NO IORG
Authors Posts by غه‌ريب يوسف

غه‌ريب يوسف

غه‌ريب يوسف
14 POSTS 0 COMMENTS

13

غه‌ریب یوسف
ل دووڤ ژڤانێ بۆ هاتیه‌ دانان، ل به‌ره‌ ل شه‌مبیا بهێت رێكه‌فتى 12/5/2018 خه‌لكێ عیراقێ ب گشتى ب هه‌موو ئاین و نه‌ته‌وێن خوه‌ ڤه‌ به‌ربژارێن خوه‌ بۆ په‌رله‌مانێ عیراقێ ب هه‌لبَژێرن، و بێ گۆمانه‌ وان هه‌لبژاتنان گرنگیا خوه‌ هه‌یه‌ ب تایبه‌ت بۆمه‌ وه‌ك ملله‌تێ كورد كو پێدڤیه‌ ل وێ رۆژێ ئه‌م هه‌موو بچینه‌ ده‌نگدانێ و نوونه‌رێن خوه‌ هه‌لبژێرین، چونكو هه‌بوونا مه‌ كوردان ل به‌غدا ب تایبه‌ت دڤى ده‌مى دا گه‌له‌كا فه‌ره‌، ژبه‌ركو شه‌ره‌كێ مه‌زن ل پێشیا مه‌یه‌ ئه‌وژى شه‌ڕێ دستۆرى یه‌ و په‌رله‌مانته‌رێن مه‌ ل شوونا لولیا تڤه‌نگێ ئه‌ڤ جاره‌ دێ ب خامه‌ى به‌ره‌ڤانیێ ژ ده‌ستكه‌فتێن مه‌ كه‌ن و ئه‌و دێ بنه‌ پارێزڤانێن وان ده‌ستكه‌فتان، له‌ورا گه‌له‌كا گرنگه‌ ئه‌م ب هشیارى و هه‌ستیارى وێ لیستێ یان وان به‌ربژاران ب هه‌لبَژێرین كو بچنه‌ به‌غدا و ببنه‌ نوونه‌رێن راسته‌قینه‌یێن گه‌لێ كوردستانێ و ئه‌م هه‌موو باش دزانین تاكه‌ لیستا هیڤیێن مه‌ ل به‌غدا بجه بینیت لیستا (184) پارتى دیموكراتى كوردستانه‌ كو پتریا خه‌لكێ باوه‌ریه‌كا مه‌زن پێ هه‌یه‌ و بۆ هه‌موویان یا ئاشكرایه‌ كو بتنێ لیستا (184) دێ شێت گره‌نتیا ژیانا خه‌لكێ كوردستانێ كه‌ت و ناهێلیت پاشه‌رۆژا كوردستانێ و خه‌لكێ وێ بكه‌ڤیته‌ د ده‌ستێن وه‌لاتفرۆشان دا، چونكو وان حزب و لایه‌نێن بچووك هه‌ر دكه‌ڤندا یێ خوه‌ فرۆتى و هه‌كه‌ خودێ نه‌كه‌ت ئه‌و بچنه‌ به‌غدا ل وى ده‌مى دێ بێ شه‌رمانه‌ ده‌ستكه‌فتێن ڤى ملله‌تى و خوینا هزاره‌ها شه‌هیدان ژى فرۆشن، لێ من باوه‌ریه‌كا مه‌زنا هه‌ى خه‌لكێ كوردستانێ وان كه‌س و لایه‌نان باش دنیاسیت و دزانن ئه‌و وه‌لاتفرۆش دارده‌ستێن هنده‌ك وه‌لاتانه‌ و ب پارێ وان یێ بزاڤێ دكه‌ن ڤێ سه‌ربۆرا مه‌ به‌ر ب ئاقاره‌كێ نه‌دیار ببه‌ن، لێ ب پشته‌ڤانیا خه‌لكێ دلسۆزێ كوردستانێ ب تایبه‌ت ژى پێشمه‌رگه‌ و كادر و لایه‌نگرێن پارتى وه‌كو هه‌رجار دێ هه‌موو پلانێن وان پووچه‌ل كه‌ن و ناهێلن ئه‌و ب هزرێن خوه‌ یێن گه‌نى شاد ببن، هه‌روه‌سا خه‌لكێ مه‌ باش دزانیت ئه‌و حزبێن به‌رى سێ یان چار هه‌یڤان هاتینه‌ دانان نه‌شێن چو بۆ ڤى ملله‌تى بكه‌ن، چونكو د بنه‌ره‌تدا ئه‌و كه‌س دخاین و خۆفرۆشن و دامه‌زراندنا وان نه‌یا سروشتى یه‌، هه‌روه‌سا ئه‌و ب خوه‌ ژى باش دزانن چو جاران ئه‌و نه‌شێن هه‌ڤركیه‌كا وێ حزبێ بكه‌ن یا كو به‌رى (72) سالان ل سه‌ر ده‌ستێن رێبه‌ر و پێشه‌وا مه‌لا مسته‌فایێ بارزانى هاتیه‌ دانان، ئه‌و ژى پارتى دیوكراتى كوردستانه‌ كو ب درێژاهیا ژیێ وێ گه‌له‌ك كه‌س و حزب و لایه‌نان بزاڤ كرینه‌ كو ژناڤ كو پارتى و بنه‌مالا بارزان ژناڤ ببه‌ن لێ چو جاران نه‌شیاینه‌ و هه‌ر ئه‌و ب خوه‌ شه‌رمزار و فهێت بووینه‌ و هندى ئه‌و دساخ ژى بن نه‌شێن هه‌ڤركیا پارتى بكه‌ن، چونكو پارتى دیموكراتى كوردستانێ جهێ خوه‌ دناڤ دلێ هه‌ر كورده‌كى دا كریه‌ و هه‌ر دكه‌ڤندا هه‌تا نوكه‌ ل هه‌ر جهه‌كێ كورد لێ دژین شانازیێ ب پارتى دكه‌ن و هه‌موو باش دزانن هه‌كه‌ رۆژه‌كێ كورد بگه‌هنه‌ مافێن و خوه‌ ده‌وله‌تا كوردى بهێته‌ راگه‌هاندن بتنێ دێ ل سه‌ر ده‌ستێن پارتى و سه‌رۆك مه‌سعود بارزانى بیت و چو كه‌س ولایه‌نێن دى ئه‌و شیان نینن و هه‌تا دمرن نه‌شێن وێ چه‌ندێ بكه‌ن، له‌ورا ئه‌ڤرۆ نه‌ به‌س ل عیراقێ به‌لكو ل وه‌لاتێن عه‌ره‌بى و ئورۆپى و هه‌تا وه‌لاتێن زلهێزێن جیهانێ ژى هزه‌ركا مه‌زن بۆ پارتى و سه‌رۆك مه‌سعود بارزانى دهێته‌كرن، ئه‌و هه‌موو ژى دزانن هه‌كه‌ كورد بگه‌هنه‌ مافێن خوه‌ و ببنه‌ كیانه‌كێ سه‌ربه‌خوه‌ و خودان ده‌وله‌ت و ئالا بتنێ مه‌سعود بارزانى و پارتى دێ شێن ب وێ چه‌ندێ رابن، له‌ورا سه‌ركه‌فتنا لیستا (184) یا پارتى دیوكراتى كوردستان سه‌ركه‌فتنا هه‌موو كوردانه‌ و ئه‌ز پێشبینى دكه‌م پترى 80% ژ خه‌لكێ كوردستانێ دێ ده‌نگى ده‌نه‌ لیستا (184). له‌ورا ئه‌ز وه‌ك پێشمه‌رگه‌ بتنێ دێ پرسیاره‌كێ ژ ده‌نگده‌رێن هێژا كه‌م ئه‌و ژى ده‌مێ شه‌رێ داعش رووداى و تیرۆرست به‌ر ب سنۆرێن هه‌رێمێ ڤه‌ هاتین ئه‌و كى بوون به‌رسنگێن وان گرتنین و نه‌هێلاین ب خه‌ونێن خوه‌ یێن چه‌په‌ل شاد ببن؟ ئه‌رێ ما ئه‌و نه‌پێشمه‌رگێن پارتى بوون و خودێ دزانینت هه‌كه‌ پێشمه‌رگه‌ و سه‌رۆك بارزانى نه‌با دا چاره‌نڤیسێ باژێرێن دهۆك و هه‌ولێر و سلێمانیێ و هه‌تا كه‌ركووك ژى چو لێ هات و هه‌كه‌ پێشمه‌رگێن پارتى هه‌یبه‌تا داعشێ نه‌شكاندبا دوور نینه‌ حالێ باژێرێن كوردستانێ وه‌كو باژێرێ مووسل و هنده‌ك باژێرێن دى یێن عیراقێ لێ هاتبا، لێ پێشمه‌رگه‌ى ب مه‌ردانه‌ و قاره‌مانه‌ به‌رسنگێن وان گرتن و بۆ هه‌موویان دیاربوو پێشمه‌رگه‌ى ژ پێش هه‌موو وه‌لاتێن جیهانێ ڤه‌ شه‌ڕێ داعش كرن، له‌ورا هه‌ر زوو ناڤ و ده‌نگێ پێشمه‌رگه‌ى ل هه‌موو جیهانێ به‌لاڤ بوو و سه‌نگا كوردان ل پرانیا وه‌لاتێن جیهانێ بهێزتر لێ هات و هه‌موو ئاراسته‌ ژبۆ وێ چه‌ندێ دچوون كو پشتى ئه‌نجامدانا ریفراندۆمێ ل نێزیك كورد ب هه‌موو مافێن خوه‌ شادببن و ده‌وله‌تا كوردى بهێته‌ راگه‌هاندن، لێ مخابن خیانه‌تا شازده‌ى ئوكتۆبه‌رێ ب سه‌ردا هات و وه‌لاتفرۆشان پرۆژێ ده‌وله‌تبوونێ گیرۆكرن، لێ ئه‌م وه‌كو كورد و پارتى هه‌تا دمرین دێ شانازیێ ب ریفراندۆمێ و ئه‌نجامێن وێ به‌ین چونكو ئه‌و ئه‌نجامێن ریفراندۆمێ بوومه‌ وه‌ك چه‌كه‌كى نه‌ د به‌ریكا مه‌دا و دێ هه‌ر جاره‌كێ رۆژا وێ هێت. ل دووماهیێ داخوازا من ژوان خوشك و برا ئه‌وه‌ ئه‌وێن دچنه‌ به‌غدا و دبنه‌ نوونه‌رێن مه‌ ل وێرێ ئێك ده‌ست و ئێك دلبن، هه‌روه‌سا ل وێرێ كوردایه‌تیێ بكه‌ن نه‌ حزبایه‌تیێ.

12

غه‌ریب یوسف
هه‌رچه‌نده‌ د كه‌ڤندا دهێته‌ گۆتن كو عیراق جهێ پێكڤه‌ژیانا هه‌موو ئۆل و ئاین و نه‌ته‌وانه‌، ب تایبه‌ت ژى كورد و عه‌ره‌بان، لێ ب درێژاهیا دیرۆكێ بوومه‌ دیاربوو كو ئه‌ڤ چه‌نده‌ نه‌راسته‌ و هه‌رده‌مێ عه‌ره‌ب كه‌فتبنه‌ ته‌نگاڤیه‌كێ ل وى ده‌مى ژنه‌چارى گۆتینه‌ كورد برا و دوستێن مه‌نه‌، لێ ده‌مێ به‌رپێن وان به‌رفره‌ه دبن وێ چه‌ند ژبیردكه‌ن و ئه‌وا ژده‌ستێن وان دهێت ل هه‌مبه‌رى كوردان ب هه‌ر جۆره‌كێ هه‌بیت دژاتیا مه‌ دكه‌ن، ئانكو دشێم بێژم هنده‌ك كه‌سن ب تنێ ل دووڤ به‌رژه‌وه‌ندیا خوه‌ دچن و وه‌سا هزردكه‌ن كو عیراق به‌س یاوانه‌ و مافێ كه‌سه‌كێ دى لێ بژیت یان داخوازا مافێن خوه‌ یێن ره‌وا دكه‌ن، و سه‌باره‌ت نه‌رماتیا ڤێ دووماهیێ یا حوكمه‌تا عیراقێ ب تایبه‌ت ژى حه‌یده‌ر عه‌بادى یێ سه‌رۆك وه‌زیر كو د پێنگاڤا ئێكێ دا فرۆكخانێن كوردستانێ ڤه‌كرن، د دووڤ دا پشكه‌كا مووچێن فه‌رمانبه‌رێن كوردستانێ هنارت ئه‌ز وه‌سا دبینم كو ئه‌ڤه‌ نه‌رماتیه‌كا سیاسى یه‌ و كاودانان وه‌سا خواست كو ئه‌و ڤێ پێنگاڤێ پاڤێژیت، چونكو پشتى ریفراندۆمێ وان پلانێن مه‌زن بۆ لاوازكرنا سه‌نگا كوردان و حوكمه‌تا هه‌رێمێ دانا بوون و د پێنگاڤا ئێكێ پلانا خیانه‌تكاریا (16) ئوكتۆبه‌رێ ب هاریكاریا هنده‌ك كوردێن خوه‌فرۆش ئه‌نجامدا و باژێرێ كه‌ركووكێ داگیركرن، له‌ورا ئه‌ز ب خوه‌ وه‌ك كه‌سه‌ك نه‌شێم بێژم نه‌رماتیا حوكمه‌تا عیراقێ به‌رامبه‌ر كوردان 100% ژدله‌، به‌ركو ئه‌ز دبینم ئه‌ڤه‌ ژى جۆره‌ سیاسه‌ته‌كه‌ و گرێداى پرۆپاگنده‌یێن هه‌لبژارتنه‌، ئانكو عه‌بادى دڤێت ب ڤێ رێ دلێ كوردان بۆ خوه‌ راكێشیت و بێژیتێ ئه‌ڤه‌ ئه‌ز دێ ده‌ستێ خوه‌ ده‌مه‌ هه‌وه‌ و یا به‌رى نه‌ما، و مه‌ره‌ما وى ژڤێ چه‌ندێ ئه‌وه‌ دا لیستێن كوردى خوه‌ بده‌نه‌ ل گه‌ل وى ژ پێخه‌مه‌ت وێ چه‌ندێ دا دوباره‌ ببیته‌ سه‌رۆك وه‌زیرێن عیراقێ، له‌ورا گه‌له‌كا فه‌ره‌ سه‌ركردایه‌تیا كوردى ب هه‌موو حزبێن خوه‌ ڤه‌ گه‌له‌ك هشیارى ڤێ چه‌ندێ بیت و هه‌كه‌ رێكه‌فتنه‌ك ژى بهێته‌ كرن پێدڤیه‌ ب حازربوونا لایه‌نێ سیێ بیت، چونكو ئه‌م هه‌موو یێ دبینێن دچه‌نده‌ سالێن بۆرى دا چاوا دستوور یێ دهێته‌ پێشێلكرن و مافێن كوردان سۆر ب سۆر یێن دهێنه‌ خوارن، له‌ورا یافه‌ره‌ د قووناغا بهێت دا ئه‌م هه‌موو كورد دئێكگرتى بین و حزبایه‌تیێ بده‌ینه‌ لایه‌كى و ده‌ست ب كوردایه‌تیێ بكه‌ین، ئانكو هه‌ر حزب و لایه‌نه‌ك به‌رژه‌وه‌ندیا خوه‌ بدانه‌ لایه‌كى و به‌رژه‌وه‌ندیا كوردان ب سه‌ر هه‌ر هه‌موویان بێخن و جاره‌كا دى دێ بێژم ئێكرێزى كلیلا سه‌ركه‌فتنا مه‌یه‌ و دڤێت ئه‌ڤرۆ به‌رى سوبه‌هى ئه‌م ئێكرێزیا ناڤمالا كوردى پتر ب هێز و رێكبێخین، چونكو ب تنێ مه‌ ئه‌ڤ چاره‌ یا هه‌ى و هه‌كه‌ ئه‌م وه‌نه‌كه‌ین دێ دوژمنێن مه‌ پتر هاربن.
ل دووماهیێ دێ بێژم هه‌كه‌ ئه‌م د ئێكرێزبین، دێ شێین هه‌موو مافێن كوردان ئه‌وێن د دستوورێ عیراقێ دا هاتینه‌ بنه‌جهكرن دێ شێیێن بده‌ستڤه‌ ئینین، ژ وانا مادێ (140) كو ب دیتنا من كلیلا چاره‌سه‌ریا هه‌ر ئاریشه‌كێ یه‌، یا دویێ ئه‌م كورد خودانێن پێشمه‌رگێن چاڤنه‌ترس و قه‌هره‌مانین مه‌ باوه‌ریا ب شیانێن وان هه‌ین دێ شێن هه‌موو مافێن مه‌ ب ده‌ستڤه‌ئینن و جیهان هه‌موو شاهدیێ بۆ وێ چه‌ندێ دده‌ن كو پێشمه‌رگه‌ى ژ پێش هه‌موو وه‌لاتێن جیهانێ ڤه‌ شه‌رێ داعشكرن و پاشڤه‌برن، هه‌روه‌سا دڤێت ژبیرنه‌كه‌ین كو مه‌ سه‌رۆكه‌كێ حه‌كیم و سه‌ركردایه‌تیه‌كا حه‌كیمانه‌ یا هه‌ى و دوور یا نێزیك ده‌وله‌تا كوردى دێ ل سه‌ر ده‌ستێن سه‌رۆك مه‌سعود بارزانى هێته‌ راگرتن.

29

غه‌ریب یوسف
به‌رى (31) سالان، وه‌كى ئه‌ڤرۆ دلێ مه‌زنێ پێشمه‌رگه‌ و ئه‌ندازیارێ ئاشتیێ شه‌هیدێ هه‌رده‌م ساخ (ئدریس بارزانى) ل وه‌لاتێ ئیرانێ ژ لێدانێ راوه‌ستیا و گه‌هشته‌ كاروانێ نه‌مران، و ئه‌زل وێ باوه‌ریێ مه‌ ب درێژاهیا دیرۆكێ چو كه‌س نه‌شێن ب دروستى و وه‌كى وى جهێ وى بگرن، له‌ورا ژده‌ستدانا وى نه‌به‌س زیان گه‌هانده‌ مالا وى، یان پارتى دیمۆكراتى كوردستان، به‌لكو زیان گه‌هانده‌ هه‌موو كوردان و ل هه‌ر جهه‌كێ دونیایێ بن، له‌ورا دێ بێژم قه‌ره‌بووكرنا قه‌هره‌مانێن وه‌سا دێ گه‌له‌كا ب زه‌حمه‌ت بیت.
هه‌لبه‌ت نیاسینا من ل گه‌ل نه‌مر ئدریس بارزانى بۆ سالا (1964) دزڤریت، كو وى ده‌مى ئه‌ز پێشمه‌رگه‌بووم ل باره‌گایێ مه‌كته‌با سیاسیا پارتى دیمۆكراتى كوردستان ل گۆندێ (دێرێ) ل ده‌ڤه‌را رانیا و ئێدى هه‌ڤنیاسین د ناڤبه‌را مه‌دا چێبوو، و هه‌تا رۆژا چوویه‌ وه‌غه‌رێ ئه‌ز ئێك ژ كه‌سێن نێزیكى وى بووم، و خوه‌ ب سه‌رفه‌راز دبینم بۆ ده‌مێ چه‌ند سالان ئه‌ز ل خزمه‌تا وى بووم، و هه‌تا مرنێ شانازیێ ب وێ چه‌ندێ دبه‌م كو ل سالانێن خۆش و نه‌خۆش ئه‌ز ل گه‌ل دا بووم، له‌وار ب هه‌لكه‌فتا (31) سالیا وه‌غه‌ركرنا وى حه‌ز دكه‌م چه‌ند رێزه‌كا بۆ دیرۆكێ دیاربكه‌م، یا ئێكێ د وارێ دبلۆماسى دا، هندى بێژى شه‌هید ئدریس بارزانى دبلۆماتكاره‌كێ شاره‌زا بوو، و په‌یوه‌ندیێن گه‌له‌ك باش ل گه‌ل سه‌رۆك و سه‌ركردێن گه‌له‌ك وه‌لاتان هه‌بوون، و ده‌مێ دچوو ژده‌رڤه‌ یان شانده‌ك ژده‌رڤه‌ دهاته‌ ده‌ف گه‌له‌ك رێز لێ دگرتن و حسابه‌كا مه‌زن بۆ دكرن، هه‌روه‌سا دوارێ ب رێڤه‌برنا كارۆبارێن پارتى دا گه‌له‌كێ زیره‌ك بوو و گه‌له‌ك رۆژان ل گه‌ل سه‌رۆك مه‌سعود بارزانى ل باره‌گایێ مه‌كته‌با سیاسى پێكڤه‌ دروونشتن و پێشوازیا شاند و مێهڤانان دكرن و ره‌فتارێن وى ل گه‌ل وان كه‌سێن دهاتنه‌ ده‌ف گه‌له‌ك دجوان بوو، ئانكو هه‌ر كه‌سه‌كێ دڤیا شیا ببینیت و هه‌رده‌م ده‌رگه‌هێ وى یێ ڤه‌كرى بوو، و هه‌ر ئاریشه‌ك یان داخوازیه‌كا هه‌با دا چاره‌یه‌كى بۆ بینین و كه‌س بێ ئۆمێد نه‌دكر، هه‌روه‌سا مرۆڤه‌كێ زێده‌ رحه‌ت و سه‌رخوه‌ بوو چو جاران تۆڕه‌ نه‌دبوو، ئانكو سینگێ وى هندێ چیایه‌كێ بۆ هه‌ر پرسیار و ره‌خنه‌كێ یێ ڤه‌كرى بوو.
بیرا من دهێت ل ئیلۆنا سالا (1981) شه‌هید ئدریس بارزانى ل گه‌ل پتر ژ (300) پێشمه‌رگه‌ى، كو ئه‌ز ژى ئێك ژوان بووم، ئه‌م هاتینه‌ ده‌ڤه‌را ده‌شتا به‌رازگر، و مه‌ باره‌گایێ خوه‌ ل گوندێ (بێ كێڤرێ) دانا، كو وى ده‌مى هێزا بارزان ژى ل وێرێ بوو، مه‌ره‌م ژ وێ هاتنێ پاراستنا عه‌ردێ كوردستانێ وخه‌لكێ وێ بوو، له‌ورا ل هه‌یڤا یازده‌ ب چه‌كێ گران و سڤك مه‌ چه‌ندین شه‌ر ل گه‌ل له‌شكرێ عیراقێ یێ وى سه‌رده‌مى كرن، و ژبه‌ركو زیانه‌كا مه‌زن گه‌هشته‌ دوژمنى نه‌چار بوون داخوازا دانوستاندنێ ل گه‌ل شه‌هید ئدریس بارزانى بكه‌ن، له‌ورا چه‌ندین شاند هنارتن، و هه‌تا بهارا سالا (1982) ئه‌م ماینه‌ ل وێرێ و ئێدى هه‌تا رۆژا وه‌غه‌رێ ئه‌م ماینه‌ ل خزمه‌تا وى و شانازیێ ب وى ژى دبه‌م یێ كو من ل گه‌ل ئدریسێ جانه‌مه‌رگ بۆراندى، و هه‌رده‌م خوه‌ ب قوتابیێ وێ قوتابخانێ دزانم كو ئه‌و ژى قوتابخانا كوردایه‌تیێ یه‌ ئه‌وا بابێ وى مه‌لا مسته‌فا بارزانى بوومه‌ داناى دبه‌م، و سۆزێ دده‌م هه‌تا دووماهیا چركا ژیانا خوه‌ هه‌ر قوتابیێ وێ رێبازى بم.

31

هه‌رچه‌نده‌ ئه‌ز نه‌ مرۆڤه‌كێ ره‌شبینم، به‌لێ ئه‌ز ل وێ باوه‌ریێ مه‌ هندى تایفه‌گه‌رى ل عیراقێ هه‌بیت چو جاران ره‌وشا وى خۆش نه‌بیت، چونكو ئه‌و كه‌سێن حكومى ل عیراقێ دكه‌ن فه‌رمانا ژ وه‌لاتێن جیران وه‌ردگرن، ئانكو ئه‌و چو دبێژنێ ئه‌و وه‌دكه‌ن، گرۆڤه‌ژى گه‌له‌ك دمشه‌نه‌ لێ پێدڤى ناكه‌ت ئه‌م ب رێز بكه‌ین، چونكو خه‌لكێ كوردستانێ ب گشتى، هه‌تا یێ عیراقێ ژى باش دزانیت كا عه‌بادى دار ده‌ستێ كیژ وه‌لاتى یه‌ و چاوا فه‌رمانێن وان بجه دئینیت و مه‌ره‌م ژێ دانانا هیلاله‌كا شیعى یه‌ ل ده‌ڤه‌رێ، له‌ورا یێ بزاڤێ دكه‌ت كونترۆلێ ل سه‌ر هه‌ر تشته‌كى بكه‌ت و هه‌ر فه‌رمانه‌كا لێڤه‌گه‌ڕێ وان بده‌تێ 100% ب سوپاسیڤه‌ ئه‌و دێ بجه ئینیت، و دبیت هه‌تا راده‌كى بشێت خه‌ونێن خوه‌ ب ده‌ستڤه‌بینیت، لێ ئه‌ڤه‌ هندێ ناگه‌هینیت كو دێ شێت كونترۆلێ ل سه‌ر عیراقێ هه‌موویێ بكه‌ت، چونكو ئه‌م هه‌موو دزانین ژمێژه‌یه‌ عیراق یا پارچه‌ پارچه‌كرى یه‌ ل سه‌ر سێ هه‌رێمان (كورد، سونه‌، شیعى) و هه‌موو خه‌لكێ عیراقێ ڤێ چه‌ندێ باش دزانیت و بۆزانین نه‌به‌س ئه‌م كورد د مه‌غدۆرین، به‌لكو غه‌درا ل عه‌ره‌بێن سونه‌ ژى هاتیه‌كرن و مافێن وان ژى هاتینه‌ پێشێلكرن، چونكو گه‌له‌گ جاران سه‌ركردێن سونه‌ د كۆنگیرێن خوه‌ یێن رۆژنامه‌ڤانى دا ئاماژه‌ ب وێ چه‌ندێ كرینه‌ كو دعیراقێ دا ئه‌و خوه‌ ب مه‌غدۆر دزانن، له‌ورا پلانا دانانا هه‌رێمه‌كا سنى دانایه‌ و چو دوور یا نێزیك دێ پلانا وانژى سه‌رگریت و عه‌بادى و سه‌ركردێن شیعا بڤێت یان نه‌ڤێت عیراق دێ بیته‌ سێ پارچه‌ و ژ مێژه‌ به‌رنامه‌ بۆ هاتیه‌ دارشتن.
هه‌روه‌سا دڤێت ئه‌م بزانین كو سونه‌ و شیعه‌ چه‌ند دوژمنێن ئێكبن بۆ دوژمناتیا كوردان دبنه‌ دوستێن ئێك، له‌ورا پێدڤیه‌ ئه‌م پتر د ئێكگرتى بین و ناڤمالیا كوردى باشتر ب پارێزین، هه‌روه‌سا پێدڤیه‌ هه‌موو لیستێن كوردى ل په‌رله‌مانێ عیراقێ ئێكده‌نگ و ئێك رێزبن و دهه‌موو ده‌لیڤان دا ب تایبه‌ت ل سه‌ر پرسا كوردى پشتا هه‌ڤدۆ بگرن دا نه‌هێلن دوژمن ب خه‌ونێن خوه‌ شاد ببن، هه‌روه‌سا پێدڤیه‌ سه‌ركردایه‌تیا كوردى له‌زێ د راگه‌هاندنا ده‌وله‌تا كوردى دا بكه‌ن و ب دیتنا من ده‌لیڤه‌ بۆ ده‌وله‌تبوونێ یا باش و گونجایه‌، چونكو چه‌ندین جاران سه‌رۆك مه‌سعود بارزانى د دیدار و گۆتارێن خوه‌ دا گۆتیه‌ هه‌كه‌ ئه‌م ب خوه‌ ده‌وله‌تا خوه‌ نه‌راگه‌هینینن چوجاران كه‌سه‌ك یان وه‌لاته‌ك ناهێت بێژیت ئه‌ڤه‌ ده‌وله‌تا كوردى دیارى بۆ هه‌وه‌، له‌ورا مه‌ دڤێت ب سه‌ربلندى بژین نه‌كو هه‌تا مرنێ بنده‌ست بژین.
ل دووماهیێ من دڤێت بێژم هه‌كه‌ خیانه‌تا (16) ئوكتۆبه‌رێ نه‌با چو جاران كه‌ركووك و هنده‌ك ده‌ڤه‌رێن دى نه‌دكه‌فتنه‌ ده‌ستێن حه‌شدا شه‌عبى و سۆپایێ عیراقێ، لێ هنده‌ك خائین و خۆفرۆشێن كورد ب پیلانگێڕیا هنده‌ك وه‌لاتێن جیران ئه‌و خیانه‌تا مه‌زن ل ملله‌تێ كورد كر، له‌ورا هندى كورد مابن وان خۆفرۆشان ژبیرناكه‌ن و هیڤیا من ئه‌وه‌ رۆژه‌ك بهێت دادگه‌ه ب وان كه‌سان بهێته‌كرن و ب هه‌ر ئێك بگه‌هیته‌ سزایێ خوه‌.

18

وه‌كى ئه‌ڤرۆ و به‌رى (56) سالان چریسكا ئێكێ یا شۆڕه‌شا ئیلۆنا مه‌زن ب سه‌ركێشى و رابه‌ریا مه‌لا مسته‌فایێ بارزانى ل كوردستانێ سه‌رهلدا و ئێدى ئه‌و شۆڕه‌ش بۆ قوتابخانه‌كا مه‌زنا كوردایه‌تیێ و هه‌موو ده‌ستكه‌فتێن كوردستانێ ب تایبه‌تى ژى په‌رله‌مان و حوكمه‌تا هه‌رێما كوردستانێ به‌رهه‌مێن وێ شۆڕه‌شێ نه‌، هه‌روه‌سا ئه‌و شۆڕه‌ش بۆ بنیاته‌ك كو سه‌ركردایه‌تیا كوردستانێ بڕیارێ ل چاره‌نڤیسێ گه‌لێ خوه‌ بده‌ت و رۆژا 25 ڤێ هه‌یڤێ بۆ ئه‌نجامدانا ریفراندۆم و سه‌ربخوه‌بوونا كوردستانێ ده‌ستنیشان بكه‌ن.
بێ گومانه‌ ئه‌و شۆڕه‌ش ژ چو ڤالاهیان نه‌هاتبوو، به‌لكو پشتى وێ زۆلم و زۆرداریێ هات ئه‌وا حوكمه‌تا عیراقێ یا وى سه‌رده‌مى دژى كوردان دكر، له‌ورا بارزانیێ نه‌مر نه‌خشه‌ بۆ وێ شۆَره‌شێ دانا و به‌رى ده‌ست ب بجهئینانا وێ بكه‌ت بارزانى سه‌ره‌دانا پتریا ده‌ڤه‌رێن كوردستانێ كر و ل گه‌ل ریهسپى و ماقوولێن وان ئاخفت و گۆتێ مه‌ ل به‌ره‌ ده‌ست ب شۆڕه‌شێ بكه‌ین و ئه‌م دێ بۆ مرنێ كه‌ین، ئه‌ڤجا هه‌كه‌ وه‌ دڤێت ل گه‌ل مه‌ بن و هاریكاریا مه‌ بكه‌ن دێ ده‌ست پێ كه‌ین، چونكو دوژمنێن مه‌ یێ پیلانێن مه‌زن دژى كوردان ددانن و ئارمانجا وان ژناڤبرنا مه‌ هه‌موویانه‌، و خۆشبه‌ختانه‌ هه‌موویان خوه‌ دا ل گه‌ل بارزانى و گۆتێ بۆ مرن و مانێ ئه‌م ل گه‌ل ته‌ینه‌، پشتى پلانا شه‌رى هاتیه‌ دانان و میحوه‌ر هاتینه‌ به‌لاڤكرن، ل هه‌ر میحوه‌ركى به‌رپرسه‌ك بۆ هاته‌ دانان و ب سه‌دان پێشمه‌رگه‌ ل گه‌ل دابوون و پشتى ده‌ستپێكرنا شۆڕه‌شێ رۆژ بۆ رۆژێ گه‌نجێن كوردان گه‌هشتنه‌ ناڤ رێزێن شۆڕه‌شێ و چه‌كێ شه‌ره‌ف و كه‌رامه‌تێ هه‌لگرتن و بوونه‌ پێشمه‌رگه‌، و هه‌ر چه‌نده‌ ل وى ده‌مى چه‌كه‌كێ سڤك و كێم ل به‌رده‌ستێ پێشمه‌رگه‌ى بوو، دوژمنى ب ده‌هان فرۆكه‌ و ب سه‌دان تانك و زریپۆش ل به‌رده‌ست بوون لێ ئیرادا پیلاى یا پێشمه‌رگه‌ى هه‌موو هێرشێن وان شكاندن و زیانه‌كا ئێكجار مه‌زن گه‌هانده‌ دوژمنى و ب ده‌هان كه‌له‌خێن وان ل گه‌ل چه‌كى مابوونه‌ ل مه‌یدانا شه‌رى، له‌ورا حكومه‌تا عیراقێ نه‌چار بوو داخوازا دانوستاندنان ژ بارزانى بكه‌ن، لێ ژبه‌ر كو مه‌ره‌مێن وان دباش نه‌بوون و نه‌دڤیان دانپێدانێ ب مافێن كوردان بكه‌ن، له‌ورا شۆَره‌ش یا به‌رده‌وام بوو، و رۆژ بۆ رۆژێ ناڤوده‌نگیا كوردان و پێشمه‌رگه‌ى ل جیهانێ ده‌نگڤه‌دا، هه‌روه‌سا رۆژ بۆ رۆژێ شۆرَه‌ش گه‌رمتر لێ هات هه‌ر چه‌نده‌ هنده‌ك جاران شكه‌ستن هه‌بوون، لێ بارزانى یێ ب ئومێد بوو، و هه‌رده‌م دگۆت (ل سه‌ركه‌فتنا مه‌غرۆر نه‌بن و ل شكه‌ستان ژى بێ ئۆمێد نه‌بن)، له‌ورا رۆژ بۆ رۆژێ مۆرالا پێشمه‌رگه‌ى و خه‌لكێ كوردستانێ بلندتر لێ هات هه‌تا شۆڕه‌شا گولانێ دووڤدا سه‌رهلدان ب سه‌ردا هاتین و بۆ ده‌مێ پتر ژ (25) سالانه‌ ئه‌م كورد خودان په‌رله‌مان و حوكمه‌تین و مه‌ بۆ دۆست و دوژمنان دوپاتكر كو ئه‌م دشێین خوه‌ ب رێڤه‌ببه‌ین و نوكه‌ كاروانێ كوردینیێ یێ ل گوپیتكا سه‌ركه‌فتنێ، ب تایبه‌ت پشتى شه‌رێ داعش كو پێشمه‌رگه‌ى بۆ هه‌موو جیهانێ سه‌لماندن ئه‌و شیان ژ پێش هه‌موو جیهانێ ڤه‌ شه‌رى بكه‌ن و وێ گرۆپا تیرۆرستى ژناڤ ببه‌ن، و تشتێ مه‌ ماى پشتى دو حه‌فتێن دى ئانكو ل رۆژا 25 ڤێ هه‌یڤێ ئه‌م ب دله‌كێ پر شاد و كه‌یفخۆشى بچینه‌ سه‌رسندۆقێن ده‌نگدانێ و بێژین به‌لێ و هزار جاران به‌لێ بۆ ریفراندۆم و سه‌ربه‌خوه‌بوونا كوردستانێ.

33

د دیرۆكا پر سه‌روه‌ریا ملله‌تێ كوردا گه‌له‌گ ئه‌ڤرازى و نشیڤى هه‌نه‌، هه‌روه‌سا گه‌له‌ك رۆَژێن خۆش و نه‌خۆش ژى هه‌نه‌، كو ل هنده‌ك رۆژان ئه‌م كورد گه‌له‌ك پێ ئێشاینه‌ و ل هنده‌ك رۆژان ژى گه‌له‌ك كه‌یفا مه‌ هاتیه‌، ژ وانا رۆژا (16) ته‌باخێ كو رۆژه‌كا پر سه‌روه‌ریا ددیرۆكا ملله‌تێ كورد دا ئه‌و ژى رۆژا دامه‌زراندنا پارتى دیمۆكراتى كوردستانه‌ ل سه‌ر ده‌ستێ رابه‌ڕ و بلیمه‌تێ كوردان مه‌لا مسته‌فا بارزانى، كو هندى ئه‌م كورد هه‌یه‌ ڤێ رۆژێ ژبیرناكه‌ین چونكو ب دامه‌زرندنا پارتى چرایێ كوردان گه‌شتر لێ هات و دڤێت د هه‌موو ژیانا خوه‌ دا شانازیێ ب پارتا خوه‌، هه‌روه‌سا دامه‌زرێنه‌رێ وێ بارزانیێ نه‌مر بكه‌ین.
بێ گۆمانه‌ دامه‌زراندنا پارتى ژچو ڤالاهیان نه‌هاتیه‌، به‌لكو د سه‌رده‌مه‌كى دا هات كو مه‌ كوردان گه‌له‌ك پێدڤى پێ هه‌بوو، له‌ورا دێ ب سه‌ربلندى ڤه‌ بێژین دامه‌زراندنا پارتى ئێك ژ پێدڤیێن هه‌ره‌ گرنگ بوو، هه‌روه‌سا دڤێت چو جاران رۆلێ بارزانیێ نه‌مر ژبیرنه‌كه‌ین ژبه‌ركو نه‌ تشته‌كێ ب ساناهى بوو به‌رى (71) سالان تۆ حزبه‌كێ ب دامه‌زرینى، چونكو ل وى ده‌مى دوژمنێن كوردان گه‌له‌ك بوون و ئه‌وان هه‌موو بزاڤێن خوه‌ دمه‌زاختن دا ده‌نگێ كوردان بمرینن، لێ مه‌لا مسته‌فا یێ بارزانى ب شاره‌زاى و قه‌هره‌مانیا خوه‌ شیا هه‌موو نه‌خشه‌ و پلانێن وان ژناڤ ببه‌ت و پشتى دامه‌زراندنا پارتى رۆژ بۆ رۆژێ چرایێ كوردان ل هه‌موو جیهانێ گه‌شتر لێ هات، هه‌روه‌سا دوستێن كوردان ژى ل سه‌رتاسه‌رى جیهانێ زێده‌تر لێ هاتن و ئه‌ڤرۆ ژى ب سایا سه‌رێ سه‌رۆك مه‌سعود بارزانى، كو كۆڕێ مه‌لا مه‌سته‌فا یێ بارزانى یه‌، رۆژ بۆ رۆژێ دوستێن كوردان یێن زیده‌ دبن و هه‌كه‌ د ده‌مه‌كى دا به‌س چیا دۆستێن كوردان بوو، ئه‌ڤرۆ ل سه‌رانسه‌رى وه‌لاتێن جیهانێ كوردان دوست هه‌نه‌ و وه‌لاتێن زلهێز یێ پشته‌ڤانیێ لێ دكه‌ن، چونكو بۆ وان دیاربوو كو تاكه‌ هێزا شیاى هه‌یبه‌تا داعشێ بشكێنیت و ژناڤ ببه‌ت پێشمه‌رگێن كوردان بوو، له‌ورا ئه‌ڤرۆ كه‌ ل پرانیا وه‌لاتێن جیهانێ رێزه‌كا مه‌زنا ل كوردان و سه‌رۆك مه‌سعود بارزانى دهێته‌ گرتن و ل هه‌موو سه‌ره‌دانا خوه‌ دا بۆ ده‌رڤه‌ى وه‌لاتى و ئورۆپا پێشوازیه‌كا كێم وێنه‌ و ب ئالایێ كوردستانێ یا ل سه‌رۆك مه‌سعود بارزانى دهێته‌ گرتن، و دڤێت ئه‌م هه‌موو بزانین ئه‌ڤه‌ بۆ هه‌موو كه‌سان ناهێته‌ كرن، به‌س بۆ سه‌رۆك بارزانى وه‌كو سه‌رۆك كۆمارێ هه‌ر وه‌لاته‌كى پێشوازى لێ بهێته‌ كرن، و دڤێت ئه‌م هه‌موو شانازیێ پێ ببه‌ین چونكو ئه‌و نوونه‌رێ ئێكانه‌ و راسته‌قینه‌ یێ هه‌موو كوردان ل هه‌موو جیهانى.
ل دووماهیێ دێ بێژم سالرۆژا دامه‌زراندا پارتى دیمۆكراتى كوردستان، كو دهه‌مان ده‌مدا رۆژبوونا سه‌رۆك مه‌سعود بارزانى ژى یه‌ ل هه‌موو كوردان پیرۆز بیت و هیڤیا من ئه‌وه‌ ئه‌م خوینا وان قه‌هره‌مان ژبیرنه‌كه‌ین یێن كو گیانێ خوه‌ پێشكێشى ڤێ رۆژێ كرین و شه‌هید بووین، داخازێ ژ هه‌موو كوردان دكه‌م ل رۆژا بیست و پێنجى ئیلۆنا بهێت پێكڤه‌ بچنه‌ سه‌ر سندۆقێن ده‌نگدانێ و بێژن به‌لێ بۆ سه‌رخوبوونا كوردستانێ، دا گیانێ شه‌هیدێن مه‌ شاد ببیت و ئه‌م كورد ب ده‌وله‌تبوونا خوه‌ سه‌رفراز ببین.

53

(گشتپرسى دیاركرنا مافێ چاره‌نڤیسازێ كوردانه‌، و هه‌كه‌ ئه‌و پرۆسه‌ ب سه‌ركه‌فت ئه‌ڤه‌ هه‌موو كورد ب سه‌ركه‌فتن)
پشتى كێمتر ژ دو هه‌یڤێن دى، بۆ جارا ئێكێ د دیرۆكا كوردان دا پرۆسا گشتپرسیێ ئانكو ریفراندۆمێ دێ ل هه‌رێما كوردستانێ هێته‌ كرن، و تشتێ جهێ شانازیێ ئه‌وه‌ ئه‌و بریارا گرنگ و دیرۆكێ ژلایێ سه‌رۆكێ هێژا مه‌سعود بارزانى ڤه‌ هاتیه‌ دان، كو هه‌تا هه‌تا ئه‌م وێ رۆژێ ژبیر ناكه‌ین یا كو جه‌نابێ سه‌رۆكى ل گه‌ل پتریا حزب و لایه‌نێن سیاسى ل كوردستانێ، ژبلى ته‌ڤگه‌را گۆڕان و كۆمه‌لێ كو ئه‌وان بایكۆتا وێ چه‌ندێ كربوو و نوونه‌رێن خوه‌ نه‌هنارت بوون كۆم بووى و ئه‌و بریارا وێره‌كانه‌ داى.
بێ گۆمانه‌ پرۆسا گشتپرسیێ ل هه‌موو جیهانێ، ژوانا ل كوردستانێ ژى نه‌مولكێ چو حزب عه‌شیره‌تانه‌، به‌لكو مولكێ هه‌موو كوردانه‌ ل هه‌ر پارچه‌كا كوردستانێ یان ل هه‌ر قولاچكه‌كا جیهانێ بژیت، ئانكو گشتپرسى دیاركرنا مافێ چاره‌نڤیسازێ كوردانه‌، و هه‌كه‌ ئه‌و پرۆسه‌ ب سه‌ركه‌فت ئه‌ڤه‌ هه‌موو كورد ب سه‌ركه‌فتن، و هه‌كه‌ خودێ نه‌كه‌ت سه‌رنه‌كه‌فت ئه‌ڤ هه‌موو كورد سه‌رنه‌كه‌فتن، له‌ورا گه‌له‌كا گرنگه‌ هه‌موو ملله‌تێ كورد ب هه‌موو ته‌خ و چیێن جڤاكى ڤه‌ ل رۆژا 25 ئیلۆنا بهێت ب گه‌رم و گورى بچنه‌ بنگه‌هێن ده‌نگدانێ و بێژن: به‌لێ بۆ ریفراندۆمێ، به‌لێ بۆ سه‌رخه‌بوونا كوردستانێ، ژبه‌ركو چاره‌نڤیسێ مه‌ هه‌موویان یێ دوێ رۆژێ دا و پێدڤیه‌ ئه‌م ژده‌ستێن خوه‌ نه‌كه‌ین، چونكو بوومه‌ دیاربوویه‌ مانا مه‌ ل گه‌ل عیراقێ یا بێ مفایه‌ و وه‌كى جه‌نابێ سه‌رۆكى كه‌ره‌مكرى بلا ئه‌م دو جیرانێن باش بین ل گه‌ل ئێك، دێ بوومه‌ ژى باشتر بیت هه‌روه‌سا بۆ وانژى.
هه‌روه‌سا دڤێت ژبیرنه‌كه‌ین د سه‌د سالێن بۆرى دا ژبلى كوشتن و بنبڕكرن و كاره‌سات و ئه‌نفالان عیراقێ چ مفا گه‌هاندیه‌ مه‌ و ئه‌م د پشت راستین هه‌تا هه‌تا یێ ژى عیراق مه‌ ب برا و هه‌ڤپشكێن خوه‌ نا هژمێرێت، به‌لكو هه‌تا نوكه‌ وه‌ك مێڤان ره‌فتارێ ل گه‌ل مه‌ دكه‌ن، و هه‌رده‌مه‌كێ ته‌نگاڤ بوون دێ بێژن كورد برایێن مه‌ و هه‌وارا خوه‌ گه‌هینه‌ سه‌ركردێن كوردان، لێ ده‌مێ ته‌نا دبن و ده‌لیڤا خوه‌ دبینن جاره‌كا دى دۆژمناتیا كوردان دكه‌ن، هه‌تا كار گه‌هشته‌ وێ رادى مووچه‌ و بۆدجا هه‌رێما كوردستانێ ژى به‌رى چار سالان هاته‌ بڕین، هه‌تا ئه‌و شیرێ بۆ زارۆیێن ئێك هه‌یڤى هه‌تا ساله‌كێ دهات ئه‌و ژى بڕین، ئانكو ئه‌و ب خوه‌ یێ دبێژنه‌ مه‌ ئه‌م دژى هه‌وه‌ینه‌ و چو جاران ل گه‌ل هه‌وه‌ دراست نابین، له‌ورا باشترین چاره‌ دێ ئه‌و بیت ئه‌م ژ عیراقێ جوودا بین و ل بیست و پێنجى ئیلۆنێ بێژینه‌ وان ئه‌م ل مالا خوه‌ و هوون ل مالا خوه‌، و ئه‌ڤ چه‌نده‌ دێ د گشتپرسیێ دا ئێكلابیت و پێدڤیه‌ ئه‌م وێ چه‌ندێ ژ ده‌ست نه‌ده‌ین، چونكو ئه‌م كورد هه‌موو یێ د پاپۆره‌كێ دا ل نیڤا ده‌ریاى و چاره‌نڤیسێ مه‌ هه‌موویان پێكڤه‌ یێ گرێدایه‌، و هه‌كه‌ ئه‌و پاپۆر ب سلامه‌تى ده‌رباز بوو ئه‌ڤه‌ ئه‌م هه‌موو پێكڤه‌ سه‌رفراز بووین، ئه‌گه‌ر خودێ نه‌كه‌ت نه‌ ژى ئه‌ڤه‌ ئه‌م هه‌موو زه‌ره‌مه‌ند بووین، له‌ورا پێدڤیه‌ ئه‌م باش هزرێن خوه‌ بكه‌ین و ڤێ ده‌لیڤا دیرۆكى ژده‌ست نه‌ده‌ین، هه‌روه‌سا دڤێت گه‌له‌ك د هشیاربین و گوهێ خوه‌ نه‌ده‌ینه‌ گۆتنێن نه‌حه‌زان چونكو هنده‌ك وه‌لات ب تایبه‌ت ژى یێن ده‌وروبه‌ر یێن ژبۆ هندێ كاردكه‌ن كو گشتپرسى سه‌رنه‌گریت و ئه‌و دحازرن ب ملیۆنان دۆلاران ب مه‌زێخن دا دلێ خه‌لكه‌كى ژ گشتپرسیێ سار بكه‌ن، لێ خه‌یالا وان یا خاڤه‌ و ملله‌تێ كورد باش مافێن خوه‌ دزانیت، هه‌روه‌سا ئه‌ز یێ پشت راستم رۆژ بۆ رۆژێ دێ پشته‌ڤانێن گشتپرسیێ زێده‌تر لێ هێن، هه‌تا ئه‌و كه‌سێن هه‌تا نوكه‌ ب هه‌ر ره‌نگه‌كێ هه‌بیت دژاتیا وێ دكه‌ن یان دبێژن ئه‌م ناچینه‌ ریفراندۆمێ ئه‌و ژى دێ وێ رۆژێ چن و ده‌نگێ خوه‌ ب به‌لێ ده‌ن چونكو وژدانا وان قه‌بوول ناكه‌ت ئه‌و دژى ملله‌تێ خوه‌ راوه‌ستن و گۆهێ خوه‌ بده‌ گۆتنێن هنده‌ك به‌رپرس و سه‌ركردێن خوه‌ كو عاقل و بریارێن وان دده‌ستێن هنده‌ك وه‌لات و كه‌سێن دى دانه‌ و ئه‌و فه‌رمانا لێ دكه‌ن، له‌ورا ئه‌ز پێشبینیا وێ چه‌ندێ دكه‌م ب رێژا 85_90% دێ خه‌لكێ مه‌ ده‌نگى ب به‌لێ ده‌ن، چونكو ده‌نگدان ئه‌ركه‌كێ نشتیمانى و ئه‌خلاقى و ئاینى یه‌ و ئه‌و كه‌سێن ده‌نگێ خوه‌ ب به‌لێ نه‌ده‌ن ب دیتنا من ئه‌و كه‌س نه‌ كوردن، و رۆژه‌ك دێ هێت خه‌لك و دیرۆك دێ نه‌عله‌تێ ل وان كه‌ن، و ل دووماهیێ دێ بێژین به‌لێ و هزار جاران به‌لێ بۆ سه‌رخوبوونا كوردستانێ.

67

شانازیێ ب وان رۆژان دبه‌م یێن من ل گه‌ل شه‌هید ئدریس بارزانى بۆراندین
وه‌كى ئه‌ڤرۆ، به‌رى (30) سالان دلێ مه‌زنێ پێشمه‌رگه‌ و ئه‌ندازیارێ ئاشتیێ شه‌هیدێ جانه‌مه‌رگ (ئدریس بارزانى) ل وه‌لاتێ ئیرانێ ژ لێدانێ راوه‌ستیا و گه‌هشته‌ كاروانێ نه‌مران، و ئه‌زل وێ باوه‌ریێ مه‌ ب درێژاهیا دیرۆكێ چو كه‌س نه‌شێن ب دروستى و وه‌كى وى جهێ وى بگرن، له‌ورا ژده‌ستدانا وى نه‌به‌س زیان گه‌هانده‌ مالا وى، یان پارتى دیوكراتى كوردستان، به‌لكو زیان گه‌هانده‌ هه‌موو كوردان و ل هه‌ر جهه‌كێ دونیایێ بن، له‌ورا دێ بێژم قه‌ره‌بووكرنا قه‌هره‌مانێن وه‌سا دێ گه‌له‌كا ب زه‌حمه‌ت.
هه‌لبه‌ت نیاسینا من ل گه‌ل نه‌مر ئدریس بارزانى بۆ سالا (1964) دزڤریت، كو وى ده‌مى ئه‌ز پێشمه‌رگه‌بووم ل باره‌گایێ مه‌كته‌با سیاسیا پارتى دیوكراتى كوردستان ل گۆندێ (دێرێ) ل ده‌ڤه‌را رانیا و ئێدى هه‌ڤنیاسین دناڤبه‌را مه‌دا چێبوو، و هه‌تا رۆژا چوویه‌ وه‌غه‌رێ ئه‌ز ئێك ژ كه‌سێن نێزیكى وى بووم، و خوه‌ ب سه‌رفه‌راز دبینم بۆ ده‌مێ چه‌ند سالان ئه‌ز ل خزمه‌تا وى بووم، و هه‌تا مرنێ شانازیێ ب وێ چه‌ندێ دبه‌م كو ل سالانێن خۆش و نه‌خۆش ئه‌ز ل گه‌ل دا بووم، له‌وار ب هه‌لكه‌فتا (30) سالیا وه‌غه‌ركرنا وى حه‌ز دكه‌م چه‌ند رێزه‌كا بۆ مێژۆیێ دیاربكه‌م، یا ئێكێ دوارێ دبلۆماسى دا، هندى بێژى شه‌هید ئدریس بارزانى دبلۆماتكاره‌كێ شاره‌زا بوو، و په‌یوه‌ندێن گه‌له‌ك باش ل گه‌ل سه‌رۆك و سه‌ركردێن گه‌له‌ك وه‌لاتان هه‌بوون، و ده‌مێ دچوو ژده‌رڤه‌ یان شانده‌ك ژده‌رڤه‌ دهاته‌ ده‌ف گه‌له‌ك رێز لێ دگرتن و حسابه‌كا مه‌زن بۆ دكرن، هه‌روه‌سا دوارێ ب رێڤه‌برنا كارۆبارێن پارتى دا گه‌له‌كێ زیره‌ك بوو، و گه‌له‌ك رۆژان ل گه‌ل به‌رێز مه‌سعود بارزانى ل باره‌گایێ مه‌كته‌با سیاسى پێكڤه‌ دروینشتن و پێشوازیا شاند و مێهڤانان دكرن، و ره‌فتارێن وى ل گه‌ل وان كه‌سێن دهاتنه‌ ده‌ف گه‌له‌ك دجوان بوو، ئانكو هه‌ر كه‌سه‌كێ دڤیا شیا ببینیت و هه‌رده‌م ده‌رگه‌هێ وى یێ ڤه‌كرى بوو، و هه‌ر ئاریشه‌ك یان داخوازیه‌كا هه‌با دا چاره‌یه‌كى بۆ بینین و كه‌س بێ ئۆمێد نه‌دكر، هه‌روه‌سا مرۆڤه‌كێ زێده‌ رحه‌ت و سه‌رخوه‌ بوو چو جاران تۆڕه‌ نه‌دبوو، ئانكو سنگێ وى هندێ چیایه‌كێ بۆ هه‌ر پرسیار و ره‌خنه‌كێ یێ ڤه‌كرى بوو.
بیرا من دهێت ل ئیلۆنا سالا (1981) شه‌هید ئدریس بارزانى ل گه‌ل پتر ژ (300) پێشمه‌رگه‌ى، كو ئه‌ز ژى ئێك ژوان بووم، ئه‌م هاتینه‌ ده‌ڤه‌را ده‌شتا به‌رازگر، و مه‌ باره‌گایێ خوه‌ ل گوندێ ( بێ كێڤرێ) دانا، كو وى ده‌مى هێزا بارزان ژى ل وێرێ بوو، مه‌ره‌م ژوێ هاتنێ پاراستنا عه‌ردێ كوردستانێ وخه‌لكێ وێ بوو، له‌ورا ل هه‌یڤا یازده‌ ب چه‌كێ گران و سڤك مه‌ چه‌ندین شه‌ر ل گه‌ل له‌شكرێ عیراقێ یێ وى سه‌رده‌مى كرن، و ژبه‌ركو زیانه‌كا مه‌زن گه‌هشته‌ دوژمنى نه‌چار بوون داخوازا دانوستاندنێ ل گه‌ل شه‌هید ئدریس بارزانى بكه‌ن، له‌ورا چه‌ندین شاند هنارتن، و هه‌تا بهارا سالا (1982) ئه‌م ماینه‌ ل وێرێ و ئه‌ڤ وێنێ ل گه‌ل گۆتارا مه‌ به‌لاڤ ل رۆژا 20/3/1982 كو ئێڤاریا نه‌ورۆزێ بوو هاتیه‌ گرتن، ئه‌و ده‌م بوو ده‌مێ ئه‌م ب رێ كه‌فتین، و ئێدى هه‌تا رۆژا وه‌غه‌رێ ئه‌م ماینه‌ ل خزمه‌تا وى و شانازیێ ب وى ژى دبه‌م یێ كو من ل گه‌ل ئدریسێ جانه‌مه‌رگ بۆراندى، و هه‌رده‌م خوه‌ ب قوتابیێ وێ قوتابخانێ دزانم كو ئه‌و ژى قوتابخانا كوردایه‌تیێ یه‌ ئه‌وا بابێ وى مه‌لا مسته‌فا بارزانى بوومه‌ داناى دبه‌م، و سۆزێ دده‌م هه‌تا دووماهیا چركا ژیانا خوه‌ هه‌ر قوتابیێ وێ رێبازى بم.

38

به‌رى چه‌ند رۆژان نوورى مالكى، سه‌رۆك وه‌زیرێن به‌رێ یێ عیراقێ د كۆنگره‌كێ رۆژنامه‌ڤانى دا ب ئاشكرایى گۆت (پێدڤیه‌ پێشمه‌رگه‌ بزڤرنه‌ وان سنۆران یێن كو ل سالا 2003 ل وێرێ)، له‌ورا هه‌كه‌ ئه‌م ئاخفتنێن وى شرۆڤه‌ بكه‌ین دێ بۆ مه‌ دیاربیت ئه‌ڤ كه‌سه‌ یێ تووشى هێستریایێ بووى و نزانیت ئه‌وا (2003) نه‌ سنۆر بوون، به‌لكو هێلا ته‌ماسێ بۆ د ناڤبه‌را پێشمه‌رگه‌ى و له‌شكرێ عیراقێ دا، هه‌ر چه‌نده‌ ئه‌و ب خوه‌ ڤێ چه‌ندێ باش دزانیت لێ نه‌ڤێت راستیێ بێژیت و هه‌رده‌م بزاڤێ دكه‌ن ب ئاخفتنێن خوه‌ یێن خاپینۆك خه‌لكه‌كى د سه‌ر دا ببه‌ت، له‌ورا وه‌كو مرۆڤه‌كێ تووشى نه‌خۆشیا ده‌روونى بووى یێ هه‌ر ته‌ڤڕه‌كى ل عه‌رده‌كى دده‌ت و مه‌ره‌ما وى پێ ئه‌و دا ب ڤان ئاخفتنان خه‌لكه‌كى بكه‌ته‌ دوژمنێن كوردان و شكه‌ستنێن خوه‌ پێ ب ڤه‌شێریت. له‌ورا هه‌ر چه‌ند هه‌یڤان جاره‌كێ یێ بومبه‌كا هۆسا دهاڤێته‌ د مه‌یدانێ دا و ئه‌و وێ هزرێ دكه‌ت كو خه‌لكه‌ك دێ باوه‌ر ژ وى كه‌ت، لێ تشتێ باش ئه‌وه‌ هه‌موو خه‌لكێ عیراقێ سه‌نگا وى باش دزانن و دزانن هه‌ر ئه‌و بۆ چار ملیار دۆلار داینه‌ داعشێ ده‌مێ نێزیكى به‌غدا بووین و به‌رێ وان دایه‌ كوردستانێ، ئانكو ئاخفتنێن ڤى تزبى فرۆشى یێن به‌عسیانه‌، له‌ورا ئه‌ڤ كه‌سه‌ هنده‌ك ره‌فتاران دكه‌ت هه‌رده‌م جهێ پێكه‌نینێ نه‌، چونكو ئه‌وێ خوه‌ ب سیاسى بزانێت، یان ئه‌وێ د ناڤا سیاسه‌نێ دا كار دكه‌ت دڤێت ب هشیارى ره‌فتارێ بكه‌ت و بزانیت كا چو ئاخفتن ژ ده‌ڤێ وى ده‌ردكه‌ڤیت ئه‌گه‌ر نه‌ دێ هه‌رده‌م بیته‌ جهێ پێكه‌نینێ د ناڤ جڤاتان دا، لێ تشتێ باش ئه‌وه‌ خه‌لك یێ ژ وان گۆتنان بێزاربووى چونكو هه‌موو باش دزانن هه‌ر ئه‌و مالكى بوو نیڤا ئاخا عیراقێ و پتر ژى دماوێ چه‌ند حه‌فتیان دا راده‌ستى مه‌زنترین رێكخراوا تیرۆستى ل جیهانێ كرى، كو ئه‌و ژى رێكخراوا داعش بوو، ب تایبه‌ت ژى باژێرێ مووسل كو سۆپایێ مالكى نه‌شیا شه‌ڤ و رۆژه‌كا ژى به‌ره‌ڤانیێ ژێ بكه‌ت، سه‌ره‌راى هه‌بوونا ب ده‌هان فرۆكان و ب هزرانا زریپۆش و تانكێن له‌شكرى و چه‌كێ سڤك و گران لێ ئه‌ڤه‌ هه‌موو ب چو نه‌چوون و كێمتر ژ (500) داعشان سۆیایێ عیراقى ل وى باژێرى باشڤه‌بر و ب هزارا ته‌نێن چه‌كى هێلانه‌ دده‌ستێن داعشێ دا و دونیا هه‌موو دزانین هه‌كه‌ ئه‌و چه‌ك د ده‌ستێن پێشمه‌رگه‌ى دا با دا هه‌تا به‌غدا ژى چن، له‌را ئه‌م دبێژینه‌ مالكى و دارده‌ستێن وى خه‌یالاته‌ یا خاڤه‌ و هه‌موو دزانن تو دووڤه‌لانكێ وه‌لاته‌كێ جیرانى و ئه‌و چو دبێژنه‌ ته‌ تۆ دبێژیێ (به‌لێ) ئانكو تۆ نه‌خودان ئاخفتنى به‌لكو ئاخفتنا ته‌ ژ كیستێ خه‌لكى یه‌، له‌ورا هه‌تا مرنێ دێ یێ شه‌رمزار بى و دیرۆك دێ نه‌عله‌تێ ل ته‌ و كه‌سێن وه‌كى ته‌ كه‌ت، و باش بزانه‌ ئیرادا خه‌لكێ كوردستانێ و پێشمه‌رگه‌ى ژ هه‌موو نه‌خشه‌ و پلانێن ته‌ مه‌زنترتن و چو جاران ئه‌و هزره‌كێ بۆ ئاخفتنێن ته‌ ناكه‌ن، چونكو ئه‌و سنۆرێن پێشمه‌رگه‌ى ب خوینێ رزگاركرین چو جاران بووته‌ به‌رناده‌ن، ئانكو پیِشمه‌رگه‌ دێ سنۆرێن كوردستانێ ده‌ست نیشانكه‌ن نه‌ك تو.

39

ناهێته‌ مانده‌لكرن ئه‌ڤا ل چه‌ند سالێن بۆرى ل عیراقێ رووداى، هه‌روه‌سا ئه‌ڤا نوكه‌ ژى روودده‌ت ژ ئه‌نجامێ وێ سیاسه‌تا فاشله‌ ئه‌وا سه‌رۆك وه‌زیرێن به‌رێ یێ عیراقێ (نورى مالكى) په‌یره‌و دكر، و ئه‌ز ل وێ باوه‌ریێ مه‌ هه‌تا چه‌ندین سالێن دى ژى كارتێكرنا وێ سیاسه‌تا فاشل دێ ل سه‌ر هه‌موو گه‌لێ عیراقێ مینیت، چونكو مالكى كه‌سه‌كێ تایفه‌گه‌رى بوو، و عاقلێ وى ژى ژ كیشتێ خه‌لكى بوو، ئانكو وه‌كو (عه‌بده‌كى) بوو د ده‌ستێن وه‌لاته‌كێ جیراندا و ئه‌وان چاوا دڤیا مالكى بۆ ئه‌و دكر، دا رۆهنتر بێژم فه‌رمان بۆ وى ژوى وه‌لاتى دهاتن ئه‌وێ دده‌مێ خوه‌ دا ئه‌و وه‌ك په‌نابه‌ر لێ دژیا، له‌ورا كارتێكرنا عه‌بدینیا وى گه‌هشته‌ وى راده‌ى كو عیراق هه‌موو تووشى چه‌ندین كاره‌سات و نه‌خۆشى و ئاتافان بیت، و مه‌ هه‌موویان دیت كا چاوا و ب ساناهى و دده‌مه‌كێ كێمدا نێزیكى نیڤا ئاخا عیراقێ كه‌فته‌ دبن كنترۆلا مه‌زنترین رێكخراوا تیرۆستى ل جیهانێ، كو ئه‌و ژى داعشه‌، و هه‌تا ئه‌ڤرۆ ژى ب هزاران عیراقى یێ ل بن گه‌ڤا داعش دژین، و ب سه‌دان هزار ژى ئاواره‌ و ده‌ربه‌ده‌ربووینه‌، ژبلى خرابكرن و كاڤلكرنا چه‌ندین باژێر و باژێرۆكێن عیراقێ، و ئه‌ز ل وێ باوه‌ریێ مه‌ ئه‌و كاڤلكرنا ل عیراقێ رووداى، مه‌ره‌ما من خرابكرن و وێرانكرنا خانى و ئاڤاهى و جهێن پیرۆزه‌ هه‌تا پێنجى سالێن دى ژى عیراق وه‌كو به‌رێ لێ ناهێته‌ ڤه‌، واته‌ دشێم بێژم عیراق پتر ژ 60% به‌ر ب پاشڤه‌ زڤرى، و ئێدى ئه‌م نه‌شێین بێژین وه‌لاتێ شارستانیان. ل دووماهیێ من دڤێت بێژم هه‌كه‌ مالكى نه‌با باژێرێ مووسل وه‌سا ب ساناهى نه‌دكه‌فته‌ د ده‌ستێن داعش دا، چونكو یا ره‌وا نه‌بوو ب سه‌دان هزار له‌شكر و پۆلیس و هێزێن ئێمناهیێ ل وى باژێرى هه‌بن و چه‌كه‌كێ بهێز و مۆدرێن ل به‌ر ده‌ستى بیت، و هه‌موو پێكڤه‌ نه‌شیان ده‌مژمێره‌كا بتنێ ژى به‌رگیریێ بكه‌ن، ل ڤێره‌ ئه‌ز گونه‌هێ بتنێ نائێخمه‌ ستۆیێ وان هێزان، به‌لكو گۆنه‌ها مه‌زن یا مالكى بوو، چونكو ئه‌و فه‌رماندێ گشتى یێ له‌شكرى بوو، و هه‌موو بزاڤ و لڤینێن له‌شكرى دده‌ستێن وى بتنێ دا بوون، ئانكو وه‌ك دكتاتۆره‌كى یێ زال بوو ل سه‌ر هه‌ر تشته‌كى و بریارا ئێكێ و دووماهیێ دده‌ستێن وى بتنێ دا و چو هزر بۆ كه‌سێ به‌رامبه‌رى خوه‌ نه‌دكرن، له‌ورا وێ سیاسه‌تا فاشل ئه‌ڤه‌ ب سه‌رێ عیراقێ ئینا، و عیراق به‌ر ب ئاتافه‌كێ نه‌دیار بر، له‌وا یا پێدڤیه‌ ئه‌م هه‌موو پشته‌ڤانێن سه‌رۆك بارزانى بین و له‌زێ د دریفراندۆمێ دا بكه‌ین چونكو چاره‌سه‌ریا دووماهیێ هه‌ر جوودا بوونه‌ ژ عیراقێ.

website security