NO IORG
Authors Posts by هه‌يفا دوسكي

هه‌يفا دوسكي

هه‌يفا دوسكي
20 POSTS 0 COMMENTS

33

ره‌نگه‌ بابه‌ت پیچه‌ك یێ ئالۆز بیت بۆ خواندنێ، تایبه‌ت ژ لایێ خوێنده‌ڤانێ زه‌لام ڤه‌، ژ به‌ر كو بۆ زه‌لامى نه‌خه‌مه‌ یان هه‌ر نه‌ڤێت هزرێ ژى تێدا بكه‌ت كا چ ئاسته‌نگى درێیا ژنان دا هه‌نه‌، پێنه‌ڤێت ئه‌ڤا ئه‌ز دبێژم نه‌ بۆ هه‌مى زه‌لامان، ئه‌و زه‌لامێن هێشتا عه‌شایرگه‌ریێ ده‌مارێن وان به‌رنه‌داین و رێ ل پێشكه‌فتنا ژنێ دگرن.
بێده‌نگیا ژنێ ل سه‌ر گه‌له‌ك ماف و ئه‌ركێن پێدڤى یێن رۆژانه‌ و یێن پاشه‌رۆژێ جاران مرۆڤى دلگران دكه‌ن، به‌لێ راستیا ئه‌م پێ دلخۆش دبین، هه‌ر گۆهرینه‌كا جڤاكى و ئابوورى و سیاسى رووبده‌ت، چ پێ نه‌ڤێت ژنێ پشكداریا تێدا هه‌ى و ئه‌م یێ هه‌ولا هندێ دده‌ین ژن، خودان ئیراده‌یه‌كا ب هێز بیت د ناڤ هه‌ر كاره‌كێ بیت، ژبه‌ر بێده‌نگیا ژنێ، ته‌په‌سه‌ركرنا ژنێ د هه‌ر بزاڤه‌كا ژیانێ دا نه‌ ب تنێ ئه‌و ژنا د ناڤ ده‌ستهه‌لاتێ دا، به‌لكو هه‌ر ژنه‌كا دبیته‌ نوونه‌را خێزانه‌كێ و دایكا هه‌ر مێیه‌كا دهێته‌ دونیایێ، به‌لكو ژى د بنیاتێ هه‌ر توخیبه‌كێ پێشكه‌فتنا ژن تێدا بیت بۆ ره‌گه‌زێ نێر یا گرانه‌ ژن ببیته‌ خودانا ده‌ستهه‌لاته‌كا ب هێز ل وه‌لاتى و ئه‌م ژى ژڤێ بارۆڤێ دبێ به‌هر نینین و ب سه‌دان و ب هزاران ژن د سالێن بوورى و یێن نوكه‌ یێ سه‌رێ خوه‌ ژبۆ ڤێ چه‌ندێ ددانن ئاخێ، لێ تشتێ دلێ مرۆڤى پێ گه‌شبین دبیت ئه‌وه‌ ژنا كورد ل كوردستانێ ئێدى به‌ر ب باشتر یا هه‌ول ده‌ت، ئه‌و شیان و هێزا هه‌یى بده‌ته‌ كارى كو شیانا د جانێ وێ دا ببیته‌ كارى و ژبۆ سه‌ركه‌فتنا پرسا ژنێ سه‌ربكه‌ڤیت، یا ژ ڤێ پتر ئه‌م ل سه‌ر راوه‌ستین، ئه‌وه‌ ئه‌م جاران د گومانێ دا دژین ئه‌رێ ژن ل كوردستانێ دێ به‌ر ب كیڤه‌ ده‌ته‌ رێ؟، چونكو هێشتا ئه‌م ژن مژوولى هندێنه‌ كه‌س ل به‌راهیا مه‌ ژنان نه‌كه‌ڤیته‌ كاروانى و ئه‌م دژاتیا ئێك بكه‌ین و نه‌هێلین هه‌ڤال و كه‌سان ل دۆرێن مه‌ بهێته‌ پێش و ئه‌و پێ ئالینك و ئاسته‌نگان بۆ په‌یدا دكه‌ین، دا كو بمینته‌ ل پشت مه‌ و ئه‌م ترسین ئه‌و مه‌ بهێلیت و ئه‌م د جهێ خوه‌ دا بمینین، له‌ورا ژى باشه‌ ئه‌گه‌ر ئه‌م هه‌ڤركیا پێشكه‌فتنێ بكه‌ین، به‌لێ نه‌ هه‌ڤڕكیا شكاندنا ئێك و دروستكرنا هنده‌ك تۆمه‌تێن نه‌ به‌رئاقل د ناڤ جڤاكى دا، تشتێ گرنگ ئه‌وه‌، سه‌ركه‌فتنا هه‌ر ژنه‌كێ سه‌ركه‌فتنا ژماره‌كا ژنانه‌ ل كوردستانێ و ئه‌م پێدڤى پشته‌ڤانیا ئێكین بۆ سه‌ركه‌فتنا پرسا ژنێ، ژ به‌ر خوه‌ ناسكرن و خوه‌ ئاڤاكرن بۆ پتر به‌ر ب پێش گه‌له‌ك یا ب زه‌حمه‌ت نابیت و باشتره‌ ئه‌م هه‌ولا سه‌ركه‌فتنا ئێك بكه‌ین د هه‌ر قووناغه‌كا ژیانێ دا دا كو حوكمه‌ت و ده‌ستهه‌لات ژى ئه‌و په‌ڕێ باوه‌ریێ د ناڤ هه‌ر كاره‌كى جڤاكى و ئابوورى و سیاسى دا باوه‌ری ب هێزا ژنێ هه‌بیت و ل دووماهیا ڤێ گۆتارێ ژى وه‌ك په‌یامه‌ك بۆ هه‌مى ژنان، به‌رۆكێ مه‌ د ناڤ جڤاكى دا گه‌له‌ك یێ به‌رفرهه‌یه‌ و گه‌له‌ك كار ل سه‌ر ملێن مه‌یه‌ ئه‌م مافێن ژنان و هزرا جڤاكى ل به‌رامبه‌رى ژنان بگوهۆرین و ئه‌گه‌ر مه‌ ژنان بخوه‌ ژى هه‌ڤڕكى ل گه‌ل ئێك هه‌بیت، پێنه‌ڤێت ئه‌و به‌رۆكێ من ژێ به‌حسكرى دێ ب زه‌حمه‌تر كه‌ڤیت و دێ زێده‌تر ماندى بین هه‌تا ئه‌م بشێین وه‌ك ژن و چالاكڤانێن ژن، ل سه‌ر مافێن ژنان باخڤین.

23

بابه‌تێ پێشكه‌فتن و پاشكه‌فتنا ژنێ، زێده‌تر د ڤان ده‌هـ ساله‌كێن دووماهیێ دا په‌یدا بوویه‌، تایبه‌ت پشتى سالێن حه‌فتییان ده‌ما خواندن و زانین به‌ربه‌لاڤبووى. ئه‌و بابه‌تێن بووینه‌ ئه‌گه‌ر ژى زێده‌تر كو ژن یا پاشڤه‌ماى بیت یان ئه‌گه‌ر باشتر بێژم كو ب زه‌لامى را نه‌ گه‌هشتبیت، ئه‌م دشێین بكه‌ینه‌ دو خال، ئێك: خواندن و زانین، ده‌ما رێ بۆ كورى هاتیه‌ دان كو بخوینیت و بچیته‌ قوتابخانێ، ل ڤێره‌ ئه‌و ده‌رفه‌ت بۆ كورى په‌یدا نه‌بوو، ئه‌و هه‌ڤسه‌نگیا به‌رى هینگێ د ناڤبه‌را زه‌لامى و ژنان دا هه‌ى، كو هه‌ردو نه‌خونده‌وار بوو، پێكه‌ دچوونى ئاقارى و پێكڤه‌دچوونه‌ چیایى گیایێ بهارێ و كه‌زان و گهیشكا و هه‌تا هه‌شكا و داران ژى یانكو ئێك ئاستییا هه‌ردویان و ئێك ئاستیا دنیادیتیا هه‌ردویان ئه‌گه‌ره‌كێ ب هێز بوو كو باوه‌ریا وان ب ئێك زێده‌تر بیت و رێزێ ل بۆچوون و دیتنێن ئێكدو بگرن، ژ به‌ر كو هه‌ردویان ئێك ئاستێ ره‌وشه‌نبیرى هه‌بوو، خالا دوێ كو من دڤێت زێده‌تر ل سه‌ر براوه‌ستم، په‌یدابوونا حزبێن ئیسلامى بوو، كو ژن ب عه‌وره‌ت زانى، ژ ئێكجوداكرنا ژنان ژ زه‌لامى، چ ب رێكێن خوه‌ ڤه‌شارتن و پێچانێ بیت چ ب رێگرى گرتن بیت ل ده‌ركه‌فتن و ئازادیا وێ بۆ هه‌لبژارتنا مافێن وێ، ل گه‌ل په‌یدابوونا هزرا ئاینى یا سیاسى، بارێ ئابوورى یێ نه‌ سه‌قامگیر ژى ئه‌گه‌ره‌ك بوو كو زێده‌تر ژن د ناڤ چاردیواران دا بمینیت و نه‌ ئه‌وێ شیان هه‌بوون به‌رگریێ ژخوه‌ بكه‌ت و ئه‌ڤ هه‌ڤسه‌نگیا جاران ژى د ناڤبه‌را وێ و زه‌لامى دا نه‌ما، كو ئاستێ ره‌وشه‌نبیرى یێ هه‌ردویان وه‌كى ئێك بیت و پێنه‌ڤێت ژى هینگێ رێزگرتن بخوه‌ دێ زێده‌تر بیت، لێ ده‌ما زه‌لام خوه‌ ژ ژنێ زێده‌تر ببینیت و ئاستێ خوه‌ بلندتر ببینیت و خودان داهات و ژنێ ژبلى خودانكرنا زارۆیان زێده‌تر چ پێ چێنابیت، ئه‌ڤه‌ بخوه‌ ئه‌گه‌ره‌كێ ب هێزه‌ كو ئێدى ژن بهێته‌ چه‌وساندن. یا من دڤێت بێژم، راسته‌ پێنگاڤان بۆ راستڤه‌كرنا ڤێ هه‌ڤسه‌نگیێ یێ دهێنه‌ هاڤێتن و نوكه‌ كچ ژى دشێن به‌رده‌وامیێ بده‌نه‌ خواندنا خوه‌ و ئاستێ خوه‌ یێ ره‌وشه‌نبیرى مل ب ملێ زه‌لامى بگه‌هینن، لێ مانا پارتێن ئیسلامى یێن سیاسى، كو گه‌له‌ك جاران بابه‌تان بۆ لایێ خوه‌ و به‌رژه‌وه‌ندیا خوه‌ یا حزبى ئالیسه‌نگ دكه‌ن، ژن زێده‌تر دهێته‌ ته‌په‌سه‌ركرن و ئه‌و هه‌ڤسه‌نگى ژى یا ته‌مام نابیت. بوویه‌ ب هزرا من، دڤێت ئه‌م وه‌ك چالاكڤانێن ژن بۆ وێ چه‌ندێ كار بكه‌ین، فشارا ڤان پارتێن هه‌نێ ل سه‌ر پێشكه‌فتنا ژنان كێم بكه‌ین، فشارا ئه‌ز ژێ دبێژم نه‌ ل سه‌ر ئاینێ ئیسلامێ یه‌، ژ به‌ر كو ئیسلامێ گه‌له‌ك مافێن ژنان زامن كرینه‌ و د قورئان و فه‌رمۆده‌یان دا هاتینه‌ به‌حسكرن، لێ پارتێن سیاسى كو خوه‌ ب رێبه‌رێ یان نیشاده‌رێ ئاینى دده‌نه‌ ناسكرن، ڤێ چه‌ندێ بۆ ئالیێ خوه‌ یێ حزبى له‌نگیێ دئێخنێ و چارچووڤه‌ دكه‌ن.
به‌لكو ژى گۆتنا هه‌ر بابه‌ته‌كێ گرێدایى ژنێ د ناڤ جڤاكێ مه‌ دا، چونكى ژن و ئاین بوویه‌ هێله‌كا سۆر و گه‌له‌ك جاران ژى هوشیاریا ژنێ دلگرانیا گه‌له‌ك كه‌سانه‌ و كاریگه‌ریا گه‌له‌ك وه‌لاتان و كه‌لتورێن بیانى د ناڤ جڤاكێ مه‌ دا كه‌لتۆره‌كێ هه‌ڤدژ په‌یدا كریه‌ د ناڤبه‌را هه‌ر دو ره‌گه‌زان دا و به‌رده‌وام هه‌ول داینه‌ ژن د ناڤ كه‌ڤلوژانكه‌كێ نڤستى دا بێده‌نگ بیت و كه‌سێ ئاگه‌ه ژ ره‌وشا وێ نه‌بیت ب تنێ ل گه‌ل خوه‌ بژیت، ژ لایه‌كێ دیڤه‌ ژى ئه‌و بنه‌مایێن هێزین ژنێ د ناڤ جڤاكێ مه‌دا كو دكه‌ڤن دا ژن بتنێ دچوو ئاقارى و هه‌تا ب شه‌ڤ كارێ ده‌رڤه‌ دكر ئه‌ڤجا چ ب تنێ یان ل گه‌ل زه‌لامى كار كریه‌ و بێى هزر ل شه‌رم و سه‌رپووشكرنا ژنێ هاتبا كرن ئانكو ئه‌ڤ جوداهیا ره‌گه‌زى نه‌بوویه‌ و هه‌میان پێكڤه‌ ل گۆره‌یى ژیانا وى سه‌رده‌مى ژیان دبره‌ سه‌ر و به‌خته‌وه‌ریا خێزانێ گه‌له‌ك د چارچووڤه‌كێ پیرۆز دا یێ پاراستى بوو و هه‌كه‌ ژى ژن و زه‌لامه‌كى ڤیان بۆ ئێك هه‌بایه‌ خێزانه‌كا تژى ڤیان و كه‌یف و بێ گۆنه‌هى ده‌رباز دكر و خێزان پێكدئینا ئانكو بۆ قووناغێن بۆرى ژیان گه‌له‌ك ب شێوه‌كێ جوان و پاقژ ده‌رباز دبوو، لێ ل ڤێ دووماهیێ و پشتى ده‌ركه‌فتنا لایه‌نێن سیاسى و تایبه‌ت یێن ئیسلامى ئه‌ڤ پیرۆزى و بهایێ ژنێ یێ هه‌ى وه‌كو ده‌نگ و ستران گۆتن و تێكه‌لى و ئاخفتن و كاركرن نه‌ دچوو چارچووڤێ شه‌رم و گونه‌هێ دا، ئانكو دین پیرۆزى و راسته‌قینه‌یا سرۆشتێ خوه‌ یێ جوانه‌ كو خه‌لك به‌ریا نها سه‌ر بێ ئارمانج و هزرێن دوروویى دینى بكاردئینان و پاكى و پاقژى تێدا بوو، به‌لێ نها ئه‌و په‌یاما پیرۆز هاتیه‌ چارچووڤه‌كرن ل ناڤ هزره‌كا سیاسى و ئارمانجه‌كا دیار ب رێیا په‌یاما ئاینى دهێته‌ بكارئینان بۆ مه‌ره‌مان ئه‌وى ده‌مى ده‌روونێ مرۆڤان ناهێنه‌ پاقژكرن، به‌لكو بۆ مه‌ره‌مان دژین و تایبه‌ت ژن دبن هنده‌ك په‌ردێن سیاسى دهێته‌ پێگه‌هاندن كو ئه‌گه‌ر ل گه‌ل لایه‌نه‌كێ دینى نه‌بى و رۆژانه‌ گوهداریا گۆتارێن ئاینى و روونشتنان نه‌كه‌ى دێ حه‌شرا ته‌ ل گه‌ل مرۆڤێن دۆزه‌خێ هێته‌كرن و ئه‌و بهایێ ژنێ كو د كه‌لتۆرێ كوردى یێ كوردپه‌روه‌ر و ئاینى و ژیان د به‌ر سه‌ر هاتیه‌ گۆهۆرین و پتر گومان ل ده‌ڤ ره‌گه‌زێ نێر ژى په‌یدا كریه‌ كو هه‌كه‌ ژنێ به‌رێ خوه‌ دا زه‌لامه‌كى یان گرنژى یان ره‌فتاره‌ك كر ده‌ركه‌فتنه‌ دین و كه‌لتۆرێ كوردى دا، لێ ده‌م ل ده‌ست ژن پتر دهێته‌ چارچووڤه‌كرن و ره‌وشا وێ به‌ر ب ئاقارێن به‌رزه‌ ڤه‌ دچیت و پتر توند دبیت و دێ هه‌ول ده‌ت ئه‌و دژاتیا ژنێ كه‌ت و دێ هزر كه‌ت ب تنێ بۆچوونا زه‌لامى دروسته‌ و ئه‌و هه‌مى گونه‌ه و شه‌رمه‌، به‌لكو ب تنێ دڤێت ئه‌و بێژیت به‌لێ یان گوهداریا گۆتن و پره‌نسیپێن زه‌لامى دبێژیت ئه‌و بن هه‌كه‌نه‌ دڤێت ئه‌و خوه‌ بێده‌نگ بكه‌ت د كه‌لتۆرێ كوردى دا.

89

دبیت مانشێتێ من بۆ گۆتارا خوه‌ هه‌لبژارتی، جهێ سه‌رسورمانێ بیت بۆ گه‌له‌ك خوانده‌ڤانان، ب تایبه‌ت جڤاكێ مه‌ یێ كوردی هنده‌ك ره‌وشتوتیتالێن نه‌گوهۆر و پیرۆز هه‌نه‌. ره‌نگه‌ هه‌ر ئه‌و خوانده‌ڤان بێژن، ئه‌ڤا تو د بابه‌تێ خوه‌ دا ل سه‌ر راوه‌ستای، ژ جڤاكێ مه‌ دووره‌، به‌لێ ئه‌گه‌ر به‌حس ل ناڤه‌رۆكا بابه‌تی بكه‌ین، گه‌له‌ك راستیێن تێدا و ئه‌و گوهۆرینێن ب سه‌ر هه‌ڤژینیا نوكه‌ دا دهێن، به‌ر ب ئاقاره‌كێ لاواز و به‌رزه‌ڤه‌ دچیت، ژ به‌ر هندێ گرنگه‌ پتر به‌حس ل راستیا بابه‌تی بكه‌ین و هنده‌ك راستیێن ته‌حل بده‌ینه‌ به‌رچاڤكرن.
شووكرن و پێكئینانا پرۆسا هه‌ڤژینیێ، ئێك ژ پێنگاڤێن گرنگن بۆ ته‌خا گه‌نجان و دیسا بۆ كه‌سێن بێ هه‌ڤژین و ئه‌ڤه‌ ژی بۆ هه‌ر دوو ره‌گه‌زان، به‌ری چه‌ند سالان ده‌مێ كوری یان كچێ داخواز كربا دگه‌ل هه‌ر كه‌سی هه‌ڤژینیێ پێكبینیت، به‌رێ خوه‌ دا ره‌فتار و ره‌وشت و كه‌سایه‌تیا وی، هه‌كه‌ یا گونجایی با دا دووڤچوونا ئێك كه‌ن و هه‌ڤژینیێ ل گه‌ل ئێك پێكئینن، به‌روڤاژی دابونه‌ریتێن جڤاكێ مه‌ ژی، دا ئه‌و رێك دا كو هه‌ڤژینی ل سه‌ر هنده‌ك بنه‌مایێن ب هێز هاتبا پێك ئینان و ڤیان و حه‌زژێكرن ژی ئێك ژ مه‌رجێن وان كه‌سا بوو، كو دكره‌ هۆكاره‌كێ ب هێز یێ د هێلینا زێرین دا، به‌لكو ئه‌و كه‌سه‌ دشیان گیانێ خوه‌ گۆری ڤیان و وه‌فاداری و حه‌زژێكرنا ئێك بكه‌ن، بۆ ڤێ چه‌ندێ ژی مرۆڤ هه‌ر یێ ئارام بوو، چونكی گیانێ مرۆڤایه‌تێ و وژدانێ ئێك ژ وان خالێن هه‌ڤپشك بوون، دناڤبه‌را هه‌ر دو ره‌گه‌زان دا و دشیان پێكڤه‌ بگۆنجن و هه‌ڤژینیێ پێكبینن.
به‌لێ هه‌كه‌ به‌حس ل دیارده‌كێ بكه‌ین، دبیت گه‌له‌ك كه‌س مه‌نده‌هۆش و سه‌رسورمان بمینن، كو ئێدی ئه‌م ژ پاشه‌رۆژا خێزانێ بترسین، چونكی گرێدایی گۆهورینین ئابووری نه‌، نموونه‌ ژی ل ڤێ دووماهیێ و ڤان سێ سالێن دووماهیێ و قه‌یرانێ ده‌ستپێكری، ئێدی دیارده‌كا نه‌ یا شارستانی و مرۆڤایه‌تی سه‌رهه‌لدایه‌ و هه‌ر كوره‌كێ بیت، ئه‌ڤجا چ خودان مووچه‌ بیت یان خودان كار بیت، ده‌ما بۆ خوه‌ ل كچه‌كێ دگه‌ریت، كو گرێبه‌ستا هه‌ڤژینیێ دگه‌ل گرێبده‌ت، مه‌رجێ سه‌ره‌كی هه‌كه‌ خودان مووچه‌ نه‌بیت یان ژی شوقه‌ك یان ترومبیله‌ك نه‌بیت، ئه‌و كچ دڤێت هزرا نه‌ شووكرنێ بكه‌ت، چونكی ژماره‌كا مه‌زن ژ كوران دڤێن هه‌ڤژینا وی خودان مووچه‌ بیت و داهاته‌كێ باش هه‌بیت دا بشێت بخوازیت و بشێت هاریكاریا وی بكه‌ت د ئاڤاكرنا خێزانێ دا، ئه‌م نابێژین دڤێت هه‌می بار یێ زه‌لامی بیت و ئه‌و ب تنێ به‌رپرساتیا ئابووری وه‌رگریت، به‌لێ پا ژماره‌كا مه‌زن ژ كچان ده‌رچووینه‌ و نه‌ هاتینه‌ دامه‌زراندن، ئانكو پاشه‌رۆژا ڤان كچان دێ یا به‌رزه‌ بیت و دڤێت ل هیڤیا شووكرنێ نه‌بن!!.
ژلایه‌نه‌كێ دیڤه‌، ئه‌و نێرینا ل سه‌ر كه‌ساتیا كچان دهاته‌ گۆتن، كو كچ داخوازا پاره‌ و زێر و شقه‌یان دكه‌ن یا بوویه‌ نه‌ریته‌ك ب دووڤ كه‌ساتیا كچان ڤه‌ و رۆژانه‌ دهێته‌ به‌حسكرن و دهێته‌ ڤه‌جوون، به‌لێ دبنیات دا ب تنێ ماوه‌ك بۆ كچان ئه‌و داخوازی كرن و ئه‌م نابێژین ئه‌و ژی دروستن، لێ مافه‌كێ كچێ یه‌، هه‌كه‌ بۆ شووكرنا خوه‌ داخوازا تشته‌كی بكه‌ت، ئه‌و ژی ل ده‌مێ ره‌وشا پتریا خێزانان ل ئاسته‌كێ باش بوو، به‌لێ ئێدی كچ ژی كچێن ڤی وه‌لاتی نه‌ و دزانن ره‌وشا پتریا خێزانان یا چاوایه‌ و ئێدی ژماره‌كا مه‌زن ژ كچان ب تنێ خه‌له‌كا هه‌ڤژینی دخوازن و نموونه‌ ژی یێ په‌یدا بووین و ئه‌ڤه‌ مه‌ ب هیڤی دئێخن، كو ئێدی ئه‌و كه‌لتۆرێ عه‌ره‌بی یێ داگیركه‌ر كاریگه‌ری كریه‌ ل سه‌ر وه‌لاتێ مه‌ و خواستنا زێران و پێگۆهوركانێ وه‌رگرتنا نه‌ختی زێده‌كرن د ناڤ جڤاكێ مه‌ دا، به‌لێ ئێدی ئه‌و دیاره‌ یێ ژ ناڤدچن و پتریا ده‌ڤه‌رێن كوردستانێ یێ هه‌ول دده‌ن خوه‌ ژڤێ چه‌ندێ قورتال بكه‌ن و ئێدی پیرۆزیا خێزانێ وه‌كو ملله‌تێ كورد دكه‌ڤن دا، خێزان پێك دئینان به‌ر ب باشتر ڤه‌ دڤێت، ژبه‌ر هندێ ژی گرنگه‌ بێژین، ئه‌ڤ دیاردا كور خوه‌ تووش دكه‌ن، كو ب تنێ ل وان كچان بگه‌رن یێن خودان موچوه‌ و ترومبێل و پارچێن عه‌ردی بن، راسته‌ دیارده‌ بخوه‌ یا جوانه‌، لێ د هه‌مان ده‌مدا ژی، ره‌نگه‌ كچه‌كێ ئه‌ڤ تشتێن هه‌نێ ل ده‌ف ژی نه‌بن و شیان هه‌بن، كچه‌كا زیره‌ك بیت و ژ مالباته‌كا باش بیت و بنیاتێ خێزانێ ژی جوانتر دانیت، هه‌ر چاوا بیت یا من گۆتارا خوه‌ بۆ ته‌رخان كری و من ڤیایی بێژم ئه‌وه‌، راسته‌ ئه‌ڤ جۆرێ هه‌ڤژینیێ و داخوازكرنێ دیارده‌كا نووی یه‌ و یا سه‌رهلدده‌ت، به‌لێ ئه‌گه‌ر یا دروست نه‌بیت و له‌ز و به‌ز تێدا هه‌بن، ره‌نگه‌ خرابیێن وێ زێده‌تر بن ل سه‌ر خێزانێ و مالباتێن هه‌ردو هه‌ڤژینان، ژبه‌ركو هه‌ڤژینی نه‌ یا ساله‌كێ و دویان و سیانه‌، به‌لكو یا ژیانێ هه‌میێ و خۆشی و نه‌خۆشیێن ژیانێ یه‌.

77

ئاشكه‌رایه‌ كو هه‌یڤا ره‌مه‌زانێ یا خێر و به‌ره‌كه‌ت و كارێن خێرێ یه‌ بۆ هه‌ر دو ره‌گه‌زان نێر و مێ، به‌لێ خالا گرنگ ئه‌وه‌ ل ڤێره‌ به‌حسا رۆلێ ژنێ هۆشمه‌ندى و حنێرا ژنێ بكه‌ین د مه‌ها ره‌مه‌زانێ دا، ژبه‌ر ئه‌و ژى وه‌كو وى زه‌لامى یا ب رۆژى یه‌ دبیت تۆره‌بن و دلته‌نگى ژ نه‌بوونا تشته‌كى یان پێدڤیه‌كا مالێ دلته‌نگ دبیت، لێ ئاشكه‌را ناكه‌ت و ل گه‌ل هندێ شیان و بزاڤ و ئه‌ركێ ژنێ گه‌له‌ك مه‌زنتر لێ دهێت ل به‌رانبه‌ر یێ زه‌لامى، ژبه‌ر ل گه‌ل هه‌ر پێنگاڤه‌كا ژن یان دایك یان هه‌ڤژین یان خووشك دهاڤێژیت هه‌ولا هندێ دكه‌ت خێزانێ پێكڤه‌ گرێبده‌ت و شیانێن وێ دده‌ته‌ كارى ژ بۆ ئێكرێزیا خێزانێ و ل گه‌ل هندێ ژى ئه‌گه‌ر ئه‌و چه‌ند یا لاواز بیت ژ لایێ هێزێ ڤه‌، دێ خوه‌ ماندى كه‌ت پێخه‌مه‌ت ئه‌و چ كێماسیان نه‌هێلته‌ د ناڤ خێزانێ دا، به‌روڤاژى ڤێ ئێكێ ژى تایبه‌ت ئه‌و خێزانا ژ لایێ په‌یوه‌ندیان یا لاواز بیت دبیت گه‌له‌ك پلانان بدانیت ژ بۆ هندێ هه‌مى خێزانا خوه‌ ل سه‌ر ئێك سفرا خوارنێ خڕڤه‌ بكه‌ت و دا چاڤێن وان ب ئێك بكه‌ڤن و ب مه‌ره‌ما هندێ ره‌مه‌زانێ ئه‌و كه‌ربوكین و سلببوونا به‌رى هینگێ هه‌ى دبیته‌ بهانه‌ ل ئێك ببۆرن و ئه‌ڤه‌ جوانترین و هه‌ستیارترین بزاڤه‌ ژن دهاڤێژیت.

خالا دى یا گرنگ و یا گه‌له‌ك جاران مه‌ ب چاڤێ خوه‌ دیتى ئه‌وه‌ ئه‌و خێزانێن ده‌ستكورت و سه‌میانێ مالێ نه‌شێت خوارنه‌كا وه‌سا بۆ زارۆیێن خوه‌ په‌یدا بكه‌ت، كو ئه‌و هه‌ست پێ بكه‌ن خوارنه‌كا خۆش و وه‌كو یا ده‌وله‌مه‌ندانه‌، دێ دایك به‌رى هه‌یڤا ره‌مه‌زانێ بۆ مازه‌كى درێژ هنده‌ك پاران خرڤه‌كه‌ت ژ بۆ هندێ بشێت ل هه‌یڤا ره‌مه‌زانێ فتارێن خۆش بۆ خێزانا خوه‌ به‌رهه‌ڤ بكه‌ت ئه‌وان ب زكێ برسى ل سه‌ر خوارنێ نه‌راكه‌ت، بێگومان ئه‌ڤه‌ مه‌زنترین ده‌ستكه‌فته‌ ژنا كورد بزاڤێ ل سه‌ر هندێ دكه‌ت، ئه‌وێ خێزانێ ژ لایێ دلسۆزى و ڤیان و وه‌فادارى و حه‌زژێكرنێ ل سه‌ر ئاڤا دكه‌ت، به‌لكو مرۆڤ دشێت بێژیت دبیت گه‌له‌ك جاران ئه‌و بێزار و نه‌ئارام ژى دبیت، لى نه‌ڤێت كه‌سێن ل دۆرێن وێ هه‌تا ناسیارێن وى هه‌ست ب نه‌بوونا دراڤێ مالا وێ بكه‌ن، چونكى هنده‌ك جاران دبیت ئه‌و ب چاڤێن گرى ڤه‌ سه‌رێ خوه‌ دانیت و ژنا كورد ناهێلیت بۆ هه‌ر كاودانه‌كێ ب سه‌ر خێزانا وێ دا دهێت به‌لكو ناهێلیت هه‌ڤژینێ وێ كێماسیێن زارۆیێن خوه‌ ژ لایێ ئابوورى ڤه‌ بزانیت داكو ئه‌و هه‌ست ب كێماسیێ نه‌كه‌ت ل به‌رانبه‌ر زارۆیێن خوه‌.
به‌لێ هه‌كه‌ به‌حسا لایه‌نێ دى یێ ژنێ بكه‌ین دێ بینین ئه‌و دێ گه‌له‌ك بزاڤان كه‌ت ژ بۆ هندێ د سه‌ر وێ ده‌ستكورتى و بزاڤێن زه‌لام دكه‌ت ژ بۆ بده‌ستڤه‌ئینانا داهاتیێ خێزانێ، لێ ناهیلیت زارۆیێن وى ب چاڤێ كێم به‌رێ خوه‌ بده‌نه‌ بابێ خوه‌ به‌لكو دێ به‌رده‌وام به‌حسا ماندیبوون و شیانێن بابێ وان بۆ ڤه‌گێریت بۆ هندێ د سه‌ر وێ برس تێهن و رۆژیان دگریت دێ دله‌كى ل دلێ هه‌ڤژینێ خوه‌ ده‌ت بۆ هندێ ئه‌و تووشى بێزاریێ نه‌بیت د ژیانێ دا هزرا پتر كاركرنێ و هیڤیێن گه‌ش ل ده‌ف په‌یدا دكه‌ت.
خالا جهێ سه‌ره‌نجراكێشیێ كو ل ده‌ڤ ژنا كورد هه‌یه‌ ئه‌و ژى بۆ ئه‌و تشتێ هه‌ڤژینێ وێ پێ شه‌رم ژ كه‌ساتیا خوه‌ بكه‌ت ل به‌رانبه‌ر جیران و نیاس و مرۆڤێن خوه‌ ناكه‌ت داكو ل ده‌مێ چاڤێن وى ب وان دكه‌ڤن ئالۆز نه‌بیت و په‌شێمان نه‌بیت، به‌روڤاژى به‌لكو هه‌كه‌ یا خودان كار بیت ئه‌و دێ ل خێزانا خوه‌ مه‌زێخیت ژبۆ سه‌ركه‌فتنا مال و هه‌ڤژینێ خوه‌، هه‌تا گه‌له‌ك جاران ده‌مێ دبێژن هه‌ڤژینا فلانكه‌سى یا ده‌ستگرتی و قه‌لسه‌ ژى لێ ب خاله‌كا كێم و كرێت نابینن، به‌لكو دێ بیژن ژنه‌كا رێنجبه‌ر و وه‌فاداره‌ بۆ هه‌ڤژینێ خوه‌، دێ هه‌مى هه‌ولا ده‌ت هه‌یڤه‌كا تژلا ڤیان به‌خته‌وه‌ر ب سه‌ر خێزانا وێ دا بۆریت و هه‌كه‌ نموونه‌كا كێم هه‌بیت كو ئه‌و ژنێن گه‌له‌گ گازندان ژ بۆ نه‌بوونا پارا د ڤێ هه‌یڤێ دا ژ هه‌ڤژینێ خوه‌ بكه‌ن نابنه‌ پیڤه‌ر ل سه‌ر هه‌مى ژنێن دى دبیت ژى ل گه‌ل هندێ پتر ئه‌و بن یێن هه‌ڤژینێن وان ب كێرنه‌هاتى و بێهنا خێزانا خوه‌ یا كورت كرى كو ئه‌و ده‌ربكه‌ن و بابه‌تى مه‌زن بكه‌ن ئه‌و ژى بۆ هندێ یه‌ كێشه‌ چاره‌ بیت نه‌ك شه‌رما خێزان و هه‌ڤژینێ خوه‌ ببه‌ت.
ل داویێ ژى به‌حسكرنا رۆلێ ژنا كورد ل گوندان گه‌له‌ك یێ دیاره‌ كو ل گه‌ل زه‌لامى یا كارێ ده‌رڤه‌ ژى دكه‌ت و بێى هه‌ست ب وه‌ستیان و برسێ و تێهنێ بكه‌ت، دێ مل ب ملێ هه‌ڤژینێ خوه‌ڤه‌ كارێ په‌ز و چه‌روان و ئاقارى ژى كه‌ت ل ده‌مێ زڤرینێ ژى كارێ فتارێ مالێ ژى ئه‌نجامده‌ت بێى كێماسى هه‌بن و ئه‌ڤه‌ نیشانا شیان و كه‌سایه‌تیه‌كا مه‌زنه‌ بۆ ژنا كورد.

19

یا ئاشكه‌را یه‌ كو كو مژارا ریفراندومێ و سه‌ربخوه‌یێ و راگه‌هاندنا ده‌وله‌تا كوردستانێ نیڤشكێ هه‌ر خرڤه‌بوون و كۆمبوونه‌كێ یه‌ ژ بۆ بابه‌تێ ریفراندومێ ل هه‌ر جهـ و ده‌زگه‌هه‌كێ راگه‌هاندنێ یه‌، یێ دهێته‌ ئازراندن و ئه‌م ل هیڤیا هندێ نه‌، وه‌ك پرۆژه‌ بكه‌ڤیته‌ د ناڤا ته‌خ و چینێن جڤاكى دا و كار ل سه‌ر بهێته‌كرن. وه‌كو گه‌له‌ك دانوستاندن و بگر و ڤه‌كێش ل سه‌ر هاتینه‌ كرن و مه‌ چ گومان نینه‌ كو بۆ مژاره‌كا هۆسا و ب ڤى ره‌نگى ئه‌م پێدڤى هندێ ینه‌، ژ به‌ر كو ئه‌ڤه‌ مژاره‌كا چاره‌نڤیسازه‌ و نابیت مله‌ت یێ ژێ غافل بیت، به‌لكو دڤێت ئه‌ڤ دان و ستاندنه‌ شورببیته‌ د ناڤ هه‌مى گه‌هێت جڤاكیدا و هه‌ر كه‌سه‌كێ ل ڤى وه‌لاتى دژیت بێ جوداهیا دینى و مله‌تینیێ، ماف هه‌بیت ره‌ئى و دیتنێن خوه‌ ل سه‌ر بده‌ته‌ و ئه‌و ره‌ئى و هزر ببنه‌ به‌رێ بنیاتێ ڤى پڕۆژێ مه‌زن و پیرۆز ده‌ما ئه‌م به‌حسا ته‌خ و چینێن كومه‌لگه‌هى ژى دكه‌ین، مه‌به‌ستا مه‌ زێده‌تر ئه‌م خه‌لكى ئاشناى ڤى بابه‌تى بكه‌ین، ریفراندومێ و گرنگیا ریفراندومێ بۆ كوردان، جوداهیا ریفراندومێ ل گه‌ل هه‌لبژارتنێن په‌رله‌مانى یان ئه‌نجوومه‌نێ پارێزگه‌هان، گرنگیا سه‌رخستنا ریفراندومێ د چ دایه‌، چ ئه‌رك دكه‌ڤیته‌ سه‌ر ملێن مه‌ ئه‌ڤێن ئه‌م خوه‌ ب نڤیسه‌ر و رۆژنامه‌ڤان و چالاكڤان دزانین دپێگه‌هاندنا خه‌لكى دا ل سه‌ر ریفراندومێ، ئه‌م چاوان بالا رایا گشتى بۆ ریفراندومێ بكێشین، ژ به‌ر كو هنده‌ك بابه‌ت یێن هه‌ین، گرێداى چ حزب و یه‌نێن سیاسى و ئایدولۆجیه‌تان نینه‌، به‌لكو ب چاره‌نڤیسێ مله‌ه‌ته‌كى ڤه‌ گرێدایه‌، بوویه‌ گرنگه‌ د ڤى هه‌ل و مه‌رجى دا، ئه‌م هه‌مى شیانێن خوه‌ بده‌ینه‌ كارى كو گرنگیا ریفراندومێ و پشكداریا خه‌لكى تێدا رۆهن و زه‌لال بكه‌ین، ژ به‌ر كو ده‌رفه‌ت دێ ئێكجار بیت، هندێ ده‌نگێ مه‌ بۆ رفراندومێ ب ئه‌رێ بن، دێ زێده‌تر باوه‌ریا خوه‌ وه‌رگرین و دێ زێده‌تر شێین پێگه‌یێ خوه‌ موكم و قایم بكه‌ین و دێ زێده‌تر شێین باوه‌ریا جڤاكێ نیڤده‌وله‌تى بۆ خوه‌ په‌یدا كه‌ین، كو به‌لێ ئه‌م ملله‌ته‌كێ غه‌در لێكرینه‌ و مه‌ ئاخ و زمان و كه‌لتۆرێ خوه‌ یێ هه‌ى، مه‌ شیانێن رێڤه‌برنا خوه‌ یێن هه‌ین، هینگێ ئه‌و دشێن رۆناهیا كه‌سك بۆ مه‌ هلبكه‌ن، دساته‌ وه‌خته‌كى دا، ئه‌م نوكه‌ ل گه‌ل وه‌لاتێ عیراقێ وه‌ك كرێدار و خودان خانى نه‌ و عیراق ڤێ مامه‌لێ ل گه‌ل مه‌ دا دگه‌ت، دڤێت چ دى ئه‌م ژ لایێ ڤان وه‌لاتان ڤه‌ نه‌هێینه‌ سه‌ركوتكرن و هه‌ر رێ ژى بۆ ڤێ چه‌ندێ نه‌ده‌ین، ئه‌م ببینه‌ خودان ئیراده‌ و خودانێن بریارا خوه‌ و خودان سه‌روه‌ریا خوه‌، ئه‌ڤه‌ێن هه‌نێ ژى دێ چاوا بده‌ست ڤه‌ هێن، ئه‌كید ده‌ما پرۆژێ راپرسیێ سه‌رگرت، پشكداریا خه‌لكى یا زێده‌ و هه‌ست ب به‌رپرساتیێ بیت. یا من دڤێت د ڤى ده‌رباره‌ى دا بێژم و بگه‌هینم، په‌یامه‌كه‌ بۆ هه‌مى ژنان، بۆ هه‌مى چالاكڤانان، بۆ هه‌مى نڤیسه‌ر و ره‌وژنامه‌نڤیس و هونه‌رمه‌ند و هه‌مى ته‌خێن جڤاكى بێ جوداهى، ئه‌م پێكڤه‌ كارى ل سه‌ر رایا گشتى بكه‌ین و چاڤ رونیه‌كێ بده‌ینه‌ وان، ریفراندومێ بۆ وان زه‌لال بكه‌ین، ئه‌م وان د بابه‌تێ سه‌رخوه‌بوونێ و گرنگیا سه‌رخوه‌بوونێ دیار بكه‌ین، ئه‌ڤێ ژى دوور بێخین ژ هه‌مى بابه‌تێن سیاسى و ئایدولوژى، به‌لكو وه‌ك پرۆژه‌یه‌كێ نه‌ته‌وه‌ى ل سه‌ر كار بكه‌ین، ژبه‌ر كو ده‌ستكه‌فتێن وێ بۆ ملله‌تى نه‌ و ئه‌م پێدڤى نه‌ ملله‌تى ژ قووناغاكا راوه‌ستیاى و مه‌ند بۆ قووناغه‌كا دێ ڤه‌گوهێزین و هه‌ست ب خوه‌ بكه‌ین كو ئه‌م ل سه‌ر ئاخا خوه‌ینه‌ و وژدانا خوه‌ به‌رامبه‌رى شه‌هیدێن خوه‌ ئارام بكه‌ین، دڤێت ده‌ست بده‌ست ئه‌م كاربكه‌ین و چاڤێ مه‌ هه‌میان ل سه‌ر خستنا ڤى پرۆژه‌ى بیت.

37

ره‌وشا كچ و ژنێن خودان باوه‌رنامه‌ یێ د مه‌ترسیێ دا و حوكمه‌ت دڤێت چاره‌سه‌ره‌یه‌كا ب له‌ز بۆ په‌یدا بكه‌ت.

پشتى ره‌وشا كوردستانێ ژ ئالیێ سیاسى و ئابوورى ڤه‌، كه‌فتیه‌ د قووناغه‌كا هه‌ستیار دا، ژ پاشماوێن وێ ژى دامه‌زراندن نه‌ ب تنێ ب زه‌حمه‌ت كه‌فتیه‌ و رێژه‌ هاتیه‌ كێمكرن، لێ هه‌ر هاتیه‌ راوه‌ستاندن و ئه‌گه‌ر به‌راوردیه‌كێ د ناڤبه‌را ده‌رچوویێن كور و كچ دا بكه‌ین، كچ زه‌ره‌رمه‌ندیێن ئێكێ نه‌ ژ ڤان قه‌یران و نه‌ دامه‌زراندنان و هه‌ر هیچ نه‌بایه‌، دڤیابا، ئالیێن په‌یوه‌ندیدار ل سه‌ر ڤێ چه‌ندێ راوه‌ستابان و ڤه‌كولین ل دوور ڤان گوهورینان ئه‌نجامدابان.
بۆچى ده‌رچوویێن كچ و نه‌ یێن كوڕ؟ ره‌نگه‌ پسیاره‌كا ژ ڤى ره‌نگى، بابه‌تێ مه‌ دڤێت بنڤیسین بكه‌ته‌ به‌رسڤ، ژبه‌ركو، كوڕ دشێت ل كه‌رتێ تایبه‌ت كاربكه‌ت و بۆ كچێ یا ب زه‌حمه‌ت بیت و هه‌مى گاڤان ده‌لیڤه‌ بۆ په‌یدا نه‌بن، لێ ئه‌ڤه‌ نه‌ هه‌مى بابه‌تێ نڤیسینا مه‌یه‌، كو مه‌ دڤێت ل سه‌ر راوه‌ستین، ژبه‌ركو ده‌رچوویێن كچ فێرى ده‌ركه‌تنێ بووینه‌، جۆرێ په‌یوه‌ندیێن وان ل په‌یمانگه‌هـ و كۆلیژان جوداترن ژ په‌یوه‌ندیێن د ناڤا مالێ و ژینگه‌ها مالێ دا، بوویه‌، مانا وان د مالێ دا، سه‌ره‌ده‌ریا مالێ د گه‌ل ره‌فتارێن وێ، دگه‌ل ڤه‌بوونا وێ و ئاستێ وێ یێ زانستى هه‌ڤدژیه‌كێ بۆ دروست دكه‌ن، كو نه‌شێت وه‌ك پێدڤى رۆلێ خوه‌ بگێریت، ره‌نگه‌ ئه‌و هه‌مى سالێن ب خواندنێ ڤه‌ بۆراندین بۆ ببنه‌ په‌شیمانى، ئێك: ژبه‌ركو ده‌لیڤه‌یا شووكرنێ كێمتر دبیت، ئه‌گه‌ر ل سالێن دانه‌شویا كچان وه‌ك رێژه‌ ته‌ماشا بكه‌ین، دو: چ دى ده‌یباب رێخوشكه‌ر نه‌بن، كو كچێن وان به‌رده‌وامیێ ب خواندنا خوه‌ بده‌ن و چ نه‌هێته‌ شوینێ و نه‌هێنه‌ دامه‌زراندن.
یا من دڤێت وه‌ك چاره‌سه‌رى بێژم، دڤێت حكومه‌ت و ده‌زگایێن پارت و لایه‌نێن سیاسى كار ل سه‌ر رێهورییشالێن ئه‌ڤێ بابه‌تێ بكه‌ن، دبیت ژى بێژن ئه‌ڤ بابه‌ته‌ جارێ وه‌ختێ وى نینه‌، لێ د پتریا خێزانان دا مه‌ كچ هه‌نه‌ و ده‌رچوویێن په‌یمانگه‌هـ و كۆلیژانه‌ و رۆژانه‌ بۆ دامه‌زراندنێ دنالن و گه‌له‌ك ژوان یێ ده‌روونه‌كێ نه‌ یێ ئارام دا و ئه‌گه‌ر بزانین ئه‌ڤ كچه‌ د چ ره‌وش دانه‌، تایبه‌ت ژى سه‌نگ و بهایێ ره‌گه‌زێ مێ، چۆنكى هه‌ر كه‌س ئه‌گه‌ر خودان داهات بیت، بهایێ وى پتره‌، له‌ورا پاشه‌رۆژا گه‌له‌ك ژ كچ و ژنێن خۆدان باوه‌رنامه‌ یێ دمه‌ترسیێ دا و د پێدڤى چاره‌سه‌ریه‌كا بله‌زا حكومه‌تا هه‌رێما كوردستانێ نه‌، چونكى كچ بۆ نه‌بوونا پاره‌یى تووشى ده‌ردێن مه‌زن دبیت و ئه‌گه‌ر ل دویڤ وێ گۆتنا هه‌ى كو رێژا كچێن نه‌ شووكرى به‌ره‌ڤ زێده‌بوونێ چوویه‌، ئه‌رێ ئه‌ڤێ قه‌یرانا په‌یدا بوویى دێ چ كارتێكرنا دى ل ژمارا ڤان كچان بیت، چونكى رێژه‌كا كێم نه‌بیت ئه‌گه‌ر هه‌ر ئێكێ دڤێت كچه‌كێ بخوازیت مه‌رجه‌ خودان مووچه‌ بیت.
به‌رۆڤاژى ڤێ ئێكێ ژى دێ ئه‌ڤ كچێن نه‌ دامه‌زراندى و دیسا گۆتنه‌كا ته‌عل یا هه‌ى ئه‌گه‌ر مه‌رجێن وه‌سا ژێ نه‌گرن بهێته‌ دامه‌زراندن كو هزره‌ك ژى په‌یدا بویه‌ ئه‌گه‌ر كچا خودان باوه‌رنامه‌ ژى جوان و بلندى و یادى دێ پتر په‌یڤێن ته‌عل ل دووڤ خوه‌ ئینیت نابێژین ئه‌رێ دێ ئه‌ڤ كچێن كه‌فتینه‌ د ڤان هزرا دا پاشه‌رۆژا وان یا ده‌روونى دناڤ خێزانێ دا به‌ر ب چ ئاست ڤه‌ چیت، چۆنكى گه‌له‌ك جاران د ناڤ خێزانان دا ئه‌ڤ چكیه‌ دهێنه‌ چاڤێن وێ ئه‌و نه‌شێت چ به‌رسڤێن وه‌سا بده‌تێ چونكى ئه‌و خواندنا خواندى نه‌بوویه‌ هوكارێ هندێ به‌ره‌ڤانیێ ژ خوه‌ بكه‌ت ب پاره‌یى وه‌سا كو خوه‌ سه‌ربلند بینیت دناڤ وێ خێزانێ دا.
ل داویێ ژى گرنگه‌ بێژین، راسته‌ دڤێت گرنگى ب كه‌رتێ تایبه‌ت بده‌ین، به‌لێ ل كوردستانێ ب گشتى زه‌مانا جڤاكى نینه‌ و ئه‌م ل سه‌ر ده‌زگه‌هێن راگه‌هاندنێ چاوا بێژین هزر و بیرێن پتریا تاكێن جڤاكێ مه‌ ل سه‌ر دامه‌زراندنێ و داهاته‌ك ژ حوكمه‌تێ هه‌بیت بو هه‌ردوو ره‌گه‌زان و یا باشتر بۆ پێشهاتێ، ژڤى ره‌نگى، ده‌زگایێن تایبه‌ت بابه‌تى ب رژدى وه‌ربگرن و روونشتن و ڤه‌كۆلینان ل سه‌ر بكه‌ن و مه‌ترسیا وێ بهێته‌ زانین و چاره‌سه‌ركرن.

25

بابه‌تێن گازندان یێن بووینه‌ گۆتنێن سه‌رده‌ڤێ پتریا وه‌لاتیان و هه‌ر گۆتنه‌كا دبێژن، هه‌كه‌ ره‌خنه‌ تێدا نه‌بیت و ل گه‌ل هندێ شكاندنا یێ به‌رانبه‌ر نه‌بیت ناهێته‌ گرتن. به‌روڤاژى ڤێ چه‌ندێ، ژ به‌ر ئه‌ڤ كه‌لتۆرێ ب ناڤێ كه‌لتۆرێ ئێكدو شكاندنێ و ئه‌م ل سه‌ر هاتینه‌ په‌روه‌رده‌كرن و ل سه‌ر مه‌زن بووین، ئه‌م یێن فێرى گازنده‌كرنێ كرین و چ جار ئه‌م گۆتنا دروست بۆ رایا گشتى نابێژین، نه‌ ب تنێ هه‌كه‌ بابه‌ت گرێداى رایا گشتى بیت به‌لكو د رۆژانێن مه‌ ژى دا، ب ده‌هان نموونێن ژ ڤى ره‌نگى دهێنه‌ دیتن. ل ده‌ستپێكا هه‌ر سوحبه‌ته‌كێ ژى، دێ بینى گۆتنێن جادێ د ناڤ هه‌ر دیوان و مێزگه‌رده‌كێ دا یێ ل ده‌ستپێكا هه‌ر ئاخفتنه‌كا مه‌، به‌روڤاژى ڤێ یه‌كێ ژى تاك یێ ساده‌ و نه‌ ساده‌ هه‌یه‌، ئه‌و ژى ل گه‌ل وان گازندان دكه‌ڤنه‌ به‌ر وێ هێرشا ره‌خنا و ده‌ستان دگه‌ل دقوتن و رادبنه‌ هێرشه‌كا سه‌مایا ده‌ستهه‌لاتێ، ئانكو كى ده‌ستهه‌لاته‌ ئه‌و دكه‌ڤیته‌ به‌ر وێ هێرشێ و دهێته‌ ره‌خنه‌گرتن.
به‌لێ خالا گرنگ ئه‌وه‌ هه‌ر گۆتنه‌كا ئه‌م دكه‌ین، دێ هه‌ول ده‌ین چ كارتێكرن ل هزرا خه‌لكى دكه‌ت ئه‌و دهێته‌ گۆتن و پتر د لایه‌نێ دلینى دا به‌حس لێ دهێته‌كرن، نه‌ك ب شێوازه‌كێ زانستى. خالا دى ئه‌وه‌ كو ڤه‌كۆلین ل سه‌ر چ بابه‌تان ناهێته‌ كرن و ئه‌و لایه‌نێ هه‌ول دده‌ت بابه‌تێن هه‌ستیار یێن كو كارتێكرنێ ل دلینیا وه‌لاتیان بكه‌ت، دێ وى بابه‌تى هاڤێنه‌ د مه‌یدانا ئاخفتنێ و جاددى دا، هه‌تا كو دبیته‌ ئه‌گه‌ر ته‌ر و هشك پێكڤه‌ بهێنه‌ سۆتن. یا من زێده‌تر دڤێت به‌حس بكه‌م، ئه‌ڤ ره‌خنه‌گرتنا بێ بنه‌ما و ره‌خنا ب تیڤل، ئه‌گه‌ر بۆ ئێكدو شكاندنێ نه‌بیت ژى وه‌كى به‌رێ ل ته‌راشێ یه‌، ژبلى خرابیێ چ تشتێ باش ددووڤ خوه‌ را نائینیت و یا دروست هه‌ر كه‌سێ ژ مه‌ شاشیه‌كێ یان نه‌ دادیه‌كێ یان هه‌ر كێماسییا هه‌بیت ببینیت، ل گه‌ل ره‌خنه‌گرتنێ، رایا گشتى ژى دلگران و بێ هیڤى نه‌كه‌ت، دا هینگێ كارڤه‌دانێن خراب دروست نه‌بن و شوینا كار بهێته‌ سه‌ر راستكرن، ئه‌و كارێ هه‌نێ ب ئاقاره‌كێ دى دا بچیت و ل دووماهیێ ژى هه‌ر هاولاتى كو مه‌به‌سته‌، دێ یێ زه‌ره‌رمه‌ند بیت. بوویه‌ یا دروست ده‌ما ئه‌م ره‌خنێ دگرین، كو ب باوه‌رامه‌، ره‌خنه‌گرتن بنه‌مایێ ئاڤاكرنێ یه‌، دڤێت ره‌خنه‌گرتنا مه‌ یا زانستیانه‌ بیت و یا هه‌مى ئالى بیت، نه‌ك ب تنێ ئه‌م وى كوژى ببینین یێن بۆمه‌ باش و ئه‌م پێ كه‌سێن دى كێم بكه‌ین، به‌لكو ئه‌م ل هه‌مى كوژیان ته‌ماشا بكه‌ین، لایه‌نێ خه‌مسار هه‌كه‌ هه‌بیت دیار بكه‌ین، نه‌ دووره‌، ئه‌و كارێ ئه‌م ره‌خنه‌ دكه‌ین، شیانێن ئه‌نجامدانا باشترینێ نه‌بووینه‌، ئالاڤێن دروست بۆ باشتركرنێ نه‌بووینه‌ و ره‌نگه‌ چه‌ندین سه‌ده‌مێن دى هه‌بن، له‌ورا فه‌ره‌ ل گه‌ل گه‌هاندنا یان ئاراسته‌كرنا ره‌خنێ ئه‌م یێن باشیێ بین زێده‌تر و گۆتنه‌ك مه‌زنان هه‌یه‌ دبێژیت مار ب گۆتنێن خۆش ژ كونجێ ده‌ردكه‌ڤیت.

9

هه‌كه‌ نێرینێ بكه‌ین و به‌رێ خوه‌ بده‌ینه‌ خالا سه‌ره‌كى ئه‌وه‌ هه‌ستیاریه‌ك هه‌یه‌ د ناڤ هه‌ر كاره‌كى دا و پتر مرۆڤ هه‌ست پێ دكه‌ت ل هه‌ر داموده‌زگه‌هه‌كێ میرى و حزبى یان هه‌تا كه‌رتێ تایبه‌ت ژى ململانه‌ك كه‌ڤتیه‌ د ناڤ ئیدارێ دا و هه‌ر تاكه‌ك دێ هه‌ول ده‌ت ئیدارێ بۆ خوه‌ راكێشیت، ئانكو جارێ گرنگه‌ به‌حس ل هندێ بكه‌ین كو مرۆڤ ئه‌و تاكێ جڤاكى و پێدڤى و ب هه‌ڤدو و پێكڤه‌ژیانا ره‌گه‌زى و ئۆلى و نه‌ته‌وه‌یى هه‌ى، ژ به‌ر هندێ جڤاكێ كوردى ژ هه‌ر وه‌لاته‌كى دیتر حه‌ز ل سه‌ر پێكڤه‌ ژیان و ئول و ئێكدوقه‌بوول كرنێ هه‌یه‌، به‌لێ گرنگه‌ بزانین ژى ئه‌و تشتێ سه‌ره‌نجا مرۆڤى رادكێشیت ئه‌وه‌ هه‌كه‌ چه‌ند هه‌ول بۆ تێكدانا پرۆسێسا سیاسى یا كوردستانێ و ئه‌و ئالوگۆریێن ل كوردستانێ په‌یدا دبن دێ بینین تشته‌كێ ڤه‌شارتى یه‌ ل پشت هنده‌ك په‌ردێن دیتر هنده‌ك حه‌زێن جودا هه‌نه‌، به‌لێ پێنگاڤ ژى دهێنه‌ هاڤێتن ژ بۆ ژ لایێ نه‌حه‌زێن پێكڤه‌ ژیانێ كو مرۆڤ ببنه‌ دۆژمنێن هه‌ڤ و ژئالیێ سیاسى و ئابۆرى ڤه‌ چۆنكى ئه‌ڤ هه‌ردو بیاڤه‌ ل سه‌ر ژیانا هه‌ر ملله‌تى دزالن و چه‌كێ ئه‌ڤ ململانه‌ پێ دهێته‌كرن راگه‌هاندنه‌ و ئه‌ڤجا چ لۆژیكى یان پراكتیكى و تیۆرى كوكارتێكرن ل ده‌روونێ گه‌له‌ك تاكێن كورد دكه‌ت و هه‌تا و ئه‌و چه‌نده‌ په‌یدا كریه‌ كو ئه‌و ئێكرێزیا ره‌گه‌زى وه‌كو مرۆڤ و ئێكدو قه‌بوولكرن هه‌ر وه‌كو خوه‌ بمینت چۆنكى هه‌ر قووناغه‌كا سیاسى بابه‌ته‌كى جوداتر دكه‌ڤیته‌ د مه‌یدانا سیاسى و جڤاكى و ئابوورى دا، خالا ژ ڤێ سه‌رسورمانتر ل هه‌ر دیوانه‌كا بیت دێ بینى دژاتیه‌ك كه‌فتیه‌ هه‌تا د ناڤ تاكان و هه‌كه‌ گه‌نگه‌شه‌كا چه‌ندا ساده‌ بكه‌ن ژى دێ ب توندى نه‌ ب تنێ ئاخڤن به‌لكو دێ توندیێ بكارئینن و ئه‌ڤه‌ هه‌مى دچیته‌ دبن خانا لاوازیا كه‌ساتیا مرۆڤى ڤه‌ و تایبه‌ت ژى د بیاڤێ سیاسى دا مرۆڤ هند وى ب زوى ئێك قه‌بوولناكه‌ن و به‌ردوام هه‌ول ده‌ن ئێك بشكێنن و كارتێكرنێن نه‌رینى ل هه‌ڤ بكه‌ن، به‌لێ هه‌كه‌ به‌رۆڤاژى بیر ل نموونه‌كێ بكه‌ین كو مێزگه‌ردێن تیڤیان بكه‌ین دێ بینین وه‌كو گیانێ كورد ئه‌و هه‌دار ل سه‌ر پاراستنا ئێك نینه‌ و پتر رۆحا تۆلڤه‌كرن و ئێك شكاندن و به‌رژه‌وه‌ندیێن تاكى جهێ خوه‌ دگرن و دوور نینه‌ بۆ تشته‌كێ گه‌له‌ك كێم ئه‌و باوه‌ریا ب ئێك هه‌ى نه‌مینیت و هه‌ر كێماسیه‌كا هه‌ى ب ده‌رزیكێ ڤه‌كولن، زێده‌بارى ڤێ ئێكى ژى ئه‌ڤ ملله‌تێ هنده‌ ده‌رده‌سه‌رى و نه‌خۆشى و شه‌هیدبوون و قوربانى داین بۆ به‌رژه‌وه‌ندیێن تاكى هه‌ر پیرۆزیه‌كا نه‌ته‌وه‌یى دێ بیته‌ تۆندوتیژیى و هه‌ر ره‌فتاره‌كا درندانه‌ دژى ئێك ئه‌نجام ده‌ن، به‌لێ یا جهێ سه‌رسورمانێ ئه‌و كه‌سێن كه‌سانێن بێ ده‌ستهه‌لات دبنه‌ قوربانیێن وێ دژاتیا سیاسى، تایبه‌ت شه‌ره‌كى ده‌روونى ل گه‌ل هه‌ستێن وه‌لاتیان دهێته‌ كرن و جاران ئه‌ڤ تاكه‌ دێ هه‌ولا ره‌ڤێنى ژ وه‌لاتى كه‌ن و ئه‌ڤه‌ ژى نموونه‌ دیارن و كۆچا ب هزاران وه‌لاتیێن كورد به‌لكو دێ هه‌مى تشتێ خوه‌ ل كوردستانێ هیلیت و قه‌ستا جهێن دى كه‌ت به‌س دا د مه‌عمه‌عا سیاسى دا نه‌ نالن و هه‌تا جاران ئه‌و رۆحا نه‌ته‌وه‌یى به‌ره‌ڤ لاوازیێ ڤه‌ دچیت و ئه‌ڤه‌ دێ مه‌ترسیه‌ك ل سه‌ر تاكێ كورد چۆنكى تاك واته‌ ملله‌ت هه‌مى و هه‌ر كورده‌ك ب ئێكى دى ڤه‌ یێ گرێدایه‌، گرنگه‌ ژى سنۆره‌ك بۆ تێكدان و هه‌ڤركى و هه‌ستیاریا سیاسى بهێته‌دان و بهێته‌ كونترۆل كرن چونكو ئه‌م یێن به‌ر ب قووناغێن دى ڤه‌ دچین و پێدڤى ئێكرێزى و ئێكدوقه‌بوولكرنێ نه‌ ئه‌ڤجا ل سه‌ر چ بنه‌ما بیت یا گرنگ روحا نه‌ته‌وه‌یى نه‌هێته‌ تاوانبار كرن و ل سه‌ر حسابا هنده‌ك به‌رژه‌وه‌ندیان بهێته‌ چه‌وساندن و هزر پتر به‌ر ب توندره‌ویێ ڤه‌ بچن، ژ به‌ر هه‌تا نوكه‌ هێشتا ئه‌م ب هیڤینه‌، له‌ورا گرنگه‌ ل هه‌ر جهه‌كێ كارى ئه‌و گیانێ لێبۆرین و ڤیانا كورداتیێ نه‌هێته‌ بن پێ كرن.

20

ده‌نگێ تلیلى و ده‌ستقوتان و هیمه‌تا نه‌ته‌وه‌یى یا ژنێ مل ب ملێ زه‌لامان پشكدارى د سه‌رهلدانێن كوردستانێ دا كرن.

یا ئاشكه‌را كو هه‌ر قووناغه‌كا ژیانێ و كاودانه‌كێ كوردستان تێدا بۆرى ژنێ ئه‌و رۆلێ ئه‌كتێف هه‌بوویه‌ و شیایه‌ ب رۆحه‌كا نه‌ته‌وه‌یى و مه‌عنه‌وى و سیاسى پشكدارى تێدا كریه‌ زێده‌بارى هه‌ر باژێر و گۆنده‌كێ هاتیه‌ ئازادكرن ده‌نگێ ژنێ لێ دیار بو پێخه‌مه‌ت خزمه‌تا گه‌ل و ملله‌تى كریه‌، ژ به‌ر هندێ ژى د سه‌رهلدانێن گۆند و باژیرێن كوردستانێ دا ژنان مل ب ملێ زه‌لامان ب هیمه‌ته‌كا نه‌ته‌وه‌یى كو ژ لایێ پشته‌ڤانیا پێشمه‌رگه‌ى و خه‌بات و هاندان ل گه‌ل پێشمه‌رگه‌ى ئه‌نجام دایه‌، تایبه‌ت ئه‌و كولان و گه‌ره‌كێن هه‌مى كوردستانێ و قولاچ نه‌بوو ده‌نگێ تلیلیێن ژنێ ب كراس و لاوه‌ندى و ب چۆش و خرۆشه‌كا مه‌زن ده‌نگڤه‌دان ئه‌و رۆندكێن ژنێ داكو پێشمه‌رگه‌ى سه‌ركه‌فتنێ د سه‌رهلدانێ بینن و ملله‌تێ كورد ژى زرگاریا خوه‌ وه‌رگرن و ببنه‌ خودان سه‌ربه‌خویى وه‌لاته‌كێ ئازاد، هه‌ناسا ئازادیێ ب كێشن و ئه‌و زولم و سته‌م و شه‌هیدبوونا كور لاو تاكێن ڤى ملله‌تى ل پێش چاڤێن دایك و خویشكا دهاتنه‌ سێداره‌دان ئه‌و خۆراگریا ئافره‌تان ل به‌رانبه‌ر هه‌ر ئه‌زیه‌ته‌كا ب چاڤ دیتى و ل ناڤ ژیایى ئێدى هه‌دار نه‌مایى و هه‌میان ب هه‌ڤرا تلیلیێن سه‌رهدلانێ راهێلاین و وه‌لات تێكدا ب ئازاد بوویى ژ ده‌ستێ رژێما به‌عس، چۆنكو هه‌ر شۆره‌شه‌كا بیت ژ ئیلۆن و گۆلانێ ژى ئافره‌تێ ئه‌و پشكدارى كریه‌ و ئه‌سته‌مه‌ هه‌ر شۆره‌شه‌كا بیت بێ ئافره‌ت ده‌رباز ببیت، ژ به‌ر كو ئه‌و ژنێن ئه‌و زه‌لام و كه‌سێن پشكدارى د شۆره‌شێ دا كرین هه‌ر پشته‌ڤانیا ژنان ئه‌و كاركریه‌ و شیایه‌نه‌ ببنه‌ دایك هه‌ڤژین خویشك و هتد… ئانكو خه‌ونا هه‌ره‌ مه‌زن یا ژنا كورد یا گرێدایى سه‌ربه‌خویا كوردستانێ یه‌ چنكى بزاڤا ژنێ چ یا كێمتر نینه‌ ژ یا زه‌لامى و هه‌ر كار و ره‌فتاره‌كا دكه‌ت د قادا خه‌باتێ دا مه‌ره‌م ژێ هه‌ر بزاڤه‌كا سیاسى و پَى گه‌هشتى مه‌ره‌م پێ كاركرنه‌ مل ب ملێ خه‌باتا سیاسى ژبه‌ر سه‌ربه‌خویا كوردستانێ بوویه‌ ئه‌ڤه‌ ژى وێ چه‌ندێ رادگه‌هینیت كو سه‌ر به‌خوه‌یا هه‌ره‌ مه‌زن یا ژنا كورد سه‌ربه‌خوه‌یا كوردستانێ یه‌ بوویه‌ و دێ بیت ژى، به‌لكو ژن واته‌ دایك واته‌ كوردستان ژ به‌ر هندێ یێ كه‌سانێن سه‌ركره‌ ئاڤا دكه‌ت دایكه‌ و ژنه‌، له‌ورا ژى پێ خه‌مه‌ت هه‌ر ئاوایه‌كێ بیت دكه‌ڤن دا نوكه‌ ژى ژنا كورد سمبۆل بوویه‌ ژ بۆ خه‌بات و دیرۆكا كوردى د یرۆكا جیهانێ دا، چونكى ل كوردستانێ كار و بزاڤ جودایه‌ ل وه‌لاتێن دى یێن دونیایێ ژبه‌ركو ئه‌ز دبینم خه‌بات دره‌وشه‌كا وه‌كو یا نها كوردستان د ڤێ و قووناغێ دا دبۆریت ب زه‌حمه‌ترین قووناغه‌ و باشترین قووناغه‌ ژى ژنێ رۆل ژى وه‌كو كریار هه‌بیت وه‌كو یا بۆرى ژنێ كرى كو نه‌ ب تنێ وه‌كو ده‌نگ چونكى هه‌كه‌ رێژه‌یا ژنان یا زوور بیت ده‌نگ و بزاڤا ژنێ ژى زووره‌ كاریگه‌رى هه‌یه‌ د هه‌ر بیاڤه‌كێ كوردستان ل سه‌ر ده‌رباز دبیت، ئه‌ڤه‌ لایه‌نه‌ك، لایه‌نێ دى یێ بزاڤا ژنێ كو ل وێ باوه‌ریێ نه‌ ئه‌ركێ هه‌ره‌ مه‌زن یێ ل سه‌ر ملێن ژنێ به‌لێ مه‌رجه‌كى ئه‌و رێكا كارێ سیاسى بو ژنێ ژى هه‌بیت نه‌ ب تنێ گۆتن بیت و خوشكرنا ده‌ڤى بیت چۆنكى جاران ئه‌م بێ ئومید دبین ژ ره‌فتارێن زه‌لامان دسه‌ركردایه‌تیێن سیاسى دا ژ هه‌مى لایه‌نا و ئه‌و ئه‌ركێ ژنێ بتنێ سه‌روسیما و جوانیا رۆیێ سیاسى نینه‌ ئه‌گه‌ر نێرینه‌كێ ل شۆره‌شێن چویى بكه‌ین هزر ل جوانیا ژنێ و سه‌روسیمایێ چ تشتا نه‌كریه‌ ب تنێ دلسۆزى و وه‌فاداریا ژنێ ل به‌رانبه‌ر ئاخا كوردستانێ ب رێژا ئیكێ هاتیه‌ و شیایه‌ كارى ژبۆ كوردستانێ بكه‌ت و وه‌لاتێ مه‌ ژى ئه‌ڤرۆ ژى پێدڤى ب شیانێن ژنێ كا چاوا د شۆره‌شێن كوردى و سه‌رهلدانێن كوردى دا كریه‌. به‌لێ هه‌كه‌ ئه‌م پێڤه‌ر بكه‌ین ل به‌رانبه‌ر وه‌لاتێن دى به‌لكو بزاڤ و ئه‌ركێ ژنێ یه‌عنى لڤینا هه‌مى ملله‌تى یه‌ ژن یه‌عنى ملله‌ت په‌روه‌رده‌كرنا تاكێ كورد ژ ده‌ڤ ژنێ یه‌ و ژبه‌ر هندێ ئه‌ركێ ژنێ د هه‌مى بیاڤێن ژیانێ هیڤى و ئومێد ئه‌ن كو سه‌ربه‌خوه‌یا كوردستانێ بوویه‌.

38

ئه‌و روودانا ل جێهانێ رووداى كو ل (هه‌شتى مارس) ل ویلایه‌تا نیویۆرك ل ئه‌مریكا كو پشتى ژنێن د كارگه‌هه‌كا درینێ دا كاردكر مافێن وان دهاتنه‌ بنپێكرن و كار ب زارۆیان دهاته‌ كرن، دیسا ل سالا 1908 ژنان خۆنیشادانه‌ك كر ل جاده‌یێن نیویۆرك ل ئه‌مریكا و هه‌ر پۆسته‌كێ بلند كرى داخوازا مافێ ژنێ و پشتگیریا وێ دكرن، ژ به‌ر هندێ ده‌مێ ئه‌ڤ روودانه‌ په‌یدا بوویى و ل سالا 1977 ب فه‌رمى ل وه‌كو رۆژا جیهانى یا ژنان هاته‌ راگه‌هاندن و هه‌ژى ئاماژێ یه‌ كو ل كوردستانێ ژى هه‌تا راده‌یه‌كێ باش ئه‌و بیره‌وه‌ریه‌ دهێته‌ ساخكرن و ب هه‌مى ئاوایان گرنگى ب پرسا ژنێ دهێته‌ دان، به‌لێ یا دبیته‌ جهێ حێبه‌تیێ ئه‌وه‌ فه‌ره‌ رێخستنێن ژنان ل هه‌مى رێكخراوێن ژنان پێداچوون ل خه‌بات و پرسا ژنێ بهێته‌ كرن، چونكى ب ئاهه‌نگ و كه‌یف و خۆشیێ ده‌ربرینێ ژ وان ئێش و ئازارێن ژنێ ناهێته‌ كرن یا كو ئه‌ڤرۆ د كاودانێن نوكه‌ دا ژن تێدا دبۆریت، چونكى هشیاریا ژنێ بۆ ئه‌رك و ماف و ئاڤاكرن و پێگه‌هاندنا ژنێ ژ خه‌لاته‌كى و دیسا گرنگى ب كه‌یسا ژنێ و دیسا خالا سه‌ره‌كى زارۆ چونكى هه‌شتێ مارس، ئانكو هه‌شتێ ئادارێ، ده‌ربرینه‌ ژ وان كه‌سێن بێ ده‌ستهه‌لات یێن مافێن وان هاتینه‌ خوارن و بن ده‌ستكرن و دیسا دژوارى به‌رانبه‌ر وان ژنێن كرێكار یێن كو د ناڤ بیاڤێ كاری دا كار دكه‌ن و دكه‌ڤیته‌ به‌ر دژواریا دره‌ونى و ژ ئالیێ ئابورى و مافێن یاسایى و ره‌وشه‌نبیرى گرنگى پێ بهێته‌دان.
گرنگه‌ ژن بخوه‌ خوه‌دى ل ماف و ئازادیێن خوه‌ ده‌ركه‌ڤیت و ل هه‌مى ده‌رگه‌هان بده‌ت یێن كو تا نوكه‌ رێ لێ هاتیه‌گرتن و وێ ب خوه‌ژى وێره‌كى نه‌دابوو ڤه‌كه‌ت، سه‌ر ژنوو خوه‌ رێخستى بكه‌ت د ناڤا خێزان و عه‌شیره‌ت و جڤاكى و د بیاڤێ سیاسى و ره‌وشه‌نبیرى دا گاڤێن باشتر پاڤێژیت و ل سه‌ر بنه‌مایێن هزرى و خوه‌ نیاسین و په‌روه‌رده‌كرنه‌كا نه‌ته‌وى كه‌سایه‌تیا خوه‌ ده‌ست پێبكه‌ت ئاڤا بكه‌ت.
ژبه‌ركو د قادا خه‌باتێ دا ژنێ قووناغێن باش ده‌رباز كرینه‌ و شیایه‌ ببیته‌ سه‌ركێشه‌كا ب هێز د ناڤ جڤاكى دا و رۆله‌كێ ئه‌كتێف ببینیت لێ بۆ كاودانێ نوكه‌ و ساخكرنا هه‌شتى ئادارێ تایبه‌تمه‌ندیا خوه‌ هه‌یه‌ ژبۆ پتر ئێكرێزیا ژنێ د بیاڤێ نه‌ته‌وه‌یى و سیاسى دا، یا فه‌ره‌ ژن پتر خوه‌ هشیار بكه‌ت و دیسا بهێته‌ هشیاركرن و بزانیت كا د كیڤه‌دا له‌نگى كه‌فتیه‌ د مافێن وێ دا و خوه‌ لێ بكه‌ته‌ خودان و به‌ره‌ڤانیێ ژ وان مافان بكه‌ت و گڤاشتنێ بێخیته‌ سه‌ر وان ئالیان یێن كو مافێن وێ بن پێ دكه‌ن.
دیسان د رۆژه‌كا وه‌ك ئه‌ڤرۆ دا كو هه‌ڤده‌مه‌ ل گه‌ل سه‌رهلدانێن باژێر و باژێركێن كوردستانى، ئه‌م پێداچوونه‌كێ دره‌وشا ژن و زارۆیان دا بكه‌ین، ئه‌رێ د ڤان 26 سالێن بۆرى دا ئه‌م شیاینه‌ مافێن وان دابین بكه‌ین و به‌رسینگا توندوتیژیێ بگرین ئه‌وا ل هه‌مبه‌رى وان دا دهێته‌كرنێ و هه‌ر وه‌كو من ل ده‌سپێكێ گۆتى دڤێت ئه‌ڤ رۆژه‌ ب تنێ ب پیرۆزكرن و خه‌لاتكرنا چه‌ند ژنان ڤه‌ ده‌رباز نابیت، به‌لكو روونشتن و كۆمبوون بۆ باشتكرنا ڤێ ره‌وشێ بهێته‌ كرنێ.

website security
Facebook Auto Publish Powered By : XYZScripts.com