NO IORG
Authors Posts by ره‌ڤين سالح لاوه‌ند

ره‌ڤين سالح لاوه‌ند

ره‌ڤين سالح لاوه‌ند
3 POSTS 0 COMMENTS

43

خودانكرنا كه‌سێن دانعه‌مر ئه‌ركه‌كه‌ ل سه‌ر ملێن مه‌ هه‌موویان، د مالێ دا خۆشى و به‌ره‌كه‌ته‌ د ژیانێ دا، ئه‌وان لاوینیا خوه‌ گورى زارۆیێن خوه‌ كر هه‌تاكو زارۆیێن وان بێ كێماسى و سه‌ربلندى مه‌زن بووین، وان نفشه‌كێ ته‌مام مه‌زنكریه‌ و قوربانى داینه‌ سه‌رخاترا زارۆیێن خوه‌ دا كو ژیانا وان یا خۆش بیت و بگه‌هینه‌ پاشه‌رۆژا خوه‌، لێ گه‌له‌ك ژ ئه‌ندامێن خێزانێ ڤێ چه‌ندێ ژبیر دكه‌ن كو ده‌یكو بابان گه‌له‌ك بوو وان كریه‌ و چ ناهێته‌ پێش چاڤێن وان، هزر دكه‌ن ده‌مێ ده‌یك و بابێن وان دانعه‌مر دبن دبنه‌ بارگرانى ل سه‌ر ملێن وان، ژ به‌رهندێ هند ژوان ده‌یك و بابێن خوه‌ دبنه‌ جهێ چاڤدێدریا دانعه‌مران، كو ئه‌ڤه‌ جهه‌كه‌ بو وان كه‌سێن دانعه‌مر هاتیه‌ ته‌رخانكرن.
نه‌خۆشترین هه‌ست ده‌ف دانعه‌مران په‌یدا دبیت ئه‌وه‌ ده‌ما دزانن به‌ر ب پیراتیێ ڤه‌ چووینه‌ و ئه‌و سه‌رده‌م نه‌ما كو بهایێ خوه‌ هه‌بوو و د ناڤ هه‌ڤال و كه‌سوكارێن خوه‌دا ب هه‌ست ڤیان رۆژانێن خوه‌ بۆراند، مخابن ژ نشكه‌كێ ڤه‌ دێ بینت پشتى دانعه‌مریێ ئه‌ندامێن خێزانا وى ئه‌و بریه‌ جهێ چاڤدێریا دانعه‌مران، ئه‌ڤ جهه‌ و ئه‌و كه‌سێن تێدا دژین بۆ وى دخه‌ریبن و وان نانیاسیت.
جهێ دانعه‌مران گه‌له‌ك خزمه‌تگوزارى یێن لێ هه‌ین بگره‌ ژ ساخله‌مى و ده‌روونى و جڤاكى، ئه‌ڤ هه‌موو خزمه‌تگوزارى یه‌ د به‌رژه‌وه‌ندیا كه‌سێن دانعه‌مر دایه‌ ل ڤێره‌ چاڤدێریا ساخله‌میێ رۆله‌كێ مه‌زن دبینت بۆ ساخله‌میا دانعه‌مران، ژ به‌ركو ئه‌و یێن گه‌هشتینه‌ ژیه‌كێ هه‌ستیار كو ب ساناهى تووشى نه‌خۆشیێ دبن و له‌شێ وان خوه‌ ل به‌ر نه‌خۆشێن دژوار ناگریت، ژبه‌ر هندێ پێدڤیه‌ سروشتێ چاڤدێریا ساخله‌میێ رۆله‌كێ باش گێریت ژ بۆ مانا وان د ژیانه‌كا ساخله‌م دا، هه‌روه‌سا چاڤدێریا ده‌روونى ژى پێدڤیه‌ ته‌كه‌زیێ ل سه‌ر هه‌ستێ وان بكه‌ن دا كو ئه‌و كه‌سێن دانعه‌مر هه‌ست نه‌كه‌ن یێن ل جهه‌كێ بیانی، ئه‌ڤه‌ ژى دێ ب وان رێیا بیت كو ته‌ماشه‌ى كه‌سێن دانعه‌مر بكه‌ت هه‌ر ئێكى ئاره‌زویا وى ل سه‌ر چیه‌، دیسا گوهداریا ئاخفتنێن وان بكه‌ت و یاریا ب هه‌ستێن وان نه‌كه‌ت، هه‌روه‌سا ژ ئالیێ جڤاكى ڤه‌ پێدڤیه‌ ئه‌و كه‌سێن دانعه‌مرێن ئێك جهدا بژین وان كه‌سان نێزیكى ئێك بكه‌ن و په‌یوه‌ندى د ناڤبه‌را واندا هه‌بیت، ئه‌ڤه‌ دبیته‌ ئه‌گه‌ر كو هه‌ست ب خه‌ریبیێ نه‌كه‌ن و ده‌روونێ وان دێ به‌ر ب باشتر بیت.
لێ هه‌كه‌ ته‌ماشه‌ى كوردستانێ بكه‌ین تایبه‌ت دهۆكێ چو جهه‌ك نینه‌ بۆ خودانكرنا ڤان كه‌سێن دانعه‌مر، ل پتریا جیهانێ ئه‌ڤ جهه‌ یێ هه‌ى، ب راستى جهێ داخێ یه‌ كو گرنگترین تشته‌ د ژیانێ دا لێ چز ئالیه‌كێ په‌یوه‌ندیدار خوه‌ ل ڤێ چه‌ندێ نه‌كریه‌ خودان و گرنگیه‌كا پێدڤى بۆ نه‌دایه‌، رۆژانه‌ كه‌سێن دانعه‌مر یێن بێ خودان ل پێش چاڤان دبینن، هه‌روه‌سا ره‌وشا ئابووریا لاواز كارتێكرنێ ل ئه‌ندامێن خێزانێ دكه‌ت تایبه‌ت هه‌كه‌ كه‌سه‌كێ نه‌خۆشێ دانعه‌مر هه‌بیت و مه‌زاختێ ده‌رمانێن وى زۆ بن، دبیته‌ ئه‌گه‌ر كو ب پێدڤى چاڤدێریا ڤى نه‌خۆشى نه‌كه‌ت، یان ژى هن ژ خێزانا دبینن توندیێ به‌رامبه‌ر كه‌سێن دانعه‌مر دكارئینن و ب شیوه‌یه‌كێ پێدڤى وان خودان ناكه‌ن كو دبینن ئه‌و یێن بووینه‌ بارگرانى ل سه‌ر ملێن وان، فه‌ره‌ حوكمه‌تا مه‌ جهه‌كێ تایبه‌ت ل دهۆكێ بۆ ڤان كه‌سێن دانعه‌مر ته‌رخان بكه‌ت، یان ژى ئه‌و كه‌سێن ده‌وله‌مه‌ند هنده‌ مزگه‌فتان ئاڤا دكه‌ن بلا ب خێرا خوه‌ جهه‌كێ تایبه‌ت بۆ دانعه‌مران ژى ئاڤا بكه‌ن دێ خێر بۆ وان هێته‌ نڤیسان نه‌تنێ ئاڤاكرنا مزگه‌فتان خێرتێدایه‌، كه‌سێن دانعه‌مر ژ زولما خێزانێ و نه‌پووته‌دانا وان یا پێدڤى و هه‌م ره‌فتارێن جڤاكى به‌رامبه‌ر ڤان كه‌سان ژێ قورتال بكه‌ن، دخوازین ئالیێن په‌یوه‌نیدار ڤێ چه‌ندێ ل به‌رچاڤ وه‌ربگرن، ژ به‌ر كو ئه‌ڤه‌ ئه‌ركه‌كێ مرۆڤاتیه‌ و مافێ هه‌ر كه‌سه‌كێ دانعه‌مره‌ ل ڤى ژیێ خوه‌ جهه‌كێ تایبه‌ت هه‌بیت رێز لێ بهێته‌گرتن.

21

به‌تالی ئێك ژ ئاریشه‌یێن به‌ربه‌لاڤه‌ كو گه‌نج د جڤاكى دا تووش دبیتێ و كارتێكرنێن خوه‌ یێن نیگه‌تێف ل سه‌ر وان هه‌یه‌، ژ ئالیێ ئابوورى، جڤاكى و ده‌روونى ڤه‌، ئاریشه‌كا دى زێده‌ دكه‌ت دبیته‌ بارگرانى د ناڤ وه‌لاتى دا، هه‌ر كه‌سه‌كێ كار نه‌بیت دهێته‌ دخانا به‌تالیێ دا، ژ به‌ر كو دبه‌رهه‌ڤن بۆ كارى و به‌رده‌وام دلێگه‌ریانێ دانه‌، لێ چو كار بده‌ست وان ناكه‌ڤیت، ژ ئه‌گه‌رێ ڤالاتیێ گه‌نج په‌نایێ دبه‌ته‌ به‌ر مادێن بێهۆشكه‌ر هه‌تا دگه‌هیته‌ وى راده‌ى ببنه‌ مه‌ترسى ل سه‌ر خێزانێ و جڤاكێ تێدا دژین، ده‌ما رێژا هه‌ژاریێ زۆر بیت و قه‌یران د ناڤ وه‌لاتى یا به‌رده‌وام بیت، كریارێن دزیێ و كوشتنێ ژى زۆر دبن، هه‌كه‌ ژى ئه‌وه‌ كو گه‌نجى چ كارێن ده‌ست نیشانكرى نینه‌ بكه‌ت و رۆژا خوه‌ بورینت كو مێشكێ وى هه‌موو ل كارى بیت، ژ به‌هندێ په‌نایێ دبه‌ته‌ به‌ر ڤان تاوانان. بلندبوونا رێژا به‌تالیێ ب تنێ كارتێكرنێ ل سه‌ر وه‌رارا ئابوورى یا وه‌لاتى ناكه‌ت، به‌لكو كارتێكرنێ ل جڤاكى ژى دكه‌ت و دبیته‌ ئه‌گه‌رێ گه‌له‌ك ده‌ردێن جڤاكى د ناڤ ته‌خا گه‌نجاندا، ژ به‌ر كو په‌یوه‌ندیه‌كا موكم یا د ناڤبه‌را به‌تالى و هه‌ژاریێ و تاوانێ دا هه‌ى، وه‌كو چاوا فه‌یله‌سوفێ فه‌ره‌نسى رۆسۆ دبێژیت: (هه‌ژارى مه‌زنترین تاوانه‌) و د جڤاكێن ساخله‌م دا تاوانبار دكێمن، هه‌ر وه‌سا فه‌یله‌سۆفێ مه‌زن دیكارت دبێژیت: (دزى تاوانا هه‌ژاریێ یه‌)، ڤێجا چه‌ند به‌تالى به‌ر ب زێده‌بوونێ ڤه‌ بچیت دێ رێژا هه‌ژاریێ و تاوانێ زێده‌ بیت، دیسا رێژا خوه‌كوشتنێ ژى زێده‌ دبیت، ژبه‌ر كو دبینت بۆ ده‌مه‌كێ درێژ بێكار مایه‌ و هزر دكه‌ت ئێدى چ ده‌رگه‌هێن دى بۆ ناڤه‌بن كو د ژیانێ دا بژیت، ره‌وشا وى یا ده‌روونى تێكدچیت و دگه‌هیته‌ وى راده‌ى دووماهى ب ژیانا خوه‌ بینت و هزردكه‌ت كو باشترین كاره‌كرى دا ژ ڤێ ئالۆزیێ قورتال بیت.
نه‌ گونه‌ها گه‌نجى یه‌ ده‌ما خواندنا خوه‌ ته‌مام بكه‌ت، بێكار بیت، فه‌ره‌ ل سه‌ر حوكمه‌تێ كو هزر ل گه‌نجى بكه‌ن دا پاشه‌رۆژا وى ب هه‌روه‌ نه‌چیت، ژ به‌ر كو هه‌ر گه‌نجه‌ك خودان هزر و دیتنه‌ك جودایه‌، فه‌ره‌ ده‌رفه‌تێن كارى بۆ وان بهێنه‌ دابینكرن داكو بشێن داهێنانێن خوه‌ دیار بكه‌ن و ده‌لیڤێ بده‌نه‌ گه‌نجى پۆستێت كارگێرى یان هه‌ر پۆسته‌كێ دى وه‌ربگریت، دیسا دڤێت كه‌رتێن تایبه‌ت د ناڤ جڤاكى دا زێده‌ بن ئه‌ڤه‌ دبیته‌ ئه‌گه‌ر كو بارگرانى ل سه‌ر ملێن حوكمه‌تێ سڤك بیت، هه‌كه‌ گه‌نجى كار نه‌بیت و دیت د وه‌لاتێ خوه‌ دا چ پیته‌دان و خزمه‌ت بو ناهێته‌كرن ، خو هه‌كه‌ چ كارێن خراب د ناڤ جڤاكى دا نه‌كه‌ت دێ په‌نایێ به‌ته‌ به‌ر كۆچبه‌ریێ، لێ ئه‌ڤه‌ مه‌زنترین شاشى یه‌ دهێته‌كرن، چونكو وه‌لات ل سه‌ر ده‌ستێن وان و ب داهێنانێن وان یێن سه‌رده‌م دهێته‌ ئاڤاكرن.
جهێ داخێ یه‌ ئه‌ڤ قه‌یرانا ئابوورى هند درێژبووى و سیاسه‌تمه‌دارێن مه‌ وه‌لاتیێ خوه‌ ژ بیركریه‌ ب تنێ هزرا وان ل به‌رژه‌وه‌ندیێن وانه‌، سێ سال بۆرین چو لایه‌نه‌كى نه‌شیایه‌ ڤێ قه‌یرانێ دوماهى بینت، ژ به‌ر كو رۆژانه‌ كۆمبوونێن سیاسه‌تمه‌داران د بێ ئه‌نجام دووماهى دهێن ، ئه‌ڤه‌ هه‌موو دبنه‌ ئه‌گه‌ر كارتێكرن ل ژیانا گه‌نجى بهێته‌كرن، گه‌نج هزر د وه‌لاته‌كێ ئارام دا دكه‌ت داكو بشێت بژیت و داهاتوى دا پاشه‌رۆژه‌ك گه‌ش هه‌بیت، لێ هه‌كه‌ به‌روڤاژى بوو كو مرۆڤ د وه‌لاته‌كێ قه‌یران دا بژیت و بێكارى زۆر ببیت، بهایێن هه‌ر تشته‌كى د بازارى دا یێ بلند بیت و ئاگه‌ه ژ ره‌وشا هه‌ژارى و ده‌ستكورتان نه‌بیت، ل وى ده‌مى هێلانا وه‌لاتى ئه‌ركه‌كێ نشتیمانى یه‌.

26

كى ژ مه‌ هه‌یه‌ نه‌زانیت كو خێزان وه‌كو ده‌زگه‌هه‌كێ جڤاكى یێ ئیكێ یه‌ كو زارۆ وه‌رار و گه‌شه‌كرنا خوه‌ تێدا دكه‌ت و فێردبیت كو كریارێن شاش و دروست ژێك جودا بكه‌ت، لێ هه‌كه‌ ئه‌ڤ ده‌زگه‌هه‌ هاته‌ ڤه‌گوهاستن بۆ گۆره‌پانه‌كا جودا یا جۆرێن توندوتیژیێ كو ده‌رئه‌نجامێ وێ ئاریشه‌ یێن د ناڤبه‌را دایك بابان دا بن ئه‌ڤ چه‌نده‌ دبیته‌ ئه‌گه‌ر كو زارۆ د ژینگه‌ها نه‌ئارامكه‌ر دا بژیت ره‌نگه‌ ده‌روونێ وى تێك بچیت، ل دووڤ ڤه‌كۆلین و وان خواندنێن هاتینه‌كرن دیاردا توندوتیژیا خێزانى به‌ربه‌لاڤترین و كه‌ڤنترین دیارده‌یه‌ د جڤاكێ مرۆڤاتیێ دا، ئه‌ڤه‌ نه‌ تنێ كارتێكرنێ ل خیزانێ دكه‌ت به‌لكو ل جڤاكى ژى دكه‌ت. سه‌رده‌م بۆ سه‌رده‌مه‌كێ دى ژیان دهێته‌ گوهۆرین و هشیاركرن د ناڤ خه‌لكى دا په‌یدا دبیت، دیسا هه‌بوونا رێكخراوێن جیهانى كو به‌ره‌ڤانیێ ژ مافێ زارۆى بكه‌ن، ل سه‌ر ڤێ هه‌موو یێ را هێشتا ل رۆژهه‌لاتا ناڤین ته‌خه‌ك مایه‌ ژ به‌ر دابونه‌ریتان كو ڤێ توندیێ د ناڤ خێزانا خوه‌ دا ڤه‌دشێرن داكو هه‌تك به‌ریا وان پێ نه‌چیت، كارتێكرنا نیگه‌تێڤ ل  ئه‌ندامێن خێزانێ دهێته‌كرن، تایبه‌ت زارۆ، ژ به‌ر كو ده‌ما دبینن ژ بچووكاتیا خوه‌ تووشى توندیێ و لێدانێ دبن ژ بال مالباتا خوه‌ ڤه‌، ئه‌ڤ زارۆیه‌ ل سه‌ر وێ توندوتیژیێ دهێته‌ مه‌زنكرن و نفش بۆ نفشه‌كێ دى وێ توندیێ دوباره‌ دكه‌ن. رێیێن توندوتیژیێ نه‌ تنێ قوتانه‌ به‌لكو ئازاردانا له‌شى و مۆرالى و یا سكسى یه‌ ژى، دیسا یا ده‌روونى وه‌كو (خه‌مۆكى و دودلى و باوه‌رى بخونه‌ بوون و هتد …) ئه‌ڤه‌ هه‌موو دبیته‌ ئه‌گه‌ر كو زارۆ په‌نایێ به‌ته‌ خوه‌كوشتنێ. گه‌له‌ك جاران د ناڤ خێزانێ دا دێ بینى كه‌سه‌كێ كێم ئه‌ندام هه‌یه‌، هن جاران ئه‌ندامێن خێزانێ شوونا پشته‌ڤانیا وى بكه‌ن و وى هانده‌ نه‌ هندێ كو هه‌ست نه‌كه‌ت كێماسیه‌ك ل ده‌ف هه‌یه‌، به‌روڤاژى ڤێ چه‌ندێ دكه‌ن پشتگوه ڤه‌ دهاڤێژن و گرنگیدانه‌كا پێدڤى بۆ ناكه‌ن، دیسا هه‌م جڤاك ژى ڤێ ره‌فتارێ ل گه‌ل دكه‌ت، كریارێن وان دگه‌هنه‌ وى راده‌ى كو زارۆ بخوه‌ هه‌ست ب ڤێ چه‌ندێ بكه‌ت، نه‌باوه‌رى ب خوه‌بوون ل ده‌ف زۆر دبیت دترسیت بۆچوونا خوه‌ بێژیت یان كریاره‌كێ بكه‌ت و ده‌روونێ وى تێكدچیت، د عه‌لى وه‌ردى د پرتووكا خوه‌ دا یا(كه‌ساتیێ تاكێ ئیراقى) دبێژیت: (دبیت زارۆیه‌كێ كێم ئه‌ندام یان ژى یێ گه‌له‌ك زه‌عیف ببیته‌ جهێ یارى و تڕانه‌پێكرن و ئێشاندنێ ل جه‌م زارۆیێن دى، ڤێجا دێ خودیكا ده‌روونێ وى گرێیه‌كا كوور ب خوه‌ ڤه‌ گریت دێ گه‌له‌ك یا ب زه‌حمه‌ت بیت خوه‌ ل مه‌زنیێ ژى خوه‌ ژێ قورتال بكه‌ت، ڕه‌نگه‌ هنده‌ك ئاره‌زۆیێن ل ده‌ف وى زارۆى هه‌بن وى بگه‌هینه‌ جهێن بلند د ناڤ جڤاكى دا و بناڤوده‌نگ بكه‌ڤیت، لێ گرێیا وى یا هه‌ست ب كێماسیێ ناهێلیت ڤێ چه‌ندێ ل جه‌م خوه‌ ببینیت و دێ هه‌ر هه‌ست پێ كه‌ت كو ئه‌و جهێ یارى و تڕانه‌پێكرنێ یه‌). تایبه‌ت ل ڤێ دووماهیێ توندوتیژیا زارۆیان ژ بال خێزانێن وان ڤه‌ ببوو دیارده‌یه‌كا به‌ربه‌لاڤ د ناڤ جڤاكى دا، جهێ داخێ یه‌ كو ئه‌ڤرۆ روودانێن هۆسا دلته‌زین بینن، كو چه‌ند ژ وان بوونه‌ قوربانێن توندوتیژیێ، لێ هه‌تا نوكه‌ نه‌شیاینه‌ ڤێ توندوتیژیێ رژدى راوه‌ستینن و چو ئالیه‌ك ب ژردى خوه‌ لێ نه‌كریه‌ خودان. رێكخراوێن مافێ مرۆڤان ل هه‌رێمێ نزا دنفستینه‌؟ ب تنێ ئه‌م گوه ل ده‌نگێ وان دبین، به‌لێ ئه‌م كریارێن وان ب چاڤ نابینن، ب دیتنا من فه‌ره‌ خولێن هشیاركرنێ بۆ ده‌یكو بابان بهێنه‌ ڤه‌كرن كو چاوانیا په‌روه‌رده‌كرن و سه‌ره‌ده‌ریا وان ب شێوه‌كێ دروست گه‌ل زارۆیێن خوه‌ بكاربینن، ژ به‌ركو پاشه‌رۆژا زارۆى ب قوتان ولێدانێ گه‌شه‌ نابیت، به‌لكو وێران دبیت

website security
Facebook Auto Publish Powered By : XYZScripts.com