NO IORG
Authors Posts by زه‌ري نه‌وزاد

زه‌ري نه‌وزاد

زه‌ري نه‌وزاد
16 POSTS 0 COMMENTS

23

زه‌رى نه‌وزاد
پشتى هه‌لبژارتنێن په‌رله‌مانێ عیراقێ هاتینه‌كرن و ئه‌نجام دیاربوون، ل كوردستانێ یا دهێته‌ دیتن، ب تنێ پارتى یێن د خه‌ما هندێ دا، به‌ره‌یه‌كێ یه‌كگرتوو یێ نیشتیمانى دروست بكه‌ت بۆ دانوستاندنان ل گه‌ل به‌غدا ب مه‌ره‌ما پێكئینانا حوكمه‌تا نوو یا عیراقێ و گیرۆبوونا پێكنه‌ئینانا به‌ره‌یێ كوردى دێ هه‌ر د زیانا كیانێ هه‌رێما كوردستانێ دا شكێت، ژبه‌ر كو د دووماهى خولا په‌رله‌مانێ عیراقێ دا یا دهاته‌ دیتن، لایه‌نێن كوردى د گه‌له‌ك پرسان دا ژ ئێك دووركه‌فتبوون و كارتێكرنه‌كا مه‌زن ل پێگه‌هێ هه‌رێمێ كر كو دڤێت بۆ ڤێ خۆلا په‌رله‌مانى دوباره‌ نه‌بیت، ژ به‌ر كو ئه‌و یه‌كگرتنا جاران ئه‌وا ل به‌غدا هه‌ى، كلیلا سه‌ركه‌فتنا كوردان بوو، به‌لێ ده‌رزێن مه‌زن كه‌تنێ و پێدڤى ب چاره‌سه‌ریا ب له‌ز هه‌یه‌.
ئه‌زموونا خولا به‌رێ یا حوكمه‌ت و په‌رله‌مانێ عیراقێ ئه‌و یه‌كه‌ بۆ مه‌ دیاركر كو وه‌رگرتنا پۆستێن ویزارى ل به‌غدا، چ مافه‌كێ دستوورى بۆ كوردان دابین ناكه‌ت، جێگرێ سه‌رۆك وه‌زیران، وه‌زیرێ دارایى، جێگرێ سه‌رۆك په‌رله‌مان ، سه‌رۆك كۆمار كورد بوون، به‌لێ مه‌ چ مفا ژێ وه‌رنه‌گرت، په‌رله‌مانێ عیراقێ ب پرانی بریار ددان و چو حساب بۆ ته‌وافوقا سیاسى نه‌دكر، هه‌روه‌سا عه‌بادى ژى ب تاك لایه‌ن بریار ددان، ئه‌نجامێن هه‌لبژارتنێن عیراقێ ئاشكرابوون ل هه‌رێمێ هنده‌ك لایه‌نێن كوردى هه‌ر یێ سه‌ر هزرا هندێ كو سه‌خته‌كارى یا هاتیه‌كرن، د به‌رامبه‌ر دا لایه‌نێن شیعى یێن سه‌ركه‌فتى د هه‌لبژارتنان دا كو گه‌له‌ك ژ ئێك دوور، یێ هه‌ڤپه‌یمانیا ل گه‌ل لایه‌نه‌كێ دى یێ شیعى بۆ پێكئینانا حوكمه‌تێ پێكدئینیت، سه‌در و عامرى نێزیكى ئێك بوون، سه‌در و عه‌بادى نێزیكى ئێك بوون و هه‌ڤپه‌یمانى پێكئینان و هه‌ر مه‌ ل كوردستانێ، ئانكو لایه‌نێن سه‌ركه‌فتى ئێك نه‌گرت، كو ئه‌ڤ چه‌نده‌ ژى دێ كارتێكرنه‌كا خراب ل سه‌ر پێگه‌ه و گۆتارا كوردى كه‌ت د حوكمه‌ت و خولا نوو یا په‌رله‌مانێ عیراقێ دا، ژبه‌ر كو ئه‌گه‌ر دوژمنێ ببینیت د ناڤخوه‌یا خوه‌دا مه‌ ئاریشه‌ یێن هه‌یین و نه‌ د ئێكگرتى نه‌، وى ده‌مى ب چو ره‌نگه‌كێ نه‌ یێن به‌رهه‌ڤن گوهداریا داخوازیێن مه‌ بكه‌ن د كابینا نوو دا، له‌وا ئه‌ركێ سه‌ر ملێن پارتى دیمۆكراتى كوردستان و ئێكه‌تیا نیشتیمانیا كوردستان كو هێزێن ئێكێ و دوێنه‌، ڤێ جارێ گرانتره‌ ژ جارێن چوویى، ژبه‌ر كو د ڤان چار سالێن بوورى دا، چ نه‌ما به‌رامبه‌ر هه‌رێمێ نه‌هاتیه‌ كرن، به‌غدا هه‌مى شیان مه‌زاختن كو كیانێ هه‌رێما كوردستانێ ژ ناڤببه‌ت، له‌وما بۆ قووناغا بهێت پێدڤیه‌ ئێكگرێزیه‌كا ئێكجار موكم ل ناڤا هه‌رێمێ بهێته‌ دروستكرن و پارتى و ئێكه‌تى ڤێ ئێكرێزیێ دروست بكه‌ن ئه‌گه‌ر به‌رامبه‌ر چ داگیرانه‌ك بیت، داكو ژیانا تاكێ كورد به‌س بكه‌ڤیته‌ به‌ر مه‌ترسیێ.
هه‌ڤبه‌ركرن ل گه‌ل هه‌موو عیراقێ، ره‌وشا كوردستانێ گه‌له‌ك باشتر و ئێمنتره‌، له‌وما چ جار نابیت ناكۆكیێن سیاسى، ره‌نگڤه‌دانا وێ پشتى دیاربوونا ئه‌نجامێن هه‌لبژارتنان په‌یدا ببن، دڤێت هه‌ر چ زوویه‌ ناڤ مالا خوه‌ رێكبێخین و ب ئێك پاكێچ داخوازیێن خوه‌ پێشكێشى به‌غدا بكه‌ین و خوه‌ ئێكلا بكه‌ین ل گه‌ل لایه‌نێن عیراقى كو یێن داخوازیێن مه‌ بجهبینیت، ل گه‌ل رێكه‌ڤین و به‌رژه‌وه‌ندیێن حزبى بده‌ینه‌ لایه‌كێ و هه‌مى بزاڤ بۆ وێ ئێكێ بن كو پاشه‌رۆژه‌كا گه‌ش بۆ نه‌ڤیێن نوو په‌یدا بكه‌ن، ژبه‌ر كو دووركه‌تنا مه‌ ژ ئێك ب تنێ د خزمه‌تا دوژمن و نه‌یارێن مه‌دایه‌.

51

زه‌رى نه‌وزاد
پرسا زمانێ ستاندارد، ئانكو هه‌لبژارتنا زاراڤه‌كێ زمانى، كو ببیته‌ زمانێ نڤێسین و دانوستاندنا فه‌رمى ل وه‌لاتى، ئاسته‌نگیێن خوه‌ هه‌نه‌ و پێدڤى ب بزاڤێن هه‌مه‌ لایه‌ن و سه‌رانسه‌رى هه‌یه‌، ره‌نگه‌ زمانێ ستاندار ب تنێ د بیاڤه‌كى دا وه‌كو بیاڤێ ده‌رمانسازى، یان ریكلام یان د بیاڤێ بازرگانى یان ئاینى دا هاتبیته‌ بكارئینان، ل جیهانێ ژى نموونێن ئه‌ڤان د زورن، به‌لێ ب گشتى زمانێ ستاندارد كو بیته‌ زمانێ فه‌رمى یێ نڤیسینا وى وه‌لاتى تێدا دهێته‌ راگه‌هاندن، پێدڤى ب پشته‌ڤانیا هه‌مه‌لایه‌ن هه‌یه‌.
سه‌باره‌ت زمانێ كوردى، ژ ئالیێ زانستێ زمانى ڤه‌، زمانه‌كه‌ هه‌موو ئه‌و خه‌سله‌تێن سروشتى یێن زمانان یێن تێدا كو ببیته‌ زمانێ ستاندار، ل دووڤ هنده‌ك قوتابخانێن زمانى، خه‌سله‌تێن زمانى ل سه‌ر چار ئاستان پێك دهێت، وه‌كو فونولۆژى، فۆنه‌تیك، مورفولۆژى، سینتاكس، ئانكو د ڤى بیاڤى دا دڤێت بهێته‌ تاقیكرن، به‌لێ د هه‌مان ده‌مدا، بۆچوونه‌ك هه‌یه‌ كو ب ستانداركرنا زاره‌كێ، ئانكو كوشتنا زاره‌كێ دى یه‌، چونكو د پلان و سیاسه‌تا زمانى دا، دشیاندایه‌ زارێن دى د پرسێن هونه‌رى و ئه‌ده‌بى دا بهێته‌ چالاككرن، هه‌روه‌كو بیاڤێ دوبلاژێ، بۆ نموونه‌ هنده‌ك زاراڤ یێن هه‌ین، ل دوبلاژا بابه‌تێن كومیدى، یان به‌رنامێن زارۆیان، یان بابه‌تێن تراژیدى دشیاندایه‌ بهێته‌ بكارئینان، هه‌روه‌ه‌سا د بیاڤێ ئه‌ده‌بى دا، چیرۆكنڤیس، روماننڤیس، ب رێیا كاراكته‌ر و روودانان، دشێت مفا ژ هه‌موو دیالێكتان وه‌ربگریت.
هه‌ر چاوا بیت، ئه‌ز ل گه‌ل هه‌بوونا زمانه‌كێ ستانداردم، ژبه‌ر كو هه‌بوونا زمانه‌كێ ستانداردێ كوردى، ئانكو شێوه‌كێ هه‌ڤپشكێ كوردى، پێدڤیه‌كا ئێكجار گرنگه‌ بۆ پاراستنا زمانێ كوردى و به‌ره‌ڤپێشڤه‌برنا وى، هه‌روه‌سا بۆ پێشكه‌فتنا ره‌وشه‌نبیریا نه‌ته‌وه‌یی و ب هێزكرنا ئێكرێزیا كوردان, هه‌روه‌سا گه‌له‌ك یا گرنگه‌ بو سه‌رخستنا دۆزا ره‌وایا كوردى و بهێزكرنا په‌یوه‌ندیێن مرۆڤایه‌تى د ناڤبه‌را هه‌موو خه‌لكێ كوردستانێ، زمانێ ستاندارد بناغێ هشیاریا نه‌ته‌وه‌یی یا دروست و چارچووڤێ ئێكگرتنا نه‌ته‌ویى یا ئستراتیجى و گرنگترین پرا په‌یوه‌ندیا د ناڤبه‌را كورد و كێم نه‌ته‌وێن كوردستانێ یه‌ و مه‌رجێ بنه‌ره‌تى یێ كیانێ نه‌ته‌وه‌یی یه‌ بۆ سه‌ربه‌خوه‌یا كوردستانێ ل پاشه‌روژێ، لێ تا نوكه‌ بارودۆخه‌كێ گونجایى بۆ دروستبوونا زمانێ ستانداردێ كوردى ل سه‌رانسه‌رى كوردستانێ دروست نه‌بوویه‌ و ئه‌و هه‌ولێن هاتینه‌دان هه‌موویان ب ره‌نگه‌كێ ئه‌كادیمى سه‌رنه‌گرتیه‌ و ل دوڤ وان هه‌ولان دیاردبیت كو زمانه‌كێ ستاندارد بۆ هه‌رچار پارچێن كوردستانێ گه‌له‌ك یا ب زه‌حمه‌ته‌ و بده‌ستڤه‌ ناهێت، چونكى كوردستان وه‌لاته‌كێ سه‌ربخۆ و ئێكگرتى نینه‌ و ژ ئه‌نجامێ پارچه‌پارچه‌كرنا كوردستانێ ژ لایێ دوژمنان ڤه‌ و ته‌به‌سه‌ركرنا ملله‌تێ كورد ژ لایێ ده‌سهه‌لاتا دوژمنان ڤه‌ زاراڤێن كوردى ژێك دویر كه‌تینه‌، له‌ورا دڤێت د هه‌رێما كوردستانا ئازاد ڤه‌ ده‌ست پێبكه‌ین چونكى ده‌لیڤه‌ پتر ل هه‌رێمێ هه‌یه‌ بۆ دروستكرنا شێوازه‌كێ تایبه‌تێ زمانێ كوردى و ب فه‌رمى كرنا وى هه‌م ژ لایێ دام و ده‌زگه‌هان و میدیایێ ڤه‌ هه‌م ژى د دستوورێ عیراقا فیدرالدا.

52

زه‌رى نه‌وزاد
پشتى روودانێن 16 ئوكتوبه‌رێ، فشارێن مه‌زن ل ناڤخوه‌ و ده‌رڤه‌ ل هه‌رێما كوردستانێ هاتنه‌كرن كو ب ئێكجارى راده‌ستى نه‌یارێن خوه‌ ببیت و مه‌ترسیه‌كا مه‌زن ئێخستنه‌ سه‌ر ئه‌زموون و ده‌ستكه‌فتێن هه‌رێما كوردستانێ بگره‌، ژ گرتنا ده‌ریێن سنوورى، گرتنا فرۆكخانان، درێژه‌پێدان ب برینا بلادجێ خه‌لكێ كوردستانێ كو سه‌قایه‌كێ دروست بكه‌ن خه‌لكى ئێدى ب ئێكجارى باوه‌رى ب حوكمه‌ت و سه‌ركردێن خوه‌ یێن كوردى نه‌مینیت، زۆر ڤه‌نه‌كێشا گه‌له‌ك گوهۆرین دروستبوون كو هه‌رێم نه‌كه‌ڤیت و جاره‌كا دى باوه‌ریا خه‌لكى بۆ ده‌ستهه‌لاتێ ڤه‌گه‌ریت، ئه‌و ژى ڤه‌بوونا فرۆكخانان و هاتنا بۆدجه‌كێ كێم ژ به‌غدا كو ببیته‌ ئه‌گه‌ر ده‌ستكاریا مووچه‌ى بهێته‌ كرن، ئانكو فشارێن سه‌ر هه‌رێمێ رۆژ بۆ رۆژ یێن دهێنه‌ كێمكرن كو راسته‌وخوه‌ ژى كێمبوونا ڤان فشاران په‌یوه‌ندى ب خوه‌شتركرنا ره‌وش و ژیارا وه‌لاتیان ڤه‌ هه‌یه‌.
خه‌لكى چار سالێن ده‌رده‌سه‌ریێ و نه‌خۆشیێ قه‌بوولكرن، له‌وما ده‌م هاتیه‌ بارێ خه‌لكى ب ئێكجارى بهێته‌ سڤككرن و ب ئێكجارى پاشكه‌فتا مووچه‌ى نه‌مینیت، ئه‌و ژى ب په‌سه‌ندبوونا پرۆژه‌ قانوونا راستڤه‌كرنا مووچێن پلێن بلند و خانه‌نشینیێ كو نوكه‌ ل په‌رله‌مانێ كوردستانێ یه‌ بهێته‌ په‌سه‌ندكرن و بكه‌ڤیته‌ كارى داكو پتر ببیته‌ ئه‌گه‌ر دادپه‌رویه‌ك ل ناڤ جڤاكێ كوردى په‌یدا ببیت، هه‌روه‌سا ژبلى ڤى پرۆژه‌ى، دڤێت حوكمه‌تا هه‌رێما كوردستانێ پتر كار ل سه‌ر هه‌موو سێكته‌رێن دى یێن ژیانێ بكه‌ت، پێدڤیه‌ داهاتێ ناڤخوه‌ پتر بهێته‌ رێكخستن، پرۆژێن ژێرخانا ئابوورى كار ل سه‌ر بهێنه‌ كرن و لایه‌نێ سه‌ربازى بهێته‌ سازیكرن و پتر كۆنترۆلا گه‌نده‌لیێ بهێته‌ كرن وپتر ریفورم د كارگێرى و برێڤه‌برنێ دا بهێته‌ كرن داكوبۆ هه‌لبژارتنێن بهێت یێن په‌رله‌مانێ عیراقێ و یێن په‌رله‌مانێ كوردستانێ ژى، ب تمامى باوه‌رى بۆ خه‌لكێ كوردستانێ ب ڤێ حوكمه‌تێ بزڤریت و وه‌لاتى ل سه‌ر بنه‌مایه‌كێ دروست و راست د هه‌لبژارتنا نوونه‌رێن خوه‌دا د راستگۆ بن و ل دووڤ سوزێن ته‌یسوك نه‌كه‌ڤن و ئارمانج و نیازا هنده‌ك پارتێن سیاسى بزانن یێن كو دخواستن د ڤان چار سالێن بوورى دا سه‌ره‌راى قه‌یرانا دارایى و شه‌رێ داعش و هاتنا ملیۆنه‌ها ئاواران بۆ هه‌رێما كوردستانێ، ره‌وشا ئێمناها كوردستانێ ژ ناڤ ببه‌ن، دڤێت خه‌لك بگه‌هته‌ وێ باوه‌ریێ كو ئه‌گه‌ر ئاشتى و سه‌قامگیریا وه‌لاتى تێكچوو، ئێدى ب سۆزێن بریقه‌دارێن ڤان حزبان ره‌وش ئاسایى نابیته‌ڤه‌، دڤێت خه‌لكى ئه‌ویه‌كه‌ ل به‌رچاڤ بیت كو كى بوو بوویه‌ ئه‌گه‌ر سازانا نیشتمانى ل ڤى وه‌لاتى تێك بچیت، دڤێت خه‌لك باش ل نیازا لایه‌نێن ڤێ دووماهیێ ده‌ركه‌تین بگه‌هیت كو ئارمانجا وان ئه‌و نینه‌ ب رێیا سندوقێن ده‌نگدانێ بگه‌هنه‌ ده‌ستهه‌لاتێ، ژبه‌ر كو به‌رى هه‌لبژارتنان ل ده‌رگه‌هێ دوژمنى ددانان و ل به‌غدا دگۆتنه‌ حه‌یده‌ر عه‌بادى سه‌رۆك وه‌زیرێن عیراقێ بودجێ خه‌لكێ كوردستانێ نه‌فرێكه‌ داكو ئه‌ڤ حوكمه‌ته‌ ب ئێكجارى بكه‌ڤیت.

34

زه‌رى نه‌وزاد
پشتى هه‌رێما كوردستانێ ژ ئه‌گه‌رێ سه‌رنه‌گرتنا ده‌رئه‌نجامێن ریفراندۆمێ و وێ خیانه‌تا ل 16 ئوكتوبه‌رێ هاتیه‌ كرن، تووشى دوورپێچه‌كا سیاسى و ئابوورى بووى و سنورێن وێ یێن ل گه‌ل ئیرانێ و فرۆكخانێن هه‌رێمێ ل هه‌مبه‌ر گه‌شتێن ئاسمانى هاتینه‌ گرتن، هه‌روه‌سا پشتى ژ ده‌ستدانا نه‌فتا كه‌ركووكێ پتر بارێ دارایى یێ هه‌رێما كوردستانێ دژوار بوو كو نه‌شێت مووچێ فه‌رمانبه‌رێن خوه‌ دابین بكه‌ت، به‌لێ ب سیاسه‌تا سه‌رۆك وه‌زیرێن هه‌رێمێ و ئه‌و بزاڤێن به‌رده‌وام یێن دبلوماسى یێن داین، بوو ئه‌گه‌ر كو فشارێن سه‌ر هه‌رێما كوردستانێ هێدى هێدى ژ ئه‌نجامێ وان بزاڤان كێم ببن، ب تایبه‌ت پشتى سه‌ره‌دانا سه‌رۆك وه‌زیران بۆ فره‌نسا و ئه‌لمانیا و ڤاتیكان، ده‌رئه‌نجامێن وان بزاڤان یێ دیار دبن، به‌رى چه‌نده‌كێ ده‌رگه‌هێ سنورى یێ حاجى عومران ل گه‌ل ئیرانێ هاته‌ ڤه‌كرن و ل نێزیك دێ فرۆكخانێن هه‌رێمێ ژى هێنه‌ ڤه‌كرن و دیدارا د ناڤبه‌را عه‌بادى و نێچیرڤان بارزانى ژى هه‌ر ژ ئه‌نجامێ وان فشارێن نێڤده‌وله‌تى بوویه‌ كو عه‌بادى نه‌چار ببیت گوهداریا داخوازیێن كوردان بكه‌ت ب تایبه‌ت مووچێن فه‌رمانبه‌رێن هه‌رێمێ دابین بكه‌ت كو پتر ژ سێ سالایه‌ به‌غدا سیاسه‌تا برسیكرنا خه‌لكێ كوردستانێ بكار دئینیت.
ل ڤێره‌ كه‌تنه‌ سه‌ر پێیا هه‌رێما كوردستانێ، بێى ئێكگرتنا هێز و لایه‌نێن سیاسى یێن كوردستانى، ره‌نگه‌ گه‌له‌ك كێماسى تێدا هه‌بن و یا به‌روه‌خت ژى بیت، له‌ومان دڤێت سه‌ركردێن پارتێن سیاسى مفاى ژ ئه‌زموون و شاشیێن خوه‌ یێن بوورى وه‌ربگرن و شاشیه‌كا گه‌له‌ك مه‌زنه‌ كو هه‌تا نوكه‌ ل ڤێ پارچا هه‌رێمێ، بۆ پرۆسا هه‌لبژارتنێن عیراقێ، كوردان هه‌ڤپه‌یمانیه‌ك ئێكگرتى دروست نه‌كریه‌، ژبه‌ر كو رێكخستن و ئێكده‌نگى و ئێك گوتاریا گه‌لێ كورد د ڤى ده‌مى دا به‌رامبه‌ر به‌غدا، دێ بیته‌ باشترین فشارا كو ئه‌و فشاره‌ خوه‌ گه‌له‌ك بگریت و نه‌ یا به‌روه‌خت بیت، گونه‌هه‌كا مه‌زنه‌ سه‌كردێن كورد ده‌رحه‌ق گه‌لێ خوه‌ دكه‌ن كو د ڤى ده‌مى دا ئێك نه‌گرن، ژبه‌ر كو گه‌له‌ك ب رۆنى ئوروپا و ئه‌مریكا یێ دبێژن مه‌ هه‌رێمه‌كا بهێز د چارچووڤێ عیراقێ دا دڤێت و به‌رده‌وام یێ رژدیێ ل وێ یه‌كێ دكه‌ن كو كیانێ هه‌رێما كوردستانێ دڤێـت ژ ئالیێ به‌غدا ڤه‌ بهێته‌ پاراستن، باشه‌ چاوان ده‌وله‌تێن زلهێزێن جیهانێ پشته‌ڤانیێ ل پاراستنا ئه‌زموونا مه‌ بكه‌ت و ئه‌م بخوه‌ د ناڤخوه‌یا خوه‌دا نه‌شێت ئێك بگرین و ئه‌زموونا هه‌رێما كوردستانێ بئێخینه‌ به‌ر مه‌ترسێ، بلا مفاى ژ خوه‌رێكخستنا وه‌لاتێ ئه‌لمانیا وه‌ربگرین، كانێ چاوا ئه‌لمانیه‌كا یه‌كگرتوو چێكر و چاوان نوكه‌ بوویه‌ بهێزترین هێزا كارتێكه‌ر ل ئوروپا و جیهانێ، قوناغ گه‌له‌ك یا نازكه‌ ب تایبه‌ت هه‌لبژارتنێن عیراقێ نێزیك بوویه‌، ئه‌گه‌ر ئه‌م به‌رى هه‌لبژارتنان مالا خوه‌ رێك نه‌ئێخین و مافێن خوه‌ یێن ده‌ستورى نه‌ڤه‌گه‌رینین و مه‌رجێن پشكداریا خوه‌ د هه‌لبژارتنێن عیراقێ دا نه‌كه‌یه‌ كارت، پشتى هه‌لبژارتنان گه‌له‌ك دێ ب زه‌حمه‌تتر لێ هێت، له‌وما بارێ گران یێ ده‌ربازكرنا ڤێ قوناغێ دكه‌ڤیته‌ سه‌ر ملێن پارتى دیموكراتى كوردستان و ئێكه‌تیا نیشتمانیا كوردستان كو ده‌ستبه‌رداى هه‌موو مافێن خوه‌ بن كو بشێن به‌رى هه‌لبژارتنێن عیراقێ ئێك بگرن داكو كورد سه‌نگا خوه‌ یا جاران ڤه‌گه‌رینه‌ڤه‌ و جاره‌كادى هه‌ولێر ببیته‌ ترافیكا سیاسى یا لایه‌نێن عیراقێ و بێى كوردان چ پێنگاڤ بۆ ده‌ربازكرنا هه‌ر قوناغه‌كێ نه‌هێنه‌ هاڤێتن.

37

زه‌رى نه‌وزاد

رێكخراوا په‌رله‌مان یا تایبه‌تمه‌ند ب گه‌شه‌پێدانا ژنان ل سه‌رانسه‌رى جیهانێ كو  سه‌ر ب وه‌زاره‌تا ده‌رڤه‌ یا ئه‌لمانیا ڤه‌یه‌ پرۆژه‌یه‌ك بۆ ژنێن نڤیسه‌ر و ره‌وشه‌نبیر یێن عیراقى به‌رهه‌ڤكربوو ل هه‌ولیرا پایته‌ختێ هه‌رێما كوردستانێ تشتێ سه‌رنجا من راكێشایى د ڤێ خولێ دا و چه‌ندین خولێن دی یێن كو ئه‌ز دگه‌ل هه‌ڤپیشه‌یێن خوه‌ یێن عیراقى یێن عه‌ره‌ب پشكدار دبم ئه‌وه‌ كو نوخبا ره‌وشه‌نبیرا عه‌ره‌بی نوخبه‌یه‌كا ئازادیخوازه‌ باوه‌رى ب یه‌كسانى و مافێ گه‌لان هه‌یه‌ نه‌ د رازی نه‌ ژ ره‌وشا سیاسی یا عیراقى، دیتنا وان بۆ گه‌لێ كورد دیتنه‌كا ئاشتیانه‌یه‌، ئه‌ز كچا كورد یا ب تنێ بووم د ناڤا وان دا لێ دیتن و رێز ز ڤیانا هه‌ره‌ زۆر ژ بوی مه‌ وه‌ك كوردانه‌ گه‌له‌ك ژ هه‌ڤالێن من یێن عه‌ره‌ب د قووناغا ریفراندۆمێ دا پشتگیریا خوه‌ نه‌ راسته‌وخوه‌ بۆ من دیار دكر نه‌ ب تنێ ئه‌ڤه‌ به‌لكو دگۆتن ئه‌م ئه‌گه‌ر حه‌ز ژ جه‌نابێ سه‌رۆك بارزانى نه‌كه‌ین ژى ئه‌م نه‌شیێن ئینكارا وێ چه‌ندێ بكه‌ین كو ئه‌ڤێ كه‌سایه‌تیێ گه‌له‌ك قوربانى بۆ گه‌لێ خوه‌ داینه‌ و جیهان شاهده‌ ل سه‌ر مێژویا خه‌باتا ڤێ كه‌سایه‌تیا كوردى،    ئه‌ڤێ چه‌ندێ پرسیار ل نك من په‌یدا كرن و د گه‌نگه‌شه‌كێ دا من ئاراسته‌ى وان هه‌موویان كرن، كو د جیهانێ دا نوخبا ئه‌كادیمى و ره‌وشه‌نبیر جاده‌، رایا گشتى، دیتن و ئاراسته‌یا خه‌لكی دكه‌ن چینا هه‌ره‌ كارتێكه‌رن بو ئاراسته‌كرنا خه‌لكى ئه‌گه‌ر ئه‌و راست هنده‌ دۆستنین كوردانه‌، بۆچى جاده‌یا عیراقى سال بۆ سالێ پتر دژى مافێن ره‌وا یێن گه‌لێ كورد دبیت، بوچى هه‌ر حزبه‌ك یان كه‌سه‌كێ پتر دژى كوردان داخویانیان بده‌ت و دژایه‌تیا هه‌رێما كوردستانێ بكه‌ت كه‌سه‌ك خوشتڤى تره‌ د جاده‌یه‌یا عیراقى دا و پتر ده‌نگان و باوه‌ریا جادێ بده‌ست خوه‌ ڤه‌ دئینیت. و خالا هه‌ره‌ گرنگتر ئه‌گه‌ر د عیراقێ دا ئه‌ڤ نوخبا ژنان هه‌نه‌ بۆچى سالانه‌ نموونێن وه‌ك عه‌واتف نعمه‌، عالیا ناصیف،حه‌نان فه‌تلاوى … نوونه‌رێن ژنن د جادا سیاسی یا عیراقى دا. د به‌سڤان دا دیار كرن كو ئه‌ڤه‌ نینه‌رایه‌تیا وان ناكه‌ن و ده‌زگه‌هێن ره‌وشه‌نبیرى و میدیایی پتریا وان سه‌ر ب ڤان كه‌سان و حزبانه‌، له‌ورا ئه‌و خوه‌ تێدا نابینن و ئه‌جندایێن ڤان حزبان ژ ده‌رڤه‌ دهێن نه‌ حه‌ز و ئاراستێن وان ب خوه‌ نه‌، تا دكتوره‌كا زانكویێ ب روهنی دیار كر كو سندوقین ده‌نگێن یێن مینا عه‌واتف نعمه‌ تژى ژ ده‌ڤه‌ دهێت نه‌ ژنێن عیراقی نه‌ وان هه‌لدبژێرن و ئه‌ڤ نمونه‌ كیمكرنه‌ د كه‌سایه‌تیا ژنێن عیراقى دا، لێ ئه‌ڤه‌ كه‌تواره‌كه‌ بوو ژناڤچوونا ڤی وه‌لاتى و دوباره‌ بهێزنه‌بوونا وى و نه‌باشبوونا ره‌شا ئه‌منى و ئابوورى یه‌.

98

زەری نەوزاد:

د چەند سالێن حوکمرانیا ل ھەرێما کوردستانێ و سەرەرایی ھەبوونا کێماسیان د ئاراستەکرنا ژنان و بەرپاکرنا یەکسانیا جڤاکی گەلەک خال ھەنە دەسکەفتێن ژنا کوردن دڤێت د قوناغا داھاتی دا کار ژ بو پاراستنا ڤان دەسکەفتان بھێتە کرن و بەردەوامی ب بەرەڤ پێشڤەبرنا رەوشا ژنێ ل ھەرێما کوردستانێ بدەین ل دەمەکی کو رەوشا ژنێ ئەگەر ئەم بەراورد بکەین دگەل عیراقێ ب شاھدەییا ژنێن عیراقی ب خوە د جوداھیەکا وسا دایە کو ناھێتە بەراورد کرن ژ لایێ جڤاکی، ئاینی، یاسایی، سیاسی…ھتد.

عیراق بەر ب یاسا ب شوی دانا د ژیێ9 سالیێ دا، ب گوتنێن ژنێن عیراقی رەوشا وان ل گەلەک دەڤاران ل وی ئاستی دایە کو نەشێن بتنێ ل جادەیەکا گشتی دەرکەڤن، بەردەوام ل بن گەفێن نەبونا ئازادیا تاکەکەسی، ل مەسترین پارێزگەھێن عیراقێ ئێک سەنتەرێ تایبەت ب ژنان یێ وەرزشی نینە ئەڤە ژ بلی نەبونا گەلەک پێدڤیێن دە یێن تایبەت بو ھندێ ژن بشێت ب شێوازەکێ نورمال ژیانا خوە بژیت ، فشارێن جڤاکی، ئاینی، مەزھەبی تاکە خالا کو عیراق دشێت شانازیێ پێ ببەت بو ژنێ ھەبوونا کوتاییێ یە د پەرلەمانێ عیراقێ دا کو ب جوھد و فشاێن لایەنێن کوردی ئەڤ مافە ب ژنا عیراقی ھاتیە دان، ل دەمەکی کو ئەم یێ بەر ب قوناغا نە پێدڤیا کوتایێ دچین چونکی ژنا کورد گەھشتیە وێ قوناغێ کو دکاریت ھەڤرکیا زەلامی بکەت د بدەستڤەینانا باوەریا جەماوەری دا.

ئەڤ ئاستە ژ ڤالاتیەکێ نەھاتیە بەلکو ھەولێن حکومەتا ھەرێما کوردستانێ د دامەزراندنا سازیێن تایبەت ب رەوشەنبیری بەرھنگاریا توندوتیژیێ پالپشتی و پشتەڤانیا ژنێ د ھەموو ساکتەرێن جڤاکی دا ھەروسا ھەولێن پەرلەمانێ کوردستانێ د راستڤەکرنا یاسا بارێ کەسایەتی و د یاسا چەوانیا سەرەدەریی کرنێ دگەل ھێلێن پەیوەندیان کو رێگریێ ل ھەموو جورێن ھەرەشەکرنێ ب رێیا ئامیرێن پەیوەندیان ل ژنێ بگریت، و یاسا سزا یا عیراقی ب تایبەت کو تاوانا کوشتنا ژنان وەک ھەر تاوانەکا دی یا کوشتنێ سەرەدەری دگەل بھێتەکرن.  ژن قوربانیا ھەمی جەنگ و ململانێیێن سیاسی یە ل ھەموو جیھانێ، ژنا کورد پشکا شێری ژ ڤێ قوربانیێ بەرکەتیە لەورا دڤێت ئەڤ سازیێن تایبەت ب ژنان ل حکومەت و پەرلەمان و رێکخراویێن تایبەت ب ژنان ڤە کار ژ بوی قوناغا داھاتی یا ھەرێما کوردستانێ بکەن.

دوھی د گوتارا سەروکێ حکومەتا ھەرێما کوردستانێ دا ل ھەوا بەرھنگاربونا توندوتیژیێ دژی ژنان ب رونی پشتەڤانی و بەرھەڤیا خوە بو ڤان سازیان دیارکریە و ئەرکێ حکومەتێ د پاراستنا ڤان دەسکەفتان دا بەرچاڤکریە لەورا بەرپرسیارەتیا وان بو داھاتەکێ باشتر و ئاستێ ژیانەک ھێژاتر بو ژنان مەزنتر لێھات. ھەولێن حکومەتا ھەرێما کوردستانێ د پشتەڤانیکرن و قورتالکرنا ژنێن کوردێن ئێزدی ژ دەستێ مەزنترین رێکخراوا تیرورستی دا و ھەبوونا نڤێسینگەھەکا تایبەت ب قورتالبونا وان و سەنتەرێن تایبەت ب دوبارە ڤەگەراندنا وان بو ژیانێ ئومێدا دوماھیێ نینە بەلکو دڤێت ئەڤ پروسە یا بەردەوام بیت و کاودانێن نوکە کارتێکرنێ ل رژدیا ڤەگەراندنا ڤان ژنان و بەرپاکرنا ژیانەک باشتر بو وان ژ کارێن دەستپێکێ یێن حکومەتێ بن.

172

د به‌رنامه‌یه‌كێ تله‌فزیۆنى دا ل سه‌ر شاشا كه‌نالێ ئافاق یێ عه‌ره‌بی یێ سه‌ر ب نوورى ئه‌لمالكى ڤه‌ ل ده‌مێ كو بێژه‌رێ به‌رنامه‌ی دبێژیته‌ ئالا تاله‌بانى دڤێت ناڤێ ته‌ ژ ئالا تاله‌بانى بهێت گوهورین بۆ ئالا عیراقى! په‌رله‌مانتار و سه‌رۆكا لیستا ئێكه‌تى نشتیمانی كوردستان دبێژیت بۆچى ما ته‌ گومان ب عیراقیه‌تا من دا هه‌یه‌؟ د ئه‌سل دا نفشێ مالا تاله‌بانى بۆ مالا به‌نى ئه‌سه‌د یا عه‌ره‌بان یا شیعى ڤه‌دگه‌ریت و ئه‌و دبێژنه‌ من دوتمام!
ئه‌ڤ چه‌نده‌ ل ده‌لیڤه‌كێ دا دهێت كو بیژه‌ر و مێڤانێن وى په‌سنا په‌رله‌مانتارا ناڤبرى دكه‌ن و ئه‌و ژى ب هه‌مان گه‌رمى ڤێ به‌رسڤێ دده‌ت. ب عه‌ره‌بكرنا ملله‌تێ كورد سیاسه‌ته‌كا فاشلا دوور و درێژه‌، ڤیدیۆیا ڤى به‌رنامه‌یى د تۆرێن جڤاكى دا جاده‌یا كوردى توره‌ كریه‌ تا گه‌هشته‌ وێ یه‌كێ كو نڤیسینگه‌ها جه‌لال تاله‌بانى ب فه‌رمى خوه‌ ژ گۆتنێن په‌رله‌مانتارا خوه‌ بێگونه‌هـ بكه‌ت و دیار كریه‌ كو ئه‌و ب تنێ به‌رپرسیاره‌ ل سه‌ر ڤێ گۆتنا خوه‌ و به‌روڤاژى گۆتنا وێ دبێژیت كو مالا تاله‌بانى ماله‌كا كوردیه‌.
ئه‌ڤه‌ نه‌ جارا ئێكێ یه‌ كو جادا كوردى ژ گوتنێن نینه‌رێن خوه‌ توره‌ دبیت ل ده‌مێ كو حزب و مالا تاله‌بانى و نڤیسینگه‌ها تاله‌بانى به‌رپرس نه‌بیت ژ گوتنا نینه‌را خوه‌ و ئه‌م ب خوه‌ ژى وه‌ك ملله‌ت به‌رپرس نه‌بین ژ هه‌رلبژارتنا خوه‌، كى به‌رپرسه‌ به‌رامبه‌ر فه‌شه‌لا نینه‌رێن كو نه‌شییاین چ باده‌كێن كوردى ئێكلا بكه‌ن ل په‌رله‌مانێ عیراقێ بێئومێدیه‌كا ب ڤى ئاوای بو گه‌لێ خوه‌ دروست كرى، ب تنێ هه‌بوونا خوه‌ ل وى جهێ هنده‌ حه‌ساس و چاره‌نڤیساس بتنێ بو به‌رژه‌وه‌ندیێن خوه‌ یێن كه‌سۆكى بكاردئینن ئه‌ڤه‌ چه‌ندین جار په‌رله‌مانتارێن كورد ئه‌ڤ بێئومێدیه‌ بو خه‌لكێ خوه‌ دروست كر ئه‌ڤ داخویانیێن نه‌ به‌رپرسانه‌ یێن نوونه‌رێن كورد چ رامانێن دى ژێ ناچن ژ بلى كو ئه‌و خوش دبێژن و ئه‌و ژى خۆش!
هه‌لسوكه‌وتێن هه‌ر ئێك ژ وان دڤێت ئه‌جندایا حزبێن وان یێن سیاسى ل نك مه‌ زه‌لال بكه‌ت چونكى ئه‌ڤه‌ به‌رهه‌مێ ئاڤاكرنا وان حزبانه‌ بۆ كه‌سایه‌تى و سه‌ركردایه‌تیێن خوه‌، ده‌لیڤێن مینا ده‌لیڤا نوكه‌ بو ملله‌تێ كورد نه‌بوینه‌ كو ئه‌م چاره‌نڤیسێ خوه‌ ئێكلا بكه‌ین ئه‌زمونا مه‌ یا سیاسی دگه‌ل هه‌لبژارتنێن مه‌ بومه‌ باش ئاشكه‌را بوینه‌ و ئێدى تاكێ كورد دزانیت چاره‌نڤیسێ وى ب چ ئاوا بیت باشتره‌، له‌ورا ده‌م هات ئه‌م بابه‌تێ عه‌ره‌ب و كوردینیا خوه‌ ئێكلا بكه‌ین عیراقیه‌ت و كوردستانیه‌تا خوه‌ هه‌لبژێرین و ئه‌ڤ هه‌لبژارتنه‌ دێ زور باشتر بیت ژ توره‌ییا مه‌ .

137

گه‌له‌ك یا ره‌وایه‌ ده‌زگه‌هه‌كێ راگه‌هاندنێ ژئالیێ لایه‌نه‌كى یان حیزبه‌كێ یان كۆمپانیه‌كێ سپونسه‌ریێ لێ بهێته‌ كرن، مه‌زنترین رێژا ده‌زگه‌هێن راگه‌هاندنێ ل سه‌رانسه‌رى جیهانێ ب ڤى ئاواى كار دكه‌ن، حزبێن سیاسى یێن ده‌ستهه‌لاتدار و كۆمپانیایێن مه‌زن ده‌زگه‌هێن راگه‌هاندنێ ددامه‌زرینن داكو خه‌لك ب رێییا وان كه‌ناڵان هه‌م خزمه‌ت هه‌م ژى په‌یاما خوه‌ بگه‌هینن، خالا سه‌یر ل روژهه‌لاتا ناڤین ب گشتى و ل هه‌رێما كوردستانێ ب تایبه‌ت هه‌ر لایه‌نه‌ك یان میدیاكاره‌ك پیچه‌ك به‌رپێن خوه‌ ببینیت ئێكسه‌ر دێ خوه‌ ب بێلایه‌نى و پیشه‌ى ده‌ته‌ دیاركرن وه‌ك تو بێژى ئه‌ڤ ژمارا مه‌زن یا بینه‌ران هه‌موو د ساویلكه‌نه‌ و نوزانن كو ئه‌و ده‌زگه‌هێ ئه‌وى كارلێكرى و لێهاتیه‌ پێش مینا هه‌موو یان پتریا ده‌زگه‌هێن دى ژ بال حزبه‌كێ ڤه‌ دهێته‌ پشته‌ڤانیكرن.
ل ڤێره‌ خالا سه‌یر ئه‌وه‌ ل ده‌مێ تو خوه‌ ببینى كه‌سه‌ك پیشه‌كار و هه‌مان هه‌ڤپیشه‌یێ خوه‌ ببینى كه‌سه‌ك حزبى و لایه‌نگر و ب سڤكى لێبنێرى، سه‌یره‌ راگه‌هاندن بو جه‌نابێ وان پیشه‌ و وێره‌كى بیت و بو یێن به‌رامبه‌ر حزبایه‌تى بیت و یا ژ وێ مه‌زنتر ئه‌وه‌ حزبایه‌تى ژ بوى وان نه‌ته‌وایه‌تى بیت ژ بو یێن به‌رامبه‌ر كوێلایه‌تى بیت، ئاخر چینه‌ك ب ڤى ره‌نگى هزر بكه‌ت چ جوره‌ ره‌وشه‌نبیریه‌كه‌ ل بال هه‌ى.
په‌رله‌مانتاره‌كێ هه‌رێما كوردستانێ بره‌نگه‌كێ نه‌ ره‌وشه‌نبیرانه‌ و ب سه‌ره‌ده‌ریه‌كا نه‌شارستانى سڤكاتیێ ب كه‌ناله‌كێ كوردستانێ دكه‌ت، ئاخر جه‌نابێ په‌رله‌مانتار ئه‌رێ كێ دزانى تو هه‌ى یان تو نینی ئه‌گه‌ر ته‌ ل تلفزیونه‌كێ كار نه‌كربا كو حزبه‌ك ته‌مویلا وێ دكه‌ت، ئه‌رێ ژ بوى جه‌نابێ هه‌وه‌ حزبایه‌تى و راگه‌هاندن حه‌لاله‌ لێ بو یێن به‌رامبه‌ر وه‌ نه‌!
ل ڤێره‌ من دڤێت بابه‌ته‌كى ب ئازرینم ژ بوى جه‌نابێ وى و ژ بوى خه‌لكێ كو توره‌ بوى ژ ره‌فتارا وى جارێ مێژوویا ملله‌تێ كورد گه‌له‌ك یا زه‌نگینه‌ ب كه‌سانێن مینا جه‌نابێ وى لێ خالا هه‌ره‌ گرنگ ل ڤێره‌ ئه‌وه‌ كو بلا ئه‌م هه‌مى بزانین كو تا نوكه‌ ئه‌گه‌ر كوردان د گه‌ل به‌غدا ده‌سكه‌فته‌ك هه‌بوویه‌ ئه‌ڤه‌ ژ بوى ئێكریزی و ئێكده‌نگیا وان ڤه‌دگه‌ریت و ل روژا كو ده‌نگێن دوژمنان بلند بووین و ڤیایین ڤان ده‌سكه‌فتێن كوردان تێك بده‌ن ئێكسه‌ر كار ژ بوى ژ ناڤبرنا ڤێ ئێكرێزیێ كر و ب مخابنى ڤه‌ تا راده‌یه‌كێ ده‌سكه‌فت هه‌بووینه‌، ل ده‌مێ كو كه‌سانێن مینا وى سڤكاتیێ ب میدیاكاره‌كێ یان ب كه‌ناله‌كى بكه‌ت كو ئه‌ڤ كه‌ناله‌ نینه‌راتیا باژێره‌كێ مینا دهوكێ پیروز دكه‌ت باجا وێ و ره‌نگڤه‌دانا وێ گه‌له‌ك ژ بیرا وى مه‌زنتره‌ ئه‌ڤ یه‌ك تمامیا وى پروژه‌ى یه‌ یێن كو دوژمنێن ملله‌تێ كورد ژ بوى دژایه‌تیا پروژه‌یێ ده‌وله‌تا كوردى، باژێره‌ك مینا دهوكێ لاندكا شوره‌ش و شوره‌شگێران ب كه‌سانێن مینا ته‌ قه‌د ژ هه‌لویستێ خوه‌ ناگوهۆرن به‌لكو هه‌بوونا وان دبیته‌ پشته‌ڤان كو ئه‌م پتر د رژد بین ل سه‌ر هه‌لویست و به‌رخوه‌دانا خوه‌ و پروژێ نه‌ته‌ویی یێ كو ملله‌تێ مه‌ كار ژ بۆ دكه‌ت .

111

ل جیهانه‌كێ ژن قوربانیا هه‌ره‌ مه‌زنا جه‌نگ و كلتور و گرێیێن جڤاكى بوویه‌، په‌یڤا شه‌ره‌ف كریه‌ تێگه‌هه‌ك به‌رته‌نگ كو دیربیت ژ پیروزى و مه‌زنیا خوه‌ وه‌ك سیفه‌ته‌ك مرۆڤانه‌، چونكى شه‌ره‌ڤ بتنێ ب ژنێ ڤه‌ و ب به‌شه‌كێ له‌شێ وێ ڤه‌ گرێدایه‌، ل ده‌مێ رویدانا كاره‌ساتا شنگالێ و ره‌ڤاندنا ژن و كچێن كوردێن ئێزدى ترسا هه‌ره‌ مه‌زن ئه‌و بو كو ئه‌رێ ئه‌گه‌ر ئه‌ڤ كچه‌ ڤه‌گه‌رن دێ چ چاره‌نڤیس هه‌بیت ئه‌رێ ئه‌و بونه‌ قوربانى چ ڤه‌گه‌رن یان نه‌، بخوشحالى ڤه‌ جڤاتا روحانیا ئێزدیان فه‌توا ده‌ركر كو ئه‌ڤ كچ و ژنه‌ دێ ڤه‌گه‌رنه‌ڤه‌ ژیان و ناڤ خێزانێن خوه‌ و جیهانێ و رێكخراوێن نێڤده‌وله‌تى و ناڤخوى كار ژ بو رزگاركرن و كێمكرنا كاره‌ساتا وان كر، ل ڤێره‌ كچه‌ك جودا ژ هه‌ر كچه‌كێ خودان به‌رخودانه‌كا تایبه‌ت، ده‌نگه‌ك بلندتر ژ هه‌ر ده‌نگه‌كى ده‌ركه‌ت، نادیا مراد ئه‌ڤا كو ل 2014 و دگه‌ل كاره‌ساتا بسه‌رێ ملله‌تێ كوردێن ئێزدى هاتى، هاتیه‌ ره‌ڤاندن ل سه‌ر ده‌ستێ مه‌زنترین رێكخراوا تیرورستى یاكو بناڤێ داعش، پشتى كوشتنا شه‌ش برایێن وێ، نادیایا كو ژیێ وێ 23 بهار ده‌رباز نه‌كرین توشى ره‌ڤاندن و ده‌ستدرێژیا سكسى و ده‌ستدرێژیا له‌شى بویه‌، نادیایێ ل ده‌مێ ڤه‌گوهاستنا چیروكا خوه‌ دا به‌رامبه‌ر جڤاتا ئێمناهیا نێڤده‌وله‌تى دا ل سالا 2015 شیا بره‌نگه‌كێ مه‌زن ئێش و ئازارێن كچ و ژنێن ئێزدى بگه‌هینیته‌ جیهانێ و شه‌ره‌ڤا ژنێن ئێزدى و پیروزیا وان بكه‌ته‌ كه‌یسه‌كا نێڤده‌وله‌تى و ببیتى بالیوزا نه‌ته‌وێن ئێكگرتى بو نه‌هێلانا بێهوشكه‌ران و گونه‌هباریان بو ئاشتیێ كو ئه‌ڤه‌ ئێكه‌م جاره‌ ئه‌ڤ سیفه‌ته‌ ب كه‌سه‌كى بهێته‌ دان، بڤێ یه‌كێ نادیا دشێت فشاره‌كا مه‌زنتر بدانیته‌ سه‌ر وه‌لاتێن جیهانێ بو جینوساید ناساندنا كه‌یسا كوردێن ئێزدى و د هه‌مان ده‌م دا ژ بوى رزگاركرنا ئه‌و كچ و ژنێن ماینه‌ ل بن ده‌ستێ ڤێ رێكخراوا تیرورستى، نادیایێ پیڤه‌رێن شه‌ره‌فێ ل جیهانێ گوهارتن وه‌كو ژنه‌ك پر شه‌ره‌ف هاته‌ به‌رده‌م جیهانێ هه‌میێ و گوت به‌لێ ئه‌ز توشى ده‌ستدرێژیێ بووم به‌لێ ده‌ستدرێژیا بكوم دگه‌ل من هاته‌ كرن و به‌لێ ئه‌ز كچه‌ك پر شه‌ره‌فم، ژ به‌ركو شه‌ره‌ف نه‌ به‌شه‌كێ له‌شێ ژنێ یه‌ به‌لكو شه‌ره‌ف هه‌ست ب رومه‌تى و مروڤایه‌تیێ یه‌ شه‌ره‌ف گوتن و كریارێن مروڤى نه‌ سوز و راستگوییا مروڤانه‌، شه‌ره‌ف كاركرنه‌ ژ بوى بلند راگرتنا مرۆڤایه‌تیێ.

80

خێزان ئانكو ئه‌و بنگه‌هێ دوو هه‌ڤژین پێك دئینن و دبیته‌ مالگه‌هه‌ك به‌رفره‌ه، و چه‌ند كه‌سه‌ك تێدا په‌یدا دبن و په‌یوه‌ندیه‌كا گه‌له‌ك بهێز و پێدڤی د ناڤبه‌را واندا هه‌یه‌ ئه‌و ژی په‌یوه‌ندیا ئێك خێزانی یه‌ ئانكو خووشكینی و براینی یه‌، گه‌له‌ك جاران دایك و باب نوزانن كو ئه‌ڤ كه‌سێن ئه‌و په‌روه‌رده‌ دكه‌ن ره‌نگه‌ ل پاشه‌روَژێ ببنه‌ نێزیكترین كه‌سێن ئێك یان مه‌زنترین دوژمنێن ئێك!
د بابه‌تێ خووشكینی و بارینیێ دا چه‌ره‌سه‌ریه‌ك مام ناوه‌ند نینه‌، یان ئه‌ڤ په‌یوه‌ندیه‌ دێ بیته‌ نێزیكترین په‌یوه‌ندی و دێ وه‌كه‌ت كو ئه‌ڤ كه‌سه‌ ببنه‌ تمامكه‌رێن هه‌ڤ و هاریكار و هه‌ڤكار ژبوَ سه‌ركه‌فتنێن ئێك یان ژی دێ ئه‌ڤ كه‌سه‌ بنه‌ مه‌زنترین دوژمنێن هه‌ڤ چونكی دوژمنێ ته‌ ژ نێزیك دنیاسیت هه‌موو خالێن بهێز و لاوازێن ته‌ ژ به‌ركرینه‌ و دزانیت كه‌نگی دژی ته‌ بكاربینیت، بنیاتێ ڤێ په‌یوه‌ندیێ دایك و باب په‌یدا دكه‌ن و ڤی هه‌ستی د ناڤا ڤان زاروَیان دا د خوَلقینن پاشی گه‌شه‌ پێدكه‌ن و ل پاشه‌روَژێ هه‌ر ئه‌و بخوه‌ به‌رهه‌مێ وێ دخوون.
گه‌له‌ك دایك و باب هه‌نه‌ جوداهیه‌كا سه‌یر د ناڤبه‌را زاروَیێن خوه‌ دا دكه‌ن هنده‌ك رسته‌ و په‌یڤێن كوژه‌ك د ناڤبه‌را واندا دبێژن مینا: سبحان الله ئه‌ڤ زاروَیه‌ ب زوَری خوه‌ خوه‌شتڤی دكه‌ت، ئه‌ز گوری بم چه‌ند یابمن ڤه‌ چووی نه‌وه‌كو خووشكا خوه‌ بیرامن ب خه‌سوا من دئینیت، ئه‌ڤه‌ یێ ساده‌ و نه‌ژیره‌، هه‌ر چ نوزانیت یێ بێ فامه‌. .. هه‌رچه‌نده‌ ئه‌ڤ په‌یڤه‌ ژ لایێ دایك و بابان بێ مه‌ره‌م ده‌ردكه‌ڤن و بوَ خوه‌ ئه‌و هنده‌ك ساخله‌تێن وان زاروَیان ب ده‌لیڤه‌ و هێجه‌ت دبنین ئانكو ئه‌ڤان په‌یڤا د ناڤبه‌را وان دا دبێژن و ئه‌ڤه‌ ب ڤێ چه‌ندێ ب دووماهی ناهێت به‌لكو دگه‌هیته‌ وێ رادێ كو وان راهێنان بكه‌ن ل دوَر ئینان و برنا ئاخفتنێن هه‌ڤ (فه‌سادی كرنێ) زێره‌ڤانیكرنا هه‌ڤ ب هێجه‌تا هندێ كو ئه‌و بزانن كا زاروَیێن وان ل پشت وان ڕا چ دكه‌ن، لێ ئه‌و نوزانن كو ئه‌و یێ گوَڕه‌پانه‌كێ به‌هه‌ڤدكه‌ت بوَ هه‌ڤڕكیه‌كا مێژویی د ڤێ خێزانێ دا كو گه‌له‌ك جاران ب هه‌رڤتنا خێزانێ ب دووماهی دهێت ئانكو ل ده‌مێ مه‌زن دبن بسالان پرسیارا هه‌ڤ ناكه‌ن و دگه‌ل ئێك نائاخڤن و ره‌نگه‌ هه‌ڤڕكیا هه‌ڤ ژی بكه‌ن.
دڤێت ئه‌م مه‌نده‌هوَش نه‌بین ل ده‌مێ كو ئه‌م خووشك و برایان ل دادگه‌هان به‌رامبه‌ر هه‌ڤ دبینین، گه‌له‌ك جاران ئه‌ڤه‌ به‌رهه‌مێ په‌روه‌رده‌كا سه‌قه‌ت و بێ مه‌ره‌ما دایك وبابانه‌، به‌رامبه‌ر ڤێ چه‌ندێ دایك و باب هه‌نه‌ زاروَیێن خوه‌ ب ره‌نگه‌كێ نموونه‌ییی په‌روه‌رده‌ كرینه‌ خێزانه‌كا هه‌ڤگرتی و سه‌ركه‌فتی پێك ئینایه‌ بوونه‌ جهێ شانازییێ بوَ هه‌ڤ و د كاودانێن مه‌زنێن ژیانێ دا سه‌رفه‌راز بوونه‌. ره‌نگه‌ گه‌له‌ك ژ مه‌ بێژن چ دایك و بابه‌ك نینن وه‌ك ئێك حه‌ز ژ زاروَیێن خوه‌ بكه‌ن و دێ هه‌ر جوداهیه‌ك هه‌بیت و ئه‌ڤ چه‌نده‌ یا نوَرماله‌ چونكی ڤیان هه‌سته‌كێ كیمیائی یه‌ د ناڤبه‌را مروڤان دا خوه‌ ئه‌گه‌ر ئه‌و زاروَیێن مروڤی ژی بن و رێژه‌یا ڤێ كیمیایێ كێمی و زێده‌هی و جوداهی هه‌یه‌، لێ خالا هه‌ره‌ گرنگ ئه‌وه‌ ل ڤێره‌ دایك و باب بزانن كا دێ چه‌وا شێن خالێن بهێز و لاواز یێن هه‌ر زاروَیه‌كێ خوه‌ د خزمه‌تا یێ دی دا بكاربئینن، بزانن چه‌وا ڤی زاروَیی فێری هندێ بكه‌ت و باوه‌ری ب خوه‌ هه‌بیت، و ب برایینی و خووشكینیا خوه‌ هه‌بیت خوه‌ ئه‌گه‌ر گه‌له‌ك جاران ئێك ژ خێزانێ سه‌ركه‌فتی تر بیت رامانا وێ ئه‌و نینه‌ كو یێن دی نه‌سه‌ركه‌فتی نه‌ به‌لكو سه‌ركه‌فتنا وی ب پشته‌ڤانی و سه‌ركه‌فتنا یین مایی تمام دبیتپه‌یوه‌ندیا خووشكینی و بارینییێ تامه‌ك تایبه‌ت هه‌یه‌ دڤێت ئه‌م هه‌می هه‌ولێن خوه‌ بده‌ین كو ئه‌م ڤێ یه‌كێ ژ ده‌ست نه‌ده‌ین.

website security