NO IORG
Authors Posts by كامی كمال

كامی كمال

كامی كمال
49 POSTS 0 COMMENTS

10

ئه‌م و كورد برایێن هه‌ڤدووینه‌، ئه‌م ب چاڤه‌كێ ئێكسان ل به‌سرا و هه‌ولێرێ دنێرین، ئه‌م گه‌لێ كوردستانێ سزا ناده‌ین.. ـ به‌رى ریفراندۆمێ ـ كورد ناخوازن جودا ببن، لێ بارزانى بزاڤا پارچه‌كرنا وه‌ڵاتێ مه‌ دده‌ت، ئه‌ڤه‌ چه‌ند ڕسته‌یه‌كێن زۆر بێ ویژدانانه‌ و نا ئه‌خلاقى یێن هنده‌ك سه‌ركرده‌یێن عه‌ره‌بانه‌ كو به‌رده‌وام ل سه‌ر كه‌ناڵێن ڕاگه‌هاندنێ دئیننه‌ زمان، مه‌به‌ستا وان خاپاندنا پشكه‌كا خه‌لكێ كوردستانێ و خاپاندنا دیدگه‌ها جڤاكێن نیڤده‌وڵه‌تی یه‌ ل سه‌ر عیراقێ و دۆزا كوردان.
پێشكێشكاره‌كێ كه‌ناڵێ “ڕووداو” ده‌مێ ل نیۆیۆرك چاڤپێكه‌فتنه‌ك دگه‌ل بیرمه‌ندێ مه‌زنێ فڕه‌نسى و دۆستێ گه‌لێ كورد”بێرنارد هێنرى لێڤى” ئه‌نجامداى، پرسیاره‌كا گرنگ ئازراند و پرسى: (بۆچى هه‌ر سه‌ركرده‌یه‌كێ عه‌ره‌ب و فارس و تورك ئه‌گه‌ر بڤێت جه‌ماوه‌رى كۆم بكه‌ت و ل هه‌لبژارتنان سه‌ربكه‌ڤیت، ل دژى كوردان ڕادوه‌ستیت؟)!!، بێ گومان پرسیاره‌كا گرنگه‌ كو پێدڤیه‌ هه‌م گه‌لێ كورد ل خوه‌ بپرسیت و هه‌م ژى ئه‌ڤ پرسیاره‌ ل سه‌ركرده‌یێن وه‌ڵاتێن داگیركه‌ر بهێته‌ كرن، گه‌لۆ چ هاندان و فاكته‌ر ل پشت ڤێ چه‌ندێ بوونه‌ كو ئه‌ڤ كه‌ربوكینا عه‌ره‌ب و تورك و فارسان ب گشتى ل دژى كوردان بهێنه‌ ئافراندن؟!، چاوا چێ دبیت وان نه‌ته‌وه‌یان كوردستان داگیر كربیت، سه‌روه‌ت و سامان و ژیانا وان تالان كربیت، ل سه‌ر ئاخا وان ئه‌و ئه‌نفال و كیمیاباران و شه‌هید كربن، كه‌لتوور و پێشڤه‌چوونا وان هه‌ڕفاند بیت، و كوردان به‌روڤاژى!، نه‌ چ جاران ئاخ و وه‌ڵاتێن ڤان وه‌لاتان داگیر كرینه‌، ژبلى به‌رگیریكرنێ ژ خوه‌ چ جاران چه‌ك بۆ وان هه‌لنه‌گرتیه‌، هه‌رده‌م ژى داخوازا دۆستى و برایه‌تیێ ل داگیركه‌ران كریه‌ و دكه‌ن، گه‌له‌ك جاران ژى بۆ نیشتیمان و وه‌ڵاتێن داگیركه‌ران چه‌كێ هه‌لگرتى و به‌رگیرى یا كرى، گه‌لۆ بۆچى سه‌خمه‌راتى ڤان هه‌مى سته‌م و زۆرداریێن داگیركه‌ران و د هه‌مبه‌ردا نیازپاكى و برایه‌تى خوازیا كوردان، ئه‌ڤجا ژى هه‌ر د چاڤ و ناخێن داگیركه‌ران دا كورد تاوانبار و زۆردارن؟!، گه‌لۆ د هه‌مى دیرۆكا مرۆڤایه‌تیێ دا كوردان ژبلى مافێ ژیانێ چیا دیكه‌ ل داگیركه‌ران خواستیه‌، دا كو ب ڤى ئاوایی بهێنه‌ تاوانباركرن كو ژ هه‌ژى برسیكرنێ و كوشتنێ و ژناڤبرنێ بن؟!، مه‌ هه‌میان دیت سه‌خمه‌راتى ئه‌و هه‌مى سته‌م و زوردارى یێن دیرۆكى كو حوكمه‌تێن عیراقێ ل نه‌ته‌وه‌یا كورد كرین، لێ دیسا ل ساڵا 2003یێ پشتى كو ڕژێما دڕنده‌یا به‌عس ژ ناڤچووى كوردان داخوازا ژیانه‌كا ئازاد و مافێن خوه‌ د ناڤ وه‌ڵاتێ عیراقێ دا كرن و داخوازا جودابوونێ نه‌كر!، لێ دیسا حوكمه‌تا عیراقێ مینا حوكمه‌تێن به‌رتر خوه‌ خه‌لكێ كوردستانێ برسى كر، گه‌فێن سه‌ربازى دكرن و هێزێن میلیشیا ئینانه‌ سه‌ر باژێرێن كوردان ب نیازا ژناڤبرنا ئه‌و مافێن كوردان كو ب خوین و جانێ سه‌دان هزار لاوێن خوه‌ ل سه‌رده‌مێ حوكمه‌تا به‌عس ب ده‌ستڤه‌ ئیناى، واته‌ حوكمه‌تا عیراقێ دخواست وان كاران ب داوى بینیت كو حوكمه‌تا به‌عس نه‌شیای بكه‌ت و ته‌نازول بۆ كوردان كرى!، ئه‌ڤجاژى كوردان پتر ژ ده‌ه سالان بزاڤ كرن حوكمه‌تا عیراقێ تێبگه‌هینن كو ده‌ست ژ هزرا شوڤێنیه‌تێ به‌رده‌ن و بزاڤێ نه‌كه‌ن ئه‌و ده‌ستكه‌فتێن ب خوین و قوربانیدانا ده‌هان هزار كوردان ب ده‌ستڤه‌هاتى ژناڤببه‌ن. لێ مینا دیار كوشتن و ژناڤبرنا كوردان ل ده‌ف داگیركه‌ران یا بوویه‌ كه‌لتۆر هه‌تا ڕاده‌یه‌كى بۆ پرۆپاگنده‌یێن هه‌لبژاردنان ژى دبێژنه‌ جه‌ماوه‌رێ خوه‌ ئه‌گه‌ر ده‌نگێ خوه‌ بده‌نه‌ مه‌ دێ بۆ و كوردان ژناڤبه‌ین!، ئه‌ڤجا ژى بۆ جڤاكێن نیڤنه‌ته‌وه‌یی په‌یاما فێدكه‌ن و دبێژنێ ئه‌م و كورد براینه‌ و چ جوداهیه‌ك د ناڤبه‌را كورد و عه‌ره‌بان دا نینه‌ و ب تنێ “مه‌سعود بارزانى” بزاڤێ تێكدانا ئه‌وله‌هى و ئێكپارچه‌یا وه‌ڵاتێ عیراقێ دده‌ت!، یا ژ هه‌میێ نائه‌خلاقیتر و چه‌په‌ڵتر هه‌لویستێ جڤاكێن نیڤنه‌ته‌وه‌یی و وه‌ڵاتێن ب ناڤ دیمۆكراسی یه‌ ل سه‌ر ریفراندۆما هه‌رێما كوردستانێ.
ئێدى پێدڤیه‌ جڤاكێن نیڤده‌وڵه‌تى و وه‌ڵاتێن زلهێز و ب ناڤ دیمۆكراسی یێن جیهانێ وێ ڕاستیێ د ناڤ مه‌ژیێ خوه‌دا بچه‌سپینن كو كورد نابنه‌ف خوراكێن وه‌ڵاتێن دیتر، ئێدى كورد ناچار نینن به‌دبه‌ختیێ و بنده‌ستیێ و خوین به‌خشینێ بپه‌رژینن داكو خه‌لكێن نه‌ته‌وه‌ و ده‌وڵه‌تێن دیتر مفاو خۆشبه‌خیتێ پێ ببینن، ئه‌گه‌ر نییه‌ته‌ك هه‌بیت كو دیسان كوردان ببنه‌ خالا سفرێ، پشتڕاستم سه‌قامگیرى و ئاسایشا هه‌مى جیهانێ دێ كه‌ڤیته‌ دمه‌ترسیێ و له‌رزه‌ له‌رزێ دا.

29

د نوكه‌ دا باردۆخێ كوردستانێ یێ د قووناغا ڕاڤه‌گوهاستنێ دا و پشتى ڕاگه‌هاندنا ئه‌نجامێن ڕیفراندۆمێ، گوهارتنێن مه‌زن ژ نشكه‌كێڤه‌ دیار بوون، جاده‌یا كوردى و خه‌لكێ كوردستانێ ب گشتى ژبه‌ر گوهۆرینا هه‌لویستێن وه‌ڵاتێن جیران ب تایبه‌تى توركیا یێن ڕاستى نه‌ئارامیه‌كا ده‌روونى هاتى.
به‌رى هه‌رتشته‌كێ پێدڤیه‌ گه‌لێ كوردستانێ وێ ڕاستیێ بزانیت كو چ گوهارتنێن مه‌زن ل جیهانێ بهێنه‌ ڕوودان ژ نشكه‌كێڤه‌ نینن و كار یا ل سه‌ر هاتیه‌كرن و نابیت ل سه‌ر بنیاتێ ڕاگه‌هاندنێ و به‌یاننامه‌یێن وه‌ڵاتان هه‌ڵسه‌نگاندنا سیاسى بكه‌ین.
د ڤان ده‌هه‌یێن ده‌ربازبوویی دا باشترین میكانزمێ وه‌ڵاتێن رۆژئاڤا بۆ لاوازكرن و تێكدانا دوژمنێن وان چێكرنا ڕێكخراو و هێزێن ڕادیكاڵێن ئیسلامى بوویه‌ و هه‌روه‌سا بكارئینانا سه‌ركرده‌یێن نه‌زان و دیكتاتۆر د به‌رژه‌وه‌ندیێن خوه‌دا، هه‌ر چاوا رێكخراوا قاعیده‌ هاته‌ چێكرن بۆ لاوازكرنا سیسته‌مێ كۆمونیستى ب سه‌ركردایه‌تیا ڕۆسیا، سه‌دام كشكره‌ كوێتێ ژبۆ هندێ ب وێ به‌هانه‌یێ پێنگاڤێن وان ب باشى بهێنه‌ د ڕۆژهه‌ڵاتا ناڤین دا، هه‌روه‌سا داعش ژى هه‌ر چه‌نده‌ زیانێن مه‌زن هه‌بوون و تراژیدیا چێكرن، لێ ئه‌و هێز ژى بێ ئه‌گه‌ر نه‌هاتبوو چێكرن و نه‌خشه‌یێ رۆژهه‌لاتا ناڤین ب داعشێ هاته‌ گوهارتن، بۆ نموونه‌ ئه‌گه‌ر داعش نه‌بایه‌ ڤه‌گه‌ڕاندنا كه‌ركووكێ ب ده‌هان هزاران شه‌هیدان ژى یا ب زه‌حمه‌ت بوو، ئه‌وا داعشا ل دژى مه‌ ئه‌نجامداى دا عیراق و میلیشیایێن شیعه‌ خراپتر كه‌ن، واته‌ مه‌ قوربانیه‌كا مه‌زن یا خوینێ دگه‌ل داعشێ به‌خشى لێ ده‌ستكه‌فتێن مه‌ یێن سیاسى و سه‌ربازى بێ وێنه‌ بوون، پێشمه‌رگه‌ ژلایێ داگیركه‌رانڤه‌ ب هێزه‌كا مه‌ترسیدار هاتبوو پێناسه‌ كرن، شه‌ڕێ داعشێ ئه‌و پێناسه‌ گوهارت و جه‌وهه‌رێ ئه‌رك و كارێن پێشمه‌رگه‌ به‌یان كر كو پاراستنا مرۆڤایه‌تیێ و خه‌لكه‌كێ سته‌م لێ كرییه‌، شه‌رێ داعشێ نه‌خشه‌یێ ده‌وڵه‌تا كوردستانێ دیار كر، شه‌رێ داعشێ دۆزا كوردى ل سه‌ر ئاستێ جیهانێ به‌رز كر، ژبه‌ر شه‌رێ داعشێ چه‌كه‌كێ باش و پێشكه‌فتى بۆ پێشمه‌رگه‌ هاته‌ پێش كێش كرن كو نها دكاریت ب وى چه‌كى ل هه‌مبه‌ر وڵاتان ژى ب باشى به‌رگیریێ ل خوه‌ بكه‌ت، ئه‌گه‌ر وه‌سا هزر بكه‌ین چێكرن و فرێكرنا داعش بۆ هه‌رێما كوردستانێ هه‌مى ل نشكه‌كێڤه‌ بوون و وڵاتێن زلهێزێن جیهانێ ب تایبه‌ت ئه‌مریكا نه‌شیا رێكێ ل داعش بگریت كو تراژیدیا چێنه‌بن، ئه‌م دشاشین و تێگه‌هشتنا مه‌ یا سیاسى یا لاوازه‌، هیچ مه‌نتق نه‌بوو كو چه‌ند چه‌كدارێن داعش نزیكى ده‌ه رۆژان چیایێ شنگالێ بگرن و فرۆكه‌یێن ئه‌مریكى ب ڤێ پێشكه‌فتنێن بهێز و بێ وێنه‌ نه‌شیان ده‌روازه‌یه‌كێ بۆ گه‌هاندنا ئالیكاریێن خه‌لكێ لێ قه‌وماوى ل چیا ڤه‌كه‌ن!، لێ دیاره‌ چێبوونا تراژیدیایێ پتر هاریكار بوو كو به‌رنامه‌یێن خوه‌ ل رۆژهه‌لاتا ناڤین جێ بجێ بكه‌ن.
د نوكه‌د ا حه‌تا ڕاده‌یه‌كێ زۆر كێشه‌یێن كوردستانێ چاره‌سه‌ر بوون بۆ دامه‌زراندنا ده‌وڵه‌تا كوردستانێ، هه‌م مادده‌یێ 140 ئوتوماتیكى ب داعش جێ بجێ بوو، هه‌م بوونه‌ خوه‌دى چه‌ك بۆ به‌رگیرى كرنێ ژخوه‌، هه‌م مینا نه‌ته‌وه‌یه‌كێ سته‌م دیدى و خوه‌دى دیروكه‌كا پڕ كاره‌سات و تراژیدییا و هه‌م ئاشتى خواز و دژه‌ تیرور ل جیهانێ هاتنه‌ سه‌لماندن..
هه‌رێما كوردستانێ ب سه‌رۆكایه‌تیا بارزانى شیان به‌رژه‌وه‌ندیێن سیاسى یێن كوردستانێ و وڵاتێن رۆژئاڤا پێكڤه‌ گرێده‌ن، ژ لایه‌نێ ئابوورێ حوكمه‌تا هه‌رێما كوردستانێ ب سه‌رۆكایه‌تییا تێچیرڤان بارزانى مه‌زنترین كۆمپانیایێن جیهانێ كو كاریگه‌ریێ ل ئابوورێ هه‌مى جیهانێ دكه‌ن ئینانه‌ كوردستانێ، واته‌ تێكچوونا كوردستانێ نه‌ك ب تنێ زیانێ دێ ب وه‌ڵاتێن هه‌ڤسنۆر گه‌هینیت، دێ كاریگه‌رییه‌كا نێگه‌تیڤ ل ئابوور و به‌رنامه‌یێن ئیكونوومى یێن وه‌ڵاتێن جیهانێ ژى كه‌ت.
یا گرنگ كو خه‌لكێ كوردستانێ پێدڤیه‌ بزانیت د ڤى سه‌رده‌می دا سیناریۆیێن سیاسى زۆر بهێزن، ب ڕاگه‌هاندنا به‌یاننامه‌ یان ئاخفتنا سه‌رۆكێ وڵاته‌كێ دلگران نه‌بن، ئه‌وا دهێته‌ كرن و دهێته‌ گۆتن گه‌له‌ك ژێك دوورن، بۆ نموونه‌ ئه‌مریكا ل بابه‌تێ ڕاكرنا ئالایێ كوردستانى، فیدرالیه‌تا كوردستانێ، بابه‌تێ پێشمه‌رگه‌، ڕاكێشانا بۆریا نه‌فتا كوردستانێ و فرۆتنا وێ بێ به‌غدا، ل ڤان هه‌میان پشتگیریا به‌غدا دكر و ل دژى مه‌ به‌یاننامه‌ ده‌ردكرن، لێ ل داویێ هه‌مى د به‌رژه‌وه‌ندیا كوردان دا ب داوى هاتن و هیچ ده‌ستكه‌فته‌ك بۆ عیراقێ تێدا نه‌بوون، هیچ ئه‌گه‌رو مه‌نتقه‌ك نینه‌ كو ئه‌مریكا دجه‌وهه‌ردا پشتگیریا دوژمنێن خوه‌ و سیاسه‌تا ئیرانێ ل دژى خوه‌ ل ده‌ڤه‌رێ بكه‌ت، هه‌تا ڤێ چركێ ژى ئه‌مریكا ب كریار پشتگیریا مه‌یا كرى (نه‌ك ب به‌یاننامه‌یان!).

50

به‌رۆڤاژییا سیاسه‌تا وڵاتێن رۆژهه‌ڵاتا ناڤین، سیاسه‌تا ئه‌مریكا ب چ ئاوایه‌كى ل سه‌ر تۆرێن ڕاگه‌هاندنێ و به‌یاننامه‌یان ناهێته‌ خواندن، ئه‌و سیاسه‌تڤان ئانكو رۆژنامه‌نڤیسێ سیاسى كو بڤێت هه‌ڵسه‌نگاندنێ بۆ سیاسه‌تا ئه‌مریكا ل سه‌ر پیڤه‌رێ لێدوانێن ڕاگه‌هاندنێ بكه‌ت، شاشیه‌كا مه‌زن هه‌مبه‌رى پیشه‌یا خوه‌و خوینه‌رێن خوه‌ ئه‌نجام دده‌ت.
ئه‌گه‌ر چاڤه‌كێ د سیاسه‌تا ئه‌مریكا دا بخشینن ل چل سالێن ده‌رباز بووی دا، دێ تێگه‌هین كردارێن ئه‌مریكا و لێدوانێن وێ گه‌له‌ك جاران ل دژى هه‌ڤ ب دووماهی هاتینه‌، بۆ نموونه‌ د شه‌ڕێ هه‌شت سالیێ ساڵێن هه‌شتێیان دا كو د ناڤبه‌را عیراقێ و ئێرانێ دا چێبووى، ئه‌مریكا ب باشى ئالیكارییا ڕژێما عیراقێ دكر و ل شه‌ڕێ كوێتێ ژى ئه‌مریكا شیا ل داگیركرنا كوێتى عیراقێ هان بده‌ت، ئه‌ڤ چه‌نده‌ ببیته‌ فاكته‌ره‌ك كو ژ ترسێن “سه‌دام حوسێن”دا هه‌مى ئه‌و وڵاتێن عه‌ره‌بى كو نه‌دڤیا چ جاران ئه‌مریكا ل ده‌ڤه‌رێ ببینن، داخواز ژ ئه‌مریكا بكه‌ن د هه‌وارا وان دا بهێت و سه‌ربازى مایتێكرنێ ل دژى عیراقێ ئه‌نجام بده‌ت. د شه‌رێ نه‌فتێ دا ژى كو د ناڤبه‌را هه‌ولێرێ و به‌غدادا دهاته‌ كرن، ئه‌مریكا ب ڕاگه‌هاندن و به‌یاننامه‌ دژایه‌یتیا به‌رژه‌وه‌ندیێن هه‌ولێرێ دكر، هه‌تا ل دژى توركیاژى لێدوان ددان كو نابیت نه‌فتا كوردان بگه‌هیته‌ به‌نده‌را جه‌یهان، لێ د پراكتیك دا ئه‌و پێنگاڤ هاتنه‌ هاڤێتن و حوكمه‌تا هه‌رێمێ سه‌ركه‌فتن ل سه‌ر به‌غدا ئینا و ئه‌مریكا ژى ئه‌ڤ دیفاكتۆیه‌ په‌رژاند.
ئه‌مریكا دو جۆره‌ سیاسه‌تان ل گه‌ل وه‌ڵاتان دا په‌یره‌و دكه‌ت، یا ئێكى ستراتیژیه‌ كو په‌یوه‌ندى یێن درێژخایه‌ن دگه‌ل هه‌ڤپه‌یمانێن خوه‌ گرێ دده‌ت، ئه‌و وه‌ڵاتێ دخوازیت ئه‌ڤ جۆره‌ په‌یوه‌ندیه‌ ل گه‌ل ئه‌مریكا دا هه‌بن، پێدڤیه‌ لایه‌نێ وێ یێ سه‌ربازى تا وى ڕاده‌ی بهێز ببیت كو ل ژێر كۆنترۆلا ئه‌مریكا ده‌رنه‌كه‌ڤیت، دپێنگاڤێن سه‌ره‌كى یێن گرێدانا په‌یوه‌ندى یێن سیاسى و ئابوورى و دببلۆماسى و سه‌ربازیدا ب گشتى ل ژێر چه‌ترا هه‌ژمونێ ئه‌مریكا دا ده‌رنه‌كه‌ڤیت. جۆرێ دوویێ ته‌كتیكیه‌، ئه‌گه‌ر وڵاته‌كێ به‌رۆڤاژى ستراتیژییه‌ت و سیاسه‌تا ئه‌مریكا پێنگاڤ هاڤێتن پێدڤیه‌ هه‌تا ل ده‌ستقوتانا ئه‌مریكا ژى بترسیت، ژ به‌ر كو ئێدى دێ ل هه‌ڤپه‌یمانه‌كێ ستراتیژى بیته‌ هه‌ڤپه‌یمانه‌كێ ته‌كتیكى و مینا كه‌ره‌سته‌یه‌كێ بۆ به‌رژه‌وه‌ندى یێن ئه‌مریكا بكارهێت، هه‌روه‌كى “موعه‌مه‌ر قه‌زافى” كو هه‌ڤپه‌یمانێ ئه‌مریكا بوو و خوه‌ سه‌ربازى نێزیكى ڕۆسیا دكر، مینا “سه‌دام حوسێن” كو نێزیكێ ئه‌مریكا بوو و ل دژى وه‌لاتێ “ئیسرائیل”ێ بوو، و وه‌ڵاته‌كێ دیكتاتۆرخواز و سه‌ربازى بوو، هه‌روه‌كى رژێما شاهێ ئیرانێ به‌رى ساڵا 1979 كو گرنگیه‌كا مه‌زن ب كه‌رتێ سه‌ربازى ددا و هه‌ڤڕكى ل گه‌ل رۆژئاڤا و ئه‌مریكا دكر، ئه‌مریكا شیا هه‌ر زوى ب دانانا رژێمه‌كا ئیسلاما سیاسى، ئیرانێ ژ پێشكه‌فتنان ئیفلیج بكه‌ت.
توركیا ئێك ژ وان هه‌ڤپه‌یمانێن ئه‌مریكایه‌ كو پێگیرێ سیاسه‌تا وێیه‌ و نكاریت بێ ڕه‌زامه‌ندیا ئه‌مریكا پێنگاڤێن ستراتیژى بچیته‌ پێش، هه‌روه‌سا حوكمه‌ت و سیاسه‌تا هه‌رێما كوردستانێ ب ڕێڤه‌به‌رى و سه‌ركردایه‌تیا پارتى دیمۆكراتى كوردستان، یێن شیاین ئه‌مریكا بگه‌هیننه‌ وێ باوه‌ریێ كو كوردستان دێ پێگه‌هه‌كێ گرنگ بیت د سیاسه‌ت و به‌رژه‌وه‌ندیێن رۆژئاڤا دا ئه‌گه‌ر پاڵپشتى لێ بهێته‌ كرن دێ باڵانسێن سیاسى ل ده‌ڤه‌رێ بۆ به‌رژه‌وه‌ندى یێن وڵاتێن دیمۆكراسیخواز هێنه‌ گوهارتن و دێ بنه‌ فاكته‌رێ ئارامیێ و سه‌رچاوه‌یه‌كێ ب هێزێ ئابوورى بۆ ئه‌ورۆپا و ئه‌مریكا و هه‌ڤپه‌یمانێن وان، هه‌ر ئه‌ڤ چه‌نده‌ ژى نه‌ك نها به‌لكى پتر ژ بیست ساڵانه‌ هاتیه‌ زانین و ئه‌مریكا گرنگیه‌كا مه‌زن یا ب هه‌رێما كوردستانێ داى ب سه‌ركردایه‌تیا “ماڵباتا بارزانى” ژبه‌ر كو ژبلى هه‌مى هزره‌كا حزبى و عاتفى، ماڵباتا بارزانى یێن شیاین بۆ وان بسه‌لمینن كو ب تنێ كه‌سایه‌تییه‌كن ژ هه‌مى لایه‌نه‌كێڤه‌ هه‌م كوردستانێ كۆم بكه‌ن و بپارێزن، هه‌م ژى د سیاسه‌تا سه‌رده‌م و گرنگیا ئاسایش و سه‌قامگیریا جیهانێ بگه‌هن، له‌وما ئه‌مریكا د ڤان ده‌ه ساڵێن ده‌رباز بۆیدا هه‌ڤپه‌یمانێن خوه‌ ل رۆژهه‌ڵاتا ناڤین ب تایبه‌ت توركیا و سعوودیا یێن تێگه‌هاندى كو كوردستانا باشۆر بنیاتێ ستراتیژیا وێ یا نوویه‌ و پێدڤیه‌ ب هه‌ر جۆره‌كێ بیت خوه‌ بگونجینن و بپه‌رژینن، هه‌لبه‌ت ده‌وڵه‌تا كوردستانا باشۆر دێ فاكته‌ره‌كێ گرنگ بیت بۆ په‌ره‌پێدانا دیمۆكراسیێ ل ده‌ڤه‌رێ و دێ سه‌رچاوه‌یه‌كێ ب هێزێ ئابوورى بیت، ژبه‌ر بن ده‌ستیا پارچه‌یێن دیكه‌ یێن كوردستانێ ل ژێر حوكمێ وڵاتێن مه‌ترسیدار و پۆلیسى دێ میكانزمێ رزگاربوونا وان پارچه‌یان بیت، كو د به‌رژه‌وه‌ندیا وڵاتێن رۆژئاڤا و رۆسیا دایه‌ ژى، له‌وما لێدوان و پێنگاڤێن ئه‌مریكا و هه‌ڤپه‌یمانێن وێ ل دژى كوردستانێ ته‌كتیكى و ده‌مكینه‌ و جهێ ترسێ نینن.

15

ئێك ژ بوونه‌وه‌رێن هه‌ره‌ دڕنده‌ ل گه‌ل بوونه‌وه‌رێن دیتر كو ل سه‌ر زه‌ڤیێ دژین، دبیت مرۆڤ بن، ده‌مێ زانایێن زانستى كو ژ پێشكه‌فتى و هشیارترین ته‌خێن جڤاكانه‌ ل سه‌ر ده‌رمانه‌كێ تێسته‌كێ دكه‌ن، ل ده‌سپێكێ گیانداران دكه‌نه‌ ئارمانج، هه‌ر ل سه‌ر ڤێ ڕێره‌وێ ده‌مێ ب
گشتى كه‌سایه‌تى یێن ژیر و سیاسى ژى تێستێن سیاسى و سه‌ربازى و ئابوورى دكه‌ن بزاڤێ دكه‌ن خه‌لكێن نه‌فام و بێ ئاگه‌ه ل پێشیا خوه‌ بهاژوون و تێستان ل سه‌ر بكه‌ن و ل قوربانیدانێ خوه‌ بده‌نه‌ لایه‌كێ و ل ده‌ستكه‌فتان ژى سینگێ خوه‌ ب ئیننه‌ پێش. “شاسوار عه‌بدولواحید” ئێك ژ كه‌سایه‌تى یێن نه‌فام بوو د سیاسه‌تێدا كو كه‌فته‌ داڤێن بزاڤا گۆڕان و كۆمه‌ڵا ئیسلامى، ئه‌ڤ حزبێن سیاسى یێن كوردستانێ خوه‌دى سیاسه‌ته‌كا شێلى و ناڕوونن ب مه‌به‌ستا خاپاندنا خه‌لكێن جڤاكى، د هه‌مى واره‌كی دا نیڤه‌كا دارى دگرن و چاڤه‌رێى باڵانسێ دكه‌ن و بۆ هه‌ر لایه‌كێ هێز چوو خوه‌ دده‌نه‌ وى لایی، ل هه‌مى ده‌ستكه‌فتێن حوكمه‌تێ خوه‌ ب خوه‌دى دزانن و ل هه‌مى كێماسییان پارتى پێ به‌رپرس دكه‌ن!، هه‌م پشكدارێن رێڤه‌برنێ و به‌رپرسیاریه‌تێدا ل حوكمه‌تێ و هه‌م ئوپوزسیۆنه‌كا دژوارن تا ڕاده‌یه‌كێ كو به‌رده‌وام بزاڤا هه‌لوه‌شاندنا حوكمه‌تێ و به‌رنامه‌یێن وێ دكه‌ن!، ئه‌ڤ جۆره‌ ئیزدواجییه‌ته‌ د سیاسه‌تێ دا به‌لگه‌یێن نیازخرابیێن ڤان حزبانه‌. پشتى كو سه‌رۆك بارزانى ل گه‌ل لایه‌ن و حزبێن سیاسى ل 7ێ حوزه‌یرانێ كۆم بووى و 25ێ ئیلۆنێ دیاركرى بۆ ئه‌نجامدانا ریفراندۆمێ بۆ سه‌ربه‌خوه‌بوونا كوردستانێ، ئێدى ئه‌و كارتا بزاڤا گۆڕان و كومه‌ڵ یا ئیسلامى سۆتاند كو دگۆت بارزانى موزایه‌ده‌یان دكه‌ت و بابه‌تێ ڕیفراندۆم چ بنگه‌هه‌ك ژ بۆ نینن ل جه‌م بارزانى، ئه‌ڤجا ڤان هه‌ردو حزبان ده‌ست ب چێكرنا كارتێن دیتر یێن خاپینۆك كرنه‌ڤه‌، ل ده‌سپێكێ دگۆت ده‌وڵه‌تا بارزانى به‌حس دكه‌ت بۆ توركیایه‌!، پشتى كو توركیا دژایه‌تیا خوه‌ بۆ ریفراندۆمێ ڕاگه‌هاندى ئه‌و كارت ژى سۆت، پاشان گۆڕان و كۆمه‌لا ئیسلامى تا وى ڕاده‌ى كو دشیانێن واندا بن بزاڤ كرن ڤێ پڕۆسێسێ تێكبده‌ن و سه‌رنه‌گریت، ده‌مێ وان دیتى كو یه‌كێتى نیشتیمانى كوردستان ب گشتى و ئێكگرتوویا ئیسلامى ژى پشتگیریه‌كا ڕژد ژ ریفراندۆمێ دكه‌ن، ئێدى وان نیڤا دارى گرت و دگۆت ئه‌م سه‌ربخوه‌ بوونێ مینا مافه‌كێ ڕه‌وایێ گه‌لێ كورد دبینین لێ ده‌م نه‌هاتیه‌، بیێ كو دیار بكه‌ن چ ده‌مه‌كێ باشه‌؟!، چ زه‌مانه‌ته‌كێ باشتر ل واقعێ نوكه‌ ئه‌م تێدا دێ هه‌بیت؟، بۆ هندێ كو مینا دو حزبێن سیاسى ب فه‌رمى ل دژى سه‌ربخوه‌بوونێ نه‌ڕاوه‌ستن و نه‌بێژن ئه‌م ل گه‌ل ده‌نگێ (نه‌خێر)ین، ئه‌وان شاسوار عه‌بدولواحید خودانێ ده‌زگه‌هێNRT دا پێشیا خوه‌و به‌ره‌یێ (نه‌خێر) چێكر ناڕِاسته‌وخوه‌، داكو هه‌م بزاڤا ژناڤبرنا پڕۆسیسا ریفراندۆمێ بكه‌ن و هه‌م ژى بێژن ئه‌م ل گه‌ل ده‌نگێ (نه‌خێر)دا نینین. پشتى كو وان دیتى ئێدى نه‌شێن شكه‌ستێ ب بارزانى ب ئینن و پڕۆسسا ریفراندۆمێ دێ هه‌ر بڕێڤه‌چیت، ئه‌وان دڤیا دووباره‌ بهێنه‌ سه‌ر سفرا به‌رهه‌ڤكرى و خوه‌ ژى بكه‌نه‌ خوه‌دى ئه‌ڤ ده‌ستكه‌فتا ب شه‌ره‌ف، لێ كۆمبوونا 14 ڤێ مه‌هێ ل سه‌حێلان كو د ناڤبه‌را “برێت مه‌كگۆرك” و نوونه‌رێ UN و نوونه‌رێ به‌ریتانیا ل گه‌ل سه‌رۆك بارزانى هاتیه‌كرن و د ئه‌نجام دا سه‌رۆكاتیا هه‌رێمى ڕاگه‌هاند كو ل سه‌ر ئه‌لته‌رناتیڤێ هه‌ڤپه‌یمانان دێ جڤیێن و ئه‌نجامێ وێ به‌رسڤ ده‌نه‌ڤه‌، دیسا گۆڕان و كۆمه‌ڵ په‌شێمان بوونه‌ڤه‌ و ڤه‌گه‌ڕییانه‌ڤ پاش!، د هزرا گۆڕان و كومه‌ڵێ دا ئێدى دێ بارزانى په‌شێمان بیته‌ڤه‌ و ریفراندۆم ناهێته‌كرن و ئه‌و ژى دێ خوه‌ كه‌نه‌ قه‌هره‌مان و بێژنه‌ خه‌لكێ كوردستانێ مه‌ زۆر زوى هوون ئاگه‌هدار كرن كو بارزانى ریفراندۆمێ ناكه‌ت و ئه‌ڤه‌ژى به‌رهه‌م، ئه‌ڤه‌ بوو بزاڤا گۆڕان و كومه‌ڵا ئیسلامى هه‌رپشتى وێ ڕاگه‌هاندنا سه‌رۆكایه‌تیا هه‌رێمى پاشگه‌زیا خوه‌ بۆ پشكدارى كرنێ د په‌رله‌مانى كوردستانێدا ڕاگه‌هاند!، پشتى وێ چه‌ندێ ژى سه‌رۆك بارزانى ل كۆمبوونا جه‌ماوه‌ری یا ئامێدیێ دیار كر كو ب چ ئاوایه‌كێ ئه‌لته‌رناتیڤێ پێدڤی نه‌گه‌هشتینه‌ ده‌ستێ وان و هیچ كه‌سه‌ك و وه‌ڵات و لایه‌نه‌ك نه‌شێت رێگیریێ ل ڤێ خواستا ڕه‌وایا گه‌لێ كورد بكه‌ت. ل ڤێره‌ بوو كو بزاڤا گۆڕان و كومه‌ڵ یا ئیسلامێ مینا دیڤه‌لانكا سه‌رنه‌كه‌فتن كو مینا هه‌ر جار ل ده‌ستكه‌فتان بهێنه‌ سه‌ر سفره‌یا به‌رهه‌ڤكرى!.

7

هه‌ر چاوا هه‌ر كه‌سه‌ك وێ ڕاستیێ دزانیت كو ڕیفراندۆم پرۆسه‌كا دیمۆكراسیه‌، ب وى ئاوایی پێدڤیه‌ هه‌ر كه‌سه‌ك بزانیت كو مه‌به‌ست ژ ئه‌نجامدانا ڕیفراندۆمێ چیه‌، گه‌لۆ سه‌ركردایه‌تیا كوردستانێ گومان ل وێ چه‌ندێ هه‌بوون كو سه‌ربه‌خوه‌بوون یا باشه‌ بۆ گه‌لێ كوردستانێ له‌وما داخواز دكه‌ن ل خه‌لكى بپرسن؟!، بۆچى دوژمن ل دژى ڕیفراندۆمێ گه‌فان دكه‌ن؟!، ئه‌ڤه‌ ئه‌و پرسیارێن ساده‌نه‌ كو پێدڤیه‌ مرۆڤ هزر تێدا بكه‌ت به‌رى كو ل سه‌ر ڕیفراندۆمێ بپه‌یڤیت.
گه‌لێ كوردستان ب هه‌مى پێكهاته‌و لایه‌ن و نه‌ته‌وه‌و ئایین په‌رست و حزبێن خوه‌ڤه‌، ب ئه‌و كوردێن شوڕش كرى، ئه‌و كوردێن ل ده‌رڤه‌یی شۆره‌شێ مایه‌ڤه‌ و قوربانیێن خوینێ نه‌داى، ب ئه‌و كوردێن بۆیه‌ هه‌ڤچه‌په‌رێن دوژمن و داگیركه‌ران ژى، هه‌میان پێكڤه‌ قوربانى یێن داین ل ژێر سیبه‌رو ده‌سه‌ڵاتا به‌غدایێ دا، لێ هه‌ر ئێكێ ب ئاوایه‌كى، د عیراقێ دا نه‌ك ب تنێ خه‌لكێ هه‌رێما كوردستانێ، به‌لكى هه‌مى عه‌ره‌بێن عیراقێ ژى قوربانی یێن ده‌وڵه‌ته‌كێنه‌ كو كه‌لتۆر و نه‌ته‌وه‌و بیروباوه‌رێن وان یێن ئایینى و سیاسى لێكجودانه‌، هه‌تا كو ژیان مابیت عه‌ره‌بێن سوننه‌ قوربانى یێن حوكمه‌ته‌كێنه‌ ل به‌غدا كو عه‌ره‌بێن شیعه‌ ب ڕێڤه‌دبه‌ن و به‌روڤاژى، لێ یا گرنگ ئه‌وه‌ ئه‌م مینا كورد خوه‌ ب باشى بنیاسین و چاره‌نڤیسێ خوه‌ دیار بكه‌ین، ب تایبه‌ت د نها دا كو ده‌لیڤه‌یه‌كا دیرۆكى بۆ گه‌لێ كوردستانێ یا هاتیه‌ پێش.
د ناڤ ده‌زگه‌هێن راگه‌هاندنێ دا گه‌له‌ك جاران هنده‌ك به‌رپرسێن لایه‌نێن سیاسى یێن كوردستانێ بزاڤێ دكه‌ن خه‌لكه‌كێ هان بده‌ن داكو ده‌نگێ خوه‌ بده‌نه‌ “نه‌خێر”، بۆ ڤێ چه‌ندێ وێنه‌یه‌كێ دیمۆكراسیه‌ته‌كا خاپینۆك ژ ڕوومه‌تێ خوه‌ڕا دیار دكه‌ن و دبێژن، ده‌نگێ “نه‌خێر” ئاساییه‌ و دشێن هه‌لبژێرن، لایه‌نێن سیاسى دشێن بێ ده‌نگیێ هه‌لبژێرن داكو شاشى یێن یاسایی نه‌كه‌ن، لێ نابیت خه‌لكى هان بده‌ن كو ده‌نگى بده‌نه‌ “نه‌خێر”.
ئه‌و كه‌سێن ساده‌و تێنه‌گه‌هشتى كو ده‌نگێ خوه‌ دده‌نه‌ (نه‌خێر) ب ناپاك (خائین) پێناسه‌ ناكه‌م، لێ ب پشتڕاستى دبێژم ئه‌و لایه‌نێن سیاسى یێن كوردستانێ كو ل سه‌ر ئاخا كوردستانێ دژین و خوه‌دى سه‌رمایه‌ و حزبێن نیشتیمانینه‌ ل كوردستانێ، بزاڤێ دكه‌ن خه‌لكه‌كێ هان بده‌ن داكو خه‌لك ده‌نگى ب “نه‌خێر” بده‌ن، ده‌سپێكێ مه‌زنترین ناپاكن دگه‌ل خه‌لكێ خوه‌، پاشان دیرۆك و نهاو پاشه‌ڕۆژا ڤى وه‌ڵاتى و خوینا هزاران شه‌هید و قوربانی یێن كوردستانێ، حزب و سه‌ركرده‌ یێن هه‌ین هزاران لاوێن ڤى وه‌لاتى ل ژێر درووشمێن سه‌ربخوه‌ بوون بۆ كوردستانێ یێن كرینه‌ قوربانى، ئه‌ڤرۆ خه‌لكى هان دده‌ن كو ل سه‌ر سندۆقا ده‌نگدانێ ده‌نگى ل دژى سه‌ربخوه‌بوونێ بده‌ن!!.
به‌لێ گومان تێدا نینه‌ پرۆسا ڕیفراندۆمێ پرۆسه‌كا دیمۆكراسیه‌ و ده‌نگدان ب “نه‌خێر” بۆ عیراقچیه‌تیێ، باشترین دیمۆكراسیه‌ته‌، نه‌ك بتنێ ناپاكى نینه‌!، به‌لكى وه‌فا و دلسۆزیه‌ ژى، لێ بۆ گه‌لێ كورد كه‌س نه‌شێت بێژیت دژایه‌تیكرنا ده‌وڵه‌تا كوردستانێ پاكیه‌!، ئه‌ڤجا ب تڤه‌نگێ بیت ئان ده‌نگێ نه‌خێر چ جوداهى نینه‌!، ئه‌و فیشه‌كا هنده‌ك كوردان پێشمه‌رگه‌ پێ شه‌هید دكرن، بۆ هندێ بوویه‌ كو بزاڤا ڕزگاریخوازا كوردان بهێته‌ ڤه‌مراندن و نه‌مینیت داكو كورد دپاشه‌ڕوژێدا نه‌گه‌هنه‌ قووناغه‌كێ كو داخوازا سه‌ربخوه‌یبوونێ بكه‌ن، هه‌مى دژایه‌تى و پلانێن دوژمنان ژناڤچوون و شكه‌ستن، كورد گه‌هشتنه‌ قووناغا داویێ كو ڕاگه‌هاندنا ده‌وڵه‌تا كوردستانێ یه‌، ئه‌ڤجا خه‌لكه‌ك ل كوردستانێ ده‌نگى بده‌نه‌ (نه‌خێر) بۆ ده‌وڵه‌تا كوردستانى چ پێناسه‌یه‌ك ژ هه‌ژى وى كوردی هه‌یه‌؟!.
سه‌ركردایه‌تیا كوردستانێ گومان ل كوردستانیان نینه‌ كو ژ هه‌ژى ده‌وڵه‌ته‌كا سه‌ربخوه‌نه‌، لێ ریفرامدۆم ژ پێخه‌مه‌ت پتر شه‌رعیه‌ت دانه‌ ب بڕیارا سه‌رخوه‌یی بوونێ، هه‌ر چاوا هه‌مى جیهانێ دزانى كو “سه‌دام حوسێن” كه‌سه‌كێ تاوانبار بوو و ژهه‌ژى مه‌زنترین سزا بوو، لێ داكو بڕیارا سزادانا وى شه‌رعى ببیت، دادگه‌هكرن گه‌ره‌گ بوو، ب ڤى ئاوایی داخوازا كوردان ژبۆ وه‌لاتێن جیهانێ یا ڕۆن نینه‌ كو ب ڕاستى كوردان سه‌ربخوه‌یی دڤێت ئان نه‌!، هه‌تا نهاژى گه‌له‌ك دوژمنێن كوردان ل وه‌ڵاتێن جیهانێ دبێژن (كوردان سه‌ربخوه‌ بوون نه‌ڤێت بتنێ “مه‌سعود بارزانى”یه‌ ڤان پرسگرێكان بۆ عیراقێ چێدكه‌ت، خه‌لكێ كوردستانێ هه‌مى هه‌ڤسۆز و دڵسوزێن عیراقێ و حوكمه‌تا به‌غدانه‌!)، ئه‌ڤرۆ سه‌ركردایه‌تیا كوردان دخوازن ده‌ڤێ دوژمنى بگرن و گه‌ل بڕیارا خوه‌ بده‌ت، هه‌كه‌ ڕیفراندۆما كوردستانێ یا خراب بایه‌و دژى دوزا كوردان بایه‌، چ لایه‌نه‌كێ مینا مالكى و وه‌لاتێن داگیركه‌ر پشتگیریا ریفراندۆمێ نه‌دكر داكو ئه‌و خرابى جهێ خوه‌ بگریت.

65

ئێك ژ ئه‌و خالێن كو د نوكه‌ دا یا بۆیه‌ جهێ ته‌نگه‌زارى و ترسیانا خه‌لكێ كوردستانێ ل سه‌ر ئه‌نجامدانا ڕیفراندۆمێ و نزیكبوونا ڕاگه‌هاندنا سه‌ربخوه‌بوونێ، گرتنا ده‌روازه‌یێن سنۆرییه‌ ژلایێ وه‌لاتێن هه‌ڤسنۆرڤه‌ ب تایبه‌تى ل گه‌ل توركیایێ كو د نوكه‌ دا نه‌فتا كوردستانێ د رێیا به‌نده‌را جه‌یهاندا دهێته‌ فرۆتن.
گۆره‌پانا سیاسى هه‌مى ده‌مه‌كێ مینا ته‌ختێ یارییا شه‌تره‌نجێیه‌، ده‌مێ دو یاریزان ل گه‌ل هه‌ڤدو یارییا شه‌تره‌نجێ دكه‌ن، ئه‌گه‌ر چه‌ند ژى هه‌ڤال و نێزیكێ هه‌ڤدو بن، د له‌یزینا یاریێ دا ئه‌و په‌یوه‌ندیا كاریگه‌ریێ ل سه‌ر بزاڤێن سه‌ركه‌فتنێ ناكه‌ن، واته‌ یاریكه‌ر هه‌رده‌مێ شیا دێ كشوماتێ ده‌ته‌ به‌رامبه‌ر خوه‌، ب ڤى ئاوایی د گۆره‌پانا سیاسی دا ژى تشته‌ك ب ناڤێ سۆز و هه‌ڤالینى و دووژمنكاریا بێ بناغه‌ نینه‌، واته‌ به‌رژه‌وه‌ندى ل به‌رامبه‌ر به‌رژه‌وه‌ندینه‌، هه‌ر وڵاته‌ك ل گۆڕ به‌رژه‌وه‌ندیێن خوه‌ د گۆره‌پانا سیاسی دا دله‌یزیت و ئه‌گه‌ر شه‌ڕ د به‌رژه‌وه‌ندیێن وڵاته‌كێدا بیت درێغیێ لێ ناكه‌ت و به‌روڤاژى. ئه‌و وڵاتێن كو سه‌رۆك و رێبه‌رێن وان د تێگه‌ه و چه‌مكێ سیاسیدا دلاواز و نه‌زان بن زووتر ڕاستى زیانێ و دوڕاندنێ دبن هه‌روه‌كى مینا “سه‌دام حوسێن” كو ل نه‌زانینێ كه‌فته‌ داڤێن وڵاتێن زلهێز و ب داگیركرنا وڵاتێ كوێتێ خوه‌ ڕاستى دوڕاندنه‌كا مه‌زن كر. ل ڤێره‌ ئه‌م به‌حسێ واقعێ نهایێ كوردستانێ و وڵاتێ توركیایێ بكه‌ین، گه‌لۆ توركیا ولاته‌كه‌ كو هه‌رزه‌كارێن سیاسى و نه‌زان ب ڕێڤه‌ دبه‌ن؟!، بێگۆمان نه‌خێر، ئه‌گه‌ر ئه‌م وه‌سا تێبگه‌هین كو توركیا مینا سۆزدارى و مرۆڤایه‌تى دژایه‌تییا باشۆر ناكه‌ت!، ئه‌ڤه‌ ئه‌م د گۆپیتكا تێنه‌گه‌هشتنا سیاسى داینه‌، هه‌رچاوا به‌رى زێده‌تر ژ حه‌فت سه‌ده‌یان ئیمپراتۆریه‌تا عوسمان د لاوازیێ دا ب هه‌ڤكاری و پاڵپشتییا ده‌وڵه‌تا سه‌لجۆقى هێدى هێدى ب هێز كه‌فت و هه‌تا گه‌هشته‌ ڕاده‌یه‌كێ نێزیكى شه‌ش سه‌د ساڵان به‌رده‌وام بوون ل داگیركرنا وڵات و نیشتیمانێن نه‌ته‌وه‌ و خه‌لكێن دیكه‌، ب وى ئاوایی نهاژى توركیا بشێت، نه‌ك بتنێ وڵاتێن ئه‌ورۆپى و رۆژهه‌ڵاتا ناڤین به‌لكى هه‌مى جیهانێ دێ داگیركه‌ن، نه‌ك ب تنێ توركیا ئه‌ڤ حه‌سوودییه‌ یا هه‌ى ژبۆ داگیركارییا ئاخ و وڵاتێن دیكه‌، به‌لكى هه‌مى وه‌ڵاتێن جیهانێ ل دووڤ ب ده‌ستڤه‌ئینانا هێزێ دگه‌ڕن و درێغیێ ل چ پێنگاڤه‌كێ ناكه‌ن ئه‌گه‌ر ده‌لیڤه‌یێن باش ل به‌راهیا خوه‌ دیتن.
د شه‌ڕێ ئازادیا عیراقێ دا ل ساڵا 2003یێ، توركیا ل دژى كوردێن باشۆر سیاسه‌تا چاڤسۆركرنێ و ترساندنێ و گه‌فان بكاردئینا داكو ڤێ هه‌رێمێ ل هه‌مى پێشكه‌فتنێن وێ ڕابگریت و ده‌ستكه‌فتێن وێ ژناڤببه‌ت، ئه‌ڤ سیاسه‌تا توركیا بۆ ده‌مێ چه‌ند ساڵه‌كا یا به‌رده‌وام بوو، لێ كوردێن باشۆر د ڤان ده‌هه‌یێن داویێ دا شانسه‌كێ باشێ هه‌بووى كو رێزدار “مه‌سعود بارزانى” سه‌رۆكایه‌تیا ڤێ هه‌رێمێ دكه‌ت، بارزانى دوێ ڕاستیێ دگه‌هشت كو ئه‌گه‌ر توركیا هێرشێ بكه‌ته‌ سه‌ر كوردستانێ و شه‌ڕ د ناڤبه‌را كوردێن باشۆر و توركیا دا ڕوو بده‌ت، دێ هه‌مى به‌رنامه‌ و ستراتیژیه‌تا ئه‌مریكا و ئه‌ورۆپا كه‌ڤنه‌ د مه‌ترسیێ دا و ژناڤچن و توركیا ژى دێ ڕاستى دربێن مه‌زن بیت، بارزانى سیاسه‌تا (ماده‌م دخوازى من ژناڤ ببه‌ى، ئه‌زژى وه‌ناكه‌م تو ئارام ببى) بكارئینا، پشتى كو توركیا تێگه‌هشتى هه‌رێما كوردستانێ ژلایێ وڵاتێن زلهێزڤه‌ یا گرنگه‌ و ده‌ست درێژكرن ژبۆ هه‌رێمێ موجازه‌فه‌یه‌كا مه‌زنه‌ كو ب ئێك پارچه‌یی و ئه‌وله‌هیا خوه‌ دكه‌ت، ناچار بوو مینا دیفاكتۆ هه‌رێما كوردستانێ بپه‌رژینیت. ب ئاوایه‌كێ ڕیشه‌یی توركیا گوهارتنێن سیاسى كرن و رۆژ ب رۆژ په‌یوه‌ندیێن توركیا و هه‌رێمێ باشتر لێ هاتن، تا گه‌هشته‌ وێ چه‌ندێ ب مه‌به‌ستا ڤه‌كرنا فرۆكه‌خانه‌یا نیڤده‌وڵه‌تى یا هه‌ولێرێ ل 29/3/2011ێ “ره‌جه‌ب ته‌یب ئه‌ردۆگان” هاته‌ بن ئالایێ كوردستانێ، ئه‌ڤ چه‌نده‌ وه‌چه‌رخانه‌كا دیرۆكى بوو هیمایه‌كێ باشبوو، حوكمه‌تا هه‌رێما كوردستانێ ژى ب تایبه‌تی ب شاره‌زایی و بسپۆریا “نێچێرڤان بارزانى” ب سیاسه‌ته‌كا مه‌نتقى و لۆژیكى گومانێن نیگه‌تیڤ یێن توركیایێ ژناڤبرن، تا گه‌هشته‌ ڕاده‌یه‌كێ توركیا بوو هه‌ڤكاره‌كێ سه‌ره‌كى یێ حوكمه‌تا هه‌رێما كوردستانێ كو ژێرخانه‌كا ئابوورى بۆ ده‌وڵه‌تا ئاینده‌یا كوردستانێ چێ بكه‌ن، توركیا وه‌ڵاته‌كێ هندێ بچووك نینه‌ كو نه‌زانیت گرێبه‌ستێن زه‌به‌لاحێن ئابوورى یێن پێنجى ساڵى ل گه‌ل هه‌رێما كوردستانێ دێ بناغه‌یا ده‌وڵه‌ته‌كا نوو یا كوردى ئاڤا كه‌ت، توركیایێ هه‌ر ل وى سه‌رده‌مى هه‌م ل ژێر فشارێن نیڤده‌وڵه‌تى و خوه‌ گونجاندن ل گه‌ل گوهارتنێن ده‌ڤه‌رێ، هه‌م تێگه‌هشتن ل وێ ڕاستیێ كو ده‌وڵه‌ته‌كا كوردستانى یا دیمۆكراسى و ئاشتیخواز هه‌ڤسنۆرێ وێ بیت باشتره‌ ژ ده‌وڵه‌ته‌كا عیراقى یا شیعى یا دیكتاتۆرخواز.

20

هه‌ر چاوا پێدڤیێن سه‌ره‌كى یێن ژیانێ، هه‌لكێشانا ئۆكسجینێ و پاشى خوارن و ڤه‌خوارنن و ل دووڤدا مرۆڤ بزاڤێ دكه‌ن لایه‌نێ ئه‌وله‌هى گه‌ره‌نتى بكه‌ن…هتد، وه‌سا یا پێدڤیه‌ كو خه‌لكێ كوردستانێ ل پێشیا هه‌ر بابه‌ته‌كێ مژارا سه‌ربخوه‌بوونێ ب گرنگ وه‌ربگرن و ئه‌و ڕێیا ب خوینا سه‌دان هزار شه‌هید و ئه‌نفالان هاتیه‌ دیاركرن ژ پێخه‌مه‌ت ئازادیا گه‌لێ كوردستانێ بگه‌هیننه‌ ئارمانج، تاوانه‌ ملله‌تێ كورد ب شاشیه‌كێ سه‌رێ وێ رێیێ وندا بكه‌ت، گه‌لێ كوردستانێ ژ بۆ ب ده‌ستڤه‌ئینانا ژیانه‌كا ئازاد و ب ڕوومه‌ت، چ جۆره‌ قوربانیه‌ك نه‌مانه‌ كو نه‌دابن، هه‌تاكو سه‌رهه‌دانا ساڵا 1991 خه‌لكێ كوردستانێ پارێزگارى ژ ناسنامه‌ و هه‌بوونا خوه‌ دكر و ب هیمه‌ت و قوربانیدانا شۆڕشگێر و خوینا شه‌هیدێن كوردستانێ و خوه‌ڕاگریا گه‌لێ كورد سه‌ركه‌فتن ئینا، پشتى سه‌رهه‌لدانێ گه‌لێ كوردستانێ كه‌فته‌ د قووناغه‌كا نوو دا، ئه‌و ژى قووناغا سه‌لماندنێ بوو، قووناغه‌كا كێم قوربانی دانتر، لێ هه‌ستیارتر ژ قووناغا شۆڕشێ. د ڤێ قووناغا پشتى سه‌رهه‌لدانێ دا، دبیت هه‌ر تاكه‌كێ ب گشتى ل گۆڕ به‌رژه‌وه‌ندى و پێدڤى و ژیانا خوه‌یا تایبه‌ت شێوازێ حوكمڕانیا كوردستانێ هه‌لسه‌نگان دبیت، لێ د ڕاستی دا ئه‌ڤ قووناغه‌ هه‌ستیارترین و پڕ به‌رپرسیارترین قووناغا كوردستانێ بوو، دبیت هه‌بوونا گه‌نده‌لیێ و نه‌دادپه‌روه‌ریێ گه‌له‌ك جاران سنۆرێن خوه‌ ده‌ربازكربن، لێ ب گشتى هه‌كه‌ ده‌سهه‌ڵاتێ شه‌ڕه‌كێ دژوار ل گه‌ل گه‌نده‌لیێ كربا، دا دۆخێ كوردستانێ ل ژێر كاریگه‌ریا گه‌له‌ك كه‌سایه‌تى و مرۆڤێن هۆزى و خوه‌دى خه‌لك كه‌ڤیته‌ د مه‌ترسیێ دا، ئه‌ڤ ڕاستیه‌ هه‌كه‌ چ یا ته‌عله‌ لێ پتریا شۆڕشێن كوردان ژ به‌ر نه‌پاكیا هنده‌ك ده‌ره‌به‌گ و خه‌لكێن خوه‌دى جه‌ماوه‌ر شكه‌ستن دئینا و بێ ئه‌نجام ڤه‌دمریان، جوداهیا شۆڕشا بارزان ل گه‌ل شۆڕه‌شێن به‌رتر ئه‌ڤه‌یه‌، د شۆڕه‌شێن به‌رێ دا دوژمنێن كوردان هنده‌ك سه‌رۆك هۆز دكڕین و خه‌لكه‌ك ژى (كو دڤه‌مایى بوون و به‌رژه‌وه‌ندیا وه‌لاتى نه‌دزانین)، مینا پاداشت ل گه‌ل سه‌رۆكى هۆزى دبوونه‌ ڕه‌شه‌كێن دوژمن و داگیركه‌ران!، لێ شۆڕه‌شا بارزانى نه‌هێلا ئه‌و خال ببیته‌ ئه‌گه‌رێ ل ده‌ستدانا به‌رهه‌مێ شۆڕشێ و هه‌ر زوى ل شوونا كو دوژمن هنده‌ك سه‌رۆك هۆزان بكڕن، وان بخوه‌ سه‌رۆك هۆز كڕین!، ئه‌ڤ چه‌نده‌ژى بۆ ڕاگرتن و پاراستنا ده‌ستكه‌فتێن كوردستانێ بوو، هه‌كه‌ نه‌ ئه‌م هه‌مى دزانین هنده‌ك سه‌رۆك هۆز كو بوونه‌ خوه‌دى پله‌و بودجه‌ و پاره‌ ئێكه‌م جار دوژمنێن سه‌رسه‌ختێن بارزانى بوون، پاشى دوژمنێن شۆره‌شێ بوون، ئه‌ڤ چه‌ندا مه‌ به‌حس كرى ئه‌گه‌رێ سه‌ره‌كى یێ هه‌بوونا گه‌نده‌لیێ و نه‌دادپه‌روه‌ریێ بوو. بێ گۆمان نه‌بوونا ده‌وڵه‌تێ فاكته‌ره‌ كو به‌رده‌وام وه‌لاتێن داگیركه‌ر ده‌ست د كارۆبارێن وه‌لاتى وه‌ردده‌ن، و لاوازیا تێگه‌هشتن و ره‌وشه‌نبیرییه‌تا جڤاكى ئه‌گه‌رێن سه‌ره‌كى یێن هه‌بوونا گه‌نده‌لیێ و نادادپه‌روه‌ریێ نه‌، چ گۆمان تێدا نینه‌ پشتى سه‌ركه‌فتن و ب ئه‌نجام گه‌هشتنا پڕۆسا سه‌ربخوه‌بوونا كوردستانێ، ئه‌ركێ ده‌سه‌لاتێ ژ لایه‌نێ به‌رنگاریا گه‌نده‌ڵیێ ڤه‌ دێ سڤكتر بیت و رێژه‌یا گه‌نده‌لیێ دێ زۆر كێمتر لێ هێت، واته‌ دشێین بێژین نه‌بوونا ده‌وڵه‌تا سه‌ربخوه‌ مه‌زنترین فاكته‌رێ هه‌بوونا گه‌نده‌لیێ و نادادپه‌روه‌ریێ یه‌، چێبوونا ده‌وڵه‌تێ ژى باشترین فاكته‌رێ نه‌هێلانا گه‌نده‌لیێ و نادادپه‌روه‌ریێ یه‌، له‌وما گۆمان تێدا نینه‌ كو پتریا ئه‌و كه‌سایه‌تى و لایه‌نێن سیاسى كو ل دژى سه‌ربخوه‌ بوونێ ڕادوه‌ستن، ژ ترسا چاكسازیێ و نه‌هێلانا به‌ره‌لایی و گه‌نده‌لیێ یه‌.
ب به‌هانه‌كرنا ئه‌كتیڤی یا په‌رله‌مانى و هه‌بوونا گه‌نده‌لیێ و ترساندنا خه‌لكێ كوردستانێ ژ قه‌یران و سنۆرگرتنا وڵاتێن جیران، ژ لایێ بزاڤا گۆڕان و هه‌ڤپه‌یمانێن وێڤه‌، د جه‌وهه‌ر دا ب تنێ دژایه‌تیكرنا سه‌ربخوه‌بوونا كوردستانێ یه‌، هه‌كه‌ نه‌ یا دیاره‌ خه‌لكى سه‌دان هزار شه‌هید و ئه‌نفال نه‌دانه‌ بۆ په‌رله‌مانه‌كێ بێ ده‌وله‌ت، هه‌روه‌سا دوژمنى ژى ژترسا ڕوونشتنا “یووسف محه‌مه‌د” ل سه‌ر كورسیا په‌رله‌مانى ئه‌ڤ وه‌لاته‌ وێران نه‌كریه‌، به‌لكى ژ ترسا ل ده‌ستدانا وێ ئاخا كوردستانێ بوویه‌ كو سه‌دان سالن سامانێ وێ دخۆن و نه‌ته‌وه‌یا كورد مینا كوێله‌ بكاردئینن، واته‌ ده‌وڵه‌ت بۆ ژیانێ ب هه‌مى جۆرێن خوه‌ یێن پوزه‌تیڤ ڤه‌ و په‌رله‌مان ب تنێ میكانزمه‌كه‌ بۆ ده‌رخستنا قانوونان، هه‌كه‌ ژبه‌ر په‌رله‌مانى پرۆسسا ده‌وڵه‌تێ كه‌فته‌ د مه‌ترسیێدا نه‌ك ب تنێ بلا قفل بكه‌ن، به‌لكى گه‌ر پێدڤى بوو ده‌شت ژى بكه‌ن و بكه‌نه‌ گۆڕستانا شه‌هیدان، ئه‌لته‌رناتیڤێ ده‌وڵه‌تێ كوێلایه‌تی یه‌، لێ په‌رله‌مانى گه‌له‌ك ئه‌لته‌رناتیڤ یێن هه‌ین كو قانوونان ده‌ربێخن، هه‌روه‌سا ئه‌گه‌ر وه‌لاتێن جیران بشێن سنۆران ل سه‌رمه‌ بگرن، نوكه‌ ب ساناهیتر دشێن ڤى كارى ئه‌نجام بده‌ن، لێ ده‌مه‌كه‌ كوردستان یا د وێ قووناغێ دا ده‌رباز بووى.

18

ئێك ژ خه‌سله‌تێن نێگه‌تیڤ یێن جڤاكێن ڤه‌مایی ئه‌وه‌ كو بۆ هه‌ر كاودانه‌كێ، بۆ هه‌ر كه‌سه‌كێ، بۆ هه‌ر حزب و لایه‌نه‌كێ، بۆ هه‌ر كریاره‌كێ، هه‌لسه‌نگاندنه‌كا ساخله‌م ناهێته‌كرن، دۆست و دوژمن ب دروستى و هووربنیى ژێك ناهێنه‌ ڤاڤارتن، مه‌به‌ستێن كریارێ ب درستی ناگه‌هیته‌ ناڤ بیردانكا مێشكێ تاكیدا ب گشتى، ئه‌ڤه‌ ژى زیانه‌كا مه‌زن دگه‌هینیته‌ خزمه‌تكارێ ڕاسته‌قینه‌، واته‌ كه‌سه‌كێ ب كریار و قوربانیدان ده‌هان ساڵان خزمه‌ت كربیت، دبیته‌ قوربانێ كه‌سه‌كێ كو بێ خزمه‌ت و قوربانیدان، ب هه‌لگرتنا هنده‌ك درووشم و ئاخفتنێن ب ته‌یسووك ڤه‌ و خاپینۆك دهێته‌ سه‌ر سفره‌یا به‌رهه‌ڤ.
ژبلى ئه‌و كه‌سێن هاتینه‌ خاپاندن و خوه‌دى دیتنه‌كا كورت و به‌رته‌نگ، چ كه‌سه‌ك نه‌شێت خه‌بات و شۆڕش و قوربانیدانێن پارتى دیمۆكراتى كوردستان بۆ دۆزا كوردى ب كێم ببینیت، پڕانیا سه‌ركرده‌یێن حزبێن دیتر ژى د ناڤ قوتابخانه‌یا بارزانیێ نه‌مردا ده‌ست ب خه‌باتێ بۆ كوردایه‌تیێ كرییه‌، ئه‌ڤ ڕاستیه‌ ناهێنه‌ ئینكاركرن كو ده‌ستپێشخه‌رێ شۆڕشێن گه‌لان خوه‌دى مه‌زنترین ئیمتیازێن دیرۆكێ نه‌، ئه‌ڤجا ب تایبه‌ت د واقعه‌كی دژوارێ مینا ئه‌و سه‌رده‌مێ ماڵباتا بارزانى تێ دا ده‌ستپێشخه‌ریا شۆڕشێ و خه‌باتێ كرى، لێ پشتى ئه‌نجامێن شۆڕه‌شێ ب نیڤ ئازادبوونه‌كا باشۆرێ كوردستانێ ب داوى هاتى، هنده‌ك حزبێن دیتر یێن كوردستانێ دزانى مینا دیرۆك و شیان نه‌كارن مل ب ملێ پارتى هه‌ڤڕكیێ بۆ ده‌سه‌ڵاتێ بكه‌ن، ژبه‌ر كو مینا پارتى نه‌ خوه‌دى دیرۆكه‌كا بهێزن، نه‌خوه‌دى په‌یوه‌ندیێن سیاسى یێن نیڤده‌وڵه‌تی یێن بهێزن، نه‌ ئابووره‌كێ بهێزتر ژ پارتى دده‌ستێن واندایه‌، له‌وما ده‌ست ب هه‌ڤڕكییه‌كا نه‌رێنى كر، واته‌ هه‌ڤڕكى نه‌ك ب ئه‌نجامدانا كارێن باشتر ژ كارێن پارتى!، به‌لكى هه‌ڤڕكى ب شێواندن و تێكدانا هزر و دیتنا خه‌لكى ل سه‌ر پارتى، ژ به‌ركو خواندنا جڤاكا مه‌ ب گشتى خواندنه‌كا ساخله‌م و دووربین نینه‌، هه‌ڤڕكێن پارتى شیان كاریگه‌ریه‌كا مه‌زن بكه‌ن، ب تایبه‌ت ل ئه‌و ده‌ڤه‌رێن كونترۆل ل ژێر ده‌ستێن واندا، پارتى دیمۆكراتى كوردستان ب ڕه‌نگه‌كێ باش و چالاك سۆد ل میكانزمێ ڕاگه‌هاندنێ نه‌دیت، ڕێخستی و كادرێن وێ مینا پێدڤى كاریگه‌رى نه‌بوون كو به‌رهنگاریێ دگه‌ل نه‌یارێن خوه‌ بكه‌ت، ئه‌و دیرۆك و خه‌بات و قوربانیدانا پارتى هه‌ى و كارێن پارتى دكه‌ت، ئه‌گه‌ر حزبه‌كا دیتر هه‌بان و خوه‌دى بایه‌، چ حزبه‌كا كوردستانێ ب دوورڤه‌ ژى شیانێن هه‌ڤڕكیێ دگه‌ل دا نه‌دبوون، پارتى شۆڕشه‌كا مه‌زن یاهه‌ی، د چاڤێن خه‌لكه‌كی دا، ئه‌وێن ل دژى شۆڕشێ ژى ڕاوه‌ستیای هه‌ر مینا پارتى شۆڕش یا كرى!، پارتى نه‌فتا كوردستانێ ل ژێر كونترۆلا به‌غدا ده‌رێخست، حزبێن دیتر خوه‌ دكه‌نه‌ خوه‌دى ڤى پڕۆژه‌ى!، ده‌مێ ژبه‌ر ڤان ده‌ستكه‌فتێن پارتى بۆ كوردان ب ده‌ستڤه‌ ئیناى ژانێن ده‌وڵه‌تبوونێ ئاخا كوردستانێ دگریت، هه‌مى ژانا دئێخنه‌ دناڤ زكێ پارتی دا!!، واته‌ بۆ ده‌ستكه‌فتا هه‌مى هه‌ڤالێن پارتینه‌ و بۆ قوربانیدانان ژى هه‌میێ دئێخنه‌ ل ژێر به‌رپرسیاریا پارتی دا!.
ئه‌و به‌ختێ پارتى هه‌ى ئه‌وه‌ كو سیاسه‌تا ئه‌و حزبێن هه‌ڤڕكیێ ل گه‌ل پارتى دكه‌ن یا د ده‌ستێن دو جۆره‌ كه‌سان دا، یان د هزر ژه‌نگى و بیرته‌نگ و ده‌روون تێكچوویینه‌، یانژى كه‌سێن سنێله‌یێن سیاسى و بێ ئه‌زمۆنن، ئه‌ڤ چه‌نده‌ ژى فاكته‌رن كو مینا پێدڤى نه‌شێن كه‌یسا لاوازیا تێگه‌هشتنا جڤاكى ب گشتى بكه‌ن، بۆ نموونه‌ ئه‌و حزب سه‌ركه‌فتن كو خه‌لكێ ده‌ڤه‌رێن سلێمانیێ و گه‌رمیان ب گشتى بخاپینن كو پارتى به‌رپرس بكه‌ن ب كێماسى و نادادپه‌روه‌رى و گه‌نده‌ڵیا ده‌ڤه‌رێن وان!، د ده‌مه‌كێ دا پارتى شیانێن گوهارتنا پۆلیسه‌كێ ل ده‌ڤه‌ره‌كا سلێمانیێ بۆ ده‌ڤه‌ره‌كا دیكه‌ نینه‌!، لێ دژایه‌تیكرنا سه‌ربخوه‌یی و ئازادیا ڤى وه‌لاتى!، زه‌حمه‌ته‌ خه‌لكه‌ك هه‌تا وى ڕاده‌ى یا ڤه‌مایی بیت كو ڤێ چه‌ندێ ژى ل وان لایه‌ن و حزبان بپه‌رژینیت!. مینا حزب به‌ختێ پارتى ل ڤێره‌یه‌ كو نه‌یارێن وێ بۆ دژایه‌تى كرنا پارتى و تێكدانا پارتى، چه‌قۆ یا ل سه‌ر گه‌رده‌نا به‌رژه‌وه‌ندى یێن هه‌مى خه‌لكێ كوردستانێ داناى!، ئه‌وان حزبان ل داویێ و پشتى چه‌ندین ساڵان خاپاندنا خه‌لكێ خوه‌، نها ب كریار و پراكتیك دبێژنه‌ خه‌لكى پرۆژه‌یێن نه‌ته‌وه‌یی و كوردایه‌تى یێن پارتینه‌، چاوا وان وه‌سا خه‌لك تێگه‌هاند كو جاشایه‌تى ژى شۆڕشه‌!، وه‌سا دیسا یێ تێدگه‌هینه‌ڤه‌ كو كوردایه‌تیا ڕاسته‌قینه‌ ژى هه‌ر پارتى یا كرى!، ئه‌ڤ چه‌نده‌ ژى باشترین به‌خته‌ كو پارتى د دیرۆكێ دا هه‌ى و زه‌حمه‌ته‌ هه‌مى حزبه‌كێ ئه‌ڤ شانسه‌ هه‌بیت كو نه‌یارێن وێ كار بۆ به‌رژه‌وه‌ندیێن وێ یێن حزبى بكه‌ن!.

11

سیاسه‌تمه‌دارێ زیره‌ك ب كێمترین قوربانیدان پترین ده‌ستكه‌فتان بده‌ستڤه‌ دئینیت، دبیت ژى قوربانیا ئابوورى بده‌ت و ده‌ستكه‌فتا ئه‌وله‌هى ب ده‌ست بئینیت، ئه‌ڤجا وه‌ڵاته‌كێ مینا كوردستانێ یا نه‌سه‌ربخوه‌و خوه‌دى سه‌دان دوژمنێن ب هێز چاوا بێ قوربانیدان بهێته‌ پاراستن؟!، گه‌له‌ك جاران حوكمه‌تا هه‌رێما كوردستانێ ژبۆ ده‌ستكه‌فته‌كا سیاسى قوربانیێن ئابوورى یێن داى، گه‌له‌ك جاران نه‌شیایه‌ مینا پێدڤى بۆدجه‌ ژبۆ كه‌رته‌كێ گرنگێ ئابوورى بمه‌زێخیت كو گرێدایی ب خوشگوزه‌رانییا جڤاكی ڤه‌یه‌، ژبه‌ر كو جڤاكى پتر ژ خۆشگۆزه‌رانیێ پێدڤى یا ب ئه‌وله‌هیێ هه‌بووى، ل سه‌ر ڤێ چه‌ندێ هنده‌ك خه‌لك ڕه‌خنه‌یێن دژوار ئاراسته‌یێ حوكمه‌تێ دكه‌ن كو گرنگى ب كه‌رتێ كشتوكالێ نه‌دایه‌ و ب تنێ بۆدجه‌ یا مه‌زاختى ژبۆ كه‌رتێ نه‌فتێ، به‌لێ ڕاسته‌!، لێ گه‌لۆ حوكمه‌تا هه‌رێمێ هنده‌ شاره‌زایی نه‌بوویه‌ كو بزانیت كه‌رتێ كشتوكاڵى یان پیشه‌سازى هه‌م خه‌لكێ جڤاكى دێ ژ ته‌مبه‌لیێ پارێزیت و هه‌م داهاتێ ڤان كه‌رتان مه‌زمونتر و ده‌مدرێژتره‌ ژ كه‌رتێ نه‌فتێ؟!، هه‌كه‌ خه‌لكه‌ك وه‌سا هزر دكه‌ت كو حوكمه‌تا هه‌رێما كوردستانێ هنده‌ شاره‌زایی نینه‌ د ڤان هه‌ڤكێشه‌یێن ساده‌ بگه‌هیت، ئه‌ز ب هه‌مى باوه‌ر دبێژمێ (نه‌خێر!)، حكوكمه‌تا هه‌رێمێ باش د ڤان هه‌ڤكێشه‌ و بالانسان دگه‌هیت، لێ دبێت هوونێن ڕێزدار د مه‌به‌ست و نیازێن حوكمه‌تێ نه‌گه‌هن ئان مه‌به‌ستێن دیكه‌ هه‌بن، كه‌رتێ كشتوكاڵى دكاریت وه‌لاتى ژ لایێ ئێكونۆمی ڤه‌ ب هێز بكه‌ت، لێ نكاریت مینا كه‌رتێ نه‌فتێ دگه‌ل كه‌رتێ ئابوورى لایه‌نێ سیاسی و ئه‌وله‌هی ڤه‌ ژى مفا هه‌بیت.
ئه‌ڤجا بپرسین چاوا؟، بۆ نموونه‌ ده‌مێ حكوكمه‌تا هه‌رێما كوردستانێ ملیاردان دۆلار مه‌زاختى و پترین گرنگى ب كه‌رتی نه‌فتێ داى، هه‌رێما كوردستانێ د قووناغه‌كا نازك دابوو، وه‌لاتێ توركیا ب چاڤه‌كێ نزم و بێ مفا ل كوردستانێ دنێرى، واته‌ توركیایێ د سیاسه‌تا خوه‌دا وه‌ها دنێرى (هه‌كه‌ ئه‌م سه‌ره‌ده‌ریێ ل گه‌ل كوردان بكه‌ین ل عیراقێ، ده‌ستكه‌فتێن مه‌ دێ چ بن؟! (چنه‌ ئان زۆر كێم)!، لێ ئه‌م دزانین كوردێن عیراقێ ببنه‌ خوه‌دى كیانه‌كێ سه‌ربخوه‌ ئه‌م دێ پتر زیانێ بكه‌ین و كوردێن توركیایێ ژى دێ حه‌سوودێ مافێن خوه‌ یێن نه‌ته‌وه‌یی بن)، لێ حوكمه‌تا هه‌رێما كوردستانێ ب سه‌رۆكاتیا نێچیرڤان بارزانى ب هه‌ر میكانزم و قوربانیدانه‌كێ بیت شیا دچه‌ند سالێن كێم دا باوه‌ریێ ب مه‌زنترین كۆمپانیایێن جیهانێ بتایبه‌ت یێن نه‌فتێ بینیت كو بهێن و ل هه‌رێما كوردستانێ كار بكه‌ن، به‌رژه‌وه‌ندیێن ئابوورى یێن توركیا ب ده‌هان ملیارد دۆلار د سالێ دا هاتنه‌ بلند كرن، هه‌ڤده‌م هاتنا كۆمپانیایێن مینا ئیكسۆن مۆبیل و چیڤرۆن یێن ئه‌مریكى و تۆتاڵ یا فڕه‌نسى هاتنه‌ كوردستانێ كو سێ ژ پێنج كۆمپانیایێن جیهانێنه‌ و مه‌زنترین كاریگه‌ریێ ل سه‌ر وزێ جیهانێ دكه‌ن، ئه‌ڤ پێنگاڤێن حوكمه‌تا هه‌رێما كوردستانێ ژبلى مه‌به‌ستێن ئابوورى، مه‌به‌ستێن وێ پتر زامنكرنا لایه‌نێ ئه‌وله‌هى و سیاسى و دبلۆماسى بوونه‌، واته‌ حوكمه‌تێ ئه‌وله‌هى و ده‌ستكه‌فتێن سیاسى و دبلۆماسى كڕین كو كوردان نه‌بوو!، هه‌ر كه‌سه‌كێ هشیار دزانیت ئه‌گه‌ر كه‌رتێ كشتۆكاڵى و گه‌شتوگۆزارى و پیشه‌سازى و ئه‌له‌كتریكێ چه‌ندژى ب هێز ببان و پێشكه‌فت بان مه‌حال بوو بشێن ب ڕێژه‌یه‌كا كێم ژى مینا كه‌رتێ نه‌فتێ كاریگه‌ریێن پۆزه‌تیڤ بۆ سه‌ر ئه‌وله‌هی و سیاسه‌تا هه‌رێما كوردستانێ چێ بكه‌ن، حوكمه‌تا هه‌رێما كوردستانێ بو ئینانا كۆمپانیا و بزنسمه‌ن و بگره‌ كرێكارێن ده‌ره‌كى ژى ئاسانكارى یێن زۆر كرن و قوربانیدان، نه‌ ب وى ئاواییه‌ كو حوكمه‌تا هه‌رێما كوردستانێ بێگانه‌په‌رسته‌ ئانكو نه‌زانه‌!، ئه‌ڤ پێناسه‌یه‌ بێ ویژدانییه‌، حكومه‌تا هه‌رێمێ دزانى ب هه‌بوونا به‌رژه‌وه‌ندییان دێ زلهێزو وڵاتێن ده‌ڤه‌رێ ژى ناچار بن دان ب مافێن گه‌لێ كورد دا ب ئینن و بپارێزن ژى، ده‌مێ ل ده‌ستپێكا شه‌ڕێ داعش دا “باراك ئۆباما” سه‌رۆكى وى ده‌مى یێ ئه‌مریكا بڕیارداى هه‌ولێر هێلا سۆره‌ و نابیت مه‌ترسى بكه‌ڤنه‌ سه‌رو هاریكاریا مه‌ كرى، ژئه‌نجامێن سیاسه‌تا سه‌ركه‌فتی یا هه‌رێما كوردستانێ بوویه‌، خوه‌ ژ به‌ر لایه‌نێ مرۆڤى نه‌بوویه‌!، ئه‌م هه‌ر ئه‌و مرۆڤین یێن ده‌هان ساڵان چاڤپووشى ل وان كاره‌ساتێن مینا كیمیابارانكرنا هه‌له‌بچه‌ و ئه‌نفالێن كوردان دكرن!، ده‌مێ سه‌رۆك بارزانى شیاى فشارێ ب ئێخیته‌ سه‌ر جیهانێ كو ڕێكێ بده‌ن پێشمه‌رگه‌ ل سه‌ر ئاخا توركیا دا ده‌رباز ببیت و نه‌هێلیت كۆبانێ بكه‌ڤیت، به‌رهه‌مێن سیاسه‌ته‌كا سه‌ركه‌فتى بۆیه‌، لێ حوكمه‌ت نه‌شێت بێژیته‌ جڤاكى داكو ئه‌مریكا مه‌ بپارێزیت ئه‌م پتر گرنگیێ ب نه‌فتێ دده‌ین!.
ده‌مێ ئه‌وله‌هى و سیاسى كورد هاتنه‌ پاراستن، ئه‌ڤجا حوكمه‌ت ژى دێ هزر دخۆشگوزه‌رانیا خه‌لكێ كوردستانێدا پتر كه‌ت، چێبوونا ده‌وڵه‌تا سه‌ربخوه‌ژى زامنێ ئینانا وێ قووناغا خۆشگوزه‌رانیێ یه‌.

34

ل ده‌ستپێكا نڤیسینا دیرۆكێ دا هه‌تا نوكه‌ژى كو تێدا دژین، شه‌ر و برین و كوشتن بۆ نه‌ته‌وه‌یا كورد یا هه‌بووى و هه‌یى!، پڕانیا وان شه‌ڕان كوردان بۆ ڕزگاركرن یان پاراستنا نه‌ته‌وه‌یێن دیتر یێن كرین!، واته‌ یێن هاتیه‌ بكارئینان، جار ل دژى به‌ریتانیایا مه‌زن، جار ل دژى ئه‌رمه‌نیان، جار ل دژى ئیسرائیلیان، جار ل دژى سه‌فه‌ویان بۆ ئۆسمانیان و جار به‌روڤاژى، بارا پتر ژى ب ڕێیا ده‌ره‌به‌گ و بیروباوه‌رێن ئاینى كورد دهاتنه‌ خاپاندن و بكارئینان، چ وه‌لاته‌كێ جیهانێ بێ باجێن مه‌زن نه‌شیایه‌ ده‌وله‌تا خوه‌ ڕابگه‌هینیت، پڕانیا ده‌وڵه‌تان ده‌مێ سه‌ربخوه‌بوونا خوه‌ ڕاگه‌هاندى د قه‌یرانێن دارایی و خزمه‌تگۆزارى و فه‌رهه‌نگی دا بوون، ئێك ژ وان ئه‌مریكا كو ل ژێر داگیركاریا به‌ریتانیا ب قوربانیدانا سه‌دان هزار كه‌سان ل ساڵا 1776 سه‌ربخوه‌یی ڕاگه‌هاند كو ئاستێ وان یێ ره‌وشه‌نبیرى و ناڤخوه‌یی د قه‌یرانه‌كا مه‌زن دا بوو، هه‌تا ڕاده‌یه‌كێ كو هێشتا به‌نده‌ ئانكو كویله‌ هه‌بوون و بازار ل سه‌ر دهاته‌ كرن، ل سه‌ر ئازاد كرنا به‌نده‌یان و قه‌ده‌غه‌كرنا ڤى بازارى شه‌ره‌كێ ناڤخوه‌ ل ئه‌مریكا چێبوو كو 25 ساڵان ڤه‌كێشا و 620 هزار كه‌س هاتنه‌ كۆشتن. ئێك ژ بێ واتاترین و پڕخاپینۆكترین ڕسته‌یێن ل دژى سه‌ربخوه‌یێ ژ لایێ هنده‌ك لایه‌ن و خه‌لكێن كوردستانێڤه‌ ب كاردهێت ئه‌وه‌ كو دبێژن: كه‌هره‌با‌و خزمه‌تگۆزارى و مووچه‌..هتد دئاسته‌كێ لاوازدانه‌ مه‌ ده‌وله‌ت بۆچییه‌!، د ڕاستیدا فاكته‌رێ سه‌ره‌كیێ هه‌مى به‌دبه‌ختى و ڤه‌مانا كوردان نه‌بوونا ده‌وڵه‌تا سه‌ربخوه‌یه‌، چ ولاته‌كێ جیهانێ بێ ئه‌گه‌ر خه‌لكێ خوه‌ نه‌كرییه‌ قوربانى داكو وه‌لاتێ خوه‌ ڕزگار بكه‌ت، ئه‌گه‌ر وڵاتێن ژێر ده‌ست كێشه‌یێن خزمه‌تگوزارى و ئازادى و مافێن مرۆڤان ب گشتى هه‌بان، چ جاران خه‌لكى قوربانى نه‌ددا كو ل ژێر داگیركه‌ریێ ده‌ربهێن و سه‌ربخوه‌ بن، نه‌خاسمه‌ ل رۆژهه‌لاتا ناڤین و ئه‌ڤجا نه‌ته‌وه‌یا كورد!، پێتڤییه‌ هه‌مى تاكه‌كێ كورد وێ ڕاستیێ بزانیت كو ئه‌و نیڤ ئازادییا نوكه‌ هه‌یی ب پاڵپشتیا هێزێن نیڤ ده‌وله‌تییه‌ كو هنده‌ك به‌رژه‌وه‌ندیێن وان دخوازن ژ لایه‌نێ سیاسى و ئابوورى و دبلوماسیڤه‌ هاریكار بن و ئه‌گه‌ر ئه‌م نه‌شێین ده‌وڵه‌تا خوه‌ دابمه‌زرینین گۆمان دوێ چه‌ندێدا نینن كو ئه‌ڤ به‌رژه‌وه‌ندیێن وان وڵاتان دێ ل ستراتیژى و درێژخایه‌ن بنه‌ به‌رژه‌وه‌ندیێن ده‌مكى و ته‌كنینكى، پێتڤییه‌ تاكێ كورد وێ ڕاستیێ بزانیت كو ئه‌گه‌ر هنده‌ك په‌یوه‌ندیێن سیاسى لسه‌ر ئاستى كه‌سێتى و حزبى دناڤبه‌را سه‌رۆك بارزانى و پارتى دگه‌ل وڵاتێن زلهێز نه‌بان و حكومه‌تا هه‌رێما كوردستانێ روله‌كێ نایاب ل ڕاكێشانا كومپانیاو نوێنه‌رایه‌تى و قونسولێن جیهانێ …هتد نه‌گێڕابا مه‌حال بوو وڵاتێن زلهێز پاڵپشتییا هێزێن پێشمه‌رگه‌ بكه‌ن، و ئه‌و چه‌كێ لاوازێ مه‌ هه‌ى زور ب زه‌حمه‌ت بوو كو هه‌مى كوردستان نه‌كه‌ڤیته‌ ژێر ده‌ستێن هێزه‌كا تیرورستى و هوڤى یا داعشڤه‌، ئه‌ز باوه‌رم هه‌ركه‌سه‌كێ كورد دخه‌ونێدا ببییت چه‌كدارێن داعش هاتینه‌ دده‌رگه‌هێ مالا ویدا دێ ب دل قوتانه‌كا توند ل خه‌وێ هه‌لپه‌ریت و چ جاران ژى وێ خه‌ونێ ژ بیرناكه‌ت!، پێتڤییه‌ تویێ كورد وێ ڕاستیێ بزانى بێ هه‌بوونا ده‌وڵه‌تا كوردى نه‌ك بتنێ ئازادییا ته‌ یا ئاخفتنێ و ژیانه‌كا ئاسایی دیار نینه‌ دێ به‌ره‌ف چ ئاقاره‌ك چیت، به‌لكى پشت ڕاستبه‌ ئه‌ڤرۆ نه‌ سوبه‌هى ئه‌گه‌ر ئه‌ڤ داعشه‌ژى وڵاتێ ته‌ داگیر نه‌كه‌ت دێ سه‌رده‌مه‌كێ ڕاستى ڤان تراژیدیاو به‌دبه‌ختیان بى، واته‌ پێتڤییه‌ كورد ل نه‌بوونا ده‌وڵه‌تێ بترسن، ل وێ چه‌ندێ بترسن ئه‌گه‌ر ڕاپرسى نه‌هێته‌ كرن و ده‌لیڤه‌ نه‌بیت ده‌وڵه‌تا خوه‌ دابمه‌زرینن، دامه‌زراندنا ده‌وڵه‌تێ واته‌ چێكرنا هێزه‌كا موكم و پرۆفیشناڵ و پڕچه‌كێ سه‌ربازى، واته‌ دابینكرنا ئه‌وله‌هى و خزمه‌تگۆزارى و خۆشگوزه‌رانى ب جوره‌كێ زۆر باشتر. ترسیان ل گه‌فێن وڵاتێن دیكه‌ ئان پشتگیرى نه‌كرنا وڵاتێن زلهێز، تێنه‌گه‌هشتنه‌كا زوره‌ ل سیاسه‌تێ و واقعێ وه‌لاتێن دیكه‌، وڵاتێن مینا عیراقێ و ئیرانێ و سوریێ و توركیا هه‌رچه‌ندا پێ چێبوى یا كرى كو نه‌گه‌هینه‌ ڤێ قوناغێ و نكارن خراپتر بكه‌ن و ئه‌و بخوه‌ژى باش دزانن كارتێن وان یێن سه‌ره‌كى یێن سوتى و بتنێ كارتا ترساندنا خه‌لكێ كوردستانێ یا دده‌ستێن واندا ماى (پشت ڕاستم دێ ب هه‌بوونا ده‌وڵه‌تا كوردى ڕازى بن بتایبه‌ت توركیا كو گرێدایی ب به‌رنامه‌و سیاسه‌تا وڵاتێن رۆژئاڤاڤه‌یه‌)، وڵاتێن زلهێزژى ناڕاسته‌وخۆ ده‌لیڤه‌ یا دایه‌مه‌ ده‌وڵه‌تێ بكه‌ینه‌ دیفاكتۆ، پێدڤییه‌ مه‌ هند لیاقه‌ت و هشیارى هه‌بیت ڤێ پیچه‌كێ تێبگه‌هین.

website security
Facebook Auto Publish Powered By : XYZScripts.com