مشه‌ كوردان بینن..
چ خزمه‌ت كاری هه‌بوون بۆ راگه‌هاندنێ؟
ژبلی هندێ كو جهێن تایبه‌ت و باش بۆ میدیا كاران هاتبوونه‌ ته‌رخانكرن، چه‌ندین خزمه‌تكاریێن دی ژی هه‌بوون. بۆ نموونه‌ ئه‌گه‌ر كامیرا وێنه‌گره‌كی ژ كار كه‌تبا، هه‌ردو مه‌زنترین كۆمپانیێن نیكۆن و كانوون پشكێن خوه‌ ل نێزیك جهێن تایبه‌ت بۆ رۆژنامه‌ڤانان دانابوو و خزمه‌تا وان وێنه‌گرا دكر یێن كامیرێن كۆمپانیێن وان هه‌ین، بۆ نموونه‌ كامیرا من كانوونه‌ و من دو میمۆری كارت هه‌بوون، هه‌ردویا شۆل نه‌دكر، چوومه‌ وێرێ، گۆتی هه‌كه‌ مه‌نه‌شیا چیبكه‌ین دێ دو یێن نوو ده‌ینه‌ته‌، لێ شیان كارتێن من دوباره‌ چێكه‌ن و بده‌نه‌ف من..خوارن و ڤه‌خوارن و ئه‌نترنێت و هه‌تا د ناڤا یاریگه‌هێ دا ژی بۆ مه‌ ئاڤ دئینا و به‌رده‌وام دهاتن د گۆته‌ مه‌چ هه‌وه‌ كێم نینه‌؟ ژبلی هندێ ژی پاركێن تایبه‌ت بۆ ترومبێلێن میدیاكاران هه‌بوون و هه‌ر داخوازیه‌كا ره‌وایا رۆژنامه‌ڤانه‌كی هه‌با، ده‌ملده‌ست بۆ جێبه‌جێ دكر..راستی ژی پشتی من ئه‌ڤ جیهانه‌ دیتی و به‌راوه‌رد كری ل گه‌ل وه‌رزشا مه‌ و یانێن مه‌ كا چاوا سه‌ره‌ده‌ریێ دگه‌ل وێنه‌گر و رۆژنامه‌ڤانان دكه‌ن، من زانی هێشتا ئه‌م گه‌له‌ك دپاشڤه‌چووینه‌ د ڤی واری دا!.

16

ل ژێر سه‌رپه‌رشتی و راسپاردێن مێشكێ خوه‌، گه‌له‌ك جاران ئه‌ز كۆمبوونێن ناڤخوه‌یی د ناڤبه‌را ئه‌ندامێن له‌شێ خوه‌ دا رێكدئێخم، ب ئاماده‌بوونا هه‌می ئه‌ندامان چونكی وه‌كو یا زانا ئه‌م كورد گه‌له‌ك حه‌ز ژ كۆمبوون و ئاخفتنێ دكه‌ین. هه‌روه‌سا جار جار سمینار و كۆِِرا ژی بۆ ئه‌ندامێن له‌شێ خوه‌ سازدكه‌م و ده‌لیڤێ دده‌مه‌ ئه‌ندامه‌كێ له‌شی، بچیته‌سه‌ر ده‌پی شانۆیێ و ب دلێ خوه‌ بئاخڤیت بێی كو به‌رێ خوه‌ بده‌ته‌ سه‌روچاڤ و لڤلڤین و شینبوونا نه‌عیمێن ئاماده‌بۆیا، یانژی هه‌ما چنه‌نه‌زره‌كا خاتف ل وێ سه‌عه‌تا هندی وی ب هۆلێ ڤه‌بكه‌ت، دا بزانیت كا وی چه‌ند درێژكر و چه‌ند ئاخفت!!
من ئه‌ڤ پێشگۆتنه‌ نڤیسی، دا هیڤی و رجایێ ژ كوردان بكه‌م و بێژمێ كۆمبوون و كور و سمینار و داخۆیانی و چاڤپێكه‌فتن و دیدارێن ژ قه‌ستا كیم بكه‌ن و شوینا وان هه‌میان كار و خزمه‌تێ بكه‌ن، دا پیچه‌كی مافێ ڤێ كوردستانێ و ڤی ملله‌تی بۆ بده‌ستڤه‌بینن و ببنه‌ هاریكار بۆ وان، نه‌ك كه‌ربێن وان ژ خوه‌ ڤه‌كه‌ن!؟ ب راستی ئه‌م كورد، ب تایبه‌ت به‌رپرسێن مه‌یێن حزبی و حكومی گه‌له‌ك دئاخڤن و گه‌له‌ك مه‌تحا ژی دكه‌ن د چارچووڤێ ئاخفتنێن خوه‌ دا و وه‌سا خوه‌ بۆ ئاماده‌بۆیان دده‌نه‌ نیاسین كو هه‌ما ئه‌و عه‌مێ گۆزێ نه‌!! حه‌یرانا چاڤێ وه‌، وه‌رن دا ئه‌م كێم ب ئاخڤین و گه‌له‌ك شۆل بكه‌ین.. باوه‌ر بكه‌ن ئه‌م ژ نه‌چاری دهێین و بۆ ماوێ دو یان سێ یان چار سه‌عه‌تا گوهێ خوه‌ دده‌ینه‌هه‌وه‌، ئه‌م دهێین دا سیلفیه‌كی ل گه‌ل هه‌وه‌ بگرین و هێشتا ئه‌م دهۆلێ ڤه‌ل فیسبۆكی و تۆیته‌ری و ئه‌نستگرامی و سنابشاتی به‌لاڤ بكه‌ین و ل سه‌ر بنڤیسین ئه‌ڤرۆ ل گه‌ل مامۆستا و سه‌یدا و به‌رێز و هێژا فلان كورێ فلانی و ده‌مێ ب شه‌ڤێ ل گه‌ل هه‌ڤالا ل دیوانه‌كی دروونین دێ بێژین هه‌وه‌دیت ئه‌ڤرۆ فلان كه‌س چه‌ند ره‌وی؟ مالا ته‌ خوه‌ دێ بێژی مسجله‌كا داعویرای؟ ما رادیۆ بۆ هنده‌ دئاخفت!! پیچه‌ك مابوو دا ژ هۆلێ ده‌ركه‌ڤم هندی ئه‌ز عاجزبووم هندی درێژ كر و هه‌می ئاخفتنێن بێ مفا و دێ ڤێجا ئێك ره‌فع كه‌ت و یێ دی كه‌بس كه‌ت و ژبیركه‌ت وی سرا گرتی هه‌تا شیای سیلفیه‌كی ل گه‌ل سه‌یدای بگریت و ل سۆشیال میدیایێ دا به‌لاڤ بكه‌ت و هنده‌ك جاران ژی ب نامێن تایبه‌ت بۆ هه‌ڤالا فرێدكه‌ت، دا خوه‌ پشت راست كه‌ت كو ئه‌و ده‌لیڤا وی یا دیرۆكی و سیلفیێ وی ل گه‌ل مامۆستا و هێژای ژ قه‌ستا نه‌چوو و هه‌میان دیت!!
مه‌ ئه‌ڤرۆ پێدڤیا ب كاری هه‌ی پتر ژ گۆتنان و ئاخفتنان و دێ هۆ كه‌ین و مه‌ ل به‌ره‌ومه‌یا دیراسه‌ت كری و دێ كۆمبوونه‌كێ ل سه‌ر فلانه‌تشتی كه‌ین، ئه‌ڤرۆ ملله‌ت یێ پێدڤی ب لایه‌نه‌كی یه‌ بۆ خزمه‌تێ بكه‌ت، پتر ژ هندێ كو بئاخڤیت..ملله‌ت بێ زار بوو له‌وما پیچه‌ك رێزێ لی بگرن چونكی، سه‌رێن رێكا ل به‌ر به‌رزه‌بوون، بۆ ڤی ملله‌تی شۆل بكه‌ن پتر ژ هندێ كو هوون هه‌ر بو ب ئاخڤن چونكی هندی هوون بۆ ئاخفتن ئێدی چ رێز ل ئاخفتنێن هه‌وه‌ ناهێته‌گرتن چونكی هه‌وه‌ خوه‌ سڤككر، هندی هوون ئاخفتن و سه‌رێ هه‌میان گێژكر..
كورد هندی هۆسا بن، من باوه‌ره‌ چ جاران ب سه‌رناكه‌ڤن هه‌تا بریارێ نه‌ده‌ن كو كێم بئاخڤن و گه‌له‌ك شۆل و خزمه‌تێ بكه‌ن وه‌كو هه‌ر لایه‌نه‌كێ سیاسی و حوكمه‌ته‌كا پێشكه‌فتی ل ڤێ جیهانێ..
كۆمبوون و كۆر و سمینار و دیدار و چاڤپێكه‌فتنێن خوه‌ كیم بكه‌ن و فێر بنه‌هندێ ده‌مێ مایكه‌كا كۆڕه‌كی یان سمیناره‌كێ یان رادیۆ و ته‌له‌ڤزیۆنه‌كی دهێته‌به‌ر ده‌ڤێ هه‌وه‌، بیرا خوه‌ بینن كو كێم گۆتن و ئاخفتن زێره‌ و بێژن ئه‌م درێژ ناكه‌ین بلا كار و خزمه‌تێن مه‌ بئاخڤن و دو شه‌ش و قفل و خلاس و چوو..
بلا به‌س بیت ده‌مێ تو مایكێ دگری نزانی به‌رده‌ی! بلا به‌س بیت ده‌مێ دئاخڤی نزانی ڤه‌بری، بلا به‌س بیت برایێ مه‌شعوول شاشه‌؟گه‌ره‌زان؟
..مه‌شعول شاشه‌ ژی سوحبه‌ته‌كه‌دێ ل نێزیك دڤێ گۆشێ دا به‌لاڤ كه‌م

38

زۆر جاران دبێژمه‌ هه‌ڤالان یێ سه‌روشتی نه‌ڤیا دێ كه‌ته‌ هه‌ڤوه‌لاتیێ وه‌لاته‌كی موسلمان و رۆژهه‌لاتا ناڤین، چونكی مرۆڤی ل ڤان وه‌لاتان چ ماف نینه‌ د ژیانێ دا و ژین و ژیارا وی و زارۆیێن وی هه‌رده‌م دگرێداینه‌ ب گێولا حاكمی ڤه‌.. هه‌ڤوه‌لاتی چ ماف نینن، یێ بن ده‌سته‌! بئاخڤیت دێ حاكم قوتیت و كوژیت و زیندان و ئه‌شكه‌نجه‌ده‌ت، مافێ هندێ نینه‌ بزانیت كا داهاتێ ڤی وه‌لاتی چ لێدهێت! ماف نینه‌ پسیار بكه‌ت، بۆچی یێ روونشته‌ سه‌ر كورسیكێ نزانیت رابیت! ماف نینه‌ ده‌نگێ خوه‌ ل حاكمی بلند بكه‌ت و بێژیتێ تو پارێ ڤی ملله‌تی كیڤه‌ دبه‌ی! ماف نینه‌ بێژیت بۆچی ئه‌ڤ وه‌لاته‌ ب عه‌داله‌ت ناهێته‌ برێڤه‌برن! نه‌وێریت پسیار بكه‌ت بۆچی بیره‌كا گازێ بۆ منژی نابیت؟ بۆچی پانزینخانه‌كی ناده‌نه‌ منژی؟ بۆچی ئه‌سواقه‌كی بۆ من و خێزانا منژی ناڤه‌كه‌ن؟ هنده‌كان دبینیت چ نه‌بوو، لێ خوه‌ گه‌هانده‌ به‌رپرسه‌كی و رۆژا ل دووڤ دا بوو ملیۆنێر؟ بۆچی هه‌ڤوه‌لاتی دێ هه‌ر خزمه‌تێ كه‌ت و ته‌حه‌مولا هه‌می خۆشی و نه‌خۆشیان كه‌ت و كوڕێ به‌رپرسه‌كی یاریا ب پاره‌ و سه‌فرێن ژده‌رڤه‌ دكه‌ت!! بۆچی و بۆچی و بۆچی و گه‌له‌ك بۆچی!! مه‌ یێن هه‌ین پێدڤی به‌رسڤانه‌، لێ ئه‌م ڤان پسیاران ئاراسته‌ی كی بكه‌ین؟ هه‌كه‌ مه‌ گۆته‌ به‌رپرس و ده‌ستهه‌لاتدارێن وه‌لاتێن موسلمان و رۆژهه‌لاتا ناڤین، ئێكسه‌ر زیندان و گرت و فه‌سله‌ ژ كاری و بۆ وان نه‌خه‌مه‌ ته‌ خزمه‌ت هه‌بیت یان نه‌بیت؟ تو ل سه‌ر ده‌مێ حاكمه‌كی فه‌رمانبه‌ر بی و حاكمه‌كێ دی ب كۆده‌تایه‌كێ ببیته‌ ده‌ستهه‌لاتدار دێ ئێكسه‌ر ته‌گریت و ژ سه‌ر كاری كه‌ته‌ ده‌ر و كه‌ته‌ كوڕێ كولانان، ب هێجه‌تا هندێ كو تو ل سه‌ر ده‌می حاكمێ به‌ری وی فه‌رمانبه‌ر بووی!! بۆ وی نه‌ خه‌مه‌ ته‌خێزان هه‌بیت یان نه‌بیت، نه‌خه‌مه‌ زاۆیێن ته‌ نه‌چنه‌ قوتابخانان، نه‌خه‌مه‌ خێزانا ته‌ نه‌ساخ بیت ته‌ پاره‌ نه‌بن ببه‌ یه‌ ده‌ف نۆشداران!! له‌وما ب دیتنا من ده‌م هات لایه‌نه‌كێ ب هێز ل ڤێ جیهانێ بهێته‌ دامه‌زراندن داكو به‌ره‌ڤانیێ ژ ملله‌تان و ژبن زولم و زۆرداریا حاكمێن وان ده‌ربێخیت، لێ وه‌كو یا رابردوویێ عیراقێ و رزگاركرنا وێ ژ سه‌دامێ گۆربگۆر نه‌بیت، ده‌مێ ئه‌مریكا برێمه‌ر كریه‌ حاكم و شوونا ره‌وشا گه‌لی عیراقێ باش بكه‌ت كره‌ كاره‌سات و هه‌تا نوكه‌ ژی بریارێن وی یێن كارتێكرنێ د ره‌وشا عیراقێ دا دكه‌ن و رۆژ بۆ رۆژی ره‌وشا هه‌ڤوه‌لاتیێ عیراقێ یێ خرابتر لێ دهێت و هه‌ژار یێ دمریت و تنێ ره‌وشا بازرگانا و سیاسه‌تمه‌دار و ته‌خه‌كا زانایێن ئاینی یێ فۆل دبیت و رۆژ بۆ رۆژێ ره‌وشا وان باشترا لی دهێت و بلا هه‌ژار هه‌ر خوه‌ بگه‌ڤزینیت و رۆژا ده‌نگێ خوه‌ بلندكر ژی دێ سه‌د تۆمه‌تان ب دووڤ ڤه‌نن و كه‌نه‌ خائین و خۆفرۆش، بلا خزمه‌ت و رابردۆیه‌كی پاقژ ژی هه‌بیت ئه‌و هه‌می دێ ب چڕكه‌كێ و ب ده‌ستێ نه‌زان و خولام و ره‌شه‌كه‌كێ به‌رپرسه‌كی هێته‌ قوتان و ره‌زیلكرن!! ده‌م هات ئه‌ڤ ملله‌تێن خۆلیبسه‌ر مینا ملله‌تێن عیراقێ و لیبیا و سووریێ و لوبنان و یه‌مه‌ن و گه‌له‌كێن دی لایه‌نه‌ك هه‌بیت به‌ره‌ڤانیێ ژێ بكه‌ت و مافێ وان ژ چاڤێن زالمان بینیته‌ ده‌ر و داهاتیێ وه‌لاتان ب عه‌داله‌ت ل سه‌ر هه‌ڤوه‌لاتیان بهێته‌ به‌لاڤكرن، له‌وما من نیازه‌ كو ل روونشتنێن داهاتی یێن نه‌ته‌وێن ئێكگرتی كو د ماوێ چه‌ند سالان دا به‌رده‌وام پشكداریێ تێدا دكه‌م، په‌یڤه‌كێ ل دۆر ڤێ چه‌ندێ پێشكێش بكه‌م، چونكی ب راستی هه‌كه‌ جیهان ل سه‌ر ڤی سیسته‌می برێڤه‌بچیت دڤێت فاتیحێ ل سه‌ر بخوینین!!
هه‌چی حاكم و به‌رپرسێ تو ل گه‌ل بروونی و بئاخڤی دێ بێژی مه‌لایكه‌ته‌!!، لێ گاڤا ته‌به‌حسێ داهاتێ وه‌لاتی و زولمێ و نه‌عه‌داله‌تیێ ل گه‌ل ڤه‌كر، دێ بیته‌ وه‌كو گورگان و به‌ربیته‌ سه‌روچاڤێن ته‌ و هنده‌ك روو ب روو دبێژنه‌ملله‌تێ خوه‌ هه‌وه‌ دڤێت ئه‌ڤه‌یه‌ و هه‌وه‌ نه‌ڤێت ژی ئه‌ڤه‌یه‌ و چ دكه‌ن وه‌بكه‌ن، مینا هه‌ردو وه‌لاتێن سعوودیێ و ئیرانێ كو دهێنه‌ هژمارتن دو وه‌لاتێن ده‌وله‌مه‌ندێن جیهانێ نه‌، لێ هه‌ڤوه‌لاتیێن وان زۆر دهه‌ژارن و د ره‌وشه‌كا دارایی و ساخله‌می و خواندنێ دا یا خراب دا دژین و گاڤا پسیارا مافێ خوه‌ كر ژ ده‌ستهه‌لاتدارێن ئیرانێ و سعوودیێ یان دێ هه‌لاویسن و خه‌ندقینن، ب تۆمه‌ته‌كا نه‌دروست ل ئیرانی یانژی ل سعوودیێ دێ سه‌ری لێ بڕن!!

41

گومان تێدا نینه‌ هه‌ر كه‌سه‌كێ فه‌یسبۆك هه‌بیت، ب تایبه‌ت خه‌لكێ ده‌ڤه‌را مه‌ به‌هدینان ب تایبه‌تی و كوردستانێ ب گشتی، هه‌روه‌سا عیراقێ یێ گوه ل ناڤێ ئه‌بۆ چیچۆی بووی و دیتی.. ئه‌بۆ چیچۆ كابرایه‌كێ خه‌لكێ زاخۆ یه‌ ژ ده‌رڤه‌ی كوردستانێ دژیت و شیایه‌ ب شێوازێ خوه‌ چ ئه‌م ل گه‌ل بین یان ل گه‌ل نه‌بین، ببیته‌ ئێك ژ ستێرێن سۆشیال میدیایێ و ژماره‌كا زۆرا خه‌لكی حه‌زژێ دكه‌ن و لایڤێن وی ل سه‌ر فه‌یسبۆكێ باوه‌ر بكه‌ن ژ بینه‌رێن زۆر كه‌نالێن مه‌ یێن كوردی پترن، راسته‌ دیتنا ڤیدیۆیێن ئه‌بۆ چیچۆی دڤێت د ناڤا خێزان و زارۆیان دا نه‌بیت، ژ به‌ر وان گۆتن و كریارێن ئه‌و د ڤیدیۆیێن خوه‌ دا دبێژیت و دكه‌ت و هه‌می ژی ئاراسته‌ی سیاسه‌تمه‌داران دكه‌ت ب تایبه‌ت سیاسه‌تمه‌دارێن عیراقی یێن عه‌ره‌ب و كورد و هنده‌ك جاران ژی خوه‌ ژ سنۆرێن ناڤخوه‌یی ژی ده‌رباز دكه‌ت و دبیته‌ ئه‌بۆ چیچۆیه‌كێ دوه‌لی و به‌حسێ سیاسه‌ت و سیاسه‌تمه‌دارێن بیانی ژی دكه‌ت.. هه‌ر چه‌نده‌ ئه‌ز ب خوه‌ به‌رێ خوه‌ ناده‌مه‌ ڤیدیۆیێن ئه‌بۆچیچۆی ژ به‌ر كو ئه‌ز حه‌زژ وی شێوازی ناكه‌م، لێ پا ئه‌ز نه‌دژم ژی، چونكی سیاسه‌ت و سیاسه‌تمه‌دارێن عیراقێ و ده‌وروبه‌ران ئه‌م یێن گه‌هاندینه‌ وی ئاستی دڤێت مه‌ئه‌بۆ چیچۆ هه‌بن، دا بزانن ب زمانێ وان ل گه‌ل ب ئاخڤن.
چونكی نوكه‌ل عیراقێ ود ناڤا حوكمه‌تا عیراقێ و كوردستانێ دا و هه‌ردو په‌رله‌مانێن وێ مه‌ ژماره‌كا ئه‌ندامێن وان یێن هه‌ین، ئه‌بۆ چیچۆ نه‌و ژ ئه‌بۆ چیچۆی خرابترن هندی گۆتن و كریارێن وان دپیس و خرابن و بێ شه‌رمانه‌ ل سه‌ر شاشێن تی ڤیان ب قات و ریبات و ده‌رسۆك و حیجاب ژ ئه‌بۆ چیچۆیێ مه‌ زۆر خرابترن، ل گه‌ل رێزێن من بۆ ئه‌بۆ چیچۆیێ مه‌، چونكی كابرایه‌كێ ساده‌ و ب رێكه‌كا كۆمیدی و هه‌زه‌لی ناما خوه‌ دگه‌هینیت، لێ ئه‌بۆ چیچۆ و یێن حوكمه‌ت و په‌رله‌مانێن عیراقێ و كوردستانێ ل ته‌له‌ڤزیۆنان دهێنه‌ مێهڤانكرن و وێ دبێژن و دكه‌ن یا كو ملله‌تی تێكدده‌ت و ره‌وشا عیراقێ و كوردستانێ هه‌رده‌م به‌رب خرابیێ ڤه‌ دبه‌ت..
پسیار ئه‌وه‌ كی ڤان ئه‌بۆ چیچۆیا هه‌میان هنده‌ بلند دكه‌ت و پێشدئێخیت؟ هه‌لبه‌ت ملله‌ت ب خوه‌یه‌، له‌وما پشتی هینگی هه‌ر ئه‌و ملله‌ت دبیته‌ زه‌ره‌رمه‌ندێ ئێكێ ژ وی ئه‌بۆ چیچۆیێ وی ده‌نگێ خوه‌ دایێ و بریه‌ په‌رله‌مانی و خودێ دزانیت كا دبیت وه‌كو ئه‌بۆ چیچۆیێ مه‌زن (عه‌بادی) هه‌ما سودفه‌ و ب ژماره‌كا زۆرا كێما ده‌نگان ببیته‌ وه‌زیر و سه‌رۆك وه‌زیرا؟! دڤێت مرۆڤ چاڤه‌رێی هه‌می تشتان بیت د ناڤا سیاسه‌تا عیراقێ و كوردستانێ دا، داكو ژ ئه‌ڤرۆ وێڤه‌ ژمارا ئه‌بۆ چیچۆیێن خرابكه‌ر كێم ببن د ناڤا سیاسه‌تمه‌داران دا، هه‌روه‌سا د ناڤ خودان شاشكان دا یێن كو ئاینێ پیرۆز بۆ خوه‌ كریه‌ رێیه‌ك بۆ هندێ ئارمانج و به‌رژه‌وه‌ندیێن خوه‌ یێن كه‌سایه‌تی و خێزانی جێبه‌جێبكه‌ن..
له‌وما هیڤیه‌ ئێدی ئه‌م هه‌می ژ ئه‌ڤرۆ وێڤه‌ جوداهیێ بێخینه‌ د ناڤبه‌را ئه‌بۆ چیچۆیێن مه‌ هه‌ین و هه‌ر ئه‌بۆ چیچۆیه‌كی بدانینه‌ جهێ وی یێ مسته‌حه‌ق و نه‌بینه‌ ساوێلك و هه‌ر كه‌سێ بۆ مه‌ دو گۆتن گۆتن یان حاسیبا خوه‌ ئینا ده‌رێ و گۆتی ئێك زاید ئێك دبنه‌ دو بدووڤ بكه‌ڤین، چونكی ئه‌م هه‌می دزانین ئێك و ئێك دبنه‌ دو..
ل دووماهیێ داخوازا لێبۆرینێ ژ ئه‌بۆ چیچۆیێ راسته‌قینه‌ كاك مه‌هدی دخوازین كو مه‌ ناڤێ وی و كه‌سایه‌تیا وی كریه‌ مانشێت و ناڤه‌رۆكا بابه‌تێ خوه‌.

29

بیرا من دهێت ئه‌ڤ مانشێته‌، من به‌ری چه‌ندین سالان به‌لاڤ كربوو د كۆڤاره‌كا ره‌خنه‌یی دا ل دهۆكێ ده‌ردكه‌فت، چه‌ند ژماره‌ك ژێ ده‌ركه‌فتن و راوه‌ستیا وه‌كو ب ده‌هان رۆژنامه‌ و كۆڤارێن دی ل دهۆكێ ده‌ردكه‌فتن و دا چه‌ند ژماره‌كا به‌لاڤكه‌ن و هێنه‌ راوه‌ستاندن. دووڤ پاره‌ی بوو، پاره‌ هه‌با، دا بینی رۆژنامه‌ ده‌ركه‌فتن و كۆڤار هاتنه‌ چاپكرن و ده‌مه‌كی پارێزگه‌ها دهۆكێ وه‌لێ هاتبوو چ نه‌مابوو، دا گوندێن وێ ژی بۆ خوه‌ رۆژنامه‌ و كۆڤاران چاب كه‌ن و هه‌كه‌ ئاریشێن بۆدچه‌ و مووچه‌یان نه‌با، باوه‌ر بكه‌ن نوكه‌ هه‌ر دائیره‌كێ كۆڤارا خوه‌ هه‌با، چونكی ل كوردستانێ كه‌س نا بێژیته‌ كه‌سێ كا وه‌ره‌ تو چ دكه‌ی و ئه‌ڤه‌ چیه‌ و كێ گۆتیه‌ته‌ بكه‌!! دا بزڤرینه‌ مانشێتی.. ل دهۆكا كه‌ڤن ده‌می هێشتا كه‌سێ مایێ خوه‌ د كه‌سێ نه‌ دكر، هنده‌ك ژ خه‌لكێ وێ بۆ خوه‌ دچوونه‌ بارا و مه‌ی(مشروب) ڤه‌ دخوار و ده‌مێ دره‌نگی شه‌ڤێ برسی ژ بارا ده‌ردكه‌فتن دا قه‌ستا خوارنگه‌ها كه‌ن ووی سه‌رده‌می وه‌كو نوكه‌ خوارنگه‌هێن دهۆكێ هه‌تا نیڤ شه‌ڤ نه‌دمانه‌ڤه‌كرن، لێ خودانێ خوارنگه‌هه‌كی خوارنگه‌ها خوه‌ دهێلا ڤه‌كری و نه‌فه‌رێن وی یێن شه‌ڤێ ئه‌و كه‌س بوون یێن ژ بارا ده‌ردكه‌فتن وگل و گل دچوون چونكی د سه‌رخۆش بوون و هاى ژ خوه‌ نه‌بوو و دا قه‌ستا خوارنگه‌هێ كه‌ن و خودانێ خوارنگه‌هێ ژی مرۆڤه‌كی رح سڤك و ناڤدار بوو ل دهۆكێ دا چیته‌ هنداڤ سه‌رێ نه‌فه‌رێ خوه‌ یێ سه‌رخۆش و بێژیتێ كه‌ره‌مكه‌؟ دێ چ خوی؟ كابرایێ سه‌رخۆش ژی دا بێژیتێ چ هه‌یه‌؟ دا خودانێ خوارنگه‌هێ ب له‌ز بێژیتێ مریشك سه‌ر برنجێ، مریشك بن برنجێ، مریشك ره‌خ برنجێ، مریشك و ئافك و برنج و مریشك و ئافك و مریشك و برنج و ئافك، چونكی ژبلی ڤان هه‌رسێ تشتا چ دی نه‌دما و ئه‌و ژی دمانه‌ دبنێ قازانان دا و زۆر بێسه‌روبه‌ر دبوون، لێ خودانێ خوارنگه‌هێ نه‌دڤیا بهاڤێت و دفرۆته‌ نه‌فه‌رێن (تالی اللیل) وه‌كو دگۆتێ. یێ سه‌رخۆش ژی ده‌می گول ڤان هه‌می تشتان دبوو وه‌سا تێدگه‌هشت كو وی چ دڤێت یێ هه‌ی و دا بۆ نموونه‌ بێژیت من مریشك ب ره‌خ برنجێ ڤه‌ دڤێت و زۆر دلخۆش دبوو ده‌می ددانا به‌ر سینگی و دخوار.. ئه‌ڤرۆ سه‌روبه‌رێ مه‌ و ره‌وشا مه‌ د گه‌ل عه‌بادی یا وه‌كو وێ ره‌وشا من ل سه‌ری به‌حس لێ كری یا لێهاتی و عه‌بادی ئه‌م سه‌رخۆش كرین هندی بێهنا مریشكێ چ بژارتی چ قه‌لاندی چ بره‌خ برنجێ یان بن برنجێ یان سه‌ر برنجێ دئینیه‌ به‌ر دفنا مه‌ و ناهێلیت ئه‌م تام كه‌ینێ!! نوكه‌ یا مه‌ته‌نێ یا بوویه‌ بێهنكرن ب تنێ، مه‌ مافێ ئێك پاری ژی نینه‌! بمرین ژ برسا ژی نه‌خه‌مه‌ بۆ عه‌بادی و حوكمه‌تا وی و ئه‌وێن ده‌ستێ خوه‌ كریه‌ د ده‌ستێن وان دا هه‌تا ره‌وشا هه‌رێمێ گه‌هشتیه‌ ڤێ رادێ.. به‌راهیێ مه‌ دیكل و كه‌ و عه‌لۆك و ماسی بێ منه‌ت و ب به‌ترانی دخوارن، ئه‌ڤرۆ چه‌نگه‌كێ مریشكێ بده‌ست مه‌ناكه‌ڤیت دا ب خوین!! ئه‌ز ب خوه‌ باوه‌ر ناكه‌م ئه‌وا به‌ری نوكه‌ بۆ دهات و بده‌ست دكه‌فت بۆ بهێنه‌ڤه‌، نوكه‌عیراق هێدی هێدی یا ل سه‌ر پێن خوه‌ دراوه‌ستیت و عه‌ره‌بێن وێ به‌راهیێ ترسه‌كا مه‌زن د دلی دا بوو كو نه‌وێرن چ پێنگاڤان بێی كورد بهاڤێژن، لێ پشتی كو چه‌ند پێنگاڤه‌ك هاڤێتین و چ ژ كوردان نه‌هات، نوكه‌یێ وێ دكه‌ن یا دلێ وان حه‌ز دكه‌ت و یا ژ ده‌ستی دهێت بۆ دژاتیا كوردان یێن دكه‌ن و هێشتا هنده‌ك كوردان پشتا خوه‌ ب ئه‌مریكا و ئه‌ورۆپا یا گه‌رم كری و نزانن كو نوكه‌ ده‌م هات كورد پێنگاڤه‌ك و بریاره‌كا زۆرا مه‌زن بده‌ن دا جاره‌كا دی ڤی خه‌لكی قورتال بكه‌ن و رێز و هێزا كوردستانێ به‌ری ١٦ ی ئكتوبه‌رێ هه‌ی بۆ بزڤریته‌ڤه‌، چونكی مخابنه‌ خه‌لكێ كوردستانێ هنده‌ قوربانی داین و خه‌باته‌كا دوور و درێژ كری دووماهیا وی ل سه‌ر ده‌ستێ عه‌بادیه‌كی بگه‌هیته‌ وێ رادێ چه‌نگه‌كی مریشكێ ژی نه‌ده‌تێ!!

42

ئازاد گوله‌ى
پشتی چه‌ند رۆژه‌كێن دی، دێ ل سۆیسرا ده‌نگدان ل سه‌ر چه‌ند بابه‌ته‌كێن گرێدای ژیارا ئاكنجیێن وی وه‌لاتی هێنه‌كرن و ل دووڤ دا ب چه‌ند رۆژه‌كان دێ هه‌لبژارتنێن په‌رله‌مان و حوكمه‌تێ ژی هێنه‌كرن و بۆ هندێ ژی هه‌می لایه‌نێن سیاسی پرۆگرامێن خوه‌ یێن به‌رچاڤكرین بۆ ملله‌تێ خوه‌ و كاندیدا ژی پرۆژێن خوه‌ دانانه‌به‌ر سینگێ ملله‌تی و گۆتێ ئه‌م دێ بۆ هه‌وه‌ ئه‌ڤێ كه‌ین هه‌كه‌ هوون مه‌ بهه‌لبژێرن.. دا بزڤرینه‌ سوحبه‌تا ده‌نگدانێ ل سه‌ر بابه‌تێن گرێدای ژیارا سۆیسریا یا كو دێ به‌ری هه‌لبژارتنان هێته‌كرن. ئێك ژ بابه‌تێن هه‌ره‌ گه‌رم نوكه‌ ل سۆیسرا و بوویه‌ جهێ گه‌نگه‌شه‌ و دانوستاندنان د ناڤبه‌را حزب و ملله‌تی دا، ئه‌وه‌ كو سۆیسرا ده‌زگه‌هه‌كێ هه‌ی دبێژنێ بیلاگ هه‌ر ماله‌كا ل سۆیسرا رادیۆ و ته‌له‌ڤزیۆن هه‌بن بڤێت و نه‌ڤێت دێ سالانه‌ گۆژمێ نێزیكی (40) دۆلاران ده‌ته‌ وی ده‌زگه‌هی و ئه‌گه‌ر ئێك بێژیتێ من ته‌له‌ڤزیۆن نینه‌، دێ بێژیتێ ترۆمبێل لابتۆب مۆبایل، هه‌كه‌ گۆتێ، به‌لی دێ بێژنێ مانێ تو دشێی د وان ژی دا به‌رێ خوه‌ بده‌یه‌ته‌ له‌ڤزیۆنا و گوهێ خوه‌ بده‌یه‌ رادیۆیان!! ئانكو قورتالبوون ژ ڤی ده‌زگه‌هى نینه‌ و ل ڤان دووماهیا هنده‌كا ئیمزا لێكدان دا بێخنه‌ ده‌نگدانێ و ره‌زامه‌ندی هاته‌دان كو ببیته‌ ئێك ژ خالێن دڤێت ملله‌ت ره‌ئیا خوه‌ ل سه‌ر بده‌ت و بریارا دووماهیێ بۆ وان كا ئه‌ڤ ده‌زگه‌هه‌ بمینیت یان نه‌مینیت. تشتێ سه‌یر ئه‌وه‌ كو هه‌تا نوكه‌ چه‌ندین ده‌زگه‌هێن راگه‌هاندنێ و لایه‌نێن شاره‌زا ریفراندۆما ئه‌نجامدای و د هه‌میان دا ملله‌تێ سۆیسری ب ده‌نگێن گه‌له‌ك مه‌زن و جودا یا گۆتی بلا ئه‌ڤ ده‌زگه‌هه‌ بمینیت، چونكی حوكمه‌ت و چه‌ندین ده‌زگه‌هێن وێ مفایه‌كی زۆرێ مه‌زن ژێ دبینن و پاره‌كی زه‌به‌لاح ژێ دهێت كو پتره‌ ژ (٣٠) ملیار فره‌نكێن سۆیسری، باش ب خوینن ملیار نه‌ملیۆن و ب رێیا وان (٣٠) ملیاران چه‌ندین ده‌زگه‌هێن راگه‌هاندنێ و گه‌هاندنێ و زۆر تشتێن دی پێ دهێنه‌كرن، ئه‌ز ب خوه‌ وه‌كو ئاكنجیه‌كی ڤی وه‌لاتی گه‌له‌ك كه‌ربێن من ژ ڤی ده‌زگه‌هی ڤه‌دبن و چونكی من مافێ چار ده‌نگان یێ د مالا خوه‌ دا هه‌ی من من گۆته‌ هه‌ر چارا بێژن نه‌خێر بۆ بیلاگ دا نه‌مینیت و شوونا ئه‌و پاره‌ بۆ حوكمه‌تێ بچن بلا بۆ مالا مه‌ بمینن؟ ئینا پشتی دانوستاندنه‌كا چر و پر بریارا ده‌نگده‌رێن مالا من ئه‌وه‌كو دێ بێژن به‌لێ بۆ بیلاگ چونكی هه‌كه‌ نه‌مینیت دێ زه‌ره‌ر ب حوكمه‌تێ كه‌ڤیت، چونكی دڤێت پاشی ئه‌و ژ به‌ره‌كا خوه‌ مه‌سره‌فی ل راگه‌هاندنا سۆیسرا و چه‌ندین لایه‌نێن دی بكه‌ن وو… هتد. ئانكو ده‌نگده‌رێن مالا من به‌رژه‌وه‌ندیا وه‌لاتێ خوه‌ ئێخسته‌ به‌ری به‌رژه‌وه‌ندیا مالا خوه‌، چونكی وه‌كو كورێ من گۆتی (باب هه‌كه‌ حوكمه‌ت نه‌ما، وه‌لات ژی نامینیت و هه‌كه‌ وه‌لات نه‌ما ملله‌ت ژی نامینیت، هه‌كه‌ ژى ئه‌ڤه‌ هه‌می نه‌مان، مالا مه‌ ژی نامینیت!!)، له‌وما دڤێت ئه‌م بارێ حوكمه‌تێ گران نه‌كه‌ین دا حوكمه‌ت باش خزمه‌تا مه‌ بكه‌ت و هۆسا دێ وه‌لاتێ مه‌ هه‌ر مینیت پێشكه‌فتی و ژیارا مه‌ دێ یا سه‌رفراز و خۆش بیت و رۆژێ دۆلاره‌ك كارتێكرنێ و زه‌ره‌رێ ل چ مالێن سۆیسری ناكه‌ن، چونكی رۆژێ تنێ دۆلاره‌ك ژ هه‌ر ماله‌كا سۆیسری بۆ وان دچیت!!! ب راستی ئه‌ز مامه‌ حێبه‌تى و د دلێ خوه‌دا گۆته‌ كورێ خوه‌، سه‌حه‌تا ته‌ خۆش تو هۆسا هزر بكه‌ی نه‌ وه‌كی مه‌ كوردان، كا لایه‌نێن وان یێن سیاسی چ دبێژنێ و كێ بۆ كاندید دكه‌ن، یا وان تنێ تبل مۆركرنه‌ و بلا نه‌زانن كا كیه‌ و چ كریه‌ و دێ چ كه‌ت و یێ هه‌ژیه‌ یان نه‌وكا پرۆژێ وی چیه‌ وه‌كو كاندید!، ب راستی گه‌له‌ك و گه‌له‌كا بۆ مه‌ مایی ئه‌م بێژین كو ئه‌م ژی یێ هه‌لبژارتنان دكه‌ین، ده‌مێ ئه‌ز ڤان هزران دكه‌م، ژنوو دزانم كا خه‌لكێ رۆژهه‌لاتا ناڤین ل كیژان جیهانێ دژیت و ئورۆپا و ئه‌مریكا و كه‌نه‌دا و ئوستورالیا ل كیژان جیهانێ دژین!! هه‌ر ل ڤێره‌ ژی من دڤێت بێژمه‌ هه‌وه‌ كو ل هه‌یڤا حه‌فتا سالا ٢٠١٦ ێ گه‌لێ سۆیسرا د رێژه‌یه‌كا مه‌زنا ده‌نگان رازی نه‌بوون كو حوكمه‌ت هه‌یڤانه‌ مووچه‌كی بده‌ته‌ هه‌ر هه‌ڤوه‌لاتیه‌كێ سۆیسری، ژ بلی مووچێ وی یێ سه‌ره‌كی و دیسا ئێك ژ وان كه‌سان كوڕێ من بوو و ده‌می من گۆتیی بۆ ته‌ نه‌هێلا مووچه‌كی بده‌نه‌مه‌؟ گۆتی حوكمه‌ت گه‌له‌ك گه‌له‌ك هه‌تا پێنچ سالێن دی دێ شێت ڤی مووچه‌ی ده‌ت، پشتی هینگی دێ چ كه‌ن و چ چێبیت؟دێ سۆیسرا كه‌ڤیت!! بابۆ خه‌لك هزرێن پاشه‌رۆژێ و بیست سالێن بهێن دكه‌ن و ئه‌م خوه‌ یا سوباهی ژی ناكه‌ین!!

12

ئازاد گوله‌یى

وه‌كو ئه‌م هه‌می دزانین كو هه‌لویستێن سیاسی نه‌ مه‌دئینن و دبه‌ن و یاریا ب هه‌ستێن مه‌ دكه‌ن و ئه‌گه‌ر په‌یوه‌ندیێن سیاسه‌تمه‌دارێن مه‌ یێن كورد ل گه‌ل لایه‌نه‌ك یانژی سیاسه‌تمه‌داره‌ كێ عه‌ره‌بێ عیراقێ تێكچوو، ئه‌م ل مالێن خوه‌ وه‌سا وی لایه‌نی و وی كه‌سی ل به‌ر دلێ خوه‌ ره‌ش دكه‌ین خوه‌ دێ بێژی بابێ مه‌ یێ كوشتی و خویندارێ مه‌ دبیته‌ ئه‌و و ڤێجا دێ سوشیال میدیا فیێت سۆر دانینه‌ سه‌ر و دێ ب فۆتوشۆپی یا ئه‌م ژێ دزانین دێ ب وێنێن وی كه‌ین و جار كه‌ینه‌ ئاژه‌ ل و جار كه‌ینه‌ ئبلیس، ڤێجا ئه‌م ب كه‌یفا خوه‌ینه‌.. ئه‌ڤه‌ هه‌می و ئه‌م یێ ل مالێن خوه‌ پالدای و وه‌كو ره‌حمه‌تیێ بابێ دگۆته‌ ده‌یكا من هه‌ما تو خوینا مرۆڤی دسۆژی، ئه‌ڤجا مه‌ ژی خوینا خوه‌ دسۆت و نه‌ سیاسه‌تمه‌دارێ كورد هایژمه‌ و نه‌یێ عه‌ره‌ب و گه‌له‌ك جاران ژی دلێ مه‌ و هنده‌كا یێ ژێك مای سه‌را ڤان تشتان و چ ئه‌و دحه‌ق یان ئه‌م، مه‌ چ دچڕا نه‌ دهێلا هه‌كه‌ مه‌ زانیبا دێ كورده‌ك به‌ره‌ڤانیێ ژ وی عه‌ره‌بی كه‌ت!! ڤێجا ئه‌م ژی د مه‌عروفین (ناسیار) ب خوین گه‌رمیێ و گه‌له‌ك جاران ئه‌م ژ سنۆرێ لایه‌نێ خوه‌ یێ سیاسی ده‌ردكه‌فتین و دچووین مه‌ هاری سیاسه‌تمه‌دار و به‌رنیاسێن لایه‌نێن دی ژی یێن كوردستانێ دكر (دلسۆزین نه‌ ب ده‌ستێ مه‌یه‌!) و ما ڤێجا مه‌ خوینا خوه‌ دسۆت و خوه‌ دهه‌لاڤێت و یا ژده‌ڤێ مه‌ ده‌ركه‌فتبا چ سنۆر بۆ نه‌بوون هه‌تا دگه‌هشته‌ وێ رادێ ده‌مێ پیچه‌ك سست دبوین و په‌رداغه‌كی ئاڤێ ڤه‌ خار با دا سه‌حكه‌ینێ دپشت مه‌را سیاسه‌تمه‌دارێ كورد و عه‌ره‌ب یێن بووینه‌ دۆسته‌ برایێن ئێك، ب تایبه‌ت دهه‌رێما دی ئه‌ وا د ناڤا هه‌رێما مه‌ دا!! تا گه‌هشتیه‌ وێ رادێ كو ئه‌ ڤرۆ كوردینیا مه‌ یا ب سه‌ر عیراقبوونا مه‌ دا دكه‌ڤیت و ئه‌م خوه‌ ناهژمێرین عیراقی، هه‌ر چه‌نده‌ ئێك تشتێ د به‌ریكا مه‌ دا نابێژیته‌ مه‌ كو ئه‌م كوردین!! هه‌می ناسنامه‌ و كارتێن پێناسه‌ یێن مه‌ یا ل سه‌ر نڤێسیه‌ كۆمارا عیراقێ به‌لێ پا هندی یا كریه‌ دسه‌رێ مه‌ ئێدی خوه‌ ئه‌م نابێژین ئه‌م كوردێن عیراقێ نه‌، دبێژینه‌ خه‌لكی ئه‌م كوردین؟ یێ شاره‌ زابیت ژی د سیاسه‌تێ دا دێ ئێكسه‌ر بێژیته‌ مه‌ كوردێ كیریێ؟ ئه‌م ژی دێ تێگه‌هین كو كابرا تشته‌كی ژ جوغرافیا ڤێ جیهانا مه‌زن دزانیت و یێ ئاگه‌داره‌ كو چ وه‌لات نینن ب ناڤێ كوردستان له‌وما یێ دبێژیت كوردێ كیرێی.. دێ كا هوین خوه‌  داننه‌ شوونا من و تو ئێكێ بیانی ل وه‌لاته‌كی كه‌فتنه‌ سوحبه‌تێ و گۆته‌ ته‌ تو یێ ژ كی دێ چ بێژیێ؟ هه‌لبه‌ت كوردم. پاش هه‌كه‌ گۆته‌ ته‌ كوردێ كیرێی؟ دێ بێژیێ یێ عیراقێ!! ئه‌ڤه‌ راستیه‌ و كه‌س نه‌شێت خوه‌ ژێ بده‌ته‌ پاش سه‌ره‌رای هندێ كو هه‌تا نوكه‌ ژی و د ڤان سه‌روبه‌ران دا ئه‌م هێشتا یێ دبێژین كوردین و كوردێن باشۆرین و دێ ڤێجا ده‌ست هاڤێژینێ سه‌رێ كابرای كێژ كه‌ین ب چیرۆكێن خوه‌ و ئه‌نفالا و حه‌له‌بچه‌ بۆ ژ سه‌ری بێژین و خرابكرنا گوندێن مه‌ ژلایێ رژێما سه‌دامی ڤه‌ و پاشی ده‌ستهه‌لاتدارا ژ سه‌دامی خرابتر ئه‌وا پشتی سالا ٢٠٠٣ یێ هاتیه‌ سه‌ر دلێ مه‌ ووو هتد.. ژ ڤان چیرۆكێن ئێدی چ مفایێ ناگه‌هیننه‌ مه‌ كوردان و دزانین ژی چ ناگه‌هیننه‌ مه‌ چونكی ژبلی مه‌ كه‌س پیته‌ پێ ناكه‌ت و مه‌ ژی نه‌ شیایه‌ ژ سنۆرێن كوردستانا باشۆر ده‌ربێخین و بكه‌ینه‌ بابه‌تێن جیهانی و بالكێش و هێدی هێدی تاكو ببا مینا هێرۆشیما یابانی.. مه‌ گه‌له‌ك تشت د ڤان دوسێ سالێن بۆری ژ ده‌ستدان ئه‌ڤجا هیڤیه‌ بلا بۆ مه‌ بهێته‌ رۆنكرن كا دێ ئه‌م كورد بینه‌ تشته‌ك یان نه‌، چونكی ئێدی سیاسه‌تمه‌دارێن مه‌ یێ ب ئه‌لغازا و زمانێ ئه‌جنا ل گه‌ل مه‌ دئاخڤن!! مه‌ چ ژێ نه‌ڤێت تنێ بێژنه‌ مه‌ كا ئه‌م كوردین یان عیراقینه‌؟ دێ كی مه‌ ب خودان كه‌ت و برێڤه‌به‌ت؟ كی دێ پارا و مووچه‌ی ده‌ت؟ كێ دێ ده‌ستهه‌لات بیت؟ هه‌لبه‌ت دڤێت كورد بن، لێ پا سه‌ر ڤی ده‌ستودارێ ئه‌زێ دبینم دێ كوردستان زڤریته‌ بن ده‌ ستهه‌لاتا به‌غدا و گونه‌ ها ڤی ملله‌تی دێ ستویێ وان هه‌میان بیت ئه‌وێن ئه‌ڤه‌ سه‌رێ 27 ساله‌ ئه‌ڤ كوردستانه‌ د ده‌ستێن وان دا و برێڤه‌ دبر و چ ژ وێ رێڤه‌برنێ چێنه‌كر هه‌تا گه‌هاندیه‌ ڤێ رادێ هزار هیڤیا ژ به‌غدا بكه‌ن رازی نه‌ بیت مووچه‌كی فرێ بكه‌ت!! مه‌ دڤێت سیاسه‌تمه‌دارێن مه‌ ژی ب جورعه‌ت بكه‌ڤن و ده‌ركه‌ڤن بۆ خه‌لكی بئاخڤن و راستیا بۆ بێژن دا ئه‌ڤ ملله‌ته‌ تشته‌كی ژ خوه‌ و پاشه‌رۆژا خوه‌ بزانیت!!

28

د سیسته‌مێ دیمۆكراسی دا، تشته‌كێ هه‌ی، دبێژنێ هه‌لبژارتن و ده‌نگدان، مه‌قسه‌د ژ وان هه‌لبژارتن و ده‌نگدانان ژی ئه‌وه‌كو ملله‌ت بۆ خوه‌هنده‌ك كه‌سان ژێ بگریت داكو ببنه‌حكومه‌ت و ژ لایێ ئیداری ڤه‌وه‌لاتی برێڤه‌ببه‌ن و خزمه‌تێ بكه‌ن بۆ هه‌ڤوه‌لاتیان داكو ژیارا وان خۆشبكه‌ن و ئێمناهیا وان بپارێزن، لێ هندی ئه‌ز ل ئیراقێ و كوردستانێ، ئه‌م وه‌سا د هه‌لبژارتن و ده‌نگدانان دگه‌هشتین كو یا مه‌ تنێ ئه‌وه‌ بچینه‌ سه‌ر سندۆقێن ده‌نگدانێ و تبلا خوه‌ مۆر بكه‌ین بۆ كه‌سه‌كی هه‌ر ئه‌م نزانین كا دێ بۆ خوه‌ یێ باش بیت یان بۆ مه‌! هه‌لبه‌ت هه‌ر كه‌سێ مه‌ ده‌نگێ خوه‌ دایێ ژی جامێرا ته‌قسیری بۆ خوه‌ نه‌كریه‌، لێ ده‌رهه‌قێ مه‌ دا د گونه‌هبارن، چونكی گه‌له‌ك ژ وان هیڤی و ئۆمێد و خه‌ونا وان ئه‌و بوو ببیته‌ ئه‌ندام په‌رله‌مان ب چ رێیا هه‌بیت ژ به‌ر به‌رژه‌وه‌ندیێن خوه‌ یێن كه‌سایه‌تی نه‌ك بۆ چاڤێن ملله‌تی یێن ره‌ش (هنده‌ك..هنده‌كێن كێم دا مرۆڤ به‌ختێ خوه‌ خراب نه‌كه‌ت د باش بوون)، لێ پتریا ئه‌ندامێن په‌رله‌مانێن كوردستانێ و ئیراقێ ب دلێ ملله‌تی نه‌بوون، چونكی ژ لایێ لایه‌نێن سیاسی ڤه‌ هاتبوونه‌ سه‌پاندن ل سه‌ر ملله‌تی و هه‌ڤوه‌لاتی چ رێك نه‌بوون ژبلی هندێ ده‌نگێ خوه‌ بده‌ته‌ وی كه‌سی یێ كو لایه‌نێن سیاسی كاندید كری، له‌وما رۆژ بۆ رۆژێ رێژه‌یا ده‌نگده‌ران ل هه‌رێما كوردستانێ ل كێمیێ دا و وان لایه‌نێن سیاسی پسیارا خوه‌ نه‌كر كا بۆچی رۆژ بۆ رۆژێ رێژه‌یا ده‌نگده‌ران كێم دبیت و ئه‌گه‌ر چنه‌! پسیار ناكه‌ن چونكی دزانن خلاس خاك و ملله‌ت كه‌فته‌ د ده‌ستێن وان و ئوپوزسیۆن نینه‌ له‌وما فێربوون بێی وه‌رگرتنا بۆچوونا ملله‌تی و ده‌نگدانێن ناڤخوه‌یی مرۆڤی هند دیت، دێ ڤێجا وێنێن كاندیدا هه‌لاویسن و كارتا بۆ چاپ و به‌لاڤ كه‌ن ل سه‌ر خه‌لكی و هنده‌ك ناڤ دبنه‌جهێ مه‌ندهۆشیا خه‌لكی، كا چاوا و كێ ئه‌ڤه‌ كاندید كریه‌ بۆ ئه‌ندامه‌تیا په‌رله‌مانه‌كی و دووڤدا ده‌ستهه‌لاتداریا وه‌زاره‌ته‌كی یان رێڤه‌به‌ریه‌كا گرنك بكه‌ڤیته‌ د ده‌ستدا!! لێ پشتی ئه‌ز هاتیمه‌ سۆیسرا یاكو ب گوپیتكا دیمۆكراسیێ ل هه‌می جیهانێ دهێته‌ نیاسین ژنوی من زانی یێن مه‌ كوردان و عه‌ره‌بان و رۆژهه‌لاتا ناڤین هه‌میێ هه‌ر شه‌رمه‌ بێژنێ هه‌لبژارتن و ده‌نگدان، چونكی ملله‌ت به‌ری هه‌لبژارتنێن مه‌زن یێن ناڤخوه‌یی ئه‌نجام ناده‌ن داكو بۆ خوه‌ بنیڤا دلێ خوه‌ كاندیدێن خوه‌ بهه‌لبژێرن و ده‌ستنیشان بكه‌ن و ئه‌و نه‌ك لایه‌نێن سیاسی بۆ خوه‌ مرۆڤان ژێ بگرن داكو حوكمه‌تا خو وه‌كو ئێمانه‌ت بكه‌نه‌ د ده‌ستان دا.. ل سویسرا به‌روڤاژی یه‌، كاندید دێ ژ تاخێ خوه‌ ده‌ستپێكه‌ت و خه‌لكێ تاخی هه‌كه‌ دیت یێ باشه‌ دێ هه‌لبژێریت و ل ده‌ستپێكێ كاروبارێن تاخی وه‌رگریت و برێڤه‌به‌ت، هه‌كه‌ باش برێڤه‌بر دێ ملله‌ت ب خوه‌ وی مه‌زنتر لی كه‌ت و كاندید دكه‌ن و هه‌لبژێرن بۆ برێڤه‌برنا باژێری و هه‌كه‌ دیسا یێ سه‌ركه‌فتی بوو، دێ بلندكه‌ن داكو بچیته‌ د ناڤ حوكمه‌تا فیدرال و په‌رله‌مانێ ده‌وله‌تێ دا خزمه‌ت بكه‌ت. لێ هه‌كه‌ دیت چ ژ رێڤه‌برنا كارێ ئیداریێ تاخی چێ نه‌كر دێ ئێكسه‌ر بێژنه‌ ل مالا خوه‌ روونه‌ خارێ تو نه‌یێ هندێی ڤی ملله‌تی دكارێن وی ته‌سلیمی ته‌ بكه‌ین و دێ شوونا وی ئێكێ باش دانن، له‌وما ل سۆیسرا هه‌ر كه‌سێ هاته‌كاندیدكرن بۆ پۆسته‌كی دێ ده‌ستێ وی ب دلێ وی ڤه‌بیت و هه‌می هێز و شیانێن خوه‌ ته‌رخان كه‌ت دا ب باشترین شێوه‌ خزمه‌تا خه‌لكی بكه‌ت، داكو جاره‌كا دی خه‌لك به‌هلبژێریت وه‌كو نوونه‌رێ خوه‌..لێ ل ده‌ف مه‌، ته‌ بڤێت و نه‌ڤێت فلان كاندیده‌ یێ باش بیت یێ خراب بیت ئه‌وه‌ و كه‌سێ دی نینه‌ و ئاریشه‌ نینه‌ ئه‌گه‌ر به‌ری نوكه‌ پۆسته‌ك وه‌رگرتبیت و فه‌شل ئینا بیت یان دز و گه‌نده‌ل بیت!! ب راستی نابێژنه‌ ڤێ هه‌لبژارتن و ده‌نگدان. دبێژنێ سه‌پاندنا كه‌سێن نه‌ ژهه‌ژی ل سه‌ر ملله‌تی ژلایێ لایه‌نێن سیاسی ڤه‌، نه‌ك ل كوردستانێ ب تنێ و ئیراقێ به‌لكو ل هه‌می رۆژهه‌لاتا ناڤین و وه‌لاتێن عه‌ره‌بان دا و ب راستی من وه‌كو كه‌س نه‌ڤێت چ جارا ئه‌ڤ كلتۆرێ ده‌نگدان و هه‌لبژارتنان هاتبا د ناڤ مه‌ كوردان دا، لێ مخابن هات و روونشته‌ سه‌ر دلێ مه‌ و نوكه‌ هه‌می لایه‌نێن سیاسیێن كوردی یێ هنده‌كا كاندید دكه‌ن بێی كو حسابا پیڤازه‌كێ بۆ ملله‌تی بكه‌ن و بهێلن ملله‌ت بۆ خوه‌ خه‌لكه‌كی ده‌ستنیشان بكه‌ت بۆ هه‌لبژارتنان!؟ ئه‌ز ب خوه‌ نابێژمه‌ ڤێ هه‌لبژارتن دبێژمێ گوشتبژارتن چونكی ب راستی مه‌ژ كه‌ربا دا دبژێرن!!

26

پشتی ماوه‌یه‌كی دابران ژ سۆشیال میدیایێ، جاره‌كا دی زڤرینه‌فیسبۆكێ كو ئه‌ز ب خوه‌ مینا ته‌ركتره‌كا گلێشی دبینم، چونكی هه‌می جۆرێن مرۆڤان تو دێ ل فیسبۆكێ بینی.. بۆچی ته‌ركترا گلێشی؟ چونكی ته‌ركترا گلێشی هه‌می تشتان د هاڤێنه‌ تێدا یێن باش و یێن خراب و پیس و پاقژ و..، ئه‌و باش و پاقژێن دكه‌ڤنه‌ د ناڤ پیس و خرابا دا بێگومان دێ هێنه‌ به‌رزه‌كرن و كه‌س زوی ب زوی نابینیت. هنده‌ك جاران زێره‌و پاره‌ و خوارن و جلكێن هێشتا نوو و كتێب و پرتووك دهێنه‌ هاڤێتن و دچنه‌ د ناڤ گلێشی دا و به‌رزه‌دبن.. فه‌یسبۆك ژی نوكه‌ یا وه‌سایه‌، هه‌می جۆرێن مرۆڤان دێ تێدا بینی، بگره‌ ژ یێ خواندن و نڤیسینێ نه‌زانیت و خودانێن كارێن مللی چ بۆیاغچی و فیته‌ر و كاسبكارێن هه‌ژار كو من رێزێن تایبه‌ت و مه‌زن بۆ وان هه‌میان هه‌نه‌، ئه‌وێن هه‌ژاریێ و به‌له‌نگازیێ هند ده‌لیڤه‌ بۆ ته‌رخان نه‌كری، خواندنا خوه‌ بدووماهیك بینن، ڤان هێژایان تنێ بۆ خوه‌ هنده‌ك وێنه‌یێن د ته‌له‌فۆنا خوه‌دا خه‌زن كرین و سوپاس و ده‌ستخۆش و گه‌له‌ك لاوه‌ و هه‌ر بژی تو و.. هتد، یێ ل سه‌ر هاتینه‌ نڤێسین و چ زه‌حمه‌تێ نابه‌ن و دێ سه‌حكه‌ته‌ وێنێ خودانێ پۆستی، هه‌كه‌ یێ نیاس بیت، دێ لایكه‌كێ یان قه‌لبه‌كێ سۆر لێده‌ت، یانژی سمایلێ رۆندكا بۆ فرێ كه‌ت، ئانكو یێ حه‌زینه‌! ئانكو شۆلا وان زۆرا ب ساناهی یه‌..ل گه‌ل ڤان به‌رێزان توخمه‌كێ دیژی دبینین د فیسبۆكێ دا وه‌كو مامۆستا و ره‌وشه‌نبیر و دكتۆر و رۆژنامه‌ڤان و هزرڤان و چالاكڤانن و خودان باوه‌رنامێن بلند و سیاستمه‌دار و هونه‌رمه‌ند..ل ڤێره‌ دڤێت مرۆڤ بزانیت كا دێ چاوا شێت سه‌ره‌ده‌ریێ ل گه‌ل ڤان هه‌میان كه‌ت، بێی كو دلێ كه‌سێ نه‌هێلیت و نامه‌ و هزروبیر و بۆچوونێن خوه‌ بگه‌هینیته‌ وان؟ ب راستی كاره‌كێ بزه‌حمه‌ته‌..و ئێك ژ ئه‌گه‌رێن سه‌ره‌كیێن كو من فیسبۆكێ خوه‌ نێزیكی سێ هه‌یڤا دائێخست، ئه‌و بوو كو مه‌ نه‌شیا ته‌حه‌مولا هنده‌ك پۆستان بكه‌ین كو ژ لایێ هنده‌ك كه‌سانێن نێزیكی مرۆڤی دهاتنه‌ به‌لاڤكرن و مرۆڤی دزانی كو هه‌می دره‌ون و ئێك په‌یڤا راست ژی تێدا نینه‌، لێ تو نه‌شێی بێژیێ تو دره‌وا دكه‌ی!! یانژی دێ كابرایه‌ك دێ هێت و فیسبۆكی تژی په‌یڤێن نیشتمانپه‌روریێ و مه‌لاقیێ و هاڤێته‌ گه‌ندلا و هه‌می دزانن كو كه‌س ژ وی گه‌نده‌لتر نینه‌!! ل دووماهیێ گه‌هشتمه‌ وێ چه‌ندێ كو سه‌ره‌ده‌ری و كه‌یفخۆشی و دانوستاندنێن مرۆڤ ل گه‌ل جۆرێ ئێكێ دكه‌ت، گه‌له‌ك و گه‌له‌كا ب مفاتره‌ ژ وێ سه‌رگێژی و بگره‌ و بكێشا مرۆڤ ل گه‌ل جۆرێ دووێ دكه‌ت، چونكی د ناڤ جڤاكێ كوردی دا، نابیت تو ته‌نازولێ بۆ یێ به‌رامبه‌ر بكه‌ی تو چه‌ندێ خه‌له‌ت بی ژی!! ژبه‌ر هندێ ناڤوده‌نگێ مه‌ كوردان ب سه‌رره‌قیێ یێ چووی هه‌ر چه‌نده‌ نوكه‌ ئه‌م زۆرێن سه‌ر نه‌رم و حه‌لیم بووین و هه‌كه‌ هوون باوه‌ر نه‌كه‌ن به‌رێ خوه‌ بده‌نه‌ حوكمه‌تا مه‌ یا هه‌رێمێ، عه‌بادی چ دبێژیتێ، دبێژنێ به‌لێ و له‌بێ.. ئه‌ڤجا كا سه‌ر ره‌قیا مه‌؟,
گه‌لۆ.. ئه‌م ئه‌ڤرۆ پێدڤی سه‌رره‌قی و هشكاتیێ نینین، مه‌ ئه‌ڤرۆ پێدڤی یا ب هندێ هه‌ی ئه‌م دوژمن ودۆستان ژێكجودا بكه‌ین و خوه‌ نه‌كه‌ینه‌ پێترانكێن وان كه‌سێن هه‌تا نوكه‌ ژی پتر ژ دوژمنێن مه‌ یێن به‌رچاڤ كێر ل پشتا مه‌ داین و دا ئه‌م ژی وه‌كو وه‌لاتێن پێشكه‌فتی هه‌تا گلێشێ خوه‌ ژی ژێكجودا بكه‌ین و نه‌هێلین خوارن و كتێب و تشتێن پیرۆز بچنه‌ د ناڤ گلێشێ دی یێ پیس و خراب دا و پشتی هینگی بزانین د ژیانێ دا ژی هنده‌ك مرۆڤ و لایه‌نێن گلێش ژ یێن پاقژ و پیرۆز جودا بكه‌ین و هیڤیدارم ئه‌ڤ ناما من بگه‌هیت..
تێبینی.. ئه‌م كورد زۆر كه‌لوپه‌ل و خوارن و تشتێن ل ئورۆپا هه‌ر نابێژنێ گلێش دهاڤێژینه‌ د ناڤ گلێشی دا و د گه‌ل وی گلێشی تێكهه‌ل دبیت و به‌رزه‌دبن.

38

ئازاد گوله‌ى
ئه‌ز گه‌هشتمه‌ڤێ چه‌ندێ، به‌لێ مه‌پشتا خوه‌ ب گه‌له‌كا گه‌رم كر و مه‌ خوه‌ گه‌له‌ك مه‌زن دكر و دگۆته‌ ئێكودو، كی جورعه‌ت دكه‌ت بێژیته‌ مه‌ كوردان پێلاڤا پێ هه‌وه‌ یاخاره‌!، ب تایبه‌ت مه‌ كوردێن باشۆر، خودانێن گازێ و جهێن ته‌ئمین بۆ بێهنڤه‌دانا هێزێن هه‌ڤپه‌یمانا و شاندێن بیانی یێن سه‌ره‌دانا عیراقێ دكرن و دهاتنه‌ كوردستانێ، دا خوارنێن خۆش بخۆن و ب دلێ خوه‌ بگه‌ریێن!! مه‌ كوردان خوه‌ كره‌ عه‌رد بۆ ڤان بێوژدانا، ژ ئه‌مریكیان و ئه‌وروپایان و ئیسرائیلیان و هه‌تا عه‌ره‌با ژی و ل دووماهیێ ده‌مێ ئه‌م ژ راستا محتاجی وان بۆین، دا پشتا مه‌ بگرن دژی به‌غدا، هه‌میان پشتا خوه‌ دا مه‌ و گۆتنا (ئه‌م د گه‌ل عیراقه‌كا ئێك پارچه‌ینه‌!!)، گوهێن مه‌ سمتن هندی بۆ مه‌دوباره‌دكه‌ن، هه‌تا گه‌هشتیه‌ وێ رادێ نوكه‌ ڤێجا ئه‌م یێ دبێژینه‌ وان مه‌ عیراقه‌كا ئێك پارچه‌ و ب هێز دڤێت!! عیراقی دبێژنه‌ مه‌هوین جوداخوازن (أنفصالیون!)، تورك دبێژنه‌ كوردا تیرۆرست، ئیران دبێژیته‌ مه‌ هوین دارده‌ستێن ئه‌مریكا و ئیسرائیلن و سه‌هیونیانه‌!، سووریا دبێژنه‌ مه‌هوین خۆفرۆشن! داعش دبێژنه‌ مه‌ كافر! قاعیده‌ دبێژیته‌ مه‌مولحید!، جه‌بهه‌ئه‌لنوسره‌ دبێژنه‌ مه‌ دێ هه‌وه‌ برینین، چونكی هه‌وه‌یا خوه‌ دایه‌ ل گه‌ل رژێمێ! حزبوللاه‌مه‌بگرن دێ مه‌خون هندی سه‌رێ مه‌نه‌ڤێت چونكی دبێژنه‌ مه‌، هه‌وه‌ دڤێت ئیسرائیله‌كا دووێ ل ده‌ڤه‌رێ دروست بكه‌ن!! ئه‌ڤه‌ ژبلی هندێ كو عه‌بادی و مالكی و ئه‌لحه‌كیم و ئه‌لجبۆری و ئه‌لنجویفی و خامه‌نه‌ئی و ئه‌ردوغانی و ئه‌سه‌دی و ترامپی و ماكرۆنی و خاله‌تا مێركل و مه‌تا تێرێزا مای و گه‌له‌كێن دی ژی خرا سه‌رێ مه‌ كوردان نه‌ڤێت!! ئه‌و هه‌می به‌س نینن، ژنوو مه‌ كوردان سه‌رێ ئێكودو نه‌ڤێت!! كا دێ وه‌رن بۆ من ڤێ مه‌سه‌لێ سافی بكه‌ن؟ دێ هنده‌ك بێژن مانێ دوژمن ناهێلن كورد ببنه‌ئێك!!. وه‌یلا من و ڤێ دره‌وا مه‌زن، نه‌وللادوژمن دزانیت كو ئه‌م چ جاران نابینه‌ ئێك، له‌وما هند خوه‌ ب مه‌ڤه‌ مه‌حتل ناكه‌ت، ژ بلی هندێ هه‌كه‌ به‌رژه‌وه‌ندیه‌كا وان ل ده‌ف مه‌ كوردان بیت وه‌كو ئه‌م بكارئیناین بۆ شه‌ڕێ ل دژی داعش و پاش پویته‌ ب مه‌نه‌كر، ل سووریێ ژی تێر شه‌ڕ ب كوردان هاته‌كرن و نوكه‌ هه‌می یێن بووینه‌ ئێك دا كوردان ژ ناڤببه‌ن!!. دبێژنه‌ من تو بۆچی بۆ عه‌فرینێ ده‌رناكه‌ڤی؟ما دێ چاوا ده‌ركه‌ڤم دگه‌ل په‌كه‌كێ؟ و چمه‌ خۆنیشاندانه‌كێ و بلا ئه‌و وێنێن ئاپۆی و درووشمێ خوه‌ هه‌لگرن، به‌لێ بۆ مه‌ نابیت وێنێن سه‌رۆك بارزانی و ئالایێ كوردستانێ بلند بكه‌ین!!. دبێژینه‌ په‌كه‌كێ وه‌رن ژبلی ئالایێ كوردستانێ چ دی بلند ناكه‌ین؟ قه‌بوول ناكه‌ن! باشه‌ ما عه‌فرین ل كیڤه‌ و ئاپۆ ل كیڤه‌؟ نابه‌ برێ، ئه‌ڤ سه‌رۆكێ نه‌ته‌وه‌یی یه‌ و دبێ د هه‌موو هه‌لكه‌فتا وێنێ وی بهێته‌بلندكرن؟ باشه‌ پا دیاره‌ سه‌رۆكێ مه‌، نه‌یێ نه‌ته‌وه‌یی یه‌ ئانه‌؟ پا دیاره‌ ئاپۆی پتر ژ سه‌رۆك بارزانی خه‌باتا كری؟ هه‌رن پسیارا جیهانێ بكه‌ن كا خه‌لك كیژ سه‌ركردێ كورد پتر دنیاسیت ل سه‌رانسه‌ری جیهانێ؟ تنێ سه‌رۆك بارزانی یه‌، هه‌می د نیاسن و ل گه‌ل دروینن و دزانن كو خودان هێزه‌ و گۆتنێن وی جهێ رێزێنه‌، بۆ هه‌می كوردان و كورد پێگریێ پێ دكه‌ن، چونكی حه‌ز ژێ دكه‌ن.. ژبلی ڤێ، ئێكه‌تی خوه‌ ناده‌ته‌ ل گه‌ل چالاكیێن كوردێن باشۆر هندی خوه‌ دده‌ته‌ ل گه‌ل چالاكیێن په‌كه‌كێ ولایه‌نێن كارتوونی یێن بسه‌رڤه، تنێ بۆ هندێ دا كه‌ربێن رێخستنێن پارتی ژ خوه‌ ڤه‌كه‌ن!! ئه‌ڤه‌ هه‌ر سێ لایه‌نێن سیاسیێن مه‌زنێن كوردستانێنه‌ و هه‌می لایه‌نێن دی و ل هه‌ر چار پارچێن دی یێن كوردستانێ نه‌شێن ژبن تایێ ڤان هه‌ر سێ لایه‌نان ده‌ركه‌ڤن و هه‌ر ئێك ژ وان بۆ خوه‌ چه‌ند حزبه‌كێن بچووك یێن گرتین، یانژی وه‌كی په‌كه‌كێ بۆ خوه‌ یێن دروستكرین و سه‌رپه‌رشتیا وان دكه‌ت، لێ ب ناڤێن جودا جودا!! هوین ب خودێ ئه‌ڤه‌ كوردینی یه‌؟ ب هه‌می پیرۆزیان دلێ مه‌ ژ كوردینیێ ژی ره‌ش بوو؟ لێ پا بۆ عیناد و كا چاوا ئه‌و بۆ حزب و لایه‌نێن خوه‌ یێن سیاسی و سه‌ركردێن خوه‌ د عنصرینه‌، ئه‌ز و گه‌له‌كێن دی ژی وه‌كو پارتی یا كێم نه‌بوو خوه‌ و نه‌بۆ پارتیا خوه‌ به‌رامبه‌ر كه‌سێ نادانین، چونكی نه‌وان هندی مه‌ پارتیا خه‌بات كریه‌ و نه‌هندی مه‌ شه‌هید و قوربانی داینه‌ سه‌را كوردینیێ، له‌وما سه‌ره‌رای هه‌ر تشته‌كی دڤێت ئه‌ڤرۆ هه‌می پارتی ل سه‌رانسه‌ری جیهانێ ملێن خوه‌ بده‌نه‌ ئێك داكو بۆ هه‌میان دیار بكه‌ن كو پارتی چ جاران لاواز نابیت و ناكه‌ڤیت، چونكی خودانا خوه‌ و جه‌ماوه‌ره‌كێ مه‌زن و پێشمه‌رگه‌كێ ب هێزه‌ و سه‌رۆكه‌كی گه‌له‌كێ خۆشتڤی یه‌..

website security