NO IORG
Authors Posts by نزار مجید

نزار مجید

نزار مجید
20 POSTS 0 COMMENTS

34

سه‌ره‌رایى كو چه‌ندین كه‌نال ل باشۆرێ كوردستانێ ب ناڤێ كه‌نالێن زارۆیان هاتینه‌ ڤه‌كرن لێ ژ به‌ر كو پرانى دبێ پلان و ئارمانج بووینه‌ زوى مرینه‌ و شوونوارژى نه‌ماینه‌ و زارۆ بخوه‌ ڤه‌ گرێداینه‌ و زوو ئێكسپاربووینه‌، ژ به‌ر كو بۆ هه‌ر كاره‌كێ پلان نه‌بیت كه‌فتنه‌ك نه‌ چاڤه‌رێ كرى دێ بته‌ ئه‌نجام هه‌لهه‌لۆك ژى ئێك ژ وان كه‌نالایه‌ كو د ڤان رۆژان دا ده‌ست ب وه‌شانا خوه‌ كریه‌ و بنگه‌هێ كه‌نالێ ناڤهاتى ل پارێزگه‌ها دهۆكێ یه‌ من دڤێت ب رێیا ڤێ نڤیسنێ هنده‌ك تیبنیێن ره‌خنه‌یى ئاراسته‌یى كه‌نالێ ناڤبرى بكه‌م، به‌رى ئه‌و ژى بگه‌هنه‌ كاروانێ كه‌نالێن دى یێن مرى.
جارێ وه‌ك ناڤ:
(هه‌لهه‌لۆك) هه‌ر چه‌نده‌ ناڤه‌كێ داره‌كا كوردى یا ب به‌رهه‌مه‌ و ناڤه‌كێ به‌ربه‌لاڤه‌ ل هه‌مى به‌هدینان لێ ناڤه‌كێ درێژه‌ و دبیت ل سه‌ر زارێ زارۆیان ب گۆتن یا ب زه‌حمه‌ت بیت و ل ده‌مێن داهاتى ژى بۆ رێڤه‌به‌ریا تیڤیێ ژى دێ دیاربیت كو ناڤه‌كێ ب زه‌حمه‌ته‌ بۆ نموونه‌ ل سه‌ر لۆگۆیى وه‌ك نڤیسین دیسا هه‌كه‌ وه‌ك ستران پێ گۆتن ژى هه‌لهه‌لۆك هند یا ب ساناهى نابیت بێته‌ گۆتن ناڤێن خوه‌شتر هه‌بوون.
كه‌سێن ئه‌كادیمى یان خودان ئه‌زمۆن چه‌ندا گرنگه‌ و بۆچى؟
هه‌ر چه‌نده‌ ژنێزیك ڤه‌ من زانیارى هه‌نه‌ كو كه‌سێن ل كه‌نالێ هه‌لهه‌لۆك كاردكه‌ن دبت د ئه‌كادیمى نه‌بن لێ به‌گراوه‌نده‌ك ل ده‌مێن بۆرى دا هه‌یه‌ و خودان ئه‌زمۆنن ژ به‌ ركو د ماوێ بۆرى دا كارێن ل سه‌ردروستكرنا كلیپ و به‌رنامه‌یێن زارۆیان كرین ئه‌ڤ چه‌نده‌ دێ بیته‌ پالده‌ره‌ك د سه‌ركه‌فتى بن لێ ب مه‌رجه‌كێ مفا ژشاشیێن بۆرى وه‌رگرت بن.
كه‌سێن دئێنه‌ هلبژارتن بۆ كه‌نالى ب تایبه‌ت سترانبێژێن زارۆ: گه‌له‌كا گرنگه‌ لێژنه‌یه‌ك هه‌بیت بۆ كه‌سێن ژ هه‌ژى و ده‌نگخوه‌ش بێنه‌ هلبژارتن كو ببنه‌ خودیكا شاشێ زارۆ ب ده‌نگ و ره‌نگێ وانڤه‌ بێنه‌ گرێدان دبیت ریڤه‌به‌ریا كه‌نالى بیژیت ئه‌م ژى ڤێ دزانین لێ یا هه‌رى گرنگ ئه‌وه‌ بازرگانى ب وى یان وێ زارۆى نه‌ئێته‌ كرن ب راستى و زه‌لالى بۆ ده‌یك و بابێن وان بێژن ب شێوێ گرێبه‌ست داهاته‌كێ ب ده‌نه‌ وان كه‌سێن هوون دهه‌لبژێرن یان هوون به‌رهه‌مى بۆ دروست دكه‌ن و بهایێ فرۆتنا به‌رهه‌مى و ریكلامان هوون دشێن وه‌ك تیڤى خوه‌ژى ب خودان بكه‌ن و وى یا وێ زارۆێ ژى ب خودان بكه‌ن.
داهات و مه‌زاختى: هه‌رچه‌نده‌ من چ زانیارى نینن كا سه‌ره‌داڤێن كه‌نالێ هه‌لهه‌لۆك كى پالپشتیا دارایى دكه‌ت، لێ هه‌رچاوا بیت پێدڤیه‌ پلانه‌كا باش و زه‌لال بۆ هه‌مى كارمه‌ندێن خوه‌ هه‌بیت و نه‌مینته‌ ب هیڤیا حزب و حوكمه‌ت و بازرگانه‌كێ ڤه‌ و ل دووماهیێ ده‌رگه‌هێن دوعا ڤه‌كه‌ت و دوعا بۆ بكه‌ین كو نه‌ئێته‌ داخستن.
گرنگیدان ب په‌یامه‌كا راست: گه‌له‌كا گرنگه‌ ب رێیێن ساخله‌م په‌یامه‌كا راست و دروست بگه‌هیته‌ زارۆیان ژ لایێ هه‌ستا نه‌ته‌وى ڤه‌ دوور ژ هزرێن به‌رته‌نگێن پارتێن كلاسیك و گرنگیێ ب سمبۆل و پیرۆزیێن كوردستانێ ژ هه‌مى روویه‌كێ ڤه‌ بده‌ت، هه‌ردیسا ژ لایێ فێركرنا رێیێن زانستى په‌روه‌رده‌یى و ده‌روونى ڤه‌ ببیته‌ خودیكه‌كا پێشه‌نگ بۆ ئاڤاكرنا هه‌مى زارۆیێن كوردستانێ ب گشتى و ل هه‌مى به‌هدینان ب تایبه‌تى.
كه‌ربوكین و هه‌ڤركى یا ستێران: دبت گه‌له‌ك كه‌س حێبه‌تى بمینن لێ من و گه‌له‌ك كه‌سان ئه‌ڤ چه‌نده‌ ل كه‌نالێن دى یێن زارۆیان دیتینه‌ هنده‌ك ب شه‌ڤ و رۆژ ل سه‌ر شاشه‌یان بین و ل ئاهانگێن زارۆیان و هنده‌ك زارۆیێن دى ژ وان زیره‌كتر و ده‌نگخوه‌شتر، لێ مخابن بوونه‌ پالێن پیشى و هه‌ستَن وان دهاتنه‌ شكاندن هیڤیا من ئه‌وه‌ ڤێ چه‌ندێ ل هه‌لهه‌لۆك دا نه‌بینم.
رێنڤیس و ده‌ڤوك و گرنگیا وێ: ژ به‌ر كو دێ بته‌ كه‌ناله‌ك هه‌مى زارۆ خوه‌ تێدا ببینن و كه‌ناله‌ك ئه‌سمانى یه‌ ئه‌ڤجا فه‌ره‌ گرنگیێ ب هه‌ردو رێنڤیسا بده‌ن (ئارامى و لاتینى) ژ بلى ده‌ڤۆكێن دى یێن كوردى لێ یا هه‌رى گرنگ وێ ڤالاتیا ل به‌هدینان هه‌یى پر بكه‌ن و سه‌ركه‌فتنێ بۆ كه‌نالێ هه‌لهه‌لوك دخوازم من گه‌له‌ك تێبینى یێن دى هه‌نه‌ بلا ده‌مێن داهاتى بن.

21

سه‌ره‌رایى كو ل ده‌ستپێكا راگه‌هاندنێ ل سه‌رانسه‌رى جیهانێ ب رێكا رۆژنامێ بوویه‌، ئانكو نڤیسكى پاشان رادیو پاشان تیڤى و پاشان تۆرێن ته‌ڤبپیركێ، یا كو دبێژنێ جیهانگیرى یا ته‌كنۆلۆژیایێ یا ئنته‌رنێتێ، لێ هێدى هێدى پشتى زێده‌بوونا مرۆڤان و گورانكاریێن جیهانێ و پێشكه‌فتنا زانستى ب رێكێن دن یێن ب له‌ز رۆژنامه‌ و كۆڤارێن نڤیسكى به‌ر ب لاوازبوونێ ڤه‌ دچیت و كوردستان ب تایبه‌ت ل باشووری ب ره‌نگه‌كێ به‌رچاڤ به‌ر ب نه‌مانێ ڤه‌یه‌.
هه‌رچه‌نده‌ ل وه‌لاتێن رۆژئاڤا هێشتا تا راده‌یه‌كێ به‌رچاڤ رۆژنامه‌یان تام و رۆلێ خوه‌ هه‌یه‌ و تیراژێن هنده‌كا ب شێوه‌یه‌كێ ئاشۆپى دكه‌ڤیته‌ د ناڤا بازاران دا و خوانده‌ڤانێ خوه‌ ژى هه‌یه‌، ژبه‌ركو ل سه‌ر میكانزمه‌كا راست و دروست په‌یاما ئاراسته‌یى جادێ دكه‌ن وه‌ك راگه‌هاندن و گرنگیدان ب پره‌نسپێن رۆژنامه‌ڤانى و ژڤانێ به‌لاڤكرنێ و گه‌هاندنێ ل هه‌مى جه و ده‌ڤه‌رێن وه‌لاتى لێ هه‌ین یا ژهه‌میێ گرنگتر باوه‌رى و راستگۆیى د هه‌مى بیاڤان دا بۆ به‌رژه‌وه‌ندیا گشتى، لێ ب گشتى گه‌له‌ك كێم بوویه‌، سه‌ره‌رایى ڤان هه‌مى هه‌ول و بزاڤان ژى هه‌ر خوانده‌ڤانێ نڤیسكى ل وه‌لاتێن رۆژئاڤایى ل كێمێ دایه‌ ئه‌و ژى ژبه‌ر سه‌ده‌مێن پێشكه‌فتنا زانستى ته‌كنۆلۆژیایێ، ژبه‌كو راگه‌هاندنا نڤیسكى ئێدى گه‌له‌ك جاران په‌یامێن گرنگ یێن گرێدایى خه‌لكێ و بوویه‌رێن جیهانى ب ده‌نگ و ره‌نگ دئێنه‌ دیتن د ماوێ چه‌ند چركه‌یان دا دگه‌هیته‌ هه‌مى قولاچێن جیهانێ، ئانكو ساربونه‌ك و ئێكسپایه‌ربوونا وێ په‌یامێ بۆ رۆژا باشتر چ بهایێ خوه‌ نامینت ئه‌ڤه‌ ل وه‌لاتێن رۆژئاڤایى ب ڤى ره‌نگى یه‌، لێ ل كوردستانێ ب تایبه‌ت ل باشوور هه‌ر چه‌نده‌ هه‌مان ئاریشه‌ هه‌یه‌، لێ دیسان هه‌كه‌ پێداچوونه‌كێ وه‌ك به‌راوردیه‌كێ بكه‌ین دێ هنده‌ك جوداهى یێن دى ژى هه‌بن كو رۆژنامه‌یا نڤیسكى ژبه‌ر وان سه‌ده‌مان رۆلێ خوه‌یێ جاران نه‌مایه‌ و دبیت ل ده‌مه‌ك نێزیك ب ئێكجارى بێژین رۆژنامه‌یان ل باشوور مالئاڤى كرن، ئه‌و ژى هه‌بوونا پارتێن كوردستانێ ل ده‌ستپێكێ تا نوكه‌ هه‌ر ئێكى ژلایه‌كێ خوه‌ڤه‌ ب تنێ ب به‌ژن و بالا خوه‌ و په‌یاما پارتا خوه‌ دگه‌هانده‌ لایه‌نگرێن خوه‌ و پارێن ئاشۆپى دهاتنه‌ مه‌زاختن بۆ سازیا ئورگانێ پارتا خوه‌ بێ كو گرنگیێ ب كارێ رۆژنامه‌ڤانیا راست و دروست بده‌ت و گه‌له‌ك جاران ب درووشمان خه‌لك دهاته‌ خاپاندن و خه‌لكى ئه‌و راسته‌ زانین ئێدى باوه‌رى ژده‌ست دا و هه‌تا نوكه‌ ل كوردستانێ هه‌میێ چ رۆژنامه‌یان هه‌ر ژ ده‌ستپیكێ تا نوكه‌ چ جارا ل وه‌ختێ خوه‌ ده‌رنه‌كه‌تیه‌ و چاپ نه‌بوویه‌ بۆ نموونه‌ ل رۆژێن بێهنڤه‌دانا رۆژنامه‌ ژى بێهنا خوه‌ ڤه‌دده‌ت ئه‌ڤه‌ به‌س ل وه‌لاتێن رۆژهه‌لاتى و باشوورێ كوردستانێ یا هه‌یى هه‌كه‌ ل چ جهان نینه‌، خاله‌كا دن قه‌یرانا دارایى ژى وه‌كى دیار رۆژ بۆ رۆژى ده‌رگه‌هێن رۆژنامه‌یان یێن دئێنه‌ گرتن ژبه‌ر نه‌بوونا پشته‌ڤانیا دراڤى، هه‌تا بزنس مانێن كوردستانێ ژى رۆژنامه‌ ب گرنگ نه‌دیتن، ژبه‌ركو قازانجا وان یا سه‌دى سه‌د تێدا نه‌بوو پڕانیا قه‌ستا تیڤیان كرن و ریكلامێن خوه‌ د شاشێن تیڤیان دا قازانج پتر بوو، دیسان تۆرا ته‌ڤنپیركێ ئانكو ئنته‌رنێت ژى ل ڤێ دووماهیێ ل كوردستانێ و سه‌رانسه‌رى جیهانێ كو بوویه‌ پشكه‌كا رۆژانه‌ ژ ژیانا خه‌لكى گه‌له‌ك جاران په‌یامه‌كا گه‌رم د چه‌ند چركه‌یان دا ب ملیۆنان كه‌س ب ده‌نگ و ره‌نگ دبینن كه‌واته‌ ده‌مێ ئه‌و بوویه‌ره‌ بێته‌ دیتن ئێدى ل رۆژنامێ چ بهایێ خوه‌ نامینت و دى بیته‌ په‌یامه‌كا بۆرى و پتریا رۆژنامێن ئه‌ڤرۆ هه‌ین ژى هه‌ر رۆژنامه‌یه‌كێ مالپه‌ره‌ك هه‌یه‌ دشێن ل هه‌ر جهێ لێ بین ببینین و بخوینین كه‌واته‌ ئێدى نه‌شێن خوه‌ ل رۆژا باشتر بگرین هه‌تا رۆژنامه‌ دگه‌هیت، ژبه‌ركو پێشوه‌خت هاتیه‌ دیتن و خواندن هه‌رچه‌نده‌ زۆربه‌یان جاران رۆژنامه‌ ده‌ردكه‌ڤیت و پاشى دكه‌ڤیته‌ د مالپه‌ران دا، لێ هه‌ر دیسان ژى چ نائێته‌ گوهۆرین و خه‌لك مه‌جبور نینه‌ ده‌م و پاره‌ بۆ خه‌لكى گرنگه‌ ئه‌ڤرۆ ب موبایلێ هه‌ر تشت دئیته‌ دیتن و گوهلێبوون و خواندن، ئانكو جیهانگیرى بۆ هه‌مى كه‌سان (كوره‌ و كه‌ڕ و لال و خوانده‌ڤان) مفایى ژێ وه‌ردگرن و دوماهیك ب خێر.

30

پشتى چه‌ندین جاران ب ئاشكرایى سازیێن راگه‌هاندنێ زیان گه‌هاندینه‌ پێشمه‌رگه‌ی و ئه‌گه‌رێ سه‌ره‌كى ئه‌و بوویه‌ كو رۆمالا زیندى دكرن و كار و پلانێن سه‌ربازى یێن كو ب هه‌یڤا ئاماده‌كارى پلان ژ لایێ فه‌رماندا گشتى یا هێزێن پێشمه‌رگه‌ى و هه‌ڤپه‌یمانان ڤه‌ بۆ هاتیه‌ دارێشتن ب چه‌ند خوله‌كان ئه‌و پلانه‌ دهاته‌ ئاشكراكرن ب رێكا كه‌نالێن راگه‌هاندنێ د ده‌مێن بۆرى دا و ب تایبه‌ت هێرشا رۆژێن بۆرى یا چه‌كدارێن داعش بۆ سه‌ر كه‌ركووكێ و دیسان ئۆپه‌راسیۆنا كونترۆلكرنا مووسل و ده‌ردورێن وێ.
هه‌لبه‌ت پشتى بێ ده‌نگیه‌كا درێژ وه‌زاره‌تا داد ب هه‌ر ره‌نگه‌كێ هه‌بیت ل رۆژا 24/10/2016ێ هه‌لویستێ خوه‌ ب بریار دیار كر، لێ چه‌وا؟ بێ كو بچیته‌ د ناڤا كووراتیا بابه‌تى دا ل سه‌رێ نڤیسارێ ب تنێ ئاماژه‌ بۆ سێ كه‌نالان دیار كریه‌ كو نابیت ئه‌ڤ هه‌ر سێ كه‌ناله‌ په‌خشێن زیندى ل به‌روكێن شه‌رى و ل ناڤا باژێران ڤه‌گوهێزن ئه‌و ژى كه‌نالێن (كوردستان بیست و چار، ئێن ئار تى، روداو) و تێدا دیار كریه‌ زه‌حمه‌تا وه‌ جهێ رێزێ یه‌، لێ ژبه‌ركو مه‌ دیت زیان دگه‌هنه‌ پێشمه‌رگه‌ى و بارودوخ نه‌دگونجایى نه‌ و پێدڤیه‌ هوین ل به‌ر چاڤ وه‌رگرن مه‌ره‌ما ڤێ نڤیسارێ ب تنێ سێ كه‌نالێن ناڤهاتى نه‌ و هه‌ر دیسان د نڤیسارێ دا هاتیه‌ ئاگه‌هدارى كامیره‌ڤان و په‌یامنێرێن كه‌نالێن خوه‌ بكه‌ن ل ده‌مێ ل به‌روكێن شه‌رى په‌خشێن راسته‌خۆ راگرن و پشتى چه‌ند خوه‌له‌كان پاشى بۆ بینه‌ران وان دیمه‌نان ڤه‌گوهێزن ل ڤیرێ ژى دیسان هه‌ر ب تنێ به‌حسێ هه‌ر سێ كه‌نالایه‌ نه‌ زیده‌تر، پرسیار ئه‌رێ جه‌نابێ داواكارێ گشتى ئه‌رێ كه‌نالێن دى یێن كوردى و بیانى ب واته‌یا نڤیسارا هه‌وه‌ دشێن په‌خشێن راسته‌خۆ بكه‌ن یان نه‌؟ به‌رسڤ ئه‌ز و تو و هه‌مى دزانین به‌رسڤ به‌لێ یه‌! چونكو بریار بۆ سێ كه‌نالان ده‌رچوویه‌ و وه‌ك قانوون مافێ وان كه‌نالایه‌ ژبلى یێن وه‌ دیاركرى رێك پێ دئێته‌ دان رۆمالێن زیندى بكه‌ن ب هه‌مى ره‌نگان و هوین نه‌شێن چ پێ رابوونێن قانوونى دگه‌ل بكه‌ن، ژبه‌ركو د نڤیسارا هه‌وه‌ دا بریار نه‌گشتاندنه‌، خاله‌كا دى یا شاش ئه‌رێ چ جوداهى هه‌یه‌ د رۆنكرنێ دا د ناڤبه‌را په‌خشێن زیندى و پشتى چه‌ند خوله‌كان دا؟ كه‌واته‌ ئه‌و كه‌نالێن دیمه‌نان ڤه‌دگوهێزن مافدارن وه‌ك قانوون پشتى خوله‌كه‌كێ دیمه‌نان ب وه‌شینن! باشه‌ ب خوله‌كان دێ چ ژ هه‌ڤكێشێ ئێته‌ گوهۆرین؟ ئانكو هه‌ر هه‌مان رۆلێ زیندى ب تنێ خوله‌كه‌ك جودایه‌، كه‌واته‌ هه‌مان زیان دێ ب گه‌هیته‌ پێشمه‌رگه‌ی و كه‌نال ژى دێ هه‌ر ل سه‌ر یا خوه‌ به‌رده‌وام بن و داعش ژى دێ ب خوله‌كان چاڤه‌رێ دیمه‌نان و پلانێن پێشمه‌رگه‌یى كه‌ن!، یا ئێكجار شاش و جهێ حێبه‌تیێ چ ئاماژه‌ ب رێكارێن سزایى نه‌هاتینه‌ دیاركرن ئه‌گه‌ر هات و پێگیرى ب ڤێ بریارێ نه‌ ئێته‌ كرن، كه‌واته‌ چ پێرابوون دگه‌ل چ سازیێن راگه‌هاندنێ نائێنه‌ كرن ئه‌گه‌ر پێگیر نه‌بوون!.
ل دوماهیێ هیڤیدارم ژ وه‌زاره‌تا پێشمه‌رگه‌ی و جه‌نابێ داواكارێ گشتى پێداچوونه‌كێ د ڤێ بریارا شاش دا بكه‌ن و راستڤه‌كه‌ن و پاشان ببیته‌ گشتاندن بۆ هه‌مى سازیێن كوردستانێ و جیهانى، دا كوردستان و ژیانا پێشمه‌رگه‌ی پاراستى بیت.

52

هه‌لبه‌ت راگه‌هاندن ب شێوه‌یه‌كێ گشتى قانوون و پره‌نسپێن خوه‌ هه‌نه‌ بۆ ڤه‌گوهاستنا هه‌ر بوویه‌ره‌كێ، گه‌له‌كا گرنگه‌ وان مه‌رج و پره‌نسپیان په‌یره‌و بكه‌ت یێن هاتینه‌ دیاركرن وه‌ك پیشه‌ و پرۆفیشنال بوون و خالێن گرنگ ل به‌ر چاڤ بێنه‌ وه‌رگرتن، نه‌خاسمه‌ رۆمالا جه‌نگێ جودابوونه‌ك مه‌زن هه‌یه‌ دگه‌ل رۆمالێن دى یێن دهێنه‌ روودان.
وه‌ك دیار عیراق ب گشتى و هه‌رێما كوردستانێ وه‌ك باشوورێ كوردستانێ ب تایبه‌تى تووشى به‌رسینگگرتنا شه‌رێ تیرۆرى یێ ده‌وله‌تا ب ناڤ ده‌وله‌تا ئیسلامى یا عیراق و شامێ بووینه‌، گه‌له‌ك شاشیێن مه‌زن د ماوێ سالێن بۆرى دا هاتینه‌ كرن، ب تایبه‌ت د بیاڤێ راگه‌هاندنێ دا ژبلى شاشیێن هێزێن پێشمه‌رگه‌ی، چونكی شه‌رێ تیرۆرێ بۆ هه‌رێما كوردستانێ و عیراقێ ب گشتى شه‌ره‌كێ نه‌چاڤه‌رێكرى بوو، دیسان ژى شه‌ر كه‌ته‌ كولانا و باژێر و گوندان، هه‌لبه‌ت نێزیكى دو سال ده‌رباز بوون هێشتا ئه‌و شاشیه‌ یێن دئێنه‌ دووباره‌كرن ئانكو مفا ژ ئه‌زموونا سالێن بۆرى نه‌هاتیه‌ وه‌رگرتن وه‌ك راگه‌هاندن. به‌رى ب درێژاهى بچمه‌ د ناڤا بابه‌تى دا ل ڤیرێ هه‌كه‌ پیچه‌ك ل پاش زڤرینه‌كێ بكه‌ین ل ده‌مێ داگیركرنا عیراقێ ژلایێ ئه‌مریكا و هه‌ڤپه‌یمانان ڤه‌ ب هه‌مى ره‌نگا سازیێن راگه‌هاندنێ هاتبوونه‌ قه‌ده‌غه‌كرن كو خوه‌ نێزیكى جه و بوویه‌رێن وان جهان بكه‌ن یێن دئێنه‌ بوردومان كرن ب تنێ جهه‌ك هاتبوو ده‌ستنیشانكرن بۆ كۆنگرێن رۆژنامه‌ڤانى و داخویانیان ژلایێ ئه‌مریكا و دیسان ژلایێ حكوومه‌تا رۆخیایى یا عیراقێ ڤه‌ ژى ب هه‌مان شێوه‌ هه‌كه‌ سازیه‌كێ رۆماله‌كا راسته‌وخۆ كربیت ژى گه‌له‌ك ب دوورى و چ گرنتیا وى سازیێ نه‌بوویه‌ بێته‌ پاراستن ژ مه‌ترسیێن گیان.
ل باشوورێ كوردستانێ ئه‌ڤه‌ دو سال ده‌رباز بوون هه‌ر سازیه‌كا راگه‌هاندنێ هه‌بیت بێ مه‌رج رێ پێ دئێته‌دان قه‌ستا به‌رۆكێن شه‌ڕى بكه‌ت و رۆمالا خوه‌ دكه‌ت بێ كو بزانن ئه‌ڤ سازیه‌ دێ چ په‌یام گه‌هینیت ئه‌و ب خوه‌ د قانوونا سه‌ربازى دا نینه‌ سازیه‌كا راگه‌هاندنێ ب ئاشكرایى بچیته‌ د ناڤ دا ژبه‌ركو دبیت ئه‌و سازیه‌ كارێ سیخۆریێ بكه‌ت و ژماره‌ و جه و چه‌كى و هه‌میێ بۆ لایێ دى ئاشكرا بكه‌ت هه‌تا سیخۆریێ نه‌كه‌ت ژى بۆ جهێ دى ب ساناهى هه‌مى زانیارى دكه‌ڤنه‌ به‌ر ده‌ستى، نه‌خاسمه‌ په‌خشێن راسته‌خۆ.
یا گرنگ ل ڤێره‌ ئه‌وه‌ ب هه‌مى ره‌نگان په‌خشێن راسته‌خۆ بێنه‌ راگرتن ب تایبه‌ت ل ده‌مێ به‌رهه‌ڤیێن پێشمه‌رگه‌ی دئێنه‌ كرن بۆ هێرشكرنێ ل سه‌ر داعش و یا گرنگتر د ده‌مێ شه‌رێ به‌رده‌وام دا، ئه‌ڤجا گرنگه‌ وه‌زاره‌تا پێشمه‌رگه‌ی ژووره‌كا كۆنفراسان ل جهه‌كێ دوور ژ به‌رۆكێن شه‌رى ب دانیت و هه‌مى سازیێن راگه‌هاندنێ ل وێرێ بێنه‌ كۆمكرن و كه‌سه‌ك ب پله‌یا سه‌ربازى بێته‌ ده‌ستنیشانكرن داخویانیا بۆ راگه‌هاندنێ دیار بكه‌ت ل سه‌ر بوویه‌رێن هاتینه‌ روودان ژ هه‌مى روویه‌كى ڤه‌ و به‌رهه‌ڤیا خوه‌ دیار بكه‌ت ب شێوه‌یه‌كێ راست و دروست و به‌رسڤا رۆژنامه‌ڤانا ب ریكا داخویانیا بده‌ت. و رێك ب كه‌سێ نه‌ ئێته‌دان داخویانیا بۆ چ سازیان بده‌ت، خوه‌ ئه‌گه‌ر چ پلا سه‌ربازى هه‌بیت ژى ژبلى به‌رپرسێ راگه‌هاندنێ ب رێكا ژوورا پرێس كۆنفراسان، گه‌له‌ك جاران به‌ره‌لایى داخویانیێن جودا پێشمه‌رگه‌ی شكه‌ستن خواریه‌ یان په‌خشێن راسته‌وخۆ بووینه‌ ئه‌گه‌ر مورالا پێشمه‌رگه‌ی بێته‌ خوار و یان ژى ئه‌و جهه‌ ببیته‌ نێچیرا چه‌كدارێن داعش و بێنه‌ بوردومان كرن، ئه‌ڤجا نوكه‌ گه‌له‌كا ب مه‌ترسیه‌ ب تایبه‌ت شه‌رێ رزگاركرنا مووسل نێزیكه‌.

90

ب ڤه‌بوونا هه‌ر كه‌ناله‌كێ سیاسه‌ت و رێبازه‌كا خوه‌ یا تایبه‌ت ل دووڤ درووشمێ ئه‌و سازیه‌ دكه‌ته‌ ئارمانجا خوه‌ بۆ بینه‌ران كو ئه‌و په‌یاما هه‌ی بشێت ب سیاسه‌تا خوه‌ بگه‌هینت، هه‌لبه‌ت ڤه‌بوونا هه‌ر كه‌ناله‌كى مه‌ره‌مه‌ك یان نامه‌یه‌ك ڤێ هه‌یه‌ و دیسان به‌رژه‌وه‌ندیه‌ك دبن په‌ردێ دا ژى هه‌یه‌ چ وه‌ك ناڤداربوون یان ژى مه‌ره‌مه‌كا سیاسى و هونه‌رى وه‌رزشى و ئابوورى بیت.
دیتنا من ده‌رباره‌ى كه‌نالێن ل دهۆكێ و ئه‌گه‌رێ لاوازیا وان ڤه‌دگه‌ریت بۆ ڤان ئه‌گه‌ران:
نڤیسین: ئه‌و نڤیسینا ل سه‌ر سێجى دئێته‌ نڤیساندن ب رێنڤیسا ئارامى یه‌، ئانكو پیتێن عه‌ره‌بى، لێ ده‌مێ دبیته‌ ده‌مێ پێشكێشكرنا نووچه‌یان ب ڤى ره‌نگى دنڤیسن (nuce) باشه‌ هوون بۆچى ب ڤى ره‌نگى نانڤیسن (نووچه‌) وه‌كى دیار ل پرانیا سازیێن راگه‌هاندنێ ل دووڤ ستانده‌ردان دچن و گرنگیێ ب هه‌ردو نڤیسینان دده‌ن ل سه‌ر سى جى ب هه‌ردو نڤیسینان ب ره‌خ ئێك ڤه‌ دنڤیسن بۆ نموونه‌ (نوچه‌یێن وارتى ڤى و nuceyen wartv)راسته‌خۆ zindi هه‌لبه‌ت ئه‌ڤه‌ ژى شاشیه‌كا مه‌زنه‌ ل ده‌ستپێك ب لاتینى و پاشى نڤیساندن ب ئارامى.
زمان: هه‌لبه‌ت ئه‌و كه‌سێن ده‌نگ و باسان پێشكێش دكه‌ن گه‌له‌كا گرنگه‌ به‌گراوه‌نده‌كێ سیاسى و یاسایى و جڤاكى و زانیاریێن گشتى و ره‌وشه‌نبیریه‌كا باش هه‌بیت، نه‌وه‌كو روبوتان بیت چ ل سه‌ر ئوتوكیو یێ هاتیه‌ نڤیسان وێ بێژیت و ده‌مێ مێهڤانه‌ك یان بوویه‌ره‌ك ژ نشكه‌كێ ڤه‌ روو بده‌ت بكه‌ڤیته‌ دده‌ستێ خوه‌ و ئه‌و زمانێ بێژه‌رێن ده‌نگ و باسان ل دهۆكى پێشكێش دكه‌ن ب تنێ ل دهۆكێ و ده‌وروبه‌ران ژێ فام دكه‌ن نه‌زیده‌تر، ئانكو زاراڤه‌كێ لوكالى یێ ده‌ڤه‌رێ یه‌ ئه‌ڤ چه‌نده‌ دزڤریت بۆ ده‌سته‌یا پرودیوسه‌رێَن ده‌نگ و باسان و زمان زانێن ل وێ سازیێ كار دكه‌ن كو چ شاره‌زیه‌كا باش د ڤى بیاڤى دا نینه‌ و هه‌ر ئێك وه‌ك خوه‌ پێ دئاخڤیت، ئانكو چ رێیازێن تایبه‌ت نینن و ئه‌ڤ چه‌نده‌ ژى كێماسى و شاشیه‌كا مه‌زنه‌ كو كه‌سه‌ك دى ژبلى به‌هدینان دده‌نگ و باسێن ده‌ڤه‌رێ نه‌گه‌هیت.
بۆچى ب تنێ بادینى: ئه‌م دشێن بێژین ل پرانیا سازیێن كوردى یێن كوردستانێ و ده‌رڤه‌ی كوردستانێ ب تایبه‌ت به‌شێ ده‌نگ و باسان ب هه‌ردو زاراڤێن كرمانجى و سورمانجى ده‌نگ و باسان پێكڤه‌ پێشكێش دكه‌ن هه‌كه‌ پێكڤه‌ نه‌بن ژى، ئانكو هه‌ر ده‌مه‌كێ ده‌نگ و باسا ل هه‌ردو به‌شێن زاراڤێن من گۆتین هه‌نه‌، لێ ل چ كه‌نالێن به‌هدینان هه‌تا ڤێ چركێ مه‌ نه‌دیتیه‌، ئه‌ڤجا نزانم قه‌ده‌غه‌یه‌ یان ژى بۆ زه‌وق ئه‌ڤ چه‌نده‌ نه‌هاتیه‌ كرن.
بێژه‌ر: مه‌رجێن بێژه‌ریێ دبیت ژ گه‌له‌ك كه‌سان نه‌گرن یێن نوكه‌ بێژه‌ریێ دكه‌ن ژبه‌ر گه‌له‌ك ئه‌گه‌ران مینا سه‌روچاڤ و ده‌نگ و ره‌نگ و شێوازێ ئاخافتنێ نابیت هه‌ركه‌سێ ژخه‌و رابوو پرچا خوه‌ شه‌كر بچیته‌ ژوورا ده‌نگ و باسان و تشتێ سه‌رنجا من راكێشایى د ڤێ خالێ دا هنده‌ك ل سه‌ر پستوكا هنده‌كا خوه‌ دكه‌نه‌ قاره‌مان بێ كو شیانێن وى یان وێ ب خوه‌ ببیته‌ هانده‌ر كو بینه‌ر ب خوه‌ ببنه‌ دیده‌ڤانێن كارێ وى یان وێ ژبلى به‌گروانده‌كێ خالى، ئانكو سه‌رو سیما ژ هه‌ر تشتى گرنگتره‌.
دیمه‌نێن راسته‌وخۆ: پرانیا جاران دیمه‌نێن راسته‌وخۆ ژ كه‌نالێن ده‌ڤه‌رێ ده‌رباز بووینه‌ چونكه‌ گه‌له‌ك جاران ل دانێ سپێدێ بوویه‌رێن گرنگ په‌یدا بووینه‌ و كه‌س و رایه‌دارێن سیاسى و دبلوماسى قه‌ستا كوردستانێ كرینه‌ ئه‌ڤه‌ ژى نه‌گرنگه‌، چونكو ل وى ده‌مى سازیێن به‌هدینان ده‌نگ و باس نینن ب تشته‌كێ دیڤه‌ مژوولن ئه‌ڤه‌ ژى مافێ وانه‌، لێ یا ژ وێ كمباختر ئه‌وه‌ ده‌مێ بوویه‌ره‌كێ یان پرێس كۆنفرانسه‌كێ راسته‌خۆ ڤه‌دگوهێزن كا چه‌وا یه‌ ب وى ره‌نگى یه‌، ئانكو ئه‌و جامێره‌ ب چ زمان ب په‌یڤیت بێ كو بێته‌ وه‌رگێران دهێته‌ ڤه‌گوهاستن باشه‌ ته‌ بۆ ڤه‌گوهاست ماده‌م ته‌ وه‌رگێر نینه‌ ماده‌م پشتى ب دووماهیك هاتنێ تو یێ یان یا بێژه‌ر ته‌ شیان نینن بۆ بینه‌رى شرۆڤه‌ ب كه‌ى ب راستى نزانم مه‌ره‌م ژڤێ چه‌ندێ چی یه‌.
راپۆرت: ده‌مێ به‌لاڤكرنا راپۆرتان د ناڤا ده‌نگ و باسان دا ریپۆرته‌ر ده‌مێ راپۆرته‌كێ به‌رهه‌ڤ دكه‌ت هه‌لبه‌ت دچه‌ندین قووناغان دا ده‌رباز دبیت كه‌سێن سه‌رپه‌رشتێن ده‌نگ و باسان دكه‌ن گه‌له‌كا گرنگه‌ ب هووربینى پێداچوونێ د وێ راپۆرتێ دا بكه‌ن پتریا راپۆرتان ئه‌و پێڤه‌ر و مه‌رجێن راپۆرتێ د راپۆرتا وى دا نینن و پتریا راپۆرتان چ ناڤه‌رۆك نینه‌ یان دووماهیك و ژبلى وێ چه‌ندێ نوكه‌ ل دویف ستانده‌رێن جیهانى ماوه‌یه‌كێ گه‌له‌كێ كورت ژیێ راپۆرتا ناڤا ده‌نگ و باسایه‌ لێ ب مه‌رجه‌كێ ئه‌و راپۆرته‌ واته‌یه‌كا پرى رامان ب گه‌هه‌ینت ل دویف ئه‌ته‌كێتێن میدیایى، لێ مه‌ ئه‌ڤ چه‌نده‌ ژى نه‌دیت هه‌ر راپۆرته‌كێ ل دویف حه‌زا خوه‌ به‌لاڤ دكه‌ن هنده‌ك راپۆرت دچنه‌ دچارچوڤێ ریپۆرتاژێ دا و ژده‌ستێ ستافێ سه‌رپه‌رشت ده‌ردكه‌ڤیت بێ كو بزانیت.
ریپۆرته‌ر یان په‌یامنێر: هه‌تا نوكه‌ وه‌ك ریپۆرته‌ر ل دویف پره‌نسیپ و ئه‌ته‌كێتێن ریپۆرته‌ران نه‌چووینه‌ بۆ نموونه‌ ل به‌ركرنا جل و به‌رگان و هه‌لگرتنا باجا یان ناسناما وێ سازیێ كو ده‌ربرینێ ژ كه‌نالێ وى بكه‌ت وه‌ك هنارتیێ وان هه‌ر چه‌نده‌ ل پرانیا كه‌نالان له‌شكره‌كێ ریپۆرته‌ران هه‌یه‌، لێ ژبه‌ركو پرانى خودان ئه‌زموون نینن و كه‌سێن سه‌رپه‌رشتیێ دكه‌ن نه‌شیاینه‌ په‌یامنێرێن ده‌زگه‌هێ خوه‌ ل جهه‌كێ جێگیر بكه‌ن و ب ته‌مامى ژ هه‌مى روویه‌كێ ڤه‌ په‌یامێن وى جهى یان وێ ده‌ڤه‌رێ بگه‌هینن لێ یا جهێ سه‌رنجێ و شاشى ئه‌وه‌ هنده‌ك جاران بێژه‌رو پرودیوسه‌رو ریپورته‌ر ئێكه‌.
بۆچى سازیێن به‌هدینان خوه‌ ژ لوكالبوونێ قورتال نه‌كریه‌؟ ژبه‌ركو هه‌ر سازیه‌كا نوو ڤه‌دبیت ل به‌هدینان دڤێن هنده‌ك ره‌نگ و كه‌سێن نوو بینته‌ د ناڤا راگه‌هاندنێ دا و ب سه‌لمینیت كو ئه‌و دێ شێن بێ كه‌سێن دى یێن د ناڤا راگه‌هاندنا دهۆكێ دا كار دكه‌ن كاره‌كێ نوو و جودا بكه‌ن بێ كو پرسا خوه‌ ب كه‌سانێن ئه‌كادیمێ و خودان ئه‌زموون بكه‌ن.
رێكخستن: گه‌له‌كا گرنگه‌ هه‌تا نوكه‌ دیار دبیت د ناڤا ڤان سازیا دا رێكخستنه‌كا توكمه‌ ب پراكتیك نینه‌، به‌لكو ب تنێ ناڤه‌ و ل سه‌ر تابلو كاغه‌زان هاتیه‌ نڤیسین ب هزرا وان له‌شكره‌كێ زێده‌ گرنگه‌ و ب دیتنا من خالا هه‌رى گرنگ ئه‌وه‌ كه‌سێن كو كارى د رێڤه‌برنا ڤێ سازیێ دا دكه‌ن شاره‌زیى یه‌كا باش درێكخستن و كارگێریێ دا نینه‌ ئه‌گه‌ر هه‌بیت ژى ده‌لیڤه‌ پێ نه‌هاتیه‌ دان یان ژى بو خوه‌ نه‌كریه‌ خه‌م.
دارایى: هه‌رچه‌نده‌ ئه‌ز چ ژ كاودانێن ئابوورى نزانم كا سه‌ره‌داڤێن وان ژ كیڤه‌ دهێن یان چه‌وا دهێته‌ مه‌زاختن، لێ دبیت نه‌ دادپه‌روه‌ریه‌ك د ڤێ چه‌ندێ دا ژى هه‌بیت گرێ به‌ستێن هنده‌كا گه‌له‌ك دباش بن و یێن هنده‌كان ژى به‌روڤاژى ئه‌ڤ چه‌نده‌ دبیته‌ خاله‌ك كو بێ سه‌روبه‌ریه‌ك په‌یدا ببیت، ئه‌ڤجا چ كه‌نالێن پارتێن سیاسى بن یان ژى یێن بزنزمانه‌كێ بیت.

43

سه‌ره‌رایی بێ پلانی یا حوكمه‌تا هه‌رێما كوردستانێ ژئالیه‌كێ ڤه‌ و بلندبوون و نزمبوونا بهایێ په‌تروَلێ و به‌رسینگ گرتنا شه‌رێ تیروَرێ یێ ژنشكه‌كه‌ڤێ و بڕینا پشكا هه‌رێمێ ژ بۆدجێ، كوردستان به‌ره‌ف ئاقاره‌كی بر كو ده‌ملده‌ست توشی قه‌یرانا دارایی ببیت و ژئالیه‌كێ دیڤه‌ به‌شداریا پارتێن سیاسی دكابینه‌یا نوو دا كو پرانیا مه‌ره‌م گرتنا ده‌ستهه‌لاتێ بوویه‌، ملله‌ت ژی ژ بێ پلانی یا حوكمه‌تێ و بێ هزركرن بتنێ چاڤ ل ژڤانێ دانا مووچه‌یی ما.
ئه‌گه‌ر پیچه‌كێ ل رابردوویێ بزڤرین باشوورێ كوردستانێ هه‌موو ده‌رگه‌هێن بازرگانی یێن نیڤ ده‌وله‌تی دگرتی بوون و چ داهات ژبه‌غدا نه‌ دهات، داهاتێ ناڤخوه‌ ژی ب رێژه‌كا گه‌له‌ك به‌رچاڤ كێم بوو و دیسان شه‌رێ براكوژیێ ژی هه‌بوو هه‌ر چه‌نده‌ راستی یه‌كه‌ ته‌حله‌ لێ مێژوو ڤێ چه‌ندێ دسه‌لمینیت ملله‌تی گرنگی یه‌كا مه‌زن ددا ب كه‌رتێ چاندنا به‌رهه‌مێ خوَمالی یێ ئاڤی و دێمی ل سه‌رانسه‌ری باشوورێ كوردستانێ؛ ،سه‌ره‌رایی ل وی ده‌می په‌رگارا جوتكارا وه‌ك كه‌ل و په‌ل ب كێمی هه‌بوون، دگه‌ل به‌راووردیا نوكه‌ لێ ب شه‌ڤ و روَژان هه‌موویان كاردكر و مژوولی قووتێ خوه‌ بوون. زه‌نگین و فه‌قیر چ جوادهیه‌كا وه‌سا مه‌زن نه‌بوو ژئالیێ خوارن و ڤه‌خوارنێ ڤه‌ لێ دبیت بتنێ وه‌ك داهات ب رێژه‌یه‌كا كێم جودابوونه‌ك هه‌با چ كه‌سێ ته‌ پرسیار ژێ كربا وه‌ك به‌رهه‌م بیستانه‌كێ باجانكا یێ سێڤ و خوَخا ژبلی برنج و نیسك و نوَك و هه‌ژماره‌كا سه‌رێن په‌زی هه‌بوون ئه‌ڤجا چ یێن وی بانه‌ یان ب كه‌راخی بایه‌ گرنگ ژیانا خوه‌ یا روَژانه‌ مسۆگه‌ر دكر دا كو ل پاشه‌روژێ چاڤێن وی نه‌ میننه‌ ل به‌رده‌ستێ كه‌سێ و نه‌ ل به‌ندا مووچه‌یی ژی بوو. هه‌ر چه‌نده‌ ل دووڤ به‌راووردیا نوكه‌ چنكو مه‌ حوكمه‌ته‌ك هه‌یه‌ و خوَدان داهاتین و ئه‌ركه‌ ل سه‌ر ملێن حوكمه‌تێ ژیارا خه‌لكێ دابین بكه‌ت؛ به‌لكو چ خێرا ناكه‌ت لێ ژبه‌ركو هه‌ر ژ سالێن نوَتان و تانوكه‌ چ پلانێن توكمه‌ نه‌بووینه‌ له‌ورا گه‌هه‌شته‌ ڤی ڕاده‌یی كو پرانیا خه‌لكێ ببنه‌ په‌نابه‌ر و گه‌نده‌لیه‌كا به‌رچاڤ ژی فاكته‌ره‌كه‌ لێ ژبه‌ركو سیسته‌مێ مووچه‌خوَران خه‌لك به‌ره‌ف ئاقاره‌كێ ڤه‌ بر كو ده‌ست به‌رداری هه‌موو كه‌دا خوه‌ ببیت نوكه‌ ل باشوورێ وه‌لێ هاتیه‌ یێ بێژت تانوكه‌ یێ بێ مووچه‌مه‌ ب كه‌سه‌كێ نه‌زان و خشیم دهێته‌ ل قه‌له‌مدان هێشتا هنده‌ك قوتابی نه‌ داخوازا مووچه‌یی دكه‌ن یان هاتینه‌ دامه‌زراندن و بووینه‌ خوَدان مووچه‌ ئه‌ڤچا چ حه‌ق یان نه‌. هه‌لبه‌ت پشتی باشوورێ كوردستانێ توشی قه‌یرانه‌كا نه‌چاڤه‌رێ كری یا بێ پلانیا حوكمه‌تێ و خه‌لك فێر نه‌بوویه‌ جاره‌كا دی گرنگیێ ب كه‌رتێ چاندنێ بده‌ت؛ بتنێ چاڤه‌رێ مووچه‌یه‌ كا دێ كه‌نگی ئێته‌ دابه‌شكرن دیسان فێر نه‌بوویه‌ مه‌زاختیێن روَژانه‌ كێم بكه‌ت هه‌روه‌كو چ چێنه‌بوویی. نوكه‌ بازار گه‌رمتره‌ ژبه‌ری قه‌یرانێ بتنێ بزنس مان مفاداره‌ ژڤی دوَخی و حوكمه‌ت و خه‌لك هه‌ردوو زیان پێكه‌فتیێن بازاری نه‌ چونكو حوكمه‌ت بتنێ چاڤ ل داهاتێ ناڤخوه‌ په‌ترولێ و غازێ یه‌ و خه‌لك ژی چاڤه‌رێ مووچه‌یی ل دوماهیێ هوون بێژن حوكمه‌ته‌كا به‌تال و خه‌لكه‌كێ ته‌مبه‌ل دێ به‌ره‌ف ره‌وشه‌كا باشترڤه‌ چن؟ ئه‌ڤه‌ پرسیاره‌كه‌ بتنێ ئابورناس دشێن به‌رسڤێ بدن.

30

زاروَك وه‌كی لاپه‌ره‌كێ یه‌ ته‌ چه‌وا بڤێت دی ب وی ره‌نگێ ته‌ ڤیایی په‌روه‌رده‌ كه‌ی، كه‌واته‌ هه‌ر ئاراسته‌یه‌كا خراب یان ژی باش دێ به‌ر ب وێ ئارستێ ڤه‌ چیت. ئه‌ڤجا گه‌له‌كا گرنگه‌ د ناڤا جڤاكی دا ب سیسته‌م و به‌رنامه‌ بوَ نفشێ پاشه‌روَژێ بهێته‌ دانان داكو ل داهاتی ببته‌ روَناهیه‌كا گه‌ش بوَ وه‌لاتێ خوه‌، هه‌لبه‌ت د وه‌لاتێن دكتاتوَر لێ ده‌ستهه‌لاتدار دا و دیسان ل وه‌لاتێن ره‌وشا وان دكه‌ڤیته‌ به‌ر گه‌فێن تیروَرێ و جه‌نگێ پله‌ ئێك زاروَك دبنه‌ قوربان.
وه‌كی دیار كو ره‌وشا سوریایێ و عێراقێ ب تمامی یا تێكچوی ژلایێ ئێمناهیێ ڤه‌ بوَ گوَڕه‌پانا جه‌نگێ و هاتیه‌ كاڤلكرن ب هه‌موو ره‌نگان توشی هه‌رافتنێ بوویه‌ ، هه‌تا مروَڤایه‌تیێ بوهایێ خوه‌ ژده‌ست دایه‌ و هنده‌ك بوونه‌ په‌نابه‌ر و بوونه‌ دده‌ریایاندا بوونه‌خوارنا ماسیان و یێن ماین ژی ب نه‌چاری بوونه‌ چه‌كدار چ دگه‌ل ده‌ستهه‌لاتا دكتاتوَر یان ژی دگه‌ل ره‌فێن ئوپوََزسیوَنێ یان ژی دگه‌ل چه‌كدارێن داعش و یێن ماین ژی قه‌ستا جیرانێن ده‌ردورا خوه‌كرن و ل ناڤا كه‌مپا هاتنه‌ ئاكنجی كرن.
وه‌كو دیار پێله‌كا مه‌زن یا په‌نابه‌را قه‌ستا هه‌رێما كوردستانێ كرنه‌ و هه‌لبه‌ت هاتنا په‌نابه‌را وه‌ك كلتور و ئابوور و ره‌وشا ئێمناهیێ ژهه‌موو رویه‌كێ ڤه‌ كارتێكرنا خوه‌ یا نیگه‌تیڤ ل سه‌ر هه‌رێما كوردستانێ كریه‌، چنكو پاراستنا وان و خودان كرنا وان په‌نابه‌ران كه‌فتنه‌ سه‌ر ملێن حوكمه‌تا هه‌رێما كوردستانێ. ئه‌و شاشیا راگه‌هاندنێ كری ده‌رباره‌یی زاروَكی هه‌لبه‌ت ده‌مێ چه‌كدارێن داعش ئه‌و رووبه‌رێ به‌رفره‌هێ ئاخا سووریێ و عێراقێ و پشكه‌ك ژ ئاخا هه‌رێمێ كونتروَل كری چنكو بوَ راگه‌هاندنا كوردی ئه‌زموونه‌ك ده‌ستپێكی بوو، ركلامه‌كا بێ به‌رامبه‌ر ژ نه‌زانینا خوه‌ بوَ رێكخراوا تیروَری یا داعش دكر روَژانه‌ بێ سانسوَر هه‌موو كار و بزاڤێن رێكخراوا ناڤهاتی په‌خش دكر بێی كو ب زانیت زیانێن وێ چه‌ندن. ب گشتی ره‌وشا خه‌لكێ كوردستانێ ژئالیێ ده‌روونی ڤه‌ تێكچوو نه‌خاسمه‌ زاروَك ژی دگه‌ل مالباتێن خوه‌ گوه و چاڤێن وان ل ده‌نگ و ره‌نگێ رادیوَ، تیڤی و روَژنامه‌یان بوون كو روَژانه‌ دگه‌شتێن نوچه‌یان دا ب ئاشكرایی په‌خش دكر و دگوتن فلان ده‌ڤه‌رێ فلان كه‌س یان هنده‌ك كه‌س هاتنه‌ سه‌رژێكرن!! ڤیدیویێن داعشا ببوونه‌ پروَموَ یێن تیڤیان و وێنه‌یێن درندانه‌ ببوونه‌ نوچه‌و مانشێتێن سه‌ره‌كی یێن روژنامه‌ و گوَڤاران. لێ پشتی پێشمه‌رگه‌یی شیایی داستانێن مه‌زن توماربكه‌ت و شیان هه‌موو ده‌ڤه‌رێن كوردستانێ بزڤرینته‌ ڤه‌ دیسان راگه‌هاندنێ لاشه‌و كه‌له‌خێن داعشا ب زیندی و نه‌زیندی په‌خش دكرن بێی كو ل دووڤ پره‌نسپێن میدیایێ بچن و بزانن زیان چه‌نده‌ كه‌واته‌( راگه‌هاندنێ چ جوداهی نه‌ كر دناڤبه‌را پێشمه‌رگه‌یی و داعش) دا ئانكو یا زاروَكی ژ راگه‌هاندنێ فێربوویی هه‌ردوو مروَڤ كوژن راگه‌هاندنێ ره‌وش ب تمامی ل به‌ر چاڤ وه‌رنه‌گرت و بتمامی پێشمه‌رگه‌ نه‌دا نیاسین كو یێ وان دپارێزیت و یێ بوَ ئاخێ دكه‌ت یێ بوَ وه‌لات پارێزیێ دكه‌ت یێ شه‌هید دبیت دپێناڤا نڤشێ نودا كو ببنه‌ پێشه‌نگێن وه‌لاتی، بتنێ راگه‌هاندنێ گرنگی ب كوشتنا هژمارا كوشتیان ددا و هه‌موو سازیان هه‌ول ددا كی دێ به‌ری سازیا دی گرته‌یێن ڤیدوَیی یێن كوشتیا به‌لاڤ كه‌ت. گه‌له‌كا گرنگ بوو و گرنگه‌ ژ نوكه‌ و پێدا راگه‌هاندن ب پیشه‌یانه‌ سه‌ره‌ده‌ریێ دگه‌ل ره‌وشێ بكه‌ت و مافێن زاروَكان به‌رچاڤ وه‌رگریت ل دوماهیێ پێدڤیه‌ دایك و باب گه‌له‌ك ب هشیاری سه‌ره‌ده‌ریێ دگه‌ل زاروكێن خوه‌ بكه‌ن و دیسان په‌روه‌رده‌ ژی رولێ خوه‌ بگێریت لێ ب پله‌ ئێك راگه‌هاندن.

91

راگه‌هاندن ب هه‌می ئالاڤێن خوه‌ڤه‌ ئه‌ڤرۆ بوویه‌ پشكه‌كا گرنكا ژیانێ و شوَڕه‌ش ب رێكا راگه‌هاندنێ هاتنه‌ كرن و دیسان دكتاتوَر هاتنه‌ ژناڤبرن، و ژ ئالیه‌كی دن ڤه‌ ب رێكا راگه‌هاندنێ ژی تیروَرێ سه‌رێ خوه‌ هلدا لێ هه‌تا نوكه‌ راگه‌هاندنا كوردی نه‌شیایه‌ ببیته‌ ئه‌و ئالاڤه‌ كو بشێت په‌یام و ده‌نگێ راسته‌قینه‌ یێ نه‌ته‌وا كورد ب گه‌هینته‌ جیهانێ .
بوَچی راگه‌هاندنا كوردی ساڤایه‌؟ سه‌ره‌رایی گه‌له‌ك هوَكار هه‌نه‌ ژ وانا پڕانیا سازیێن راگه‌هاندنێ ل باشوورێ كوردستانێ و پارچه‌یێن دن یێن كوردستانێ ل سه‌ر راگه‌هاندنا ئێك ئالی په‌یاما خوه‌ دوه‌شینن و به‌لاڤ دكه‌ن، ئانكو پڕانی نه‌ ل سه‌ر بنیاتێ نه‌ته‌وی په‌روه‌رده‌ بوویه‌ به‌لكو رێبه‌رو پارتا خوه‌ به‌ری هه‌رتشتی پیروَز دیتیه‌ و رێك ب وێ سازییێ نه‌هاتیه‌ دان ژ هێلا خوه‌ یا بازنه‌یی یا وێ پارتیێ ده‌رباز ببیت .
هه‌ڤڕكی یا حزبی ل سه‌ر بنیاتێ خرابكرنێ دێ بینین ل باشوورێ كوردستانێ جوره‌كێ دی یێ راگه‌هاندنێ سه‌رێ خوه‌ هلدایه‌ ب ناڤێ میدیا بێ لایه‌ن كو د بنه‌كوَكا خوه‌ دا چ راستی بوَ بێ لایه‌نیێ نه‌بوویه‌ و نابیت به‌لكو مه‌ره‌م پشته‌ڤانی كرنا پارته‌كا دیاركریه‌ هه‌كه‌ كه‌سێن بسپوَر و شاره‌زا د وارێ راگه‌هاندنێ دا باش ته‌ماشه‌یی وێ سازیێ بكه‌ن د ماوێ چه‌ند خوله‌كان دا دێ دیاربیت كا چ ل پشت په‌ردێ هه‌یه‌.
ل ڤێڕه‌ وه‌ك پرسیار گه‌لوَ راگه‌هاندنا كوردی شیایه‌ ژ چارچوَڤێ لوَكال بوونێ ده‌ركه‌ڤیت؟ هه‌لبه‌ت نه‌خێر ژبه‌ركو ئه‌و خالێن مه‌ ل سه‌ری دیاركرین كو پتر بوَ ململانا سیاسی هاتینه‌ ئاڤاكرن و كادرێن راگه‌هاندكار مینا روَبوَتان لێكرینه‌ چ یێن ل بن سیبه‌را پارتا یان ژی یێن ب ناڤ بێ لایه‌ن كو چ راستی بوَ نینه‌، ژبه‌ر ڤێ نه‌شیاینه‌ خوه‌ ژ لوَكل بوونێ قوَرتال بكه‌ن، مینا مه‌زنترین رێكخراوا تیروَریستی یا داعش ل سه‌ر ده‌ستێ پێشمه‌رگه‌یی هاته‌ شكاندن و نه‌شیان سنوورێ باشوورێ كوردستانێ ببه‌ زینن و میدیایا جیهانێ هه‌موو حێبه‌تی مان ژ قاره‌مانیا پێشمه‌رگه‌یی لێ راگه‌هاندنا كوردی مابوو ب لێڤا هندێ پێشمه‌رگه‌یێ پارتی شنگار به‌ردا یێ ئێكه‌تیێ جه‌له‌ولاو سه‌عدیه‌ پاراستن و یێ یه‌په‌گێ كوبانێ میدیا جیهانی هه‌ر ئاماژه‌ ب ب كوردستانێ و پێشمه‌رگه‌یی دكر و میدیا كوردی سه‌ركه‌فتن و شكه‌ستن بوَ ئالیه‌كێ توَماردكر؛ ئالیه‌ك حزبی توَمه‌تبار دكر و هه‌تا نوكه‌ژی ئه‌ڤ جوره‌ راگه‌هاندنه‌ به‌رده‌وامه‌، دێ چه‌وا ده‌نگ و په‌یاما كوردا گه‌هیته‌ هه‌موو جیهانێ؟ هه‌لبه‌ت هه‌تا نوكه‌ راگه‌هاندنا كوردی وه‌ك من ل پێشیێ دیاركری و دیسان دێ دووباره‌كه‌م هه‌تا كه‌سێن دیبلوَماسی و فه‌رمانده‌و شاره‌زایێن بیانی ل سه‌ر بنیاتێ دشێم بێژم ئالی گره‌ك و پشته‌ڤانه‌كێ وێ پارتیێ نه‌بیت، ناهێته‌ مێهڤانكرن. كه‌واته‌ راگه‌هاندنه‌كا واسته‌كاری یه‌ بتنێ پشگیری كرنا پارته‌كا دیاركری هه‌كه‌ نه‌ بوَچی هه‌تا نوكه‌ میدیا كوردی نه‌شیا ڤان پرسیارا ئاراسته‌یی رایا گشتی و جیهانێ هه‌موویێ بكه‌ت كو: – كورد نه‌ مروڤ كوژن – ئاشتی خوازن، كوردان مافێ ده‌وله‌تبوونێ هه‌یه‌.
– كورد یه‌كه‌م هێزه‌ د روَژهه‌لاتا ناڤین دا ب كێمترین چه‌ك پێش هه‌موو جیهانێ ڤه‌ شه‌رێ تیرورێ دكه‌ت،
– د دیروَكا كوردان دا كرسیتیان و توركمان و عه‌ره‌ ب ل سه‌ر ده‌ستێ كوردان هاتینه‌ پاراستن هه‌تا نوكه‌ د ئاخا كوردان دا جهێ پێكڤه‌ ژیانێ یه‌ و هه‌موو ئول هاتینه‌ پاراستن ب كه‌نیسه‌ دێر و مزگه‌فت ڤه‌.
– كوردان ب تنێ به‌ره‌ڤانی ژئاخ و ئه‌ردێ خوه‌ كریه‌ نه‌زێده‌تر
– ئه‌گه‌ر كورد تیروریست بان دا هه‌لویستێ جیهانێ چ بیت؟
– كوردان چ كه‌س ب زوَری نه‌ كوشتیه‌، ژبه‌ر ڤێ چه‌ندێ هێشتا میدیا كوردی ساڤا یه‌ نه‌شیایه‌ په‌یاما نه‌ته‌وا خوه‌ ب ئاراسته‌یه‌كا راست و دروست ب گه‌هینت جیهانێ، سه‌ره‌رایی راگه‌هاندنا ئه‌ڤرۆ گه‌له‌ك یا ب ساناهی بوویی. ل دوماهیێ ب دیتنا من په‌یاما شوَڕه‌شێن به‌ری نوكه‌ ب تنێ رادیویه‌ك دكَوخه‌كێ چیایی را هه‌وبو وان شیان پتری راگه‌هاندنا نوكه‌ خزمه‌تێ بكه‌ن.

23

وه‌كی دیار ده‌مه‌كێ گه‌له‌ك كورت مایه‌ ژ بو دووباره‌ هه‌لبژراتنێن توركیا ژ به‌رك و د ماوێ بوری دا چ پارتان نه‌شیان ب تنێ حكومه‌تێ برێڤه‌ ببه‌ن و دیسان چ پارتان ژی هه‌ڤپه‌یمانی بو پێك ئینانا حكومه‌تا نوویا توركی نه‌ كر ژ به‌ر ڤێ چه‌ندێ ژی هه‌لبژراتن ل حه‌فتیا بهێت دێ هێنه‌ ئه‌نجام دان و ده‌لڤیه‌یه‌كا دی یا مێژویی یه‌ بو هه‌ده‌پێ.
جارێ دێ به‌حس ل پارتا هه‌ده‌پێ كه‌م. بێ كو پێداچونه‌كا دویر و درێژ ل مێژویا وێ و دامه‌زراندنا وێ باش بیت یان خراب بیت دناڤا پارتێن كوردی دا ل توركیا پترترین جه‌ماوه‌ر هه‌یه‌ وه‌ك پارته‌كا سیاسی ل ژێر ئالایێ توركیا چونكو د دستورێ توركیا دا هه‌ر كه‌سێ ل توركیا خودان ناسنامه‌یا توركی بیت توركه‌ ل ڤێره‌ دێ بوچونا خوه‌ ل سه‌ر پارتا هه‌ده‌پێ دیاركه‌م جارێ چه‌نده‌كێ دێ ل پشت خوه‌ زڤرین و ل ئه‌نجامێن بوری كو خه‌ونه‌كا ژنشكه‌كێ ڤه‌ بویه‌ بو پارتا گه‌لان هه‌ده‌پێ و گه‌لێ تورك و پارتێن دی یێن نه‌ ژاد په‌رست هه‌می حێبه‌تی مان ژب ده‌سڤه‌ ئینانا وێ رێژه‌یا ده‌نگێن هه‌ده‌پێ ب ده‌ستخوه‌ ڤه‌ ئیناین هه‌لبه‌ته‌ ئه‌وچه‌نده‌ ژی دزڤریت بو وێ ڤالاتی و شاشیێن هه‌رسێ پارتێن (ئاكه‌په‌ و مه‌هه‌په‌ و جه‌هه‌په‌ )ێ و گه‌له‌ك كه‌سێن ب ره‌گه‌ز تورك ژی ده‌نگێن خوه‌ دان هه‌ده‌پێ وه‌ك كه‌ربه‌ك بو پارتێن مه‌ گوتین لێ هه‌ده‌پێ شاشیه‌ك مه‌زن كر و ده‌لیڤه‌كا دیروكی ژ ده‌ست دا چونكو د دیروكا كوردان دا ل باكورێ كوردستانێ و ل ناڤا جه‌رگێ توركیا دا ببیه‌ خودان جه‌ماوه‌ره‌كێ ب ڤی ره‌نگی و هه‌ژمارا خوه‌یا كورسیا هوسا ب ساناهی ب ده‌ست بێخی ئه‌و شاشیه‌ ژی ئه‌و بویه‌ ب ژیرانه‌ هه‌ڤپه‌یمانی دگه‌ل ئاكه‌پێ كربایه‌ بو پێكئینانا حكومه‌تا توركی راسته‌ باره‌كێ گران بویه‌ دا كارتێكرنا خوه‌یا نه‌رێنی هه‌بت دچاڤێن خه‌لكێ باكوردا لێ ب دیتنا من هه‌ده‌په‌ دا شێت بو چه‌ند سالێن داهاتی هه‌ناسه‌یه‌كا دی و ده‌لیڤه‌ یه‌ كا باشتر ل ب ده‌ستخوه‌ڤه‌ بینت ژ به‌ر كو چ تشت د سیاسه‌تێ دا مستحیل نینه‌ و هه‌ڤپه‌یمانی دگه‌ل ئاكه‌پێ باشتره‌ ژ هه‌ردو پارتێن جه‌هه‌پێ و مه‌هه‌پێ.
ره‌نگه‌ خوانده‌ڤان ب گه‌هه‌نه‌ وێ باوه‌ریێ پشته‌ڤانیا ئاكه‌پێ دكه‌م به‌روڤاژی لێ به‌راوردیێ دگه‌ل پارتێن دی و سالێن بوری خواندنه‌كێ بو بكه‌ن دێ باشتر دیار بیت مینا سه‌روكێن باژێرڤانیا و سه‌روكێن زانكویا ڤه‌كرنا به‌شێن زمانێ كوردی و كه‌سێن پله‌دارێن كورد د ناڤا له‌شكه‌ری دا به‌رهه‌مێن هونه‌ری و ڤه‌كرنا كه‌نالان ب زمانێ كوردی هه‌می ل سه‌ر ده‌مێ ئاكه‌پێ و گورانكاریێن به‌رچاڤ هاتنه‌ دیتن و گروڤه‌ ژی بو ڤێ چه‌ندێ د دیروكا توركیا دا كه‌نگی كوردان ب ڤی ره‌نگی سه‌نگ و هێزا خوه‌ هه‌بویه‌ چ ب چه‌كداری یان ژی ب مه‌ده‌نی خوه‌ هه‌كه‌ بو سیاسه‌ت ژی بت كورد ژ وێ سیاسه‌تێ مفادار بوینه‌.
هه‌ده‌پێ نه‌شیا ب ژیرانه‌ پێنگاڤا ب هاڤێژیت چونكو ما حێبه‌تی دناڤبه‌را ( قه‌ندیل و ئیمرالیێ) ێ دا، بالێ قه‌ندیلێ وه‌سا فشار ئێخسته‌ سه‌ر هه‌ده‌پێ كو نابیت دگه‌ل ئاكه‌پێ حكومه‌تێ پێك بینت و بالێ ئیمرالی و خه‌باتا سڤیل یا ناڤه‌ندێن مه‌ده‌نی حه‌ز هه‌بو دگه‌ل ئاكه‌پێ بن هه‌ڤپه‌یمانیێ دروست بكه‌ن، لێ هه‌ده‌پێ قه‌ندیل هلبژارت و كارتا خوه‌ سوت میناك ژی بو ڤێ چه‌ندێ د دیارن چه‌وا ئالوزی په‌یدابون ره‌وش ب تمامی ل توركیا و ده‌ڤه‌رێن كوردنشین و ل چیایێن په‌كه‌كێ لێ د جێهگر چه‌وا هاتنه‌ تێكدان و خوین ژی هاته‌ رشتن و تانوكه‌ ژی ب دوماهی نه‌هاتیه‌ و بتنێ زیانێن به‌ر ب چاڤ ل ده‌ڤه‌رێن كوردا كه‌فتن، لێ هه‌لبژارتنێن حه‌فتیا بهێت یا توركیا چاڤدێرین سیاسی و رێكخرواێن گرێدایی راپرسیان و چالاكڤانێن مه‌ده‌نی و سازیێن راگه‌هاندنێ وه‌سا دیار دكه‌ن كو چ گورانگاری یێن مه‌زن ب سه‌ر ئه‌نجامێن بوری دا ناهێن به‌لكو دبیت گورانكاری یێن كێم د ئه‌نجامان دا هه‌بن ئه‌ڤجا بو هه‌ده‌پێ گرنگه‌ ب ژیرانه‌ و ب هویربینی ڤێ كارتا مێژویی ژده‌ست نه‌ده‌ت نه‌ مینته‌ دناڤبه‌را قه‌ندیل و ئیمرالیێ دا چونكو ملله‌تێ باكور ب درێژاهیا دیروكێ یێ قوربانیا د ده‌ن.
راسته‌ ئیمرالی و قه‌ندیل ژی گرنگن لێ ب هه‌بونا هه‌ژماره‌كا ژ هه‌شتێ كه‌سان چ كێمتر یان زێده‌تر و به‌شداریكرن دحكومه‌تا نوی یا توركیا دا و وه‌رگرتنا چه‌ند پوستێن د ناڤا حكومه‌تێ دا، دێ شێن ده‌نگێن نه‌رازیبونێ گه‌هیننه‌ دلێ ئه‌وروپا و دیسان دێ بو ئه‌مریكا ژی گرنگ بیت د ڤێ بواری دا و پاشان هه‌ده‌په‌ دشێت هێدی هێدی ب سیاسه‌ته‌كا مه‌ده‌نی ده‌نگێن قه‌ندیل و ئیمرالیێ بو رایا گشتی یا جیهانێ به‌ر ب چاڤ بكه‌ت ده‌لیڤه‌یه‌كا مێژویی یه‌ و نابیت بێته‌ ژده‌ست دان چونكو ب ڤی ره‌نگی دبیت ئێدی گه‌لێ باكور ژی ب ڤێ ره‌وشا نوكه‌ تێ دا ده‌رباز دبن پارته‌كا دی ببیته‌ پێگوهوركا هه‌ده‌پێ.

43

سه‌ره‌رایی هه‌ژماره‌كا به‌رچاڤ یا سازیێن راگه‌هاندنێ چ یێن ل بن سیبه‌رێن پارتێن سیاسی یان ژی یێن ب ناڤ بێ لایه‌ن هه‌نه‌ وه‌ك تیڤی، روژنامه‌ و رادیوگوڤار و سایتێن ئه‌لكترونی ب هه‌می ئازادیا خوه‌ یێن كار دكه‌ن و دبیت گه‌له‌ك سنوران ژی ده‌رباز دكه‌ن لێ جهێن په‌یوه‌ندیدار نه‌شیاینه‌ ل گور یاسایا كارێ روژنامه‌ڤانی هه‌لویستان وه‌رگرن چ وه‌ك سزادان ب پاره‌یی یان ژی راوه‌ستاندن ژوه‌شانێ.
ل دویف بریارا ژماره‌ 24یا سالا 2008ێ یاسایا كارێ روژنامه‌ڤانی ل هه‌رێما كوردستانێ برگه‌یا ئێكێ ژ مادده‌یا ده‌هێ ژ یاسایا سه‌روكاتیا هه‌رێما كوردستانا عیراقێ ل خولا دوویێ ل روینشتنا چارێ بریار هاته‌ دان و چه‌ند مادده‌ بخوه‌ ڤه‌گرتن ده‌رباره‌یی یاسایا كارێ روژنامه‌ڤانی ل هه‌رێما كوردستانێ و ژوانا دێ به‌حسا مادده‌یا نه‌هێ كه‌م دوه‌رزێ پێنجێ دا چوار خالان ب خوه‌ڤه‌ دگریت ژ وانا (خالا ئێكێ) روژنامه‌ڤان و سه‌رنڤیسه‌ر دهێنه‌ سزادان ب كوژمێ نه‌ كێمتر ژ ملیونه‌كێ و نه‌زێده‌تر ژ دو ملیونان ل ده‌مێ به‌لاڤكرنا جوره‌ك ژڤان بابه‌تان:
خالا ئێكێ: به‌لاڤكرنا كه‌رب و كینێ دناڤا جڤاكی دا كو ببیته‌ جهێ نه‌ره‌حه‌تیێ و پێشێل كرنا بیرو باوه‌ران ب ئولی ڤه‌ و پێشیل كرن یاری پێكرن ب پیروزیێن ئولی و هه‌ر چ ئول بیت ل گور بیرو باوه‌را وی یان وان باوه‌ری پێ هه‌یی و هه‌ر بابه‌ته‌كێ نهێنی و گرێدایی ب ژیانا كه‌سایه‌تیا تاكی ڤه‌ بیت خوه‌ ئه‌گه‌ر راست بیت ژی ب هیچ ره‌نگه‌كێ رێك پێ نه‌هاتیه‌ دان و ناڤزراندن نابیت پێ بهێته‌ كرن. خالا دویێ: ئه‌و سازیا به‌لاڤكری دێ هێته‌ سزادان نه‌ كێمتر ژ پێنج ملیونان و نه‌ زێده‌تر ژ بیست ملیونان هه‌كه‌ ژ وان خالێن د مادده‌یا نه‌هێ دا یا برگه‌یا ئێكێ دا هاتینه‌ دیاركرن.
خالاسیێ: ل ده‌مێ زڤرین دروسته‌ بو دادگه‌هێ زێده‌كرنا پاره‌یی لێ ب مه‌رجه‌كێ گوژمه‌یێ پاره‌یی نه‌بیته‌ دوجاركی هه‌ر وه‌كی د برگا ئێكێ و دویێ دا هاتیه‌ دیار كرن. خالاچارێ: دواكارێ گشتی و لایه‌نێ زیان ڤێ كه‌فتی ماف هه‌یه‌ سكالایێ تومار بكه‌ت ل گور یاسایێ. ره‌نگه‌ خوانده‌ڤان و پرانیا روژنامه‌ڤان و سازیێن راگه‌هاندنێ وه‌سا دیار بكه‌ن كو ئاگه‌هداری ڤان برگه‌ و مادده‌یێن یاسایی یێن كارێ روژنامه‌ڤانی نه‌ لێ به‌روڤاژی دبیت هنده‌كان هه‌ر ئه‌ڤ خال و برگه‌ نه‌ دیتبن و نه‌ژی خواند بن و و دبیت پیته‌ ی ژی پێ نه‌كه‌ن، ئه‌ڤ چه‌نده‌ ژی دزڤریت بو لاوازیا ده‌ستهه‌لاتا داواكاریا گشتی و ژماره‌ ئێك وه‌زاره‌تا داد ژ ڤێ چه‌ندێ به‌رپه‌رسیاره‌ چونكو هه‌تا نوكه‌ ژی بارودخێ كوردستان تێ دا ده‌ربازدبیت هاوه‌لاتی ب ته‌مامی د ئه‌رك و مافێن خوه‌ نه‌گه‌هشتیه‌ ب رێكێن یاسایی داخوازا مافێن خوه‌ بكه‌ت و كه‌نگی ماف هه‌یه‌ سكالایێ تومار بكه‌ت ژ لایه‌كێ دی ڤه‌ ژ به‌ر كو پرانیا سازیێن حزبی یێن راگه‌هاندنێ وه‌كریه‌ و ماف دایه‌ خوه‌ كو هه‌ر چ بو پارتا وان باش بیت وی بابه‌تی ب وه‌شینیت و پارتا ل هه‌مبه‌ری خوه‌ یا ركابه‌ر بشكێنیت بێی كو یاسایا كارێ روژنامه‌ڤانی بو ببیته‌ رێگر گه‌لو ئه‌م دشێین بێژین سازیه‌ك هاتیه‌ سزادان یان سازیه‌ك هاتیه‌ راوه‌ستاندن ژ وه‌شانێ؟ به‌رسڤ هه‌كه‌ هه‌بن ژی ل گور وێ به‌ره‌لاییا هه‌یی و به‌زاندنا سنوران ل گور پێتڤی نه‌بویه‌ چونكو هه‌كه‌ ب ته‌مامی كار بو هاتبا كرن باوه‌ر ناكه‌م چ سازیێن راگه‌هاندنێ بمینن سه‌رپێچی نه‌كر بیت و هه‌كه‌ هه‌بن ژی یێن پێگیر، ره‌نگه‌ مه‌ نه‌دیت بن و گولێ نه‌بیت و یان ژ نوی ژ دایك ببن ژ به‌ر كو ب تایبه‌ت دڤان روژێن بوری دا مه‌ دیت خونیشادان چه‌وا هاتنه‌ كرن و به‌ر ب چ ئاراسته‌ ڤه‌ چون و چه‌وا راگه‌هاندنا پارتێن سیاسی وه‌ك په‌زی خه‌لك د هاژوت و هه‌ر لایه‌نه‌كێ چه‌وا سڤكاتی ب پارتا ل هه‌مبه‌ری خوه‌ و دیسان وه‌لاتیان دكرن ب رێكا راگه‌هاندنێ ئه‌ڤجا ل ڤێره‌ جاره‌كا دی دبێژم وه‌زاره‌تا داد ل هه‌مبه‌ری ڤێ به‌رپرسیاره‌ و نه‌قیب و سه‌ندیكایێن روژنامه‌ڤانان و پاشی حكومه‌ت چونكو هه‌ر تشتی سنورێن خوه‌ هه‌نه‌ نابیت ئازادیا ئه‌م هزر لێ دكه‌ین هه‌ر تشت ره‌وایه‌ ل ڤی ده‌می كوردستان دێ توشی مه‌زنترین كێشه‌ و ئالوزی بن چونكو راگه‌هاندنا شاش وه‌لاتی د هه‌رفینیت پێتڤیه‌ هه‌ركه‌سێ دبیته‌ روژنامه‌ڤان پیشه‌یانه‌ سه‌رده‌ریێ دگه‌ل بویه‌ران بكه‌ت و شاره‌زا بیت د بیاڤێ یاسایا كارێ روژنامه‌ڤانی دا و دیسان ل سه‌ر هه‌ر سازیه‌كێ گرنگه‌ كادرێ خوه‌ هشیار بكه‌ت بو وێ چه‌ندێ ب سه‌ركه‌فتیانه‌ و ب پیشه‌یانه‌ په‌یامه‌كا راست و دروست نه‌كێم و نه‌ ژی زێده‌ بگه‌هینیت ب مه‌رجه‌كێ ل گور وێ یاسایا بو هاتیه‌ دان ده‌رنه‌چیت ل دوماهیێ دبێژم هه‌كه‌ حكومه‌تا هه‌رێما كوردستانێ ب رێكا داواكاریا گشتی و دیسان وه‌لاتیان داخازا مافێن خوه‌ كربایه‌ ده‌رباره‌یی به‌زاندنا سنوران ژلایێ سازیێن راگه‌هاندنێ ڤه‌ نوكه‌ حكومه‌تا هه‌ریمێ ژقه‌یرانا دارایی قورتال ببا.

website security
Facebook Auto Publish Powered By : XYZScripts.com