NO IORG
Authors Posts by کەڤال سدقی

کەڤال سدقی

کەڤال سدقی
2 POSTS 0 COMMENTS

68

هندەک تشت چ جارا ژ بیرا مروڤی ناچن و بورینا دەمی ژی نەشیت دەرگەهێ وان بیرهاتنا لسەر خەیالا مروڤی بگریت،هندەک ژ وان تشتا لگور چین و گبقێن جڤاکێێن مروڤ تێدا ژیای ژێک جودانە ، بەلێ زوربەی مە ژیانەکا وەک هەڤ و هەژاری یابوراندی لەوما ژی هندەک بیرهاتنادا د هەڤبەشین ، ژوان جورێن یاریێن کو مە ل زاروکینا خو دکرن، وەکی پێنجوکانێ، ماتکانێ، پلیتانێ، گوستیلانێ ….هتد، بەلێ من دڤێت ئەڤرو بەحس ل ئێک ژ وان کاراکتێرێن تایبەت د ژیانا خویا زاروکینێێ دا بکەم، زەلامەکێ جودا، ب هەلسوکەفت و گوهرین و بیرو بوچونێن خوڤە،زەلامەکێ کو دەما ناڤێ وی دهاتە گوهێ مە جهەک نەدما خو لێ ڤەشێرین کو لێ بێهێنە پاراستن خو بن دەهمانا کراسێن دەیکێن مە ژی ئەم ژ کەربا وی قورتال نەدکرین یان شەملکا دانایی یا باپیری بەری راوەستیتە نڤێژێ ژی نەدشیا دناڤبەرا مە و وی رولێ دلوڤانیێ بگێریت ژبەرکو ئەوی پرەنسیبەک هەبو دڤێت بو هەر خەلەتیەکێ خو چەندا بچیک ژی مە سزایێ خو وەرگرتبا داکوژ خەلەتیێن خو فێر ببین ، جارا بەس گوهلێبونا ناڤێ وی بەس بو بو پاشەکشا مە ژ مەیدانا شیماتیێن زاروکینیێ ترسەک یان تشتەک وێڤەتربو ژ ترسێ کودگەل گوهلێبونا ناڤێ وی دهات ئەوی هەستێ کو دەما ل تەحرێن هاڤینێ مە سیتافکا وی ل سەرێ کولانێ دیت هەتا مال بێ کو بوێرین سەر ملێێن خو پاشڤە بزڤرین وەکی بریسیێ مە دکرە قار ، بەلێ ئەوی کەنزەک هەبو تشتەک کوهەمیگاڤا ببو خەونەک بو من کو بشیم جارەکێ ئازادانە دەستخوڤە بێخم ، بەلێ دولابا وی …دولابا وی یا کو کەسێ ژ بلی وی کلیلا وێ نەبو، کەسێ ماف نەبو خو هزرا هندێ بکەت کو کلیلا وی بدەست خو ڤە بێخیت ژبەرکو یا توژی بو ژ تشتێن تایبەت، ئەو تشتێن کو چ ئەردەکێ دی بدەست مروڤێ نەدکەفتن، توژی ژ هەستێ گەنجاتیێ، پر ژ وێنێن بالکێشێن هونەرمەندێن ناڤدارێن سینمایی ….ئاخ کو وەکێ کەنزەکێ بو من، ئەو دولابا تێدا شیشکێن گولاڤا درێز و هندەک شریتێن فلمێن سینمایی لسەر ئێک دگەل کاسێتێن سترانبێژێن ناڤدار و سێ چار نامێن کو من گومان نەبو یێن کچەکێنە کو بێهنا خەونێن وێ نامێ دا هاتینە نڤێسین دگەل هەر ڤەکرنەکا وێ دولابێ ئەم هەمی مەندەهوش دکرین ، من هندەک جارا دناڤ دانو و ستاندنێن وی دگەل هەڤالێن وی دا گوهلێدبو و دزانی حەز ژ کیشک سترانبێژی دکەت، و بوچونا وی وەکی ئایەتەکا تایبەت بو کو من بخو ژ بەر دکر دا دەما هەڤالێن خولقوتابخانێ دبینم بێژمێ فلان ئەکتەرێ سینمایی هوسا یێ بهێزە دناڤ فلان فلمی یان فلان سترانبێژ گە هشتیە فلان حزبا سیاسی ، من حەز ژ جلکێن وی و بێهنا گولاڤا وی دکر، تایبەت دەما قەمسەلێ خویێ جلدی یێ رەش و پانتورێ سپێ ئەڤێن ژ ناڤ تەنگێ توژی کوریشک و خارێ ل رەخ گوزەکێ تەنگ دبو دگەل پوتا خویا سپی و قەمیسێ خویێ سپێ دکرە بەر خو و پرچا خو یا رەش ژێهەل شە دکر، و بەر قودیکێ فیتک لێدان ، گەلەک جارا دەرازینکا مەدبەخێ دا من چاڤزلکانێ دگەل کارکرنا وی دکر. من حەز دکر بزانیت سەر وێ ترسا مەزنا من ژێ هەی ، گەلەک حەز ژێ دکەم و دەما دچیتە سەفەرەکێ ئەگەر خو بو ئێک هەفتە ژی ئەز ژێ خەریب دبم ، بەلێ من نەدزانی چاوا دێ شیم بو دیار کەم ، هەتاکو ئێڤارەکێ من دیت یێ بەر فیتک لێدانێ خو کار دکەت ، بێهنا گولاڤا وی بەری وی کەفتبو و هەمی قولاجێن مالێ توژی کربون، سەرهندێ را کو شەڤا بەری ئەز و مەتا منا بوهار دابوینە بەر زلەها و دایکا من ژی ب روندکێن خو یێن نە پاقژکری خو ژ سەر سفرا خارنێ دابو پاش (بێگومان وەک پروتستوکرنا وێ قوتانێ یا کو ب نەحق دیتی نان نە خار) بەلێ من دڤیا خو شرینکەم و بێژم ئەگەر خو دایکا منا سل ژی بیت ئەز نەیا سلم، لەوما بقار چومە د مەگبخێڤە دا پارچەکێ بینم و پێلاڤێن وی یا کو توزەکا نەرم و سفک توزیکی کربون پاقژ کەم ، بەلێ من تشتەک وەسا نەدیت بشیم لپێلاڤێ بدەم و من دزانی یێ ئامادەیە ژ ژورا خو دەرکەڤیت، ئەو قوماشی نێزیکێ سوپێ لعەردی من دەستێ خو لێدا و چوم د پێلاڤێن وی را هسی ، ئوهـ خودێ …. چاڤێن من تاری بون ، قوماشی ب دوهن بو نوزا شینا چ بو بەلێ وەکی پنیەکێ مالسەر پێلاڤێ، دلێمن ژ ترسادا خوش خوش لێدا ، بێهنا گولاڤێ هەر نێزیکتر لێدهات و قەدەمێن من شکەستبون ،ئاخ … نێ مە سبقا پێلاڤا نەبو دا وێ خەلەتیا خو راستڤەکەم بێهنا گولاڤێ هند نێزیک بو کو ئێدی دەلیڤە نەما خو ڤەشێرم، رابوم راستیام سەر پێێا قوماشی پیسژ دەستێن من کەفت دایکا من ژ ژورا مە بەرەڤ مەگبەخێ هات ، بێ گومان دڤیا سەحا خارنا خو بکەت مامو ب ئەنیا خویا گرێ سەح کرە من و پێلاڤێ وپریقێنی ژ بن گوهێ من ئینا دایکا من ما راوەستیای ، دیسا چاڤێن وێ سور بون ، دەنگەکێ کزگریوکڤە گوت، نێ تە ئەڤ عەیالە کوشت دێ بەسە…. مامو خو لسەر ملێ خو نەزڤری دیسا سەحکرە پێلاڤیو دەستێ خو برە بەرینکا پانتورێ خو و کلیلا دولابا خو ئینا دەر چاڤێن من پشت وێ پەردا روندکا برسقین دەستێ خو ب کلیلڤە درێژ کرو گوتە من دێ هەرە دولابا من ڤەکە سبقەکا پێلاڤا یا تێدا هەرە بینە و کلیلا کەنزا خەیالی بو کو دناڤ تبلێن مندا وەک خەونەکێ گرێل دبو و ئەز بوم کو وەک بالندەکێ بەرەف ژور و دولاب و بێهنێن گولاڤ و خەونا خو یا تایبەت دفریم من نەزانی چاوا گەهشتمە دولابێ و من چاوا ڤەکر بەلێ ئەز ژ هنگی فێربوم کو پێکولێن مروڤی هەمی خەونا دکەنە راستی ، من چ جارا بو مامو نەگوتیە کو چەند وانێن هوسا یێ ژوی فێربویم ،هەرچەندە نوکە بێدەنگترە و بوچونێن خو زوی بزوی بو هەمیا ناکەتە پەیڤ ، هەرچەندە گەلەک جارا دیوانادا یێ کێمە بەلێ هێشتا ژی چاڤێن وێ ب رەحمترین و دلوڤانترین چاڤێن دناڤ بنەمالێدا ،هەرچەندە زێدە حەز ژ قەرەبالقیێ ناکەت بەلێ جهێ وی هەمیگاڤا یێ دیارە دناڤ خەیالو زاروکینیا مەدا و من دڤیا ڤێرێ بێژمێ ، ئەز گەلەک حەز ژێ دکەم و گەلەک تشتا یا ژێ فێر بویم ، ئێک ژوانا پێکول بو دەستکەفت و خەونا

56

کەڤال سدقی

نە دەنگێ ڤەبونا پەردەکێ دناڤ تاریاتیا هولەکێ دهێت، نە خەیالێن نڤیسەر ودەرهێنەران دبیتە مێهڤانا هولان نە رپ رپا دلێ ئەکتەران لپشت وێ پەردا ستویر دمینتە هەلاویستی ، نە چ چەپکێن گولا دهێنە دیاری کرن، نە ژی دەنگێ چەپلە قوتانێن بینەرێن دلخوش و چاڤ بروندک دهێتە بیهیستن ، چەند هیڤی و خەیالێن شانوکاران وەک ماسیێ نە، نە شانوکار دشین د هولەکا چول و بێدەنگ دا بژین و نە ماسی دشێت د دەریایەکا هشک دا، وەک( جک وان ) دبێژیت دێ چەندا بالکێش بیت ئەو دەمێ کو دیسا بیتە سەردەمێ معجیزا ، نە خەلەت تێنەگەهن من باوەری ب چ معجیزا نینە و نابن ، بەلێ بتنێ تەخمین بکەن، ئەو دەما کو کەساتیێن بەرنیاسیێن گریکا کەڤن و روما ساخ ببنە ڤە و بێهنە ڤی سەردەمی و ڤی عصرێ کورونایێ ئەم تیدا، پرس ئەوە کا دێ ئەو چاوا ڤێ جیهانێ بینن و چ کەن؟ بو نمونە دبیت مێژو نڤێسی ناڤدار (توسیدیدیز) ل ءیک ژ میدیایێن هەرێ ناڤدار دەست بکارێ بکەت وەک راگەهاندکارەک، (هودت) بگەهیتە کوما مێژونڤیسین چارچوڤەکری و سنوردار (افلاطون) بەلێ دێ گەلەکێ کەیف خوش بیت کو د ناڤ کومەکا هەرە زورا فیلەسوفا دا دێ ژیت بەلێ بێ گومان دێ عاجز بیت دەما بزانیت ژ سەردەمێ وی تا ئەڤروکە فەلسەفە چەند کێم و ضعیف یا هاتیە پێشڤەبرن،(ارسطو، بقراط، بطلیموس) دێ ژ ڤێ پێشڤەچونا زانستێن پزیشکێ و زانستێن کەونی مینە حەیری،بەلێ ب بوچونا من کومەک ژ وان رێڤینگێن مێژویی کێمتر ژ هەمیا دێ هەست ب غەریبی و نامویی کەن و ئەو ژی هونەرمەندێن سەردەمێن کەڤنارێن،ئەو بێ گومان دێ شین ڤێ جیهانێ ژی دیسا ب هەست وخەون و جانێ خو تێبگەهن ، ژبەرکوکەساتینێن مینا هومەر ، اسخیلوس، سوفوکلس، یوربیدس و هوراس ، دێ گەلەک زوی تێگەهن کو هونەرمەند ئەو تەخا ئێکانەیە یا سەرەرای هەمی هەڤدژیێن ، هزری ، کلتوری، سیاسی، ئایینی، جغرافیای ئێک زمانێ دەربرینێ یێ هەی، و هوسا بووان دیار دبیت کو هونەر ژ کەڤن و تا ئەڤرو لسەر دو بنگەهان یێ هاتیە ئاڤاکرن: ١. سرا لێگەریان دناڤ جیهانێ ٢. ئەو رێکا کو هونەرمەند دهەلبژێریت بو دەربرینا وێ جیهانێ. دزانم هونەرمەند بون ئانکو فێری شکەستن و رابونێ بون، ئەو ژی ژ جورێ بەردەوام و لدویف ئێک، ب رەنگەکێ کوکەس ژ بلی هونەرەمەندا نەشین تێدا بژین، ئەو شکەستنە پارچەکە ژ جیهانا هونەرمەندا، خو ڤەکێشان ژ وێ بازنێ ئانکو شکەستن و هونەرمەند چ جارا شکەستنێ قەبیل ناکەن خو د سەردەمێ کورونایێ دا ژی ، دڤان خەیالادا بوم دەما دەنگێ ناما تێلەفونا من بێدەنگیا ژورێ و خەیالا من شکاند و شاشا تاریا موبایلا من بناڤێ کوثر شوکتێ روهن بو بەلێ هەڤالا خوشتڤی پیروزباهیەک ژرەنگ و خەیالا خو بو من دیاری کربو و نڤیسی بو: ڕۆژ باش ئەی جوانیی… جوانی یا بازددەت بازددەت بەرەڤ داڤێن ڕەشێن پرچا تە یا رەشتر ژ تاریا شەڤێ، ببورە هەكە ل داویا پائیزەكێ مە جاردن هەڤ هەمبێز نەكر، كارڤەدانێن خۆ یێن تژی دلوڤانی ل ناڤ جانتا خۆدا هەلگرە، خواتر خواستنێ ژ داوی روناهیا زەرا هولا شانویێ بكە! ل داویا كوراتییەکێ وێنێ تێكستەكی ژ شانویا بێدەنگیێ بکێشە، گولەكێ لبن بالگەهەكا تژی خەون بدانە… ڕۆژ باش ئەی جوانی، هشیاربە مرن یا لەزێ دكەت… جاكیتێ بابێ خۆ یێ رەش، كەفیكا دایكا خۆ یا بگولێن مور ل ناڤ جانتا خودا هەلگرە! پەیڤێن ڤی تكستێ خەمناك دگەل ئاراستێ بای بكە فروكەكا كاغەزی، تێنڤیسا خۆ یا وێنا دگەل رەنگان لبەر سینگا خۆ بدانە، خەمگین نەبە ژ وێنە كرنا ڤی باژێری، رەنگێن تژی دەنگ و دور بدانە ئالیەكی، تەخمین نەكە ئەڤ باژێرە مینا جاران دێ بیتە تابلویەكا تژی ژیان، نەژی نوتێن موزیكەكا ئارام، رەنگێ بێدەنگی و ڤالاتیێ بسەر هەر جهی دا زال بكە، پرتێن نانی ددەستێ چ گەشتیاران دا نین بو پشیكەكا رەنگ گەور، زەنگێن پەرستگەهان، دەنگێ بانگی چ باوەر داران لخۆ خرڤە ناكەت. ڕۆژ باش ئەی جوانی، هشیاربە مرن یا لەزێ دكەت… هەستێن من یێن تژی ڤیان و پەیڤێن من یێن ل دور عەشقێ دشانویەكا خۆ وەربكە و دجانتا خۆ دا هەلگرە ئەڤرو نە ئەرد و نەئەسمان نكارن عەشقێ بپارێزن ژبلی گورستانەكێ چ نەمایە… ڕۆژ باش ئەی جوانی! گوتە من: من دڤیا وەکی خو روژا جیهانیا شانویێ لتە پیروز کەم ئەز ژی دبەرسڤا هەڤالا خو دا بسوپاسی ڤە روژا جیهانیا شانویێ لگشت شانکار و هونەرمەندا پیروز دکەم

26.03.2020 المانیا

website security
WP Facebook Auto Publish Powered By : XYZScripts.com