NO IORG
Authors Posts by فەرست مستەفا

فەرست مستەفا

فەرست مستەفا
13 POSTS 0 COMMENTS

34

زه‌لامه‌كی هه‌ر رۆژ ژڤان بوو ل گه‌ل كورێ خوه‌ مه‌له‌ڤانی نیشا ددان ل مال، دا دۆشه‌كێ بۆ دانیته‌ ئه‌ردی و ل سه‌ر دۆشه‌كێ فێری مه‌له‌ڤانیان دكر، ده‌مێ پێكڤه‌ چووینه‌ سه‌ر رووباری كوڕك بنئاڤ بوو و بۆ خه‌ندقینێ دچوو. بابێ وی ب تۆره‌یی ڤه‌ گازی كرێ:
(ما ئه‌ز هه‌رۆ مه‌له‌ڤانیا نیشا ته‌ ناده‌م؟!)
كوڕ یێ د هه‌ناسا دووماهیێ دا به‌رسڤا بابێ دده‌ت: (باب.. كه‌س ل سه‌ر دۆشه‌كێ فێری مه‌له‌ڤانیا نابیت!).
وه‌ك مرۆڤ هه‌ر كه‌س حه‌ز دكه‌ت تشتێ راست و درست بكه‌ت، به‌س حه‌زا دلی تشته‌كه‌ و زانینا رێك و رێككارێت بجهئینانا وێ حه‌زێ تشته‌كێ دی یه‌، هه‌ر شۆله‌كێ ده‌م و جهێ خوه‌ یێ تایبه‌ت یێ هه‌ی، دڤێت ل به‌رچاڤ بهێته‌ وه‌رگرتن دا خلمه‌ت بدورستی بگه‌هیت و كارێ بهێته‌كرن یێ بنه‌جه بیت، هه‌رده‌م دئێته‌ گۆتن كو هه‌ر كه‌سێ ئاره‌زۆیه‌ك هه‌بیت بلا چو جاران ئاره‌زۆیا خوه‌ ژ ده‌ستنه‌ده‌ت و بلا سه‌خبێر بكه‌ت و پێشڤه‌ ببه‌ت، دێ رۆژه‌ك ئێت و گه‌هیته‌ ئاره‌زویا خوه‌، گۆتنه‌كا گرنگ و راسته‌، لێ نائێته‌ وێ واتایێ ئاره‌زۆیا كاری ب تنێ تێرا مرۆڤی هه‌یه‌ و دێ هاری مرۆڤی كه‌ت د هه‌می ده‌راڤان دا، هه‌می تشت ل هه‌می جهان ددرست نینن، دڤێت ل گه‌ل ئاره‌زۆیێ یاریێ ل جهێ وێ بكه‌ت و نه‌ ژ ده‌رڤه‌یی یاریگه‌هێ.
دو رێ یێن ل به‌ر مرۆڤی هه‌ی، یان دڤێت د قالبێ خوه‌دا بیت و ژ قالبێ خوه‌ نه‌ئێته‌ده‌ر، یان ژی هه‌كه‌ پێدڤیكر و ڤیا ژ قالبێ خوه‌ ده‌ركه‌ڤیت.
ئه‌گه‌ر ڤیا وه‌كی هه‌یه‌ بژیت و دانپێدانێ ب قالبێ خوه‌ بكه‌ت و سنۆرێن خوه‌ بزانیت دڤێت چ جاران چاڤ و دلێ خوه‌ نه‌به‌ته‌ وان كه‌س و وان كار و وان جهێن ژ قالب و سنۆرێن وی د دوور و مولكێ ئێكێ دی
و ئه‌گه‌ر ڤیا و حه‌زا هندێ هه‌بیت ژ قالبێ خوه‌ ده‌ركه‌ڤیت و توخیبه‌كێ دی بۆ خوه‌ ده‌ستنیشان بكه‌ت و به‌رفره‌هتر ببینیت و بچیت و چاڤ ل ده‌ردوران بكه‌ت و خوه‌ ژ كه‌سێ كێمتر نه‌بینیت، ئه‌ڤه‌ حه‌قێ وی یه‌، هینگی دڤێت بزانیت شۆل نه‌به‌س حه‌ز كرن ب تنێ یه‌ و هه‌ما دێ كه‌ڤیته‌ د ناڤدا و پێنگاڤێن خوه‌ هاڤێت، ڤێجا ب كۆمێنتان دێ خوه‌ بینیت كو رۆژنامه‌ڤانه‌ و ب به‌لاڤكرنا هزره‌كێ د تۆرێن جڤاكی دا دێ خوه‌ بینیت كو هزرڤانه‌ و ب ده‌ربرینه‌كێ سیاسی یه‌ و ب دیتنا دیمه‌نه‌كێ هه‌ستیار ڤێجا مافزان و پارێزه‌ره‌، وه‌كی گه‌له‌ك جاران دبێژن (كل فی كل) و هه‌می ژی چنكی حه‌زا هه‌ی و رێكه‌كا ب ده‌ست كه‌فتی دبێژنێ تۆرێت جڤاكی یێن ئنترنێتێ، هه‌می كه‌س هه‌می تشتن، جهێ خوه‌ لێ دبینن قه‌هره‌مان ژی نه‌ ئه‌و جهه‌ یێ قه‌هره‌مان لێ دئێنه‌ چێكرن.
نفشه‌كێ چێدبیت بێی به‌ر هه‌ڤی یێ ده‌ستێ خوه‌ دبه‌ته‌ هه‌می تشتان، مفتی نه‌ و موجته‌هد و حاكم و به‌رپرس و عالم و سیاسه‌تڤان و نڤیسكار و هونه‌رزان، خوه‌ نه‌چار دبینیت كو ل سه‌ر هه‌می تشتان بۆچوون و ده‌ربرینا خوه‌ هه‌بیت، بێ هه‌وجه‌یی یێ باره‌كێ گران بۆ خوه‌ چێدكه‌ت و خوه‌ دكه‌ته‌ بارهلگرێ بارێ هه‌میان و نزانیت ئه‌و بخوه‌ باره‌، هه‌می كار وه‌كی مرۆڤانه‌، كا چاوا هه‌ر ئێكی ماله‌ك هه‌یه‌، هه‌ر كاره‌كی ژی ماله‌ك و جهێ ڤه‌حه‌ویانێ یێ هه‌ی، كا چاوا كه‌سێ بێ مال بیت یێ بێ رێز و چ حسێب بۆ نائێنه‌كرن، هه‌ر وسا هه‌ر كارێ ژ جهێ خوه‌ و ژ خودانێن خوه‌ ده‌رنه‌كه‌ڤیت یێ بێ رێزه‌ و چ حسێب بۆ نائێنه‌كرن. پشته‌ڤانیه‌كا بێ گومان بۆ هه‌می خودان حه‌زان و د هه‌می واران دا، به‌س حه‌قێ تشتی بده‌نێ ل جه و پایه‌یا وی، رێزا وێ حه‌زێ و یێن پێشه‌نگ، تشتێ ئاهێن خوارنێ د جهێ كه‌ره‌ستێن ئاڤاهیا دا نائێنه‌ فرۆتن.

15

چاره‌نڤیس
دئێته‌ گۆتن كو ترومبێله‌كا ترێل یا بارهلگر دبن پره‌كێ را دا ده‌رباز بیت، لێ پر یا نزم بوو، بلندیا پرێ و ترێلێ وه‌كی ئێك بوو، ترومبێل د بن پرێ را ئاسێ بوو، پۆلیسێن باژێرڤانیێ زه‌حمه‌ته‌كا مه‌زن دیت و چ رێك و چاره‌ نه‌ برنه‌ ده‌رئێخستنا ترێلێ ژبن پرێ ڤه‌.
زارۆیه‌ك هات و ل ڤی دیمه‌نی دنێری، پسیارا پۆلیسه‌كی كر كا بۆچی ئه‌ڤ ئارێشه‌ چێبوویه‌، پشتی پۆلیسی ئه‌گه‌رێ ئارێشێ بۆ گۆتی زارۆی ب ساده‌ییڤه‌ گۆتێ: ( ما بۆچی هه‌وایێ تایێرێن وێ ڤالا ناكه‌ن ترومبێل بخوه‌ دێ نزم بیت و ب ساناهی دێ ژ بن پرێ ئیننه‌ ده‌ر؟)
پێدڤیه‌ ئه‌م ل چاره‌سه‌ریێن ساده‌ و سڤك و د شیان دا بگه‌رین، به‌رێ خوه‌ نه‌ده‌ینه‌ ئاریشێ كا چه‌ند یا مه‌زنه‌، به‌رێ خوه‌ بده‌ینه‌ خوه‌ كا بۆ ئارێشێن ئه‌م كه‌تیه‌ تێدا مه‌ چ هزر هه‌یه‌، هزرا مه‌زن ئه‌و نینه‌ مرۆڤ ل گۆر قه‌بارێ ئارێشێ چاره‌كا هندی وێ ببینیته‌ ڤه‌، كا ئارێشه‌ ب چه‌ندێ ل سه‌ر مرۆڤی راوستیایه‌ مۆوڤ ل چاره‌یه‌كا هند بگه‌ریێت نه‌ راسته‌، هزرا مه‌زن ئه‌وه‌ بهێیه‌ سه‌رێ رێزێ و بچووكترین چاره‌سه‌ری و ب ساناهیترین رێیا وێ ببینی و بكار بینی،
ده‌ردێ مه‌ هندێ ژ مه‌ ڤه‌ده‌ر نینه‌ كو ئه‌م ل هیڤیا رێیێن ده‌ره‌كی بین بۆ قورتالبوون ژ قه‌یران و ئاریشه‌یان، دیسا هندێ ڤه‌شارتی و نهێنی نینه‌ كو بۆ چاره‌یا وێ ئه‌م ل فه‌لسه‌فه‌كا توكمه‌ و بسپۆرێن ده‌روونی و جڤاكی و ئابووری بگه‌ریێن هه‌تا ده‌ستێ مه‌ داننه‌ سه‌ر برینا مه‌ و چاڤێ مه‌ ژی ل هیڤیا ده‌ستێ وان یێ دلۆڤان بیت كا دێ به‌رێ مه‌ده‌نه‌ كیش رێكێ و كیژێ ل مه‌ گرن هه‌تا ئه‌م ژ كاودانێن نه‌خۆش و به‌لایا قورتال ببین،
هات و چو ئه‌م پێدڤی ب چێكرنا باوه‌ریێ نه‌ د ناڤا خێزانێن خوه‌دا، باوه‌ری ب دو تشتان دئێته‌ كرن، یا ئێكێ دانپێدان ب شاشیێن خوه‌ د ناڤا خێزانێ دا و یا دووێ نه‌ڤه‌شارتنا چ روودان و بۆیه‌ران ل ئێك و دو، هه‌ڤژین د گه‌ل ئێك و دو و باب د گه‌ل كچێ یان كوری، ده‌یك د گه‌ل كچێ یان كوری، كچ و كور د گه‌ل خووشك و برایێن خوه‌، ئه‌و ژی ئێك ئێك دگه‌ل دایك و بابێت خوه‌، ئه‌گه‌ر ب هه‌می ساده‌یی و خاكی و ب ڤیان و بێ هه‌ستكرن ب كێماسیێ د رازی بین د گه‌ل ئێك روونینه‌ خار و داخوازا لێبۆریێ ژ ئێك بكه‌ین و ده‌ر برینا حه‌ژێكرنا خوه‌ بۆ ئێكو دو ب ئاشكه‌رایی بێژن و كه‌سێ چاڤترسیای نه‌كه‌ین ژ ده‌ربرینا راستیا چه‌ندا ته‌حل و نه‌خۆش بیت، هنگی بێ گومان دێ ده‌رگه‌هێ باوه‌ریێ ڤه‌بیت، ده‌مێ كوڕ یان كچ دزانیت دێ باب یان دایك ب تشته‌كی زانیت، هینگی ل هیڤیا پاشڤه‌برنا توند و سزایی نابیت، به‌لكی دێ ل هیڤیا نۆشداره‌كێ دلۆڤان بیت و هیڤیا سه‌ر راستكرنا چه‌وتیا ب هه‌می دلۆڤانی و دلسۆزی.
ئه‌ڤ ره‌نگێ باوه‌ریێ ئه‌گه‌ر ئه‌م ژ سنۆرێن خێزانێ ڤه‌گوهێزین بۆ ناڤ جڤاكی دێ بینین گرنگترین و مه‌زنترین قووناغا چاره‌سه‌ریا مه‌ ڤه‌بری، و چ تشت ژ مه‌ كێم نابن.
ئه‌م بۆ پاككرنا ده‌روونێ خوه‌ و په‌یداكرنا باوه‌ریێ ل نك خوه‌ و لێ زڤرین د ڤیانا خوه‌دا بۆ ئێك و دو پێدڤی ب ڤه‌كرنا چ زانكۆ و ئینانا چ پرۆفیسوران نینین، پێدڤی ب خولێن زانستی نینین.
ئه‌م پێدڤی ب ره‌وشه‌نبیریا لێبۆرینێ، و داخوازكرنا لێبۆرینێ نه‌ ژ ئێك و دو، دڤێت بۆ مه‌ باوه‌ری چێبیت كو ده‌مێ من گۆته‌ خووشك یان برا یان باب یان دایك یان زارۆیه‌كێ خوه‌ ل من ببۆره‌ هینگی، ژنیكا دێ د چاڤا مه‌زن و خۆشتڤی بم، د گه‌ل هه‌می كه‌سان ژی هۆسایه‌ نه‌به‌س ناڤ خێزانێ، ئێدی هه‌ر رێیا چاره‌سه‌ریێ دێ داننه‌ سه‌ر سه‌روچاڤان.

13

بایێ باكۆر ل گه‌ل رۆژێ ب گه‌نگه‌شه‌ چوون، بای دگۆت: ئه‌ز بهێزترم و رۆژێ دگۆت: نه‌خێر ئه‌ز بهێزترم، پاشێ لهه‌ڤهاتن و مه‌رجه‌كی دانا كا كی ژ وان دێ شێت جلكێن زه‌لامه‌كێ رێڤنگ ژ به‌ر بكه‌ت، ئه‌ڤه‌ ئه‌و بهێزتره‌.
بای ل ده‌سپێكێ پێكۆل كرن، ل دژواریا پێلێن بایی زه‌لام نه‌چار كر ب توندی جلكێن خوه‌ بگریت بشدینیت، ده‌مێ بای بهێزتر لێدایی ئێدی سه‌رما ژی هاته‌ سه‌ر، چ پێنه‌ما لحێفه‌ك ڤێبوو، ئه‌و ژی دخوه‌ پێچا و نه‌هێلا بلڤیت، پاشێ با پێڤه‌ وه‌ستیا و ته‌سلیمی رۆژێ كر.
ل ده‌سپێكێ رۆژ ب گه‌رماتیه‌كا ناڤنجی هه‌لات هه‌تا زه‌لامی ده‌رسۆكا خوه‌ دانا و پاشێ هێدی هێدی گه‌رما رۆژێ شدیا هه‌تا رادده‌كی زه‌لامی نه‌شیا خوه‌ ل به‌ر پلا گه‌رماتیێ بگریت، جلكێن خوه‌ هه‌می خستن و رووباره‌كێ نێزیك وی هه‌بوو چو خوه‌ ئێخسته‌ ئاڤێ ژگه‌رما دا.
ئه‌م هه‌می یێن گه‌هشتیه‌ وی راستیێ كو پێدڤیه‌ هه‌ولدانا خوه‌ گوهۆرینێ بكه‌ین و یا ژ مه‌ بهێت پێكولێ بكه‌ین ئه‌و كه‌س و ئه‌و كارێ ل به‌ر ده‌ستێ مه‌ و مایێ مه‌ تێدچیت باش بكه‌ین و پێدڤیه‌ نه‌هێلین نه‌ ژ به‌ر ده‌ستێ مه‌ ده‌ركه‌ڤیت و نه‌هێلین ڤارێ ببیت، خه‌ونا مه‌ و خه‌م و خیالا مه‌ ئه‌ وه‌ كو رێ نه‌ده‌ین كه‌سێن ل ده‌ردۆرین مه‌ تووشی شاشیی ببن، یان هه‌كه‌ خه‌له‌تیه‌كێ روو دابیت خه‌ما مه‌ ئه‌وه‌ بشێین كونترۆل بكه‌ین و شاشیێ بنبر بكه‌ین ئێدی ده‌رفه‌تا شاشیێ نه‌هێلین، چنكی خه‌له‌تی سه‌ر ئێشیا مه‌ هه‌میانه‌.
ئه‌ڤه‌ راستیه‌كه‌ و كه‌س ڤێ راستیێ ئینكار ناكه‌ت، لێ ئارێشا مه‌ یا د دو تشتان دا هه‌ی، یا ئێكێ هنده‌ك جاران ئه‌م ژبیر دكه‌ین كو ژتمامه‌تیا مرۆڤینیا مه‌ ئه‌وه‌ ئه‌م د ته‌مام نه‌بین، یا دروست ئه‌وه‌ كو هنده‌ك جاران ئه‌م دروست نه‌بین، یا شاش ئه‌وه‌ هه‌كه‌ ئه‌م شاشیێ نه‌بینین، راست ب چه‌پی دئێته‌ نیاسین و رۆناهی ب تاریاتیێ دئێته‌نیاسین و باشی ب خرابیێ، ئانكو د پێڤاژۆیا نۆرمالا هه‌می جڤاكێن مرۆڤاتیێ دا دڤێت هه‌ردو لا د دیار بن، و یا دووێ ره‌فتارا مه‌ یه‌ ل به‌رانبه‌ر تشتێ ئه‌م ژێ نه‌ درازی، یان ل به‌رانبه‌ر تشتێ ئه‌م دبینین یێ خه‌له‌ت و نه‌ ل دووڤ هزرا مه‌ دكر روودایه‌. یا ژ مه‌ ڤه‌ هندی ئه‌م توندتر بین به‌لگه‌یه‌ ل سه‌ر ئیمانا مه‌ یا ب هێز، هندی خودان بریاره‌كا شدیایی و بێ راست و چه‌پ و هێڤه‌ و وێڤه‌ بین به‌لگه‌یه‌ ل سه‌ر بكێرهاتنا مه‌ وه‌ك كه‌سێن خودان بریار، هندی بده‌ن و ره‌نگێن بلند و چاڤسۆركرن و ب گه‌ف و گۆر بین به‌لگه‌یه‌ ل سه‌ر زه‌لامینی و غیره‌ت و هێز و زه‌ڤله‌كێن مه‌، ئارێشێن مه‌ ل به‌رانبه‌ری تشتێ ئه‌م ژێ نه‌ د رازی ئه‌ڤه‌ نه‌ و ئه‌م نزانین كو ئه‌م دێ ب ڤی شێوه‌ی خوه‌ ئێخینه‌ دوو به‌لایێن مه‌زنتر، یا ئێكێ ئیمان و باوه‌ری و زه‌لامینی و هێز و تشتێ كو ئه‌م حسێب دكه‌ین هێزن دێ هه‌می ب ڤی ره‌نگێ ره‌فتارێ سست و خاڤبن و ئه‌م پێ ناحه‌سیێن كو ئه‌م یێ ژده‌ست دده‌ین و ئه‌م ب راستی ژی یێ ژ ده‌ست دده‌ین، ب تایبه‌ت دچاڤێن وان كه‌سان دا یێن ئه‌م پێكۆلێن خوه‌ ل سه‌ر سه‌رێ وان دكه‌ین و هه‌ولا گوهۆرینا وان دكه‌ین، ئه‌م ب ڤان ره‌فتارێن توند خوه‌ سار دكه‌ین و د چاڤێن وان دا دكه‌ڤین هه‌ر چه‌ند ژ ترسان دا په‌سنا مه‌ بده‌ن به‌س نه‌ راسته‌، به‌لایا دووێ ئه‌م دێ خه‌له‌تیێ ربیته‌كه‌ین و مه‌زنتر لێكه‌ین چ جاران نه‌شێن كونترۆل بكه‌ین، خوه‌ هه‌كه‌ ل سه‌ر زارۆیه‌كێ ساڤا ژی بیت سه‌ر كه‌فتنێ نائینین، رێیا درست ئه‌وه‌ ئه‌م به‌روڤاژی هه‌ولدانا بكاربینین و وه‌كی رۆژێ كاربكه‌ین دابگه‌هینه‌ ئارمانجێ.

22

چاره‌نڤیس
رێڤه‌به‌رێ خواندنگه‌هه‌كێ گۆته‌ سێ مامۆستایان: (هوون باشترین مامۆستایێن مه‌نه‌، مه‌ بۆ هه‌ر ئێك ژ هه‌وه‌ (٣٠) خوانده‌ڤان ژ باشترین خانده‌ڤانه‌ یێن ژێگرتی دا د پۆلێن تایبه‌ت دا وانێن وان بێژنێ، به‌س ڤی كاری نه‌بێژنه‌ خوانده‌ڤانان و نه‌بێژنه‌ خێزانێن وان ژی دا پلانا مه‌ خراب نه‌بیت، نورمال ده‌رسێن وان بێژن و به‌س پرۆگرامێ په‌روه‌ردێ ده‌ستنیشانكری بۆ بێژن، به‌س مه‌ ئه‌نجامێن باش ژ هه‌وه‌ دڤێن (ب راستی ژی ئه‌نجام زۆر باشبوون، مامۆستایان گۆت: مه‌دیت كو خوانده‌ڤان چ جار وه‌سا باش تێنه‌گه‌هشتنه‌، ل گه‌ل پرۆسێسێ باش دگونجن)
پاش گۆته‌ مامۆستایان كو ئه‌ڤ تشته‌ به‌س جه‌رباندن بوو، خوانده‌ڤان نه‌ دژێگرتی بوون و هه‌ر خوانده‌ڤانێن نۆرمالێن خواندنگه‌هێ بوون و چ تایبه‌تمه‌ندی نه‌بوون (عه‌شوائی) هاتبوونه‌ ژێگرتن، د سه‌ر ڤێ چه‌ندێ را مامۆستا ژی نۆرمال وه‌ك هه‌میان بوون، ناڤێن وان ب راكێشان هاتبوونه‌ ژێگرتن و چ تایبه‌تمه‌ندیێم دی نه‌بوون..
ئه‌م هه‌می ئێخسیرێن هزركرنا خوه‌نه‌، گه‌له‌ك جاران ئه‌م خوه‌ قانع دكه‌ین ب تشته‌كێ خراب و نه‌یێ باش، د بنیات دا چ راستی بۆ خرابی و نه‌باشیا وێ نینه‌، به‌لكی نه‌باشی و خرابی یا د سه‌رێ مه‌دا هه‌ی و د هزركرنا مه‌دا هه‌ی، ئه‌م وه‌سا دبینین،
د دیرۆكێ دا چ شۆره‌شان هندی شۆره‌شێن هزری رۆل نه‌گێرایه‌، ده‌مێ هزروبیر و دیتن و بۆچوون ل سه‌ر هنده‌ك تشتێن هه‌ستیار دئێنه‌ گوهۆرین و جهێ خوه‌ ب راستی و دروستی دكه‌ن، ب جاره‌كێ ژیان و سیسته‌مێ ژیانێ هه‌می ل جڤاكی دئێته‌ گوهۆرین، له‌وما دڤێت ل خوه‌ بزڤرین و ژ خوه‌ بپرسین (گه‌لۆ ئه‌ڤ بێ هێزی و ته‌مبه‌لی و خه‌مساری و خرش و خاڤی و بێ ئاستیا زانستی و مرۆڤی و به‌ره‌للایی و بێ سیسته‌می و… هتد، ئه‌ڤه‌ هه‌ما سالوخه‌تێ مه‌یێ هه‌ر و هه‌ره‌؟ دێ هه‌ر هۆبین؟ ئه‌م ب كێر چ شێوازێن دی یێن ژیانێ نائێین؟ ووو ؟)
ل ڤێرێ ئێك راستی یا هه‌ی دڤێت بزانین، ئه‌م ژی وه‌ك هه‌می مرۆڤێن دونیایێ یێن هاتیه‌ چێكرن دا دونیایێ ئاڤاكه‌ین و برێڤه‌ببه‌ین و هه‌ر ئێك ژ مه‌ به‌رپرساتیا خوه‌ ل به‌رانبه‌ر مرۆڤ و ژیانێ ب درستی ببه‌ته‌ سه‌ری، جوداهیا مه‌ ل گه‌ل مرۆڤ و جڤاكێن دی به‌س د ره‌نگێ هزركرنێ دایه‌، هه‌ر وه‌كی مه‌ یا ل سه‌ر خوه‌ حه‌رامكری، ئه‌م هزرێن باش ژ ئێكودو بكه‌ین، مه‌ قه‌باره‌ك یێ دانای بۆ هزر و لڤینێن خوه‌، ژ زارۆكینی و هه‌تا مه‌زن دبین، ئه‌م باوه‌ر ناكه‌ین كو ئه‌م دشێین باشتر بین، باوه‌ر ناكه‌ین كو ئه‌م دشێن پێشكه‌فتیتر بین جارێ ل سه‌ر ئاستێ تاك و جڤاكی ژ بلی سازیێن فه‌رمی.
ئه‌م پێدڤی ب پێداچوونێن رۆژانه‌ینه‌ بۆ خوه‌ و بۆ جڤاكێ خوه‌، كه‌ره‌مكه‌ن دا بۆ ماوێ هه‌یڤه‌كێ دا خوه‌ بجه‌ربینین و بێژینه‌ خوه‌: سپێدێ ده‌مێ ژ خه‌و رادبم، ئه‌ز دێ ب چاڤێ ئه‌رێنی سه‌حكه‌مه‌ خێزانا خوه‌ و زارۆ و جیران و كه‌سوكار و هه‌می مرۆڤێن ئه‌ز د ئه‌ڤرۆ دا دبینم، كی بیت و چ بیت، دێ به‌س هزرێن باش و باشیێ ژێ كه‌م، جهی بۆ ئێك هزرا خراب و بێ باوه‌ریێ ناهێلم، هه‌تا هه‌یڤا مه‌ ب دووماهی دئێت، دێ بینین ژیانه‌كا دی یاهه‌ی ئه‌م یێ ب ده‌ستێن خوه‌ خوه‌ ژێ بێ باردكه‌ین.

16

چاره‌نڤیس
شێوێ ده‌ربرینێ
سه‌رهاتیه‌كا چینی یا هه‌ی دبێژیت ماله‌كێ خودێ زارۆیه‌كێ كوڕ ب رزقێ وان كر، جیرانێن وان هاتن پیرۆزباهیان لێ بكه‌ن، جیرانێ ئێكێ گۆتێ: (چه‌ند زارۆكه‌كێ جوانه‌! بێگومان دێ بیته‌ سه‌ركرده‌كێ مه‌زن..).
خێزانا مالێ هه‌میێ سوپاسیا هه‌ستێ وی كر و خوارن و ڤه‌خوارنێن تایبه‌ت پێشكێشكرن و ب دلێن خۆش زڤری..
جیرانێ دووێ گۆت: (چه‌ند زارۆیه‌كێ تازه‌ یه‌ بێگومان دێ بیته‌ بازرگانه‌كێ زه‌نگین و كه‌سه‌كێ ناڤدار..)
دیسا خێزانا مالێ سوپاسی پێشكێشكرن و خوارن و ڤه‌خوارنێن تایبه‌ت دانێ و ئه‌و ژی ب دلێن خۆش ده‌ركه‌فت. جیرانێ سێ یێ سه‌حكره‌ زارۆی و گۆت: (ئه‌ڤ زارۆیه‌ دێ مریت!)
خێزان هه‌می هاتنێ قوتان و راخشاندنه‌ ژده‌رڤه‌، ل گه‌ل هندێ راستیه‌ك یا گۆتی و به‌س، چونكی هه‌ر كه‌سێ ببیت دێ مریت ژی، لێ به‌لێ چ راستی؟ و ل چ ده‌راڤ؟ و چه‌ندا پێدڤیه‌ د ڤێ هه‌لكه‌فتێ دا بێته‌ گۆتن؟..!.
هه‌ر په‌یڤه‌كا بهێته‌ گۆتن دڤێت به‌ری هینگی خودان هزرێن خوه‌ تێدا بكه‌ت، نه‌بێژیت یا بچووكه‌ و چنینه‌، تشتێ ژ ده‌ڤی ده‌ركه‌ڤیت جهه‌كێ هه‌ی پێشوازیێ دكه‌ت، گوهێن هه‌ی دڤه‌كرینه‌، هه‌ستێن هه‌ی د ساخ و د هه‌ستیارن، كارتێكرنا خوه‌ دێ هه‌بیت،
ب تایبه‌ت ده‌مێ مرۆڤ مژار و كاوده‌نه‌كێ نه‌یێ نۆرمال ببینیت، یان كه‌سه‌كی د كاودانه‌كێ تایبه‌ت دا ببینیت، ره‌وشه‌كا نه‌ چاڤه‌رێكری ب سه‌رێ ئێكی بێت، دڤێت گه‌له‌كێ هشیار بیت، هه‌ر وێ گاڤێ خوه‌ نه‌كه‌ته‌ حاكم و به‌رپرس و شه‌هره‌زا و ڤه‌كۆله‌ر و ده‌ست ب بریاران بكه‌ت و زیكا حوكمی ل سه‌ر خه‌لكی و كاودانان نه‌ده‌ت و بۆچوونا خوه‌ نه‌ راگه‌هینیت و بزانیت هنده‌ك تشتا مایێ وی تێ ناچیت و شۆلێ وی نینه‌، هه‌كه‌ كه‌فته‌ به‌ر سنگێ وی یان ڤیا بۆچوونا خوه‌ بێژیت، پێدڤیه‌ ب هه‌می به‌رپرساتی و حورمه‌ت و ره‌وشت بۆچوونا خوه‌ بێژیت، هه‌كه‌ لایه‌نێ باشیێ ١٪ سه‌دێ ژی بیت نابیت بهێته‌ ژبیركرن،
جهێ مخابنیێ یه‌ مرۆڤ خوه‌ بكه‌ته‌ زێره‌ڤانێ خه‌لكی و كاودانا و ره‌وشێن نه‌ نورمال، هێشتا مریشكێ هێك نه‌كری بێته‌ گۆتن كو چار هێك ل سه‌ر ئێك یێن كرین و خودانی دڤیا بفرۆشیته‌ فلانكه‌سی به‌س پا هنده‌ك بوونه‌ رێگر و نه‌هێلا، ڤێجا خودانی هه‌دار نه‌ما رابوو ئاگر به‌ردا مریشكا خوه‌، هێشتا بسم الله‌ قدقدا مریشكێ یه‌.
خواندنا نیگه‌تیڤ بۆ لڤین و گۆتن و هه‌لویستێن خه‌لكی شۆلی گه‌له‌ك خرابتر لێ دكه‌ت، كه‌س بلا هزر نه‌كه‌ت كو یێ ب گۆتنا هنده‌ك تشتان ل سه‌ر مژاره‌كێ و د كاودانه‌كێ هه‌ستیار دا یێ تشته‌كێ باش دكه‌ت! هه‌ر چه‌ند حه‌تا هنده‌ك راستی ژی بن دڤێت به‌رپرساتیا خوه‌ یا مرۆڤی و ره‌وشتی ژبیر نه‌كه‌ت.
مه‌راقا زانینا تشتان ژ هه‌می كه‌سان و ژ هه‌می شۆلان و ژ هه‌می مژاران یا بوویه‌ ئێشه‌كا گران و كوور ل ده‌ف تاكێن جڤاكی هه‌میێ، ئه‌ڤه‌ نیشانێ باشیێ نینه‌، و یێ مه‌راق ژی دكه‌ت قه‌ت ل هیڤیا گوهلێبوونا تشته‌كێ باش و یێ خێرێ نینه‌، به‌لكی گوهێ وی به‌س یێ ل هیڤیا دانانا موركا قوبحه‌ت و خرابیێ ل سه‌ر ڤی و یێ دی، ڤێجا دا ئه‌و ژی وه‌كی خوه‌ ڤه‌گوهێزیت، ماشا الله‌ ب خێرا تۆرێن جڤاكی یێن ئه‌نترنێتێ ژی دیوانا هه‌میان یا تژی یه‌. ئه‌و نه‌مه‌زنیه‌ مرۆڤ نێچیرڤانێ شاشی و خه‌له‌تیێن جڤاكی و پێكهاتێن جڤاكی بیت، پاشێ ببیته‌ حاكمێ ره‌فتارا وان، ده‌ستخۆشی و لایكێن تۆرێن جڤاكی ڤێ ره‌نگێ ره‌فتارێ حه‌لال ناكه‌ن، دڤێت مرۆڤ پێ نه‌ خاپیێت.

10

چیرۆكا په‌یكه‌رێ (بودا) ئه‌وێ ژ زێری هاتیه‌ چێكرن، و نها د ئێك ژ په‌رستگه‌هێن پایته‌ختێ تایله‌ند (بانكۆك) دایه‌، زۆرا سه‌یره‌.
دووماهیا سالێن پێنجیان كاهنێن په‌رستگه‌ها بودیان نه‌چاربوون په‌یكه‌رێ بودا ئه‌وێ ژ تابۆگ و هه‌ریێ هاتیه‌ چێكرن ڤه‌گوهێزن بۆ جهه‌كێ دی، لێ په‌یكه‌رێ گران ده‌رزی و تیك تیك بوو، دترسیان خراب بیت یان بهه‌ڕفیت، زڤراندنه‌ جهێ وی ڤه‌.
ب شه‌ڤ كاهنه‌كی دیت تیشكه‌ك یا ژێ دچیت، چه‌كۆچه‌ك ئینا دا سه‌حكه‌تێ كا چ برسقینه‌ ژ تیكه‌كا وی ده‌ردكه‌ڤیت، ژ نشكه‌كێ دیت كو په‌یكه‌ره‌كێ زێر یێ دبن وان تابۆگان دا نخافتیه‌.
پاشێ دیرۆكڤانان دیاركر كو د شه‌رێ سیام (تایله‌ندا نوكه‌) و بۆرما دا ب سه‌دان سالان كاهنێن په‌رستگه‌هێ په‌یكه‌رێ زێر ب تابۆگ و هه‌ڕیێ نخافتبوو دا نه‌كه‌ڤیته‌ ده‌ستێ دوژمنان، لێ هه‌می كاهن هاتبوونه‌ كوشتن، نهێنیا په‌یكه‌رێ ڤه‌شارتی مابوو هه‌تا پێكۆلا ڤه‌گوهاستنا وی هاتیه‌ كرن..
دێ زڤرینه‌ ڤه‌خوه‌ نیاسینێ، كلیلا ده‌سپێشخه‌ریان، كار و بزاڤان، ره‌وشت و هه‌ستا به‌رپرساتیێ، چاره‌یا ئێك ژ مه‌زنترین ئارێشان، ئارێشه‌ ژی ئه‌وه‌ ده‌مێ مرۆڤ سامانێ خوه‌ یێ راسته‌قینه‌ نه‌بینیت، نه‌زانیت، ل دووڤ نه‌چیت، هه‌ست پێ نه‌كه‌ت و به‌روڤاژی هه‌ست ب كێماسی و كێمدیتنێ بكه‌ت، كه‌س نینه‌ تووشی شاشی و خرابیێ نه‌ببیت، به‌س دڤێت بزانین كو ژ ناڤدایا مه‌ سامانه‌كێ مه‌زن و ب بها یێ هه‌ی، ئه‌م مرۆڤین، مه‌زنێن گه‌ردوونینه‌، جانشینێن خودێنه‌، ژ ڤان ره‌فتارێن ئه‌م خوه‌ پێڤه‌ مژوول دكه‌ین گه‌له‌ك بلندترین، ره‌فتارێن ئێك نه‌ڤیان و قه‌بوولنه‌كرنێ، یێن كه‌ربوكین و چاڤپێنه‌رابوونێ، یێن فێلبازی و زیانگه‌هاندنێ، یێن ئه‌زمان ره‌شی و پتپت و كه‌شه‌فرێتیێ، یێن زێره‌ڤانیا چه‌وتی و خه‌له‌تیێن خه‌لكی،
كا چاوا پشتی بۆرینا ده‌مێن درێژ و گوهۆرینێن بنه‌ره‌ت ل سه‌ر ژیانا خه‌لكی دا دئێن پێدڤی ب گوهۆرینا یاسایه‌، یاسایێن نه‌ گونجن بهێنه‌ لادان و ل جهێ وان یێن گونجای و ل دووڤ پێدڤیێن خه‌لكی بهێنه‌ دانان، ب ڤی ره‌نگی دڤێت یاسایێن ده‌روون و سه‌ر و دلێن خوه‌ بگوهۆرین، ده‌م گه‌له‌ك یێ ب سه‌ر یاسایا ته‌مبه‌لیێ و ل دووڤئێك چوونێ و چاڤ پێنه‌رابوونێ و به‌حسكرنا ئێكودو و…ڤه‌ چووی، ده‌مێ یاسایا ب كێر خوه‌ هاتنێ یه‌، ده‌مێ یاسا یا كار و لڤین و هاریكاری و ڤیان و دلفره‌هیێ یه‌، چونكو ئه‌م گه‌له‌ك ژ وێ مه‌زنترین یا ئه‌م خوه‌ پێ دبینین، ئارێشا مه‌ ئه‌م سامانێ خوه‌ نزانین و سه‌ر نا هلبین و مه‌ باوه‌ری پێ نینه‌ و خه‌مێ ژێ ناخۆین، ژ به‌ر وێ ئه‌م رێك و رێكار و یاسایێن مفا دیتن ژ وی سامانی ناگرینه‌ به‌ر.
به‌رێ دابێژن ئه‌گه‌ر برین گه‌هشته‌ هه‌ستی بریار و ره‌فتار هه‌می دئێنه‌ گوهۆرین، ئانكو هێز و تێهنه‌كا دی ژ وی دیار دبیت، دبیت به‌ری هینگی ئه‌و هزر نه‌كربیت و نه‌زانیت كو د شیان دایه‌ هه‌می بزاڤ و ره‌فتارێن خوه‌ ١٠٠٪ بگوهۆریت هه‌كه‌ خوه‌ مه‌جبوور ببینیت و بڤێت، له‌وما ل ڤێرێ دێ بێژم د نه‌خۆشترین ده‌راڤ دا و دبن بارێ ئالۆزی و قه‌یران و ئارێشێن جه‌رگبر ژی دا مرۆڤ دشێت هه‌ر چنه‌بیت ژ نه‌چاری سامانێ خوه‌ یێ ڤه‌شارتی و پشتگوه هاڤێتی بینته‌ ده‌ر و ١٠٠٪ رێ ره‌وا خوه‌ یا ژیانێ بگوهۆریت ل گه‌ل خوه‌ و ده‌ورو به‌رێن خوه‌ ژی..

24

رێڤنگه‌ك ل گونده‌كی راوه‌ستیا و نه‌زانی كیڤه‌ بچیت، وه‌سا دیت كو رێیا خوه‌ یا به‌رزه‌ كری، سه‌رێ خوه‌ ژ ترومبێلا خوه‌ ئینا ده‌ر و گازی جۆتیاره‌كی كر، جۆتیار به‌ر ب ویڤه‌ هات، ده‌مێ نێزیك بووی رێڤنگی گۆتێ (ئه‌ز پێدڤی هاریكاریا ته‌مه‌ من رێیا خوه‌ یا به‌رزه‌كری)
جۆتیاری باش به‌رێ خوه‌ دا ڤی زه‌لامی و پاشێ پسیار ژێ كر(تو دزانی نوكه‌ تو ل كیڤه‌یی؟).. گۆتێ (به‌لێ، من ناڤێ گوندێ وه‌ ل سه‌ر تابلۆیا سه‌رێ رێكێ دیت).
جۆتیاری سه‌رێ خوه‌ هژاند و گۆتێ (تو دزانی ته‌ نیازا كیڤه‌ هه‌یه‌؟ دڤێت بچیه‌ كیڤه‌؟)
گۆتێ (به‌لێ) و جهێ دڤیا بچیتێ بۆ جۆتیاری گۆت،
جۆتیارێ گۆتێ (پشتراستبه‌ تو نه‌یێ به‌رزه‌یی، تو به‌س هه‌وجه‌یی رێنیشاندانێ یی)!.
مرۆڤ هنده‌ك جاران زیكا بریارێ ل سه‌ر خوه‌ دده‌ت، ب تایبه‌ت ده‌مێ ل خوه‌ و ده‌وروبه‌رێن خوه‌ دنێریت و تشتێ ب دلێ خوه‌ نه‌بینیت، ده‌مێ مرۆڤ دكه‌ڤیته‌ كراسه‌كێ ته‌نگ دا، كاودان به‌روڤاژی ڤیانا مرۆڤی برێڤه‌بچن، هینگی رامان ئه‌و نینه‌ مرۆڤ به‌رزه‌ بوو و زڤرین بۆ رێره‌وا خوه‌ یا راست یا ب زه‌حمه‌ت كه‌فتی، دبیت پیچه‌ك مرۆڤ هه‌وجه‌ی هنده‌ك كه‌سێن دی بیت، ئاقل بده‌نه‌ مرۆڤی، رێك و چاره‌یا درست داننه‌ به‌ر چاڤێ مرۆڤی نه‌راست هاتنا كاودانان، خه‌له‌تبوون، لادانا ژ جادا خوه‌ هه‌می عه‌یبداری نینه‌ و ژ ده‌ستدانا به‌خت و ده‌لیڤا سه‌ركه‌فتنێ نینه‌، شه‌رمزاری ب تنێ ئه‌وه‌ ده‌مێ مرۆڤ ژخوه‌ نه‌گریت پسیار بكه‌ت، د دلێ خوه‌ دا دزانیت كو ئێكێ دی یێ هه‌ی شاره‌زا یه‌ و شۆلی دزانیت و سه‌ركه‌فتیه‌، لێ ب ده‌ڤ و ژیوارێ خوه‌ وێ راستیێ قه‌بوول نه‌كه‌ت و د زكێ وی ناچیت خوه‌ هه‌وجه‌ بكه‌تێ، یا ژ وی ڤه‌ دێ ب چاڤه‌كێ كێم ئێته‌ دیت و دێ ئێته‌ دیتن لاواز، ڤێجا دێ چاوا ل سه‌ر خوه‌ قه‌بوول كه‌ت كو خوه‌ بێ بها و رێز ببینیت، دبیت یێ نه‌هه‌ق نه‌بیت ده‌ما ڤان هه‌می هزران بكه‌ت، چونكو ئه‌و ژی ئێك ژ ئه‌ندامێن ڤی جڤاكیه‌، واته‌ هزرا جڤاكی یا دابه‌شكریه‌ ل سه‌ر هه‌می تاكێن جڤاكی، ئانكو ئه‌و هزرا ئه‌و دكه‌ت و د سه‌رێ وی دا هه‌ی هزرا هه‌می تاكێن جڤاكی یه‌ و د سه‌رێ وان دا ب ره‌نگه‌كی ژ ره‌نگا یا هه‌ی، به‌رزه‌بوونا راست ئه‌ڤ ره‌نگێ هزركرنێ یه‌ و پێنگاڤا راست ژی خوه‌ قورتالكرنه‌ ژ ڤێ هزرێ، دبیت بێته‌ گۆتن كو جڤاك ب سه‌ر و بنڤه‌ ب كه‌سه‌كی نا ئێته‌ گوهۆرین، هه‌كه‌ ئه‌ز ب ڤی ره‌نگی ژی سه‌ره‌ده‌ریێ بكه‌م هه‌ردێ ب مه‌ ئه‌ز ب تنێ و دیتنا كێم دێ بۆ من هه‌ر هه‌بیت، ئه‌ز دبێژم سه‌ر خاترا خوه‌ خوه‌ ژ ڤێ هزرێ قورتال بكه‌، ل دووڤ خوه‌ هه‌ره‌، پسیارا خوه‌ و سه‌ركه‌فتنا خوه‌ و كارێ راستێ خوه‌ و سه‌ره‌ده‌ریا درست یا خوه‌ ژ هه‌ر كه‌سه‌كی بكه‌، داخوازا رێ نیشاندانێ بكه‌، هزرا خوه‌ د خوه‌ و ره‌فتار و كار و سه‌ركه‌فتنا خوه‌ ب تنێ دا بكه‌، هزرا خوه‌ د یێ به‌رانبه‌ر دا نه‌كه‌ كا دێ ب چ چاڤ به‌رێ خوه‌ ده‌ته‌ ته‌، دێ چ هزر كه‌ت بۆ ته‌، ئه‌م دێ وه‌سا هزركه‌ین كو ب چاڤه‌كێ نه‌ درست و كێم تو دیتی، د وی ده‌می دا ئه‌وێ د ئارێشه‌كا دی دا، ئه‌وا جڤاك تووش بوویێ، باره‌كه‌ یێ بۆ خوه‌ چێ دكه‌ت ئارێشا وی یه‌، بلا دلێ مه‌ ب وی ڤه‌ بیت یێ ب ده‌ستێ خوه‌ و بێ هه‌وجه‌یی بۆ خوه‌ ڤی باری چێدكه‌ت، یا گرنگ بۆ مه‌ ئه‌وه‌ ئه‌م بشێن مفا ژ ئاقل و رێنیشاندانا هه‌ر كه‌سی وه‌ربگرین خوه‌ هه‌كه‌ بچیكه‌ك ژی بیت قه‌ت ب چاڤێ كێم نه‌بینین.

12

سه‌رێ چیایێ لۆنجیزك (كولۆرادو) داره‌كا مه‌زن و ناڤدار هه‌بوو، دیرۆك پێ دئاخفت، دبێژن چارسه‌د سالان ژییا، (كریستۆف كۆلۆمبوس) ده‌مێ هاتیه‌ وێ ده‌ڤه‌رێ داره‌كا بچیك بوو، ئه‌و مر و دار نه‌مر، دار كه‌فته‌ به‌ر گه‌له‌ك هێرشێن سروشتی و با و بارۆڤه‌ و ئاگرێ بریسیان، هه‌میان هه‌ڤركیا وێ كر، لێ دار وه‌ك خوه‌ ما و كارتێكرن لێ نه‌هاته‌ كرن پاشێ هنده‌ك (حشره‌) وه‌كی مێریا كه‌فتنێ، دارا خوه‌ ل به‌ر هه‌می هێرشا پاراستی ڤێ (حشر) ێ ب هاریكاریا هه‌ڤالا خوه‌ دار ل ئه‌ردی دا، دفن بلندی و خوه‌ مه‌زنكرن بۆ نه‌هێلا. ل گۆر راستیێن ژیانێ بارا پتڕ ژ ئارێشێن مرۆڤی دئێخن و ژیانا مرۆڤی شێلی دكه‌ن، ئه‌و پرسگرێكن یێن مرۆڤ چ هزران بۆ ناكه‌ت هندی ل به‌ر چاڤێن مرۆڤی دبچووكن، مرۆڤ دێ وه‌سا هزركه‌ت كو هنده‌ك تشتێ گرنگ و مه‌زن یێ هه‌ی و دڤێت خه‌ما وی ئه‌و بیت و نزانیت ژ ناڤدا یێ كرمی دبیت و دبیت ببیته‌ قوربانێ خه‌مساریا تشتێ نه‌به‌ركه‌فتی (وه‌ك ئه‌و هزر دكه‌ت) د ڤێ ژیانێ دا و هه‌ر تشتێ گرێدان ب وێ ڤه‌ تشتێ نه‌به‌ركه‌فتی و نه‌ گرنگ نینه‌، تشتێ هه‌ی ئه‌م بچووك دبینین به‌س ژیێ ئه‌م مه‌زن دبینین گه‌له‌ك گرنگتر و كاریگه‌رتره‌، هه‌ر كه‌سێ ژ تشتێ بچووك ده‌ستپێبكه‌ت ئه‌وی راست و درست ده‌ستپێكر، چونكی ئه‌و ئارێشه‌ یان ئه‌و كار وه‌ك قه‌باره‌ و كار یێ بچووكه‌ و هه‌كه‌ نه‌ د كارتێكرنا خوه‌ دا یێ مه‌زنه‌ دێ ئێكی بینی گه‌له‌ك گازنده‌ یێن هه‌ین ژ مرۆڤ و كاودان و هند جار دگه‌هیته‌ سنۆرێن بێ هیڤیبوونێ، گازنده‌ ل دووڤ گازندێ، مرۆڤ دێ ل دووڤ چیت دێ بینی ئارێشه‌ نه‌ ل وی ئاقاریه‌ یێ وی به‌حس لێكری، پیچه‌ك مرۆڤ لێ ڤه‌كۆلیت و ب زانینێ ل دووڤ بچیت دێ دیار بیت كو هه‌كه‌ ئێك هه‌بیت گازنده‌ ژێ بهێنه‌ كرن هه‌ر ئه‌و بخوه‌یه‌، چونكی تشێ راست و ب دورستی گرێدایی ژیانا وی هه‌می ئه‌و ئارێشه‌نه‌ یێن ئه‌و بخوه‌ پێ حاكم بوو، د شیانێن وی دا بوون، به‌س چونكو ل ده‌ف وی د بچووكن گوهێ خوه‌ نه‌دایێ، هه‌تا ڤه‌رێژا وان دیتی گه‌له‌كا مه‌زن ژنوی نه‌شێت ڤه‌گه‌ریته‌ سه‌ری ڤه‌، ڤێجا تشتێ ب ده‌ستی مای به‌س گازنده‌نه‌، تشتێ هه‌ر ئێك ژ مه‌ دشێت بكه‌ت مه‌ كربا، ئارێشا هه‌ر ئێك ژ مه‌ دشێت چاره‌ بكه‌ت مه‌ چاره‌كربا دابینی ٨٠٪ ئارێشێن مه‌ چاره‌ سه‌ربوون، چونكی ب ڤێ رێژێ ئارێشێن مه‌ هه‌می دبچووكن وه‌ك قه‌باره‌ و دشیانێن مه‌دانه‌، هه‌كه‌ هنده‌ك د مه‌زن ژی بن و دبن شیانێن مه‌دا نه‌بن هه‌ر ئه‌ون یێت بچووك ل ده‌سپێكێ و مه‌ پووته‌ پێ نه‌كریه‌ و یێ ژ به‌ر ده‌ستێ مه‌ ده‌ركه‌فتی و خه‌مساریا مه‌ یێن مه‌زن كری و نوكه‌ ئه‌م دكه‌ین ناكه‌ین نزانین دێ چ رێك به‌ینێ، ڤێجا رێیا ژ هه‌میان ب ساناهیتر تومه‌تێ پالده‌ین بۆ هنده‌كێن دی، هه‌ر كه‌سێ ته‌دیت یێ ب ده‌ڤگازنده‌یه‌ ژ ڤی و یێ دی و كاودانێ خوه‌ یێ خراب ژی هه‌می كره‌ ستویێ هنده‌كێن دی وێ گاڤێ بزانه‌ یێ دره‌ڤیت ژ به‌رپرساتیێ، بێ جساره‌ته‌ و بێ باوه‌ره‌ بخوه‌، به‌س پا كه‌س هندی وی ژی زیانێ ناگه‌هینته‌ وی، چونكو گرنگیێ جه ل ده‌ف وی نه‌بوویه‌ بۆ تشتێ كاریگه‌ر.

13

هنده‌ك زێره‌ڤانێن كنارێن ده‌ریایان مژوولی ئه‌ركێ خوه‌ یێ زێره‌ڤانیێ بوون، ژ نشكه‌كێڤه‌ تشته‌ك د ناڤا ده‌ریایێ دا دیت، نه‌ شیان خوه‌ بگرن ئێكسه‌ر كرنه‌ هه‌وار و ئاگاهیێن خوه‌ دان كو گه‌میه‌كا شه‌ری دیار بوو یا به‌ر ب وانڤه‌ دئێت. پێنج خوله‌ك ده‌رباز بوون دیار بوو ئێكه‌ ژ گه‌میێن ڤه‌گوهاستنا رێڤنگ و پۆستان یێن بچووك، پاشێ بوو قایقه‌كا بچیك، پاشێ ده‌ركه‌فت چۆپ، ل دووماهیێ و پشتی نێزیكی وان بووی ده‌ركه‌فت ئه‌و دارك و قرشك یێن پێلێن ئاڤێ ل گه‌ل خوه‌ دئینیته‌ ده‌راڤێن ده‌ریای.
ئێشا مه‌زنكرنا تشتان زێده‌تر ژ قه‌بارێ خوه‌ ژ ده‌روونه‌كێ نه‌یێ ساخله‌م ده‌ردكه‌ڤیت و ڤه‌رێژه‌كا خراب یا هه‌ی ل سه‌ر تاك و جڤاكی، به‌رێ دا مه‌ گوهلێبیت ل گونده‌كی ئێكێ هه‌ی دبێژنێ ره‌شه‌چی، نه‌ دبرنه‌ نێچیرا و زباران، خوه‌دێ نه‌كربا ئاریشه‌ك چێببا دا بێژن ده‌وله‌ت سه‌رێ فلانكه‌سی ژ مێشێ كره‌ گامێش، لێ نها دبینین ڤێ نه‌خۆشیێ رهێت خوه‌ یێن به‌ردایه‌ ناڤ پتریا تاكێن جڤاكی، زوو حوكمی ل سه‌ر تشتان و كه‌سان دكه‌ن، بلا نه‌ دپشتراست ژی بن، قازانجێ خوه‌ ژی دهاڤێژنه‌ سه‌ر، چنكی نوكه‌ ئه‌ز ژی وه‌ختێ ڤێ نڤیسێ پێشكێشی هه‌وه‌ دكه‌م، دێ هه‌ولده‌م ژ نك خوه‌ پیچه‌كا دی تام ده‌م دا خوه‌شیێ ژێ ببینن و بۆ هه‌وه‌ ببیته‌ قه‌ناعه‌ت، ب ڤی ره‌نگی هه‌ر ئێكێ تشته‌كی ڤه‌گوهێزیت ب تایبه‌ت یێن نه‌ دیتی و چ نه‌زانن گه‌له‌ك د به‌رڕا دچن.
كورێ ئێكی یێ ژ ده‌رڤه‌ دێ په‌یوه‌ندیێ ب مالا خوه‌ كه‌ت حه‌زدكه‌ت بێته‌ڤه‌، مالا وان دێ بێژیتێ نه‌نه‌ به‌حسێ هه‌ی دێ تشت گرانبن نه‌ئێ، یان به‌حسێ فلان ئارێشێ د ناڤبه‌را فلان و فلانان دا یێ هه‌ی مادێ چاوا هێی!
د بنیات دا دڤێت وه‌كی مرۆڤێن دونیایێ هه‌میێ هه‌ر كه‌س یێ مژوولی كارێ خوه‌با، گه‌له‌ك ل دۆر خوه‌ نه‌زڤریبا كا چ هه‌یه‌ و كێ چ گۆت، ئه‌ركێ مرۆڤی چیه‌ ل به‌رانبه‌ر مال یان جهێ كارێ مرۆڤی بلا ئه‌و سنۆرێن مرۆڤی بن، گۆتن و ده‌ربرین و حوكم دانێن مرۆڤی هه‌می بلا د وی بازنه‌یی دابن، به‌س دونیایه‌ هه‌كه‌ دیتن و هزرا مه‌ دوورتر چوو یان مه‌ ئارێشه‌ك یان روودانه‌ك دیت یان گوهلێبوو، بلا ئه‌م مه‌زن نه‌كه‌ین، بۆ خودانێن وێ بهێلین، هند مه‌زن نه‌كه‌ین ڤێجا گومان بۆ خودانێن ئارێشێ ژی چێبیت خوه‌ وسا ببینن ئێدی چ رێك ناچنێ،
دڤێت ئه‌م بشێنه‌ ئارێشان، ل به‌ر خوه‌ مه‌زن نه‌كه‌ین، بلا ترسا كاودانا پالده‌رێ چاڤ ڤه‌كرنێ و پتر خوه‌ ئاماده‌كرنێ بیت، كاودانێن ئابووری سیاسی جڤاكی به‌رپرسیا مه‌ هه‌میان نه‌ هه‌ر ئێك ل جهێ خوه‌، رێ و پلانان درست ژی یا سه‌ركه‌فتنێ ل سه‌ر كاودانان ئه‌وه‌ تو ئارێشێ بچووك ببینی خوه‌ هه‌كه‌ یا مه‌زن ژی بیت، ژ مێژه‌ كه‌سێن شاره‌زا هه‌ر ب ڤی ره‌نگی گۆتیه‌ كو هه‌كه‌ ته‌ بڤێت قه‌بارێ ئارێشێ بزانی پسیارا چاڤێ خوه‌ بكه‌، تو مه‌زن ببینی یا مه‌زنه‌، بچیك ببینی یا بچیكه‌..

18

سه‌ربازه‌كێ ئنگلیز ل كه‌ره‌كی سوواربوو دا پێ بگه‌هیته‌ بنه‌جها خوه‌ ل تاخێ عه‌باسیێ ل وه‌لاته‌كێ عه‌ره‌بی، د وی ده‌می دا ترومبێل نه‌بوون، خه‌لكی بۆ خوه‌ كه‌ر ب كرێ دگرتن پێ دهاتن و دچوون، خودانێ كه‌ری ژی دووڤ كه‌رێ خوه‌ را دچوو و قه‌سێن كرێت دگۆتنه‌ سه‌ربازێ ئنگلیز، یێ پشتراست بوو كو تێناگه‌هیت ژ به‌ر هندێ چ هاتبا به‌ر ده‌ڤێ وی دگۆتێ، كابرایه‌ك د به‌ر را بۆری و دیت یێ خه‌به‌رێن پیس دبێژیته‌ سه‌ربازی، رابوو ب زمانێ سه‌ربازی گۆتێ ئه‌رێ تو دزانی ئه‌ڤ كابرایێ ته‌ ب كه‌رێ خوه‌ دگه‌هینیت چ دبێژیته‌ته‌؟ گۆتێ: نه‌، گۆتێ یێ ڤان خه‌به‌ران دبێژیته‌ ته‌، سه‌ربازی پسیاره‌ك ژێ كر و گۆتێ: ئه‌رێ ئه‌و تشتێ ئه‌و دبێژیته‌ من دێ بیته‌ رێگر كو به‌گه‌همه‌ ده‌ڤه‌را من دڤێت؟ گۆتێ:نه‌، گۆتێ: پا بلا به‌رده‌وام بیت چ دڤێت بلا بێژیت، یاگرنگ ئه‌ز بگه‌همه‌ ئارمانجا خوه‌… جارێ یا ژ هه‌می تشتان گرنگتر ئه‌وه‌ هه‌ر ئێك ژ مه‌ ئارمانجه‌ك هه‌بیت، هه‌كه‌ ئێك پسیاره‌كێ ژمن بكه‌ت و بێژیته‌ من مه‌زنترین و مه‌ترسیدارترین ئارێشا گه‌نجا،كچان،كوڕان،چیه‌؟ بێ دو دلی دێ بێژمێ به‌ری هه‌میان و گرنگتر و ب ترستر ژ هه‌میان ده‌مێ چ ئارمانجێن به‌رچاڤ د ژیانا خوه‌دا نه‌بن، نه‌زانیت چ دڤێت، دێ گه‌هیته‌كیڤه‌، یێ د ناڤ گوهۆرینێن ژیانێ دا به‌رزه‌بیت، بێ ب مفا شه‌ڤ و رۆژێن خوه‌ ده‌رباز بكه‌ت، ناسناما خوه‌ نه‌زانیت، بێ گومان هه‌ر بزاڤ و لڤینه‌كا بكه‌ت ژی دێ لادان و ڤارێبوون بیت ژ رێك و رێكارێن درست، ئانكو بێ ئارمانجی ماكا ئارێشانه‌ لێ ل دووڤ روودانا ل سه‌ری من ئینای، هه‌ر كه‌سه‌كی كاره‌ك یێ هه‌ی ژیانا خوه‌ پێ ببه‌ته‌ سه‌ری، خوه‌ هه‌كه‌ ناڤێ ئارمانجێ ژی نه‌زانیت، لێ ئه‌م هه‌می ب شۆل و بێ شۆل راستی دیتن و گۆتنێن ده‌ردورێن خوه‌ دبین، كێم كه‌س د ناڤ جڤاكێ مه‌ دا ب سلامه‌تی د رێیا خوه‌دا دچن،دكه‌ڤنه‌ به‌ر هێرشێن بێ دلۆڤانی یێن خه‌لكی، جارێ ئێشه‌كا گرانه‌ و ڤایرۆسه‌كێ پیسه‌، گه‌له‌ك هیڤی و ئۆمێد ب ئه‌گه‌را زمانێ خه‌لكی یێن مری، گه‌له‌ك شیان یێ ب هه‌ده‌ر چووین، گه‌له‌ك داهێنانكار نه‌شێن ژ به‌ر مایتێكرن و زمانێ خه‌لكی وه‌كی وان دڤێت داهێنانا خوه‌ پێشكێش بكه‌ن، چ د هونه‌ریی بن، یان جڤاكی، هزری، یان هه‌ر لایه‌كێ ژیانێ جارێ هه‌تا كونترۆلا ڤێ ئێشێ بێته‌كرن و جڤاك ده‌ست ژ ڤی سروشتی به‌رده‌ت زۆرا ب زه‌حمه‌ته‌، به‌س بۆ كه‌سێن كو تشته‌ك هه‌بیت و ئارمانجا خوه‌ ده‌ستنیشان كربیت و بۆ خوه‌ پلان دانابن بلا به‌رێ وی ل هیڤیا وی بیت، ماده‌م باوه‌ری ب هیڤیا خوه‌ هه‌یه‌ و دبینیت راسته‌، چ هاته‌ گۆتن بۆ خوه‌ نه‌كه‌ته‌ خه‌م، ئاخفتن و قه‌سێن نه‌خۆش به‌س رێگریێ ل ئاقل و چاڤێن خوه‌ دانێت خوه‌ دكه‌ن زێده‌تر نه‌ڤه‌بن و ل جهێ خوه‌ راوه‌ستن، هه‌قه‌ مرۆڤ حێبه‌تی ببیت ژ هنده‌ك خودان ئارمانجان، ل جهێ ئارمانجا خوه‌ ب جهبینن ئارمانجا خه‌لكی ب جهتدئینن، وان سه‌ردئێخن ده‌مێ دكه‌ڤنه‌ د بن كاریگه‌ریا گۆتگۆتك و ئاخفتنێن وان ڤه‌، یاراست به‌روڤاژی یه‌.

website security
Facebook Auto Publish Powered By : XYZScripts.com