NO IORG
Authors Posts by سالح محه‌مه‌د ته‌يرۆ

سالح محه‌مه‌د ته‌يرۆ

سالح محه‌مه‌د ته‌يرۆ
20 POSTS 0 COMMENTS

44

ساڵح محه‌مه‌د ته‌یرۆ

هه‌كه‌ هنده‌كێ بزڤرینه‌ دیرۆكا پارتى دیمۆكراتى كوردستان، دێ بینین كو هه‌رده‌م به‌رژه‌وه‌ندیا گشتى ل پێش به‌رژه‌وه‌ندیێن حزبى دا دانایه‌ و ژ دلسۆزى و كوردپه‌روه‌رى و راستگویا خوه‌دا لایه‌نێ به‌رامبه‌ر ته‌لهه‌ ل به‌ر داناینه‌ و هنده‌كا جاران فێل خیانه‌ت ژى لێ كرى یه‌، لێ ئه‌ڤه‌ نابیته‌ ئه‌گه‌را وێ چه‌ندێ كو پارتى دیمۆكراتى كوردستان یا بسپۆر و شاره‌زا نینه‌ د سیاسه‌تێ دا، به‌لكو ل ده‌مێ بریارێ دده‌ت به‌ریا هه‌مى تشته‌كى به‌رژه‌وه‌ندیا كورد و كوردستانێ ب دووربینى و هووربینى شرۆڤه‌ دكه‌ت.
پشتى هه‌لبژارتنێن جڤاتا نوونه‌رێن عیراقى ل 12/5/2018 و پارتى دیمۆكراتى كوردستان بوویه‌ ئێكه‌م حزب ل سه‌ر ئاستێ عێراقێ ژ به‌ر بده‌ستڤه‌ئینانا وێ رێژه‌یا ده‌نگان ل پشتى هه‌رفاندنا رژێما به‌عس ل نیسانا سالا 2003 ێ و ل دووڤ وان رێكه‌فتنێن هاتینه‌ واژووكرن ل گه‌ل لایه‌نێن سیاسى یێن عیراقێ و بوویه‌ عورفه‌كێ سیاسى ژى كو سه‌رۆك كۆمارێ عیراقێ بۆ كوردانه‌ و یێ ئه‌نجوومه‌نێ نوونه‌ران بۆ سوننه‌یانه‌ و یێ جڤاتا وه‌زیران بۆ شیعه‌یایه‌، ل به‌ر رێژه‌ و وان كورسیێن بده‌ستخوه‌ڤه‌ ئێخستى پۆستێ سه‌رۆك كۆمارێ عێراقێ مافێ پارتى دیمۆكراتى كوردستان بوو و هه‌رچه‌نده‌ رێككه‌فتن ل ئێڤاریا 2\10\2018 د ناڤبه‌را پارتى دیمۆكراتى كوردستان و ئێكه‌تیا نیشتیمانیا كوردستانێ ل سه‌ر پۆستێ سه‌رۆك كۆمارێ عیراقێ هاته‌ كرن، لێ مه‌ دیت چاوا لایه‌نێ دى ئه‌و رێكه‌فتن هه‌ر زوو هه‌لوه‌شاند بۆ به‌رژه‌وه‌ندیا حزبا خوه‌ و بوون ئه‌گه‌ر كو كورد ب زێده‌تر ل به‌ربژاره‌كێ بچنه‌ هه‌لبژارتنێن ده‌ستنیشانكرنا سه‌رۆك كۆمارێ عێراقێ و به‌ربژارى وى لایه‌نى سه‌ركه‌فت ژبه‌ركو مه‌ بڤێت یان نه‌ڤێت ل عیراقێ ئیران و پاشان ده‌وله‌تێن زلهێز بریارده‌رن و یا وان دڤێت دێ ئه‌و بیت، عه‌ره‌بان ژى سه‌رۆك كۆماره‌ك دڤێت به‌رگریێ ل مافێن گه‌لێ كورد نه‌كه‌ت و ئاگه‌ه ل ئێش و ئازارێن گه‌لێ خوه‌ نه‌بیت و ل بریارێن وان ده‌رنه‌كه‌ڤیت و ئه‌م دپشتراستین ئه‌ڤ جۆره‌ سه‌رۆكه‌ ژى دێ ل جه‌م وان كه‌سان ده‌ست كه‌ڤیت ئه‌وێن كو ئاخا پیرۆزا كوردستانى ل 16ئوكتوبه‌را سالا 2017 فرۆشتى ئه‌وا ئاخا ب زێده‌تر ژ 1800 شه‌هیدێن سه‌ربلند و ب هزاران بریندارێن پێِشمه‌رگه‌هێن گیان ل سه‌ر ده‌ست و خوه و رۆندك و قاره‌مانیا پێِشمه‌رگه‌هێن قه‌هره‌مان هاتبوویه‌ رزگاركرن، خاله‌كا دى یا گرنگ فه‌ره‌ ئاماژێ پێ بكه‌ین ئه‌وه‌ ئه‌رێ ئه‌وێن كو سه‌ر ده‌ستێ پارتى و سه‌رۆك بارزانى ل میحوه‌رێ پردێ و سحێلا و مه‌حموودیێ و تلسقووف مه‌زنترین شكست دیتى و نه‌هێلان پێلانێن وان سه‌ربگرن مه‌عقوله‌ ئه‌ڤرۆ پشته‌ڤانیێ ل به‌ربژارێ پارتى بكه‌ن و بۆچى ئه‌م خوه‌ خه‌شیم دكه‌ین و مه‌ نه‌ڤێت ئه‌م بزانین.
یا خۆیایه‌ كو ئه‌وا ل رۆژا دوی ئوكتوبه‌رێ هاتیه‌كرن بۆ كۆمه‌كا ئارمانج و مه‌به‌ستان بوویه‌ كو ئارمانجا سه‌ره‌كى ژ ڤێ چه‌ندێ تێكدانا بارودۆخێ ناڤخوه‌یێ هه‌رێما كوردستانێ یه‌ و زێده‌تر نه‌مانا ئێكرێزى و ئێك هه‌لوێستیا حزب و لایه‌نێن كوردستانى یه‌ نه‌مازه‌ كو پشتى ئه‌نجامێن به‌راهیێ یێن هه‌لبژارتنێن په‌رله‌مانێ كوردستانێ ئه‌وا ل 30/9/2018 هاتیه‌ ئه‌نجامدان ده‌ركه‌فتین و پارتى شیایه‌ رێژه‌یه‌كا ئێكجار زۆر بده‌ستڤه‌ بینیت ئه‌ڤه‌ دبه‌رژه‌وه‌ندیا داگیركه‌ر و دوژمن ونه‌حه‌زێن كوردستانێ دا نینه‌، چونكى پارتى دیمۆكراتى كوردستان و سه‌رۆك بارزانى خودانێ بریارا خوه‌نه‌ و بریارێ ژ چ لایه‌ن و كه‌سان وه‌رناگرن و ئه‌گه‌ر بڤێت دكاریت سوبه‌هى دگه‌ل كۆتایا حوكمه‌تا هه‌رێما كوردستانێ پێكبینیت.
لێ فه‌ره‌ پارتى دیمۆكراتى كوردستان وێ بكه‌ت ئه‌وا باش و د به‌رژه‌وه‌ندیا هه‌رێما كوردستانێ دا بیت هه‌روه‌كى هه‌مى جاران كرى و ئه‌و ژى ل به‌رچاڤگرتنا بارودۆخ و هه‌ڤكێشه‌یێن سیاسى یێن عیراقێ و ده‌ڤه‌رێ و ب خویندنه‌ك هوور پێنگاڤا بهاڤێژیت كو نابیت پارتى دیمۆكراتى كوردستان ل سه‌ر ڤێ چه‌ندێ ب كاردانه‌ڤه‌ سیاسه‌تێ بكه‌ت و سیاسه‌تا خوه‌ هه‌بیت و زۆر هشیارانه‌ و واقعى سه‌ره‌ده‌ریێ بكه‌ت و پێدڤیه‌ ئێكرێزى و ئێك هه‌لوێستیا حزب و لایه‌نێن كوردستانى به‌رچاڤ بهێته‌ وه‌رگرتن و ل دووماهیێ دبێژین ئێكرێزى و ئێك هه‌لویستیا حزب و لایه‌نێن كوردستانى د ڤێ قووناغا پر كێشه‌ و ئاریشه‌ كو ده‌ڤه‌را رۆژهه‌لاتا ناڤه‌راست تێدا ده‌ربازدبیت باشترین زه‌مانه‌ته‌ بۆ پاراستن و بهێزكرنا كوردستانێ و پاراستنا مافێن گه‌لێ كورد ل عێراق و ده‌ڤه‌رێ ژى.

4

سالح محه‌مه‌د ته‌یرۆ
د ڤێ هه‌یڤا ئیلۆنێ دا چه‌ندین بیره‌وه‌ریێن نه‌ته‌وى و نیشتیمانى تێدا هاتینه‌ تۆماركرن وه‌كو یادا پیرۆزا هه‌لگیرساندنا چریسكا شۆرشا ئیلۆنا مه‌زن ل 11/9/1961 ب رێبه‌رایه‌تیا پارتى دیمۆكراتى كوردستان و سه‌ركردایه‌تیا بابێ روحى یێ نه‌ته‌وا كورد بارزانیێ نه‌مر كو ئیسال (57)سال ب سه‌ردا ده‌ربازبوون ل رۆژا 25ئیلۆنێ ساله‌ك ده‌ربازبوو ل سه‌ر ئه‌نجامدانا هه‌لبژارتنا پرسه‌كا نه‌ته‌وى و نیشتیمانى كو ئه‌و ژى هه‌لبژارتنێن ریفراندۆمێ یه‌ بۆ ٍسه‌ربخوه‌یا كوردستانێ و زێده‌تر ل (93,7) خه‌لكێ دلسۆز و كوردپه‌روه‌ر و وه‌لاتپارێز و ب شه‌ره‌ف ب كه‌رنه‌ڤال و ئاهه‌نگێن مه‌زنڤه‌ قه‌ستا سه‌ر سندۆقێن ده‌نگدانێ كرین ده‌نگ بۆ دایى و گۆتى به‌لێ بۆ سه‌رخوه‌یا كوردستانێ و به‌لێ بۆ بریارا سه‌رۆك بارزانى، بۆ ڤێ ئارمانجا پیرۆز ئه‌ڤه‌ زێده‌تر ل سه‌د ساڵانه‌ بزاڤا رزگاریخوازیا ملله‌تێ كورد د قادا خه‌بات و تێكۆشین و قوربانیدان و به‌رخودانێ دایه‌ و ب سه‌دان هزار قه‌هره‌مانێن ڤى ملله‌تى سه‌ر ل پێناڤ دانایه‌ و شه‌هیدبووینه‌، ب راستى سه‌ركه‌فتنا پرسا ریفراندۆمێ و ب ده‌ستڤه‌ئینانا ئه‌ڤێ رێژه‌یا هه‌رى زۆر یا ده‌نگێن كوردستانیان بوویه‌ به‌لگه‌هه‌كا قانوونى و دیرۆكى د ده‌ستێ گه‌لێ كوردستانێ دا و حه‌تا ئێك كوردێ ب شه‌ره‌ف مایه‌ ل سه‌ر ڤێ گه‌ردوونێ
دڤیا شانازیێ ب ڤێ رۆژا پیرۆز بكه‌تن.
ئه‌گه‌ر ئه‌م ب وژدانڤه‌ ل سه‌ر ئارمانجێن نه‌ته‌وى و نیشتیمانى یێن پارتى دیمۆكراتى كوردستان ب سه‌ركردایه‌تیا بارزانیێ نه‌مر و سه‌رۆك بارزانى راوه‌ستین و خه‌بات و فیداكارى و قوربانیدان ل پێناڤ كرى و داین دێ دیار بیت كو سه‌ربخویا كوردستانێ ئێك ل وان ئارمانجێن گرنگ و سه‌ره‌كى بووینه‌ كو پارتى و بارزانى كارێن مه‌زن و رژد ل سه‌ر كرین، چونكو هه‌تا ملله‌ت ل ژێرده‌ستى و زولم و سته‌مێ بیت نكاریت قووناغێن پێشكه‌فتنا مادى و هه‌تا مه‌عنه‌وى ژى ب ته‌مامى ببریت، له‌وما ئێك ل پێنگاڤێن سه‌ره‌كى یێن پارتى دیمۆكراتى كوردستان و سه‌رۆك بارزانى بریتى بوو ل گه‌شه‌دانا هزرا سه‌ربخوه‌یا نیشتیمانى كو ئه‌و ژى سه‌رخوه‌بوونا كوردستانێ یه‌ و ل پێنگاڤێن پرسا ریفراندۆمێ دا ب زه‌قى و زه‌لالى هاته‌ دیتن، سه‌ره‌راى ئه‌و هه‌ول و بزاڤێن كو ژلایێن هنده‌ك ل ده‌وله‌تێن زلهێز و ده‌ڤه‌رێ و هه‌رێمى و ناڤخوه‌یى ژى هاتنه‌كرن كو ئه‌ڤ پرسه‌ نه‌هێته‌كرن و ب هه‌ر هێجه‌ته‌كا بێ رامان و بێ به‌لگه‌ بهێته‌ پاشئێخستن، لێ پارتى و سه‌رۆك بارزانى خودانێ بریارا خۆنه‌ و بریارێ ل كه‌س وه‌رناگرن و هێزا خوه‌ ژ كورد و كوردستانیان وه‌ردگرن ئه‌و بریار ب جورئه‌تڤه‌ دا و پرسا ریفراندۆمێ ل رۆژا 25/9/2017 ئه‌نجامدا و مه‌زنترین سه‌ركه‌فتن د دیرۆكا ته‌ڤگه‌را رزگاریخوازیا كوردستانێ تۆماركر، چونكو باش دزانن كو هیچ جڤاك و ملله‌ته‌ك ب بێ ده‌وله‌تا نیشتیمانى یا سه‌ربخوه‌ بهایێن دیمۆكراسى پێ گه‌شه‌ نابن و ل وه‌لاته‌كێ سه‌ربخوه‌ دا ئازادیا تاك و هزر گه‌شێ دكه‌ت و كلتوورێ مه‌عنه‌وى گورانكاریێن جه‌وهه‌رى ب سه‌ردا دئێن، ئها ل به‌ر ڤێ چه‌ندێ پارتى دیمۆكراتى كوردستان و بارزانى د رژدبووینه‌ بۆ سه‌ربخوه‌یا كوردستانێ.
له‌وما ئه‌وێن خودانێن ڤێ بریارا نه‌ته‌وى و نیشتیمانى بن فه‌ره‌ كو ل رۆژا 30/9/2018 كو رۆژا هه‌لبژارتنێن په‌رله‌مانێ كوردستانێ یه‌ و كورد و كوردستانى ئه‌ڤانه‌ ب نوونه‌رێن خوه‌ یێن راسته‌قینه‌ بزانن كو ئه‌و ژى پارتى دیمۆكراتى كوردستان و سه‌رۆك بارزانى یه‌ و ده‌نگى بده‌نه‌ لیستا 183 ێ تاكو گه‌لێ كوردستانێ ب ئێكجارى ل زولم و سته‌م و داگیركه‌ر و دوژمن و پیلانگیر و خوه‌فرۆشان رزگار ببیت و گیانێ شه‌هیدێن رزگاریخوازیا كوردستانێ دنێڤ گوریدا ئارام ببن و رۆندكێن دایكێن شه‌هیدا زوها ببن و به‌رپه‌ره‌كێ دى یى زێرین لبه‌رپه‌رێن دیرۆكا رزگاریخوازیا كوردستانێ ب گشتى و نه‌مازه‌ یا پارتى دیمۆكراتى كوردستان تۆمار بكه‌ن.
نه‌ك ده‌نگى بده‌نه‌ وان لایه‌ن وكه‌سان ئه‌وێن كو ل دژى پرسا ریفراندۆمێ بوون و باوه‌رى ب ڤێ پرسێ نه‌بوویى و داخواز دكر كو ریفراندۆمچیان دادگه‌ه بكه‌ن و ل دژى ئه‌ڤێ پرسا نه‌ته‌وى و نیشتیمانى راوه‌ستابوون و پیلان لدووڤ پیلانێ ل دژى ئه‌ڤێ پرسا ریفراندۆمێ گێراین و بووینه‌ داروده‌ستێن دومن و داگیركه‌رێن كوردستانێ و ته‌سلیمكرنا وان ده‌ڤه‌رێن كوردستانى كو ب خوینا هزاره‌ها شه‌هید و بریندارێن پێشمه‌رگه‌هێن قه‌هره‌مان هاتینه‌ رزگاركرن.
دپشتراستین كو خه‌لكێ كوردستانێ یێ هوشیاره‌ و دێ ل سه‌ر سندۆقێن ده‌نگدانێ به‌رسڤا وان لایه‌ن و كه‌سان ده‌نه‌ڤه‌ ئه‌وێن كو ل دژى ڤێ ئارمانجا نه‌ته‌وى و نیشتیمانى راوه‌ستاین وهه‌روه‌كى ل هه‌لبژارتنێن نوێنه‌رێن جڤاتا عیراقێ ل رۆژا 12/5/2018 به‌رسڤا وان دایه‌ڤه‌ و لیستا پارتى دیمۆكراتى كوردستان بوویه‌ هژماره‌ ئێك وه‌كو حزب ل سه‌ر ئاستێ عیراقێ و كوردستانێ.
ل دووماهیێ پێشنیار دكه‌ین بۆ په‌رله‌مانێ كوردستانێ كو ئه‌ڤ رۆژا پیرۆز ببیته‌ بهێنڤه‌دانه‌كا فه‌رمى ل سه‌رانسه‌رى هه‌رێما كوردستانى چونكو رۆژه‌كا دیرۆكى یه‌ و نفشێ نوو ژى درامانا ئه‌ڤێ رۆژا نه‌ته‌وى و نیشتیمانى بزانیت.
سلاڤ ل یادا سالڤه‌گه‌را بریارا ریفراندۆما سه‌ربخویا
كوردستانێ و ریفراندۆمچیان ….

14

ساڵح محه‌مه‌د ته‌یرۆ
ل ڤێره‌ نازڤرینه‌ڤه‌ بۆ دیرۆكا پڕ سه‌روه‌ریا پارتى دیمۆكراتى كوردستان كو ئه‌ڤه‌ حه‌فتێ و دو سالا د قادا خه‌بات و تێكۆشین و قوربانى و به‌رخودانێ دایه‌ و سه‌ره‌راى كو پارتى و رێبازا پیرۆزا بارزانیێ نه‌مر (ئه‌خلاقه‌، دادپه‌روه‌رى یه‌، كوردپه‌روه‌ریى یه‌، وه‌لاتپارێزى یه‌، ئارامى یه‌، ئاڤه‌دانكرنه‌، پێكڤه‌ژیانه‌، وه‌كهه‌ڤى یه‌، پاراستنا مافێ مرۆڤى یه‌ و …هتد)، ئه‌گه‌ر ب وژدانڤه‌ به‌رێ خوه‌ بده‌ینه‌ وان هه‌لبژارتنان ئه‌وێن هه‌ر ل پشتى سه‌رهلدانا بهارا سالا 1991 و حه‌تا یا رۆژا 12/5/2018 ڤێجا بگره‌ ژ هه‌لبژارتنێن په‌رله‌مانێ كوردستانێ و یێن جڤاتا نوونه‌رێن عیراقا فیدرال و جڤاتێن باژێرڤانیێ و پارێزگه‌هان ل سه‌ر ئاستێ هه‌رێمى هاتینه‌كرن هه‌رده‌م زۆرینه‌یا خه‌لكێ كوردستانێ باوه‌رى دایه‌ پارتى و پارتى بوویه‌ ئێكه‌ما بێ ركابه‌ر و هه‌رده‌م ژى بۆ به‌رژه‌وه‌ندیا گشتى ته‌نازول ژ هنده‌ك مافێن خوه‌ ژى كرى یه‌ تاكو ئالۆزى وكێشه‌ دروست نه‌بن و ئه‌ڤ ئه‌زموونا ب خوین و خوه و رۆندكێن ئه‌ڤى ملله‌ته‌یى بده‌ستڤه‌ هاتین نه‌هێنه‌ شێواندن و ژناڤبرن.
دیسا ئه‌و پیلان و ئاسته‌نگێن مه‌زن و ئه‌وێن چ ب هه‌ڤكاریا هێزێن ده‌رڤه‌ و یان ناڤخوه‌یى ل دژى وێ هاتینه‌ دارێشتن ژبوى نه‌مانا پارتیه‌كێ ب ناڤێ پارتى دیموكراتى كوردستان و رێبازه‌ك ب ناڤێ رێبازا پیرۆزا بارزانیێ نه‌مر.
لێ پارتى و بارزانى و كورد و كوردستان مینا گیانه‌كێنه‌ و چ جۆران ژێك ناهێنه‌ جوداكرن و دۆست و دوژمن ژى گه‌هشتنه‌ وێ باوه‌رى و قه‌ناعه‌تێ كو پارتى دیمۆكراتى كوردستان ب سه‌ركردایه‌تیا سه‌رۆك بارزانى خوه‌ ب خودانێ ڤان ده‌ستكه‌فت و سه‌روه‌ری و پارێزڤانیا وان دزانیت و یا گرێدایه‌ ب ئارمانجێن نه‌ته‌وى و نیشتیمانى ڤه‌ نه‌ك ب مه‌رجان ڤه‌, هه‌روه‌تۆڤ خودانێ بریارا خویه‌ و بریارێ ل كه‌س وه‌رناگریت و راده‌ستى ئیراده‌یا دوژمن و داگیركه‌ران نه‌بوویه‌ و نابیت ژى و مساوه‌مێ ل سه‌ر بهۆسته‌كا ئاخا پیرۆزا كوردستانێ نه‌كرى یه‌ و ناكه‌ت ژى و هه‌ر چه‌ند به‌رخودان و به‌رگریكرن د سه‌خت و دژوار بن، پارتى قوتابخانا هه‌ستا نه‌ته‌وى و نیشتیمانى یه‌ و ب راستى پارتى دیمۆكراتى كوردستان سه‌لماند ب هه‌مى سه‌ره‌ده‌رى و كریارێن خوه‌ڤه‌ و ب به‌رپرسیارانه‌ یا خه‌مخور بوویه‌ ل پێناڤ ل كه‌دا نه‌كرنا ناڤوبانگێن كورد و كوردستانێ، هه‌روه‌تۆف ب ره‌نگه‌كێ پاكژ و خاوێن و ب سه‌نگیا خوه‌ و ب ئێك ده‌نگى و ره‌نگى یا ب بریارێن مه‌ركه‌زیڤه‌ یا گرێدایه‌ و ته‌نازول نه‌كرن ل داخوازیێن گه‌ل و وه‌لاتى و گرتنا به‌رسینگێ وان ته‌حه‌دیا و ناحه‌زان ب ره‌نگه‌كێ ئارامى راوه‌ستا و خوراگر بوو و دوور ل ناڤزراندن و شێواندنێ و هه‌رده‌م پارتى دیمۆكراتى كوردستان پێشره‌و بوویه‌ و دێ پێشره‌و ژى بیت و دێ ژماره‌ ئێكه‌ما بێ ركابه‌ر بیت د هه‌مى هه‌لبژارتنێن بهێنه‌كرن، ژبه‌ركو پارتى باوه‌رییه‌كا موكم ب سیسته‌مێ دیمۆكراسیه‌تێ هه‌یه‌، دیسا باش ل سه‌ر كاودانان رادوه‌ستیت و پاش بریارى دده‌ت و خودانێ قوتابخانه‌یه‌كا راسته‌قینه‌ یا كوردایه‌تیێ یه‌ كو ئه‌و ژى قوتابخانا بارزانیێ نه‌مره‌.
لێ مخابن هنده‌ك لایه‌نێن سیاسى نه‌ك ل گه‌ل ئێككرێزیێ و ناڤزراندنێ دا نه‌بووینه‌ و نینه‌ به‌لكو ب هه‌مى ره‌نگه‌كێ هه‌ولا ناڤزراندن و ئێك شكاندنێ دا دانه‌ و یا د شیانا وان دا ژى بیت درێغیێ ناكه‌ن و نه‌كریه‌ ژى بۆ بانگه‌شه‌یا به‌رته‌سكا هه‌لبژارتنان و یا د به‌رژه‌وه‌ندیا واندا د بانگه‌شه‌یا هه‌لبژارتناندا ئه‌نجامدده‌ن و هه‌مى توخیبان ژى دبه‌زینن، لێ به‌رسڤا پارتى ئه‌وه‌ كو هیچ ده‌مه‌كێ به‌رسڤێن وان نه‌هێنه‌ڤ دان خوه‌ ب وانڤه‌ مژوول نه‌كه‌ین.
لێ خاله‌كا هه‌ره‌ گرنگ ئه‌وه‌ ئه‌م ئاماژێ پێ بده‌ینه‌ كو ئه‌و پیلانا بۆ 16/ئوكتورا سالا 2017 هاتیه‌ دارێشتن ب هه‌ڤكارى ل گه‌ل هنده‌ك كه‌سێن سه‌ر ب لایه‌نه‌كێ سیاسى ل كوردستانێ و ل وێ باوه‌ریێ دابوون كو هه‌رێمه‌ك نه‌مینیت بناڤێ هه‌رێما كوردستانێ و پارتیه‌ك ژى بناڤێ پارتى دیمۆكراتى كوردستان نه‌مینیت و سۆره‌تا الفاتحه‌ ژى ل سه‌ر گۆرێ پارتى بخوینن و ل ده‌مێ سه‌ركه‌فتنا وێ پیلانا خیانه‌تكارى ئه‌و خیانه‌تكارێن هه‌ڤسه‌نگه‌ر ل گه‌ل وان ده‌ستهه‌لاتێ ل پارێزگه‌هێن كوردستانێ وه‌ربگرن، لێ پارتى دیمۆكراتى كوردستان و سه‌رۆك بارزانى و پێشمه‌رگه‌هێن قه‌هره‌مان به‌رسینگێ وێ پیلانا مه‌زن گرتن و ئه‌و داستانێن ل پردێ و سحێلا ومه‌حموودیێ ل سه‌ر ده‌ستێن پێشمه‌رگه‌هێن قه‌هره‌مان ب سه‌رپه‌رشتیا سه‌رۆك بارزانى هاتنه‌ تۆماركرن و خۆنه‌چه‌ماندن وانه‌یه‌ك ژى دا وان ژى كو فه‌ره‌ هه‌تا هه‌تا په‌ندو عیبره‌تا ژێ وه‌ربگرن.
هه‌روه‌تۆڤ ل وێ باوه‌ریێ دا بوون نه‌ك دێ ئاسته‌نگا بۆ پارتى دیمۆكراتى كوردستان دروست كه‌ن، به‌لكو هه‌تا هنده‌ك ژ ئه‌ندامێن وان ل سه‌ر شاشه‌یێن میدیایێن راگه‌هاندنێ دگۆتن كو دڤیا سه‌ركردایه‌تى و به‌رپرسێن پارتى راپێچى دادگه‌ها بكه‌ن و دێ پارتى تووشى مه‌زنترین شكه‌ستن بیت ل ته‌ڤایا پارێزگه‌هێن كوردستانێ و ب ریفراندۆمچى ژى دهژمارتن كو هه‌رده‌م پارتى دیمۆكراتى كوردستان وهه‌ر كورده‌كێ دلسۆز و كوردپه‌روه‌ر شانازیێ ب پرسا ریفراندۆمێ دكه‌ن و بوویه‌ به‌لگه‌هه‌كا یاسایى و دیرۆكى د ده‌ستێ ملله‌تێ كورد دا، لێ خۆیا بوو كینه‌ كه‌ڤنه‌ به‌ردادگه‌ها گه‌ل و وه‌لاتى و تووشى مه‌زنترین شكه‌ستن بوون، لێ زانایان راستگۆتى یه‌ ئه‌وێ بیره‌كێ بۆ برایێ خوه‌ بكۆلیت ئه‌و بخۆ دێ كه‌ڤیتێ!.
لێ نه‌زانى و نه‌ڤێن بزانن ژى كو ئه‌ڤرۆ ملله‌تێ كورد یێ هۆشیاره‌ و سه‌رده‌مێ هندێ نه‌مایه‌ كو ب پرۆپاگندێن وان یێن دوور ل راستیێ خه‌لكى ب سه‌ردا ببه‌ن و ئه‌ڤرۆ سه‌رده‌مێ پێشكه‌فتنا ته‌كنولوژیایه‌ نه‌ك چه‌رخێن به‌رێ یه‌.
ئه‌ز ب یێ پشتراستم كو ئه‌ڤێ جارێ ژى هه‌روه‌كى هه‌مى جارێن به‌رێ گه‌لێ كوردستانێ دێ باوه‌ریێ ده‌نه‌ لیستا (183) یا پارتى دیمۆكراتى كوردستان و بۆ كورد و كوردستانیان ژى یا خۆیا بووى و سه‌ره‌راى ئه‌و كێموكاسیێن هه‌یى كو هه‌ر پارتى و رێبازا پیرۆزا بارزانیێ نه‌مر رێبازا گه‌لێكه‌ بۆ ئازادى و سه‌رفیرازى و سه‌رخوه‌بوونا كوردستانێ خه‌باتێ دكه‌ت و هه‌رده‌م به‌رژه‌وه‌ندیا گشتى ل سه‌ر هه‌مى به‌رژه‌وه‌ندیه‌كێ دانایه‌ و ئه‌ڤه‌ و چه‌ندین خالێن دى دبنه‌ فاكته‌رێن سه‌ره‌كى بۆ سه‌ركه‌فتنا پارتى دیمۆكراتى كوردستان د هه‌لبژارتنان دا.
لێ فه‌ره‌ پارتى دیمۆكراتى كوردستان پشتى هه‌لبژارتنێن په‌رله‌مانێ كوردستانێ كو ل به‌ره‌ (30/9/2018 ) بهێنه‌ سازكرن چاڤخشاندنه‌كا ب له‌ز د سه‌ره‌ده‌ریكرنا هنده‌ك به‌رپرسان دا بكه‌ت و گورانكاریان ژى ل هنده‌ك سازیان دا بكه‌ت و ئه‌و دیوارێ ب كۆنكریتى هاتیه‌ ئاڤاكرن دنێڤبه‌را به‌رپرس و هه‌ڤوه‌لاتیان بشكێنیت و ژناڤببه‌ت و ب وێره‌كى ل سه‌ر كێموكاسیان راوه‌ستیت و بێژیته‌ گه‌نده‌لڤانا ئێدى به‌سه‌ و توخیب بۆ بێنه‌ دانان تاكو ب دروستى باوه‌ریا جه‌ماورێ كوردستانێ یێ مایى بزڤریته‌ڤه‌ بۆ ڤێ رێبازا پیرۆزا پارتى و بارزانیێ نه‌مر، سه‌ركه‌فتن ژى دێ هه‌ر بۆ ئیراده‌یا گه‌لێ كوردستانێ بیت، ل دووماهیێ دبێژم ده‌نگدان ب لیستا 183 ێ ده‌نگدانه‌ ب ئاڤه‌دانكرن و بنیاتنانه‌كا بهێز یا كوردستانێ و پاراستنا ڤان ده‌ستكه‌فت ز سه‌روه‌ریانه‌ و گه‌هاندنا پاپۆرا ملله‌تێ كورده‌ ب قووناغا دووماهیێ كو ئه‌و ژى سه‌رخوه‌بوونا كوردستانێ یه‌.

14

ساڵح محه‌مه‌ ته‌یرۆ
هه‌لبه‌ت ئه‌و هێرشا كو ژ لایێ سێ مێر مندالانڤه‌ ل رۆژا دوشه‌مبى رێكه‌فتى 23/7/2018 كرى یه‌ سه‌ر باله‌خانه‌یا پارێزگه‌ها هه‌ڤلیر ل پایته‌ختێ هه‌رێما كوردستانێ هێرش و روودان وكریاره‌كا سروشتى وخوزایى یه‌، چونكو ئه‌ڤ جۆرێن تیرۆرى ل زۆربه‌ى ده‌وله‌تێن جیهانى یێن پێشكه‌فتى دهێنه‌ ئه‌نجامدان و حه‌تا دكارن ئه‌وان تیرۆرستان ژ وان ئاڤاهیێن ده‌ست ل سه‌ر دانایى بهێنه‌ ده‌رئێخستن چه‌ند ده‌مژمێر و رۆژان ڤه‌دكێشیت و سه‌ره‌راى ئه‌و ئامرازێن پێشكه‌فتى یێن وان هه‌یى ، لێ ب قاره‌مانیى و دلسۆزى و گیانفیدایى یا ده‌زگه‌هێن ئه‌منى یێن هه‌رێما كوردستانێ شیان بۆ چه‌ند ده‌م ژمێره‌كان ئه‌ڤان تیرۆریستان ب سزایى گه‌ل بگه‌هینن.
ئه‌نجامدانا ئه‌ڤان كارێن تیرۆریستى ل ڤى وه‌لاتى زۆر زۆر سروشتى و خوزایى یه‌، ژبه‌ركو ب ده‌هان مزگه‌فت و قوتابخانه‌ و جهێن په‌روه‌رده‌كرنا ئه‌ڤى هزرا توندره‌ و ل ڤى وه‌لاتى هه‌نه‌ و هنده‌ك لایه‌نێن ئیسلامى یێن توندره‌و ژى ل پشت وانه‌ بۆ په‌روه‌رده‌كرنا ئه‌ڤان تیرۆرستان، چونكو د په‌یره‌وپرۆگرامێ ئه‌ڤان لایه‌نێن هزر توندره‌و یێن ئیسلامى دا و ئه‌گه‌ر ب ئاشكرایى ژى نه‌بێژن لێ ب نهێنى هه‌ر پارته‌كا علمانى بیت ب گاور ودژى په‌یره‌وى خودى و پێغه‌مبه‌رى ل قه‌له‌مدده‌ن و دزانن و وه‌ها ئه‌ڤان گه‌نج و لاوێن مێر مندال په‌روه‌رده‌ دكه‌ن كو كوشتنا ئه‌ڤان كادر و ئه‌ندام و ده‌ستهه‌لاتدارێن ڤان حزبێن علمانى خێره‌ك مه‌زنه‌ و بحه‌شت بۆ دئێته‌ دابین كرن و (70) حه‌فتێ حۆرى ژى بۆ دبه‌رهه‌ڤن.
تاكۆ ئه‌م ل ڤێ هزرا توندره‌و د نێڤ ڤى جڤاكى دا رزگار ببین، پێدڤى یه‌ حوكمه‌تا هه‌رێما كوردستانێ ب هه‌ڤكارى ل گه‌ل مرۆڤێن بسپۆر و شاره‌زا ل وارێن ده‌روونى و جڤاكى و ئایینى و زانستى وسازیێن په‌یوه‌ندیدار ل ڤان وارانڤه‌ وه‌كو وه‌زاره‌تا ئه‌وقافێ و وه‌زاره‌تا په‌روه‌ردێ و ووه‌زاره‌تا خویندنا بلند به‌رنامه‌یه‌كێ توكمه‌ دابرێژن تاكو ل به‌رسینگێ ئه‌ڤى هزرا كوژه‌ك رابوه‌ستن وسنوره‌كى ژى بۆ وان لایه‌نین هه‌لگرێن ئه‌ڤى هزرێ دابنێن وچه‌ند بریارێن ب وێره‌ك بهێنه‌ ده‌رئێخستن به‌رامبه‌رى هه‌ر لایه‌نه‌ك هه‌ڤسۆزبیت ل گه‌ل هزرا توندره‌وا تیرۆریستى، دیسا به‌س بیت ل سه‌ر ڤى دیمۆكراسیه‌تا سقه‌ت وبێ بنیات و مالوێران چونكو د دیمۆكراسیه‌تى دا دڤیا قانوون سه‌روه‌ر و وه‌كهه‌ڤ بیت ئه‌ڤه‌ ژى هه‌تا نوكه‌ یا ناهێته‌ چه‌سپاندن وه‌كو پێدڤى و دبینین بكوژ وتاوانبار و بریارا گرتنا وى ده‌رچوویه‌ ژلایێ دادگه‌هێ ڤه‌ و خو په‌ساردایه‌ لڤى باره‌گایى و یێ هه‌ و ل مالا ئه‌ڤى و یێ هه‌ وكه‌س نه‌شێت بێژیته‌ وى به‌رێ چاڤێ ته‌ یێ ره‌شه‌ و ئه‌ڤه‌یه‌ دیمۆكراسیه‌ت ؟
ژبلى ئه‌ڤ خالێن مه‌ ل سه‌ر ئاماژه‌ پێكرى فه‌ره‌ ده‌زگه‌هێن مه‌ زۆر دهوشیار بن و خه‌مسار نه‌بن ژبه‌ركو هه‌لگرێن ئه‌ڤى هزرێ هه‌رده‌م دبووسه‌دانه‌ بۆ دارێشتنا وێ هزرا ژه‌نگى و گه‌هشتن ب وێ مه‌ره‌ما چه‌په‌ل ئه‌وێن ل سه‌ر هاتینه‌ په‌روه‌رده‌كرن، هه‌روه‌توڤ گرنگیێ ب خالێت پاسه‌وانى بهێنه‌ دان و بهێنه‌ موكم كرن و پاسه‌وان ژى دهوشیار بن و ئامرازێن گه‌هاندنێ ل ده‌مى پاسه‌وانیێ ل پاسه‌وانى بهێنه‌ قه‌ده‌غه‌كرن تاكو ل ئه‌ركێ خودا مژویلى وى ئامرازى نه‌بن، باوه‌ر بكه‌ن هنده‌ك خالێن پاسه‌وانێن ده‌زگه‌هان مرۆڤ دبینیت دلێ مرۆڤى بۆ وى پاسه‌وانى دسۆژیت، ئه‌رێ مه‌عقوله‌ خالا پاسه‌وانیێ بیت وئه‌و خال پلاستیك بیت ؟به‌لێ بۆ دروست ناكه‌ن تاكو ئه‌و …..!!! ئه‌رێ نه‌ گونه‌هه‌ باله‌خانه‌یه‌كێ پارێزگه‌هه‌كێ و د جه‌رگێ پایته‌ختێ هه‌رێما كوردستانێ دا بیت ب تنێ پاسه‌وانه‌ك ل به‌رده‌رگه‌هى بیت؟ ئه‌زێ پشتراستم ئه‌گه‌ر ب ڤێ خه‌مساریێ ڤه‌ بچین هه‌مى ده‌ما ئه‌ڤ تیرۆریسته‌ دێ كارن بچنه‌ د ناڤ ئاڤاهیێن داموده‌زگه‌هێن مه‌دا و خۆزگه‌ دخوازین ئه‌م په‌ندو عیبره‌تا ژڤان كریارێن تیرۆریستى وه‌ربگرین ونه‌بیته‌ گۆتنا مه‌زنان ل ده‌مێ هاتیه‌ گۆتن: به‌رازى د مام شالى هه‌لدا و پاش چوو سه‌رێ دارێ.
دیسا خاله‌كێ فه‌ره‌ ئه‌م ئاماژێ پێ بكه‌ین ئه‌و كه‌نالێن راگه‌هاندنێ یه‌ ل روومالكرنا ئه‌ڤان جۆره‌ كریارێن تیرۆریستى، چونكو ئه‌وا وێ رۆژى مه‌ ل ڤان ده‌زگه‌هان دیتى زۆر یا نه‌ پرۆفیشنال بوو و هیچ ره‌ڤاڤكرنا بارێ ئه‌منى د روومالكرنا وان نه‌هاته‌ به‌رچاڤكرن، چونكو ل هه‌مى دونیایى نابیت ده‌زگه‌هێت راگه‌هاندنى خوه‌ نێزیكى ئه‌ڤان كارێن تیرۆرى بكه‌ن بۆ روومالكرنێ ئه‌ڤه‌ژى دزڤریته‌ڤه‌ تاكو ئارامى یا هه‌ڤوه‌لاتیان یا پاراستى بیت و ده‌زگه‌هێن ئه‌منى ژى بكارن رۆلێ خوه‌ ببینن و ب ئومێدین ئه‌م هه‌مى ئه‌ركێ خو بزانین و خو ب به‌رپرسیار بزانین تاكو بكارین ئه‌ركێ خۆ یى نه‌ته‌وى ونیشتیمانى جێ به‌جێ بكه‌ین و وه‌لاتێ خوه‌ ژى ل تیرۆرێ و تیروریستان بپارێزین ….

19

ساڵح محه‌مه‌د ته‌یرۆ
گه‌ر ئه‌م هنده‌ك بزڤرینه‌ڤه‌ بۆ دیرۆكا پارتا كرێكارێن كوردستانێ كو كورتكریا ڤێ پارتێ (پ.ك.ك) یه‌ و ئه‌ڤ پارته‌ ل باكۆرى كوردستانێ (توركیا) و ل سالا 1978 و ب به‌رهه‌ڤبوونا 23 ئه‌ندامێن كۆنگرێ وه‌كو پارته‌كا ماركسى ـ لینینى هاتیه‌ دامه‌زراندن و سه‌رۆكێ وى ژى (عه‌بدوللا ئوچ ئوجه‌لان) بوویه‌ كو ئه‌ڤه‌ چه‌ندین ساله‌ هاتیه‌ ده‌سته‌سه‌ركرن ژلایێ ده‌وله‌تا توركیاڤه‌، یا خۆیایه‌ كو ل ده‌سپێكێ ده‌ست ب چالاكیێن خوه‌ یێن سیاسى كرن و پاش ل سالا 1984 بوو پارته‌كا چه‌كدار و ده‌ست ب خه‌باتا چه‌كدارى كر، هه‌مى ژى دزانین ل ده‌سپێكا شه‌رێ چه‌كدارى یێ پارتا كرێكارێن كوردستانێ كى لایه‌نێ سیاسى بوو یێ باشۆرێ كوردستانێ (عیراق ) بوو كو هاریكارى و پشته‌ڤانیا وان كرى كو ئه‌و ژى پارتى دیمۆكراتى كوردستان بوو كو ده‌رگه‌هێن باره‌گایێن خوه‌ بۆ گه‌ریلایێن وان ڤه‌كرى و ب هه‌مى ره‌نگه‌كێ ژى پالپشتى و هاریكاریا وان كرى ل وى سه‌رده‌مێ به‌رته‌نگ و دژوار، لێ ل به‌ر سه‌ره‌ده‌ریكرنا وان یێن دوور ل پاراستنا مافێت مرۆڤى و بارودۆخێ خراب یێن كوردێن توركیا ئه‌ڤ پارته‌ ژ لایێ ئه‌مریكا و ئێكه‌تیا ئه‌وروپاڤه‌ خسته‌ د لیستا تیرۆرێ دا.
لێ پشتى پرۆسه‌یا ئاشتیێ كو سه‌رۆك بارزانى رۆله‌كێ دیار و به‌رچاڤ و كاریگه‌ر د ڤێ پرۆسێ دا گێرا و هه‌ول و بزاڤێن سه‌رۆك بارزانى ئێكه‌تیا ئه‌ورۆپا ئه‌ڤ پارته‌ د لیستا تیرۆرێ ئیناده‌رێ، لێ نوكه‌ ژى ل گه‌ل دابیت ژ لایێ ئه‌مریكاڤه‌ ب هێزه‌كا تیرۆرست دئێنه‌ نیاسین.
هه‌رچه‌نده‌ ل ده‌ستپێكا ئه‌ڤێ پارتى ب هێزه‌كا سیاسى یا كورد هاته‌ مه‌یدانا خه‌باتێ و ل ده‌ستپێكى ژى ئارمانجا وان دروستبوونا كیانه‌كێ سه‌ربخوه‌ یێ نه‌ته‌وێ كورد بوو، لێ مخابن سیاسه‌ت و سه‌ره‌ده‌ریكرنا ئه‌ڤێ پارتا كرێكارێن كوردستانێ (پ.ك.ك) هه‌ر زوى ب زوى ئه‌و ئارمانج به‌ردا و بوو ئه‌گه‌را هندێ كو جوداهى و دژایه‌تیێ دنێڤبه‌را به‌ره‌یى كوردى دا دروست بكه‌ت و ژ ڤێ سه‌یرتر ل ده‌رڤه‌یى سنۆرێ توركیا و ل پارچه‌یه‌كا كوردستانێ كو خودان كیانه‌كێ نیمچه‌ سه‌ربخوبوو و خودان هه‌رێم و حوكمه‌ت بوو كو ئه‌و ژى هه‌رێما كوردستانێ بوو، (پ.ك.ك)، ب هه‌مى شیانێن خوه‌ ل دژى ئه‌ڤێ حوكمه‌تێ راوه‌ستان و ده‌ست ب شه‌ڕێ براكوژى ل هه‌رێما كوردستانێ كر و هه‌ر جاره‌كێ ژى دگه‌ل لایه‌نه‌كێ سیاسى وه‌كو (پارتى دیمۆكراتى كوردستان و ئێكه‌تیا نیشتیمانیا كوردستانێ و ….هتد)، ب مخابنیڤه‌ ب سه‌دان قه‌هره‌مان و شۆره‌شگێر و دلسۆزێن كوردایه‌تیێ بوونه‌ قوربانى ئه‌ڤى شه‌ڕێ ب زۆرى ژ لایێ ئه‌ڤێ پارتێ ڤه‌ هاتیه‌ سه‌پاندن ل سه‌ر هه‌رێما كوردستانێ.
چ پێنه‌ڤێت كو پارتى دیمۆكراتى كوردستان و ل سه‌ر راسپارده‌ و رێنمایێن سه‌رۆك بارزانى شه‌رێ براكوژیێ ل هه‌ر پارچه‌یه‌كا كوردستانێ ب هێلا سۆر ل قه‌له‌م دایه‌ و حه‌رامكرى یه‌ و ناهێلێت جاره‌كادى ئه‌ڤ خوكوژى و مالوێرانى یه‌ بهێته‌ڤه‌ روویدان، لێ (پ.ك. ك) ئه‌ڤ ده‌لیڤه‌ بۆ خوه‌ ب فه‌ر زانى كو جاره‌كا دى تنگژین و سڤكاتیێ (ئیستیفزاز) ب سه‌روه‌رى و سنۆرێن كوردستانێ بكه‌تن و ژبلى ب سه‌دان گوندێن كوردستانێ ده‌ستێن خوه‌ دانه‌ سه‌ر و نه‌هێلن خه‌لكێ ره‌سه‌نێ ئه‌وان گوندان قه‌ستا زێدێ بابوباپیران بكه‌نه‌ڤه‌ و بهێنه‌ڤ ئاڤه‌دانكرن ژلایێ حوكمه‌تا هه‌رێما كوردستانێڤه‌ و بوونه‌ ئه‌گه‌را هندى كو هه‌فتیانه‌ چه‌ند هه‌ڤوه‌لاتیێن بێگونه‌ه یێن وان گوندان ب ئه‌گه‌را بۆردۆمانا فرۆكێن توركیا بهێنه‌ شه‌هید و برینداركرن.
هه‌ر وه‌تۆڤ پشتى شه‌رێ هاتیه‌ سه‌پاندن ژلایێ تیرۆریستێن داعشڤه‌ و رزگاربوونا وان ده‌ڤه‌رێن ده‌رڤه‌یى كوردستانێ ژلایێ هێزێن پێشمه‌رگێن قه‌هره‌مانێن كوردستانێ ڤه‌ و سه‌ره‌راى ل ده‌سپێكێ ئه‌و ژى هانده‌ر بوون بۆ رزگاركرنا ئه‌وان ده‌ڤه‌ران، لێ ب مخابنیڤه‌ زۆر هه‌ول و بزاڤ هاتنه‌ كرن ژلایێ حوكمه‌تا هه‌رێما كوردستانێ ڤه‌ كو ژبلى سوپاسگوزاریا وان بۆ وێ پالپشتیا وان كرى، لێ بۆ به‌رژه‌وه‌ندیا گشتى باشتر ئه‌وه‌ وان ده‌ڤه‌ران چۆل بكه‌ن تاكو نه‌بیته‌ فاكته‌رێ هندێ كو ده‌وله‌تێن داگیركه‌رێن كوردستانێ ئه‌وان ب ده‌لیڤه‌ و به‌لگه‌ه بزانن كو هێرشێ بكه‌نه‌ سه‌ر ئاخا كوردستانێ، چاوا هێزێن پێشمه‌رگه‌هێن كوردستانێ ل سه‌ر فه‌رمانا سه‌رۆك بارزانى و ب ره‌زامه‌ندیا په‌رله‌مانێ كوردستانێ دهانه‌یا شه‌رڤانێن په‌یه‌دێ چوون ل كۆبانى و پشتى كۆبانى رزگاركرى ژ ده‌ستێن تیرۆریستێن داعش ئه‌و هێزا پێشمه‌رگه‌هێن كوردستانێ زڤرینه‌ڤه‌ و گۆته‌ وان ئه‌ڤه‌ ئه‌ركێ مه‌ ب دووماهى هات، لێ ئه‌و هیز و لایه‌نێن سێبه‌ر و سه‌ر ب په‌كه‌كێ ڤه‌ نه‌ك گوهدێریا حوكمه‌تێ نه‌كر، به‌لكو ب هه‌ڤكاریا حه‌شدا شه‌عبى شنگال ژى داگیركر.
دیسا عه‌فرین ژى كو باژێره‌كێ كوردستانا رۆژئاڤایه‌ و پشتى ده‌رخستنا رێكخراوا تیرۆرستیا داعش و سۆپایى سووریا ل وێ ده‌ڤه‌را كوردى و یا خۆیا بوو كو هیڤى و ئۆمێده‌ك ل وێرێ ژى بۆ كوردێن كوردستانا رۆژئاڤا دروستبوو كو ئه‌و ژى ببنه‌ خودان كیانه‌ك و بایى ئازادى و سه‌ربخوه‌یێ هه‌لبكێشن، لێ مایتێكرنا په‌كه‌كێ و هنده‌ك لایه‌نێن سێبه‌ر و سه‌ر ب وانڤه‌ و راسپارده‌ و رێنمایان ل قه‌ندیل و ل په‌كه‌كێ وه‌ردگرن و هه‌روه‌كێ ئه‌ڤه‌ پیشه‌یا وان یا هه‌رده‌مى و توركیا ئه‌ڤ پاساوه‌ ب ده‌ستكه‌فت و هێرشه‌كا ب ناڤێ (چله‌ زه‌یتوون) ئه‌نجام دا و چو فشاره‌كا نێڤده‌وله‌تى ژى ل دژى ئه‌ڤى هێرشێ نه‌هاته‌كرن و عه‌فرین ژى هاته‌ داگیركرن ژ لایێ سۆپایى توركیاڤه‌، هه‌روه‌تۆڤ ب هه‌مان شێوه‌یى عه‌فرین مینبه‌ج ژى هاته‌ڤ داگیركرن و سه‌ره‌راى كو ب سه‌دان گه‌نج و لاوێن كورد ژلایێ ئه‌ڤى لایه‌نێن سێبه‌ر ل ڤان ده‌ڤه‌ران ب كوشتندان، ئه‌رێ كینه‌ ئه‌گه‌رێن راكێشانا ده‌وله‌ته‌كا داگیركه‌ر بۆ ئاخا كوردستانێ!.
ئه‌گه‌ر بهیێن به‌حسێ گه‌ڤوگورێن توركیا یێن ڤێ دووماهیێ بكه‌ین بۆ سه‌ر قه‌ندیلى كو قه‌ندیل ده‌ڤه‌ره‌كا سنۆرێ كوردستانا باشۆر و توركیایه‌ كو ئه‌ڤێ ده‌ڤه‌رێ بهێنڤه‌دان ژلایێ په‌كه‌كێ ڤه‌ نه‌دیتى یه‌ و بوویه‌ باره‌گایه‌كێ سه‌ره‌كێ یێ ڤێ پارتا كرێكارێن كوردستانێ و سازیێن خوه‌ ل وێرێ ئاڤا كرینه‌، هه‌ر ئه‌ڤ پارته‌یه‌ دڤێت چاوا ده‌ڤه‌رێن دى حوكمه‌تا توركیا رابكێشیت بۆ وان ده‌ڤه‌ران و ب هه‌مان شێوه‌ دڤێت حوكمه‌تا توركیا بۆ ڤێ ده‌ڤه‌رێ ژى رابكێشیت، ژ ڤێ سه‌یرتر هنده‌ك لایه‌نێن سیاسى یێن هه‌رێما كوردستانێ كو هه‌روه‌كى پیشه‌یا وان ده‌ست ب موزایدا سیاسى كرى یه‌ ل مه‌ترسیا قه‌ندیل، لێ جاره‌كێ ژى نه‌وێرایه‌ بێژنه‌ ئه‌ڤێ پارتا په‌كه‌كێ كو جهێ خه‌بات و تێكۆشینا وه‌ ل قه‌ندیل و گاره‌ یى نیه‌ به‌لكو ل ده‌ڤه‌رێن كوردستانا باكۆره‌ و چیایێن وه‌ گه‌له‌ك و گه‌له‌ك ژ ڤان چیایێن كوردستانا باشۆر دبه‌رهه‌ڤترن بۆ به‌ره‌ڤانیكرن ژ كوردستانا باكۆر و هه‌تا نوكه‌ هه‌وه‌ نه‌شیایه‌ ئێك بهۆستا ئاخا كوردستانا باكۆر رزگار بكه‌ن، دیسا ب جورئه‌تڤه‌ بێژنه‌ وان هوون ل هه‌رێما كوردستانێ مه‌ترسیه‌كا مه‌زنن بۆ له‌شكركێشیا ده‌وله‌تا توركیا، له‌وما روون و ئاشكرایه‌ كینه‌ ئه‌گه‌رێن له‌شكركێشا سۆپایێ توركیا بۆ داگیركرنا كوردستانێ كو ئه‌و ژى مه‌ بڤێت یان نه‌ڤێت په‌كه‌كه‌نه‌ و به‌رێ رۆژى ب بێژینگێ ناهێته‌گرتن!.

12

سالح محه‌مه‌د ته‌یرۆ
د به‌رپه‌رێ (13) یێ رۆژنامه‌یا ئه‌ڤرۆ یا هژماره‌ (2360) ل رۆژا 5/6/2018 بابه‌ته‌ك یێ نڤیسكار (دلۆڤان ئه‌مجه‌د بارزانى) ل ژێر ناڤێ: بۆچى دبێژن (كورد دوژمنێن خودێ نه‌؟)) هاتبوو به‌لاڤكرن، پشتى كو من چه‌ندین جاران خواندى ب هه‌مى بۆچوونێن خوه‌ڤه‌ د گه‌ل بۆچوونا نڤیسكارى دا مه‌. چونكو ئه‌وێن كو نه‌ڤیێن پێغه‌مبه‌رى كوشتین و كچ ب ساخى زینده‌چالكرین و خه‌لیفه‌ ل سه‌ر نڤێژێ كوشتین و چه‌ندین ئایه‌تێن قورئانا پیرۆز ل سه‌ر وان كوفر و بێ ئه‌قلیا وان هاتینه‌ خارێ، كو ئه‌سته‌مه‌ عه‌ره‌ب عاقل ببن و خودێ ژى ل عه‌قلبوونا وان ب گومانه‌ ((انا انزلناه قرانا عربیا لعلكم تعقلون))، واته‌ ل ڤێره‌ (لعلكم ) وه‌كى ئه‌م كورد دبێژین به‌لكى..، هه‌كه‌.. ، قه‌مى …، ره‌نگه‌ .. ئاقل ببن، یان ئه‌و كه‌سێن ب (پێنچ) ده‌قیقان دا (5000) پینچ هزار هه‌ڤوه‌لاتیێن بێگونه‌ه ل حه‌له‌بچه‌یا شه‌هید ب كیمیایێ شه‌هید بكه‌ن و (8000) هزار هه‌ڤوه‌لاتیێن بارزانیان و ل ژێر ده‌ستهه‌لاتا وان دا و ب بێ دادگه‌ه و تاوان كو ب تنێ تاوانا وان كوردن و ب هۆز سه‌ر ب هۆزێن بارزانیان بووینه‌ و ب ساخى بهێنه‌ زینده‌ ب چالكرن و 182 سه‌دو هه‌شتێ و دو هزار هه‌ڤوه‌لاتیێن كورد و كوردستانى بهێنه‌ ئه‌نفالكرن و حه‌تا نوكه‌ ژى د گه‌ل دابیت گۆرێن وان یێن پیرۆز ب دروستى نه‌هاتینه‌ دیتنه‌ڤه‌، یان خودانێن وان كریارێن ب ناڤێت ئه‌نفالان كو (4500) گوند وێرانكرین و هه‌ر ب كێمیڤه‌ (4000) گوندان مزگه‌فت و دێر لێ هه‌بووینه‌ و هه‌ر مزگه‌فته‌ك و دێره‌كى َژى ب سه‌دان قورئانێن پیرۆز و ئینجیل تێدا بووینه‌ و هه‌مى ژى سۆتن و په‌ره‌په‌ره‌كرن و به‌رپه‌رێن وان ل ده‌مى ئه‌و مزگه‌فت و دێر دهاتنه‌ (تى، ئێن، تى) كرن ل به‌ر ئاسمانان دهاتنه‌خار و بێژنه‌ ملله‌تێ كورد كو ملله‌ته‌كه‌ (95%) بوسلمانن و خودێ په‌رستن كو هوون دوژمنێن خودێ نه‌ ((الاكراد اعدا‌و الله))، یان ژى بێژنى هوون تیرۆریستن!!. ب راستى سه‌یره‌. چونكو ئه‌ڤه‌ به‌رسڤا وان چاكى و سه‌ره‌ده‌ریێن گه‌لێ كوردستانێ یه‌ كو ل گه‌ل وان عه‌ره‌بان كرین و سه‌ره‌راى ل سه‌رهلدانا جه‌ماورێ كوردستانێ ل به‌هارا سالا 1991 كو هێشتا برینا ئه‌نفالكریێن بارزانیان و شه‌هیدێن حه‌له‌بچه‌ و ئه‌نفالكریێن سالا 1988 د ته‌ربوون و فرمێسك و رۆندكێن دایكێن ڤان شه‌هیدان زوها نه‌ ببوون، ئها ل وى ده‌مى ب هزاران سه‌ربازێن وێ رژێما كو ئه‌ڤ هنده‌ كریارێن هۆڤانه‌ ل دژى گه‌لێ كوردستانێ ئه‌نجامداین كه‌ڤنه‌ ده‌ستێن پێشمه‌رگه‌هێن قه‌هره‌مان و جه‌ماورێ خوراگرێ سه‌رهلدایێ، نه‌ك تۆلڤه‌كرن نه‌هاته‌ ئه‌نجامدان، به‌لكو ب رێز و هورمه‌ت ڤه‌ ره‌وانه‌یى مالێن وان هاتنه‌ڤكرن، ئه‌رێ ئه‌مین دوژمنێن خودێ و تیرۆرست یان هوونن خودانێن عه‌گال و هنده‌ك عه‌ره‌بێن هزر شۆفێنێ؟ دیسا ل سالا 2014 ى كو تیرۆرستێن هه‌مان هزرا هنده‌ك عه‌ره‌بێن شۆفینى و ب ناڤێ رێكخراوا تیرۆرستیا داعش هێرش ئینایه‌ سه‌ر حوكمه‌تا عیراقێ و زۆر عه‌ردێ عیراقى و نه‌مازه‌ ل ده‌ڤه‌رێن سونى هاتینه‌ داگیركرن و ب هزاران ئه‌و عه‌ره‌ب و كوڕ و نه‌ڤیێن وان یێن كو ب سه‌دان كریارێن هۆڤانه‌ ل دژى گه‌لێ كوردستانێ ئه‌نجامداین ئاواره‌ و ده‌ربده‌ر بوون و قه‌ستا هه‌رێما كوردستانێ كرن و ژلایێ حوكمه‌تا هه‌رێما كوردستانێ ڤه‌ ب ده‌هان كه‌مپێن ئاواران هاتنه‌ ڤه‌كرن و خه‌لكێ كوردستانێ هاریكارى و پشته‌ڤانیا وان كرن و ژبلى ئه‌و خه‌رجیات و پاراستنا وان ژلایێ پێشمه‌رگه‌ى و ده‌زگه‌هێن ئه‌منیڤه‌، ئه‌رێ ئه‌م دوژمنێن خودێ نه‌ و تیرۆرست یان هوینن؟
ژ ڤێ سه‌یرتر به‌ریا ده‌مه‌كێ د تۆرا جڤاكى دا، هه‌ڤبه‌ندیه‌ك د نێڤبه‌را من و مامۆستایه‌كێ زانكۆیه‌كێ دا ل ده‌وله‌ته‌كا عه‌ره‌بى دروست بوو، پشتى مه‌ خوه‌ ب ئێكتر ناساندى و گۆته‌ من دێ كارى كورتیه‌ك ل سه‌ر نه‌ته‌وێ كورد بده‌یه‌ من؟ چونكى من نه‌زانى یه‌ نه‌ته‌وه‌یه‌ك هه‌بیت ب ناڤێ كورد، پشتى كو من ژى كورتیه‌ك ب رێكوپێكى ل سه‌ر نه‌ته‌وێ كورد و دیرۆك و خه‌بات و تێكۆشینا رزگاریخوازیا كوردستانێ بۆ شرۆڤه‌كرى و پاش من پرسیار ل مامۆستایى كر، ته‌ هیچ پێزانین ل سه‌ر نه‌ته‌وێ كورد هه‌بوون؟ هه‌ر ئێكسه‌ر ب بێ راوه‌ستان گۆت: به‌لێ ئه‌گه‌ر تۆ ب سینگه‌كێ به‌رفره‌ه وه‌ربگرى و عاجز نه‌بى و من بلۆك نه‌كه‌یى، من ژى گۆتێ: مامۆستا ئه‌ز خوه‌ ل ڤێ چه‌ندێ مه‌زنتر دبینم، كه‌ره‌مكه‌، گۆته‌ من: هوون كورد تیرۆریستن؟! من ژى گۆتێ ب چ به‌لگه‌ه تو وى مافى دده‌یه‌ خوه‌ مامۆستایێ زانكۆیێ كو نه‌ته‌وه‌یه‌ك زێده‌تر ژ (50) ملیۆن كه‌س و هاتبیته‌ پارچه‌كرن ب سه‌ر چار ده‌وله‌تان دا و ئه‌ڤه‌ زێده‌تر ل (100) ساله‌ ئاخ و وه‌لاتێ وان هاتیه‌ داگیركرن و ب درنده‌ترین شێوه‌ زولم و سته‌م لێ دهێته‌كرن و هه‌تا نوكه‌ ژى ده‌وله‌ته‌كا خوه‌ نه‌بیت و هه‌روه‌كى من بۆ ته‌ دیاركرى و مامۆستا تو ب تیرۆرست ل قه‌له‌م بده‌یى و مخابن كو ئه‌ڤه‌ ئاستێ مامۆستایه‌كێ زانكۆیى و خودان باوه‌رنامه‌یه‌كا بلند بیت، گۆته‌ من: سه‌یدا من ل فیلمێ دۆلا گورگا (وادی الژئاب) دیت یا كو ژلایێ چه‌ندین قه‌ناتێن عه‌ره‌بیڤه‌ دهاته‌ به‌خشكرن.
هه‌لبه‌ت ئه‌ڤ فیلمه‌ ژلایێ ده‌وله‌ته‌كا جیرانڤه‌ هاتبوو دروستكرن و هاتبوو وه‌رگێران بۆ سه‌ر زمانێ عه‌ره‌بى و ل چه‌ندین قه‌ناتێن عه‌ره‌بیڤه‌ دهاته‌ په‌خشكرن. من ژى گۆتێ: سه‌یدا ئه‌و فیلمێ ته‌ دیتى یا دووره‌ ژ راستیێ و هیچ بنیاته‌ك بۆ نینه‌ و ژلایێ ده‌وله‌ته‌كێڤه‌ هاتیه‌ دروستكرن كو زێده‌تر ژ (20) ملیۆن كورد تێدا دژین و ل بچووكترین مافێن وان یێن سه‌ره‌كى هاتینه‌ بێ به‌هركرن و هه‌تا زمانێ وان ژى لێ قه‌ده‌غه‌یه‌ و خوه‌ ب به‌ژن و بالا مه‌ نابێژن و دێ هه‌ر بێژنه‌ مه‌ تیرۆرست، یادى ئه‌وێن كو تو فێركرى كو ئه‌و تیرۆرستن، نه‌خێر سه‌یدا ئه‌و تیرۆرست نینن و ئه‌و ئه‌و بزاڤا رزگاریخوازیا كوردستانێ یه‌ كو ل وێ پارچا كوردستانێ دهێته‌كرن كو نه‌ته‌وێ كورد رزگار بكه‌ت و یێ خه‌بات و تێكۆشین و به‌رخودان و قوربانیێ دده‌ت ل پێناڤ رزگارى و سه‌ربه‌ستى و سه‌رفه‌رازیێ، مامۆستایى زانكۆیى ئه‌و تیرۆرست نینه‌ و خودان مافێن ره‌وانه‌ و داخوازا وان مافان دكه‌ن، لێ دیاره‌ ژ لایێ هنده‌ك عه‌ره‌بێن هزر شۆفینى ڤه‌ ئه‌وه‌ كو هه‌ر كه‌سێ داخوازا مافێن خوه‌ بكه‌ت وه‌كو ملله‌تێ كورد تیرۆرسته‌.
ب هه‌ر حال پشتى كو بۆ چه‌ند رۆژه‌كان گه‌نگه‌شه‌یا مه‌ درێژبووى و گه‌هشته‌ قه‌ناعه‌تێ كو نه‌ته‌وه‌یه‌ك هه‌یه‌ ب ناڤێ كورد و تیرۆرست نینه‌، لێ ب راستى ئامۆژگاریه‌ك سه‌رنج راكێش كر، گۆته‌ من: تۆ یێ دبێژى ئه‌ڤه‌ زێده‌تر ژ (27) سالانه‌ ئه‌م ل پارچه‌یه‌كا كوردستانا مه‌زن و ل كوردستانا باشۆر خودان حوكمه‌ت و په‌رله‌مان و سه‌رۆكایه‌تیا هه‌رێمینه‌ و ئه‌م حه‌تا ئاسته‌كێ هه‌رى باش دسه‌ربخوه‌ینه‌، باشه‌ چاوا هه‌تا نوكه‌ حوكمه‌تا هنگۆ یا تو دبێژى حوكمه‌تا هه‌رێما كوردستانێ كه‌ناله‌كێ حكومى نه‌بوویه‌ كو شیابا ب چه‌ندین زمانان به‌رنامه‌یێن خوه‌په‌خش كربان مینا (عه‌ره‌بى، ئینگلیزى، توركى، فارسى، فره‌نسى،…هتد) و د ڤان به‌رنامه‌یان دا و دیرۆك و بزاڤا رزگاریخوازیا كوردستانێ و ئه‌و زولم سته‌ما لێ هاتیه‌كرن و كلتور و هونه‌ر و ره‌وشت و تیتالێن ڤى ملله‌تى گه‌هاندبانه‌ جیهانا عه‌ره‌بى و یێن دى تاكو ب سه‌دان كه‌سێن وه‌كى من سه‌رهه‌لى مێژوویا ڤى ملله‌تى ببا، ده‌ستهه‌لاتا وه‌ به‌رپرسیاره‌ ل ده‌رباره‌یى ڤێ چه‌ندێ نه‌ك دوژمنێن هه‌وه‌ چونكو هوون ل وێ باوه‌ریێ نه‌بن كو دوژمن و داگیركه‌رێن وه‌ په‌سنا وه‌ بكه‌ن. من ژى گۆتێ زۆر راسته‌ مامۆستا، به‌لێ باش بزانه‌ نه‌ ئه‌م دوژمنێن خودێ نه‌ و نه‌ ئه‌م تیرۆرستین و تیرۆرست و دوژمنێن خودێ ئه‌ون ئه‌وێن كو ل دژى هه‌مى مافێن ئایینى و مرۆڤایه‌تى و نه‌ته‌وى و نیشتیمانى كار بكه‌ت و ئه‌م خودێ ناس و مافدۆست و مرۆڤدوستین سه‌یدایێ من! ….

28

سالح محه‌مه‌د ته‌یرۆ
ئه‌ڤه‌ هه‌وا بانگه‌شه‌یا هه‌لبژارتنان ل سه‌رانسه‌رێ عیراقێ ب گشتى و نه‌مازه‌ ل هه‌رێما كوردستانێ بۆ جڤاتا نوونه‌رێن عیراقا فیدرال ده‌سپێكر، یا خۆیایه‌ ژى كو ئه‌ڤه‌ ئێكه‌م بانگه‌شه‌ نینه‌ بۆ به‌ربژار و لیست و لایه‌نێن سیاسى ل هه‌رێما كوردستانێ و دووماهى بانگه‌شه‌ ژى نابیت، هه‌ر كه‌سه‌ك و لایه‌نه‌كێ سیاسى ژى مافه‌كێ وان یێ خوه‌زایێ یه‌ كو بۆ خوه‌ ده‌ست ب بانگه‌شه‌یا بكه‌ن و به‌رنامه‌ و پلانێن وان هه‌یى بۆ هه‌ڤوه‌لاتیێن كوردستانى و بۆ پاشه‌رۆژێ و به‌رگریكرن ژ مافێن قانوونى و دستوورى یێن نه‌ته‌وێ كورد ل عیراقا فیدرال دیار بكه‌ن، لێ فه‌ره‌ ئه‌ڤ هه‌وایا پرۆپاگندێن هه‌لبژارتنان ل رێنمایى و قانوونێن كۆمسیۆنا بلندا سه‌ربخوه‌یا هه‌لبژارتنان ده‌رنه‌كه‌ڤن، هه‌مان كۆمسیۆن ژى ب سزایێن خوه‌ راببیت ل سه‌ر سه‌رپێچیكرنا ته‌علیمات و قانوونێن وان ڤێجا ئه‌ڤ به‌ربژاره‌ و لیسته‌ سه‌ر ب هه‌ر لایه‌نه‌كێ سیاسى بیت چ ل عیراقێ یان ل هه‌رێما كوردستانێ.
دیسا پێدڤى یه‌ ته‌ڤایا لایه‌نێن سیاسى ئه‌ڤ قووناغا هه‌رێما كوردستانێ تێدا ده‌رباز دبیت ب گرنگى ل به‌رچاڤ بگرن، چونكو یا ئه‌ڤرۆ ل عیراقا فیدرال به‌رامبه‌ر ب هه‌رێما كوردستانێ دئێته‌كرن یا جودایه‌ هه‌لبژارتنێن به‌رێ و ل دوهى و پێر، هه‌روه‌توڤ هه‌روه‌كى مه‌ ل سه‌ر ئاماژه‌ پێدایى مافه‌كێ سیاسى و یاسایى یه‌ كو هه‌ر كاندید و لیست بۆ خوه‌ بانگه‌شه‌یێ بكه‌ن لێ فه‌ره‌ ئه‌ڤ بانگه‌شه‌یه‌ نه‌بێته‌ ناڤزراندن و ئێشاندنا یێ به‌رامبه‌ر ژبه‌ركو سه‌ره‌ده‌ریكرن ب ناڤزراندن و په‌یڤێن زڤڕ ل به‌رامبه‌ر ئه‌ڤى لایه‌نى و لایه‌نێ هه‌ ناچیته‌ د خزمه‌تا پرۆسیسا دیمۆكراسیه‌تێ دا نه‌ ل ڤێره‌ و نه‌ ل عیراقێ ژى، به‌لكو دێ بیته‌ فاكته‌ره‌كێ سه‌ره‌كى بۆ پترپه‌رت و به‌لاڤكرنا لایه‌نێن سیاسى و ناڤمالا كوردى ل هه‌رێما كوردستانێ كو ئه‌ڤه‌ ژى دێ بۆ به‌رژه‌وه‌ندیا دوژمن وداگیركه‌ر و دووڤه‌لانكێن كوردستانێ زڤریته‌ڤه‌، چونكو مه‌ بڤێت یان نه‌ڤێت، گه‌لێ كوردستانێ هه‌میان ئێك ئارمانج هه‌یه‌ كو ئه‌و ژى كێشه‌یا مافێن وان یێن نه‌ته‌وى و نیشتیمانى یه‌ كو ئه‌ڤه‌ ژى مافه‌كێ ره‌وایێ نه‌ته‌وێ كورده‌ و كه‌س خێرا ژى ب ڤى ملله‌ته‌یى ناكه‌ت به‌لكو ب سه‌دان ساله‌ خه‌بات و تێكۆشین و قوربانێ ژێرا هاتینه‌دان و كرن.
له‌وما فه‌ره‌ هه‌مى لایه‌نێن كوردستانێ ئه‌ڤێ راستیێ باش بزانن كو د ڤان هه‌لبژارتنان دا ب تێكرایى چاڤێ عیراقێ و ته‌ڤایا دوست و دوژمنان و راگه‌هاندكار ومیدیایێن جیهانێ ژى دێ ل سه‌ر كوردستانێ بیت كو دێ ب چ ره‌نگ هه‌لبژارتنه‌كا پاقژ و دوور ژ سه‌خته‌ و سه‌خته‌كارى و هه‌ره‌شه‌ و ئاژاوه‌گێرى و پێشێلكاریان برێڤه‌ بچیت، یا خۆیایه‌ ژى كو پێدڤى یه‌ خه‌لك ب وژدان ڤه‌ د ڤێ پرۆسیسا دیمۆكراسیه‌تێ ده‌نگێ خوه‌ بده‌ته‌ ئه‌وى به‌ربژار و لایه‌نێ سیاسى یێ هه‌ژى وى ده‌نگى یه‌ تاكۆ ل پاشه‌ رۆژێ په‌شیمانى وى ده‌نگى نه‌بیته‌ڤه‌ و ئاخینكا بۆ هه‌لنه‌كێشیت، چونكو ده‌نگدان ئه‌مانه‌ته‌كێ ئه‌خلاقى و ئاینى و نه‌ته‌وى و نیشتیمانى یه‌ بۆ هه‌ر تاكه‌كێ ده‌نگده‌ر.
له‌وما جاره‌ك دن دبێژم فه‌ره‌ ل سه‌ر لایه‌نێن سیاسى ب گیانه‌كێ برایه‌تى و نه‌ته‌وى و نیشتیمانى و وه‌لاتپارێزى كار بۆ لیست و كاندیدێن خوه‌ بكه‌ن و خوه‌ دووربێخن ژ هه‌مى ناڤزڕاندن و شێواندن و نه‌شیرینكرنا یێ به‌رامبه‌ر ژبه‌ركو ئه‌ڤرۆ سه‌رده‌مێ هندێ نه‌مایه‌ كۆ هاولاتى بهێنه‌ خاپاندن ڤێجا ب هه‌ر ره‌نگه‌كێ و پرۆپاگنده‌یه‌كێ بیت یان هه‌ول بهێته‌دان بۆ لاوازكرنا لایه‌نه‌كێ سیاسى یێ كوردستانێ كو ئه‌ڤه‌ یا دووره‌ ژ پره‌نسیپێن دیمۆكراسیه‌تێ ژبه‌ركو مرۆڤ یێ ئازاده‌ تاكو ئازادى یا یێ دى پێشیلى و ئالۆز نه‌كه‌ت.
فه‌ره‌ ئه‌ڤه‌ ژى ل بیرا مه‌ نه‌چیته‌ڤه‌ كو ئه‌گه‌ر ئه‌م ب وژدانڤه‌ ل سه‌ر خه‌بات و تێكۆشین و قوربانیدان و مساومه‌نه‌كرن ل سه‌ر بۆسته‌كا ئاخا پیرۆزا كوردستانێ نه‌كربیت و ته‌سلیم ب ئیراده‌یا دوژمن و داگیركه‌ران نه‌ ببیت و ئه‌و بخوه‌ خودانێ بریارا خوه‌ بیت و بریارێ ل كه‌س وه‌رنه‌گریت و ب ئارمانجێن نه‌ته‌وى و نیشتیمانیڤه‌ یا گرێدایى بیت نه‌ك ب مه‌رجانڤه‌ و خودانێ پرسا ریفراندۆمێ بۆ سه‌ربخوه‌یا كوردستانى بیت دێ ده‌نگ بۆ لیستا پارتى دیمۆكراتى كوردستان بیت، چونكو ئه‌ڤ لیسته‌ ب هه‌مى پیڤه‌ر و بنه‌مایێن نه‌ته‌وى و دیمۆكراسى و كوردستانیبوونێ یه‌ و نه‌ ب تنێ بۆ نه‌ته‌وێ كورد، به‌لكو مفا هه‌یه‌ ته‌ڤایا ئایین و نه‌ته‌وه‌یێن دى ئه‌وێن ل هه‌رێما كوردستانێ دا دژین.

40

ساڵح محه‌مه‌د ته‌یرۆ
خۆیایه‌ پارتى دیمۆكراتى كوردستان خودانێ لیستا (184) بۆ هه‌لبژارتنا نوونه‌رێن جڤاتا عیراقا فیدرال ، بۆ ڤان هه‌لبژارتنان چه‌ندین لایه‌ن و كیانێن سیاسى و به‌ربژێران و ب چه‌ندین لیستێن جودا جودا ل هه‌رێما كوردستانێ خوه‌ كاندید و به‌ربژار كرینه‌ و هه‌ر ئێك ژى ب ژماره‌یه‌كێ هاتیه‌ دیاركرن و بۆ خوه‌ هه‌وا بانگه‌شه‌یێ دكه‌ت كو ل دووڤ پره‌نسیپێن دیمۆكراسى و قانوون و راسپاردێن مافه‌كێ سروشتیێ هه‌ر ئێك ژ وانه‌، هه‌ر هه‌ڤوه‌لاتیه‌ك ژى یى ئازاد ل دانا ده‌نگێ خوه‌، لێ فه‌ره‌ وژدان سه‌روه‌ربیت ل وى ده‌نگى.
لێ یا من مه‌به‌ست ئه‌وه‌ كو ئه‌رێ بۆچى ده‌نگى بده‌ینه‌ لیستا 184 یا پارتى دیمۆكراتى كوردستان و ئه‌ڤى لیستێ ل گه‌ل لیستێت دى چ جوداهى یه‌؟ هه‌لبه‌ت ده‌نگدان ب ڤێ لیستێ و جوداهیا وى ل گه‌ل لیستێن دى مینا ئه‌ردو ئه‌سمانایه‌ و دزڤریته‌ڤه‌ بۆ ڤان ئه‌گه‌ران و چه‌ندین ئه‌گه‌رێن دى، ئه‌گه‌ر ئه‌م ب وژدانڤه‌ سه‌ره‌ده‌ریێ دگه‌ل ده‌نگێ خوه‌ بكه‌ین و ئه‌م بزڤرینه‌ڤه‌ بۆ دیروكا وێ یا پارتى دیمۆكراتى كوردستان كو زێده‌تر ل (71) سال خه‌بات و به‌رخودان و تێكوشین و فیداكارى و خودانێ ب سه‌دان هزاران شه‌هید و بریندار و په‌ككه‌فتى یه‌ و دێ بینین كو چه‌ندین ده‌ستكه‌فتیێن میژوویى ل سه‌رده‌ستێ ئه‌ڤێ پارتێ بۆ كورد و كوردستانیان بده‌ستڤه‌ هاتینه‌ كو تا كورده‌كێ دلسۆز و نیشتیمانپه‌روه‌ر مابیت دڤیا شانازیێ پێڤه‌ بكه‌تن كو ئه‌و ژى رێكه‌فتنا دیرۆكێ یا (11 ئادارا سالا 1970 ) بوو كو دنێڤبه‌را سه‌ركردایه‌تیا پارتى دیمۆكراتى كوردستان ب سه‌رۆكایه‌تیا بابێ روحى یێ نه‌ته‌وێ كورد مسته‌فا بارزانى و حوكمه‌تا عیراقێ هاته‌ واژوو كرن و بۆ جارا ئێكێ بوو كو دانپێدانێ ب نه‌ته‌وێ كورد بكه‌ن كو دووه‌م نه‌ته‌وه‌یه‌ ل عیراقێ، پارتى دیمۆكراتى كوردستان خودان مه‌زنترین شوڕشا رزگاریخوازیا كوردستانێ یه‌ كو ئه‌و ژى شۆره‌شا ئیلۆنا مه‌زنه‌ كو شیایى ته‌ڤایا كوردان ل ژێر ئالایێ كوردایه‌تیێ رێك بێخیت ل خانه‌قین و حه‌تا زاخۆ و ل پێناڤ ئێك ئارمانج كو ئه‌و ژى ل پێناڤ ئازادى و سه‌ربه‌ستى و سه‌رخوه‌بوونا كوردستانێ خه‌بات وتێكوشین دكر ل دژى دوژمن و داگیركه‌ر و دووڤه‌لانكێت كورد و كوردستانێ، هه‌ر ل ئه‌نجام و به‌رهه‌مێ شۆره‌شا ئیلۆنا مه‌زن و گولانا پێشكه‌فتنخواز راپه‌رینا جه‌ماورى بوو ل به‌هارا سالا1991 و بووینه‌ خودان په‌رله‌مان و حوكمه‌ت كو ئه‌ڤرۆ ئه‌م ل ژێر سایه‌یى وێ حوكمه‌ت و ئالایێ پیرۆزێ كوردستانێ دا دژین.
چ پێنه‌ڤێت كو پارتى دیمۆكراتى كوردستان كو هه‌رده‌م سه‌ره‌ده‌رى ل گه‌ل واقعى دا كرى یه‌ وهیچ ده‌مه‌كێ ژى درووشم ب بێ كریار بلند نه‌كرینه‌ و هه‌ر درووشمه‌ك ژى بلند كربیت ب كریار گه‌هاندى یه‌ چ نوكه‌ یان به‌رێ، ئه‌و بخۆ ژى خودان بریارا خوه‌یه‌ و بریارێ ل كه‌س وه‌رناگریت و راده‌ستى ب ئیراده‌یا دوژمن ود اگیركه‌ران نابیت هه‌ر چه‌ند خه‌بات و تێكوشین و قوربانیدان و به‌رخودان د سه‌خت و دژوار بن، به‌لگه‌ه ل سه‌ر گۆتنا مه‌ ئه‌و بریارا دیرۆكى یا دایى ل سه‌ر پرسا ریفراندۆمێ ئه‌وا ل رۆژا 25/9/2017 هاتیه‌ ئه‌نجامدان و زێده‌ترل(92%) خه‌لكى ده‌نگ بۆ دایى بۆ سه‌رخوبوونا كوردستانێ و سه‌ره‌راى گڤاشتن و گه‌ڤ ژى هه‌بوون كو بهێته‌ دائێخستن، لێ پارتى سازش ل مافێ ره‌وایێ كوردستانێ نه‌كر و خودانێ خوه‌ بریارا خویه‌ و ئه‌ڤ پرسه‌ ژى بوویه‌ سه‌نه‌ده‌ك كو تا كورده‌كێ دلسۆز مابیت دێ شانازیێ پێڤه‌ كه‌ت. دیسا پارتى باوه‌رى ب جه‌ماورێ كوردستانێ هه‌یه‌ و پشتا خوه‌ ب ئیراده‌یا ب هێز یا كوردستانیا هه‌یه‌ و سۆزا خوه‌ بجهئینا.
پارتى بوو كو خودانا لیستا 184 ه‌ ، ئه‌و پارتیا كو ل سه‌ر ده‌ستێ بارزانیێ نه‌مر هاتیه‌ دامه‌زراندن و بوویه‌ فاكته‌ره‌كێ سه‌ره‌كى بۆ هوشیاركرنا هه‌ستا نه‌ته‌وى نه‌ك ب تنێ ل ڤێ پارچا كوردستانێ به‌لكى ل هه‌ر چار پارچێن كوردستانێ و شیا سنۆرێن ده‌ستكرد بشكێنیت و بارزانیێ نه‌مر ب چه‌ندین پێشمه‌رگه‌هێن قه‌هره‌مان د هه‌وارا كۆمارا كوردستانێ ل مهابادێ بچیت، هه‌روه‌تۆف و بۆ دوباره‌بوونه‌ڤه‌یا دیرۆكێ و ل سه‌ر فه‌رمانا سه‌رۆك مه‌سعود بارزانى بوو ل شه‌رێ دژى تیرۆریستێن داعش كو پێشمه‌رگه‌ى ره‌وانه‌یێ كوردستانا رۆژهه‌لات ل كۆبانێ بكه‌ت و مل ب ملێ شه‌رڤانان به‌رگریێ ل كوبانێ بكه‌تن و نه‌هێلێن بكه‌ڤیته‌ ده‌ستێ تیرۆرستێن داعش.
لێ مخابن رێكه‌فتنا خیانه‌تكارى ئه‌وا ل 16 ئوكتوبه‌را سالا 2017 ێ ئه‌وا كو ژلایێ گرۆپه‌كێ سه‌ر ب لایه‌نه‌كێ سیاسى ڤه‌ ئه‌نجامدایى مینا رێكه‌فتنا خیانه‌تكاریا جه‌زائیر ئه‌وا ل رۆژا 6/5/1975 ێ به‌رامبه‌ر ب گه‌لێ كوردستانى هاتیه‌ كرن كو ئه‌ڤ هه‌ردوو پیلانه‌ ل دژى دۆزا ره‌وایا كوردستانێ ب گشتى و نه‌مازه‌ پارتى دیمۆكراتى كوردستان بوون، لێ پارتى دیمۆكراتى كوردستان كو خودان لیستا 184 بۆ هه‌لبژارتنێن نوونه‌رێن جڤاتا عیراقا فیدرال شیا به‌رسینگێ ئه‌ڤان پیلانا رابگریت و ل پشتى ریكه‌َفتنا جه‌زائیر ئاگرێ شۆرشا گولانا پێشكه‌فتنخواز گه‌ش بكه‌ته‌ڤه‌ و ل پشتى رێكه‌فتنا خیانه‌تكاریا 16 ئوكتوبه‌رێ پێشمه‌رگه‌هێن قه‌هره‌مان یێن پارتى دیمۆكراتى كوردستان به‌رسینگێ سۆپا و حه‌شدا شه‌عبى و وان پیلانگێران ل سه‌نگه‌رێن پردێ و مه‌خمور و سحێلا و زمار و مه‌حموودیێ بگریتن و وێ پیلانێ ژى ل ناڤ ببه‌ت و شكه‌ستنێ ب دوژمن و داگیران بكه‌ت و دفنا وان بشكێنیت و هه‌رێما كوردستانێ و ده‌ستكه‌فتیێن وێ بپارێزیت.
هه‌روه‌تۆف پارتى دیمۆكراتى كوردستان د معادلاتێن سیاسى دا ل سه‌ر ئاستێ هه‌رێمێ وده‌رڤه‌دان پێ هاتیه‌ دان كو تاكه‌ هێزه‌كا سیاسى یه‌ ل گۆره‌پانا سیاسى یا رزگاریخوازیا كوردستانێ و مافه‌كێ وى یێ سروشتى یه‌ كو سه‌ركێشیا هه‌رێما كوردستانێ بكه‌ت تاكو ئه‌ڤى ئارمانجێ نه‌ته‌وى و نیشتیمانى كو ئه‌و ژى سه‌رخوه‌بوونا كوردستانێ بگه‌هینته‌ قویناغا دووماهیێ.
لیستا 184 كو لیستا پارتى دیمۆكراتى كوردستانه‌ ئه‌و پارتیا هاتیه‌ نیاسین كو هیچ ده‌مه‌كێ مساومه‌ ل سه‌ر مافێن گه‌لێ كورد و بوسته‌كا ئاخا پیرۆزا كوردستانێ نه‌كرى یه‌ و ناكه‌ت ژى و بوویه‌ قه‌لغانه‌ك بۆ پاراستنا كوردستانێ. له‌وما ده‌نگدان ب ڤێ لیستى َ لیستا 184 و لیستێن دى دا ئه‌ڤه‌نه‌ و چه‌ندین خالێن دى یێن دیرۆكى هه‌نه‌ كو په‌یوه‌ندى ب مانه‌ڤه‌یا كورد و كوردستانێ هه‌یه‌، ژ به‌ر ڤێ چه‌ندێ ده‌نگدان ب ڤێ لیستێ ده‌نگدانه‌ ب مانه‌ڤه‌ و گه‌هاندنا ئارمانێن دیرۆ

35

سالح محه‌مه‌د ته‌یڕۆ
گه‌ر ئه‌م هنده‌كىً بزڤرینه‌ڤه‌ بۆ دیرۆكا شۆره‌شێن رزگاریخوازیا كوردستانێ كو هه‌رده‌م سه‌ركردایه‌تیا بزاڤا رزگاریخوازیا كوردستانێ و نه‌مازه‌ د شۆرشێن ئیلۆن و گولانێ دا و ب سه‌ركردایه‌تیا پارتى دیمۆكراتى كوردستان و ب رێبه‌رایه‌تیا بارزانیێ نه‌مر و سه‌رۆك مه‌سعود بارزانى، د گه‌ل هندێ دا بووینه‌ كو دۆزا ره‌وایا گه‌لێ كوردستانێ ب شێوه‌یه‌كێ دانوستاندن و دایه‌لۆك و دوور ل شه‌ڕى بهێته‌ چاره‌سه‌ركرن، لێ هه‌رده‌م ئه‌ڤ په‌یوه‌ندیه‌ چووبنه‌ پێش ده‌ستهه‌لاتێن حوكمرانیا عیراقێ یا ئێك ل دووڤ ئێك و بگره‌ هه‌تا ئه‌ڤرۆ ژى د گه‌ل دا بیت خوه‌ ل كوردان ڤه‌كێشایه‌ و هه‌ر جاره‌كێ ژى مه‌رجێن وه‌ها ڤیانه‌ ب سه‌ر سه‌ركردایه‌تیا سیاسى بسه‌پینن كو مه‌حاله‌ ژ لایێ سه‌ركردایه‌تیێ ڤه‌ بهێته‌ قه‌بوولكرن، له‌وما گه‌ر نوكه‌ ژى ده‌لیڤه‌ بۆ بهێته‌ ره‌خساندن ئه‌ز یێ پشتراستم دێ چه‌ندین جارێن دى گه‌لێ كوردستانێ جینۆساید و ئه‌نفال و كیمیاباران و قركرنه‌ڤه‌، چونكو هه‌كه‌ ده‌ستهه‌لاتێن به‌رییا ڤێ ده‌ستهه‌لاتێ خودان ئێك هه‌لویستیا دژایه‌تیێ بن، كو ئه‌و ژى ب ب تنێ یا نه‌ته‌وى بیت ل هه‌مبه‌رى كورد و كوردستانێ یا ئه‌ڤرۆ بووینه‌ دوئێك نه‌ته‌وه‌ و یا دى مه‌زهه‌ب. له‌وما ل هه‌ر پشتى روودانێن 16 ئوكتوبه‌رێ هه‌ولا هندێ دا كو هه‌رێمه‌ك نه‌مینیت ب ناڤێ هه‌رێما كوردستانێ و زۆر جاران ژى دگۆتن پارێزگه‌هێن باكۆرێ عیراقێ كو ئه‌ڤه‌، خوه‌ ب خوه‌ ل دژى دستوورێ عیراقێ بوو، چونكو دستوورێ عیراقێ دان ب فیدرالیه‌تا كوردستانێ دایه‌.
لێ یا مرۆڤ پێ حێبه‌تى دبیت ئه‌وه‌ كو دیاره‌ هنده‌ك لایه‌ن و كه‌س دزانن و نه‌ڤێن بزانن یان دڤێن سه‌رى ل خه‌لكى ب شێوێنن كو تێكچوونا په‌یوه‌ندیێن حوكمه‌تا هه‌رێما كوردستانێ ل سه‌ر پرسا ریفراندۆمێ یه‌ و هه‌كه‌ مه‌ ریفراندۆم نه‌هاتبا كرن ئه‌ڤه‌ نه‌دهاته‌ سه‌ر سه‌رێ خه‌لكێ كوردستانێ، لێ هه‌كه‌ ریفراندوم ژى نه‌هاتباكرن دا ب ڤان كریاران رابن ئه‌گه‌ر ده‌لیڤه‌ بۆ هاتبا ره‌خساندن، به‌لگه‌ه ل سه‌ر گۆتنا ل ده‌مێ كو به‌ریا هاتنا تیرۆریستێن داعش ژى و ل سالا 2014 هه‌ولا داگیركرنا كه‌ركووك و ده‌ڤه‌رێن هه‌رێما كوردستانێ ئه‌وێن ل ده‌رڤه‌یى هه‌رێمێ دا وهێز به‌ر ب وان ده‌ڤه‌ران ئینان خوه‌ هینگى هیچ ریفراندۆم نه‌هاتبووكرن، لێ هێزێن پێشمه‌رگه‌هێن قه‌هره‌مان به‌رسینگێ وان گرتوون و نه‌هێلان ئه‌و پیلان سه‌ر بگرن، لێ ئه‌و رێكه‌فتنا كو ل 16 ئوكتوبه‌رێ هاتیه‌كرن د ناڤبه‌را حوكمه‌تا ناڤه‌ندیا عیراقێ و گرۆپه‌كێ سه‌ر ب لایه‌نه‌كێ سیاسى یێ كوردستانى بوون ول پێش سۆپایى عیراقێ و حه‌شدا شه‌عبى كه‌فتین بۆ داگیركرنا ده‌ڤه‌رێن كوردستانێ ئه‌وێن ب خوینا زیده‌تر ژ 1800 شه‌هیدان و ب هزاره‌ها برینداران و خوه و ماندیبوونا پێشمه‌رگه‌هێن قه‌هره‌مان هاتیه‌ رزگاركرن، ب هه‌ر حال ئها ئه‌ڤه‌ جهێ داخه‌كا گران و مه‌زن و دیرۆك دێ ل به‌رپه‌رێن خوه‌ ڤێ رێكه‌فتنا خیانه‌تكارى ب خامه‌یه‌ك ره‌ش و چه‌په‌ل نڤیسیت.
ئه‌ڤه‌ ژى دزڤریته‌ڤه‌ بۆ وێ چه‌ندى كو هه‌تا نوكه‌ و سه‌ره‌راى ڤان 27 سالێن حوكمرانیێ سه‌ركردایه‌تیا سیاسى نه‌شیاینه‌ خوه‌ رێك بێخن و ببنه‌ خودان ئێك گۆتار و ئێك هه‌لۆیستیا نه‌ته‌وى و نیشتیمانى، ئه‌ڤجا ب هه‌ر ئه‌گه‌ره‌ك و سه‌ده‌مه‌كێ بیت.
له‌وما یاكو ئه‌ڤرۆ ژى دئێته‌ روودان نه‌ك كێشه‌یا هه‌رێما كوردستانێ ل سه‌ر مووچه‌ و بۆدجه‌یه‌، به‌لكو ل سه‌ر وى مافێ یه‌ وى یه‌ ئه‌وێ د دستوورێ عیراقا فیدرال دا بۆ نه‌ته‌وێ كورد هاتیه‌ په‌سه‌ندكرن و دیاركرن كو ژلایێ پتریا خه‌لكێ عیراقێ ب گشتى و ل سالا 2005 ڤه‌ ده‌نگ ل سه‌ر هاتیه‌دان كو كورد و عه‌ره‌ب هه‌ڤپشكن ب رێڤه‌برنا حوكمرانیا عیراقێ، نه‌ك كورد هه‌ڤوه‌لاتیێ پله‌ دو بیت، كو مه‌حاله‌ ئه‌ڤ هزرا شاش ئه‌وا هه‌یى ل ئالیێ حوكمه‌تا ناڤه‌ندا عیراقێ ڤه‌، ژلایێ سه‌ركردایه‌تیا سیاسى یا كوردستانێ و نه‌مازه‌ پارتى دیمۆكراتى كوردستان و سه‌رۆك بارزانى بهێته‌ قه‌بوولكرن، چونكو ئه‌و شۆره‌ش و سه‌رهلدان و قوربانى و خه‌بات و تێكۆشین و به‌رخودانا هاتیه‌كرن، ل پێناڤ پاریه‌كێ نانى و مووچه‌یى و بۆدجه‌یى نه‌بوویه‌، به‌لكو ل پێناڤ مافێ ره‌وا یێ گه‌لێ كوردستانێ و ئازادى و سه‌رفیرازى و سه‌رخوه‌بوونا كوردستانێ بوویه‌. له‌وما ل دووماهیێ و ب هزرا من ئه‌ڤ پرۆپاگندا دهێته‌كرن، ژ لایێ هنده‌ك كه‌س و لایه‌ن و گرۆپان ڤه‌، گوایه‌ ئه‌گه‌را ئه‌ڤێ قه‌یرانێ پرسا ریفراندۆمێ بوویه‌ یا دووره‌ ژ راستیێ و مه‌رامێن وان بۆ پرۆپاگندێن هه‌لبژارتنێن داهاتى یه‌ و چى دى نه‌. لێ نزانن كو خه‌لكێ كوردستانێ گه‌له‌ك و گه‌له‌ك ژ ڤێ چه‌ندێ مه‌زنتره‌ و هوشیارتره‌…

53

ساڵح محه‌مه‌د ته‌یرۆ
د هژماره‌كا رۆژناما هه‌ولێر یا رۆژانه‌ و ل به‌رپه‌رێ (كراوه‌) و ل گۆشێ (ده‌رده‌ دڵ) یێ نڤیسكار و رۆژنامه‌ڤان (شێرزاد عبدالرحمن)، بابه‌ته‌ك ل ژێر ناڤێ (پرسیاره‌ بێ ماناكان!) هاتبوو به‌لاڤكرن، هه‌رچه‌نده‌ پشتى كو چه‌ندین جاران من خواندى و ئه‌ز ب هه‌مى بیروبۆچوونێن خوه‌ دگه‌ل نڤیسكارى دامه‌ كو ب راستى هنده‌ك پرسیار ژ خه‌لكى دهێنه‌كرن، هه‌كه‌ مرۆڤ ب هوورى هزر بكه‌ت، چو رامانه‌ك تێدا نینه‌ و ره‌نگه‌كێ دى یێ مایتێكرنا كه‌سایه‌تیا مرۆڤى یه‌ و بۆ دلته‌نگیا وى یه‌ و هیچى دى نه‌، ل سه‌ر ڤان پرسیاران من ژى ڤیا پتر ل سه‌ر راوه‌ستم و ده‌وله‌مه‌ند بكه‌م، چونكو ئه‌ز پشتراستم كو هنده‌ك ژ ڤان پرسیارا دبنه‌ ئه‌گه‌را هندێ كو مرۆڤى تووشى دره‌وا بكه‌ن و ب ره‌نگه‌كێ نه‌وه‌ به‌رسڤێ ل سه‌ر بده‌ت، وه‌رن دا پێكڤه‌ ل سه‌ر ڤان پرسیارێن بێ مه‌عنا و دلته‌نگ راوه‌ستێن، هه‌ول بده‌ین خوه‌ ل ڤى كلتوور و دیاردێ رزگار بكه‌ین، ژ به‌ر كو هه‌ر د بنه‌ره‌ت دا ئه‌ڤان پرسیارا چ په‌یوه‌ندى ب پرسیاركه‌رى و كه‌سایه‌تیا مرۆڤى ڤه‌ نینه‌ كو ئه‌و ژى ئه‌ڤه‌نه‌:
1ـ تۆ ل كیڤه‌یى؟ ئه‌ڤ پرسیارا رۆژانه‌ ژ مرۆڤى دهێته‌كرن و نه‌مازه‌ ل ده‌مێ په‌یوه‌ندیێن تێله‌فۆنى ڤه‌، باشه‌ ئه‌وێ په‌یوه‌ندیێ ب مرۆڤى ڤه‌ دكه‌ت چ په‌یوه‌ندى ب جهێ مرۆڤى ڤه‌ هه‌یه‌ كو ئه‌ز ل كیڤه‌بم؟، ئه‌رێ ئه‌گه‌ر ئه‌ڤێ پرسیارێ ژى نه‌كه‌ت رامانا وى ناگه‌هیت یا وى دڤێت؟
2ـ ته‌ چه‌ند زارۆ هه‌نه‌ و ناڤێت وان چنه‌؟ ئها ل ڤێره‌ دیار دبیت كو پرسیاركه‌رى دڤێت ره‌گه‌زنامه‌یا زارۆیێن مرۆڤى ژى بزانیت و ئه‌ڤه‌ ژى میاتیكرنه‌كا خێزانى یه‌، ئه‌رێ مرۆڤى چه‌ند زارۆ هه‌یین یان نه‌بن چ په‌یوه‌ندى ب لایێ به‌رامبه‌رڤه‌ هه‌یه‌ و خوه‌ لایه‌نێ به‌رامبه‌ر دادوه‌ر نینه‌ تاكو لیكۆلینه‌ڤێ ل ره‌گه‌زنامه‌ و كه‌سایه‌تیا زارۆ و خێزانا مرۆڤى دا بكه‌ت و بزانیت هژمارا سه‌ره‌خێزانێ مرۆڤى چه‌نده‌.
3ـ پرسیاره‌كا دى دى كو هه‌ر ل پشتى پرسیارا ئێكێ ئه‌وا من ل سه‌رى ئاماژه‌ پێدایى دهێته‌كرن كو ئه‌و ژى دێ بێژیت (مووچێ ته‌ چه‌نده‌؟ و ل ڤان قه‌یرانێن دارایى تو چاوا ژیانا خوه‌ دبه‌یه‌ سه‌رى و هنگ بخوه‌ چ دكه‌ن؟)، ئها دڤێت بارێ ئابووریێ مرۆڤى ژى بزانیت، ل ڤێره‌ ئامووژگاریه‌كا بابێ من دئێته‌ بیرامن كو هه‌رده‌م دگۆته‌ مه‌ (هیچ ده‌مه‌كێ نه‌بێژه‌ ئه‌ز یێ فه‌قیرم ومن چ نین، ئه‌و ژى ژ به‌ر دو ئه‌گه‌ران بوو، یا ئێكێ تاكو هه‌ڤالێ ته‌ یێ هه‌رده‌مكى ب ڤێ گۆتنێ تووشى دلته‌نگیێ نه‌بیت و دوژمنێ ته‌ ژى ب هه‌ژاریا ته‌ دلخۆش نه‌بیت)، ڤێجا فه‌ره‌ كو مرۆڤ ئه‌ڤێ پرسێ ژى ب كه‌س نه‌كه‌ت تاكو ئه‌وێ تو ئه‌ڤێ پرسیارێ ئێ دكه‌یى دلته‌نگ نه‌بیت و بارێ ئابووریێ وى ژى چ په‌یوه‌ندى ب ته‌ڤه‌ نینه‌ و مووچێ وى چه‌ند بیت یان نه‌ ئه‌ڤه‌ ئاریشه‌یا وى یه‌ نه‌ك یا پرسیاركه‌رى.
3ـ بۆچى سه‌رێ ته‌ سپى بوویه‌ و تو پیر بوویى؟ دێ ڤێجا وه‌ره‌ شێت نه‌به‌ و ئه‌ڤه‌ ژى مایتێكرنه‌كا خودایى یه‌، چونكو قژ سپى و پیر بین ب ده‌ستێن خودێ یه‌ و كه‌س ژى نه‌ڤێت قژ سپى و پیرببیت، لێ د ده‌ستێن مرۆڤى دا نینه‌ و حه‌زا خودایى یه‌، ئه‌رێ گه‌لۆ پێدڤى یه‌ ئه‌ڤى پرسیارا بێ مه‌عنا مرۆڤ ژ خه‌لكى بكه‌ت و بكه‌ڤیته‌ د نه‌خۆشیه‌كا ده‌روونى دا، چونكو ئه‌ڤ هه‌ردو خه‌سله‌ته‌ نیشانێ دووماهیا ژیانێ نه‌.
4ـ ل ڤێ چه‌ندێ ژى بهێنا وان ناهێن دێ هێن پرس ب به‌ركرنا ره‌نگێن جلكا كه‌ن كو ئه‌رێ مرۆڤ پتر حه‌ز ل چ ره‌نگى یه‌. هه‌ركه‌سه‌كێ حه‌زه‌كا تایبه‌ت ب ره‌نگان هه‌یه‌، ڤێجا چ ره‌نگێن سپى یان ره‌ش یان شین و….هتد، ئه‌رێ مرۆڤ هه‌ر چ ره‌نگى ل به‌ر بكه‌ت خه‌لكى چ شۆل پێ یه‌، ئه‌ڤ مایتیكرنه‌ یا گرێدایه‌ ب سایكولۆژیا مرۆڤى ڤه‌ و ئه‌و ره‌نگێ عه‌قلێ مرۆڤى ببریت مرۆڤ دێ ل به‌ركه‌ت و ئه‌ڤا دى چیه‌ هوون پرس دكه‌ن.
5ـ هه‌تا هنده‌ك جاران پرسیارا زه‌عیفى و قه‌له‌ویا مرۆڤى ژى دهێته‌كرن، هه‌كه‌ مرۆڤ یێ زه‌عیف بیت، دبێژنه‌ مرۆڤى ئه‌ڤه‌ ته‌ خێره‌ تو هنده‌ لاوازبوویى و تو چوویه‌ دختۆرى هه‌تا كو بزانى ته‌ چ نه‌خۆشى هه‌نه‌؟، یان ئه‌گه‌ر مرۆڤ قه‌له‌وبیت دێ بێژن ئه‌ڤه‌ ته‌ خێره‌ و تو چ دخویى و ئه‌ڤ قه‌له‌ویا ته‌ دێ بیته‌ ئه‌گه‌را تووشبوونا نه‌خۆشیێن پاله‌په‌ستۆیا خوینى و شه‌كرێ و راوه‌ستنا دلى و… هتد، ل ڤێره‌ چوون پرسیار ب گیانێ مرۆڤى و ساخله‌مى و نه‌خۆشیا مرۆڤى ژى هاته‌كرن، دێ ڤێجا وه‌ره‌ سه‌رێ ته‌ ل ڤێ سوعبه‌تێ ده‌ربچیت.
6ـ دیسا ژ خه‌مۆكى و كه‌یفخۆشیا مرۆڤى ژى پرسیار دهێنه‌كرن، ئه‌گه‌ر مرۆڤ یێ عاجزبیت دێ بێژنه‌ مرۆڤى ئه‌ڤه‌ چ ب سه‌رێ ته‌ هاتیه‌ و تو بۆ هنده‌ بارێ خوه‌ گران دكه‌یى و دونیا به‌رهندێ ناكه‌ڤیت و دێ هه‌ر مرین، هه‌ست ناكه‌ن كو كه‌س نیه‌ لڤێ ژیانێ یێ بێ كه‌م و كورتى و كێماسى بیت و یێ ته‌مام بیت ل ژیانێ ڤێجا ب ره‌نگه‌كێ ئه‌و كێماسى هه‌بن، ئه‌گه‌ر مرۆڤ هه‌رده‌م یێ پشكۆرین و ده‌ڤ بكه‌نى بیت، دیسا دێ بێژن بۆ وه‌ناكه‌یى مه‌كر و ته‌خار!، وه‌ها هزردكه‌ن كو وان مرۆڤ یێ بخودانكرى و مه‌زنكرى و تال و سویرى یێ ب مرۆڤى ڤه‌برى.
7ـ زۆر جاران مایتێكرنێ د ژنئینان و ژن نه‌ئینانێ دا ژى دهێته‌ كرن ژلایێ خه‌لكه‌كێ مایتێكرنڤه‌، ئه‌گه‌ر زوى بینیت دێ بێژن هێشتا زوى بوو و ئه‌گه‌ر دانه‌عومر كه‌فت هه‌روه‌تۆڤ دێ بێژن فه‌قیرى هێشتا گرێیا نه‌سیبێ وى ڤه‌نه‌، بوویه‌ یان كه‌س شوو پێ ناكه‌ت و كه‌سێ نه‌ڤێت.
8 ـ پرسیاره‌كا دى ئه‌رێ زارۆیێن ته‌ خویندن ته‌مامكرى یه‌ و كه‌س هاتیه‌ دامه‌زراندن؟، جاره‌كا دى دێ مرۆڤى تووشى خه‌مۆكیه‌كا ده‌روونى دكه‌ته‌ڤه‌ و ئه‌و بخوه‌ دزانیت كو ل ڤان قه‌یرانا دامه‌زراندن نینه‌، یان دێ بێژیت هه‌كه‌ تو نه‌شێى زارۆیێن خوه‌ دابمه‌زرینى، ئه‌رێ كى دێ شێت و كه‌س هندى ته‌ به‌رپرس و خه‌لكى نه‌ناسێت، ل ڤێره‌ گومانێ بۆ مرۆڤى و زارۆكێن مرۆڤى دروست دكه‌ت و زارۆ ژى ره‌نگه‌ وه‌ها بزانن كو خه‌مساریه‌ك ژ لایێ بابێ وانڤه‌یه‌ هه‌یه‌، له‌وما نه‌هاتینه‌ دامه‌زراندن، باشه‌ ما كى حه‌ز ناكه‌ت كو هه‌ر زارۆیه‌كێ وى باوه‌رناما خوه‌ وه‌رگرت بێته‌ دامه‌زراندن؟
9ـ بۆچى ته‌ هه‌تا نوكه‌ چ ژن بۆ كورێن خوه‌ نه‌ئیناینه‌ یان ته‌ كچین خوه‌ نه‌داینه‌ شوى؟، دێ ڤێجا وه‌ره‌ سه‌رێ ته‌ ژ ڤى سوعبه‌تێ ده‌ربچیت، به‌ریا هه‌مى تشته‌كێ ژنئینان و شووكرن قسمه‌ت و نه‌سیبه‌ و ب ده‌ستێ مرۆڤى دا نینه‌ و ئه‌م هه‌مى حه‌ز دكه‌ین كو كورێن مه‌ ژنا بینن و كچێن مه‌ ژى شوو بكه‌ن و بچنه‌ سه‌ر رزقێ خوه‌، لى ئه‌و بخۆ دزانیت كو ل ڤان قه‌یرانا ئه‌ڤ چه‌نده‌ ژى گه‌له‌ك یا ب ساناهى نیه‌ و یێ هزر ناكه‌ت كۆ بۆ ڤێ مه‌ره‌مێ پێدڤى ب خه‌رجیاتێن مه‌زن هه‌یه‌.
ئه‌ڤه‌ چه‌ند پرسیارێن ژ وان پرسیارێن بێ مه‌عنا و واته‌ و دلته‌نگ ژ مرۆڤى دهێنه‌كرن، ڤێجا مرۆڤێ دڤێت به‌رسڤێ ل سه‌ر بده‌ت دێ هه‌ول ده‌ت ل هیجه‌ت و هنده‌ك جاران ل دره‌وان بگه‌رهێت تاكو به‌رسڤه‌كا ب قه‌ناعه‌ت بۆ لایه‌نێ پرسیاركه‌ر بده‌ت و خوه‌ ژ وان پرسیاران رزگار بكه‌ت، ل دووماهیێ پێشنیاز دكه‌م كو خه‌لكێ مه‌ خوه‌ ژ ڤان جۆره‌ پرسیارێن دیارده‌ و بوویه‌ كلتوور رزگاربكه‌ن و خه‌لكى ژى دلته‌نگ و غه‌مگین نه‌كه‌ن، بلا ئه‌ڤ كه‌سێن ڤان جۆره‌ پرسیاران دكه‌ن خوه‌ ژ ڤان جۆره‌ پرسیارا دووربێخن و ل گه‌ل ڤان پێشكه‌فتنان دا بژین نه‌ك به‌روڤاژى یا دى ژى بلا به‌رسڤ بۆ خوینده‌ڤانێن هێژا بیت…

website security