NO IORG
Authors Posts by كۆڤان حسێن

كۆڤان حسێن

كۆڤان حسێن
187 POSTS 0 COMMENTS

23

كۆڤان حسێن
تێرا هندێ گه‌شبینى هه‌یه‌ كو پرسا مووچا ب چى قه‌بارێ هه‌یی چاره‌سه‌ر بیت و جاره‌كا دى هه‌مى سه‌رێ هه‌یڤى مووچه‌ بهێنه‌ دابه‌شكرن. لێ هزار پرسیار دروست دبن پشتى مووچه‌یان پرسێن مه‌یێن ژیانه‌ڤانى چاره‌سه‌ر دبن یان ل سه‌ر ئاستێ مالێ ئه‌م راستى كاره‌ساتان ب لێشاوا خه‌رجێن تامسار دبین. نزا ئابوورى ناسێن مه‌ چما ژ كه‌ره‌ما خوه‌ ئامۆژگاریا مه‌ ناكن ب چو ته‌ڕزى پارا ب مه‌زێخین هونه‌رێ ژیانێ ل باژێران چیه‌. به‌رگریا مرۆڤى نوكه‌ بوویه‌ ئارمانجا (ركلامێ) چاوا دێ یا خۆڕ بیت. دێ ب چى ره‌نگى ئه‌ڤ تالانكرنا (به‌ریكا) هێته‌ كێمكرن. خوه‌راگرتن به‌رامبه‌رى ڤێ ریكلاما كه‌رسته‌ داریا بێ سنۆر مرۆڤێ ڤى سه‌رده‌مى راستى قه‌ریانا پالسه‌نگیێ بووى د ناڤبه‌را (داهات و خه‌رجى).كه‌سێ شیانا دابینكرنا فاتۆرا هه‌مى ژیانێ نه‌مایه‌.كه‌سێ تاقه‌تا هندێ نینه‌ ڤێرا بگه‌هیت هه‌مبه‌ر لیستا داخوازێن ڤى سه‌رده‌مى پڕ كه‌ت. بێگومان ئه‌ڤ پرسا كوردستانێ ب تنێ نینه‌ ئه‌ڤ پرسه‌ ل ئابوورێن هه‌ره‌ سه‌ركه‌فتى ژى سه‌رهلدایه‌. هیچ سه‌رده‌مه‌كێ هندى ڤى سه‌رده‌مى كه‌رسته‌ دروست و به‌رده‌ست نه‌بووینه‌. هیچ متایه‌ك ژى بۆ سویكێ ناهێته‌ به‌ربازاركرن هه‌تا (كه‌سى) ل گۆر شیان و عه‌مرى نه‌كه‌نه‌ ئارمانجا ریكلامه‌ك خاپینۆك و بریسقه‌دار و پاشى تالانكرنا به‌ریكا كه‌سى و هه‌مى ماندیبوونا وى. ئه‌م فه‌قیرێن (پێدڤێن سه‌ره‌كى) نینین هندى ئه‌م هه‌ژارێن كه‌رستێن نه‌ پێدڤى. هه‌مى مرۆڤایه‌تى یا راستى ڤێ گێژه‌ڤانكێ بووى. ئه‌م تازه‌ ژیانێ ل باژێران دكین نه‌بوویه‌ 50 سال ئه‌م د باژێران دا بژین و هێشتا مه‌ (دو به‌رباب) نین ل زانكۆیا ده‌رچووبن.كلتوورێ گوندى ب هه‌مى شانازێن گوندیاتیێ ڤه‌ رادهێلین پڕكرنا هه‌مى كێماسێن مه‌ بخوه‌ بۆ خوه‌ دروست كرین. ب كورتى دبیت به‌غدا ژى ڤێ بزانیت ئه‌م چه‌ند پیدڤى پارا نین نه‌ دا بژین، به‌لكو دا خوه‌ پێ بخه‌ملینین. ل ڤێرێ سیاسه‌ت ژى تێكهه‌لى ڤێ ئالۆزیێ دبیت. مسۆگه‌ر دێ مووچه‌ دروست بن؟ ئه‌ڤه‌ ئه‌ركێ حوكمه‌تێ یه‌ بكه‌ت. لێ ئه‌م وه‌ك تاك راهاتینه‌ چاوا مووچا بخوین. چ گرنگه‌ چ نه‌ گرنگه‌. ئه‌گه‌ر راست بیت ل سه‌ر به‌ختێ هنده‌ك ژێده‌را دبێژن قه‌بارێ (عه‌مه‌لیات تجمیل) ل كوردستانێ بۆ نێزیك دو سالا(ملیار دۆلاره‌)؟! دبێژن سویكا ته‌له‌فۆنان ل كوردستانێ (سێ) ملیار دۆلاره‌ ؟!و ئێن دى دبیت نه‌هێن گۆتن. ئه‌رێ ئابوور ناسێن مه‌ چ خواندن بۆ ڤێ پرسا نووى هه‌یه‌, ئه‌رێ ئه‌م دشێن ڤێرا بگه‌هین هه‌مى وان كێماسیان پڕكه‌ین یێن ریكلام بۆ مه‌ درست دكه‌ت!؟ یان ژى زڤرین نینه‌ و دڤیا ل ڤى شێوه‌ى رابهێن و بژین وه‌ك سویك سه‌رمایه‌داریا روو دخوازیت. ئه‌رێ مووچه‌ دێ ڤێ ڤالاهیێ هه‌مى پڕكه‌ن.یان (هل من مزید)؟ دێ د ڤێ گێَژه‌ڤانكێ دابین.

12

كۆڤان حسێن
ئه‌و ئاماژه‌یا به‌رێز قوباد تاله‌بانى داى كو ره‌نگه‌ هنده‌ك ل به‌غدا دخوازن (گه‌شا) كوردستانێ راگرن رێز گرتن بۆ هه‌ستێ عیراقیان، ژ من ڤه‌ نه‌یا ڤالایه‌ و نه‌ ژى د ناڤبه‌را (ترانێ و راستیێ) دا هاتیه‌، به‌لكو راسته‌ ئه‌م كودستانێ پڕى كێماسى و كێم دادى و قه‌باره‌كێ گه‌نده‌لیێ تێدا دبینین، لێ ب چاڤ و دیتنا هنده‌كان ل به‌غدا كوردستان ب ژماره‌كا فه‌له‌كى ل پێشیا وان دچیت و ژ ئالیێ ده‌روونى و چاڤ پێنه‌رابوونا سیاسى و زكره‌شیه‌ك مه‌زهه‌به‌. هه‌ر تشته‌كێ بێژن ژ به‌ژنا وان و بیر و لۆژیكێ سیاسیێ وان دوه‌شیت، ژ ره‌خه‌ك دى ڤه‌ ئالیێن سیاسى ل به‌غدا خودان رۆژه‌ك ئاشكرا و راگه‌هاندى نینن بۆ چاوانیا سه‌رده‌ریێ ل گه‌ل پرسا نه‌ته‌وه‌یه‌كا دى(شه‌ریك) د وه‌لاتى دا. هندى من دوویڤچوون كرى و گوهدارى كرى سیاسیێن به‌غدا ل گۆر بازارێ رۆژێ و سۆسیال میدیایێ ل چه‌ند گوشه‌كان، هنده‌ك داخۆیانى هه‌نه‌ ل سه‌ر سه‌مته‌كێ ناراوه‌ستن و هیچ دیتنه‌ك سیاسى زه‌لال بۆ كوردستانێ نینه‌، نه‌ دژایه‌تیا وان زه‌لاله‌ كه‌سه‌ك بێژی دوژمنن و دێ مینن ل سه‌ر ڤێ سه‌لیقا ره‌فتارێ نه‌ژى دۆستن ببن جهێ پشتبه‌ستنێ، كا چاوا هندك كوردستانێ خه‌مسار دبینن كو به‌غدا پشت گوهڤه‌ هاڤێت بوو سالێن بۆرى هه‌مان تشت بۆ هندێ ژى ره‌وایه‌ به‌غدا ژى كوردستان و پرسێن وێ گرنگى نه‌دایه‌ وه‌ك پایته‌ختێ فیدرالى، به‌رپرس ژ هه‌مى وه‌لاتى حه‌ه‌تا كار گه‌هشتیه‌ هندێ ئێدى دیالۆگا سیاسیا ره‌سه‌ن بۆ شه‌ڕێ داخۆیانیا ل میدیایى و ئه‌ڤه‌ مه‌ترسیا جڤاكى ل سه‌ر دروست دبیت. مێژوویا دیالۆگێ ل گه‌ل به‌غدا بۆ سه‌د سالان دزڤریت. ئاریشه‌ك هنده‌ درێژ ئاسێ بووى، هیچ چاره‌سه‌ریه‌ك بۆ نه‌هاتیه‌ دیتن سه‌ربارى هه‌مى ده‌قێن دستوورى و قانوونى. بۆ هه‌ژاریه‌كا سیاسى دزڤریت یان بۆ مه‌رمێن نه‌هێنه‌ گۆتن ڤه‌دگه‌ریێت.
سه‌رئه‌نجام كوردستان بوویه‌ كه‌د وار ب هه‌مى عه‌یبى و كێماسیێن خوه‌ڤه‌ كه‌ساتیه‌كا قانوونى دستوورى، لێ بێ دلى به‌غدا و نه‌ د فه‌له‌كا وێ ئافریه‌. راسته‌ ئه‌ڤه‌ كه‌دا سیاسى و قوربانیا هه‌مى خه‌لكێ كوردستانێ یه‌. لێ قه‌ت ل گۆر پیڤه‌رێن پایته‌ختێ نینه‌. نه‌كه‌ پرسێن سیاسى بۆ ئابوورى هاتینه‌ گوهارتن، سیاسى نه‌شیاینه‌ ژ رویێ سیاسى ڤه‌ پرسێ پالۆسه‌ بكه‌ن راسپاردیه‌ ئابوورێ و ئه‌ڤه‌ ناڤه‌رۆكا پرسێ ئێك لا ناكه‌ت، ژمن ڤه‌ جاره‌كا دى به‌غدا (پارا) ب ئاشێ كوردستانێ دا ناكه‌ت وه‌ك كوردان دڤێت ئه‌گه‌ر هه‌مى مه‌رج و گڤاشتنان ژى قه‌بوول بكه‌ن. چاره‌ ل كوردستانێ یه‌ سیاسى د ڤیا قه‌بارێ وێ بزانن مێژوویا خوه‌ قه‌نج بینن و راستگۆیانه‌ ل گه‌ل خه‌لكێ وه‌ رۆنكرنان بده‌ن. ب خودا بچین ئه‌وا دبێژن چاكسازى و پاكسازى هه‌ر چونه‌ بیت نیڤا وێ بهێته‌كرن خوه‌ژینیا ئابوورى بئافریت و و بازارى دێ به‌لانسا خوه‌ وه‌رگریت. گوهۆرینا رێره‌وا پرسێ ژ سیاسى بۆ ئابوورى ل گه‌ل به‌غدا به‌رهه‌ڤیێن جڤاكى و سیاسى بۆ دڤێن و لۆژیكه‌كێ تازه‌یێ سه‌رده‌ریێ دڤێت. بلا ئارمانج بمینن بنه‌جه، لێ تاكتیكا سه‌رده‌ریێ د دگوهۆرینێ دابیت ل گه‌ل سویكێ سویكا سیاسى ئانكو رایا گشیا شه‌قامێ سیاسى ل عیراقێ راستى گرێكه‌كا ده‌روونى بوویه‌ ده‌رحه‌ق كوردستانێ و دڤیا به‌رگا وێ ره‌نگڤه‌دانێ بكه‌ین.

21

كۆڤان حسێن
مێژوویا پڕه‌ ژ سه‌رهاتێن رى جه‌رك بر ژ شه‌ران و كوشتنێ، بریارا شه‌رى وه‌ختا دهێته‌دان، تازه‌ سیاسى بۆ ل هنده‌ك سه‌رده‌مێن لۆژیكى و به‌رئاقل دگه‌رهن، بریارا شه‌ڕى ژ ناخه‌ك ئالۆز سه‌رچاڤه‌ دگریت، سه‌ده‌مێن به‌رئاقل بۆ هیچ شه‌ڕه‌كێ نینن، لێ ره‌نگێ شه‌ڕى هنده‌ك پرسێن دى دئافرینیت، شه‌ڕێ ب ئاگرى و ئاسنى.كه‌ڤنه‌ بۆ كه‌ڤنیا مرۆڤان و هه‌روه‌سا وه‌ك ده‌رهاڤێژتا شه‌رى، شه‌ڕى برسیكرنێ یه‌ كو بۆ سه‌رده‌مێن كه‌ڤن و چه‌رێ ناڤین دزڤریت و هه‌تا نوكه‌ ژى وه‌ك ئالاڤه‌ك بۆ هنده‌ك كه‌فتنا یان هنده‌ك (تنازلاتان) دهێته‌ بكارئینان، لێ نوكه‌ ب ناڤێ (نه‌ته‌وه‌ێن ئێكگرتى) و سازێن جودا جودا دهێنه‌كرن، لێ مێژوو وه‌سا دیار دكه‌ت كارێگه‌رترین شه‌ڕ و ب باندۆرترین چه‌ك برسیكرنه‌ بۆ شكاندن و هه‌رسپێكرنا زۆره‌كا مله‌تان بۆینه‌ قوربانى. نه‌ك ژ نه‌زانینا خوه‌ یان ژ خیانه‌ت و عه‌والیا خوه‌ نه‌ك ژ بێ مۆرالیا خوه‌. ب تنێ ژ برسا؟! ئانكو وه‌ختا مرۆڤى نه‌یاره‌كێ وه‌سا هه‌بیت هه‌مى ره‌نگێ چه‌كى بكاربینیت. ره‌نگڤه‌دانا وێ ل سه‌ر لایه‌نێ لاواز راسته‌ دۆمدرێژ باندۆرێ دكه‌ت، لێ قه‌ت ئه‌و بریار و تنازلێن ژ برسا دا كرین. ئانكویا وێ ئه‌و نینه‌ ئه‌و ل لایێ هه‌لیێ دولاینه‌یا شه‌رى بوویه‌. دۆرپێجكرنا مله‌تان ب برسیكرنێ د نوكه‌ دا بۆ هنده‌ك مه‌رامێن سیاسى یان بۆ لادانێ ژ بنه‌كۆكا برسێ، هه‌تا سه‌رى نه‌خاریه‌، هه‌مى ئه‌ورۆپى رێكه‌فتن پشتى جه‌نگا جیهانیا ئێكێ ئه‌لمانیا سزا بده‌ن ب برسیكرنێ و بێ بهاكرنا ئابوورێ ئه‌لمانیا. لێ سه‌رئه‌نجام (نازى) ئافرین وه‌ك ئاگرى به‌ربوون گیانێ جیهانێ. بۆ كوردستانێ ئابلۆقه‌ و برسیكرن تشته‌كێ نوى نینه‌ ئه‌ڤا عێراق بووى ده‌وله‌ت هه‌تا نوكه‌ كوردستان د بازنێ ئابلووقێ دایه‌ ئه‌ڤ چه‌ند سالێن دووماهیێ نه‌بن. لێ ئه‌وژى ل بن گڤاشتنا جڤاكێ نێڤده‌وله‌تى دا یه‌. ب كورتى یا نوكه‌ عیراق دكه‌ت ب نه‌فه‌سه‌ك نه‌ژادپه‌رستى و مه‌زهه‌بى دكه‌ت بۆ لاوازكرنا كوردستانێ یه‌. ئه‌گه‌ر چى ل كوردستانێ ژى تێرا خوه‌ عه‌یبى و گه‌نده‌لى و پرسێن ژ ڤى ره‌نگى هه‌نه‌ وه‌ك ل هه‌مى جیهانێ هه‌ین. ده‌ستبرن بۆ نانێ خه‌لكێ ب ئاشكرا. ئه‌ڤه‌ بریاره‌كا پێِشوه‌خت و ڤه‌خواندیه‌ هیج په‌یوه‌ندێه‌ك ب قانوونا دستووران ڤه‌ نینه‌, نه‌ بۆ كوردستانێ بۆ هه‌ر جهه‌كێ ڤێ جیهانێ سیاسى نانى وه‌ك چه‌ك بكاربینن, ئه‌ڤه‌ داوه‌شینه‌كا ره‌وشیه‌ و لاوازیه‌كا مه‌زنه‌ بۆ سیاسیان وه‌ختا ڤێ كارتێ ژ لاوازیا هێزا قانوونان و دستوورى وه‌ك شوینگر بكاربینن. دبیت هنده‌ك مله‌ت هه‌بن خالا وازا وان جوگرافیا وان بیت.لێ هیچ مله‌ته‌ك ژى بۆ ده‌مه‌ك درێژ ژ ئه‌نجامێ شه‌ڕێ دۆرایێ خوه‌دا ژ برسا دا, هه‌تا رازى نابیت نه‌خاسم ده‌ما تێر بیت. ئانكو عیراق ره‌نگه‌ بشێت ژ برسان دا هنده‌ك پرسا قازانج كه‌ت لێ قه‌ت كوردان وه‌ك مله‌ت قازانج ناكه‌ت، برسیكرن سیاسه‌ته‌كا كه‌ڤنا عێراقێ یه‌ و هه‌تا نوكه‌ ئه‌نجام ئه‌و نه‌بوویه‌ یا دڤیا ئه‌وه‌ كورد د ستبه‌ردارێ خاك و شووناس و شانازیا خوه‌ بیت, سه‌رده‌مێ پاد شاهى هه‌تا نوكه‌ ب قه‌بارێن جودا جودا كوردستان برسیكریه‌, ئه‌رێ ڤیجارێ دێ بۆ چیته‌ سه‌ر.

6

كۆڤان حسێن
ل سه‌ر ئاستێ تاكه‌كه‌سى ژى ئه‌گه‌ر هنده‌ك مایێ و دوى دا نه‌كن ئه‌وێ خودانێ پرسێ دبیت ل به‌رچاڤ رۆنتر رێكه‌كێ به‌ته‌ پرسا خوه‌ و ل سه‌ر ئاستێ جڤاكى ژى وه‌ك دبێژن پرانیا ئاریشێَن نوكه‌ ل دادگه‌هان پشكه‌ك بۆ مایتێكرنا وان كه‌سان دزڤریت یێن دشیان مایێ خوه‌ تێنه‌كه‌ن. خونیشاندان و حوكمه‌ت ل هه‌مى جیهانێ پیجه‌كا ئازادیى هه‌بیت. د هه‌ڤكێسه‌كا نازك دا دبۆرن ل ره‌خه‌كێ خوه‌نیشادان مافه‌ ل ره‌خێ دى پاراستنا ئارمیێ ب گشتى ئه‌ركێ سازیێن حوكمه‌تێ یه‌ ل گۆر گرێبه‌ستا جڤاكى. كێمن خوه‌نیشادانێن ده‌ست ل پشت نه‌بن. به‌لێ چ ده‌ست چونكو یان حزبه‌ك یان سه‌ندیكایه‌ك یان گرۆپه‌ك یان هه‌ر كۆمه‌كا مرۆڤان پێرادبن. ئه‌ڤه‌ یا نۆرماله‌. هه‌تا نوكه‌ ده‌ستێ ده‌ره‌كى نه‌هاتیه‌ پێناسه‌كرن و دوور نینه‌ ژى هه‌بیت و دوور نینه‌ ژى نه‌بیت. لێ سه‌ربۆر وه‌سا دیار دكه‌ن ل ڤێ ده‌ڤه‌را مه‌ ب گشتى ماتێكرن كلتووره‌كێ باوه‌. ئه‌گه‌ر هیچ خۆنیشاندانه‌ك ژ یێن (سووریا و لیبیا و یه‌مه‌نێ) خورسك و حه‌قتر نه‌بوون. لێ ژ ئه‌نجامێ ماتێكرنا خه‌لكێ دى یان ده‌ستێن دى ئه‌نجام دیاره‌ ب چ كاره‌ساتێ گه‌هشتن. مافێ خوه‌نیشادانێ، مخابن بو خودان مافان ناهێلێت هێلان هه‌تا مماره‌سا مافێ خوه‌ بكه‌ن وه‌ك دیار. ئه‌ڤه‌ بۆ كێم ره‌وشه‌نبیریه‌كا سیاسى و بێ ستراتیژیا سیاسێن كوردستانێ دزڤریت. بۆچى حزبه‌ك ئه‌گه‌ر د ڤێ خوۆنیشادانێ دا بكه‌ن بۆچ ئه‌و د بن ناڤ و ئالا و درووشمێ خوه‌ڤه‌ ناكن؟! بۆچى سیارى خوه‌نیشادانێن (ماف خازى خزمه‌تگوزارى) دبن.؟ ئه‌ڤ سیاسه‌تكرنا سیبه‌رى نه‌ زه‌لال هنده‌ك بها بێ رامان كرینه‌. خوه‌نیشاندان مافێ هه‌ر كه‌سێ و هه‌ر ئالییه‌ و د ئه‌نجامدانێ دا ژى ڤێت ژێكجێواز بن چ خوه‌نیشادانیِن سیاسى نه‌ چ مافخازى نه‌؟! یێن سیاسى ماشا‌و لله ل كوردستانێ مه‌ تێرا هندێ حزبێن ده‌ستووردای هه‌نه‌ سیاسه‌تێ ئاشكرا و ئازاد دكه‌ن. بۆ هه‌مى حزبان سوواربوونا ل داخوازێن رۆژێ یان پرسێن ژیانه‌ڤانى بخوه‌ ژ بها و سه‌نگا خوه‌ كێم دكه‌ن. حوكمه‌تێن جیهانێ هه‌میان به‌رامبه‌ر خووه‌نیشاندانان ره‌نگه‌كێ حساسیێ یێ هه‌ى، نه‌خاسمه‌ پرانیا خونیشادانا گرژى دروست دبیت هه‌ر چه‌ده‌ نۆرماله‌، لێ نه‌ گه‌هیته‌ راده‌یا قوربانیان. ئه‌رێ پرسێن كوردستانێ دێ ب خوه‌نیشادانا سه‌ر راست و چاره‌سه‌ربن.ب دیتنا من ئه‌گه‌ر پیجه‌ك هیڤى ژى هه‌بن دێ خۆنیشادان پرسێ چاره‌سه‌ر كن ل وێ باوه‌رێ مه‌ حزبێن كوالسیۆنا حوكمه‌تێ بخوه‌ دا خونیشادانا كه‌ن و ئه‌و مه‌یدانه‌ بۆ یێن دى و ده‌ستێن ده‌ره‌كێ نه‌ دهێلا.خوه‌نیشادان دژوار ژى بن، رێك دچیتێ لێ چه‌كدار بن وى ده‌مێ هه‌مى قامووسا سیاسى رادوه‌ستیت بۆ پێناسه‌كا دیتر و ئه‌ڤه‌ پرسه‌كا دیه‌، قه‌ت دڤیا ژ مافخازى و پرسێن ژیانێ بێته‌ ڤاڤارتن. ئه‌ڤجا ده‌ستێن ده‌ره‌كى د بیانى نینن ل ده‌ڤه‌را رۆژهه‌لاتا ناڤێن ئانكو زۆرن و هه‌نه‌ و كاریگه‌رن، به‌لكێ هشیاریا سیاسى و ئاستێ سه‌ره‌ده‌ریا سیاسیى و یاساى دڤیا پرسا ژێكجودا كه‌ت، سیاربوون ل هه‌ر پێله‌كا نه‌رازیبوونێ بۆ مه‌رمێن سیاسى ج حزبه‌ك وه‌سا بیربكه‌ت، بێگومان وێ ئاریشێن بنگوهین د سازیا خوه‌ وه‌ك حزب دا هه‌نه‌ ل سه‌ر ئاستێ جه‌ماوه‌رى و هه‌ر حوكمه‌ته‌ك ژى خوه‌نیشادانێ ب مه‌ره‌ما دژایه‌تیێ پێناسه‌كه‌ت، سه‌ده‌م و ئامرازێن وێ نه‌ خوینیت زیانێ ل ناڤوبانگێ خوه‌ و پرۆسا سیاسى دكه‌ت..

29

كۆڤان حسێن
د ڤىَِ سالا بۆرى دا، هه‌ر چه‌نده‌ جیهان هه‌مى مژوولى پرسا كۆرۆنایێ بوو، لێ قه‌د پرسێن سیاسى و ئالۆزێن جیۆسیاسى ل جیهانێ بهایێ خوه‌ ژ ده‌ستنه‌دان، د ماوه‌یێ ساله‌كێ دا سێ هه‌ریمێن نیمچه‌ سه‌ربه‌خوه‌ و نێزیك سه‌ربۆرا هه‌رێما كوردستانێ ب بریار یان ب شه‌رىِ د ناڤ بێده‌نگیا جیهانێ دا، ژناڤچوون و خه‌باتا سیاسیا خه‌لكێ ڤان هه‌رێمان راستى كاره‌ساتێ هات. (كه‌شمیر) ل هندێ و (تیغراى) ل ئه‌سیۆبیا (كاره‌باغ) ل ئازه‌ربێجانێ). هه‌ر كه‌سێ ژ ره‌وشا ڤان هه‌رێمان ئاگه‌هدار بیت و هوور ل ره‌وش و مێژوویا وان بزانیت، دێ بۆ دیار بیت، هێشتا جیهانێ گه‌له‌ك نه‌ته‌وه‌ و مله‌ت هه‌نه‌ بووینه‌ قوربانى مێژوویێ یان سیاسه‌تا زلهێزا. ژناڤچوونا سێ هه‌رێمێن فیدرالى، یان نیمچه‌ سه‌ربه‌خوه‌ چ په‌یامه‌كه‌ پشتى شه‌ڕێ سارێ جیهانێ و ئه‌نجامێ جیهانگێرى و شۆره‌شا ته‌كنولۆجیایێ و سه‌رده‌مێ مافێ مرۆڤان دا. هێشتا مله‌ت هه‌بن راستى كۆمه‌لكوژى و سرینێ بن. ب تنێ چونكو ژ نه‌ته‌وه‌یێن سه‌رده‌ست جودانه‌. ڤان هه‌رێمان هندى بێژى ئاریشه‌ ل گه‌ل پایته‌ختێن خوه‌ هه‌به‌ونه‌. لێ ئاریشێن سیاسى و ژ ئه‌نجامێ نه‌بوونا كیانه‌كێ وان بپارێزیت، هنده‌ك ب شه‌ڕى و هنده‌ك ب بریاره‌كا سیاسى ژ ناڤچوون و ده‌رگه‌هه‌كێ سه‌ختێ قوربانیێ سه‌رژنى بۆ دوباره‌ خه‌باته‌كا ژ شێوه‌كێ دى ڤه‌كر. ئه‌ڤه‌ هندێ دیار دكه‌ت نه‌ته‌وه‌یێن سه‌رده‌ست د كیانه‌كێ فره‌ئاین و نه‌ته‌وه‌ دا هه‌مى گاڤێ دیمۆكراتیانه‌ بیرناكه‌ت و سوودێ ژ هه‌ر ده‌رفه‌ته‌كێ دبینیت بۆ ئێكلاكرنه‌كا دراماتیكى بێ ل به‌ر چاڤگرتنا حه‌ز و شكۆمه‌ندیا مله‌تێن ئازادیخواز. ئه‌رێ بۆ كوردستانێ ئه‌ڤه‌ وه‌ك زنگا مه‌ترسیێ نینه‌, ئه‌رێ ل به‌غدا ئاشكرا نابێژن هه‌رێما كوردستانێ زێده‌یه‌؟ ئه‌رێ ئه‌گه‌ر جیهانێ پشت ل كوردستانێ كر جاره‌نڤێسێ كوردستانێ دێ دبیت. ئه‌رێ ما ڤان هه‌رێمان ژى (گاز) هه‌بوو؟! ئه‌رێ ژ راست پرسا كوردستانێ ل گه‌ل نه‌ته‌وێن سه‌رده‌ست پرسا ئابوورى و گازێ یه‌؟ یان پرسا ئاخێ و شۆناسێ خوه‌یه‌ ل سه‌ر ئاخێ؟. هه‌رێما كوردستانێ ب هه‌مى عه‌یبێن خوه‌ڤه‌ سه‌ربۆره‌كا سه‌ركه‌فتى و نموونه‌یه‌ ل ڤێ ده‌ڤه‌را پڕى ئاریشه‌ دا. لێ ئاریشه‌ ل به‌رامبه‌ر دایه‌, كى هه‌ڤڕكێ سیاسیێ كوردایه‌ ل عیراقێ سه‌د سال بۆرین و هێشتا پرسا دو نه‌ته‌وه‌یان ل وه‌لاته‌كێ دا ب چ سیسته‌مان بنه‌جه و مكم نه‌بوویه‌. ئاستێ هه‌ڤركیا كوردستانێ ل گه‌ل به‌غدا هه‌مى قووناغێن شه‌ڕى هه‌تا كیماوى و نوكه‌ ژى برسیكرن ده‌رباس كرینه‌.چ ئاسۆیه‌ك هه‌یه‌؟! كى زامنه‌ به‌غدا پڕانیه‌كا سیاسى وه‌ك كه‌شمیرێ ب دووماهی نه‌ئینیت؟! یان كێ زامنه‌ بۆ هه‌تا هه‌تا ده‌رفه‌ته‌كێ دا وه‌ك تیغراى راستى هێرشه‌كا سه‌ربازى نه‌بیت یان كێ زامنه‌ وه‌ك كرباغێ راستى فه‌رمانه‌كا دى تالانكرنێ نه‌بیت, هێشتا سێ نه‌ته‌وێن سه‌رده‌ست نه‌هاتینه‌ وى ئاستێ هه‌بوونا كوردان قه‌بوول بكه‌ن. یا دى هه‌مى رووكه‌شى و بهانه‌نه‌ ب كوردستانێ دگرن؟!. ئێگرتن و خوه‌سازان و خوه‌ژیانكرن بۆ موده‌هه‌كێ زامنێ مان و به‌رده‌وامیا كوردستانێ یه‌..چیروك درێژه‌…!

16

كۆڤان حسێن
باوه‌ر ناكم پرسه‌كێ ژ پرسا مووچا پتر خواندن و شرۆڤه‌ بۆ هاتبن كرن، بگره‌ ژ مادا 140 پتر (تنزیر) و مزایده‌ و شرح و هۆكار و ئه‌نجام و مه‌رم هه‌مى هاتینه‌ گۆتن و سه‌رئه‌نجام، ئه‌وه‌ جارێ نوكه‌ كوردستانێ خاله‌كا لاوازه‌ بۆ په‌یدابووى و نه‌یارێن وێ یێن سیاسى ب گرانى دژى كوردستانێ بكاردئینن، ئابوور نه‌ تنێ مووچه‌ هه‌تا موده‌هه‌ك دى ژى دێ چه‌كێ به‌غدا بیت دژى كوردستانێ. ب كورتى ئه‌ز ژى ل گه‌ل وێ بۆچوونێ مه‌، كوردستان نه‌فتێ و (ته‌حینا ئامێدیێ) ژى بده‌ته‌ به‌غدا، به‌غدا بۆ هنده‌ك مه‌ره‌مێن سیاسى جاره‌كا دى هه‌یڤێ (ملیار دۆلاران) ب ئاشێ كوردستانێ دا ناكه‌ت، باشترین حاله‌ت ئه‌وه‌ یا نوكه‌ دبۆریت، ئانكو پیچه‌كا كێم ژ به‌غدا و یا دى كوردستانى دابین كه‌ت. قه‌ت پرسا مووچا یا ساده‌ و بێگونه‌ه نینه‌ ژ هه‌ڕماندنا سیاسى. كێ ژ ده‌رڤه‌ى ڤێ ژێ بیر كه‌ت ب راستى گه‌مژه‌یه‌كا سیاسى یه‌. لۆژیكه‌ت نه‌ژادپه‌رستێ مه‌زهه‌بى و فاشل و ب شیان ل به‌غدایه‌ حالێ حازر. هیچ به‌رچاڤ رۆنیه‌ك بۆ پرسا كوردى نه‌ك هه‌ر نینه‌. ئه‌گه‌ر بشێن دێ ئینكارا هه‌بوونا كوردان كه‌ن وه‌ك جارا ئاماژێ ژى بۆ دده‌ن. هه‌مى ئاره‌سته‌ بۆ هندێ یه‌ كوردستانى راستى هه‌ره‌سكێ بیت و د ناڤ خوه‌دا نه‌ره‌حتى و نه‌ ئارامى دروست بیت و ژ ئه‌نجام هه‌رفتنا سه‌ربۆره‌كا كوردستانى یه‌. كو بوویه‌ جهێ سه‌رگێژیێ بۆ سێ نه‌ته‌وه‌ێن مه‌زن ل ئاسیا بچویك. ژ بلى كه‌س دبن گڤاشتنێ ڤى بیر كه‌ت، به‌رفرهه‌تر ب كورتى نه‌هێلانا هه‌رێمێ یه‌. لێ ب هنده‌ك فاكته‌رێن نه‌رم. ئه‌گه‌ر نه‌ عیراق فاشلترین وه‌لاته‌ و گه‌نده‌لترین وه‌لاته‌ و پیسه‌ وه‌لاته‌ و نه‌ئارام ترین وه‌لاته‌ ل هه‌مى ئاسته‌كێ جیهانێ عیراق ژ ده‌رڤه‌ى هه‌مى پیڤان و ئاسته‌كێ و پرسا نه‌ زلالیى ژ كوردستانێ دكه‌ت. راسته‌ كوردستان ژى نه‌ك سۆیسرا یه‌، لێ به‌رامبه‌ر عیراقێ پیڤان نینه‌ كو 100 ساله‌ ده‌وله‌ت و چار ملیۆن برمیل گازێ دفرۆشیت؟! ژبلى چاكسازیێ و نه‌حوكمه‌ت ب تنێ، به‌لكو ل سه‌ر ئاستێ تاكێ كورد ژى دڤیا بیر ل هندێ بهێته‌كرن. خه‌رج و داهاتێ تاكى بێته‌ سه‌رژنوى دارشتن، هه‌ر ماله‌كێ سیاسه‌ته‌كا ئابووریا ساخله‌م هه‌بیت. نه‌ به‌رئاقله‌ ئه‌م د قه‌یرانێ دا بین و نێزیك (ملیار) دۆلاران (سویكا عه‌ملیات تجمیل) هه‌بیت؟! نه‌ به‌رئاقله‌ ئاستێ سویكا (مۆبایلان) سێ ملیار دۆلار بن و كوردستان د قه‌ریرانێ دا؟! چاكسازیا حوكمه‌تێ، ب تنێ به‌س نینه‌. ئه‌م ژى پێدڤى ب هه‌نه‌ره‌كێ دى نه‌ چاوا ل باژێرا بژین چاوا پارێن خوه‌ بمه‌زێخین لیستا پێدڤى و (كمالیاتان) دروست بكه‌ین. حوكمه‌ت دێ شێت هنده‌ك ده‌رگه‌هێن گه‌نده‌لیێ گریت، لێ مه‌ ئاریشه‌ یا هنده‌ك جهێن دى هه‌نه‌ وه‌ك ل مال، مه‌ ئاریشه‌ هه‌یى. بسپۆر و شاره‌زا ژ من ڤه‌ دڤیا ل ڤى وارى ژى رۆلێ خوه‌ بینن..

17

كۆڤان حسێن
ماكینه‌ك میدیا یا مه‌زن وه‌سا كار دكه‌ت كو كورد گازێ راده‌ستى به‌غدا ناكه‌ن، وه‌ك روكه‌ش دبیت بهانه‌كا درست بیت، لێ د ناڤه‌رۆك دا، پرس قه‌ت پرسا گازێ نینه‌، ئابوور ژماره‌نه‌ و ئاسانه‌ پشتى لێكدان و ژێبرنێ هه‌ر ئێك بگه‌هیته‌ مافێ خوه‌، لێ بابه‌ت كارتا گڤاشتنێ یه‌ و چه‌كه‌كێ ب هێزه‌ بۆ ژماره‌كا (تنازولاتان) هه‌كه‌ (مووچه‌) و (بۆدجه‌) ببیته‌ (چه‌ك)، ل ڤێرێ سه‌ره‌ده‌رى دڤیا هندا ساولێكه‌ نه‌بیت، زویكا (چه‌كێ) خوه‌ راده‌ست بكه‌ت، ب هیڤیا قه‌ده‌ر و (میزاجى) ڤه‌. ئاماژه‌ زۆرن كو دێ مووچه‌ و بۆدجه‌ وه‌ك چه‌ك بۆ گه‌له‌ك پرس و بابه‌تێن دى یێن سیاسى هێته‌ بكارئینان. هه‌تا راده‌یا هه‌لوه‌شاندنا هه‌رێما كوردستانێ و دوباره‌ داگیركرنا كوردستانێ. ئه‌ڤه‌ خوه‌ پرساندن نینه‌. هه‌ر كه‌سێ ژ نێزیك ڤه‌ چاڤدێریا گۆتارا سیاسیا شیعه‌یێن نوكه‌ ده‌سه‌لاتدار بكه‌ت، دێ دیار بی باشترین كوردستان د چاڤێ وان دا كوردستانا عیراقێ وه‌ك (رۆژهه‌لاتێ) بیت. شیعى ئاشكرا پوشمانى وان هه‌مى مافانن كو د ده‌ستوورێ عیراقێ دا بۆ كوردان دیار كرین و هه‌رێما كوردستانێ ب (تشته‌ك) زێده‌ و بارگرانى دزانن بۆ عیراقێ وه‌ك نه‌ته‌وه‌یه‌كا ده‌سته‌لاتدار كوردان گه‌ڤ دبینن ل گۆر دیتنا ئیران و توركیا. هه‌بوونا كیانه‌ك كوردى ب ڤى ره‌نگى هه‌یى، قه‌ت جهێ خوشحالیا كه‌سێ نینه‌ و باشترین چه‌ك برسیكرن و ڤالاكرنا كوردستانێ یه‌ ژ هه‌مى رامانه‌كا سیاسى. هه‌مى كێماسى و خرابیێن ده‌ستهه‌لاتا كوردى نوكه‌ دكه‌نه‌ بهانه‌ و ب ده‌رفه‌ته‌كا زێرین دزانن وه‌سا دیار بكن كوردان شیانا خوه‌ ئیداره‌ دانێ نینه‌. بێگومان كوردستانێ كێماسى هه‌نه‌ و چاكسازى و بخوه‌ دا چوون چاره‌كه‌ ژ چاره‌سه‌ریان. لێ قه‌ت تێرا هندێ نینه‌ جاره‌كا دى كوردستانێ ئه‌و ئیداره‌ بده‌ن و بزڤرن داگیركاریا راسته‌وخوه‌. هیچ وه‌لاته‌ك بێ كماسى نینه‌ و پاشى كوردستانێ سه‌ره‌راى كێماسێن خوه‌ سه‌ربۆره‌كا زۆرا سه‌ركه‌فتى ژ داگیركه‌ران دروست كریه‌. برسیكرن و ئابلۆقه‌دان زیزكرنا خه‌لكێ. هه‌كه‌ سه‌رگرت كورد پێدڤى سه‌د سالێن دى نه‌، هه‌تا بزڤرن یا نوكه‌ هه‌یى. لۆژیكێ نوكه‌ ل به‌ندا لوژیكه‌ك خومالى نینه‌ هیچ حزبه‌كا عیراقى پرۆژه‌كێ سیاسى بۆ چاره‌سه‌ریا پرسا كوردى نینه‌، ب هیج ره‌نگى و ده‌ستوور ژى نه‌ك هه‌ر پیرۆز نینه‌، به‌لكه‌ پوشمانێ نڤیسینا وى نه‌. كه‌س و مله‌تێن برسیكرى درست و ل سه‌ر خوه‌ بیرناكه‌ن هه‌تا تێربن و پاشى دێ هه‌ست ب قه‌بارێ ده‌رده‌سه‌ریا خوه‌ كه‌ن. هه‌ر بریاره‌كا مله‌ته‌ك ژ برسا یان ل بن گڤاشتنان بده‌ت، قه‌ت به‌رده‌وام نابیت و نموونه‌ زۆرن ل جیهانێ. ئاریشا كوردستانێ ئه‌وه‌ سه‌ره‌ده‌ریێ ل گه‌ل هنده‌ك نشتمانێن خوه‌ یێن بیێ دیتنا سیاسى دكه‌ت. ب كورتى به‌غدا ب (عاقلێ ترك و فارسا) بیر دكه‌ت. ژ دووماهیێ ڤه‌، هه‌تا (ئه‌مریكا و جیهانا رۆژئاڤا) ل كوردان خودان بیت. دبیت ئه‌نفال نه‌بین ڤه‌. لێ ب نه‌مانا وان. (گازێ) و هه‌میێ ژى بده‌یه‌ به‌دغدا حالى مه‌ ژ حالێ كوردێن باكۆر و رۆئاڤا باشتر نابیت، ئه‌گه‌ر ئه‌نفال نه‌بینه‌ڤه‌..

10

كۆڤان حسێن
ئه‌گه‌ر چى هێشتا دۆستێ كوردان یێ بێ به‌رژه‌وه‌ندى و بتنێ هه‌ر چیانه‌. لێ ل ڤى جیهانێ كوردان تیرا بنده‌ستى و چه‌وساندنا خوه‌ تێرا مه‌حرۆمكرنێ ژ هه‌بوونا خوه‌ تێرا ئینكارا خوه‌ هند نه‌یار و دوژمن هه‌نه‌، نه‌كو پێدڤى ب چ نه‌یارێن دى نینه‌، به‌لكو هه‌ر كه‌س و لایه‌نێ دژایه‌تیا كوردان نه‌كه‌ت. مه‌رج نینه‌ دۆست بیت لێ یا ژ ئه‌وه‌ پال نه‌دین خانا نه‌یاران. جیهانا رۆژئاڤا و فره‌نسا ب تایبه‌ت من گرتى دۆستێ كوردان نینن و هیچ بۆ كوردان نه‌كریه‌ ل ڤى سه‌رده‌مى، نه‌ك به‌رێ ئه‌رێ مه‌ خێره‌ بكه‌ینه‌ نه‌یارێن خوه‌. ئازراندنا هنده‌ك بابه‌تێن ب هه‌ستێن ئولى و باوه‌رێن مرۆڤان ڤه‌ گرێداى راسته‌ بۆ مه‌ ب ئازارن، لێ قه‌ت ژ خانا هه‌ڤركیا زلهێزان و پاوانكرنا سیاسه‌تێ ناچن ده‌ر. قه‌ت شه‌رێ پیرۆزیان نینه‌ وه‌ك هنده‌كا دڤێت وێنه‌بكه‌ن و له‌شكه‌ر كێشیێ بۆ بكه‌ن. یاریكرنه‌ ب هه‌ستێن مرۆڤان و ب باوه‌رێن مرۆڤان سه‌ده‌م سه‌رده‌مێ شه‌رێن ئولى نینه‌، ئه‌گه‌ر كورد كه‌سێ ژ خوه‌ كێمتر نابینن. هه‌ر ئه‌ڤ هه‌ڤڕكه‌ بوون ژ هه‌ر دو ئالیان كورد دابه‌ش و بێ ده‌وله‌ت كرین. پیرۆزێن مه‌ ب سه‌رێ خوه‌نه‌. لێ بوون و قه‌بوولكرنا مه‌ بۆ هه‌مى ئالیان مه‌حه‌كه‌ ئه‌گه‌ر راست ئه‌م ژ جیهانا ئیسلامێ نه‌. شین و جهێ مه‌ لڤێ جیهانێ چیه‌؟! ئه‌م جنه‌.ئه‌م ئه‌ركێ خوه‌ وه‌ك موسلمان قه‌نج دزانین یا نه‌هاتى زانین (مافه‌) كو نه‌ ئه‌ردوغان و هاو ئاوازێن وى. نه‌ ژى فرنسا تانوكه‌ هند زه‌لالى تێدا نینه‌ بێژن مافێ كوردایه‌ جارێ هه‌ر هه‌بن یان هه‌نه‌.هندى هه‌ى یال ل كوردستانا عێراقى هه‌ى كو به‌رهه‌مێ كاروانه‌كێ مه‌زنێ قوربانى و خوینێ بویه‌.راسه‌ فرنسا ژ ده‌رگه‌هێ مافێ مروفا فه‌ وه‌ك دلوڤانى هاو سوز بویه‌.لێ فرنسا ب ده‌هان وه‌لات بو خه‌لكێ درس كرینه‌ ل ئه‌فریقیا و اسیا لاتینا ئه‌مریكى.بو كوردا لایه‌نه‌كێ سایكس بیكو بویه‌.فرنسا ب راستى ێرا هندێ هه‌لویست پشتى شه‌رێ جیهانیێ دویێ هه‌نه‌ كورد سوپاسیا وێ بكه‌ن لێ وه‌لاتێن بناف ئیسلامى و نه‌مازه‌ ئیسلاما سیاسیا نوكه‌ بانگا شه‌رێ ئولى ده‌كه‌تن جى هه‌یه‌ هه‌تا كورد هه‌فسوز بن دگه‌ل دا.شه‌رێ باوه‌ریا نینه‌ شه‌رێ به‌رژه‌وه‌ندیایه‌ و شه‌رێ گاز و پاوان و جیوسیاسیایه‌,ئازراندنا پرسێن هه‌ست یار.كه‌س تێدا سه‌ركه‌فتى نینه‌.ئه‌ف شه‌ره‌ هنده‌ كه‌ڤنه‌ زكێ ئاخێ ژ قوربانێن وێ پره‌.قه‌ت شه‌رێ ئاسمانى نینه‌ شه‌رێ هندێ یه‌ هنده‌ك ل ئاخێ پێ بخون و قه‌له‌و بن.پیروزێن ئیسلامێ د وژدانا كوردا دا نه‌ك پاراستى و به‌رێز و ب حورمه‌تن به‌لكه‌ به‌شه‌كێ ژیان و كلتورێ مه‌یه‌.یاریكرن بڤى هه‌ستى ب ژانه‌ لێ.هه‌مى گاڤێ بو ئازراندنێ هنده‌ك هه‌نه‌ ئاگرى هه‌لكه‌ن.لێ ره‌نگڤه‌دان دڤیا وه‌سا بیت ئه‌وێن مه‌رم ژێ هه‌س ب كێماسیێ بكه‌ن.نه‌ك گشتیا خه‌لكێ.ب كورتى كورد شانازه‌ ب ئیسلاما خوه‌.هه‌ر جه‌نده‌ ئیسلامى و وه‌لاتێن ئیسلامى به‌رامبه‌ر كوردا خه‌م سار و بێ هه‌لویستن تانوكه‌ژى.لێ كورد بوكه‌سێ دڤیا هیج نه‌یاره‌ك دى لخوه‌ زیده‌ نه‌كه‌تن نه‌یارێن كوردا ێن بناف ئیسلامى تێرا مه‌ هه‌نه‌؟؟!!

5

كۆڤان حسێن
ڤان رۆژان پرۆژه‌كێ كه‌ڤن نووى دبیته‌ ڤه‌، لێ هێشتا هه‌مى گۆشێن وى زه‌لال نه‌بووینه‌، ئه‌و ژى هه‌رێما سونه‌یێن عه‌ره‌به‌، گه‌له‌ك خواندن بۆ دهێنه‌كرن، ئه‌رێ ب راستى ئه‌ڤ بیردۆزه‌ دێ سه‌رگریت؟، سه‌ركرده‌یێن عه‌ره‌بێن سونه‌ تێرا هندێ ئێك دیتن و بۆچوونن، ئه‌ڤه‌ ل ده‌مه‌كێ یه‌ كو ب تنێ ل سالا2005 ئه‌و دژى هه‌ پرۆژه‌كێ فیدرالى بوون ل عیراقێ، وه‌ك دیار ئه‌ڤ عیراقه‌ ب ڤى ره‌نگى نامینیت ئه‌گه‌ر پارچه‌ نه‌بیت ل باشترین ره‌وش دا، دێ هنده‌ك هه‌رێمن دى سه‌رهلده‌ن وه‌ك هه‌م ره‌نگڤه‌دان بۆ شێوه‌یێ حوكمرانیا شیعه‌یان، كو ب راستى نه‌شیان ده‌وله‌تێ برێڤه‌ببه‌ن، بوونه‌ سه‌ده‌ما هندێ سونه‌ پێشوازیا داعشێ بكه‌ن و كورد رێفراندۆمێ بكه‌ن و نوكه‌ شیعه‌ ئه‌وێن نه‌ د بن باندۆرا ئیرانێ دا ڤێ پسیارێ ژخوه‌ دكه‌ن كو شه‌ریكێن وان یێن وه‌لاتێ بیر ل ئه‌لترنایفێن دى دكه‌ن. سه‌رهلدانا هه‌رێما سونه‌یان، دبیت جارێ پرۆژه‌ك بیت و كاره‌كێ مه‌زن وه‌ك به‌رهه‌ڤى ل (ئه‌نبارێ) دهێته‌كرن وه‌ك پایه‌خا هه‌رێما سونه‌یان ل سه‌ر سنوورێ سێ وه‌لاتانه‌. بۆ كوردان ده‌رفه‌ته‌ هێشتا زوو نه‌ پشته‌ڤان بن بێ هنده‌ك مه‌رج نه‌ژى دژبن بێ مه‌رج بۆ لایه‌نێ دى. ل دووماهیێ پرسا كوردان دێ ل گه‌ل سونه‌یان بیت، نه‌مازه‌ ل سه‌ر ئاخێ و مادا 140. سونه‌ پر ژ شیعه‌یان پرت و به‌لاڤن راسته‌ كورد ژى بێ سه‌روبه‌رن لێ ل پرسا ئاخێ و ده‌ڤه‌رێن مادا 140 كوردان ئێك هه‌لویست و داخوازى هه‌یه‌. هندى به‌غدا وه‌ك سه‌نترال لاواز بیت و ب تنێ پایه‌خا سیاسى یا وه‌لاتى بیت و ده‌ستهه‌لات و سامان دابه‌شى هه‌رێم و ناڤچه‌یان بیت. بۆ كوردستانێ پڕ ژ جاره‌كێ مفاداره‌. هه‌رێمه‌كا ساڤایا بێ سه‌ربۆرا سونه‌یان بۆ كوردان هێشتا ل ده‌ستپێكێ ده‌رفه‌ته‌ پرسێن خوه‌ ئێكلا بكه‌ت، شیعه‌ هه‌تا دبن باندۆرا ئیرانێ دابن هه‌تا هه‌تا كورد و سونه‌ ل هیڤیا هندێ نامینن. نه‌مازه‌ دستوور ده‌رفه‌تا دامه‌زراندنا هه‌رێمان دده‌ت. سه‌ربۆرا كوردستانێ بۆ گه‌له‌كا جهێ هندێ یه‌ دوباره‌ بیت وه‌ك دیار سونه‌یان بریارا خوه‌ دایه‌ لێ ل هیڤیا هندێ نه‌ بیته‌ كریار هه‌م بۆ قورتالوبونێ ژ ملیشیا و هه‌م بۆ سه‌رده‌مه‌كێ ئاڤه‌دانیێ كو سه‌رده‌مانه‌كه‌ ژێ بێبه‌هر بووینه‌. ب كورته‌ كورد و سونه‌ باجا فه‌شه‌لا شیعه‌یان ناده‌ن وه‌ك دیار و شیعه‌ ژى راستى بزاڤه‌كا رێفۆرمخوازیێ بووینه‌ ژ خوه‌نیشادانا دیاره‌ لێ وه‌خت دڤێت هه‌تا ئێكلا بیت.ژماره‌كا وه‌لاتان ژى مسۆگه‌ر پشته‌ڤانێن سونه‌یانن وه‌ك دیار دێ هه‌رێمه‌كا عه‌ره‌بى سونى ب هێز وه‌ك كوردستانێ ئافریت بۆ به‌رسنگگرتنا هه‌ژمۆنێن ئیرانێ ل رۆژئاڤایێ عیراقێ. یا گرنگ كورد باندۆرا خوه‌ بۆ پرسا ئاخێ ب شاره‌زایى و سوود وه‌رگرتن ژ سه‌ربۆرێن به‌رێ ئێكلا بكه‌ت.

25

كۆڤان حسێن
دبیت ئه‌و گۆتنه‌ راست بیت یا دبێژیت (سۆسیال میدیایێ) چ گوهۆرین نه‌كرینه‌، ب تنێ په‌رده‌ ل سه‌ر مه‌ هه‌لاند و دبیت ئه‌و گۆتنێن به‌رى نوكه‌ ل كۆلان و دیوانێن ته‌نگ دا دهاتن گۆتن نوكه‌ ل سۆشیال میدیایێ به‌لاڤ دبن و هه‌ر تاكه‌ك بوویه‌ ئالاڤه‌كێ په‌خشێ و بێ هیچ سانسۆره‌ك پیڤه‌ره‌ك بۆ بها و ئه‌خلاق و نه‌ریت و جڤاك هه‌بیت. ژ راستى كۆژمه‌كێ مه‌زنێ (كه‌ره‌بێ) كوژمه‌كێ مه‌زنێ لادانێ ژ هه‌ر تشتێ ئاشكرا و نه‌په‌نى یا دهێته‌ به‌لاڤ كرن. كه‌سێ ئێدى نه‌ شیان و نه‌ ژی حه‌زا هندێ یه‌ پرسه‌ك بابه‌ته‌كێ یان هزره‌كێ یان هه‌لویسته‌كێ یان هه‌تا بۆچوونه‌كێ ده‌ر ببریت. دێ راستى هێرشه‌كا دژوارا ده‌ف پیستى و سڤكاتى و هه‌تكرنێ بیت. ئاستێ گشتیێ پرانیا كۆمێنتان ده‌رباره‌ى (مریا و ساخا) نه‌ك تنێ جهێ داخێ و كۆڤانێ یه‌، به‌لكو جهێ (گریانێ) ئه‌ڤه‌ چ ل ڤى وه‌لاتێ به‌رهه‌م هاتیه‌. بۆنه‌خۆشى بێژن (ڤایرۆس سه‌لامه‌ت) بیت و مرى (داخوازا جه‌هنه‌مێ) بكه‌ن. هه‌ر به‌حسى سیاسى و كاراكته‌رێن جڤاكى ناكه‌ین ل سۆسیال میدیایێ چاوا راستى تیرۆره‌كا هزرى و ترساندنه‌كا (فاشستى) بووینه‌. هه‌مى رۆژهه‌لاتناس و كوردناسێن بیانى بۆ كوردان دیده‌ڤانیا هندێ دده‌ن كورد ژ رویێ سه‌نج و نه‌ریت و ئه‌خلاقى و پاكیێ ڤه‌ مله‌ته‌ك پاك و بێ عه‌یبى نه‌. هه‌تا شه‌ڕ و شورێن كوردان دكرن و مرۆڤ دبوونه‌ قوربانى هنده‌ك سنۆر نه‌به‌زاندینه‌ بۆ نه‌یارێن خوه‌ ژی سه‌ره‌ده‌ره‌یك ماقیل و ئه‌خلاقێ (سوار چاكان) هه‌بوو.یان هه‌ره‌سه‌كا جڤاكیا خراب ل به‌رى مه‌یه‌ یان (ڤێرژه‌نێ نوى یێ داعشێ) دێ د ڤێ گێله‌شۆكێ دا سه‌رهلده‌ت. ب هه‌مى ره‌نگى دژى سانسۆرێ مه‌ ل سه‌ر میدیا و سۆسیال میدیایێ، لێ قه‌ت ئه‌ڤ ره‌وشه‌ بێ ڤه‌رێژ نینه‌ سه‌ده‌م هه‌نه‌ مسۆگه‌ره‌ و ره‌نگه‌ دیار ژی بن لێ تشتێ نه‌ دیار ئه‌نجامه‌. ژ راست ئه‌مێ ل باژێران لێ باژێرین پرى توند و تیژیا ده‌ربرینێ و هه‌تكرنێ و شكاندنێ و سڤكرنێ و (ترانه‌ پێكرنێ).ئه‌ڤه‌ به‌رهه‌مێ شۆره‌شا ته‌كنه‌لۆژیایێ یه‌. ئه‌ڤه‌ به‌رهه‌مێ ئه‌و هنده‌ زانكۆ و حزب و سه‌نته‌ر و ده‌زگه‌ه و ناڤه‌ندێن ئۆلى و جڤاكیه‌؟ ئه‌گه‌ر ئه‌ڤ تیرۆره‌ ب ڤى ره‌نگى به‌رده‌وام بیت و باوه‌رم ژی دێ به‌رده‌وام بیت، چونكو تانوكه‌ عه‌مرێ سۆسیال میدیایێ نه‌بوویه‌ 20 سال، ئانكو هێشتا ل بن تاقیكرن و هه‌لسه‌نگاندێ دایه‌. ژ راستى هه‌مى جڤاك نه‌مازه‌ چڤاكێن (محافكار) وه‌ك كوردان ژ روكه‌ش پێگیر و خودان سه‌مبۆلكێن پیرۆزن. دێ قه‌بارێ زیانێ ژ ده‌ستدانا چه‌ندێن به‌ره‌بابان بیت ل سه‌ر (مه‌زبه‌حا) ئازادیا خاپینۆكا بیاڤێ (خه‌به‌ر بێژى) و شكاندنێ بیت. یا مه‌گۆتى، یاباوه‌ لێ رامانا هندێ ناده‌ت تشتێ جهێ شانازیێ نینه‌ هه‌یه‌ و دبیت پرى ژی بن لێ یان دیار نینن یان قوربانێ تیرۆرا هزرى و ترانه‌كرنه‌ نه‌ ب كوردى ئه‌گه‌ر كۆمێنت ئاستێ مه‌ بن. به‌رهه‌مى 30 سالێن ئازادى و و (فه‌زایێ ڤه‌كرى) ئه‌ڤه‌ بن. مرۆڤ نه‌چاره‌ بێژیت سه‌ربۆرا (كۆریا باكۆر) دبیت هنده‌ك باشى تێدا بن؟؟!

website security
WP Facebook Auto Publish Powered By : XYZScripts.com