NO IORG
Authors Posts by محفوز مایى

محفوز مایى

محفوز مایى
1 POSTS 0 COMMENTS

26

شنگال ئه‌و ده‌ڤه‌را كوردستانی پتر ژ 80 كلم ژ كوردستانی دووره‌، د ناڤبه‌را شنگال و كوردستانێ دا ب سه‌دان گوندین عه‌ره‌با هه‌نه‌ ژ گه‌له‌ك خێل و عه‌شیره‌تا، پرانییا ڤان عه‌ره‌با ژ كه‌ڤندا دوژمناتییا كوردان و شۆڕشێن كوردستانێ یا كری. شنگال وه‌كه‌ غه‌زه‌یا فه‌له‌ستینێ یه‌، ب دوژمنێ خوه‌ دۆرپێچكریه‌.
گرێدانا خه‌لكێ شنگالێ ب شۆڕشا كوردستانێ ڤه‌ گرێدانه‌ك شۆڕشگێڕی بوو، نه‌خاسمه‌ گرێدانا وی خه‌لكی ب پارتی دیمۆكراتی كوردستانێ ره‌ گرێدانه‌ك روحی بوو، له‌وما ئه‌م دبینن رۆلا شنگالییا گه‌له‌ك مه‌زن بوو د ناڤ رێزێن پارتی و د ناڤا شۆڕشێ دا. ب ده‌هان سیاسه‌تمه‌دار و كه‌ساتیێن شۆڕشگێر ژ شنگالێ د ناڤ ڕێزێن پارتی دا رۆل و باندۆرا خوه‌ هه‌بوو، ب هزاران شنگالییان د ڕێیا كوردستانێ دا شه‌هید و قوربانی دانه‌.
ئه‌و كاره‌ساتا ل ده‌سپێكا مه‌ها هه‌شت سالا 2014 ب سه‌ر شنگالێ و شنگالییان دا هاتی ئه‌و به‌رده‌وامییا وان هه‌می كاره‌ساتان بوو، كو د دیرۆكێ دا ب سه‌ر كورد و كوردستانێ دا هاتنه‌. د ڤێ كاره‌ساتێ دا خه‌لكێ مه‌ یێ كوردێن ئێزدی كه‌تنه‌ به‌ر درنده‌ترین هێرشا هۆڤانه‌ د دیرۆكا مرۆڤاتیێ دا وه‌ك وێ نه‌قه‌ومییه‌. شیرێ تارستانیێ و جه‌هاله‌تێ ئه‌و دانه‌ به‌ر ده‌ڤێ خوه‌ و ل به‌رچاڤێن هه‌موو دنیایێ مرۆڤكوژی و تالان و وێرانكاریه‌ ئه‌نجامدان.
كاره‌ساتا شنگالێ برینه‌كا كویر و ژ هه‌موو لایه‌نه‌ك سیاسی پتر پارتی ب ژانا وێ برینێ ئێشا، ئه‌و ژی ژ به‌ر كو ل وێ ده‌ڤه‌رێ پارتی حوكومداری دكر. سه‌رباری ڤێ برینێ هنده‌ك لایه‌نێن سیاسی ب تایبه‌ت پ.ك.ك و یه‌كێتی فرسه‌ت دیت كو پتر پارتی بێشینن، به‌رده‌فك و مێدیاكارێن خوه‌ هاندان كو وه‌سا دیاربكه‌ن پارتی شنگال فرۆت… پارتی شنگال نه‌پاراست.. پێشمه‌رگێن پارتی ره‌ڤیان… و ژ ڤان جۆره‌ گۆتگۆتكا به‌لاڤكرن.
كه‌سێ هندی پارتی ل شنگالێ شه‌ڕ نه‌كر و قوربانی نه‌دا. پارتی پتر ژ 500 پێشمه‌رگێن قه‌هره‌مان قوربانی شنگالێ كرن و شه‌هید بوون. قوربانییا هه‌ری مه‌زن پارتی ل شنگالێ دای ئه‌وه‌ كو نه‌ڤیا ئوبالا وا كاره‌ساتان بێخته‌ سه‌ر وان ئێزدیان یێن كو كه‌تینه‌ دویڤ سۆز و په‌یمانێن عه‌ره‌بێن ده‌ردۆرا شنگالێ كو سۆز دانه‌ وان بزڤڕ ڤه‌ مه‌ ئه‌مان یا ژ داعشا وه‌رگرتی ده‌نگ ل وه‌ ناكه‌ن و ئه‌و هه‌می مالبات ژ چیایێ شنگالێ زڤرینه‌ ڤه‌ پشتی پێشمه‌رگا ئه‌و ده‌ربازی چیای كربوون. باشه‌ ئه‌گه‌ر وه‌سایه‌ پارتی ره‌ڤیا گه‌لۆ یه‌ك لیوایا پێشمه‌رگێن یه‌كێتی ل شنگالێ بوون و ژبلی هێزێن لایه‌نێ دی وان چ كرن؟
چه‌ند ئه‌گه‌رێن سه‌ره‌كی هه‌بوون كو شنگال بكه‌ڤیت:
1ـ دوورییا شنگالێ ژ كوردستانێ و دۆرپێچكرنا وێ ب گوندێن عه‌ره‌بان. راسته‌ هێزێن پێشمه‌رگه‌ ل وێده‌رێ هه‌بوون، لێ پتر ژ 80 كلم هێزێن دى پشته‌ڤانی دوور بوون كو بگه‌هنه‌ هێزێن به‌رسینگێ.
2ـ ئه‌و هه‌می گوندێن عه‌ره‌با فرسه‌ت دیت دوژمنكارییا كوردێن ئێزدی بكه‌ن و هاریكارییا داعشان بكه‌ن و رێ ل به‌ر هێزێن پێشمه‌رگان بگرن كو نه‌گه‌هنه‌ هێزێن پێشیا شه‌ری، ب سه‌دان پێشمه‌رگه‌ دكه‌مینه‌یێن وان دا هاتنه‌ شه‌هیدكرن.
3ـ ئه‌و چه‌ك و سیلاحێ د ده‌ستێ پێشمه‌رگه‌ی دا هه‌می یێ لاواز و كێم و كه‌ڤنار بوو، ئه‌و بوو یێ پێشمه‌رگه‌ی ژ له‌شكرێ عیراقی ستاندی. به‌رامبه‌ر وی چه‌كێ داعشا چه‌كه‌ك ب هێز و نوی و زێده‌ بوو. نویترین چه‌ك وانا ژ سووریێ گرتبوو. هه‌روه‌سا ئه‌و هه‌می چه‌كێ ئه‌مریكا دابوو له‌شكرێ عیراقێ ل مووسل كه‌ته‌ ده‌ستێ داعشان.
4 ـ ده‌وله‌تا عیراقێ خوه‌ ل وی شه‌ری نه‌كرنه‌ خودان و ل د هه‌وارا پێشمه‌رگه‌ی نه‌هات و چه‌ك و هاریكاری نه‌دانێ. به‌روڤاژی وێ چه‌ندێ وان گرفتاتی بۆ هێزێن پێشمه‌رگه‌ی چێدكرن.
خاله‌كا دی یا گه‌له‌ك گرنگ ئه‌وه‌ كو، ئه‌و پێشمه‌رگێ ل شنگالێ شه‌ره‌ك مه‌زن و مێرانی كر حه‌تا ئه‌و هه‌می مالبات خوه‌ بگه‌هینن چیایێ شنگالێ. لێ پشتی رزگاربوونا وان شێخ و مه‌زنێن وان گوندێن عه‌ره‌با په‌یوه‌ندی ب وان كر كو ئه‌گه‌ر ئه‌و بزڤرن ڤه‌ مه‌ ئه‌مانه‌ت یا ژ داعشا وه‌رگرتی كو ده‌نگی وان ناكه‌ن، ئه‌و بوو ب هزرا كوردێن مه‌ یێن ئێزدی ژ چیایێ شنگالێ زڤرینه‌ ڤه‌ و داعشا ئه‌و كاره‌سات ب سه‌رێ وان ئێنا.
تالی شنگال ب خوینا500 پێشمه‌رگێن شه‌هید و ب سه‌دان برینداران و ب سه‌رپه‌رشتییا راسته‌راست یا سه‌رۆك بارزانی هاته‌ رزگاركرن.. داعش نه‌ما و شنگال ڤه‌گه‌ریا و ئێزدیخان هه‌ر ما ئاڤا.

website security
Facebook Auto Publish Powered By : XYZScripts.com