NO IORG
Authors Posts by كارزان فه‌قێ

كارزان فه‌قێ

كارزان فه‌قێ
8 POSTS 0 COMMENTS

71

كارزان فه‌قى
ده‌ما وه‌لاته‌ك دكه‌ڤیته‌ ژێر گه‌فا تیرۆرێ و مه‌ترسیێن ژناڤچوونێ، ئیدى هه‌موو سازى دكه‌ڤنه‌ د خزمه‌تا بیاڤێ له‌شكرى و سه‌ربازى دا، نموونه‌ ژ بۆ ڤێ مژار گه‌له‌كن، نێزیكترین نموونه‌ ژى د ڤى بیاڤى دا ده‌ما توركیا هێرشی عه‌فرینێ كر، هوونه‌ر و مه‌دیا توركیا، ئایین و مینبه‌رێن مزگه‌فتان هه‌موو ئه‌و شه‌رعیه‌ت دا سۆپا و حوكمه‌تا توركیا كو د سنۆرێ وه‌لاتێ خوه‌ ده‌ر بكه‌ڤیت و عه‌فرین و هنده‌ك ده‌ڤه‌رێن كوردستانى ل رۆژئاڤیێ كوردستانێ داگیر بكه‌ت، د گۆتارێن هه‌ینیێ دا پتر ژ ٨٠ هزار مزگه‌فت ل وى وه‌لاتى شه‌رێ داگیركرنا عه‌فرینێ ب جیهاد ناڤكرن و گه‌نج و ساربازێن وى وه‌لاتى هاندا شه‌رى دژى كوردان بكه‌ن، واته‌ هه‌تا ئه‌ردوگان شیا شه‌ره‌كى ل ده‌رڤه‌ سنۆرێ خوه‌ بكه‌ت و ده‌نگێ نه‌رازیێ خه‌لكێ توركیا بلند نه‌بیت، په‌نا ژبۆ مینبه‌رێن مزگه‌فتان بر، پشتى ڤێ ئێكێ ژى ئه‌و سه‌ركه‌فتنا خوه‌ ب سه‌ره‌دانا خوه‌ ل گه‌ل هه‌ردو ستران بێژان سیپه‌ل جانێ و ئیبراهیم تاتلیسى پیرۆز كر، ئێدى دبێژنه‌ ڤێ ئێكێ هیچ تشته‌كێ ناڤا وه‌لاتى ژ پاراستنا ئیمناهیا نه‌ته‌وى یا وه‌لاتێ ته‌ مه‌زنتر و گرنگتر نینه‌.
ته‌ماشه‌ى دیرۆكا ئیرانێ بكه‌ن، ل سالا ٦٥٢ زاینى ئیران ژ لایێ وه‌لاتێن عه‌ره‌بی هاته‌ داگیركرن، پاشان ده‌سته‌لاتا ده‌ره‌كى ب شێوازێ حوكمكرنا خه‌لیفه‌یێن به‌غدا ب سه‌ر ئیرانێ دا بۆ چه‌ند سه‌ده‌یه‌كان به‌رده‌وام بوو، لێ ده‌مێ ئیران ل سه‌رده‌مێ فه‌رمانروایی یا یۆنانییان ل ژێ ده‌ستێ عه‌ره‌بان هاته‌ رزگركرن، د ئێكه‌م پێنگاڤدا وان ره‌سه‌نایه‌تیا خوه‌ و سه‌ربه‌خوویی یا خوه‌ ژ عه‌ره‌بان ب ره‌تكرنا مه‌زهه‌بێ سوننى و چێكرنا مه‌زهه‌بێ شیعى نیشادا. واته‌ ئیرانیان نه‌ڤیا ژلایێ مه‌عنه‌وى ژى ئه‌و داگیركرى ببن، له‌ورا پشتى ئازادیا سیاسى وان ئایین ژى گوهارت، لێ ژ بۆ مه‌ شه‌رمه‌زاریه‌ ئه‌گه‌ر مه‌لایه‌ك تشته‌ك د به‌رژه‌وه‌ندیا كوردستانێ بێژت و مخالفى ئیسلامێ بیت، ئه‌و مه‌لایێ كو په‌سنا كاره‌كێ حوكمه‌تێ بكه‌ت و ل گه‌ل پرسا سه‌رخه‌بوونا كوردستانێ بیت، ب دیڤه‌لان ك دهێته‌ ناڤكرن و ب سه‌دان فه‌یسبۆكڤان دێ هێرشی كه‌نێ و شه‌رمزار دكه‌ن. كه‌واته‌ چما ژبۆمه‌ شه‌رمزاریه‌ ئه‌گه‌ر مه‌لایه‌ك ل سه‌ر مینبه‌رێ مزگه‌فتان په‌سا پێشمه‌رگه‌ و سه‌رۆك و حوكمه‌تاخوه‌ بكه‌ت؟ تێنا گه‌هم بۆچى ئه‌و مه‌لا و سترانبێژێن توركیا ب قاره‌مان دهێنه‌ ناڤكرن تنێ ژ به‌ر كو وان پشته‌ڤانیا ئه‌ردوگانى كریه‌ كو شه‌رى ل ده‌رڤه‌ى سنۆرێ وه‌لاتێ خوه‌ بكه‌ت، لێ ژ بۆ مه‌لا ئیحسانه‌ك شه‌رمزاریه‌ ئه‌گه‌ر د گۆتارێن خوه‌ دا پشته‌ڤانیا سه‌ركرده‌ و پێشمه‌رگه‌یان بكه‌ت، ژبه‌ركو وى سه‌رۆكى و پێشمه‌رگه‌ى هزار مینبه‌ران پاراستیه‌، كه‌واته‌ جوداهیا هێزا توركیا و لاوازیا كوردان د ڤێرێ دایه‌، تورك گه‌هشتینه‌ وێ باوه‌رێ كو هه‌تا كو سنۆرێن وان ئارام نه‌بت، تاعه‌ت و دینێ وان ژى پاراستى نابیت، كه‌واته‌ به‌رى ئه‌و به‌رگریێ ژ ئایین و كه‌لتوورێ خوه‌ بكه‌ن، ئه‌و پشته‌ڤانیا وێ هێزێ دكه‌ن كو ژ بۆ وان بوویه‌ په‌رژان و مینبه‌رێن وان دپارێزێت. ئاین و كه‌لتوور و هوونه‌رێ خوه‌ ژ بۆ به‌رژه‌وه‌ندیا وه‌لاتێ خوه‌ بكاردئینن، لێ یامه‌ هه‌رتشت گۆرى هزرێن توندره‌و كریه‌. ل ده‌ستپێكا هاتنا داعشێ بۆ كاره‌كێ رۆژنامه‌ڤانى چووبومه‌ ناڤا پێشمه‌رگه‌ى، وى ده‌مى وه‌فده‌كێ ئێكه‌تیا زانایێن ئایینێ ئیسلامێ و ئه‌وقافا دهۆكێ سه‌ره‌دانا سه‌نگه‌رى كربوون، من ددیت كو مه‌لا ئیحسانێ رێكانى كو سه‌رۆكێ ئێكه‌تیا زانایێن ئایینێ ئیسلامێ تایێ دهۆكێ ، ب هه‌یه‌جانڤه‌ دكره‌ هه‌وار كو هوون شه‌رى بكه‌ن، دلێ مه‌ و مینبه‌را مه‌ پشاڤانى تل و جه‌له‌بكا تڤه‌نگا هه‌وه‌یه‌، هه‌ر وى دگۆت هوون شه‌هیدن و ژ مرنا خوه‌ نه‌ترسن هوون یێ ژ بۆ پاراستنا هزاران مزگه‌فت و ب سه‌دان هزار نڤێژكه‌ر و موسلمان شه‌رى دكه‌ن، ژبلى كو هوون هه‌موو پێكهاته‌یێن دى دپارێزن، من ب چاڤێن خوه‌ دیت كو ب گۆتارێن خوه‌یێن ئایینى مۆرالا پشمه‌رگه‌ى بلند دكر، د هه‌مان ده‌مدا مه‌لا هه‌بوو ل كوردستانێ دگۆت ئه‌ز نكارم بێژم پێشمه‌رگه‌ شه‌هیده‌ و وى مافى ناده‌مه‌ خوه‌ بێژم داعش كافره‌. ته‌ماشه‌ى ڤێ جوداهیێ بكه‌ن، ئیدى خه‌لكێ مه‌ یێن وه‌كو مه‌لا ئیحسانى ب دووڤه‌لانك ناڤكر و مه‌لایێن توندره‌وێن كو ماف نه‌ددانه‌ خوه‌ دژى داعشێ ب ئاخڤن بوونه‌ راستگۆ و وێره‌ك. له‌ورا ئه‌ز دبێژم كوردستان ژ بۆ بهیزبوونا پێگه‌هێ سیاسى پێدڤى ب مه‌لایێن وه‌كو ئیحسان رێكانى یه‌ ژ به‌ركو ئه‌و ل هه‌مبه‌ر هه‌موو وان گه‌فێن نه‌ ره‌وا راستى گۆتن، لێ ئه‌و ئیرهابا فكریا دگه‌ل بزاڤا گۆرانێ هاتی؛ ئه‌و كه‌لتوور و فه‌رهه‌نگه‌ ل گه‌ل خوه‌ ئینا كو هه‌ر ئێكێ ژ حوكمه‌تێ رازى بیت، ئه‌و مه‌لاق و موسته‌فیده‌. داوى كۆنگره‌یا ئیكه‌تیا زانایێن ئایینێ ئیسلامێ ل كوردستانێ و گۆتارا سه‌رۆكێ حكومه‌تێ نێچیرڤان بارزانى ئاماژه‌یێن گه‌له‌ك باش د ناڤدابوون ژ بۆى كو مامۆستایێن ئاینى و هێزێن ئێمناهى ب هه‌ڤرا دژى هزرا توندره‌ و ب راوستن، سه‌رۆكێ حوكمه‌تێ باش گه‌هشتیه‌ وێ باوه‌رێ كو ئه‌و توندوتیژیا د ناڤبه‌را شیعه‌ و سوننى یا دا هه‌یه‌ د وێ ڤالاتیێ ده‌ركه‌فتیه‌ كو مامۆستایێن ئاینى یێن شیعه‌ و سوننى یان نه‌شاینیه‌ رۆلێ خوه‌ ببینن، له‌ورا بارزانیێ سه‌رۆك وه‌زیر د كۆنگرا مامۆستایێن ئایینى دا گۆت، پێدڤیه‌ په‌روه‌ده‌ریا ئایینى ببیته‌ ژێده‌رێ پێگه‌هاندنا نڤشه‌كێ ئاشتیخواز و ئارام ژبۆى كو لێبۆرین و هه‌ڤدوو قه‌بوولكرن ببیته‌ پشكه‌كێ سه‌ره‌كى د ژیانا جڤاكێ مه‌ دا.

28

كارزان فه‌قى

ل بیرا منه‌ به‌ریا سێ سالان سه‌رۆكێ لیستا پارتى ل په‌رله‌مانێ كوردستانێ د دیداره‌كا خوه‌یا تیله‌ڤزیۆنێ دا ل ل هه‌مبه‌ر په‌رله‌مانتاره‌كا گۆرانێ گۆت: د داوى كۆمبوونا جڤاتا نشتیمانیا گۆرانێ پلان هاتیه‌ دارشتن كو ئه‌ندامێن گۆرانێ وه‌ها تێبگه‌هینن ئیدى ئاڤێ گه‌له‌ك برێژن و گلۆپا گه‌له‌ك هه‌لبكه‌ن، ژ بۆى كو بێ ئاڤى و بێ كاره‌بی د ناڤا هه‌رێما كوردستانێ دا پتر ببیت و ده‌نگێ نه‌رازیێ وه‌لاتیان ل هه‌مبه‌ری حوكمه‌تێ زه‌قتر ببیت، وى ده‌مى ژبۆ گه‌له‌ك ژ خه‌لكێ هه‌رێمێ ئه‌ڤ گۆتنا (ئۆمێد خۆشناو) جهێ باوه‌ركرنێ نه‌بوو، ب تایبه‌ت بۆ كه‌سێن نه‌ پارتى، لێ نها چو گومانه‌كا من ل سه‌ر ئاشكراكرنا ناڤه‌رۆكا وێ كۆمبوونا جڤاتا نشتیمانیا گۆرانێ نه‌مایه‌، چونكى بورهان مه‌جیدێ سترانبێژێ بزاڤا گۆرانێ بخوه‌ ئه‌و گۆتن پشتراستكر و گۆت: ب هلكرنا گلۆپێن زێده‌ و رژتنا زێده‌یا ئاڤێ ئه‌ز دژاتیا حوكمه‌تێ دكه‌م. ئه‌ڤێ گۆتنا وى د ناڤ سۆشیال مه‌دیا دا گه‌له‌ك ده‌نگڤه‌دا، ره‌نگه‌ ژبۆ پتریا خه‌لكێ كوردستانێ ئه‌ڤ كریارێن ئه‌ندام و ره‌وشه‌نبیرێن گۆرانێ به‌رگه‌كێ سیاسی هه‌بیت، لێ د بیاڤى په‌روه‌رده‌ و هزركرنێ دا مه‌ترسیێن ڤێ سیاسه‌تێ و به‌رنامه‌یا ڤێ حزبێ گه‌له‌ك مه‌زنه‌، هزرا وێ ئێكێ بكه‌ حزبه‌ك شیابیت هزرا هونه‌رمه‌نده‌كى ب ڤى ره‌نگى تیرۆر بكه‌ت كو زێده‌مه‌زاختنت ئاڤێ و كاره‌بێ كریاره‌كه‌ دژى حوكمه‌تێ؛ نها ئاستێ ئه‌ندامێن ئاسایى و كه‌سێن ئومى و نه‌خوانده‌ڤان د ناڤا وێ حزبێ دا ب چ ئاوایه‌كى یه‌؟ گه‌ر ل پێش تیڤیان ب ئاشكه‌را بهێته‌ گۆتن كو زیان گه‌هاندن ب مال و سامانێ ملله‌ته‌كى تشته‌ك نۆرمال و جهێ ده‌ستخوه‌شیێ یه‌، نها د كۆمبوونێن ڤه‌شارتیێن وێ حزبێ ب چ ئاواى پلانێ بۆ ڤى ملله‌تى و دژى كارنامه‌یێن حوكمه‌تێ دهێته‌ دارشتن؟ پرسیارا جه‌وهه‌رى ئه‌ڤه‌یه‌، ئه‌ڤه‌ چ ئه‌قلیه‌ته‌ ب ڤى ره‌نگى بریارێ بده‌ت كو هلكرنا گه‌له‌ك گلۆپان و زێده‌ رژتنا ئاڤێ كریاره‌كه‌ ب دژى حوكمه‌تێ دهێته‌ كرن؟ تێناگه‌هم ئه‌ڤ میتۆدا بزاڤا گۆران كار پێ دكه‌ت ژ كێڤه‌ هاتیه‌ كو هه‌رده‌ما ئه‌و شیان زیانێ ب ملله‌تى بگه‌هینن وى ده‌مى حوكمه‌ت خه‌تاباره‌ و ئه‌و ده‌سته‌لات دێ شكیێت؟ ئه‌ز نها ب درستى گه‌هشتم وێ باوه‌ریێ كو چما گۆڕان هه‌لبژارتن بۆ هه‌لبژارتنێ ئاستێ وێ یێ جه‌ماوه‌رى كێمتر دبیت، ل هه‌مبه‌ر دا پارتى د هلبژارتنان دا سه‌ركه‌فتنێن مه‌زنتر ب ده‌ست د ئیخیت. نها ل كوردستانێ مه‌ حوكمه‌ته‌ك هه‌یه‌ و سه‌رۆكێ وێ حوكمه‌تێ نێچیرڤان بارزانى یه‌، ئه‌گه‌ر كاره‌با نه‌بوو و ئاڤ كێمبوو؛ حوكمه‌ت كێماسیان بۆ خوه‌ ڤه‌دگه‌رینیت و نابێژیت فلان حزب كاره‌با و ئاڤا مه‌ ددزیت، لێ سه‌یر ئه‌وه‌ حزبه‌ك ژى هه‌یه‌ هه‌كه‌ كاره‌با باش بیت و ئاڤ ژى مشه‌ بیت، كێماسیان بۆ ئه‌ندام و هونه‌رمه‌ند و ره‌وشه‌نبیرێن خوه‌ ڤه‌دگه‌رینیت، چونكى وه‌كو پێدڤی نه‌شیانه‌ گلۆپان زێده‌ هلكه‌ن و گه‌له‌ك ئاڤێ ب هه‌روه‌ ببه‌ن له‌ورا خه‌لك بوویه‌ خوه‌دى كاره‌ب و ئاڤێ. ته‌ماشه‌ى ڤێ جوداهیێ بكه‌ن، حزبه‌ك كارنامه‌یا وێ یا هه‌لبژارتنان دابینكرنا كاره‌با و ئاڤێ و خزمه‌تگۆزاریان بیت، حزبه‌ك دى هه‌بیت ب پێچه‌وانه‌ڤه‌ هزر بكه‌ت و نه‌هێلانا ئه‌و كاره‌با و ئاڤا هه‌یی ژى به‌رنامه‌ و پلانا وێ بیت!! بینن هزرا خوه‌ هونه‌رمه‌ند بیت و سترانێن وى ده‌باره‌ى خه‌ما ئاخ و كوردستانێ بیت، لێ ب ئاشكه‌را بێژیت من زارۆیێن خوه‌ وه‌ها په‌روه‌رده‌ كرینه‌ كو ب زۆر مه‌زاختنا ئاڤێ و كاره‌بێ دژاتیا حوكمه‌تێ بكه‌ن! دڤێت په‌یاما هونه‌رێ وى به‌ر ب كیژان ئاستى بربیت؟ یان ئه‌و زارۆیێ وه‌ها هاتیه‌ په‌روه‌رده‌كرن، ده‌ما ل ژێر په‌روه‌رده‌یا بورهانێ سترانبێژ ئه‌و زارۆ مه‌زن دبن، مه‌ترسیێن وان ل سه‌ر جڤاكى چه‌ند مه‌زنه‌؟ ب هه‌موو باوه‌ریان ئه‌ز دبێژم، گۆڕان و ئه‌ندامێن گۆرانێ ناهێلن خه‌لكێ كوردستانێ ب گشتى و ئه‌ندامێن پارتى ب تایبه‌تى ژ حوكمه‌ت و حزبا خوه‌ تووره‌ ببن، چونكى ده‌ما ئه‌ز حزبه‌كێ دبینم ب ناڤێ حزبا مه‌ده‌نى هاتیه‌ گۆره‌پانا سیاسى و د ناڤه‌رۆكدا هه‌موو تشته‌ ب تنێ مه‌ده‌نى نینه‌، بێ دودلى دزانم ئه‌و تیرۆرا فكریا وان ل هه‌مبه‌ر حوكمه‌تێ ل سنورێ سلێمانیێ كرى دێ حوكمه‌تێ بهێزتر كه‌ت نه‌ك دێ ژناڤبه‌ت، هه‌ر ئه‌ڤه‌ ژى وه‌كریه‌ بزاڤا گۆران به‌ر ب داویێ ڤه‌ بچیت، چونكى ل ره‌خه‌كى ناكۆكیێن ناڤخوه‌ ل سه‌ر پاره‌ و دابه‌شكرنا داهاتێ كۆمپانیێن وان و تاپۆكرنا گرتێ زه‌رگه‌ته‌ هه‌یه‌، ل ره‌خه‌كێ دى بیرمه‌ندێن وان گه‌له‌ك ئاڤێ و كاره‌بێ ب هه‌روه‌ دبه‌ن ژبۆى كو خه‌لكێ كوردستانێ بێ ئاڤ و كاره‌با بن، ئه‌ڤێ ژى ژبیر بكه‌ن، گۆڕان ل ئالیه‌كێ دبێژیت: شه‌رمزاریه‌ مرۆڤ مالێ حزبان بخۆت، لێ ئه‌و ب نهێنى مه‌هانه‌ 25 ده‌فته‌رێن دۆلارى ژ ئێكه‌تیێ وه‌ردگرن، ته‌ماشه‌ى ڤێ هزركرنێ بكه‌ن: بۆ كارزانه‌كێ وه‌كى من شه‌رمزاریه‌ ل هه‌مبه‌ر ڤێ گۆتارا خوه‌ 25 هزار دیناران ژ ده‌زگه‌هه‌كێ وه‌شانێ وه‌ربگرم، لێ ژ بۆ گۆڕان نۆرماله‌ بێى كو چ گۆتاران ژى بنڤێسیت مه‌هانه‌ 25 ده‌فته‌رێن دۆلارى ب نهێنى ژ ئێكه‌تیێ وه‌ربگریت. نها ژى باش دزانم بزاڤا گۆڕان باوه‌رى و پشته‌ڤانى ژ بۆ حوكمه‌تا هه‌رێمێ زێده‌تر كریه‌، چونكى هه‌رده‌ما گازنده‌یێن خه‌لكى كوردستانێ ل هه‌مبه‌ر حوكمه‌تێ زێده‌ دبن، ژ نشكه‌كێ ڤه‌، بورهان مه‌جیدێن گۆرانێ ئاشكه‌را دبن و باوه‌ریا من و خه‌لكى ب چاكسازیێن حوكمه‌تێ زێده‌تر دكه‌ن، بورهان مه‌جیدێ هونه‌رمه‌ندێ گۆرانێ ئه‌ز گه‌هاندم وێ باوه‌ریێ كو كێم ئاڤى و كێم كاره‌بایا هه‌رێمێ سووچێن حوكمه‌تێ نینن، به‌لكو حوكمه‌ت شیایه‌ ل گۆره‌ى پێدڤیێن خه‌لكی كاره‌با و ئاڤێ به‌رهه‌م بینن، لێ گۆران و ئه‌ندامێن وێ ب پلان و به‌رنامه‌ زێده‌تر ژ پێدڤیێن خوه‌ ئاڤێ و كاره‌بێ د مه‌زێخن، له‌ورا مه‌ ئاریشه‌یا كێم ئاڤى و كێم كاره‌با نشتیمانى هه‌یه‌، بێگومان ئه‌ڤه‌ نه‌ ب گۆتنا من، به‌لكو ل دووڤ گۆتنا ره‌وشه‌نبیر و هونه‌رمه‌ندێن بزاڤا گۆرانێ بخوه‌، له‌ورا ئه‌گه‌ر ئه‌ز ل سلێمانیێ بام، داچمه‌ ده‌ف دوكانا هونه‌رمه‌ند بورهان مه‌جیدى و بێژمێ، ب دزینا ئاڤ و كاره‌با خه‌لكى؛ نه‌ ب تنێ هه‌وه‌ ده‌ستهه‌لات نه‌گوهۆرى؛ به‌لكو هه‌وه‌ بزاڤا گۆران ژى كره‌ حزبه‌كێ بچووك بچووك.

47

كارزان فه‌قى

ره‌نگه‌ هه‌بوونا كۆنسولخانا ئه‌مریكا ل هه‌رێمێ تشته‌كێ نۆرمال بیت، چونكى نوونه‌راتى و كونسولخانه‌یێن پتر ژ 35 وه‌لاتان ل هه‌ولێرێ هه‌نه‌، لێ دانانا به‌رێ بنیاتا مه‌زنترین كونسولخانه‌یا ئه‌مریكا ل سه‌ر ئاستێ جیهانێ ل هه‌ولێرێ جهێ ل سه‌ر راوه‌ستیانێ یه‌ و ئاماژه‌یا گرنگیدانا ئه‌مریكا ب هه‌رێما كوردستانێ نیشان دده‌ت، ل سالا 2017 گرێبه‌ستا ئاڤاكرنا وێ كونسولخانێ هاتیه‌ ئیمزاكرن و ل سالا 2022 دێ ب دووماهى هێت، گۆژمێ پرۆژه‌ى ژى 795 ملیۆن دۆلارن، كۆنسولخانه‌ دێ ل سه‌ر رووبه‌رێ 200 هزار مه‌ترێن دوجا هێته‌ ئاڤاكرن. كه‌واته‌ نه‌ ب تنێ مه‌زنترین كونوسولخانا ئه‌مریكایه‌ ل سه‌رانسه‌ری جیهانێ، به‌لكو ژ گه‌له‌ك بالیۆزخانه‌یێن ئه‌مریكا ل وه‌لاتێن جیهانێ مه‌زنتره‌، گرنگیا هه‌ولێرێ د ڤان هه‌ژماران دیار نابیت، به‌لكو ب به‌رارودكرن ل گه‌ل بالیۆزخانه‌یێن ئه‌مریكا ل وه‌لاتێن زلهێزێن جیهانێ دێ پتر رۆهن بیت كو هه‌ولێر ژبۆ ئه‌مریكا د كیژان پێگه‌هێ خوه‌ دایه‌، كۆنسولخانا ئه‌مریكا ل هه‌ولێرێ 10 جاران مه‌زنتره‌ ژ بالیۆزخانا ئه‌مریكا ل له‌نده‌نێ، ره‌نگه‌ بهێته‌ گۆتن كو له‌نده‌نێ ئارامه‌ و ئه‌مریكا پێدڤى بالیۆزخانه‌یه‌كا قه‌به‌ ل وى وه‌لاتێ نینه‌، لێ دێ ڤێ یه‌كێ ل گه‌ل بالیۆزخانا ئه‌مریكا ل ئیسلام ئابادا پایته‌ختا پاكستانێ به‌راوردكه‌ین، چونكى ئه‌و وه‌لات ب به‌راورد ل گه‌ل بریتانیا دوورتره‌ ژ ئارامیێ و گه‌له‌ك جاران ژى سه‌ربازێن ئه‌مریكى لێ هاتینه‌ كوشتن، هه‌روه‌سا سنورێ وێ ل گه‌ل ئیرانێ ژ سنۆرێ هه‌رێما كوردستانێ ل گه‌ل ئیرانێ درێژتره‌، لێ قه‌باره‌یێ بالیۆزخانا ئه‌مریكا ل ئیسلام ئاباد 150 هزار مه‌تر دووجایه‌، كه‌واته‌ كونسولخانا ئه‌مریكا ل هه‌ولێرێ ب قه‌بارێ 50 هزار مه‌تر دووجا ل بالیۆزخانا ئه‌مریكا ل پاكستانێ مه‌زنتره‌، هه‌روه‌سا ل به‌یرۆتا پایته‌ختا لووبنانێ ژى مه‌زنتره‌، رووبه‌رێ بالیۆزخانا ئه‌مریكا ل به‌یرۆتێ ل سه‌ر رووبه‌رێ 174 هزار مه‌تر چارگۆشه‌یه‌، هه‌رچه‌نده‌ هێزا حزبوللاها لوبنانێ ل وى وه‌لاتى ژى هه‌یه‌ و ل بن هه‌ژموونا ئیرانێ یه‌ و خوه‌ ب دووژمنه‌كێ سه‌رسه‌ختێ ئه‌مریكا ددانیت، لێ هه‌ر ژبۆ ئه‌مریكا هه‌ولێرێ گرنگتر دیاردبیت، د ناڤا كۆنسولخانا نوو یا ئه‌مریكا هه‌موو تشت دهێته‌ ئاڤاكرن و جهێن مانه‌ڤا سه‌ربازێن مارێنز یا ئه‌مریكى ل كونسولخانێ دهێته‌ چێكرن كو كارێ وان ئیمناهیا كونسولخانێ یه‌، هه‌موو ئاماژه‌ دبێژن كو ئه‌مریكا پرۆژه‌یه‌كێ درێژخایه‌ن ل هه‌رێما كوردستانێ هه‌یه‌ و ب دانانا به‌رێ بنیاتا كۆنسولخانا خوه‌، به‌رێ بنیاتا وێ پرۆژێ ژى دانا، ڤێ یه‌كێ دێ كاریگه‌ریه‌كا مه‌زن ژ بۆ بهێزكرنا پێگه‌هێ هه‌رێما كوردستانێ هه‌بیت و ئه‌مریكا بخوه‌ دێ بیته‌ په‌رژانه‌ك ل هه‌مبه‌ر هه‌موو وان گه‌فێن پێشتر ل وه‌لاتێن جیران ژ بۆ كوردستانێ دهاتن، چوونكى هه‌ر روودانه‌كا ببتیه‌ مه‌ترسی ل سه‌ر ئێمناهیا هه‌رێما كوردستانێ، ب ره‌نگه‌كێ راسته‌وخوه‌ ئه‌مریكا وێ روودانێ ب مه‌ترسى سه‌ر خوه‌ و كونسولخانه‌ و هه‌موو كۆمپانى و وه‌لاتیێن ئه‌مریكى یێن ل هه‌رێمێ دزانیت، كه‌واته‌ پشتى سه‌رهه‌لدانا بهارا 1991 ئه‌مریكا هه‌رێما كوردستانێ ب ده‌ڤه‌را دژه‌ فرین ناڤكرى و ب پرۆژه‌ یاسایه‌كێ ل گه‌ل فره‌نسا زۆرترین ده‌نگێن جڤاتا ئاسایشا ناڤده‌وله‌تێ بۆ كۆمڤه‌ كرى، ل وێرێ په‌یوه‌ندیێن هه‌ولێرێ و واشنتۆنێ نه‌ راوه‌ستان، به‌لكو بوونه‌ ده‌ستپێكه‌ك بۆ په‌یوه‌ندیه‌كا درێژتر و ل شه‌رێ دژى داعشێ ژى ئه‌مریكا رۆله‌كێ به‌رچاڤ د پاراستنا هه‌رێما كوردستانێ و هاریكاریا هێزێن پێشمه‌رگه‌ى هه‌بوو، تانها ژى مه‌هانه‌ بودجه‌یه‌كێ تایبه‌ت بۆ هێزێن پێشمه‌رگه‌ى ره‌وانه‌ دكه‌ت، كه‌واته‌ حوكمه‌تا هه‌رێما كوردستانێ شیایه‌ وێ باوه‌ریا ئه‌مریكا ب هه‌رێما كوردستانێ هه‌ى وه‌كو خوه‌ بهێلیت و پتر ژى پێشڤه‌ ببه‌ت، دانانا به‌رێ بنیاتا مه‌زنترین نوونه‌راتیا ئه‌مریكا ل سه‌ر ئاستێ جیهانێ ل هه‌ولێرێ ب ئامه‌ده‌بوونا سه‌رۆكێ حكومه‌تا هه‌رێمێ و بالیۆز و كونسولێ ئه‌مركیا ل ئیراقێ و ئیراقێ و هه‌ولێرێ ژى بخوه‌ باشترین به‌لگه‌یه‌ كو نها ل رۆژهه‌لاتا ناڤین كوردێن هه‌رێما كوردستانێ باشترین دۆستێ ئه‌مریكانه‌

50

كارزان فه‌قى

گرنگ نینه‌ سه‌ركه‌فتیێن هه‌لبژارتنێ و خوه‌دان زۆرینه‌ كورسیێن په‌رله‌مانى، یان ژى ئاراسته‌یێ نه‌رازى و ماكینه‌یا روونشتناشه‌شى خزیرانێ ل په‌رله‌مانێ ئیراقێ دێ سه‌ركه‌ڤیت؟ لێ روونشتنا په‌رله‌مانێ ئیراقێ د داوى رۆژێن ته‌مه‌نێ خوه‌ دا، هه‌كه‌ ژ بۆ په‌رله‌مانتارێن عه‌ره‌بێن پشكدارى كرى چه‌ند بلیمه‌تى و سه‌ركه‌فتن دناڤ دا بهێته‌ دیتن، به‌روڤاژى ژبۆ په‌رله‌مانته‌رێن كوردێن پشكدارى وێ روونشتنێ بووین بێ روومه‌تى و رووره‌شى و دو روویێ د ناڤ دا دهێته‌ دیتن و ئه‌ز ڤێ یه‌كێ ب خیانه‌تاشه‌شى خزیرانێ ب ناڤ دكه‌م، لێ ئه‌و خیانه‌ت ژ كى هاتیه‌كرن؟ پرسا جه‌وهه‌رى ئه‌ڤه‌یه‌ و هه‌كه‌ ئه‌ڤ پرسه‌ ژبۆ وان هه‌ر شه‌ش ئالیێن كوردستانێ یێن نه‌رازى ئاراسته‌ بكه‌ى دێ ژ به‌رسڤێ ره‌ڤن، چونكى ل ده‌مێ بانگه‌شه‌یێ هه‌لبژارتنان دا سه‌ر و بنێ ئه‌زمان وان مافێ پێشمه‌رگه‌ى و نان و قووتێ پێشمه‌رگه‌ى بوو، و د روونشتنا شه‌شى خزێرانێ دا پشكدارى هه‌لوه‌شاندنا ده‌نگێن پێشمه‌رگه‌ى بوون. رووره‌شى هه‌تا وى راده‌ى د بانگه‌شێ دا بۆ ده‌مێ هه‌یڤه‌كێ بكه‌یه‌ هه‌وار و ب ده‌نگێن بلند بێژى: شه‌رمه‌ مووچه‌یێ پێشمه‌رگه‌ى وه‌كو مووچه‌یێ سه‌ربازێن ئیراقێ نه‌بیت، د هه‌مان ده‌م دا تو ب خوه‌ ده‌نگێ پێشمه‌رگه‌ى ل ئاستێ ده‌نگێ حه‌شدا شه‌عبی و سوپایێ ئیراقێ ب ره‌وا نه‌بینى!! شه‌رمزارى هه‌تا ڤى راده‌ى؟! ئه‌ز نكارم بێژم په‌رله‌مانتارێن عه‌ره‌ب خیانه‌ت ل پێشمه‌رگه‌ى كریه‌، چونكى ئاشكه‌رایه‌ ئه‌و هه‌تا چ راده‌ى دژى ناڤێ پێشمه‌رگه‌ و مافێ پێشمه‌رگه‌ى بوون، هه‌ر بخوه‌ خیانه‌ت ژى ئه‌و نینه‌ تو ل دوژمنێ خوه‌ بكه‌ى، به‌لكو خیانه‌ت ئه‌وه‌ تو ل دۆستێ و مالێ خوه‌ بكه‌ى، ده‌ما د بانگه‌شێ دا، گۆران و كۆمه‌ل و هه‌ڤپه‌یمانى و ئێكگرتوو و نه‌وه‌ى نووێ و بزاڤا ئیسلامى ب هه‌موو ره‌نگان دژى پارتى و ئێكه‌تى بانگه‌شه‌ دكرن، خالا سه‌ره‌كیا بانگه‌شه‌یا وان ژى خوارنا مافێ پێشمه‌رگه‌ى بوو ژ ئالیێ پارتى و ئێكه‌تى ڤه‌، نها ئه‌ڤ شه‌ش ئالی یه‌ به‌یاننامه‌كا خوه‌شحالى و رێزگرتنێ ژ قانوونا په‌رله‌مانێ ئیراقێ ده‌رخستیه‌، كو ئێك ژ ماده‌یێن وێ قانوونێ هه‌لوه‌شاندنا ده‌نگدانا تایبه‌ته‌ (ب ده‌نگێن پێشمه‌رگه‌) ی ڤه‌ ل هه‌رێما كوردستانێ. ئه‌ڤ جۆرێ كوردان ژ بۆ من گه‌له‌ك نامۆنه‌، خیانه‌تا ب ڤى ره‌نگى د دیرۆكا كوردان روو نه‌دایه‌ هژماره‌كا حزبێن كوردى رۆژه‌كێ نانێ خوه‌ ب ئافكا پێشمه‌رگه‌ى بخۆن، رۆژا دووڤ دا ژى هه‌تا سه‌ر هه‌ستى دژى هێزێن پێشمه‌رگه‌ى بن، ته‌ماشه‌بكه‌ حزب بیت خوه‌ ب مافخوازێ پێشمه‌رگه‌ و خه‌لكى بدانیت، د هه‌مان ده‌مدا مافێ وێ ئێكێ نه‌ده‌نه‌ پێشمه‌رگه‌ى وه‌كو وه‌لاتیه‌كێ ئاسایى د رۆژا هه‌لبژارتنان خوه‌دان ده‌نگێ خوه‌ بیت! نها ژ بۆ من گه‌له‌ك زه‌حمه‌ت بوویه‌ ئه‌ز هنده‌ك حزبێن كوردستانى و حزبێن عه‌ره‌بێن ئیراقێ ژ جودا بكه‌م، بۆ نموونه‌ په‌رله‌مانتارێن شیعى و دژه‌ كورد دبێژن، پارتى و بارزانى دكتاتۆره‌، شه‌ش حزبێن كوردى ده‌ستێن خوه‌ بلند دكه‌ن و دبێژن: ئه‌شهه‌دو مابیلاهـ راسته‌، ئه‌و دبێژن: حوكمه‌تا هه‌رێمێ ماف نینه‌ په‌ترۆلێ بفرۆشیت و دڤێت هه‌مى ده‌ما ده‌ستێ خوه‌ ل به‌ر مه‌ درێژ كه‌ت و ئه‌م خێرێ پێ بكه‌ین، شه‌ش حزب دبێژن: ئه‌شهه‌دو ما بیلاهـ راسته‌ هوون ژ مه‌ شه‌ریفترن، 141 په‌رله‌مانتارێن عه‌ره‌بێن دژى كورد و دژه‌ پێشمه‌رگه‌ گۆتن، دڤێت ده‌نگێ پێشمه‌رگه‌ بێهته‌ هه‌لوه‌شاندن و نه‌هێته‌ هژمارتن، دیسا پتر ژ 30 په‌رله‌مانتارێن كورد یێن سه‌ر ب گۆران و كۆمه‌ل و ئێكگرتوو ده‌ست بۆ قوتان و گۆتن: به‌لێ دڤێت بهێته‌ هه‌لوه‌شاندن، ئه‌واته‌ ئه‌ز تێناگه‌هم جوداهیا هه‌وه‌ وه‌كو په‌رله‌مانتاره‌كێ كورد ل گه‌ل وى په‌رله‌مانتارێ عه‌ره‌ب چیه‌؟ بۆ من سه‌یره‌ گۆران حزبه‌كا كوردى بیت و لیستا ده‌وله‌تا یاسا یا شیعى بیت و هه‌ردو ژبۆ هه‌لوه‌شاندنا ده‌نگێن پێشمه‌رگه‌ى ئێك هه‌لوێست بن؟!! باشه‌ دوور ژ نه‌ته‌وایه‌تى، چه‌ند ل گه‌ل شه‌رعێ ئیسلامێ دگونجیت كۆمه‌ل و ئێكگرتوو دو حزبێن ئیسلامى بن و د هه‌مان ده‌م دا دلخوه‌شبن ب هه‌لوه‌شاندنا ده‌نگێن پێشمه‌رگه‌ى كو مزگه‌فت و ئایینێ ئیسلامێ ژ هه‌موو مه‌ترسیێن تیرۆرێ پاراستیه‌؟ سه‌یرتر ژ ڤێ ئێكێ ژى ئه‌وه‌ گومانێن سه‌خته‌كرنێ (ته‌زویر) ل سه‌ر ده‌نگدانا تایبه‌ت ل هه‌رێمێ نینن و ئه‌گه‌ر سكالایه‌ك ژى هه‌بیت دڤێت تنێ ئه‌و سندوقا گومان ل سه‌ر هه‌ى بهێته‌ هه‌لوه‌شاندن، لێ ل ڤێرێ ژى په‌رله‌مانتارێن گۆران و كۆمه‌ل و ئێكگرتوو وژدانێن خوه‌ ژبیركرن و ژبۆ رازیكرنا خوه‌شتڤیێن خوه‌یێن عه‌ره‌ب كه‌س ژ وان تێبیینه‌ك ژى نه‌گۆت، كه‌واته‌ هه‌لبژارتنا 12 گولانێ نه‌ب تنێ قه‌باره‌یێ پارتێن سیاسى یێ هه‌رێمێ دیاركرن، به‌لكو روویێ گه‌له‌ك حزبان ژى سپى كر و ژبۆ خه‌لكى دیاربوو كیه‌ ل گه‌ل پێشمه‌رگه‌ و كیه‌ دژى پێشمه‌رگه‌ى؟ كی بوو بزاڤا باشتركرنا ره‌وشا پێشمه‌رگه‌ى دكر و كی بوو ل رۆژا شه‌شى خزیرانێ ده‌ست ل گه‌ل په‌رله‌مانتارێن عه‌ره‌بێن شۆڤینى تێكهه‌لكرى ژ بۆ ژێبرن و نه‌هێلانا سه‌نگا هێزێن پێشمه‌رگه‌ى؟ ئه‌و ژى ب هه‌لوه‌شاندنا ده‌نگدانا تایبه‌ت یا هه‌رێما كوردستانێ كو ژبلى پارتى و ئێكه‌تى، نوونه‌رێن حزبێن گۆران و كۆمه‌ل و ئێكگرتوو رۆل د ڤێ خالێ دا هه‌بوویه‌ و پشتى په‌سه‌ندكرنێ ژى د به‌یاننامه‌كێ دا، رێزلێگرت و پشته‌ڤانیا قانوونێ كرن، ئه‌ز ڤێ ئێكێ ب خیانه‌تا شه‌شى خزیرانێ بناڤ دكه‌م، لێ ئه‌و خیانه‌ت ل پێشمه‌رگه‌ى هاته‌ كرن.

18

كارزان فه‌قى

جێگیرنه‌بوونا ره‌وشا سیاسى یا ده‌ڤه‌ره‌كى ب به‌راورد ل گه‌ل ده‌ڤه‌ره‌كى دى گه‌له‌ك به‌هانه‌ بۆ هه‌نه‌، لێ پتر ژ بۆ بنه‌مایێ بریاردانا خه‌لكى و پیڤه‌رێ هه‌لبژارتنان ئالییه‌كێ سیاسى ڤه‌دگه‌ریت، پرسا گه‌وهه‌رى ئه‌وه‌، چما ل سنۆره‌كى گه‌له‌ك پارت و ئالیێن نوو په‌یدا دبن و د ژیێ كێ كیم دا بلند و نزمیا زۆر بخوه‌ دبینن، د هه‌مان ده‌م دا ل ده‌ڤه‌ره‌كا دى نێزیكى چه‌رخه‌كه‌ ب تنێ پارته‌ك حاكم و ده‌سته‌لاتداره‌ و چو ده‌مه‌كى ب وى رێژه‌ى باوه‌ریا خه‌لكێ خوه‌ ژ ده‌ست نه‌دایه‌ كو كو مه‌ترسیا ژناڤچوونێ ل سه‌ر په‌یدا بیت؟ ل ڤێره‌ سایكۆلۆژیا خه‌لكێ وێ ده‌ڤه‌رێ بریارێ ل سه‌ر ڤێ یه‌كێ دده‌ت، بۆ خه‌لكێ سنۆرێ پارتى گرنگ نینه‌ سه‌ركرده‌یێن وان چه‌ند خوانده‌ڤانن، بۆ ده‌یكا شه‌هیده‌كى گرنگ نینه‌ به‌رپرسێ فلانه‌ لقا پارتى چه‌ند پرتووكێن چاپكرى ل بازارى هه‌نه‌؟ چ مفایێ فرۆشیاره‌كى د هندێ دایه‌ كو به‌رپرسه‌كێ چه‌ند پرتووكێن وى ل ژێر چاپێنه‌؟ بۆچى گرنگ بیت د فلان پرتووك و بێڤان گۆتارێ دا، سه‌رۆكێ حوكمه‌تێ چ ئایدۆلیژیه‌ك هه‌بوویه‌؟ ئه‌ڤه‌ ژ بۆ وێ خه‌لكێ كو تێهنیێ خزمه‌تگوزاریێ بیت، هیچ گرنگیا خوه‌ نینه‌، ب راستى ژى ئه‌ركێ گه‌وهه‌ریێ سیاسه‌تڤانى نڤێسین و چاپكرنا پرتووكان نینه‌، ته‌ماشه‌ى وه‌لاتێن رۆژئاڤا بكه‌ن، كێم سیاسه‌تڤان هه‌نه‌ ل ده‌مێ ئه‌و ل گۆپیتكا ده‌ستهه‌لاتى بن پرتووكێن چاپكرى هه‌بن و خه‌لكى خوه‌ به‌ر ب ئایدولۆژیه‌كێ هان بده‌ن، به‌لكو سیاسه‌تڤان ب پله‌ ئێك ئه‌ركێ وى خزمه‌تكرنه‌ و خه‌لك ژى ل دووڤ وێ خزمه‌تا هاتیه‌كرن بریارێ ل سه‌ر دده‌ت نه‌ك ل دووڤ وان پرتووكێن وى كو ل بازارى هه‌نه‌، له‌ورا ئه‌گه‌ر ئه‌ز چه‌ند خوانده‌ڤایێ پرتووكێن نه‌وشێروان مسته‌فاى بم، ل رۆژا ئه‌ز ده‌نگێ خوه‌ دده‌م پرتووكێن وى بۆ ده‌نگدانا من پیڤه‌ر نینن، به‌لكو ته‌ماشه‌ وێ كه‌ش و هه‌وایێ دكه‌م كو ل ژێر ده‌ستێ حزبا وى هاتیه‌ دروستكرن، ته‌ماشه‌ى وێ نڤشێ دكه‌م كو پشتى دروستبوونا گۆران په‌یدابوویه‌ و ب چ ئاوایه‌كێ سه‌ره‌ده‌ریێ ل گه‌ل و ره‌وش كاودانان دكه‌ن، گه‌له‌ك ب رۆهنى دبینم ئه‌و نڤشێ ل ژێر سایكۆلۆژیا گۆرانێ دروست بووى چاوا هێرشی پیرۆزى و ناڤێ پێشمه‌رگه‌ى دكه‌ن، حزبه‌ك ب هه‌موو مه‌زناهیا خوه‌ڤه‌ مافێن پێشمه‌رگه‌ى بكه‌ته‌ درووشمێ خوه‌، د هه‌مان ده‌م دا په‌رله‌مانتاره‌كێ وێ حزبێ پێشمه‌رگه‌ى ب خرابكرنا گوندێن عه‌ره‌بان تۆمه‌تبار بكه‌ت و ناڤێ پێشمه‌رگه‌ى ب كرنا ئه‌نفالێ ل گوندێ ئه‌ره‌بان كرێت بكه‌ت بخوه‌ هه‌ڤدژییه‌كه‌ و ژ ناڤ و قیمه‌تا وێ حزبێ كێم دكه‌ت، له‌ورا نه‌وشێروانێ وه‌غه‌ركرى چه‌ند شیابیت د پرتووكا (به‌ ده‌م رێگاوه‌ گول چنین) گولا بچینیت، لێ ده‌ما هه‌لسوراو ئه‌ندامێن وێ ژ بلى هێرشكرن و شكاندنا پیرۆزیێن خه‌لكى، چو تشته‌كى دى لێ نه‌هێته‌ دیتن وى ده‌مى پرتووكێن رێكخه‌رێ وێ حزبێ نابیته‌ فریادره‌سێ وان، ئه‌ز نكارم پیره‌ژنه‌كێ دانعه‌مر نه‌چار بكه‌م بچیت پرتووك و دیدارێن تاله‌بانى بخوینیت دا كو بزانین ئه‌و چ گه‌وهه‌ره‌كێ مه‌زن بوویه‌ و چ سیاسیه‌كێ ئاشتى خواز بوویه‌، به‌لكو ژ بۆ كه‌سێن نه‌ خوانده‌ڤان و خه‌لك ب گشتى سیسته‌مێ حكومرانى و ده‌سته‌لاتدارى دێ بیته‌ پیڤه‌رێ هه‌لبژارتنێ، كوردان دكه‌ڤن دا گۆتیه‌ (هه‌ر داره‌ك ب به‌رهه‌مێ خوه‌ دهێته‌ نیاسین)، چار سالن هه‌ڕێم د قه‌یرانێ ده‌ربازدبیت، تاكه‌ حزبێ كو دانپێدانێ ب هه‌بوونا قه‌یرانێ دكه‌ت و سۆزێن چاره‌سه‌ركرنێ دده‌ت پارتى دیمۆكراتى كوردستانه‌، د هه‌مان ده‌م ئه‌ڤ قه‌یرانه‌ ژ بۆ هه‌موو حزبێن دژه‌ پارتى و دژه‌ حوكمه‌تێ بوویه‌ كارتێ فشارێ و ماكینه‌یا ئازراندنا خه‌لكێ كوردستانێ دژى پارتى و چێكرنا خوه‌نیشاندانێ دژى حوكمه‌تێ، لێ د راستى دا خه‌لك چاره‌سه‌ركرنێ دخوازیت و خوه‌نیشاندانێ ناخوازیت، كه‌واته‌ ئه‌م بلا ره‌وشا نها و به‌رى دو سالان ل گه‌ل هه‌ڤدو به‌راورد بكه‌ین، چه‌ند گوهۆرین هاتینه‌ كرن، چاوا د مه‌دیا زۆنه‌كێ دا مانشێتێن داگیركرنا هه‌ولێرێ و ژناڤچوونا كوردستانێ ب خه‌ته‌كێ مه‌زن و سۆر د هاته‌ نڤێسین و د مه‌دیایا زۆنێ دى هه‌ول بزاڤێن قورتالكرنا خه‌لكێ كوردستانێ هێڤێنێ نووچه‌ و به‌رنامه‌یان بوویه‌، ئێدى كو هه‌موو پارتێن دى خوه‌ ژ حوكمه‌تێ ڤه‌كێشان و پارتى ب ته‌نێ هێلا، دڤێت وێ دانپێدانێ ژى بكه‌ین سه‌رۆكێ حوكمه‌تێ كو هه‌ڤده‌م جێگرێ سه‌رۆكێ پارتى دیمۆكراتى كوردستانه‌ شیا ره‌وش ئابووریا خه‌لكى بگوهۆریت و ئه‌و هه‌ستیاریا د ناڤبه‌را هه‌ولێر و به‌غدایێ هه‌ى ئارام بكه‌ت، دڤێت وێ دانپێدانێ بكه‌ین كو پارتى ب ئه‌گه‌رێ سه‌ركه‌فتنا خوه‌ د حوكمه‌تێ دا شیا د هه‌لبژارتنێ دا ژى سه‌ربكه‌ڤیت.

154

كارزان فه‌قى
تابۆ په‌یڤه‌ك كوردى یه‌، ژبۆ وان په‌یڤان دهێته‌ بكارئینان كو د ناڤا جڤاكى دا دركاندنا وان ب شه‌رم دهێته‌ دانان، واته‌ هنده‌ك په‌یڤ و گۆتنێن نه‌خوه‌ش هه‌نه‌ كو د پۆلینكرنا فه‌رهه‌نگێ دا دچیته‌ بیاڤێ تابۆ دا و ده‌ما مرۆڤ وان په‌یڤان بدركینیت ژى دێ پێدڤى ب دو كڤانێن شه‌رمێ بیت، لێ د هه‌ڤركیا ناڤبه‌را پارتێن سیاسى یێن هه‌رێمێ ئه‌ڤ تابۆ ژى هاتن شكاندن و نها تا راده‌یه‌كێ جڤاكێ هنده‌ك ده‌ڤه‌رێن هه‌رێما كوردستانێ و ب تایبه‌ت سنۆرێ زۆنا ره‌نگاوره‌نگ به‌ر ب جڤاكه‌كێ (ششتى) دچیت، ژ بۆ ڤێ ئێكێ ژى هزار و ئێك به‌لگه‌ هه‌نه‌ و تۆرێن جڤاكى ژى ئالاڤێ شكاندنا وان تابۆیان و نه‌هێلانا دیوارێ رێزگرتنێ یه‌، سه‌یر ئه‌وه‌ مرۆڤێ وه‌ها هاتیه‌ چێكرن كو د بیاڤێ جڤین و ئاخفتنێن نه‌خوه‌ش و كرێت پسپۆره‌، چالاكڤانێن وه‌سا د مه‌دیایا خوه‌ نیشادده‌ن كو ل هه‌مبه‌رى حوكمه‌تا خوه‌ هه‌تا بكاریت ڤه‌رشیت و گۆتنێن كرێت و بێ تابۆ بێژیت، ئالیێ سیاسى هه‌یه‌ ب تیرۆرا فكرى شیایه‌ ئه‌ندام بوون د پارتى دیمۆكراتى كوردستان داب شه‌رم و بێ حه‌یایى د ناڤ سنۆرێ خوه‌ دا بده‌ته‌ ناسكرن، په‌رورده‌یه‌كا وه‌ها هاتیه‌ به‌لاڤكرن كو ئه‌گه‌ر سه‌رۆكێ چینێ په‌یڤه‌كێ بخوینیت، پێدڤیه‌ شرۆڤه‌كاره‌كێ وان یێ سیاسى د كۆژیكه‌كێ دا وێ په‌یڤێ ب حوكمه‌تا هه‌رێمێ ڤه‌ گرێ بده‌ت و ب هه‌موو زمانێن خوه‌ دژى حوكمه‌تێ براوه‌ستیت، ل زۆنا ره‌نگاوره‌نگ په‌یڤ و ئه‌كاونتێن وه‌ها هاتیه‌ دروستكرن كو ب شه‌ڤ رۆژ دژى پیرۆزیێن ملله‌تى و ئیراده‌ و بۆچوونا خه‌لكێ هه‌رێمێ پۆستان بكه‌ن، ئازادى و ده‌ربرین هه‌تا وى ده‌مى ژ بۆ ته‌ هه‌یه‌ كو تو دژى پارتى بى، ژیان و كاركرن هه‌تا وى راده‌ى هه‌یه‌ كو پارتیبوونێ ب خیانه‌ت ناڤ بكه‌ى، هه‌تا ئه‌گه‌ر هونه‌رمه‌ند ژى بى، لێ دڤێت پشكه‌كا ده‌مێ ته‌یێ رۆژانه‌ ژبۆ دژاتیكرنا پارتى یان كابینه‌یا نها حوكمه‌تێ هاتبیته‌ ته‌رخان كرن؛ ئه‌گه‌ر ئه‌ڤه‌ هه‌موو ب نۆرمال ژى بهێته‌ دانان، پارتیبوون ل سنۆرێ سلێمانیێ گه‌هشتیه‌ وى راده‌ى كو مرۆڤێ پله‌ دو بهێته‌ دانان، ل سه‌ر ڤێ گۆتنێ دبێژن: جاره‌كێ ل كۆیه‌ شۆفیره‌كێ ئێكه‌تى و شۆفیره‌كێ پارتى تووشی روودانه‌كا هاتنوچوونێ بوون، شۆفێرێ ئیكه‌تى په‌یوه‌ندیێ ب پۆلیسێن هاتن و چوونێ دكه‌ت و دبێژیت: شۆفیره‌كى خوه‌ ل ترۆمبێلا من دایه‌؛ مۆله‌تا هاژۆتنا ترۆمبێلێ نینه‌ و پارتیه‌ ژى. واته‌ تیرۆرا فكرى گه‌هشتیه‌ وى راده‌ى كو پارتى بوون مخاله‌فه‌یه‌، پارتى ئه‌ڤ تیرۆرا فكرى ب خه‌ته‌ر ل سه‌ر ئه‌ندام و ئالیگرێن خوه‌ ل سنۆرێ سلێمانیێ دزانیت، له‌ورا نێچیرڤان بارزانى ل بانگه‌شه‌یا هه‌لبژارتنان ل سلێمانیێ گۆت: ئه‌و دێ ڤێ تیرۆرا فكرى ل دژى پارتى ژناڤبه‌ن و شه‌ری بۆ خه‌لكێ سلێمانیێ كه‌ن، ئه‌ڤ گۆتارا وى ژى ب ئێك ژ كاریگه‌رترین گۆتارێن بانگه‌شێ هاته‌ دانان.. لێ هه‌موو ئه‌و پارتێن ئه‌ڤ تیرۆرا فكرى ل دژى پارتى دروستكرین، د چار سالێن بۆرى دا هه‌ڤپه‌یمان و هه‌ڤسه‌نگه‌رێن پارتى بوون د ناڤ حوكمه‌تێ دا. سه‌یرتر ژى ئه‌وه‌ كو هه‌ڤدژى د ناڤا هه‌لوه‌ستێن ڤان پارتان دا هه‌یه‌، بۆ نموونه‌ ئه‌و ئۆپۆزسیۆنا نه‌ سه‌ركه‌فتى و سه‌قه‌تا ل سالا 2011 ل هه‌رێما كوردستانێ په‌یدا بووى، هه‌موو درووشمێن وێ دژى درۆشمێن نه‌رازیبوونا وان یا ڤى ده‌می یه‌، بۆ نموونه‌ وى ده‌مى به‌رفره‌هى بوو و خه‌لكێ هه‌رێمێ ئاریشه‌یێن ئابوورى نه‌بوون، لێ هه‌موو درووشمێن وان یێ خوه‌نیشاندانا 17 شۆباتێ ئه‌وبوون كو ئه‌گه‌ر سه‌رۆكێ هه‌رێمێ كورسیكا خوه‌ بهێلیت، ئه‌و ژى دێ بێ به‌رامبه‌ر كارێن خوه‌ یێن رۆژانه‌ ل فه‌رمانگه‌هێن حكومى ئه‌نجام ده‌ن، ئۆپۆزسیۆن هه‌رده‌م خوه‌نیشاندان و بایكۆتێن خوه‌ ب شۆره‌شه‌ك دژى حوكمه‌تێ بناڤكریه‌، لێ د دیرۆكا كوردى دا هیچ ده‌مه‌كى شۆره‌ش ل دژى و قوتابی و نه‌خوه‌شان نه‌هاتیه‌ كرن، د هیچ شۆره‌شه‌كى شۆره‌شگێران ده‌رگه‌هێ قوتابخانه‌ و نه‌خۆشخانه‌ دانه‌خسیتنه‌ و پرۆسه‌یا په‌روه‌رده‌ و ساخله‌میێ ئیفلیج نه‌كریه‌، یان مه‌زنترێن پۆسته‌رێن ئۆپۆزسیۆنێ ئه‌و بوو كو وان مووچه‌ نه‌ڤێت وان ئازادى دڤیت، لێ ئه‌ڤ گۆتن ب 180 پله‌یان دژى هه‌لوێست و درووشمێن وان یێ نهایه‌، چونكى ئازادى هه‌یه‌ و مووچه‌ كێمه‌، لێ نه‌رازیبوونا وان دژوارتره‌، كه‌واته‌ ئه‌ڤ پارادۆكسا د هه‌لوێست و بۆچوونێن حزبێن دژه‌ پارتى دیمۆكراتى كوردستان دا هه‌یه‌، بوویه‌ ئه‌گه‌ر ده‌نگێن وان خوه‌ ل كێمیێ بده‌ن و پارتى دیمۆكراتى كوردستان ببیته‌ پارتا ئێكه‌م ل سه‌ر ئاستێ ئیراقێ كو زۆرترین كورسی هه‌بیت وه‌كو حزب، هه‌رچی ئه‌وێن ل پێش پارتینه‌، لیست و هه‌ڤپه‌یمانینه‌ و هه‌ر هژماره‌كا حزبان د ناڤا لیسته‌كێ دا خرڤه‌بووینه‌. ئه‌گه‌رێن سه‌ركه‌فتنا پارتى چ ژى هه‌موو ژ بۆ بزاڤێن حوكمه‌تێ ل پشتى دۆرپێچا 16 ئكتۆبه‌رێ ڤه‌دگه‌ریت كو حككمه‌تا هه‌رێمێ بێى راده‌ستكرنا ده‌ریێن سنۆرى و كێلگه‌هێن په‌ترۆلێ و فرۆكخانه‌یان، شیا وان دۆرپێچان بشكێنیت و پشكه‌كا پاره‌ى ژى ژ به‌غدایێ وه‌رگریت ژ بۆ گوهۆرین د پاشكه‌فتا مووچه‌یێ فه‌رمانبه‌رێن هه‌رێمێ دا، كه‌واته‌ خه‌لكێ كوردستانێ ئه‌ڤ گوهۆرینه‌ دیتن و كرنه‌ پیڤه‌رێ ده‌نگدانا خوه‌، نه‌ك تیرۆركرنا هزرێن مرۆڤان و بكارئینانا وێ هزرێ دژى حوكمه‌تێ، نه‌ك شكاندنا تابۆ و بكارئینانا په‌یڤێن كرێت و هێرشكرنا پیرۆزیان.

40

كارزان فه‌قى
دووماهى كۆمبوونا جڤاتا وه‌زیرێن هه‌رێمێ ل دۆر گوهۆرینا سیسته‌مێ پاشكه‌فتا مووچه‌یێ فه‌رمانبه‌ران، نووچه‌یێن دلخوه‌شكه‌ر ژ بۆ فه‌رمانبه‌رێن هه‌رێمێ د ناڤدا بوون، ره‌نگه‌ ئه‌ڤ گوهۆرینا حوكمه‌تا هه‌رێمێ د خشته‌یا مووچه‌ى دا كرى، ل دووڤ حه‌ز و داخوازیێن مووچه‌خۆران بیت، لێ بێى دوو دلى ل دووڤ حه‌ز و پلانیێن پارت و سیاسه‌تڤانێن دژه‌ حوكمه‌تێ نینه‌، چونكى پارتێن وه‌كو گۆڕان و كۆمه‌ل و ئێكگرتوو و هه‌ڤپه‌یمانیا به‌رهه‌م سالحى و پشكه‌كا ئێكه‌تیێ، هیچ ده‌مه‌كى ب پلان و پرۆژه‌یێن خوه‌ نه‌شیاینه‌ خه‌لكێ كوردستانێ ل ده‌وروبه‌رێ خوه‌ كۆمڤه‌ بكه‌ن، به‌لكو هه‌ر ده‌ما خه‌لك ب ده‌نگه‌كێ نه‌رازى ل جهه‌كێ خرڤه‌دبوو، وى ده‌مى وان قه‌ستا ناڤا وێ خرڤه‌بوونێ دكر و دبوونه‌ ده‌ستێ راستى نه‌رازیبوویان، د هه‌مان ده‌مدا ئه‌و دژى هه‌موو وان درووشمێن خوه‌نیشاده‌ران بوون و ئه‌گه‌رێن برسیكرن و برینا مووچه‌یێن وان بوون، لێ بزاڤێن حوكمه‌تا هه‌رێما كوردستانێ و گوهۆرینا پاشكه‌فتا موچه‌یێن فه‌رمانبه‌ران، ئه‌و پارتێن بچووكێن سیاسى هه‌م بێ پلان و هه‌م ژى بێ خرڤه‌بوونێن نه‌رازى هێلان، كه‌واته‌ سه‌ره‌دانێن وان پارتان بۆ به‌غدایێ و ئامۆژگایكرنا ده‌سته‌لاتدارێن به‌غدایێ ژ بۆ برسیكرنا خه‌لكێ هه‌رێمێ سه‌رنه‌گرت و به‌غدا ل دژى پێشنیار و بۆچوونێن وان بریاردا و دێ سه‌ره‌ده‌ریێ ل گه‌ل حوكمه‌تا هه‌رێمێ كه‌ت، مه‌هانه‌ ژى دێ 317 ملیار دیناران بۆ هه‌رێمێ هنێرێت و ل گه‌ل داهاتێ ناڤخوه‌ حوكمه‌تا هه‌رێمێ شیا گوهۆرینه‌كا مه‌زن و به‌رچاڤ د پاشكه‌فتا مووچه‌ى دا بكه‌ت، بێگومان ئه‌ڤه‌ داوى گوهۆرینا حكومه‌تێ نابیت و هه‌روه‌كو د پریسكۆنفرانسا نێچیرڤان بارزانى سه‌رۆكێ جڤاتا وه‌زیرێن هه‌رێمێ و وه‌زیرێ دارایی ژى ئه‌و یه‌ك هاته‌ دوپاتكرن كو به‌رنامێ بهێت یێ حوكمه‌تێ ئه‌وه‌، دێ بزاڤێ كه‌ن به‌ره‌ به‌ره‌ ئه‌و پاره‌یێ فه‌رمانبه‌رێن هه‌ڕێمێ كو هاتیه‌ پاشكه‌فتكرن بۆ فه‌رمانبه‌ران بهێته‌ ڤه‌گه‌راندن. پشتى 16 ئكتۆبه‌رێ و تا نها حوكمه‌تا هه‌رێما كوردستانێ شیا گه‌له‌ك پلانێن پارتیێن سیاسیێن هه‌رێمێ بۆ برسیكرنا خه‌لكى و ئالۆزكرنا ره‌وشا هه‌رێمێ ژناڤببه‌ت، هه‌روه‌كو چه‌وا ل رۆژێن بۆرى مه‌ دیتى كو ب هه‌موو ره‌نگان هه‌ول دهاته‌ دان، رێره‌وێ خوه‌نیشاندانێ ژ داخوازكرنا مافان بهێته‌ گوهۆرێن بۆ دیمه‌نه‌كێ سیاسى و كرێتكرنا هێزێن ئیمناهیێن هه‌رێمێ، ئه‌گه‌ر تا راده‌یه‌كێ ژى سه‌رگرتبیت، لێ بێ ئه‌نجام ب داوى هات و تنێ خوه‌نیشاده‌رێن خوه‌دان داخوازیێن ره‌وا سه‌ركه‌فتن و ئه‌وا ئه‌ڤرۆ ل جڤاتا وه‌زیرێن هه‌رێمێ ژى هاته‌ كرن، ئێك ژ وان داخوازیان بوو. لێ نووچه‌یه‌كێ نه‌خوه‌ش و مزگینیه‌كا ره‌شبوو بۆ وان پارتێن سیاسى كو ره‌وشا ناله‌بار یا دارایی یا فه‌مانبه‌ران بخوه‌ دكرنه‌ ده‌لیڤه‌ ژ بۆى كو حزبێن ده‌سته‌لاتدار پێ تاوانبار بكه‌ن و خوه‌ ب شاما شه‌ریف نیشابده‌ن، دده‌مه‌كى دا ئه‌و بخوه بۆ ده‌ما سێ سال و نیڤان ل گه‌ل ڤێ كابینێ ده‌سته‌لاتداربوون و د شه‌ش مه‌هێن دووماهیێ خوه‌ ڤه‌كێشان، له‌ورا خه‌لك و مووچه‌خۆر د هشیارن و دزانن كینه‌ بزاڤا چاره‌كرنا كێشه‌یان دكه‌ن و كینه‌ حه‌ز دكه‌ن كێشه‌ هه‌بن و جاده‌یا هه‌رێمێ هیچ ده‌مه‌كى ئارام نه‌بیت، ئه‌و پێشنیارێن ژلاێ وان پارتان ژ بۆ عه‌بادى ژى هاتینه‌ كرن هه‌موو دژى ئه‌نجامێن داوى كۆمبوونا حوكمه‌تا هه‌رێمێ بوون، له‌ورا ئه‌و حزب و سیاسه‌تڤانێن كوردستانێ كو ژبۆ برسیكرنا خه‌لكى دچوونه‌ به‌غدایێ ئه‌و ژ بۆ رها خوه‌ چووبوون، لێ وان سمبێل ژى ل سه‌ر دانا.

105

كارزان فه‌قى
دووشه‌مییا بۆرى 12ى ئادارێ، هه‌رێما كوردستانێ د پرسا به‌ره‌ڤ گرنگیدان قۆناغێن چاكسازیێ پێنگاڤه‌كا دى به‌ره‌ف پێشڤه‌ چوو، چونكى رێكخراوا ئاژانسا گه‌شه‌پێدانا نێڤ ده‌وله‌تى تایێ خوه‌ ل هه‌ولێرێ ڤه‌كر و ئارمانج پێ ئه‌وه‌ حكومه‌تا هه‌رێمێ چالاكتر ژ جاران و ب ره‌نگه‌كێ به‌رچاڤتر خزمه‌ت پێكێشێ وه‌لاتیان بكه‌ت، و حكومه‌تا هه‌رێمێ دكاریت گهورینان بكه‌ت، كو ئه‌ڤه‌ بخوه‌ ژى گۆتنێن دۆگلاس سێلمان بالیۆزێ ئه‌مریكا بوون ل ئیراقێ، ب ڤى پرۆژه‌ى ئه‌مریكا دێ 160 ملیۆن دۆلاران د گه‌له‌ك بیاڤا دا ل هه‌رێمێ مه‌زێخیت، پشتى بریاردان ل سه‌ر ڤێ پرسێ و ڤه‌كرنا تایه‌كێ وێ رێكخراوێ ل هه‌وێرێ د كۆنگره‌یه‌كا رۆژنامه‌ڤانى دا قوباد تاله‌بانى جێگێرێ سه‌رۆك وه‌زیرێن هه‌رێمێ و جۆن لسیته‌ر هنارتیێ رێكخراوا گه‌شه‌پێدانا ناڤده‌وله‌تى و دۆگلاس سیلمان بالیۆزێ ئه‌مریكا ل ئیراقێ پشكدارى پریسكۆنفرانسه‌كێ بوون و ناڤه‌رۆكا وى پرۆژه‌ى ئاشكه‌را كرن، ئیدى ل ڤێرێ ئه‌و پێنگاڤا حكومه‌تا هه‌رێمێ پشتى قه‌یرانا دارایى ده‌ستپێكرى به‌ر ب قۆناغه‌كا دى چوو، چونكى نها ده‌سته‌لاتدارێن ناڤا كابینه‌یا نها یا حكومه‌تێ د چاكسازیێ دا ب ته‌نێ نینن، هه‌روه‌كو چه‌وا پێشتر ئه‌مریكا و هه‌موو ئه‌و وه‌لاتێن جیهانێ گوتبوون وان هه‌رێما كوردستانه‌كا ب هێز دناڤا ئیراقێ دڤێت، نها ب كردا ئه‌و یه‌ك ژ وان وه‌لاتان دهێته‌ دیتن، ئه‌ڤه‌ هه‌موو بوونه‌ ئه‌گه‌رێ وێ یه‌كێ پلانێن به‌غدایێ بۆ ژ ناڤ ژناڤبرنا هه‌رێما كوردستانێ بهێنه‌ راگرتن، چونكى ئه‌و گۆتن ل ته‌نشت سه‌رۆكێ حكومه‌تا هه‌رێمێ دهاتنه‌ كرن و هه‌م ژلایێ ئابوورى و هه‌م ژى ژ لایێ سیاسى ڤه‌ ل سه‌ر حكومه‌تا ئیراقێ بوونه‌ گڤاشتن و به‌ره‌ به‌ره‌ ئه‌نجامێن وان هه‌ول و بزاڤان ژ بۆ باشتر كرنا په‌یوه‌ندیێن ناڤبه‌را هه‌ولێر و به‌غدایێ دهێنه‌ دێتن. هه‌بوونا ئالییه‌كێ نێڤ ده‌وله‌تى‌ و وه‌رگرتنا ئه‌ركێ چاڤدێرێكرنێ، ب ره‌نگه‌كێ باشتر پێنگاڤێن چاكسازیێ شه‌فاف دكه‌ت، ژلایه‌كێ دى چاكسازیكرن ب رێكێن یاسایى و ب رێكا په‌رله‌مانێ كوردستانێ ره‌واجه‌كادى دده‌ته‌ وێ پرۆژه‌یا كو حكومه‌تا هه‌رێمێ ژ بۆ زێده‌كرنا داهاتێ و كێمكرنا خه‌رجییان ده‌ستپێكرى، چاكسازیكرن د موچه‌یێن خانه‌نشینان ژى ژ وان نموونه‌یان كو حكومه‌تا هه‌رێمێ دخوازیت ڤێ قه‌یرانا نها هه‌ى ب ره‌نگه‌كى ده‌ربازبكه‌ت كو كارتێكرنه‌كا كێم ب سه‌ر هه‌موو بیاڤان دیاربیت، یا گرنگ ئه‌وه‌ پێنگاڤێن حكومه‌تا هه‌رێمێ د بیاڤێ چاكسازیكرنێ هاڤێتین پتر د بیاڤێ پراكتیك دا جهێ خوه‌ ڤه‌كه‌ن و خه‌لكێ كوردستانێ خوه‌دى مافێن سه‌ركینه‌ كو ئه‌نجامێن وان پێنگاڤان بزانن، ژ بایۆمه‌ترى و پاقژكرنا لیستا مووچه‌خۆرێن هه‌رێمێ هه‌تا دگه‌هیته‌ قۆناغا نهایا هه‌رێمێ و كۆنفرانسێن هه‌ماهه‌نگیێ ل گه‌ل بانكێن جیهانێ و پرۆژه‌یێ چاكسازیێ د مووچه‌یێن خانه‌ نشنیان دا، ئه‌ڤه‌ هه‌موو بخوه‌ ب تنێ د بیاڤێ نڤێسینێن سه‌ركاغه‌زێ هاتینه‌ كرن و خه‌لكێ هه‌رێمێ ژ كردارێن وان پرۆژه‌یێن ب درستی‌ نه‌هاتییه‌ هایداركرن، له‌ورا ئه‌وا كو دێ ره‌واجه‌كا دى ده‌ته‌ كابینه‌یا حكومه‌تا هه‌رێمێ ئه‌وه‌، كو ئه‌نجامێن قۆناغ ب قۆناغێن چاكسازیێ ژ بۆ وه‌لاتیێن هه‌رێما كوردستانێ بهێنه‌ راگه‌هاندن

website security