NO IORG
Authors Posts by فەرست مستەفا

فەرست مستەفا

فەرست مستەفا
18 POSTS 0 COMMENTS

13

چاره‌نڤیس

كارمه‌ند
ئه‌ز ل به‌ندا ئه‌ندازیاره‌كێ بسپۆر بووم بۆ ئه‌نجامدانا كاره‌كی، پشتی چه‌ند ژڤانه‌كا هه‌ر د ده‌مێ خوه‌ دا به‌رهه‌ڤ نه‌بوو، بۆ من زۆرا خۆش و سڤك نه‌بوو، لێ ژ به‌ر كو ئه‌ز یێ پێدڤی بووم ژبلی بێهنفره‌هیێ چ چاره‌ یێن دی نه‌بوون،
من ژی گۆتێ: تو كارێ من یێ گیرۆ دكه‌ی و نزانم ئه‌گه‌ر چیه‌؟ گۆت: باوه‌ر بكه‌ زورێ مژوولم ڤان رۆژا، ئه‌ز یێ د ئاڤاهیێ رێڤه‌به‌ریه‌كێ دا كاردكه‌م، و ئه‌ڤه‌ چه‌ند رۆژه‌ ل هیڤیا وی و هنده‌ك كارمه‌ندان ژی كا چاوا جهێ وان بۆ درست بكه‌م، منژی گۆتێ: و وان چ په‌یوه‌ندی ب جهی ڤه‌ هه‌یه‌؟ گۆت: ئه‌ز بۆ خوه‌ گازندان چێناكه‌م، هندی جهه‌كێ وه‌سا چێكه‌م ئه‌ز بخوه‌ به‌لا خوه‌ ژێ ڤه‌ناكه‌م هه‌تا نه‌بێژن كا چاوا بۆ چێكه‌م، چ و چ دڤێت، ژ ده‌رگه‌هی و هۆل و جهێ روونشتن و مێز و مێڤان و هه‌می كاروباران…هتد.
ل ڤێرێ من دڤێت سێ تشتان بێژم:
یا ئێكێ؛ سه‌باره‌ت جهێ كاركرنا مه‌ وه‌ك كارمه‌ند و دوور ژ پلا كاری كا چ ئه‌رك ب مه‌ هاتیه‌ راسپاردن، د ده‌ستێ مه‌دایه‌ وه‌كی دیار، ماده‌م ب چو فه‌رمانێن حكومی نینه‌ پێدڤیه‌ ل دووڤ خزمه‌ت و كارێ خوه‌ ئه‌م هزر بكه‌ین، دێ ب چ ئالیه‌ت و دیزاین شێین پتر نێزیكی وان كه‌سان بین یێن كو ئه‌م بۆ وان شۆل دكه‌ین كو هه‌ڤوه‌لاتیه‌، ئه‌ز باوه‌ر دكه‌م بارا پتر ژمه‌ هاتن و چوونا ژ ده‌رڤه‌ یا كری یان تێكهه‌لا وان كه‌سان یان كری یێن كو هاتن و چوون كری، دیزاین و ئالیه‌تا كاركرنێ ل دووڤ خزمه‌تا خه‌لكی یا دیاره‌، بنیاتێ ب ساناهی دیتن و ب ساناهی برێڤه‌برن و ب ساناهی گه‌هشتن سیاسه‌تا هه‌می سازیێن خزمه‌تكار و خه‌مخۆرین هه‌ڤوه‌لاتیانه‌، هه‌ر چه‌ند ئه‌ز نه‌ ل گه‌ل وێ چه‌ندێ مه‌ كو ل دووڤ كه‌یفا مرۆڤی بۆ مرۆڤی جهێ ئه‌رك و كارمه‌ندیێ بهێته‌ درستكرن، به‌س ماده‌م هه‌ر هاته‌ به‌ر ده‌ستێ مرۆڤی، بلا مرۆڤ ژی وه‌سا هزر بكه‌ت كو ئه‌ڤه‌ كۆمپانیه‌كا تایبه‌ته‌ بمنڤه‌ و دڤێت ئه‌ ز دلێ خه‌لكی بكرم و چاڤێ وی راكێشمه‌ سه‌ر خزمه‌تا خوه‌ یا ئه‌ز پێشكێشی وی دكه‌م، ئه‌گه‌ر ئه‌ز ب وی چاڤی و دل پێڤه‌بوونێ جهێ كارێ خوه‌ درست نه‌كه‌م بێ گومان كار درست ب رێڤه‌ ناچیت وه‌كی د به‌رژه‌وه‌ندیا هه‌ڤوه‌لاتی دا.
یا دووێ؛ دڤێت ئه‌و كه‌سێن د داموده‌زگه‌هێن فه‌رمی دا كار دكه‌ن بگه‌هنه‌ پلا سه‌ركه‌فتنێ د كارێ خوه‌ دا، سه‌ركه‌فتن ژی ئه‌و نینه‌ ببیته‌ خودان ئه‌ركێ فه‌رمی و مووچه‌كێ ده‌ستنیشانكری و رۆژ ب رۆژ خزمه‌تا وی بهێته‌ هژمارتن دا پاشه‌رۆژێ مفا ژێ ببینیت، به‌لكی ته‌رازیا سه‌ركه‌فتنێ ل هه‌می دونیایێ د داموده‌زگه‌هێن فه‌رمی دا ئه‌وه‌ ترسا خه‌لكی و هه‌ڤوه‌لاتیان ژ وه‌ستیان و برێڤه‌چوونا كاروبارێن وان ل داموده‌زگه‌هان نه‌مینیت، به‌روڤاژی هه‌ڤوه‌لاتی، هینگی ب كه‌یف و خۆشحال بیت ده‌مێ دزانیت كو كارێ وی و خلمه‌تا وی یا دكه‌ڤیته‌ د داموده‌زگه‌هێن فه‌رمی و حكومی دا، چنكی نه‌ پاره‌كێ زێده‌ و نه‌ باره‌كێ زێده‌ و نه‌ ده‌مه‌كێ زێده‌ ژێ ناچیت، سه‌ركه‌فتن ئه‌وه‌ د كاری دا ده‌مێ هه‌ڤوه‌لاتی قه‌ستا جهێ خلمه‌تا خوه‌ دكه‌ت ل سازیا فه‌رمی هه‌ست بكه‌ت دێ كوڕێ خوه‌ یان كچا خوه‌ یان خووشك یان برا بینیت، دلسۆزیا كارمه‌ندی هه‌می ئه‌وه‌ دێ چاوا شێت هیڤیێ ده‌ته‌ هه‌ڤوه‌لاتی و ب دله‌كێ تژی كه‌یف فرێكه‌ته‌ ناڤ خێزانا وی نه‌ ب دله‌كێ شكه‌ستی.
یا سێ یێ؛ ما ده‌م ناڤێ جهی سازیا فه‌رمی یه‌ و میری یه‌، دڤێت هه‌می لڤین و هه‌لسوكه‌وت د فه‌رمی بن، سڤیل خوه‌ گه‌له‌ك ب بهاتر ببینن ل سازیا فه‌رمی ژ مالا خوه‌، ژ بلی به‌لێ و له‌بێ و فه‌رمۆ و كه‌ره‌مكه‌ و داخزمه‌تا ته‌ بكه‌م و داخوازا لێبۆرینێ چ په‌یڤێن دی نه‌ بهیزیت، ئه‌ڤ ئه‌ركێ ره‌وشتی و فه‌رمی ژ برێڤه‌برنا هه‌می ئه‌ركا گرنگ و فه‌رتره‌.
من ئه‌ڤ سێ تشته‌ گۆتن چونكی ئه‌م بخوه‌ دشێن بكه‌ین و چ تومه‌تان بۆ كه‌سێ دی چێنه‌كه‌ین و ده‌ڤێ گازندێ ل وه‌لاتی ب جاره‌كێ نه‌ڤه‌كین سه‌ده‌م به‌س ره‌فتارا مه‌.

38

چاره‌نڤیس
كارێ ژدل

رۆژنامه‌ڤانه‌كی دیداره‌ك ل گه‌ل دو كاركه‌رێن ئاڤاكرنا ئاڤاهیان ئه‌نجامدا، رۆژنامه‌ڤانی پسیارا كاركه‌رێ ئێكێ كر: تو چ كار دكه‌ی؟ د به‌رسڤ دا گۆتێ: بۆ من گه‌له‌ك نه‌خۆشه‌ ئه‌ز كاركه‌رێ ئاڤاكرنێ مه‌، رۆژێن من هه‌می ب ڤی ره‌نگی ده‌رباز دبن وه‌كی تو دبینی، كارێ من ب درێژیا ده‌می به‌س ئه‌وه‌ ئه‌ز تابۆگان ددانمه‌ ل سه‌ر ئێك.
رۆژنامه‌ڤان به‌ر ب كاركه‌رێ دووێ ڤه‌ چوو و ئه‌و پسیارا ژ كاركه‌رێ ئێكێ كری هه‌مان پسیار ژ یێ دووێ ژی كر، لێ به‌رسڤ ژێكدجودابوون، یێ دووێ د به‌رسڤ دا گۆته‌ رۆژنامه‌ڤانی: ئه‌ز گه‌له‌كێ كه‌یفخۆشم و ژ وان كه‌سانم یێ ژ هه‌میان ب شانستر، ئه‌ز یێ دبمه‌ پشكه‌ك ژ خه‌ملا ئاڤاهیێن جوان، ئه‌ز یێ هاریكارم دا پرتێن به‌ر و تابۆگان بگوهۆرم بۆ كه‌ره‌ستێ جوانیێ، ئه‌ز یێ دبمه‌ دیرۆك… هتد.
سه‌ركه‌فتن د هه‌ر كاره‌كی دا ب ئه‌ندازێ ڤیانا مرۆڤی بۆ وی كاری ب ده‌ست مرۆڤی ڤه‌ دئێت، ژ به‌ر هندێ ژی خودانێن هه‌می هزر و بیر و ئایدۆلۆژیان ئامۆژگاری دیفكه‌فتی و لایه‌نگێرێن خوه‌ دكرن و دگۆتنێ كو هه‌ر ده‌مێ هه‌وه‌ پره‌نسیپێن ڤێ هزرێ یان ڤی پرۆژه‌ی د دلێ خوه‌ دا جێگیر كرن، هینگی پشتراست بن دێ ئه‌و پرۆژه‌ و ئه‌و هزر و ئایدولۆژی بیته‌ كه‌توار وه‌كی هه‌وه‌ دڤێت،
گه‌له‌كا گرنگه‌ به‌ری ده‌ست و پێن مرۆڤی بچنه‌ كاره‌كی دلێ مرۆڤی بچیتێ، به‌ندینی یا خودێ ژی هه‌ر ب وی دلی ڤه‌ یا گرێدایی یه‌، هندی مرۆڤ خوه‌ بوه‌ستینیت ئه‌گه‌ر دلێ مرۆڤی دگه‌ل نه‌ بیت یان مرۆڤی مه‌ره‌مه‌كا دی پێ هه‌بیت بلا مرۆڤ ل هیڤیا ئه‌نجامێ خێرێ ژ كارێ خوه‌ نه‌بیت.
نابیت ئه‌و ئه‌ركێ ل سه‌ر ملێن مرۆڤی و ئه‌و كارێ ئه‌نجام دده‌ت ب به‌لایه‌ك بزانیت و دڤێت زیكا به‌لاوێ ژ خوه‌ ڤه‌كه‌ت، یان باره‌كێ گرانه‌ دڤێت زیكا بدانیت و خوه‌ ژێ خلاسكه‌ت، دڤێت ب ئه‌شق و ڤیان و ب دل بچیتێ.
شه‌رم د چ كاران دا نینه‌، و جیاوازی ژی د چ كاران دا نینه‌، هه‌می كار و ئه‌رك دگرنگن، و نه‌ چ كه‌س جهێ چ كه‌سان دگرن و نه‌ چ كار و ئه‌رك و پرۆژه‌ جهێ چ كار و ئه‌ركێن دی دگرن، ئه‌گه‌ر بۆیاغكرنا پێلاڤێ بیت دبیت هنده‌ك جاران گرنگترین كاره‌ و به‌س ئه‌و یا كێم بیت ژ مه‌زنترین كه‌س، واته‌ هه‌ر كاره‌كی د جهێ خوه‌ دا گرنگی و پیرۆزیا خوه‌ یا هه‌یی، ئه‌ و سه‌رێ ب كێماسی هنده‌ك خلمه‌تا بهه‌لسه‌نگینیت پێدڤی ب چاره‌سه‌ریێ یه‌، ئه‌ز ڤان تشتان دبێژم دا هه‌ر كه‌سه‌ك ب شانازی ڤه‌ ل كارێ خوه‌ بنێریت، خێزان و زارۆیێن وی به‌ری هه‌ر كه‌سه‌كێ ببینن كا چه‌ند حه‌زژ كارێ خوه‌ دكه‌ت و دلخوه‌شیا خوه‌ ل به‌رابه‌ر هه‌ر كه‌سێ ده‌رببریت، نه‌بیته‌ رویمه‌تی به‌لكی ب راستی هه‌می كار ب ئه‌ڤینی بهێنه‌ئه‌نجامدان نه‌ ژ مه‌جبووری. ب دیتنا من ئه‌م پێدڤی ب پرۆژه‌كینه‌ ناڤێ وی چ بیت نه‌ ئارێشه‌یه‌ به‌س ناڤه‌رۆكا وی كه‌مپینا ئه‌ڤینێ بیت بۆ هه‌ر كاره‌كێ بێته‌ ئه‌نجامدان، زۆرداریه‌كا مه‌زنه‌ مرۆڤ ل خوه‌ دكه‌ت كارێ خوه‌ بێ دل ببه‌ته‌ سه‌ری، وه‌ك وێ خێزانا بێ دل هاتیه‌ پێكئینان و ژن مێر نه‌فره‌تێ ژێك بكه‌ن و ب ئه‌رك دزانن زارۆیان چێكه‌ن و خوه‌ مه‌جبوورێن پێكڤه‌ژیانێ دبینن، هه‌می تشت د ناڤ وێ خێزانێ دا یێن هه‌ی، به‌س به‌خته‌وه‌ری و سه‌ركه‌فتن و شانازی ده‌رگه‌هێ وێ خێزانێ نا قوتیت و هه‌می ئه‌ندامێن وێ خێزانێ حه‌ز دكه‌ن زێده‌تر ده‌مێ خوه‌ ژ ده‌رڤه‌ی مالێ ببه‌نه‌ سه‌ری.

21

چاره‌نڤیس
گه‌وهه‌ر
دبێژن رویڤیه‌كێ برسی ل دووڤ ده‌نگه‌كێ مه‌زن را چوو ل دارستانێ، به‌لكی ل سه‌ر رزقه‌كی هلبیت و وه‌كی سروشتێ ژیانا خوه‌ به‌رده‌وامیێ بده‌ته‌ ژیانا خوه‌، دیت ده‌هۆله‌كا مه‌زن یا ب داره‌كێ ڤه‌ گرێدایه‌ و چه‌ند چقه‌ك یان تایه‌كێ دارێ ڤێ دكه‌ڤیت ده‌نگه‌كێ مه‌زن و عه‌جێب ژێ دئێت، رویڤی نه‌زانی ئه‌ڤه‌ چ مه‌خلۆقه‌، و د سه‌رێ خوه‌ دا دانا كو زۆرێ قه‌له‌وه‌ و به‌زێ وی نوكه‌ چ بۆ نائێته‌ گۆتن هندی خۆشه‌، پێدڤیه‌ ژ ده‌ستخوه‌ نه‌كه‌ت، و ئه‌و بخوه‌ ژی یا گرێدایی یه‌ دێ ب ساناهی بیته‌ نێچیرا وی، رابوو شه‌قكر و دراند، دیت چه‌رمه‌كێ خلۆله‌ و هشك و بێ مفا، بخوه‌ كه‌نی و گۆت: (ده‌نگێ بلند و به‌عره‌ به‌عر و كه‌له‌خ مه‌زن پووچترین تشت و شكه‌ستنا ژ خرا مه‌زنتره‌)!!.
ژیانێ و سه‌ركه‌فتنێ كاره‌كێ راست و درست و ب دلسوزی و ب پره‌نسیپ ژ مه‌ دڤێت، كه‌سێ ب درستی د رۆلێ خوه‌ گه‌هشتبیت و سروشتێ ژیانێ زانیبیت دێ گه‌له‌ك ب رحه‌تی و ب بێ ده‌نگی و هێدی و دووری مه‌دحه‌ و خۆمه‌زنكرن كارێ خوه‌ ئه‌نجامده‌ت، و ئه‌نجامێ كارێ وی به‌سه‌ كو دیار بیت مرۆڤه‌كێ بكێرهاتیه‌ بۆ خوه‌ و بۆ جڤاكێ خوه‌ ژی.
پێناسه‌كا د جهێ خوه‌ دا رویڤی یا دایه‌ وان كه‌سێن چ ژێ نه‌ ئێت و به‌ س دئاخڤن، بۆ ئه‌زمانی كه‌س ده‌ستێ وان ناگرن، ب هێزترین ره‌خنه‌ یا حازره‌ و ب جوانترین شێوه‌ لێك دئینن و پێشكێش دكه‌ن، بۆ خۆیاكرنا پێشهاتێن پاشه‌رۆژێ ژ شرۆڤه‌كارێن بێ مننه‌تن، ژ كار و ئه‌نجامێن چ كه‌سێ رازی نینن، هند جاران ژ خوارن و ڤه‌خوارنا كه‌سێ ژی رازی نینن، نه‌رازیبوونا خوه‌ ژی چ جاران ناهێلن د دلێ خوه‌ دا، چ حسێبا بۆ كه‌سێ و چ تشتان ناكه‌ن، ئێكسه‌ر نه‌رازیبوون یا ل سه‌ر ئه‌زمانی و هه‌ر دیوانا بگه‌هنێ ب جاره‌كێ دێ هه‌میێ مژوولی گله‌ و گازندێن خوه‌ كه‌ن، ده‌ور و به‌ر ژی حسێبا بۆ ده‌نگ و گۆتن و جه و قه‌بارێ وا دكه‌ن، لێ د راستی دا كه‌سێ د ئازا و ب كێر ئه‌ون یێ ده‌نگ ژێ نه‌ئێت و ده‌ستێ وان به‌ری ئه‌زمانێ وان بپه‌یڤیت.
ژ مێژه‌ یا هاتیه‌ گۆتن كو پر گۆتن به‌لگه‌یه‌ بۆ ده‌ستڤالاییێ، راستییه‌كه‌ چه‌ندا ته‌حل ژی بیت مه‌ جڤاكه‌كێ پر گۆتن یێ هه‌ی، و بێ گومان رامان ئه‌وه‌ كو ده‌ستێ وان یێ بێ كار و بێ به‌رهه‌مه‌، دا كو خوه‌ ژ هه‌ستكرن ب كێماسیێ قورتال بكه‌ت په‌نایێ دبه‌ته‌ به‌ر گۆتن و پر بێژیێ
پێغه‌مبه‌ران زۆر جار یا گۆتیه‌ هه‌ڤالێن خوه‌ د گه‌ل وان كه‌سان نه‌ ئاخڤن یێن دگه‌ل هه‌وه‌ دژین و باوه‌ری ب هه‌وه‌ نه‌ئینایه‌، ئه‌گه‌ر ژ راست هوون ب كێرهاتی بن و و د راست و درست بن، و ل سه‌ر پرۆژێ خوه‌ ب ره‌وشت و دلسۆز بن، ره‌فتار و كریارا هه‌وه‌ ب تنێ تێرا هه‌وه‌ هه‌یه‌ كو خه‌لكه‌ك باوه‌ری یێ ب هه‌وه‌ بینیت
ئه‌گه‌ر باوه‌ریا خه‌لكی ژ به‌ر كریار و ره‌فتار و سه‌ره‌ده‌ریا هه‌وه‌ بیت چ جاران ب دووماهی نائێت و ل چ ده‌راڤان ناراوه‌ستیت و نائێته‌ گرێدان ب چ روودان و بۆیه‌ران ڤه‌، لێ به‌لێ ئه‌گه‌ر ئه‌زمانێ هه‌وه‌ و پڕبێژیا هه‌وه‌ ب تنێ باوه‌ری چێكربیت، دبیت هوون بۆ ئاخفتنێ دزیره‌ك بن و ژ به‌ر هه‌ر ئه‌گه‌ره‌كێ بیت گه‌له‌ك لاو لێك دئێنن و دشێن قه‌ناعه‌تێ بۆ هه‌می ته‌خێن جڤاكی چێكه‌ن، لێ ئه‌و باوه‌ری یا به‌روه‌خته‌، رۆژه‌ك دێ ئێت ره‌فتار و ره‌وشتێ مرۆڤی دێ وان گۆتنا هه‌میان كه‌ته‌ دره‌و،
مه‌زنێن مه‌ ژی یا گۆتی سه‌د گۆتن گۆری كریاره‌كێ، ئه‌نجامێ ژیێ حه‌فتێ هه‌شتێ سالان گۆتنه‌كا ب ڤی ره‌نگی یا هاتیه‌ دارشتن، ئانكو ژ ڤالاتیێ نه‌هاتیه‌، شرۆڤه‌كا جوان ژی یا هه‌ی بۆ ڤێ گۆتنێ (سه‌د خودانێن گۆتنان گۆری خودانه‌كێ كریارێ).

17

زه‌لامه‌كی چار سێڤ بۆ خوه‌ بۆ خوارنێ كڕین، سێڤا ئێكێ كه‌ر كر دا بخۆت دیت كرمه‌كێ تێدا، دلێ وی نه‌چوویێ، نه‌خار، و هاڤێت، سێڤا دووێ كه‌ر كر دیت ئه‌وێ ژی كرمه‌ك یێ تێدا، جاره‌كا دی دلێ خوه‌ ل هه‌ڤدا نه‌ خار و ئه‌و ژی هاڤێت، سێڤا سێ یێ كه‌ر كر دیسا كرمه‌ك دیت یێ تێدا دلڤلڤیت، رابوو ئه‌و ژی هاڤێت، پشتی دیتی سێڤه‌ك ب تنێ ما، ژنوى هاته‌ سه‌ر هشێت خوه‌ ترسیا وێ ژی ڤه‌كه‌ت كرمه‌ك تێدا بیت، رابوو رۆناهی ڤه‌مراند و كره‌ تاری و سێڤا خوه‌ دا به‌ر له‌قا و خار…
ده‌مێ مرۆڤ ژ ترسان دا و ژ بێ رێ بوونێ تشته‌كی قه‌بوول دكه‌ت و پێ رازی دبیت نه‌ دشێت تشته‌كێ دی ل سه‌ر ئاڤاكه‌ت و نه‌ زه‌وقه‌كی ژێ دگریت، و نه‌ ژی ئێدی هه‌ست ب تێربوونێ دكه‌ت و به‌رده‌وام خوه‌ تۆمه‌تبار دكه‌ت ژناڤدایا خوه‌ دا ئه‌گه‌ر ژ سه‌رڤه‌ خوه‌ بسه‌رڤه‌ ژی نه‌به‌ت و خوه‌ ب هندێ نه‌ئینته‌ ده‌ر دا پیچه‌ك ئاڤا رویێ خوه‌ پێ بپارێزیت، لێ د ژ ناڤدا چ جار نه‌شێت ڤێ راستیێ ڤه‌شێریت.
ده‌مێ مرۆڤ بوو خودان تشته‌ك، و ئه‌و تشت ئه‌و بیت یێ به‌ری هینگی مرۆڤی هه‌ول بۆ داین، دڤێت یێ پێ رازی بیت، و ب ده‌ستخستنا وی تشتی وه‌كا دیاریه‌كێ وه‌رگریت، هه‌كه‌ دیت كێموكاسیه‌ك ژی یا تێدا هه‌ی دڤێت ل دووڤ قه‌بارێ وێ كێموكاسیێ ره‌فتارێ بكه‌ت و نابیت هه‌میێ ره‌ت بكه‌ت ژبه‌ر كو تشته‌كێ نه‌ دلخواز تێدا دیت،
زۆر جار ده‌مێ به‌رێ فیقیه‌كێ كرمی دیتبا یان كه‌واله‌ك سه‌رژێكربا و پارچه‌كا له‌شێ وێ یا ب كوله‌ و ب كێر خوارنێ نائێت، دابێژنێ دونیا هه‌می ب ڤی ره‌نگی یه‌، ب راستی ژی وێنێ راسته‌قینێ ژیانێ هه‌میێ ئه‌ڤه‌یه‌، هه‌رتشێ مرۆڤ ب ده‌ستبێخیت دبیت تشته‌ك یێ دگه‌ل نه‌ یێ ب دلێ مرۆڤی، به‌س نه‌ هه‌ولا خوه‌ و نه‌ بریار و دیتن و زه‌حمه‌تا خوه‌ و نه‌ لایێ باشێ وی تشتی ب چ ره‌نگان ناكه‌ته‌ قوربانی وی تشتێ نه‌به‌ركه‌فتی و یێ نه‌ ب دلێ مرۆڤی، گه‌له‌ك جاران ژی دێ بینین كو مرۆڤ یێ بێ منه‌ته‌ ژ وی تشتێ ل به‌ر ده‌ستێ مرۆڤی، ب به‌هانه‌یا وێ چه‌ندێ كو زۆر تشتێ ژ وی ره‌نگی ل ده‌ردۆرێ مرۆڤی یێ هه‌ی و هه‌وجه‌ ناكه‌ت مرۆڤ خوه‌ عاجز بكه‌ت و ب ڤی تشتێ ب عه‌یب رازی بیت، به‌لێ بێ منه‌تیا مرۆڤی ژ وی تشتێ ل به‌ر ده‌ستێ مرۆڤی مه‌زنترین گه‌فه‌ ل سه‌ر حه‌زێن مرۆڤی بخوه‌
كی دبێژیت ئه‌و تشتێ د سه‌رێ مرۆڤی دا كو ل به‌ره‌ بۆ خوه‌ بكه‌ته‌ پێگوهۆر دێ ب كێر وی ئێت؟ به‌لكی عه‌یب و علله‌تێن وی هێشتا پتر بن؟ بۆچی دێ مرۆڤ ژ بێ منه‌تی هه‌ر مه‌راق دارێ وی تشتی بیت یێ نه‌جه‌رباندی و نه‌دیتی؟
خه‌له‌ت د من نه‌گه‌هن، نه‌ دژی نووگه‌ریێ مه‌، هه‌می تشت و كار وه‌كی ئێك نینن، من به‌حسی وان كارانه‌ یێن ئه‌م د گه‌ل دا دژین و رۆژانه‌ پێدڤی دبینێ، یان وان كه‌سێن مه‌ بۆ ژیانا خوه‌ هلبژارتی و ژبه‌ر رۆتینێ ژیانێ ڤێجا دێ عه‌یبه‌كێ زیق كه‌ین و مه‌راقدارێت هنده‌كێن دی بین، چ جار تشتێ رۆژك ژ رۆژان به‌رژه‌وه‌ندیا مرۆڤی پێ بقه‌تیێت، یان كه‌سه‌ك كو رۆژه‌ك ژ رۆژا جهێ مفایه‌ بلا بێ دودلی مرۆڤ ژ ده‌ست نه‌ده‌ت و پاشگوهڤه‌ نه‌هاڤێژیت، گه‌له‌ك یێن چووینه‌ نێچیرێ و گیسكێ د به‌ررا بۆری پێ درازی نه‌بوونه‌ و یێن مایین ل هیڤیا نێری و بزنا، لێ گیسك ژی یێ چووی و نه‌ نێری هاتیه‌ و نه‌بزن.
نه‌ چ مرۆڤ و نه‌ چ پرۆژه‌ و نه‌ چ كه‌رسته‌ و نه‌ چ كار ژ به‌ر كێماسیه‌كێ ب تمامی نائێنه‌ ره‌تكرن، چونكی چ جاران چ تشت ژڤان بئێكجاری دبێ كێماسی نه‌بوونه‌ و نابن.

23

ل دووڤ پێشه‌كیا نڤیسا بۆری دێچم و دێ بێژم شانۆ و مۆزیك و سترین و نیگار و…هتد ئه‌گه‌ر ئێك ژ ڤان ژی د ناخێ مرۆڤه‌كی دا جهگیربوون زۆ
را ب زه‌حمه‌ته‌ ئه‌و مرۆڤ بشێت خیانه‌ته‌كێ بكه‌ت، یان ده‌ستێ خوه‌ درێژكه‌ته‌ زیانا ئێكێ دی، یان هزره‌كا شاش ژ ئێكی بكه‌ت، یان زۆرداری و غه‌درێ بنیاسیت، چونكو هه‌كه‌ ب راستی ژی هونه‌رمه‌ندبیت ئێك یان پتر ژ ئێكێ ژ ره‌نگێن هونه‌ری بزانیت وی ده‌می دچیته‌ د ناڤ سه‌ر و دل و مێشك و هه‌ستێ هه‌می كه‌سان دا، كه‌س وه‌كی وی نزانیت كو كه‌س ژ كه‌سێ جودا نینه‌ وه‌ك مرۆڤ و بها و رێز، له‌وما پشكداره‌ ل گه‌ل هه‌می مرۆڤان، و ژ ڤی سالۆخه‌تی پێدڤیه‌ ئه‌م هاندانه‌كا ساخله‌م و درست بكه‌ین بۆ نفشێ نوو، دا رێزێ بده‌نێ و پشكدار بن د هه‌می بزاڤێن هونه‌ری دا و ب چاڤه‌كێ دوور و هزره‌كا كوور ل هه‌می پشكێن هونه‌رێ بنێرن دا، ئه‌و ژی حه‌زژ مرۆڤایه‌تی و ئاڤاكرن و ئارامیێ بكه‌ن،
ل ڤێرێ دبیت زۆر كه‌س ببێژن هه‌كه‌ هونه‌ر ئه‌و بیت یا ئه‌م دبینین كا چه‌ندا دووره‌، بلا دوورتر بیت و خۆزی ئه‌و نێزیكیا هه‌یی ژی بلا نه‌با ئه‌م ب سلامه‌تتر بووین، و هندی ژ مه‌ بهێت ژی دێ به‌رهنگار بین و یا ژمه‌ڤه‌ تێكهه‌لبوونا مه‌ ل گه‌ل ڤێ یا ئه‌م دبینین ئه‌و بخوه‌ ڤارێ بوونه‌!!.
من دڤێت دو تشتا بێژم: یا ئێكێ، نوونه‌راتیا شاش یا تشته‌كی رامانا شاشیا وی تشتی نینه‌، ب پشتراستی ڤه‌ ئه‌ز ژی دبێژم (ل گه‌ل رێزێ بۆ هه‌ر ئێكێ تشته‌ك پێشكێش كری ب ناڤێ هونه‌ری)، من نه‌به‌ حسێ سه‌روبه‌رێ نوكه‌ یێ هونه‌ری یه‌ و نابێژم كا دا ئه‌م ژی ببینه‌ پالێن ڤی (حاله‌تی) و ئه‌ز ژی دبێژم یاریكه‌ر یاریا خوه‌ درست ناكه‌ن، یان د یاریگه‌هێ دا ناكه‌ن و ل گه‌ل گرنگیا وێ ژ هه‌می لایان ڤه‌ـ به‌س مخابن وه‌ك زۆر بیاڤێن دی یێن گرنگ فه‌لسه‌فه‌ و رێكارا درست یا هونه‌ری یا دیار نینه‌ و ل سه‌ر ده‌ستێ مه‌ هێشتا نه‌هاتیه‌ به‌رچاڤ.
یا دووێ: وه‌كی بیتربرۆگ دبێژیت (شانۆ ژدایك دبیت، و پاش دژیت، و دمریت)، ئه‌ز ژی دبێژم هونه‌ر ب گشتی ب ڤی شێوه‌ى یه‌، كه‌ساتیا كاریگه‌ر نه‌مایه‌، وه‌خته‌كی زارڤه‌كه‌ر و هونه‌رمه‌ند دا سه‌حكه‌ته‌ جه‌ماوه‌ری و روو ب روو وان دراوه‌ستیا، ل گه‌ل وان دبوو ئێك (رح) د كۆمه‌كا له‌شان دا،كه‌یفا وا دئینا، ئێدی هه‌میان خوه‌ حسێب دكر ئه‌و هه‌می پێكڤه‌ هونه‌رمه‌ندن ل سه‌ر ده‌پێ شانۆیێ، په‌یوه‌ندی وه‌سا گه‌رم دبوو شانۆ ب رح دكه‌فت، ئه‌ڤێ تێكه‌لیا زێندی و نێزیك نه‌دهێلا هونه‌ره‌ك بهێته‌ پێشكێش كرن كو ئاماده‌بوو، یان بینه‌ر یا خوانده‌ڤان یان گوهدار یێ پێ رازی نه‌بیت، ئه‌ڤه‌ ل هه‌می دونیایێ ب ڤی شێوه‌ی بوو، ل ڤێرێ ئه‌و پسیارا د جهێ خوه‌دا دئێته‌كرن ژ كورێن ملله‌تێ مه‌ و دبێژن: (بۆچی سالێن به‌رێ ب رێژه‌كا مه‌زن كاریگه‌ریا هونه‌ری زێده‌تر هه‌بوو د هه‌می مرۆڤاتیێ دا؟ و ئه‌ڤرۆ ئه‌م وێ كاری گه‌ریێ نابینین؟!!). ئارێشا ئه‌ڤرۆ ئه‌وه‌ كو خه‌م ژ(ته‌كنیكا) هونه‌رێ دئێته‌ خوارن، هونه‌رمه‌ند پتر هزرا خوه‌ دكه‌ت و حه‌زژ خوه‌ دكه‌ت و گرنگیێ بخوه‌ دده‌ت ژ هه‌می لایان ڤه‌، دشێت هه‌ما د هنده‌ك كارێن خوه‌ دا هزرا جه‌ماوه‌ری نه‌كه‌ت، دووراتیه‌كا مه‌زن یا چێبووی د ناڤبه‌را واندا، كارێ وی به‌س ل سه‌ر وی یه‌.
به‌رێ یۆنانان دگۆت: (دڤێت هونه‌رمه‌ند ل گه‌ل كه‌ساتیا خوه‌ دا نه‌بیت)، جه‌ماوه‌ر حه‌ز ژ تراجیدیایێ دكه‌ت
چاندنا حه‌زا ره‌وشه‌نبیریا هونه‌ری دێ گه‌له‌ك هاریكاریا مه‌ و نفشێ نوو كه‌ت بۆ گیانه‌كێ هشیار و هه‌ستا راست به‌رانبه‌ر ئێكودو، هه‌كه‌ نه‌ دڤێت دپشتراست نه‌بین ژ زیانا به‌رده‌وام..

42

زه‌لامه‌كی هه‌ر رۆژ ژڤان بوو ل گه‌ل كورێ خوه‌ مه‌له‌ڤانی نیشا ددان ل مال، دا دۆشه‌كێ بۆ دانیته‌ ئه‌ردی و ل سه‌ر دۆشه‌كێ فێری مه‌له‌ڤانیان دكر، ده‌مێ پێكڤه‌ چووینه‌ سه‌ر رووباری كوڕك بنئاڤ بوو و بۆ خه‌ندقینێ دچوو. بابێ وی ب تۆره‌یی ڤه‌ گازی كرێ:
(ما ئه‌ز هه‌رۆ مه‌له‌ڤانیا نیشا ته‌ ناده‌م؟!)
كوڕ یێ د هه‌ناسا دووماهیێ دا به‌رسڤا بابێ دده‌ت: (باب.. كه‌س ل سه‌ر دۆشه‌كێ فێری مه‌له‌ڤانیا نابیت!).
وه‌ك مرۆڤ هه‌ر كه‌س حه‌ز دكه‌ت تشتێ راست و درست بكه‌ت، به‌س حه‌زا دلی تشته‌كه‌ و زانینا رێك و رێككارێت بجهئینانا وێ حه‌زێ تشته‌كێ دی یه‌، هه‌ر شۆله‌كێ ده‌م و جهێ خوه‌ یێ تایبه‌ت یێ هه‌ی، دڤێت ل به‌رچاڤ بهێته‌ وه‌رگرتن دا خلمه‌ت بدورستی بگه‌هیت و كارێ بهێته‌كرن یێ بنه‌جه بیت، هه‌رده‌م دئێته‌ گۆتن كو هه‌ر كه‌سێ ئاره‌زۆیه‌ك هه‌بیت بلا چو جاران ئاره‌زۆیا خوه‌ ژ ده‌ستنه‌ده‌ت و بلا سه‌خبێر بكه‌ت و پێشڤه‌ ببه‌ت، دێ رۆژه‌ك ئێت و گه‌هیته‌ ئاره‌زویا خوه‌، گۆتنه‌كا گرنگ و راسته‌، لێ نائێته‌ وێ واتایێ ئاره‌زۆیا كاری ب تنێ تێرا مرۆڤی هه‌یه‌ و دێ هاری مرۆڤی كه‌ت د هه‌می ده‌راڤان دا، هه‌می تشت ل هه‌می جهان ددرست نینن، دڤێت ل گه‌ل ئاره‌زۆیێ یاریێ ل جهێ وێ بكه‌ت و نه‌ ژ ده‌رڤه‌یی یاریگه‌هێ.
دو رێ یێن ل به‌ر مرۆڤی هه‌ی، یان دڤێت د قالبێ خوه‌دا بیت و ژ قالبێ خوه‌ نه‌ئێته‌ده‌ر، یان ژی هه‌كه‌ پێدڤیكر و ڤیا ژ قالبێ خوه‌ ده‌ركه‌ڤیت.
ئه‌گه‌ر ڤیا وه‌كی هه‌یه‌ بژیت و دانپێدانێ ب قالبێ خوه‌ بكه‌ت و سنۆرێن خوه‌ بزانیت دڤێت چ جاران چاڤ و دلێ خوه‌ نه‌به‌ته‌ وان كه‌س و وان كار و وان جهێن ژ قالب و سنۆرێن وی د دوور و مولكێ ئێكێ دی
و ئه‌گه‌ر ڤیا و حه‌زا هندێ هه‌بیت ژ قالبێ خوه‌ ده‌ركه‌ڤیت و توخیبه‌كێ دی بۆ خوه‌ ده‌ستنیشان بكه‌ت و به‌رفره‌هتر ببینیت و بچیت و چاڤ ل ده‌ردوران بكه‌ت و خوه‌ ژ كه‌سێ كێمتر نه‌بینیت، ئه‌ڤه‌ حه‌قێ وی یه‌، هینگی دڤێت بزانیت شۆل نه‌به‌س حه‌ز كرن ب تنێ یه‌ و هه‌ما دێ كه‌ڤیته‌ د ناڤدا و پێنگاڤێن خوه‌ هاڤێت، ڤێجا ب كۆمێنتان دێ خوه‌ بینیت كو رۆژنامه‌ڤانه‌ و ب به‌لاڤكرنا هزره‌كێ د تۆرێن جڤاكی دا دێ خوه‌ بینیت كو هزرڤانه‌ و ب ده‌ربرینه‌كێ سیاسی یه‌ و ب دیتنا دیمه‌نه‌كێ هه‌ستیار ڤێجا مافزان و پارێزه‌ره‌، وه‌كی گه‌له‌ك جاران دبێژن (كل فی كل) و هه‌می ژی چنكی حه‌زا هه‌ی و رێكه‌كا ب ده‌ست كه‌فتی دبێژنێ تۆرێت جڤاكی یێن ئنترنێتێ، هه‌می كه‌س هه‌می تشتن، جهێ خوه‌ لێ دبینن قه‌هره‌مان ژی نه‌ ئه‌و جهه‌ یێ قه‌هره‌مان لێ دئێنه‌ چێكرن.
نفشه‌كێ چێدبیت بێی به‌ر هه‌ڤی یێ ده‌ستێ خوه‌ دبه‌ته‌ هه‌می تشتان، مفتی نه‌ و موجته‌هد و حاكم و به‌رپرس و عالم و سیاسه‌تڤان و نڤیسكار و هونه‌رزان، خوه‌ نه‌چار دبینیت كو ل سه‌ر هه‌می تشتان بۆچوون و ده‌ربرینا خوه‌ هه‌بیت، بێ هه‌وجه‌یی یێ باره‌كێ گران بۆ خوه‌ چێدكه‌ت و خوه‌ دكه‌ته‌ بارهلگرێ بارێ هه‌میان و نزانیت ئه‌و بخوه‌ باره‌، هه‌می كار وه‌كی مرۆڤانه‌، كا چاوا هه‌ر ئێكی ماله‌ك هه‌یه‌، هه‌ر كاره‌كی ژی ماله‌ك و جهێ ڤه‌حه‌ویانێ یێ هه‌ی، كا چاوا كه‌سێ بێ مال بیت یێ بێ رێز و چ حسێب بۆ نائێنه‌كرن، هه‌ر وسا هه‌ر كارێ ژ جهێ خوه‌ و ژ خودانێن خوه‌ ده‌رنه‌كه‌ڤیت یێ بێ رێزه‌ و چ حسێب بۆ نائێنه‌كرن. پشته‌ڤانیه‌كا بێ گومان بۆ هه‌می خودان حه‌زان و د هه‌می واران دا، به‌س حه‌قێ تشتی بده‌نێ ل جه و پایه‌یا وی، رێزا وێ حه‌زێ و یێن پێشه‌نگ، تشتێ ئاهێن خوارنێ د جهێ كه‌ره‌ستێن ئاڤاهیا دا نائێنه‌ فرۆتن.

20

چاره‌نڤیس
دئێته‌ گۆتن كو ترومبێله‌كا ترێل یا بارهلگر دبن پره‌كێ را دا ده‌رباز بیت، لێ پر یا نزم بوو، بلندیا پرێ و ترێلێ وه‌كی ئێك بوو، ترومبێل د بن پرێ را ئاسێ بوو، پۆلیسێن باژێرڤانیێ زه‌حمه‌ته‌كا مه‌زن دیت و چ رێك و چاره‌ نه‌ برنه‌ ده‌رئێخستنا ترێلێ ژبن پرێ ڤه‌.
زارۆیه‌ك هات و ل ڤی دیمه‌نی دنێری، پسیارا پۆلیسه‌كی كر كا بۆچی ئه‌ڤ ئارێشه‌ چێبوویه‌، پشتی پۆلیسی ئه‌گه‌رێ ئارێشێ بۆ گۆتی زارۆی ب ساده‌ییڤه‌ گۆتێ: ( ما بۆچی هه‌وایێ تایێرێن وێ ڤالا ناكه‌ن ترومبێل بخوه‌ دێ نزم بیت و ب ساناهی دێ ژ بن پرێ ئیننه‌ ده‌ر؟)
پێدڤیه‌ ئه‌م ل چاره‌سه‌ریێن ساده‌ و سڤك و د شیان دا بگه‌رین، به‌رێ خوه‌ نه‌ده‌ینه‌ ئاریشێ كا چه‌ند یا مه‌زنه‌، به‌رێ خوه‌ بده‌ینه‌ خوه‌ كا بۆ ئارێشێن ئه‌م كه‌تیه‌ تێدا مه‌ چ هزر هه‌یه‌، هزرا مه‌زن ئه‌و نینه‌ مرۆڤ ل گۆر قه‌بارێ ئارێشێ چاره‌كا هندی وێ ببینیته‌ ڤه‌، كا ئارێشه‌ ب چه‌ندێ ل سه‌ر مرۆڤی راوستیایه‌ مۆوڤ ل چاره‌یه‌كا هند بگه‌ریێت نه‌ راسته‌، هزرا مه‌زن ئه‌وه‌ بهێیه‌ سه‌رێ رێزێ و بچووكترین چاره‌سه‌ری و ب ساناهیترین رێیا وێ ببینی و بكار بینی،
ده‌ردێ مه‌ هندێ ژ مه‌ ڤه‌ده‌ر نینه‌ كو ئه‌م ل هیڤیا رێیێن ده‌ره‌كی بین بۆ قورتالبوون ژ قه‌یران و ئاریشه‌یان، دیسا هندێ ڤه‌شارتی و نهێنی نینه‌ كو بۆ چاره‌یا وێ ئه‌م ل فه‌لسه‌فه‌كا توكمه‌ و بسپۆرێن ده‌روونی و جڤاكی و ئابووری بگه‌ریێن هه‌تا ده‌ستێ مه‌ داننه‌ سه‌ر برینا مه‌ و چاڤێ مه‌ ژی ل هیڤیا ده‌ستێ وان یێ دلۆڤان بیت كا دێ به‌رێ مه‌ده‌نه‌ كیش رێكێ و كیژێ ل مه‌ گرن هه‌تا ئه‌م ژ كاودانێن نه‌خۆش و به‌لایا قورتال ببین،
هات و چو ئه‌م پێدڤی ب چێكرنا باوه‌ریێ نه‌ د ناڤا خێزانێن خوه‌دا، باوه‌ری ب دو تشتان دئێته‌ كرن، یا ئێكێ دانپێدان ب شاشیێن خوه‌ د ناڤا خێزانێ دا و یا دووێ نه‌ڤه‌شارتنا چ روودان و بۆیه‌ران ل ئێك و دو، هه‌ڤژین د گه‌ل ئێك و دو و باب د گه‌ل كچێ یان كوری، ده‌یك د گه‌ل كچێ یان كوری، كچ و كور د گه‌ل خووشك و برایێن خوه‌، ئه‌و ژی ئێك ئێك دگه‌ل دایك و بابێت خوه‌، ئه‌گه‌ر ب هه‌می ساده‌یی و خاكی و ب ڤیان و بێ هه‌ستكرن ب كێماسیێ د رازی بین د گه‌ل ئێك روونینه‌ خار و داخوازا لێبۆریێ ژ ئێك بكه‌ین و ده‌ر برینا حه‌ژێكرنا خوه‌ بۆ ئێكو دو ب ئاشكه‌رایی بێژن و كه‌سێ چاڤترسیای نه‌كه‌ین ژ ده‌ربرینا راستیا چه‌ندا ته‌حل و نه‌خۆش بیت، هنگی بێ گومان دێ ده‌رگه‌هێ باوه‌ریێ ڤه‌بیت، ده‌مێ كوڕ یان كچ دزانیت دێ باب یان دایك ب تشته‌كی زانیت، هینگی ل هیڤیا پاشڤه‌برنا توند و سزایی نابیت، به‌لكی دێ ل هیڤیا نۆشداره‌كێ دلۆڤان بیت و هیڤیا سه‌ر راستكرنا چه‌وتیا ب هه‌می دلۆڤانی و دلسۆزی.
ئه‌ڤ ره‌نگێ باوه‌ریێ ئه‌گه‌ر ئه‌م ژ سنۆرێن خێزانێ ڤه‌گوهێزین بۆ ناڤ جڤاكی دێ بینین گرنگترین و مه‌زنترین قووناغا چاره‌سه‌ریا مه‌ ڤه‌بری، و چ تشت ژ مه‌ كێم نابن.
ئه‌م بۆ پاككرنا ده‌روونێ خوه‌ و په‌یداكرنا باوه‌ریێ ل نك خوه‌ و لێ زڤرین د ڤیانا خوه‌دا بۆ ئێك و دو پێدڤی ب ڤه‌كرنا چ زانكۆ و ئینانا چ پرۆفیسوران نینین، پێدڤی ب خولێن زانستی نینین.
ئه‌م پێدڤی ب ره‌وشه‌نبیریا لێبۆرینێ، و داخوازكرنا لێبۆرینێ نه‌ ژ ئێك و دو، دڤێت بۆ مه‌ باوه‌ری چێبیت كو ده‌مێ من گۆته‌ خووشك یان برا یان باب یان دایك یان زارۆیه‌كێ خوه‌ ل من ببۆره‌ هینگی، ژنیكا دێ د چاڤا مه‌زن و خۆشتڤی بم، د گه‌ل هه‌می كه‌سان ژی هۆسایه‌ نه‌به‌س ناڤ خێزانێ، ئێدی هه‌ر رێیا چاره‌سه‌ریێ دێ داننه‌ سه‌ر سه‌روچاڤان.

18

بایێ باكۆر ل گه‌ل رۆژێ ب گه‌نگه‌شه‌ چوون، بای دگۆت: ئه‌ز بهێزترم و رۆژێ دگۆت: نه‌خێر ئه‌ز بهێزترم، پاشێ لهه‌ڤهاتن و مه‌رجه‌كی دانا كا كی ژ وان دێ شێت جلكێن زه‌لامه‌كێ رێڤنگ ژ به‌ر بكه‌ت، ئه‌ڤه‌ ئه‌و بهێزتره‌.
بای ل ده‌سپێكێ پێكۆل كرن، ل دژواریا پێلێن بایی زه‌لام نه‌چار كر ب توندی جلكێن خوه‌ بگریت بشدینیت، ده‌مێ بای بهێزتر لێدایی ئێدی سه‌رما ژی هاته‌ سه‌ر، چ پێنه‌ما لحێفه‌ك ڤێبوو، ئه‌و ژی دخوه‌ پێچا و نه‌هێلا بلڤیت، پاشێ با پێڤه‌ وه‌ستیا و ته‌سلیمی رۆژێ كر.
ل ده‌سپێكێ رۆژ ب گه‌رماتیه‌كا ناڤنجی هه‌لات هه‌تا زه‌لامی ده‌رسۆكا خوه‌ دانا و پاشێ هێدی هێدی گه‌رما رۆژێ شدیا هه‌تا رادده‌كی زه‌لامی نه‌شیا خوه‌ ل به‌ر پلا گه‌رماتیێ بگریت، جلكێن خوه‌ هه‌می خستن و رووباره‌كێ نێزیك وی هه‌بوو چو خوه‌ ئێخسته‌ ئاڤێ ژگه‌رما دا.
ئه‌م هه‌می یێن گه‌هشتیه‌ وی راستیێ كو پێدڤیه‌ هه‌ولدانا خوه‌ گوهۆرینێ بكه‌ین و یا ژ مه‌ بهێت پێكولێ بكه‌ین ئه‌و كه‌س و ئه‌و كارێ ل به‌ر ده‌ستێ مه‌ و مایێ مه‌ تێدچیت باش بكه‌ین و پێدڤیه‌ نه‌هێلین نه‌ ژ به‌ر ده‌ستێ مه‌ ده‌ركه‌ڤیت و نه‌هێلین ڤارێ ببیت، خه‌ونا مه‌ و خه‌م و خیالا مه‌ ئه‌ وه‌ كو رێ نه‌ده‌ین كه‌سێن ل ده‌ردۆرین مه‌ تووشی شاشیی ببن، یان هه‌كه‌ خه‌له‌تیه‌كێ روو دابیت خه‌ما مه‌ ئه‌وه‌ بشێین كونترۆل بكه‌ین و شاشیێ بنبر بكه‌ین ئێدی ده‌رفه‌تا شاشیێ نه‌هێلین، چنكی خه‌له‌تی سه‌ر ئێشیا مه‌ هه‌میانه‌.
ئه‌ڤه‌ راستیه‌كه‌ و كه‌س ڤێ راستیێ ئینكار ناكه‌ت، لێ ئارێشا مه‌ یا د دو تشتان دا هه‌ی، یا ئێكێ هنده‌ك جاران ئه‌م ژبیر دكه‌ین كو ژتمامه‌تیا مرۆڤینیا مه‌ ئه‌وه‌ ئه‌م د ته‌مام نه‌بین، یا دروست ئه‌وه‌ كو هنده‌ك جاران ئه‌م دروست نه‌بین، یا شاش ئه‌وه‌ هه‌كه‌ ئه‌م شاشیێ نه‌بینین، راست ب چه‌پی دئێته‌ نیاسین و رۆناهی ب تاریاتیێ دئێته‌نیاسین و باشی ب خرابیێ، ئانكو د پێڤاژۆیا نۆرمالا هه‌می جڤاكێن مرۆڤاتیێ دا دڤێت هه‌ردو لا د دیار بن، و یا دووێ ره‌فتارا مه‌ یه‌ ل به‌رانبه‌ر تشتێ ئه‌م ژێ نه‌ درازی، یان ل به‌رانبه‌ر تشتێ ئه‌م دبینین یێ خه‌له‌ت و نه‌ ل دووڤ هزرا مه‌ دكر روودایه‌. یا ژ مه‌ ڤه‌ هندی ئه‌م توندتر بین به‌لگه‌یه‌ ل سه‌ر ئیمانا مه‌ یا ب هێز، هندی خودان بریاره‌كا شدیایی و بێ راست و چه‌پ و هێڤه‌ و وێڤه‌ بین به‌لگه‌یه‌ ل سه‌ر بكێرهاتنا مه‌ وه‌ك كه‌سێن خودان بریار، هندی بده‌ن و ره‌نگێن بلند و چاڤسۆركرن و ب گه‌ف و گۆر بین به‌لگه‌یه‌ ل سه‌ر زه‌لامینی و غیره‌ت و هێز و زه‌ڤله‌كێن مه‌، ئارێشێن مه‌ ل به‌رانبه‌ری تشتێ ئه‌م ژێ نه‌ د رازی ئه‌ڤه‌ نه‌ و ئه‌م نزانین كو ئه‌م دێ ب ڤی شێوه‌ی خوه‌ ئێخینه‌ دوو به‌لایێن مه‌زنتر، یا ئێكێ ئیمان و باوه‌ری و زه‌لامینی و هێز و تشتێ كو ئه‌م حسێب دكه‌ین هێزن دێ هه‌می ب ڤی ره‌نگێ ره‌فتارێ سست و خاڤبن و ئه‌م پێ ناحه‌سیێن كو ئه‌م یێ ژده‌ست دده‌ین و ئه‌م ب راستی ژی یێ ژ ده‌ست دده‌ین، ب تایبه‌ت دچاڤێن وان كه‌سان دا یێن ئه‌م پێكۆلێن خوه‌ ل سه‌ر سه‌رێ وان دكه‌ین و هه‌ولا گوهۆرینا وان دكه‌ین، ئه‌م ب ڤان ره‌فتارێن توند خوه‌ سار دكه‌ین و د چاڤێن وان دا دكه‌ڤین هه‌ر چه‌ند ژ ترسان دا په‌سنا مه‌ بده‌ن به‌س نه‌ راسته‌، به‌لایا دووێ ئه‌م دێ خه‌له‌تیێ ربیته‌كه‌ین و مه‌زنتر لێكه‌ین چ جاران نه‌شێن كونترۆل بكه‌ین، خوه‌ هه‌كه‌ ل سه‌ر زارۆیه‌كێ ساڤا ژی بیت سه‌ر كه‌فتنێ نائینین، رێیا درست ئه‌وه‌ ئه‌م به‌روڤاژی هه‌ولدانا بكاربینین و وه‌كی رۆژێ كاربكه‌ین دابگه‌هینه‌ ئارمانجێ.

26

چاره‌نڤیس
رێڤه‌به‌رێ خواندنگه‌هه‌كێ گۆته‌ سێ مامۆستایان: (هوون باشترین مامۆستایێن مه‌نه‌، مه‌ بۆ هه‌ر ئێك ژ هه‌وه‌ (٣٠) خوانده‌ڤان ژ باشترین خانده‌ڤانه‌ یێن ژێگرتی دا د پۆلێن تایبه‌ت دا وانێن وان بێژنێ، به‌س ڤی كاری نه‌بێژنه‌ خوانده‌ڤانان و نه‌بێژنه‌ خێزانێن وان ژی دا پلانا مه‌ خراب نه‌بیت، نورمال ده‌رسێن وان بێژن و به‌س پرۆگرامێ په‌روه‌ردێ ده‌ستنیشانكری بۆ بێژن، به‌س مه‌ ئه‌نجامێن باش ژ هه‌وه‌ دڤێن (ب راستی ژی ئه‌نجام زۆر باشبوون، مامۆستایان گۆت: مه‌دیت كو خوانده‌ڤان چ جار وه‌سا باش تێنه‌گه‌هشتنه‌، ل گه‌ل پرۆسێسێ باش دگونجن)
پاش گۆته‌ مامۆستایان كو ئه‌ڤ تشته‌ به‌س جه‌رباندن بوو، خوانده‌ڤان نه‌ دژێگرتی بوون و هه‌ر خوانده‌ڤانێن نۆرمالێن خواندنگه‌هێ بوون و چ تایبه‌تمه‌ندی نه‌بوون (عه‌شوائی) هاتبوونه‌ ژێگرتن، د سه‌ر ڤێ چه‌ندێ را مامۆستا ژی نۆرمال وه‌ك هه‌میان بوون، ناڤێن وان ب راكێشان هاتبوونه‌ ژێگرتن و چ تایبه‌تمه‌ندیێم دی نه‌بوون..
ئه‌م هه‌می ئێخسیرێن هزركرنا خوه‌نه‌، گه‌له‌ك جاران ئه‌م خوه‌ قانع دكه‌ین ب تشته‌كێ خراب و نه‌یێ باش، د بنیات دا چ راستی بۆ خرابی و نه‌باشیا وێ نینه‌، به‌لكی نه‌باشی و خرابی یا د سه‌رێ مه‌دا هه‌ی و د هزركرنا مه‌دا هه‌ی، ئه‌م وه‌سا دبینین،
د دیرۆكێ دا چ شۆره‌شان هندی شۆره‌شێن هزری رۆل نه‌گێرایه‌، ده‌مێ هزروبیر و دیتن و بۆچوون ل سه‌ر هنده‌ك تشتێن هه‌ستیار دئێنه‌ گوهۆرین و جهێ خوه‌ ب راستی و دروستی دكه‌ن، ب جاره‌كێ ژیان و سیسته‌مێ ژیانێ هه‌می ل جڤاكی دئێته‌ گوهۆرین، له‌وما دڤێت ل خوه‌ بزڤرین و ژ خوه‌ بپرسین (گه‌لۆ ئه‌ڤ بێ هێزی و ته‌مبه‌لی و خه‌مساری و خرش و خاڤی و بێ ئاستیا زانستی و مرۆڤی و به‌ره‌للایی و بێ سیسته‌می و… هتد، ئه‌ڤه‌ هه‌ما سالوخه‌تێ مه‌یێ هه‌ر و هه‌ره‌؟ دێ هه‌ر هۆبین؟ ئه‌م ب كێر چ شێوازێن دی یێن ژیانێ نائێین؟ ووو ؟)
ل ڤێرێ ئێك راستی یا هه‌ی دڤێت بزانین، ئه‌م ژی وه‌ك هه‌می مرۆڤێن دونیایێ یێن هاتیه‌ چێكرن دا دونیایێ ئاڤاكه‌ین و برێڤه‌ببه‌ین و هه‌ر ئێك ژ مه‌ به‌رپرساتیا خوه‌ ل به‌رانبه‌ر مرۆڤ و ژیانێ ب درستی ببه‌ته‌ سه‌ری، جوداهیا مه‌ ل گه‌ل مرۆڤ و جڤاكێن دی به‌س د ره‌نگێ هزركرنێ دایه‌، هه‌ر وه‌كی مه‌ یا ل سه‌ر خوه‌ حه‌رامكری، ئه‌م هزرێن باش ژ ئێكودو بكه‌ین، مه‌ قه‌باره‌ك یێ دانای بۆ هزر و لڤینێن خوه‌، ژ زارۆكینی و هه‌تا مه‌زن دبین، ئه‌م باوه‌ر ناكه‌ین كو ئه‌م دشێین باشتر بین، باوه‌ر ناكه‌ین كو ئه‌م دشێن پێشكه‌فتیتر بین جارێ ل سه‌ر ئاستێ تاك و جڤاكی ژ بلی سازیێن فه‌رمی.
ئه‌م پێدڤی ب پێداچوونێن رۆژانه‌ینه‌ بۆ خوه‌ و بۆ جڤاكێ خوه‌، كه‌ره‌مكه‌ن دا بۆ ماوێ هه‌یڤه‌كێ دا خوه‌ بجه‌ربینین و بێژینه‌ خوه‌: سپێدێ ده‌مێ ژ خه‌و رادبم، ئه‌ز دێ ب چاڤێ ئه‌رێنی سه‌حكه‌مه‌ خێزانا خوه‌ و زارۆ و جیران و كه‌سوكار و هه‌می مرۆڤێن ئه‌ز د ئه‌ڤرۆ دا دبینم، كی بیت و چ بیت، دێ به‌س هزرێن باش و باشیێ ژێ كه‌م، جهی بۆ ئێك هزرا خراب و بێ باوه‌ریێ ناهێلم، هه‌تا هه‌یڤا مه‌ ب دووماهی دئێت، دێ بینین ژیانه‌كا دی یاهه‌ی ئه‌م یێ ب ده‌ستێن خوه‌ خوه‌ ژێ بێ باردكه‌ین.

21

چاره‌نڤیس
شێوێ ده‌ربرینێ
سه‌رهاتیه‌كا چینی یا هه‌ی دبێژیت ماله‌كێ خودێ زارۆیه‌كێ كوڕ ب رزقێ وان كر، جیرانێن وان هاتن پیرۆزباهیان لێ بكه‌ن، جیرانێ ئێكێ گۆتێ: (چه‌ند زارۆكه‌كێ جوانه‌! بێگومان دێ بیته‌ سه‌ركرده‌كێ مه‌زن..).
خێزانا مالێ هه‌میێ سوپاسیا هه‌ستێ وی كر و خوارن و ڤه‌خوارنێن تایبه‌ت پێشكێشكرن و ب دلێن خۆش زڤری..
جیرانێ دووێ گۆت: (چه‌ند زارۆیه‌كێ تازه‌ یه‌ بێگومان دێ بیته‌ بازرگانه‌كێ زه‌نگین و كه‌سه‌كێ ناڤدار..)
دیسا خێزانا مالێ سوپاسی پێشكێشكرن و خوارن و ڤه‌خوارنێن تایبه‌ت دانێ و ئه‌و ژی ب دلێن خۆش ده‌ركه‌فت. جیرانێ سێ یێ سه‌حكره‌ زارۆی و گۆت: (ئه‌ڤ زارۆیه‌ دێ مریت!)
خێزان هه‌می هاتنێ قوتان و راخشاندنه‌ ژده‌رڤه‌، ل گه‌ل هندێ راستیه‌ك یا گۆتی و به‌س، چونكی هه‌ر كه‌سێ ببیت دێ مریت ژی، لێ به‌لێ چ راستی؟ و ل چ ده‌راڤ؟ و چه‌ندا پێدڤیه‌ د ڤێ هه‌لكه‌فتێ دا بێته‌ گۆتن؟..!.
هه‌ر په‌یڤه‌كا بهێته‌ گۆتن دڤێت به‌ری هینگی خودان هزرێن خوه‌ تێدا بكه‌ت، نه‌بێژیت یا بچووكه‌ و چنینه‌، تشتێ ژ ده‌ڤی ده‌ركه‌ڤیت جهه‌كێ هه‌ی پێشوازیێ دكه‌ت، گوهێن هه‌ی دڤه‌كرینه‌، هه‌ستێن هه‌ی د ساخ و د هه‌ستیارن، كارتێكرنا خوه‌ دێ هه‌بیت،
ب تایبه‌ت ده‌مێ مرۆڤ مژار و كاوده‌نه‌كێ نه‌یێ نۆرمال ببینیت، یان كه‌سه‌كی د كاودانه‌كێ تایبه‌ت دا ببینیت، ره‌وشه‌كا نه‌ چاڤه‌رێكری ب سه‌رێ ئێكی بێت، دڤێت گه‌له‌كێ هشیار بیت، هه‌ر وێ گاڤێ خوه‌ نه‌كه‌ته‌ حاكم و به‌رپرس و شه‌هره‌زا و ڤه‌كۆله‌ر و ده‌ست ب بریاران بكه‌ت و زیكا حوكمی ل سه‌ر خه‌لكی و كاودانان نه‌ده‌ت و بۆچوونا خوه‌ نه‌ راگه‌هینیت و بزانیت هنده‌ك تشتا مایێ وی تێ ناچیت و شۆلێ وی نینه‌، هه‌كه‌ كه‌فته‌ به‌ر سنگێ وی یان ڤیا بۆچوونا خوه‌ بێژیت، پێدڤیه‌ ب هه‌می به‌رپرساتی و حورمه‌ت و ره‌وشت بۆچوونا خوه‌ بێژیت، هه‌كه‌ لایه‌نێ باشیێ ١٪ سه‌دێ ژی بیت نابیت بهێته‌ ژبیركرن،
جهێ مخابنیێ یه‌ مرۆڤ خوه‌ بكه‌ته‌ زێره‌ڤانێ خه‌لكی و كاودانا و ره‌وشێن نه‌ نورمال، هێشتا مریشكێ هێك نه‌كری بێته‌ گۆتن كو چار هێك ل سه‌ر ئێك یێن كرین و خودانی دڤیا بفرۆشیته‌ فلانكه‌سی به‌س پا هنده‌ك بوونه‌ رێگر و نه‌هێلا، ڤێجا خودانی هه‌دار نه‌ما رابوو ئاگر به‌ردا مریشكا خوه‌، هێشتا بسم الله‌ قدقدا مریشكێ یه‌.
خواندنا نیگه‌تیڤ بۆ لڤین و گۆتن و هه‌لویستێن خه‌لكی شۆلی گه‌له‌ك خرابتر لێ دكه‌ت، كه‌س بلا هزر نه‌كه‌ت كو یێ ب گۆتنا هنده‌ك تشتان ل سه‌ر مژاره‌كێ و د كاودانه‌كێ هه‌ستیار دا یێ تشته‌كێ باش دكه‌ت! هه‌ر چه‌ند حه‌تا هنده‌ك راستی ژی بن دڤێت به‌رپرساتیا خوه‌ یا مرۆڤی و ره‌وشتی ژبیر نه‌كه‌ت.
مه‌راقا زانینا تشتان ژ هه‌می كه‌سان و ژ هه‌می شۆلان و ژ هه‌می مژاران یا بوویه‌ ئێشه‌كا گران و كوور ل ده‌ف تاكێن جڤاكی هه‌میێ، ئه‌ڤه‌ نیشانێ باشیێ نینه‌، و یێ مه‌راق ژی دكه‌ت قه‌ت ل هیڤیا گوهلێبوونا تشته‌كێ باش و یێ خێرێ نینه‌، به‌لكی گوهێ وی به‌س یێ ل هیڤیا دانانا موركا قوبحه‌ت و خرابیێ ل سه‌ر ڤی و یێ دی، ڤێجا دا ئه‌و ژی وه‌كی خوه‌ ڤه‌گوهێزیت، ماشا الله‌ ب خێرا تۆرێن جڤاكی یێن ئه‌نترنێتێ ژی دیوانا هه‌میان یا تژی یه‌. ئه‌و نه‌مه‌زنیه‌ مرۆڤ نێچیرڤانێ شاشی و خه‌له‌تیێن جڤاكی و پێكهاتێن جڤاكی بیت، پاشێ ببیته‌ حاكمێ ره‌فتارا وان، ده‌ستخۆشی و لایكێن تۆرێن جڤاكی ڤێ ره‌نگێ ره‌فتارێ حه‌لال ناكه‌ن، دڤێت مرۆڤ پێ نه‌ خاپیێت.

website security
Facebook Auto Publish Powered By : XYZScripts.com