NO IORG
Authors Posts by موسه‌ده‌ق توڤی

موسه‌ده‌ق توڤی

موسه‌ده‌ق توڤی
60 POSTS 0 COMMENTS

69

هه‌یامه‌كه‌ مژارا (هه‌موار كردنه‌وه‌ی یاسای سه‌رۆكایه‌تی هه‌رێمی كوردستان)، داویهاتنا ویلایه‌تا نها یا سه‌رۆكی، مافێ سه‌رۆك مه‌سعود بارزانی بۆ خوه‌ به‌ربژاركرنێ یان نه‌، مژارێن هه‌ره‌ گه‌رمێن گوَڕه‌پانا سیاسیا كوردستانێ نه‌ و پشكا هه‌ره‌ مه‌زنا ده‌مێن مه‌دیا كوردی ب خوه‌ڤه‌ گرتیه‌. ده‌رباره‌ی ڤێ مژارێ من دڤێت به‌ری هه‌رتشته‌كی بێژم ئازراندنا وێ د ڤێ هه‌یامێ دا و ب ڤی ره‌نگی د ده‌مێ خوه‌دا نه‌بوو، به‌لكی پێدڤی بوو چ نه‌بیت به‌ری شه‌ش هه‌یڤان ئه‌ڤ مژاره‌ یا ئێكلایی كریبا و نها ئه‌م چاڤه‌رێی بجهئینانا وێ باینه‌، نه‌ك نها كو كێمتر ژ دو هه‌یڤان ژ ده‌مێ سه‌رۆكاتیا بارزانی مانه‌، ئالیێن باشوورێ كوردستانێ بكه‌ڤنه‌ د ڤێ بگر و ڤه‌كێشێ دا و راشكاوانه‌ ژی دبێژم هه‌رهه‌موویان ب تایبه‌ت هه‌ر پێنج حزبێن ده‌سته‌لاتدارێن هه‌رێمێ د ڤی واریدا ژ به‌ر هه‌رئه‌گه‌ره‌كی بیت خه‌مساری كریه‌ و به‌رپرسن ژ هه‌ر روودانه‌كا نه‌چاڤه‌رێكریا ژ ئه‌نجامێ ڤێ بگر و ڤه‌كێشێدا رووبده‌ت.
خالێن هه‌لبژارتنا سه‌رۆكێ هه‌رێمێ راسته‌وخوه‌ ژ ئالیێ خه‌لكێ كوردستانێ یان ژ ئالیێ په‌رله‌مانێ كوردستانێ یێ تنێ ژ 111 ئه‌ندامان پێكهاتی و ده‌سته‌لاتێن سه‌رۆكێ هه‌رێمێ كاكلكا سه‌ره‌كیا مژارا (هه‌موار كردنه‌وه‌ی یاسای سه‌رۆكایه‌تی هه‌رێمی كوردستان)ێیه‌، خه‌لكێ باشوورێ كوردستانێ و ئه‌ز باوه‌ردكه‌م پرانیا ڤی خه‌لكی ڤێ هه‌لبژارتنێ ب مافه‌كێ خوه‌یێ ره‌وا دزانن، لێ حزبێن مه‌ كو هه‌تا نها پتر مژوولی شه‌ره‌نیخا حزبینه‌ دگه‌ل هه‌ڤدو ل شوونا خزمه‌تا گشتی و ئاڤاكرنا وه‌لاتی و پاشه‌رۆژا وی دڤێت د رێكا په‌رله‌مانتارێن خوه‌دا ژ پێش مه‌ڤه‌ هزر بكه‌ن، ل شوونا مه‌ هه‌ناسێ بده‌ن، ل شوونا مه‌ هه‌موو بریاران بده‌ن، دڤێت ل شوونا مه‌ سه‌رۆكێ مه‌ ژی هه‌لبژێرن، حێجه‌تا وان ژی بۆ ڤێ چه‌ندێ ئه‌وه‌ دبێژن مانێ هه‌وه‌ ئه‌و په‌رله‌مانتارێن هه‌لبژارتین.. . !! ل دووڤ گۆتنا وان ده‌مێ ئه‌م چووینه‌ به‌ر سندوقێن ده‌نگدانێ و هه‌ر هنده‌كان كه‌سه‌ك وه‌ك په‌رله‌مانتار هه‌لبژارتی ئه‌ڤه‌ مه‌ كه‌له‌پچه‌كا كریه‌ ده‌ستێن خوه‌ و دڤێت هه‌تا هه‌لبژارتنه‌ك دی كه‌له‌پچه‌كری بین و ب هیڤیا ره‌حما حزبان و په‌رله‌مانتارێن وان (نه‌یێن خه‌لكی) بین.. . !! چما دبێژم په‌رله‌مانتارێن وان نه‌یێن خه‌لكی.. ؟ د به‌رسڤێدا دبێژم: سه‌روبه‌رێ هه‌ر هه‌موو هه‌لبژارتنێن ل كوردستانێ هاتینه‌كرن بینینه‌ به‌رچاڤێن خوه‌ و رۆلێ حزبان د ده‌سنیشانكرنا به‌ربژاران و هه‌لبژارتنا وان دا، كاریگه‌ریا چه‌ندین فاكته‌رێن جڤاكی و عه‌شیره‌تی و دراڤی.. . هه‌تا كاریگه‌ریێن ده‌رڤه‌ د سه‌ركه‌تنا به‌ربژاران دا هه‌رهه‌موو دده‌ن دیاركرن كو په‌رله‌مانتار یێن حزبانه‌ و دێ ل دووڤ به‌رژه‌وه‌ندیا وان كاركه‌ن، ئه‌گه‌ر هه‌تا دوهی هنده‌كان گۆتبا ئه‌ڤه‌ بێ ویژدانییه‌ د راستا په‌رله‌مانتاران دا ئه‌و نوونه‌رێن ملله‌تینه‌.. . !! ئه‌ڤه‌ ل رۆژا 23 ڤێ مه‌هێ (حزیرانێ)دا، ده‌مێ كوَمبوونا په‌رله‌مانی بۆ خواندنا ئێكێ یا (یاسای سه‌رۆكایه‌تی هه‌رێمی كوردستان) ئه‌ڤ چه‌نده‌ ب ئاشكرایی دیار بوو، په‌رله‌مانتارێن هه‌ر هه‌موو حزبان (پشته‌ڤان بۆ یاسایێ ئاماژه‌پێكری یان دژ) ئه‌و كر یا حزبێن وان فه‌رماندایێ ژ هه‌ر 111 په‌رله‌مانتاران تنێ یه‌ك ژ فه‌رمانا حزبێ نه‌ ده‌ركه‌ت.. . !! ل ڤێرێ پرسیار ئه‌وه‌ گه‌لۆ دێ حالێ وی سه‌رۆكێ هه‌رێمێ چ بیت یێ ژ په‌رله‌مانی بێته‌هه‌لبژارتن و ل ژێر ره‌حما په‌رله‌مانی بیت و دێ چ ده‌سته‌لات هه‌بن هه‌ر رۆژه‌كێ حزبه‌ك لێ بكه‌ڤیته‌ ركێ و وی راكێشیته‌ په‌رله‌مانی و بێخته‌ به‌ر ڤه‌كوَلینا په‌رله‌مانتارێن حزبان.. . ؟ تنێ وی ده‌می دێ سه‌رۆك سه‌رۆك بیت ده‌مێ ژ ناڤ ملله‌تی دهێته‌هه‌لبژارتن و ملله‌ت شه‌رعیه‌تێ دده‌تێ و وی ده‌می دێ شێت به‌رگریێ ژ به‌رژه‌وه‌ندیێن ملله‌تی و وه‌لاتی ب په‌رله‌مانڤه‌ بكه‌ت. ل داویێ مافێ منێ وه‌لاتییه‌ بێژم: ئه‌گه‌ر هه‌تا 23 ڤێ مه‌هێ من گومانه‌ك د مژارا هه‌لبژارتنا سه‌رۆكێ هه‌رێمێ ژ ناڤ ملله‌تی یان د په‌رله‌مانیدا هه‌بیت ئه‌ڤه‌ د ڤێ رۆژێدا ب دروستی باوه‌ری بۆ من چێبوو كو به‌لێ دڤێت سه‌رۆك ژ ناڤ ملله‌تی و بۆ ملله‌تی بێته‌ هه‌لبژارتن و چه‌ند په‌رله‌مانتاره‌كان ماف نینه‌ ل شوونا ملله‌تی سه‌رۆكێ وی هه‌لبژێرن.

63

رۆژانه‌ دو جاران بۆ به‌رده‌وامیدان ب كارێ به‌رهه‌ڤكرنا ئینسكلۆپیدیا پارێزگه‌ها دهۆكێ ب ته‌كسیێ سه‌ره‌دانا جهێ كاری ل ئاڤاهیی كه‌ڤنێ ئه‌منا دهۆكی دكه‌م، گه‌لۆ نه‌ تنێ ل دهۆكێ به‌لكی ل سه‌رانسه‌ری ده‌ڤه‌را به‌هدینان كی هه‌یه‌ نها ژیێ وی ژ سیه سالان بۆری بیت و په‌یڤا ئه‌منا دهۆكێ به‌رگوهان نه‌كه‌تبیت، كی هه‌یه‌ وی، كه‌سه‌ك یان هه‌ڤاله‌كێ وی چه‌ند رۆژ و مه‌هێن ئه‌شكه‌نجه‌دانێ ل ڤی ئاڤاهیێ ترسناك ب ده‌ستێن زرته‌كێن ده‌ڤ بخوین و درنده‌یێن ئه‌منێ نه‌دیتبن.. . ؟ كی هه‌یه‌ ل ڤی باژێری ژیا بیت و ب ره‌نگه‌كی یان یێ دیتر زرته‌كێن ئه‌منێ زیده‌گاڤی ل سه‌ر مال و گیان و كه‌رامه‌تا وی نه‌كربیت.. . ؟ چه‌ند خوه‌ پاراستبیت لێ هێژ ژ زیده‌گاڤیا وان نه‌هاتیه‌ پاراستن. كورت و كرمانجی ئه‌منا دهۆكی نموونا هه‌ره‌ خرابا زیندان و سازیێن ئه‌منی بوو ل جیهانێ، هه‌كه‌ نموونێن وه‌ك وێ هه‌بن ژی ئه‌ز دبێژم ده‌گمه‌نن.
دێ زڤرمه‌ڤه‌ ده‌سپێكا بابه‌تی: پرانیا جاران ده‌مێ دبێژمه‌ شوفێرێ ته‌كسیێ من بگه‌هینه‌ ئاڤاهیێ ئه‌منا دهۆكێ، ئه‌ڤ په‌یڤه‌ ب گوهێن وی یا نامۆیه‌ و ب چاڤێ سه‌ر سورمانێ دبێژیت كیڤه‌.. . ؟ یان من ئه‌ڤ ناڤه‌ گوه لێ نه‌بوویه‌.. . !! هه‌ژیه‌ بێژم پرانی د ناڤبه‌را ژیێ30 ـ 40 سالیدانه‌، خوانده‌ڤان و هنده‌ك ده‌رچووێن كۆلیژان و هنده‌ك ژی خویندكارێن كۆلیژانه‌.. . !! پرسیارا من ئه‌وه‌ چما مه‌ ئه‌منا دهۆكێ ژ بیرا خوه‌ بریه‌ڤه‌ و ب نڤشێن نوو نه‌دایه‌ نیاسین.. . ؟ كاره‌سات د ڤێرێ دایه‌.. . ئه‌ز ڤێ چه‌ندی ب نه‌ نیاسینا خوه‌، ب نه‌نیاسینا دیرۆكا خوه‌، ژبیركرنا به‌رپه‌رێن خه‌باتا خوه‌یا نه‌ته‌وایه‌تی دده‌م نیاسین.. . ل جیهانێ و گه‌له‌ك جهێن نێزیكی مه‌ ژی ڤان ره‌نگه‌ جهان دكه‌نه‌ مۆزه‌خانه‌یێن نه‌ته‌وه‌یی و ب هه‌موو سه‌روبه‌رێن وانڤه‌ دهێنه‌پاراستن، هه‌موو ئه‌و كریارێن هۆڤانه‌ یێن د وان جهانڤه‌ دهاتنه‌ئه‌نجامدان و ئامرازێن ئه‌شكه‌نجه‌دانێ و په‌یكه‌رێن وان هۆڤان یێن خه‌لك ئه‌شكه‌نجه‌ ددا و په‌یكه‌رێن قوربانیێن وان رۆژانه‌ نیشا خه‌لكه‌كی دده‌ن، رۆژانه‌ ژبلی مێڤان و گه‌شتیاران شاندێن خویندكار و شاگردان، رێكخراو و كۆمه‌له‌یێن مللی سه‌ره‌دانا ڤان جهان دكه‌ن، تایبه‌ت ژی داكوكیێ ل سه‌ر سه‌ره‌دانا نڤشێن نوو دكه‌ن داكو ئه‌وا ب چاڤێن خوه‌ نه‌دیتی ل ڤێ مۆزه‌خانه‌یێ ببینن و ب چه‌ند به‌رپه‌رێن دیرۆكا گه‌لێ خوه‌ ئاشنا ببن.
چما مه‌ ئه‌ڤه‌ نه‌كر.. . ؟ ئه‌ز دبێژم ئه‌ڤ چمایه‌ ژ چه‌ندین ئاڤاهی و شوونوارێن دی یێن رژێما به‌عسی مینا قه‌سرێن سه‌دامی ل گاره‌ی و جهێن دیتر دگریت.. . ئه‌گه‌ر ئه‌ز ب خوه‌ به‌رسڤا ڤێ چمایێ بده‌م دێ بێژم ژ خه‌مساری و هه‌ستنه‌كرن ب به‌رپرسیاریێ و هه‌ستنه‌كرن ب گرنگیا دیرۆكی مه‌ ئه‌ڤه‌ نه‌كر، دبیت هنده‌ك بێژن د ده‌مه‌ك پێدڤیدا بۆ زانكۆیا دهۆكێ مه‌ مفا ژ ئاڤاهیێ ئه‌منێ وه‌رگرت، ئه‌ڤه‌ ژی هه‌تا ئاسته‌كی د جهێ خوه‌دایه‌، لێ هه‌ر زانكۆ ب خوه‌ دشیا مفای ژ پشكه‌كا ڤی ئاڤاهی ب تایبه‌ت زیندان و جهێن ئه‌شكه‌نجه‌دانی وه‌ربگریت و ئه‌و ب خوه‌ مۆزه‌خانه‌یا ئاماژه‌ پێكری ل وی جهی دامه‌زرینیت، به‌لێ ئه‌و ژی نه‌كر. ل داویێ دبێژم ئه‌گه‌ر یێن كرنێ بین هێژ ده‌لیڤه‌ ل به‌رده‌سته‌، نها ته‌بایی ئاڤاهی ره‌نگڤالایه‌، هه‌ر چه‌نده‌ گۆرانكاری تێدا هاتینه‌كرن، لێ د شیاندایه‌ بۆ هه‌مان مه‌ره‌م لێ بزڤرینه‌ڤه‌ مۆزه‌خانه‌یه‌ك ب ناڤێ مۆزه‌خانه‌یا ئه‌منا دهۆكێ لێ بێته‌دامه‌زراندن و مفا ژ ئه‌زموونا خه‌لكێ دیتر د ڤی واریدا وه‌رگرین و د ڤێ مۆزه‌خانه‌یێدا دیرۆكا خوه‌یا هه‌ڤچه‌رخ یا مه‌یێن زیندوو ژ بیرا خوه‌ بریه‌ڤه‌ بیرا خوه‌ و بیرا نڤشێن پشتی خوه‌ بینینه‌ڤه‌ و بۆ چه‌ندین مه‌ره‌مێن ره‌وشه‌نبیری هۆنه‌ری جڤاكی مفای ژ پشكا مایی ژ ئاڤاهی وه‌رگرین.. . یا مه‌ ژی گۆتنه‌ ئه‌گه‌ر كه‌سێن په‌یوه‌ندیدار بخوینن و ل سه‌ر راوه‌ستن.

55

ژ ڤه‌رێژێن هه‌ڤركیا حزبیا ناره‌وا و شه‌رێ ناڤخوه‌ییێ دۆمدرێژ ل هه‌رێمێ دانا ده‌سكه‌فت و ئیمتیازاتان بوو بۆ ڤی كه‌سی ل سه‌ر حسێبا یێ دی، بۆ ڤی باژێری یان ده‌ڤه‌رێ ل سه‌ر حسێبا یا دیتر، دانا وان ژی ژ سامانێ گشتی بوو، نه‌ ژ بۆدجا ڤێ حزبێ و نه‌ ژ سامانێ ڤی كه‌سایه‌تیێ به‌رپرس بوو، ژ ده‌ڤێ ڤی ڤه‌دگرت و ب گه‌ویا یێ دی دا دكر، ئێك برسی و یێ دی حه‌مه‌ر دكر، ئه‌نجامێ ڤێ سه‌ره‌ده‌ریا نه‌راست ئه‌ڤرۆ ب سه‌ردا هات، كو ئه‌م هه‌موو د پرسگرێگه‌كا سیاسی ئابووری جڤاكیا ئالۆزدانه‌ و چاره‌سه‌ریا وێ دژواره‌ و گرانی ل سه‌ر مه‌ كه‌تیه‌.
ئێشا ب پایته‌ختكرن و پارێزگه‌هكرنێ به‌رهه‌مێ ڤێ سه‌ره‌ده‌ریێ یه‌، ب دامه‌زراندنا دو ئیداره‌یێن سه‌ربه‌خوه‌ ل گه‌رمیان و راپه‌رین و ب پایته‌ختكرنا ره‌وشه‌نبیریا سلێمانیێ ل سالا 2012 ده‌سپێكر، د قووناغا ب پایته‌ختكرنا ره‌وشه‌نبیریا سلێمانیێ دا گه‌له‌ك دانوستاندن ژ بۆ پایته‌ختكرنان.. . یا دهۆكێ ژی هاتنه‌كرن، سالا چوویی بریارا ب پارێزگه‌هكرنا هه‌له‌بجه‌ هاته‌دان، هه‌رچه‌نده‌ ب سه‌رژمێرا خه‌لكێ وێ بیت یان ب جوگرافیا وێ یان ب چه‌ند ئه‌گه‌ره‌كێن دیتر بیت چه‌ند قه‌زایێن دیترێن هه‌رێمێ ژ هه‌له‌بجه‌ هه‌ژیتر بوون بۆ ب پارێزگه‌هكرنی، لێ كاره‌ساتا هه‌له‌بجه‌ ئه‌و باژێر نها كریه‌ هێمایه‌ك نه‌ته‌وه‌یی بۆ خه‌لكێ كوردستانێ، هه‌ژیاتی دا هه‌له‌بجه‌ و مافێ ب پارێزگه‌هكرنی وه‌رگرت و دووڤرا ژی وه‌ك پایته‌ختێ ئاشتیێ هاته‌ده‌سنیشانكرن. پرسگرێك نه‌ د ڤێ چه‌ندێدایه‌ هه‌رێما كوردستانێ ژ سێ پارێزگه‌هان ببیته‌ چار و ژ دو پایته‌ختان ببیته‌ سێ لێ كاره‌سات د هندێدایه‌ چار پارێزگه‌ه ببنه‌ ده‌ه، چنكو نها پرۆژێ ب پارێزگه‌هكرنا شه‌ش قه‌زایان و ب پایته‌ختكرنا باژێرێن دی ل مه‌یدانێ یه‌، د ده‌مێ ب پایته‌ختكرنا ره‌وشه‌نبیرا سلێمانیێ ل سالا 2012ێ د هژمارا (790- 22/1/2013) رۆژنامه‌یا وار دا مه‌ گۆت: ب پایته‌ختكرنا ره‌وشه‌نبیریا سلێمانیێ ل سه‌ر بنیاته‌كێ راست نه‌هاتیه‌دان، به‌لكی پتر بریاره‌كا سیاسی و ل به‌ردانانا (موساوه‌ما) حزبێن كوردستانی بوو د ئه‌نجامێ وێ هه‌ڤركیا سیاسیا دژوارا ل سه‌ر گۆره‌پانا سلێمانیێ هه‌ی، هه‌روه‌سان به‌رهه‌مێ هه‌ڤركیا دێرینا مللیا ناڤبه‌را خه‌لكێ سلێمانیێ و هه‌ولێرێ بوو، چه‌ند ساله‌كان ژی سلێمانیێ پایته‌ختێ ئیدارا سلێمانیێ بوو.. . هتد. سلێمانیێ ب پایته‌ختێ ره‌وشه‌نبیریێ كوردستانێ هاته‌ناڤكرن، به‌لێ چ ژ سلێمانیێ هاته‌گۆهارتن.. . ؟ ئه‌ز دبێژم سلێمانیێ به‌ری وێ بریارێ مه‌لبه‌نده‌كێ سه‌ره‌كیێ ره‌وشه‌نبیری و هۆنه‌ریێ باشوورێ كوردستانێ بوو و نها ژی هه‌روه‌ك خوه‌یه‌، ئانكو ب وی بریارێ چ وه‌راره‌كا به‌رچاڤ نه‌كه‌ته‌ سه‌روبه‌رێ ره‌وشه‌نبیری هۆنه‌ریێ ڤی باژێری، هه‌رچه‌نده‌ د وێ سالێدا بۆدجه‌كا تایبه‌ت ب ناڤێ پایته‌ختێ ره‌وشه‌نبیری ژ بۆدجا گشتییا هه‌رێمێ بۆ سلێمانیێ هاته‌جوداكرن.
هندیكه‌ مژارا ب پارێزگه‌هكرنا وان چه‌ند قه‌زایه‌كانه‌ كو هنده‌ك په‌رله‌مانتاران چ ژ بۆ هه‌ڤركیه‌كا حزبی یان مه‌ره‌مه‌ك كه‌سایه‌تی، چ ژ بۆ خزمه‌تا گشتی خوه‌ پێڤه‌ مژوولكری، ئه‌ز دبینم نه‌ د به‌رژه‌وه‌ندیا گشتیدایه‌ و ب پارێزگه‌هكرنا وان چه‌ند قه‌زایان دێ هزرا ب پارێزگه‌هكرنا چه‌نده‌كێن دیتر دووڤ خوه‌ڤه‌ ئینیت، هه‌تا هنده‌ك ناحیه‌ ژی خوه‌ ب هه‌ژی ڤێ چه‌ندێ دبینن، نه‌ سه‌روبه‌رێ داراییێ هه‌رێمێ و نه‌ ژی جوگرافیا هه‌رێمێ شیانێن هه‌مبێزكرنا ده‌ه پارێزگه‌هان و چه‌ند پایته‌ختان هه‌نه‌ ئه‌گه‌ر نه‌بنه‌ پتر ژی.
گه‌لۆ ئه‌و دراڤێ ل هه‌یكه‌لێ پارێزگه‌هه‌كا نوو و كارگێریا وێ دهێته‌مه‌زاختن ب یه‌كسانی و دادوه‌ری ل سه‌ر یه‌كه‌یێن پارێزگه‌هێن نها و پێویستیێن وان بێته‌ مه‌زاختن باشتر نینه‌.. . ؟ وه‌لاتێ مه‌ پێدڤی ب خزمه‌ت و پرۆژه‌ و گۆرانكاریانه‌ یان پێدڤی ب ناڤێن مه‌زنه‌.. . ؟ چ جوداهی هه‌یه‌ خزمه‌ت و پرۆژه‌ د سنوورێ ناحیێ قه‌زایێ یان پارێزگه‌هێدا بێنه‌بجهئینان.. . ؟ ئه‌رێ ئه‌م پێدڤی پله‌ و پایه‌یێن مه‌زنین بۆ كه‌سان یان پێدڤی ب خزمه‌تێنه‌ بۆ هه‌موویان.. . ؟ د به‌رسڤێدا ئه‌ز دبێژم ئه‌م پێدڤی ب پرۆژه‌ و خزمه‌تگوزاریانه‌ بۆ ته‌بایی خه‌لكێ، ئه‌م پێدڤی ب پارێزگاره‌كی یان قائیمه‌قامه‌كینه‌ ب یه‌كسانی و دادپه‌روه‌ریێ سه‌ره‌ده‌ریێ دگه‌ل هه‌ر بهۆسته‌كێ ژ پارێزگه‌هێ بكه‌ن، هه‌ركه‌سه‌ك بینته‌ بیرا خوه‌ تنێ مه‌زاختیێ پارێزگاری و نڤیسینگه‌ها وی چه‌ند ب گرانی ل سه‌ر بۆدجا وه‌لاتی دكه‌ڤیت، هه‌یڤه‌كا وی مه‌زاختی دێ چه‌ند پرۆژه‌ پێ هێنه‌ ئه‌نجامدان.
كورت و كرمانجی ئه‌ڤا هنده‌ك په‌رله‌مانتار بۆ پایته‌ختكرن و ب پارێزگه‌هكرنێ دكه‌ن نه‌ د به‌رژه‌وه‌ندیا گشتیدا یه‌، پشتیه‌كێ گرانتر د هاڤێژنه‌ سه‌ر پشتیێ گرانێ سامانێ ڤی وه‌لاتی، هیچ ده‌ڤه‌ره‌كا كوردستانێ ژی ژ یا دی باشتر نینه‌ هه‌ر هه‌موو د قوربانیدانێ دا وه‌كهه‌ڤن و وه‌كهه‌ڤ هه‌ژی ده‌سكه‌فتانه‌، بلا هه‌له‌بجه‌ دوا پارێزگه‌ها هه‌رێمێ بیت، ل شوونا پرۆژێن ب پایته‌ختكرن و پارێزگه‌هكرنێ هزر ل ئاڤاكرنا هنده‌ك ده‌ڤه‌ران بێته‌ كرن مینا ده‌ڤه‌را نێروه‌ رێكان (سنوورێ ناحیا بێبۆ یا جاران) كو هه‌تا نها ژی خه‌لكێ وێ نكاریت بزڤریته‌ڤه‌ سه‌ر وارێ خوه‌.

65

په‌رله‌مان ل هه‌ر وه‌لاته‌كێ دیمۆكراسی نوونه‌راتیا خه‌لكێ وی وه‌لاتی دكه‌ت، په‌رله‌مانتار راسته‌وخوه‌ ژ ئالیێ وی خه‌لكی ڤه‌ و بۆ به‌رگریێ ژ به‌رژه‌وه‌ندیێن ته‌بایێن وی هاتیه‌هه‌لبژارتن، لێ یێ ژ په‌رله‌مانی و په‌رله‌مانتاری پیرۆزتر و به‌رگریێ ژ ژیان و مانا په‌رله‌مانی و وی خه‌لكی دكه‌ت له‌شكرێ فه‌رمیێ وی وه‌لاتی یه‌، ل جه‌م مه‌ ژی د ڤی سه‌روبه‌رێ هندێ ناسكدا كو دوژمنان ژ هه‌ر چار ئالیانڤه‌ سووند ب سه‌رێ مه‌ خواریه‌ هێزێن پێشمه‌رگه‌ی له‌شكرێ فه‌رمیێ كوردستانێ نه‌، هه‌كه‌ مه‌ پێشمه‌رگه‌ نه‌بیت نه‌ مه‌ په‌رله‌مان هه‌یه‌ و نه‌ژی په‌رله‌مانتارێن مه‌ دكارن ل هۆلا په‌رله‌مانی زه‌ڤله‌كێن خوه‌ ده‌رێخن و سنۆران ب به‌زینن راست و چه‌پ به‌رۆكا ڤی بگرن و هێرشان بكه‌نه‌ سه‌ر یێ دی.
بلا ئه‌ڤه‌ ده‌رگه‌هه‌ك بیت و بچینه‌ د ناڤ مژارا به‌ری چه‌ند رۆژه‌كان په‌رله‌مانتار دلێر ماوه‌تی (جێگری سه‌رۆكی لێژنه‌ی كاروباری پێشمه‌رگه‌ و شه‌هیدان و قوربانیانی جینۆساید) ل په‌رله‌مانی كوردستانێ ئازراندی و بێی ڤه‌كۆلین و دووڤچوون و سه‌لماندن شه‌هیده‌كێ پێشمه‌رگه‌ی ب داعشه‌كێ خوه‌كۆژ دایه‌نیاسین و هه‌روه‌ك یێ سه‌لكا مێشا هنگڤینی د قۆرمێ دارێدا دیتی خوه‌ نه‌گرتی و هێژ قیامه‌ت نه‌هاتی ب له‌ز ئه‌ڤ چه‌نده‌ بۆ خوه‌ ب نێچیره‌كا مه‌زن دیتی و ده‌ملده‌ست تۆڕا راگه‌هاندنا (رووداو) ئاگاداركری وێ ژی ئه‌ڤ ده‌سپێشخه‌ریا رۆژنامه‌ڤانی ژ ده‌ست نه‌دای و ب له‌ز د گشت كه‌نالێن خوه‌ دا ب مانشێته‌كێ مه‌زن به‌لاڤكری: وه‌زاره‌تی پێشمه‌رگه‌ داعشێكی خوه‌ كوژ به‌ شه‌هید توومار ده‌كات.
راستیا مژارێ ژی ب دروستی به‌روڤاژیه‌ ل گه‌ل نێچیرا په‌رله‌مانتار دلێر ماوه‌تی و تۆرا رووداو، وه‌زاره‌تا پێشمه‌رگه‌ی ژی چ داعشێن خوه‌كوژ ب پێشمه‌رگه‌ و شه‌هید توومار نه‌كرینه‌، پێشمه‌رگه‌كێ قاره‌مان ل به‌رۆكێن به‌رخوه‌دانێ و به‌رگریێ ژ په‌رله‌مان و په‌رله‌مانتاران و (رووداو) و گشت رۆژنامه‌ڤان و سازیێن رۆژنامه‌ڤانی و ته‌بایی خه‌لكێ ڤی وه‌لاتی شه‌هید بوویه‌ و تنێ گونه‌ها وی ئه‌وه‌ ناڤێ وی (حوزه‌یفه‌)یه‌ و ده‌مێ لیستا ناڤێن شه‌هیدان گه‌هشتینه‌ به‌رده‌ستێ جێگرێ سه‌رۆكێ لیژنا پێشمه‌رگه‌ و شه‌هیدان ناڤێ (حوزه‌یفه‌)ی دیتی چاڤێن وی چووینه‌ پشتا سه‌ری و ئه‌وا ئه‌و لێ دگه‌ریا دیت و ده‌لیڤه‌ ژ ده‌ست نه‌دا و ئه‌وا د دلێ وی دا به‌رامبه‌ر وه‌زاره‌تا پێشمه‌رگه‌ی ده‌رێخست و زمانحالێ وی دگۆت: وه‌زاره‌تا پێشمه‌رگه‌ی ئه‌ڤه‌ من تو گرتی و نه‌ تنێ كریه‌ گازی وه‌زاره‌تی پێشمه‌رگه‌ داعشێكی خۆكوژ به‌ شه‌هید توومار ده‌كات.. . !!! به‌لكی پێڤه‌ چووی و ده‌رباره‌ی تۆماركردنی ناوی شه‌هیدانی پێشمه‌رگه‌ گۆتی: “چیرۆكی سه‌یر و سه‌مه‌رمان هه‌یه‌ و هه‌مووشی به‌ به‌لگه‌یه‌” و ئاماژه‌ ب چه‌ند چیرۆكه‌كان ژ وان كری ( رووداو، 352، 30/3/2015)، لێ د چه‌ند رۆژه‌كێن كێمدا راستیا مژارێ ده‌ركه‌ت (حوزه‌یفه‌) پێشمه‌رگه‌ بوو و د پێشمه‌گاتیێ دا شه‌هید بوویه‌، ئه‌ڤه‌ ژی گومانه‌كێ ل جه‌م مه‌ وه‌لاتیان دروستدكه‌ت كو گه‌له‌ك ژ ژ چیرۆكێن سه‌یر و سه‌مه‌ره‌یێن دلێر ماوه‌تی وه‌ك چیرۆكا (داعشێكی خوه‌كوژ) نه‌وه‌یی و بێ به‌لگه‌ بن.
دلێر ماوه‌تی، په‌رله‌مانێ كوردستانێ، رووداو ل دۆر ڤێ بۆیه‌رێ داخوازا لێبۆرینێ بكه‌ن یان نه‌، مالباتا شه‌هیدی بێنه‌ده‌نگ و سكالایێ دژی هه‌رئالیه‌كی تووماركه‌ن، ئه‌ڤه‌ مژاره‌كه‌، لێ مه‌ وه‌ك خه‌لكێ ڤی وه‌لاتی ماف هه‌یه‌ بێژین: گه‌لۆ ئه‌ڤه‌ ژی نه‌ گه‌نده‌لیه‌ و گه‌نده‌لیه‌كا مه‌زن ژی په‌رله‌مانتاره‌ك بێی به‌لگه‌ زێده‌گاڤیێ بكه‌ته‌ سه‌ر پیرۆزترین پیرۆزیێن ڤی وه‌لاتی كو شه‌هیدێن پێشمه‌رگه‌نه‌.. ؟ گه‌لۆ مه‌ ماف نینه‌ بێژین نیازه‌كا دیتر ل ده‌رڤه‌ی ئه‌ركێ وی یێ په‌رله‌مانتاریێ ل پشت ڤی په‌رله‌مانتاری هه‌یه‌ و ب ڤێ كریارێ پشكه‌ك ژ وێ نیازێ بجهئینا.. ؟ ئه‌رێ هه‌كه‌ جێگرێ سه‌رۆكێ لیژنا كاروباری پێشمه‌رگه‌ و. .. ڤێ ب سه‌رێ شه‌هیدێن پێشمه‌رگه‌ی بینیت دوژمنێن پێشمه‌رگه‌ دێ چ ب سه‌ری ئینن.. ؟؟ گه‌لۆ ئه‌رێ نه‌ گه‌ریان ل دووڤ راستیێ ژ بنه‌مایێن كارێ رۆژنامه‌ڤانیه‌.. ؟ چما رووداو هنده‌ ب له‌ز و بێی به‌لگه‌ ب گۆتنێن په‌رله‌مانتاره‌كی هاته‌خاپاندن و دوور ژ گشت بنه‌مایێن كارێ رۆژنامه‌ڤانی ئه‌ڤ نووچه‌یه‌ ئینا خوار هه‌ستا ب هزاران ژ پێشمه‌رگه‌ی و خه‌لكێ كوردستانێ بریندار كر.. ؟ گه‌لۆ ئه‌مێن وه‌لاتی چاوا ژ نها پاش باوه‌ریێ ب په‌رله‌مانتار و رۆژنامه‌ڤانان بینین.. ؟ ل داویێ ژی پرسیاره‌ك ژ هه‌ركه‌سه‌كێ ڤی وه‌لاتی دهێته‌كرن: چما هۆسا بێ هه‌لویستی و بێ ده‌نگی به‌رامبه‌ری ڤێ مژارێ.. ؟

190

پرسیاره‌كه‌ و پێدڤیه‌ هه‌ر كه‌سه‌ك بكه‌ت، ئه‌رێ دروسته‌ كه‌سه‌ك ل كۆچك و دیوانان بگه‌ریت و ب به‌ژنا خوه‌ بێژیت و خوه‌ بكه‌ته‌ قاره‌مان و بێی كو قاره‌مانیه‌ك كربیت و رۆژه‌كێ ژ رۆژان خوه‌دی هه‌لویسته‌كێ باش بیت.. . ؟ ل دووڤ ئه‌زموونا خوه‌ و هندی من دیرۆك خواندی ئه‌ز دبێژم كه‌س ب مه‌دحان نابیته‌ قاره‌مان، هه‌كه‌ مرۆڤ هه‌ژی و خوه‌دی هه‌لویستێن نه‌مر بیت، دیرۆك دێ مرۆڤی كه‌ته‌ قاره‌مان و هه‌لویستێن مرۆڤی ب نه‌مری تووماركه‌ت، له‌وما نه‌ دروسته‌ كه‌سه‌ك ئه‌و ب خوه‌ ب به‌ژنا خوه‌ بێژیت، ب رامانه‌كا دیتر مه‌دحان بكه‌ت، نه‌كو رۆژه‌كێ خه‌لك لێ بێته‌ ده‌نگ و چ نه‌بیت بێژنێ تو نه‌ ل دووڤ وان مه‌دحانی، یان هنده‌ك به‌لگه‌نامان به‌رچاڤبكه‌ت 100% به‌روڤاژی بن دگه‌ل مه‌دحێن وی، وی ده‌می نه‌ به‌رسڤه‌ك هه‌بیت و نه‌ ژی بكاریت به‌رگریێ ژ خوه‌ بكه‌ت.. . !
ب كورتی دێ ئاماژه‌ ب ڤێ دیرۆكێ كه‌م، كو نێزیكه‌ جهێ خوه‌ ل ناڤ جڤاكێ مه‌ ب تایبه‌ت هنده‌ك ژ كه‌سێن خوه‌ ب ره‌وشه‌نبیر دزانن دكه‌ت و رۆژ ل دووڤ رۆژێ یا به‌لاڤه‌ دبیت، نه‌كو ببیته‌ ئێشه‌كا ڤه‌گر و د ئه‌نجامدا خه‌لكه‌ك لێ بێنه‌ده‌نگ و ببیته‌ پرسگریكه‌ك د ناڤ جڤاكێ ده‌ڤه‌را مه‌دا، دێ بینی كه‌سه‌كی ل ژێر ناڤێ بیرهاتنه‌كێ، یان نڤیسین ده‌رباره‌ی روودانه‌كێ یان كه‌سایه‌تیه‌كی، چه‌ند به‌رپه‌ڕه‌ك ڤه‌گرتن و خوه‌ كره‌ بنیاتنه‌رێ هزرا نه‌ته‌وه‌یی ل ده‌ڤه‌رێ، یێ دی خوه‌ كره‌ سه‌ركێشێ بزاڤا ره‌وشه‌نبیری، یێ دی خوه‌ كره‌ مامۆستایێ هۆنه‌رمه‌ندێن ده‌ڤه‌رێ و وه‌سا دا دیاركرن كو بزاڤا هۆنه‌ری ل ڤی وه‌لاتی ژ به‌ریكا قاپویتێ وی ده‌ركه‌تیه‌، یێ دی وه‌سان دا دیاركرن كو هه‌موو نڤیسه‌ر و ره‌وشه‌نبیرێن ڤێ ده‌ڤه‌رێ شاگردێن وی بوونه‌ و گشت خوه‌دی شیانێن ڤی وه‌لاتی ل به‌رده‌ستێ وی فێری ئه‌لیفبێتكان بوونه‌.. . نه‌ هه‌رێ ب ڤێ چه‌ندێ ناراوه‌ستن ئێك دێ بێژیت فلان رۆژێ ل فلان سمینارێ من به‌رسنگێ ره‌شه‌كێن رژێما به‌عسی گرت و تۆز ژێ راكر، یێ دی دێ ئاماژه‌ ب هه‌لویسته‌كی كه‌ت كو تێدا قه‌بێ ره‌شه‌كێن رژێما به‌عسی خواستیه‌ و ب ده‌نگێ بلند گۆتیه‌: دێ.. . كه‌م و بلا من ئیعدام كه‌ن، یێ دی داكو خوه‌ بكه‌ت خوه‌دی دیرۆكه‌ك پڕ سه‌رفرازی دێ رادیۆیا كوردی یا به‌غدا كه‌ته‌ قادا كوردایه‌تیێ و به‌رۆكا چیایێ خواكوركی و ستۆدیێن وێ كه‌ته‌ چه‌په‌رێن پێشمه‌رگه‌ی و مایكرۆفۆنا وێ كه‌ته‌ تڤه‌نگا ده‌ستێ پێشمه‌رگه‌ی و شۆرشێن كوردستانێ ب ده‌یندارێن وێ رادیۆیێ ده‌ردئێخیت و بێژیت: ڤێ رادیۆیێ رۆله‌ك باش دیتیه‌ ل زۆخاندن و هشیاكرنا هه‌ستا نه‌ته‌وه‌یی ل جه‌م گه‌نج و تولازێن كورد و هانداینه‌ بچنه‌ رێزێن شۆرشا كوردی و چه‌كی هه‌لگرن د ناڤ رێزێن پێشمه‌رگه‌یدا.. . ئه‌ڤه‌ هه‌موو ژ بۆ هندێ خوه‌ بكه‌ته‌ قاره‌مانه‌ك ل وێ رادیۆیێ، مه‌ هند دیت ئێكێ دی رابوو و بۆ دیاركرنا زه‌ڤله‌كێن خوه‌ رۆژناما (بزاڤ)ا به‌عسیان ده‌رێخستی كره‌ مه‌یدانا خه‌بات و تێكۆشانێ و پێڤه‌ چوو رۆژنامه‌ گه‌هانده‌ ئاستێ رۆژناما خه‌بات و كۆڤارا مه‌تین یێن چیای د وارێ خزمه‌تا هزرا نه‌ته‌وه‌ییدا.. . ب ڤی ره‌نگی ئێشا مه‌دحه‌ و خوه‌ ب قاره‌مانكرنێ یا به‌رده‌وامه‌ و هنده‌ك ژ گه‌نجێن نوو ژ به‌ركو ل روودانێن دیرۆكێ تایبه‌ت سه‌رده‌مێ رژێما به‌عسی د ئاگادار نین، بله‌زن ڤه‌گێرانێن ڤان كه‌سان راستره‌ بێژین مه‌دحێن وان ژێ وه‌ردگرن و ل به‌رپه‌رێن رۆژنامه‌ و كۆڤاران به‌لاڤدكه‌ن، دوور ژی نابینم كته‌كا خه‌لكی باوه‌ر پێ بكه‌ن.
ل داویێ داكو ئه‌ڤ مژاره‌ درێژ نه‌بیت و كۆڤار و رۆژنامه‌ نه‌بنه‌ مه‌یدانێن مه‌دحان و خوه‌ ب قاره‌مانكرنێ و دیرۆك نه‌هێته‌ شێواندن ب كورتی دێ بێژم: پێدڤیه‌ ل به‌لاڤكرنا ڤان ره‌نگه‌ بابه‌تان هشیار بن و نه‌هێلن خه‌لكه‌ك بۆ خوه‌ ب قاره‌مانكرنێ یان تووماركرنا دیرۆكه‌كا نه‌وه‌یی مفای ژ به‌رپه‌رێن وان وه‌رگرن، د هه‌مان ده‌مدا ئه‌و كه‌سه‌ ب خوه‌ ژی ل خوه‌ بزڤرنه‌ڤه‌، هه‌كه‌ خوه‌دی هه‌لویستێن قاره‌مانانه‌ بوونه‌ بلا بهێلن دیرۆك قاره‌مانیێن وان تووماركه‌ت، هه‌كه‌ خوه‌دی هه‌لویستێن خراب بووینه‌ ئێكا وه‌سا نه‌كه‌ن خه‌لكه‌ك لێ بێته‌ده‌نگ و یا ڤه‌شارتی بینته‌ سه‌ر به‌ڕكێ، هه‌ی كه‌سێن خوه‌پارێز بووینه‌ و ده‌ستێ خوه‌ ب كۆلاڤێ خوه‌ڤه‌ گرتیه‌ خوه‌دی هه‌لویستێن نه‌رینی ژی نه‌بووینه‌ كو خه‌لكه‌كێ زۆر ژ ڤی جوینی هه‌بوو ده‌لیڤه‌ ل پێشیا وانه‌ و هه‌ر ئێك ل جهێ خوه‌ دكاریت ب كارێن خوه‌ دلسۆژیا خوه‌ دیار بكه‌ت.
musediqtovi@yahoo. com

68

ل 18 كانوونا ئێكێ 2014ێ سه‌رۆكێ هه‌رێما كوردستانێ مه‌سعوود بارزانی د نامه‌كێدا بۆ وه‌زیرێ پێشمه‌رگه‌ی خواست ب مه‌ره‌ما یه‌كگرتنا هێزێن پێشمه‌رگه‌ی و نه‌مانا چ هێزان ل ده‌رڤه‌ی هێزێن سه‌ر ب وه‌زاره‌تا پێشمه‌رگه‌یڤه‌ هه‌موو پێنگاڤێن پێویست بگریته‌به‌ر.. . نامه‌ پێنگاڤه‌كا گرنگ و د ده‌مه‌كێ پێدڤی و نازكدا هات، ئه‌نجامدانا خالێن ڤێ نامه‌یێ و هه‌ڤگرتنا هێزێن پێشمه‌رگه‌ی دێ دۆزا كوردی چه‌ندین قوناغا به‌ر ب پێش به‌ت، ئه‌ڤ پێنگاڤه‌ دگه‌ل پێنگاڤێن په‌یداكرنا ئابووریه‌كا سه‌ربه‌خوه‌ و دابینكرنا پشته‌ڤانیه‌كا ناڤده‌وله‌تی دێ به‌رێ بنیاتی لێ بنیاته‌كێ موكم و نه‌لڤ بۆ ئاڤابوونا ده‌وله‌تا كوردی دانن، د وارێن ئابووری و پشته‌ڤانیا ناڤده‌وله‌تیدا پێنگاڤێن گرنگ هاتینه‌ هاڤێتن و قووناغێن باش به‌ر ب پێش چووینه‌، لێ هێژ نه‌گه‌هشتینه‌ قووناغا داویێ. هندیكه‌ وارێ له‌شكه‌ریه‌ ناما سه‌رۆكێ هه‌رێمی زه‌نگا به‌راهیێ بوو بۆ هاڤێتنا پێنگاڤا ئێكێ، هێژ ده‌سپێكه‌ و هه‌رده‌سپێكه‌ك ژی دڤێت به‌رهه‌ڤیه‌ك باش، ڤه‌كۆلین و هه‌لسه‌نگاندنێن هویر و زانستی بۆ بێنه‌كرن، دووربن ژ هه‌ستێن ناسك و سۆزداریێ و باندۆرێن ده‌مكی، وی ده‌می پێنگاڤا به‌راهیێ بێته‌هاڤێتن و ل به‌ر رۆناهیا خالێن لاواز و ب هێزێن وێ پێنگاڤه‌كا دیتر بێته‌هاڤێتن، ب ڤی ره‌نگی هه‌تا پێنگاڤا داویێ، خوزی ئه‌م ژ وان بین یێن پێنگاڤا داویێ ئانكو دامه‌زراندنا له‌شكرێ یه‌كگرتیێ كوردستانێ دبینن.
چاوا پێنگاڤا ئێكێ ب هاڤێژین.. . ؟ ئه‌رێ تێكه‌لكرنا چه‌ند یه‌كه‌یێن هێزێن 70 و 80 و پێكگۆهارتنا چه‌ند فه‌رمانده‌كێن له‌شكری یان پێكئینانا چه‌ند لیوایه‌كێن تێكه‌ل ژ پێشمه‌رگه‌یێن هه‌ردو هێزان و ئێكئێخستنا سه‌روبه‌رێ كارگێری و دراڤی و سازیێن سه‌ر ب وانڤه‌ تێرا هندێ هه‌نه‌ بێژینێ پێنگاڤا ئێكێ و پێنگاڤێن دیتر دووڤرا بهاڤێژین.. . ؟ نه‌خێر ئه‌ڤه‌ نه‌ پێنگاڤا ئێكێ یه‌ و ئه‌گه‌ر ئه‌ڤه‌ پێنگاڤا ئێكێ بیت، ئه‌ڤه‌ مه‌ سه‌رنه‌كه‌تنا وێ و شكه‌ستنا ته‌مامی كریارێ دانا به‌رسنگێ خۆ. مه‌ د وارێ یه‌كگرتنا سیاسی و له‌شكه‌ریا بزاڤا نه‌ته‌وه‌ییدا چه‌ند ئه‌زموون هه‌نه‌، هه‌موو ژی ده‌مكی و سه‌رنه‌كه‌تی بوون، ئه‌زموونا یه‌كگرتنا پارتی دیمۆكراتی كوردستان و پارتی شۆرشگێری كوردستان سالا 1970ێ، ئه‌زموونا به‌ره‌یێ كوردستانی 1988ێ، ئه‌زموونا حوكمه‌ت و په‌رله‌مان و له‌شكرێ یه‌كگرتیێ هه‌رێمێ 1991- 1994ێ، ئه‌زموونا پێكهاتنا ستراتیژیا ناڤبه‌را پارتی و ئێكێتی 2007ێ، سه‌روبه‌رێ ناڤخۆیی و فشارا دوژمنان، هنده‌ك روودانێن هه‌رێمایه‌تی و جیهانی پالده‌ربوون بۆ ڤان ئه‌زموونان، لێ هێژ هه‌ست و دلێن مه‌ كوردان نه‌ د به‌رهه‌ڤبوون، له‌وما ژی نه‌ تنێ مه‌ شكه‌ستن تێدا ئینا به‌لكی وان شكه‌ستنان كاره‌سات ژی دووڤ خوه‌ڤه‌ ئینام. گه‌لۆ چما ئه‌ڤ هه‌موو ئه‌زموونێن نه‌ سه‌ركه‌تی و په‌یوه‌ندیا وان ب مژارا یه‌كگرتنا هێزێن پێشمه‌رگه‌یڤه‌ چیه‌.. . ؟ د به‌رسڤێدا دێ بێژم هه‌موو ئه‌ڤ ئه‌زموونێن نه‌ سه‌ركه‌تی ئه‌نجامێن ناكۆكیه‌كا دیرۆكینه‌ د بزاڤا نه‌ته‌وایه‌تیا كوردیدا، ڤێ ناكوكیێ باندۆرا خوه‌ كریه‌ سه‌ر هه‌موو ئالیێن ژیانا مه‌، هزر و بۆچوون و شرۆڤه‌كرن و هه‌لسه‌نگاندنا ڤی خه‌لكی ژ هه‌ڤجودا كریه‌، به‌رژه‌وه‌ندیێن حزبایه‌تیێن به‌رته‌نگ، به‌رژه‌وه‌ندیێن كه‌سایه‌تی و بنه‌مالان و ده‌سته‌ك و كۆمان ل شوونا به‌رژه‌وه‌ندیا نه‌ته‌وایه‌تی گرتیه‌، هه‌رده‌مێ پێكهاتنه‌ك د ناڤبه‌را ئالیێن سیاسیێن كوردستانێدا هاتیه‌كرن، مه‌ره‌ما ئالیێن پێكهاتی نه‌ به‌رژه‌وه‌ندیا نه‌ته‌وایه‌تی و پاراستنا ده‌سكه‌فتێن دیرۆكیێن خه‌لكی بوو، به‌لكی مه‌ره‌م ئه‌و بوو ئالیه‌ك ده‌لیڤا خۆ ل یێ دی ببینیت و دربێ خۆ دانیتێ، ئه‌زموونا ئێكه‌مین حوكمه‌ت و په‌رله‌مانێ هه‌رێمێ و له‌شكرێ گوایه‌ یه‌كگرتیێ كوردستانێ یێ وی ده‌می ل به‌رچاڤێن مه‌نه‌، چاوان شیانێن وی ده‌می یێن هه‌رێمێ هاتنه‌بكارئینان بۆ كوده‌تایێ دژی ئالیه‌كێ دی یێ پشكدار د حوكمه‌تا هه‌رێمێدا. دوورنه‌چین دوهی پێر بوو چاوان هنده‌ك ئالیێن كوردستانی هێرشا تیرۆریستێن داعش بۆ سه‌ر باشوورێ كوردستانێ و شكه‌ستنا پێشمه‌رگه‌ی ل هنده‌ك به‌رۆكان و كاره‌ساتا ب سه‌ر هنده‌ك ده‌ڤه‌راندا هاتی بۆ خۆ ب ده‌لیڤه‌ ددیت دربێ خوه‌ داننه‌ ئالیێ دی و شكه‌ستنا وی ب رۆژا نوویا خوه‌ دزانی. ئه‌ڤ هه‌موو سه‌ربۆره‌ وه‌ل مه‌ دكه‌ن بێژین، به‌ری ئێكخستنا هێزێن پێشمه‌رگه‌ی دڤێت دلێن ئێك ئێك ژ پێشمه‌رگه‌ی و فه‌رمانده‌یێن وان و سه‌ركرده‌یێن سیاسیێن كوردستانێ بكه‌ینه‌ ئێك، هه‌ر ده‌مێ دلێن وان هه‌ڤگرتن، هزر و بۆچوونێن وان به‌رژه‌وه‌ندیێن وان بوونه‌ ئێك ئه‌و ژی به‌رژه‌وه‌ندیا نه‌ته‌وایه‌تی بیت، ئه‌ڤ چه‌نده‌ ژی دێ ب نه‌هێلانا شوونه‌وارێن ناكۆكیا دیرۆكی یا بزاڤا نه‌ته‌وایه‌تیا كوردی بجه هێت، هه‌رده‌مێ ئه‌ڤ شوونه‌واره‌ نه‌مان وی ده‌می پێنگاڤا ئێكێ بۆ ئێكخستنا له‌شكه‌رێ كوردستانێ دا یا ب ساناهی بیت و ئه‌نجامێن خوه‌ ژی دێ ده‌ستڤه‌ئینیت و 70 و 80ێ ژی دێ بنه‌ 150 و ب 150 پێشمه‌رگه‌یێن یه‌ك دل و یه‌ك باوه‌ر دێ به‌رسنگێ مه‌زنترین دوژمنان گرین و سه‌ركه‌تنێ ده‌ستڤه‌ئینین.

50

ل ده‌سپێكا سالا (2014ێ) سه‌رۆكوه‌زیرێن به‌رێ یێ عیراقێ نوری مالكی د پێنگاڤه‌كا نه‌ پێشبینیكریدا و بێی كو مهانه‌یه‌كا ره‌وا د ده‌ستاندا بیت ب بریاره‌كا تاكه‌ كه‌سی پشكا هه‌رێما كوردستانێ ژ بۆدجه‌یا عیراقێ بری و ب ڤێ كریارێ ژی هه‌رێم توشی پرسگرێگه‌كا ئابووری كر، پرسگرێكێ كارڤه‌دانا خۆ نه‌ تنێ ل هه‌رێمێ به‌لكی ل ته‌بایی باشوورێ كوردستانێ هه‌بوو، پرسگرێك هێژ مه‌زنتر لێ هات ده‌مێ د مه‌ها حزیرانێدا رێكخراوا تیرۆریستیا داعش ده‌ست ب سه‌ر مووسلێ و پرانیا ده‌ڤه‌رێن عه‌ره‌بێن سونه‌نشیندا گرتی و به‌رێ ب هزاران په‌نابه‌ران كه‌تیه‌ كوردستانێ، پاشتر ده‌مێ ل مه‌ها ته‌باخێ به‌رێ هێرشا هۆڤانه‌یا رێكخراوا تیرۆریستی كه‌تیه‌ كوردستانێ و پرانیا ده‌ڤه‌رێن كوردستانێ یێن ده‌رڤه‌ی هه‌رێمێ داگیركرین ب سه‌دان هزاران ژ خه‌لكێ ڤان ده‌ڤه‌ران مشه‌ختبوونه‌ هه‌رێمێ و د هه‌مان ده‌مدا حوكمه‌ت و خه‌لكێ باشوورێ كوردستانێ كه‌تنه‌ د شه‌ره‌كێ بێ یه‌مان و نموونێن وی د دیرۆكێدا نه‌ی دگه‌ل رێكخراوا تیرۆریستی، گومان تێدا نینه‌ شه‌ر ب خوه‌ بارگرانیه‌كا هێژ مه‌زنتره‌ و پێدڤی ب شیانێن ئابووریێن مه‌زنه‌، هۆسا پرسگرێك چه‌ند جاركی مه‌زنتر لێهات و پشتیێ هه‌رێمێ هند گرانبوو كو د شیانێن حوكمه‌تێن خوه‌دی شیانێن مه‌زنێن ئابووریدا نه‌بوو خوه‌ ل به‌ر بگرن، ب هه‌رره‌نگه‌كی و شێوازه‌كی بیت حوكمه‌تا هه‌رێمێ خوه‌ ل به‌ر ڤی پشتیێ گران گرت و قووناغێن دژوار ژ ڤێ ئه‌زموونێ ده‌رباز كرن، لێ هێژ كاریگه‌ریێن وێ مانه‌ و خه‌لك و حوكمه‌ت ب ده‌ست ئه‌نجامێن بڕینا پشكا هه‌رێمێ ژ بۆدجا عیراقێ دنالن. هه‌رچه‌نده‌ ل ڤێ داویێ پێكهاتنه‌ك بۆ چاره‌سه‌ركرنا ئاریشێن د ناڤبه‌را هه‌رێمێ و حوكمه‌تا به‌غدا هاتیه‌مووركرن و مه‌زنه‌ به‌رپرسێن هه‌ردو ئالیان ب هیڤینه‌ بێته‌ جێبه‌جێكرن و ب جێبه‌جێكرنا پێكهاتنێ ژی پرسگرێكا ئابووریا نها ل هه‌رێمێ داوی بهێت یان سڤكتر لێ بهێت.
ل ڤێرێ ئه‌م پێدڤی ب هه‌لسه‌نگاندنه‌كا قووناغا برینا بۆدجه‌یا هه‌رێمی و كارڤه‌دانێن وێ ینه‌ د چه‌ند واره‌كاندا، هندی په‌یوه‌ندی ب خه‌لكێ هه‌رێمی ڤه‌ هه‌ی، هندی په‌یوه‌ندی ب خه‌لكێ و حوكمه‌تێ ڤه‌ هه‌ی، هندی په‌یوه‌ندی ب حوكمه‌تێ ب خوه‌ڤه‌ هه‌ی، هندی په‌یوه‌ندی ب خه‌لكێ هه‌رێمی ڤه‌ هه‌ی، ڤی خه‌لكی د دیرۆكا خوه‌یا هه‌ڤچه‌رخدا چه‌ند سه‌ربۆرێن ب ڤی ره‌نگی و دبیت خرابتر ژی دیتینه‌، لێ ل ئاستێ وان بوویه‌ و شیایه‌ خوه‌ ل به‌ر بگریت، دوا سه‌ربۆر ژی سه‌ربۆرا سالێن نوتان و دو دوورپێچێن ئابووریێن سه‌ر هه‌رێمی بوو به‌ری چه‌سپاندنا بریارا 986 یا نه‌فت به‌رامبه‌ری خوارنێ، ڤی خه‌لكی چه‌ند ساله‌كێن دژوار بۆراندن، هه‌ر چه‌نده‌ چه‌ند خاله‌كێن نه‌رێنی ژی هه‌بوون لێ شیا خوه‌ ل به‌ر بگریت، به‌لێ ڤێ جارێ خوه‌راگریا خه‌لكێ مه‌ خوه‌راگریه‌كا لاوازبوو و نه‌ ل وی ئاستی بوو ب شانازیڤه‌ د به‌رپه‌رێن دیرۆكێدا توومار بكه‌ین، د دو هه‌یڤێن به‌راهیێ یێن گیرووبوونا مۆچه‌یاندا ل چه‌ندین باژێر و باژێركێن هه‌رێمێ ب هزران كه‌س، نه‌ ل دژی مالكی و حكومه‌تا به‌غدا كو مووچه‌ برینه‌ به‌لكی دژی حوكمه‌تا هه‌رێمێ هاتنه‌سه‌رجاده‌یان، حزب و رێخستنێن سیاسیێن كوردستانێ و سازیێن راگه‌هاندنێ یێن سه‌ر ب وانڤه‌ و یێن سیبه‌ر و خوه‌ ب سه‌ربه‌خوه‌ دزانن هه‌ر ئێكی ب ره‌نگه‌كی هاندانا خوه‌نیشادان و مانگرتنان دژی حوكمه‌تا هه‌رێمێ دكرن و پشكه‌ك ژ مه‌رما مالكی بجهئینا ده‌مێ ده‌رباره‌ی كریارا برینا بۆدجه‌ی گۆتی: مه‌ بڕی دا خه‌لك دژی وان (مه‌ره‌م پێ حوكمه‌تا هه‌رێمێ بوو) رابن.. . !! دبیت پرسیار بێته‌كرن ئه‌رێ ما ئه‌و خه‌لكه‌ یێ نه‌حه‌ق بوو.. ؟ د به‌رسڤێدا ئه‌ز ژی دبێژم: به‌لێ ئه‌و خه‌لكه‌ یێ حه‌ق بوو، لێ حه‌قیا وی دبیته‌ نه‌حه‌قی ده‌مێ خه‌لكه‌ك بۆ مه‌ره‌مه‌كا خوه‌یا تایبه‌ت ب مهانه‌یا وێ حه‌قیێ خه‌لكی بینته‌ سه‌ر جاده‌یێ و ناڤتێدانا وی دژی ئالیه‌كێ دیاركری بكه‌ت بێی كو كاودان و ئه‌گه‌رێن وێ پرسگریكا هاتیه‌ پێش به‌رچاڤوه‌رگریت.

87

د داوی نڤیسینا خوه‌ دا ل ژێر ناڤێ (ده‌م نه‌هاتیه‌ بێژینێ ته‌ ئه‌ڤه‌ ژ كیڤه‌ ئینا؟؟) د هژمارا رۆژا 28/12 ڤێ رۆژنامه‌یێدا مه‌ چه‌ند تیشكه‌ك به‌ردابوونه‌ سه‌ر ئێشا گه‌نده‌لیێ كو پرانیا جڤاكێ مه‌ ڤه‌گرتیه‌ و چه‌ند هزره‌ك ژ بۆ چاره‌سه‌ریێ مه‌ به‌رچاڤكربوون، ل داویێ ژی مه‌ پێشنیازكربوو به‌رۆكا مه‌زنه‌ به‌رپرسێن گه‌نده‌ل بگرین و بێژینێ ته‌ ئه‌ڤه‌ ژ كیڤه‌ ئینا.. . ؟ د هه‌مان نڤیسیندا مه‌ ئاماژه‌ ب ئه‌نجامێن راپرسیا رێكخراوا سكالا و چاڤدێری كربوو كو دبێژن: 80%ی پشكداربوویێن راپرسیێ دبینن حوكمه‌ت و په‌رله‌مان نكارن دیارده‌یا گه‌نده‌لیێ چاره‌سه‌ربكه‌ن.. . !! د ڤێ نڤیسینێ دا دێ پرسیاركه‌م گه‌لۆ 80% پشكداربوویان كو ل دووڤ سیسته‌مێ راپرسیان دڤێت نوونه‌راتیا 80% جڤاكی بكه‌ن وان ب خوه‌ پرسیار ژ خوه‌ كریه‌ مه‌ چ كریه‌ بۆ ڤی جڤاكی.. ؟ مه‌ چ و چه‌ند پێشكه‌شكریه‌.. ؟ ده‌مێ ئه‌م دبێژین: حوكمه‌ت و په‌رله‌مان نكارن دیارده‌یا گه‌نده‌لیێ چاره‌سه‌ربكه‌ن.. . !! ئه‌رێ هه‌ر ئێك ژ مه‌ هندی په‌یوه‌ندی ب وی ڤه‌هه‌ی یان د شیانێن وی دا دیارده‌یا گه‌نده‌لیێ چاره‌سه‌ركریه‌ یان بزاڤا چاره‌سه‌ریێ كریه‌.. . ؟ ئه‌ز باوه‌رم ئه‌گه‌ر هه‌ریه‌ك ژمه‌ هندی په‌یوه‌ندی ب وی ڤه‌هه‌ی یان د شیانێن وی دا گه‌نده‌لیێ چاره‌سه‌ر بكه‌ت ئه‌ڤه‌ مه‌ ئه‌و دیارده‌یه‌ ژ ره و ریشال ئیناده‌ر، ده‌مێ گه‌نده‌لی ژ جه‌م مه‌ باردكه‌ت نه‌ وێریت كوینێ خوه‌ ل جهه‌كێ دی ڤه‌ده‌ت و نه‌ ژی كه‌سه‌ك ب ساناهی ل چ ئاستێ به‌رپرسیێ بیت دوێریت بچیته‌ ژێر وی كوینی.. . !! وی ده‌می دێ ئالیێن ده‌سته‌لاتدار ب ساناهی شێن وێ دیارده‌یێ چاره‌سه‌ركه‌ن.
دێ پرسیار هێته‌كرن چاوا.. ؟ وه‌لاتیێ ئاسایی چاوا دكاریت ڤێ چه‌ندێ بكه‌ت.. . ؟ به‌رسڤا ب ساناهیه‌، ئه‌رێ ئه‌گه‌ر ئه‌زێ تاك یان وه‌لاتیێ ئاسایی مامۆستامه‌، ئه‌ندازیارم، نوشدارم.. . هتد ب دلسۆژی كارێ خوه‌ ئه‌دا بكه‌م، چاوا ئێڤاران ده‌مێ ده‌رسێن خسوسی دده‌م ب هه‌مان ره‌نگ ل خواندنگه‌هێ ده‌رسا خوه‌ بده‌م، چاوا ده‌مێ د گه‌ل كۆمپانیه‌كێ یان بۆ پرۆژه‌كێ خوه‌یێ تایبه‌ت ئه‌ندازیاریا خوه‌ دكه‌م ب هه‌مان شێوه‌ دانێ سپێدێ ل فه‌رمانگه‌هێ ژی ئه‌ركێ خوه‌ ئه‌نجام بده‌م، چاوا ل نه‌خۆشخانه‌یا تایبه‌ت یان ل كلینیكا خوه‌ چاڤێ خوه‌ دده‌مه‌ نه‌خوشی ب هه‌مان شێوه‌ ل نه‌خوشخانه‌ و بنگه‌هێن ساخله‌میێ یێن ده‌وله‌تێ ژی چاڤێ خوه‌ بده‌مه‌ نه‌خوشی و خه‌مێ ژێ بخۆم.. . هتد ب هه‌مان شێوه‌ نموونه‌ د مشه‌نه‌ و دێ چه‌ند كته‌كان به‌رچاڤكه‌ین ئه‌زێ بازرگان و دوكاندار د سنووره‌كێ ره‌وادا كه‌ره‌سته‌یێن خوه‌ بفروشم.. . ، ئه‌زێ باخچه‌ڤان ب دروستی خزمه‌تا وی باخچه‌ی بكه‌م یێ ئه‌ز ژێ به‌رپرس و سه‌خبێریا وی بكه‌م.. . ، ئه‌زێ وه‌لاتی جهێ خوه‌ پاقژ راگرم، گلۆپێن ده‌رڤه‌ رۆژا نیڤرۆ نه‌هێلمه‌ هه‌ل، نه‌هێلم هه‌روه‌ ئاڤ ژ مالا من بچیت، د ده‌مێ خوه‌دا حه‌قێ ئاڤێ و كاره‌بێ بده‌م، كاره‌بێ ژ هێلا سه‌ره‌كی نه‌ دزم و مالا خوه‌ پێ گه‌رم كه‌م و خه‌لكه‌كێ دی ژێ بێ باهر كه‌م.. . !! دبیت كه‌سه‌ك بپرسیت گه‌لۆ ما ئه‌ڤه‌ ژی گه‌نده‌لینه‌.. . ؟ د به‌رسڤێدا دبێژم به‌لێ ئه‌ڤه‌ گه‌نده‌لینه‌ و گه‌نده‌لیا مه‌زن ژی ئه‌وه‌ مرۆڤ ب دروستی ئه‌ركێ خوه‌ ئه‌نجام نه‌ده‌ت. كورت كرمانجی ئه‌گه‌ر ئه‌زێ وه‌لاتی خوه‌ ژ گه‌نده‌لیێ بپارێزم، ب دلسۆژی ئه‌ركێ خوه‌ بجه بینم، وی چاخی گه‌نده‌لێ مه‌زن ژی نه‌وێریت زوو ب زوو گه‌نده‌لیێ بكه‌ت، ئه‌گه‌ر كر ژی دێ وێره‌كی بۆ من چێبیت بێژمێ گه‌نده‌لۆ گه‌نده‌لیێ نه‌كه‌.. .
دێ زڤرمه‌ڤه‌ ده‌سپێكێ بێژمه‌ڤه‌: هه‌رده‌مێ مه‌ پرسیار ژ خوه‌ كر مه‌ چ كریه‌ بۆ ڤی جڤاكی.. ؟ مه‌ چ و چه‌ند پێشكه‌شكریه‌.. ؟ و چاوا مه‌ ئه‌ركێ خوه‌ ئه‌نجامدایه‌.. . ؟ ئه‌ڤه‌ مه‌ 80% جڤاكێ خوه‌ ژ گه‌نده‌لیێ پاراست وی ده‌مێ 20% یا مایی ژی دێ خوه‌ پارێزیت و دێ ژ چاڤێن من و ته‌ ترسیت، هندی چاڤێن مه‌ د ڤه‌كری بن ئه‌و نه‌وێریت ئه‌وا وی دڤێت بكه‌ت.. .

77

9ێ كانوونا ئێكێ رۆژا جیهانیا رووب رووبوونا گه‌نده‌لیێ بوو، ل سه‌رانسه‌ری هه‌رێمێ چه‌ندین چالاكی هاتنه‌گێران، د هه‌ر چالاكیه‌كێدا ب ره‌نگه‌كی ئاماژه‌ ب گه‌نده‌لیێ هاته‌كرن، د هه‌مان ده‌مدا ژ ئه‌نجامێ روودانێن ڤێ داویێ ل وه‌لاتێ مه‌ و گورانكاریێن د ده‌سته‌لاتێ رێڤه‌برنێدا ل هه‌رێمێ رووداین ده‌نگێن دژی گه‌نده‌لیێ وێ بلند دبن و پێنگاڤێن بۆ كێمكرنا وێ دهێنه‌ هاڤێتن. یا من دڤێت ل ڤێرێ ل به‌ر رۆناهیا وان چالاكیان و سه‌روبه‌رێ نوو هه‌لسه‌نگاندنه‌كی بۆ گه‌نده‌لیێ بكه‌م، و سه‌روگوهه‌كان لێ بشكێنم و پێشنیازه‌كی بۆ كێمكرنا وێ نابێژم بنبڕكرنا وێ به‌رچاڤبكه‌م.
چ پێنه‌ڤێت ئێشا گه‌نده‌لیێ ب به‌رفره‌هی ئه‌ڤ وه‌لاته‌یێ ڤه‌گرتی، په‌ژیكه‌كا بهێزه‌ و بله‌ز به‌لاڤدبیت، كێم كه‌س خوه‌ ل به‌ردگرن، په‌ژیكێ به‌ری هه‌ر كه‌سه‌كی مه‌زنه‌ به‌رپرس و ده‌سته‌لاتدارێن ڤه‌گرتین و ژ وان ژی پێدا هاتیه‌ هه‌موو ته‌خێن جڤاكی، لێ ئه‌ز نه‌ دگه‌ل ئه‌نجامێن راپرسیا رێكخراوا سكالا و چاڤدێری مه‌ كو دبێژن: 80%ی پشكداربوویێن راپرسیێ دبینن حكومه‌ت و په‌رله‌مان نكارن دیارده‌یا گه‌نده‌لیێ چاره‌سه‌ربكه‌ن (وار، هژمار 1231 بپ7).. !!!، به‌روڤاژی ئه‌ز دبینم ئه‌گه‌ر باوه‌ری ب خوه‌ هه‌بیت، وان ب خوه‌ بڤێت و ده‌ست ژ به‌رژه‌وه‌ندیێن خوه‌ به‌رده‌ن، نه‌تنێ ئه‌و دكارن دیارده‌یا گه‌نده‌لیێ چاره‌سه‌ركه‌ن به‌لكی دكارن بنبڕ بكه‌ن، زۆر ب ساناهیه‌، چه‌ند بریاره‌ك پێ دڤێن، وێره‌كانه‌ بن و ژ هه‌موویان بگرن، بریار بیت هه‌ر ئێكی حه‌قێ وی ل دووڤ باوه‌رنامێ، تایبه‌تمه‌ندیێ، شاره‌زاییێ، ده‌مێن كاری، به‌رهه‌مێ وی و سالێن خزمه‌تێ بگه‌هیتێ، ئه‌ڤا دیتر پرسیار ژێ بێته‌كرن ته‌ ئه‌ڤه‌ ژ كیڤه‌ ئینا.. ؟ ده‌مێ مه‌زنه‌ به‌رپرس و رێڤه‌به‌ر د هێنه‌لادان، ئه‌گه‌ر لادانه‌كا كارگێری بیت ل دووڤ ئه‌و خزمه‌تا كری رێز لێ بێته‌گرتن، ئه‌گه‌ر ژ ئه‌نجامێ لاوازی و نه‌شیانا وی یان ژبه‌ر گه‌نده‌لیا وی بیت نه‌بێژنێ تو بخێربچی، به‌لكی بێژنێ وه‌ره‌ به‌ری بێیه‌ ڤێرێ ته‌ چ هه‌بوو و نها ته‌ چ هه‌یه‌، ئه‌ڤه‌ ته‌ ژ كیڤه‌ ئینایه‌.. ؟ نه‌ هند به‌لكی ئه‌گه‌ر به‌رسڤا وی نه‌یا باوه‌ریێ بوو و گه‌نده‌لی ل سه‌ر هاته‌سه‌لماندن، نه‌ تنێ ئه‌وا بری ژێ بستیننه‌ڤه‌ به‌لكی ل دووڤ یاسای بێته‌سزادان.. . وی ده‌می نه‌ ئه‌وێ پشتی وی دهێت دێ وه‌كی وی كه‌ت، به‌لكی ئه‌وێن ژ وی فێربووین، هه‌ڤكاری دگه‌ل وی كری، ئاسانكاری بۆ وی كرین، ب رێكا وی گه‌هشتینه‌ ئارمانجێن خوه‌یێن گه‌نده‌ل.. . هتد دێ پێڤه‌چن و دێ ده‌ست ژ وێ كریارێ به‌رده‌ن ئه‌وا هه‌تا نها دكر، هوسان دێ دیارده‌یا گه‌نده‌لیێ به‌ره‌ف چاره‌سه‌ریێ به‌ین، لێ هندی ب ڤی ره‌نگی بیت كو چه‌ندین ساله‌ ئه‌م دبینین: گه‌نده‌لۆ هه‌ره‌ مالا خوه‌، ئه‌وا ته‌ بری بۆ ته‌، ب هه‌مان پله‌ و مووچه‌ و ده‌رماله‌ تو ل دیوانا. .. . ی و سه‌رێ هه‌یڤێ وه‌ره‌ مووچه‌ و ده‌رماله‌یێن خوه‌ ب ده‌مژمێرێن زێده‌ڤه‌ وه‌رگره‌، نه‌ ته‌ چ ژ مه‌ و نه‌ مه‌ چ ژ ته‌، تو ب خێر و ئه‌م سلامه‌ت، هوسان نه‌ گه‌نده‌لیێ چاره‌سه‌ردكه‌ین و نه‌ ژی بنبڕ دكه‌ین، ژ ئێشه‌كێ دێ بیته‌ په‌نجه‌شێره‌كا كوژه‌ك.. . دوباره‌ ئه‌رێ ده‌م نه‌هاتیه‌ بێژینه‌ گه‌نه‌ده‌لی ته‌ ئه‌ڤه‌ ژ كیڤه‌ ئینایه‌.. ؟؟

114

چ ملله‌تان هندي‮ ‬كوردان سه‌رهاتي‮ ‬ل گه‌ل نه‌ته‌وه‌يێن جيرانێن خوه‌ نينن،‮ ‬هه‌كه‌ ب درێژيا ديرۆكێ ملله‌ته‌ك هه‌بيت مفا ژ سه‌ربۆر و ئه‌زموونێن خوه‌ وه‌رنه‌گرتبيت ئه‌و كورده‌،‮ ‬دبيت ئه‌ڤ بۆچوونه‌ بۆ هنده‌ك هه‌ست ناسكێن نه‌ته‌وه‌يي‮ ‬يا گران بيت،‮ ‬به‌لێ هه‌كه‌ كت كته‌ به‌رپه‌رێن ديرۆكا خوه‌ ڤه‌ده‌ين ب سه‌دان نموونێن ب ڤي‮ ‬ره‌نگي‮ ‬هه‌نه‌،‮ ‬ل ژێر هه‌ر درووشمه‌كي‮ ‬بيت مه‌ ده‌ستێ هاريكاريێ بۆ ملله‌تێن جيران درێژكريه‌،‮ ‬ب سه‌ر و مالێ خوه‌ قورباني‮ ‬بۆ دايه‌،‮ ‬ده‌مێن هه‌موو ده‌رگه‌ه لێ هاتينه‌گرتن مه‌ ده‌رگه‌هێ خوه‌ ل به‌ر وان ڤه‌كريه‌ و حه‌واندينه‌،‮ ‬ئه‌وا ژ مه‌ هاتي‮ ‬مه‌ بۆ وان كريه‌،‮ ‬لێ ده‌مێ گه‌هشتينه‌ ئارمانجێ خوه‌ نه‌ به‌س پاتكا خوه‌ دايه‌ مه‌،‮ ‬به‌لكي‮ ‬هه‌مان تڤه‌نگا هه‌تا دوهي‮ ‬ب پشته‌ڤانيا مه‌ شه‌رێ دوژمنێ خوه‌ پێدكر به‌رێ وێ تڤه‌نگێ دا سنگێ مه‌ و حاشايي‮ ‬ژ هه‌موو هاريكاريێن مه‌ كر‮.‬
پێداچوونه‌كا بله‌ز ب ديرۆكا عيراقێدا دياردبيت،‮ ‬ده‌سپێكا دامه‌زراندنا ده‌وله‌تا مه‌لكي‮ ‬له‌شكه‌ر و وه‌زاره‌تا به‌رگريا عيراقێ ب ده‌ستێن ئه‌فسه‌ر و ده‌ره‌جه‌دارێن كورد هاته‌دامه‌زراندن،‮ ‬كوردان هه‌موو شيانێن خوه‌ بۆ ئاڤاكرنا ڤي‮ ‬له‌شكري‮ ‬مه‌زاختن،‮ ‬لێ ده‌مێ كه‌تيه‌ سه‌ر پييان هێدي‮ ‬هێدي‮ ‬ئه‌فسه‌رێن كورد دانه‌ ئاليه‌كي‮ ‬و مه‌زنه‌ ئه‌فسه‌ر و فه‌رماندێن عه‌ره‌ب ده‌ستهه‌لات گرتيه‌ ده‌ست،‮ ‬به‌ري‮ ‬هه‌ر تشته‌كي‮ ‬به‌رێ وي‮ ‬له‌شكري‮ ‬دا كوردستانێ و شيانێن تۆپ و فرۆكه‌يێن خوه‌ د كوشتنا كوردان و كاڤلكرنا گوندێن واندا دياركرن‮. ‬
ده‌مێ نه‌ته‌وه‌په‌روه‌رێن عه‌ره‌ب سالا ‮9591‬ێ د بزاڤا شه‌وافيدا شه‌ر دژي‮ ‬ده‌وله‌تا كۆماري‮ ‬راگه‌هاندي،‮ ‬كورد به‌ري‮ ‬هه‌ر پێكهاته‌كا دي‮ ‬د هه‌وارێ چوون و ده‌وله‌ت ژ وێ پيلانێ پاراست،‮ ‬لێ هه‌ر ڤي‮ ‬ده‌سته‌لاتي‮ ‬ژ سالا ‮0691‬ێڤه‌ ده‌ست ب دژايه‌تيا كوردان كر،‮ ‬ل ئه‌يلوولا ‮1691‬ێ به‌ري‮ ‬له‌شكري‮ ‬دا كوردستانێ و شه‌رێ قركرنا كوردان راگه‌هاند،‮ ‬هه‌تا پيلانا جه‌زائيرێ ئادارا‮5791‬ێ‮ ‬،‮ ‬هه‌ر ده‌مێ رژێمێ ل هه‌ر جهه‌كي‮ ‬ل عه‌ره‌به‌كي‮ ‬ته‌نگاڤكربا و مه‌ترسي‮ ‬ل سه‌ر ژيانا وي‮ ‬هه‌با جهێ ره‌ڤا وان و تاكه‌ په‌ناگه‌ها ئاراما وان كوردستان بوو،‮ ‬هه‌رچه‌نده‌ د وي‮ ‬سه‌ربه‌ريدا په‌يڤا كوردستان ب ده‌ڤيدا نه‌دهات و ب‮ (‬شمال العراق‮) ‬ناڤدكر‮. ‬
د سه‌رده‌مێ شۆرشا گولانێدا جهێ ره‌ڤا عيراقيان ژ زۆرداريا به‌عسيان و په‌ناگه‌ها حزب و به‌رهه‌لستكارێن عيراقێ باره‌گايێن پێشمه‌رگه‌ي‮ ‬بوون،‮ ‬ل كوردستانێ رێكخستنێن خوه‌يێن سياسي‮ ‬و له‌شكه‌ري‮ ‬دامه‌زراندن،‮ ‬سه‌رهلدانا ‮1991‬ێ ب سه‌ردا هات دوباره‌ جهێ ڤه‌حه‌ويانا وان كوردستان بوو،‮ ‬تنێ ل هه‌رێمي‮ ‬ب ئازادي‮ ‬خه‌ون ب رۆژه‌كێڤه‌ د ديتن بزڤرنه‌ڤه‌ باژێر و گوندێن خوه‌،‮ ‬شه‌رێ ئازادكرنا عيراقێ ل ‮3002‬ێ ب سه‌رداهات،‮ ‬كورد به‌ري‮ ‬هه‌موويان د هه‌وارا باژێر و گوندێن عيراقێ چوون و پاراستن‮.‬
‮ ‬يه‌كه‌مين فه‌وجێن له‌شكرێ نوويێ عيراقێ ژ كوردان و ب شيانێن ئه‌فسه‌رێن كورد هاتنه‌ دامه‌زراندن،‮ ‬پێشمه‌رگان مه‌زنه‌ به‌رپرسێن عه‌ره‌بێن عيراقي‮ ‬و هه‌ستيارترين سازيێن به‌غدا د پاراستن،‮ ‬جهێ پێشمه‌رگه‌ لێ نه‌ي‮ ‬ئه‌و جهه‌ و ژيانا وان كه‌سان د مه‌ترسيێدا بوو‮…. ‬سه‌روبه‌ر ب ڤي‮ ‬ره‌نگي‮ ‬چوو،‮ ‬هه‌تا عه‌ره‌بێن شاره‌زا د خاپاندن و سه‌ردابرنا كورداندا جهێ پێ خوه‌ ديتي،‮ ‬سۆپا و ميليشياتێن خوه‌ ئاڤاكرين،‮ ‬ژ چاڤدێريا ئه‌فسه‌رێن بياني‮ ‬ده‌ركه‌تين،‮ ‬چه‌كێ نوو و بۆدجه‌ و ده‌سته‌لات گرتيه‌ده‌ست،‮ ‬دوباره‌ زڤرينه‌ڤه‌ ده‌وسا خوه‌يا به‌رێ،‮ ‬هه‌ر رۆژێ ب مهانه‌كي‮ ‬ده‌ست ب دوژمناتيا كوردان كر،‮ ‬هه‌رچه‌نده‌ خوه‌ ل به‌ر سنگێ ده‌سته‌لاته‌ك كوردي‮ ‬خودان شيان و له‌شكه‌ره‌ك رێخستي‮ ‬ديت،‮ ‬لێ ده‌ست ژ دوژمنايه‌تيا كوردان نه‌به‌ردا،‮ ‬خوه‌ ژ بجهئينانا مافێن ده‌ستووريێن كوردان ڤه‌دزي،‮ ‬گه‌ف ل ده‌ڤه‌رێن نوو رزگاركري‮ ‬دكرن،‮ ‬به‌رێ له‌شكري‮ ‬و ميليشياتێن خوه‌ ددا سنوورێ هه‌رێمي،‮ ‬بۆدجه‌يا پێشمه‌رگه‌ي‮ ‬و پاشتر‮ ‬يا هه‌رێمي‮ ‬بري،‮ ‬ده‌ست ب پيلانێن هه‌رێمايه‌تي‮ ‬و ناڤده‌وله‌تي‮ ‬دژي‮ ‬ده‌سته‌لاتێ سياسي‮ ‬و له‌شكه‌ري‮ ‬و ئابووريێ كوردستانێ كرن‮. ‬
مه‌ها حزيرانا چوويي‮ ‬سه‌روبه‌ره‌ك نوو هاته‌پێش،‮ ‬رێكخراوا تيرۆريستيا داعش د ناڤبه‌را شه‌ڤ و رۆژه‌كاندا ده‌ست ب سه‌ر ده‌ڤه‌رێن عه‌ره‌بێن سونه‌نشيندا گرت،‮ ‬پێنج تيپێن له‌شكرێ عيراقي‮ ‬ده‌ست ژ چه‌كي‮ ‬به‌ردان و هه‌ر سه‌ربازه‌ك و ئه‌فسه‌ره‌ك ب ره‌نگه‌كي‮ ‬ره‌ڤي‮ ‬و مه‌يدانا پڕ‮ ‬چه‌ك و دراڤ‮ ‬بۆ داعشيان هێلا،‮ ‬كورد د هه‌وارا ده‌ڤه‌رێن كوردستانيێن ده‌رڤه‌ي‮ ‬سنوورێ هه‌رێمێ چوون،‮ ‬ژ داگيركرنا تيروريستان پاراستن،‮ ‬نه‌ تنێ ل كوردێن وان ده‌ڤه‌ران به‌لكێ ل عه‌ره‌ب و پێكهاتێن دي‮ ‬ژي‮ ‬بوونه‌ خودان،‮ ‬ڤێ جارێ حوكمدارێن عه‌ره‌بێن عيراقێ‮ ‬يێن نه‌شياين ده‌مژمێره‌كێ به‌رامبه‌ري‮ ‬داعشيان به‌رخوه‌دانێ بكه‌ن كورد گوناهباركرن كو مفاي‮ ‬ژ ده‌ليڤه‌يێ ديتيه‌ و هنده‌ك ده‌ڤه‌ر داگيركرينه‌،‮ ‬ئه‌ڤه‌ د ده‌مه‌كيدا بوو تيروريستان گه‌ف ل به‌غدا دكرن و نها ژي‮ ‬يێ گه‌فان لێ دكه‌ن،‮ ‬سێ هه‌يڤ بۆرين سۆپايێ پڕچه‌كێ عيراقێ نه‌شيايه‌ بهوسته‌كێ ژ وان ده‌ڤه‌ران‮ ‬يێن داعشيان گرتين بزڤرينته‌ڤه‌،‮ ‬باژێركێ ئامرليێ شيعه‌نشينێ پارێزگه‌ها سه‌لاحه‌دين نێزيكي‮ ‬سێ هه‌يڤان بوو‮ ‬يێ دوورپێچكري‮ ‬ژ ئاليێ تيروريستێن داعشڤه‌،‮ ‬د سه‌روبه‌ره‌كێ دژوار دا بوو،‮ ‬هه‌رده‌م د ترسا هندێدا بوو داعش باژێري‮ ‬بگريت و قرا خه‌لكێ وي‮ ‬بينيت‮.‬
‮ ‬پشتي‮ ‬مه‌رجه‌عێن شيعان گه‌ف ل ده‌سته‌لاتدارێن به‌غدا كرين كو د هه‌وارا خه‌لكێ ئامرلي‮ ‬بچن،‮ ‬ب رێيا فروكه‌خانه‌يا سلێمانيێ ميليشياتێن هێزا به‌در نێزيكي‮ ‬ئامرلي‮ ‬كرين،‮ ‬ب هاريكاريا هێزێن پێشمه‌رگه‌ي‮ ‬و پشته‌ڤانيا فروكه‌يێن ئه‌مريكا شياين دۆرپێچا سه‌ر باژێركي‮ ‬بشكێنن و خه‌لكێ مه‌ده‌نيێ وي‮ ‬ژ گه‌فێن قركرنێ رزگاربكه‌ن،‮ ‬نه‌تنێ كه‌نالێن عه‌ره‌بيێن عيراقێ خوه‌ ب سه‌ر رۆلێ سه‌ره‌كيێ پێشمه‌رگه‌ي‮ ‬ڤه‌نبر،‮ ‬به‌لكي‮ ‬پشتي‮ ‬داويهاتينا كريارا رزگاركرنا ئامرلي‮ ‬هادي‮ ‬ئه‌لعامريێ فه‌رماندێ هێزێن به‌در و مه‌زنه‌ سه‌ركردێ شيعه‌يێن عيراقي‮ ‬هێرشه‌كا دژوار كره‌ سه‌ر پێشمه‌رگه‌ي‮ ‬و وه‌زاره‌تا پێشمه‌رگه‌ي‮ ‬و هوشداري‮ ‬دا كوردان كو دڤێت پێشمه‌رگه‌ ژ كه‌ركووكێ ڤه‌كشيێته‌ڤه‌ و تشته‌ك نينه‌ بێژنێ نه‌ڤه‌كشيان‮… ‬هتد ئه‌ڤ زێده‌گاڤيه‌ ژي‮ ‬ل كه‌ركووكێ و ل سه‌ر ئاخا كوردستانێ ل كوردان كرن،‮ ‬ب ڤي‮ ‬هه‌لويستي‮ ‬ژي‮ ‬راستيا خوه‌ گۆت‮…!! ‬
ئه‌و راستيا ئه‌م كوردێن خوشباوه‌ر ل به‌ر چاڤێن خوه‌ به‌رزه‌ دكه‌ين‮…! ‬ئه‌و راستيا ئه‌م كورد پێڤه‌نه‌چين مفاي‮ ‬ژ سه‌ربۆر و ئه‌زموونێن خوه‌ ل گه‌ل عه‌ره‌بان وه‌رنه‌گرين،‮ ‬ئه‌و راستيا ره‌سه‌ناتيا عه‌ره‌بان دياردكه‌ت كو هند هه‌ڤالێن كوردانه‌ هندي‮ ‬پێدڤي‮ ‬دبنێ و مفا ژێ وه‌ردگرن،‮ ‬ده‌مێ پێدڤي‮ ‬ژي‮ ‬نه‌بن هنده‌ كورد دڤێن كوله‌يێن وان بن،‮ ‬سه‌ر و سامانێن كوردان بۆ وان حه‌لالبن،‮ ‬هه‌رده‌مێ كورده‌ك بێژيت‮: ‬نه‌ ئه‌ڤه‌ خوينا وي‮ ‬حه‌لاله‌ و سامان نامووسا وي‮ ‬ژي‮ ‬غه‌نيمه‌يه‌‮. ‬

website security
WP Facebook Auto Publish Powered By : XYZScripts.com