NO IORG
هه‌لبژارتى1

ئه‌ڤرۆ نیوز:

بریاره‌ ب مه‌به‌ستا دانوستاندنێ ده‌ربارێ پشكا هه‌رێما كوردستانێ ل بۆدجا 2021 یا عیراقێ شانده‌كێ حكومه‌تا هه‌رێمێ سه‌ره‌دانا به‌غدا بكه‌ت.

فارس عیسا نوونه‌رێ حكومه‌تا هه‌رێما كوردستانێ ل به‌غدا راگه‌هاند شانده‌ك ب سه‌رۆكاتیا ئاوات حه‌نابی وه‌زیرێ دارایی سه‌ره‌دانا به‌غدا دكه‌ت و ل گه‌ل لژنا دارایی یا جڤاتا نوونه‌رێن عیراقێ كۆم دبیت.

نوونه‌رێ حكومه‌تا هه‌رێما كوردستانێ ل به‌غدا ئه‌و چه‌نده‌ ژی دیاركر ئارمانجا سه‌ره‌دانێ دانوستاندنه‌ ل سه‌ر پشكا هه‌رێمێ ل بۆدجا عیراقێ كو نوكه‌ پرۆژه‌یێ یاسایێ ل جڤاتا نوونه‌رانه‌ و خواندنا ئێكێ بۆ هاتیه‌كرن.

فارس عیسای ئه‌و چه‌نده‌ ژی دا زانین هه‌تا نها چ ده‌مێن دیاریكری بۆ ئه‌وێ سه‌ره‌دانێ نه‌هاتینه‌ دانان.

ژمارا قوربانیێن تەقینا بەغدایا پایتەختێ عێراقێ زۆرن.

لیوا کازم بورهان، بەڕێڤەبەرێ گشتى یێ باژێرڤانیا بەغدا راگەهاند:
ژمارەیا قوربانیێن دوو تەقینێن باژێرێ بەغدا ری ل بلند بوونێ یە.

ناڤبری ئەو چەندەژی راگەهاند هەتانوکە ٢٨ کەس هاتینە کوشتن
زێدەتری ٧٣ کەس ژی برینداربوون.

بەڕێڤەبەرێ گشتى یێ باژێرڤانیا بەغدا راگەهاند ژی ئێک ل مەیدانا تەیاراندا بوو کو تێدا ١٣ کەس هاتنە کوشتن و ٢٢ ژی بریندار بوون.

 

ئەڤرۆ نیوز:
پشتى كۆمبوونا ئه‌ڤرۆ، یا مەسرور بارزانی، سەرۆکێ حوكمەتا ھەرێما کوردستانێ، ل گەل کونسول و دبلۆماتکار و نوونەرێن وەلاتێن بیانی ل ھەرێما کوردستانێ، د تویته‌كێ دا راگەھاندییه‌: ل حەفتیا بھێت شاندێ ھەرێما کوردستانێ دێ سەرەدانا بەغدا کەت .

سەرۆکێ حکومەتا هه‌رێمێ دیار کرییه‌ ژى: بۆ ئەنجامدانا گوتۆبێژان ل حەفتیا بھێت شاندێ ھەرێمێ دێ چیتە بەغدا، هه‌روه‌سا پشتەڤانیا حکومەتا ھەرێمێ بۆ ئەنجامدانا ھەلبژارتنێن پێشوەخت ژى ل عیراقێ دەربرییه‌.

ئەڤرۆ رۆژا چوارشەمبی ٢٠٢١/١/٢٠ د.عەلی تەتەر، پارێزگارێ دهۆکێ پێشوازی ل شاندەکێ بلندێ ئێکەتیا زانایێن ئاینێ ئیسلامێ ب سەروکاتیا د. عەبدولا مەلا سەعید وەیسی سەروکێ ئێکەتیا زانایێن ئاینێ ئیسلامێ ل هەرێما کوردستانێ کر.

دروینشتنێ ب بەرهەڤبوونا هژمارەکا زانایێن ئاینێ ئیسلامێ، سەرۆکێ ئێکەتیا زانایان راگەهاند: سۆپاسیا پارێزگارێ دهۆکێ دکەین ژبۆ پێشوازیا وی یا گەرم و هەماهەنگیا بەردەواما دگەل ئێکەتیا زانایان و رێڤەبەریێن پەیوەندیدار و دوپاتی ل گرنگیا پێکڤەژیانا ئاین و نەتەوان ب تایبەتی ل سنۆرێ پارێزگەها دهۆکێ کر.

پارێزگارێ دهۆکێ ژی پشتی بخێرهاتنا شاندێ مێهڤان رۆلێ زانایێن ئاینێ ئسلامێ دهەمی بیاڤان دا و ب تایبەتی دبزاڤا نەتەوەیی و نشتیمانیدا بلند نرخاند و دا دیارکرن بەردەوام مە پێدڤی ب هەماهەنگیا دگەل ئێکەتیا زانایان هەیە دهەمی بیاڤان دا و ب تایبەتی دپاراستنا پێکڤەژیانا ئاشتیانە یا هەمی پێکهاتە و نەتەوان.

ئەڤرۆ:

سەرۆکێ جڤاتا پارێزگەھا کەرکووکێ راگەھاند، ئەنجامدانا ھەلبژارتنان ل دەڤەرێن کوردستانی یێن دەرڤەی ئیدارا  ھەرێما کوردستانێ ب وی شێوە نوکە کو عەسکەرتاریەت ل وان دەڤەران یا زالە و ھەموو ددەستێ وان دایە و خەلک نەشێت ب ئازادی دەنگێ خوە بدەت، شەرعیەت بۆ نینە و دێ ھەلبژارتنێن نە دستووری و نە قانوونی بن.

رێبوار تالەبانی، سەرۆکێ جڤاتا پارێزگەھا کەرکووکێ گۆت” ل دووڤ وێ رەوشا ھەی، پێدڤیە ھەلبژارتن ل دەڤەرێن کوردستانی یێن دەرڤەی ھەرێما کوردستانێ نەھێنە ئەنجامدان، لەوما ھەر ھەلبژارتنەک ل وان دەڤەران ل بن رەوشا نوکە ھەی دێ ھەلبژارتنێن نە شەرعی و نە دستووری و نە قانوونی بن و ھەر تشتەکێ دی بھێتە گۆتن ل دۆر وێ چەندێ یێ زێدەیە، چونکە ئەو دەڤەر کێشە یێن ل سەر ھەین و پێدڤیە ب گۆرەی مادێ ١٤٠ ژ دستوورێ بەردەوامێ عیراقێ بھێنە ئێکلاکرن”.

رێبواری ئاماژە کر ژی کو نابیت ل ژێر عەسکەرتاریەتێ ھەلبژارتن بھێنە ئەنجامدان و ل کەرکووکێ ژی عەسکەرتاریەت یا ھەی و حەشدا شەعبی و لەشکرێ عیراقێ ل وێرێ یێن ھەین، ئەڤجا دێ چاوان خەلک شێت دەنگێ خوە دەت، چونکە ھەموو بریار ل وان دەڤەران د دەستێ وان دانە”.

ناڤبری دیارکر کو ژبلی وی چەندێ کۆمسیۆنا ھەلبژارتنان ژی د دەستێ کوردان دا نینە و د دەستێ عەسکەرتاریەتێ دایە ل وان دەڤەران، لەوما پێدڤیە پرسا وان دەڤەران ب گۆرەی دستووری بھێتە چارسەرکرن وبھێنە ئاساییکرن و خەلک ب ئازادی دەنگێ خوە بدەت، چونکە خەلک یێ ئازاد نینە و ل ژێر داگیرکاریێ دێ دەنگێ خوە دەت”.

ئه‌ڤرۆ نیوز:

ئه‌ڤرۆ 18/1/2021 به‌رێز د.على ته‌ته‌ر پارێزگارێ دهۆكێ پێشوازیا به‌رێز لیوا(نه‌زیر عاصم ئاغا) راگرێ ئه‌كادیمیا له‌شكرى یا زاخو و شاندێ دگه‌لدا كر. دهه‌ڤدیتنه‌كێ دا به‌حسێ ره‌وشا ده‌ڤه‌رێ و ره‌وشا ئه‌كادیمیا له‌شكرى ل زاخو و ڤه‌كرنا وان خۆل و وراهێنانان بۆ ئه‌ڤسه‌ر و پله‌دارێن پێشمه‌رگه‌يى و له‌شكرێ عیراقێ ڤه‌دكه‌ن ب گشتى هاته‌ كرن.

پارێزگارێ دهۆكێ رۆلێ ئه‌كادیمیا له‌شكرى یا زاخۆ به‌رز هه‌لسه‌نگاند ژ بۆ پێگه‌هاندن و په‌روه‌رده‌كرنا ئه‌فسه‌‌ر و پله‌دارێن هێزێن پێشمه‌رگێ كوردستانێ و عیراقێ ل سه‌ر بنه‌مایێن زانستى و ئه‌كادیمى و سه‌ركه‌فتن بۆ هه‌موویان خواست وپشته‌ڤانیا پارێزگه‌هێ نیشان دا بۆ هه‌ر هه‌ڤكاریه‌كێ.

ئەڤرۆ نیوز
لگۆری ئامارێن کومسیونا بلندا سەربەخویا هەلبژارتنێن عیراقێ هەتا نها زێدەتری 430 پارتان داخوازی بۆ خۆە تومارکرنێ ل کومسیونێ پێشکێشکرینە، کومسیونێ داخوازیا 128 پارتان رەتکریە و مۆلەت ژی دایە 225پارتان.
دوماهی هاتنا دەمێ تومارکرنا ناڤێ پارت و هەڤپەیمانیان ددەمەکی دایە، دەمێ بڕێڤەچوونا هەلبژارتنان کێمتر ژ پێنج هەیڤان مایە.

ئەڤرۆ نیوز:
کومسیونا بلندا هەلبژارتنێن عیراقێ دەمەکێ نوو بۆ ئەنجامدانا هەلبژارتنێن پێشوەخت پێشنیار دکەت .
میدیایێن عیراقی ژ چەند ژێدەرەکان بەلاڤکرینە، کومسیونا هەلبژارتنان ل عیراقێ د کۆمبوونا خوەیا دوماهیێ دا، هەر سێ سەروکایەتیێن عیراقێ و هێزێن سیاسی ئاگەهدارکرینە، کو بەرهەڤ نینن بۆ ئەنجامدانا هەلبژارتنێن پێشوەخت ل حوزەیرانا ئیسال، بەلکو پشتی هەیڤا ئەیلولێ دێ بەرهەڤ بن، ئەڤ چەندە ژلایێ پشکەکا لایەنێن سیاسی پشتەڤانی لێ دهێتەکرن.
ئاماژە ب وێ چەندێ هاتیەکرن ل چەند رۆژێن بهێت د کۆمبوونەکا نوو دا، دناڤبەرا کومسیونێ و هەر سێ سەرۆکایەتی و هێز و لایەنێن سیاسی هێتە برێڤەبرن بۆ دیارکرنا دەمەکێ نوو بۆ هەلبژارتنێن پێشوەخت.
د دوماهی کۆمبوونا سەرۆکاتیێن عیراقێ دا کو رۆژا دوشەمبێ ب بەرهەڤبوونا نوونەرێ کومسیونێ و نوونەرێ نەتەوەیێن ئێکگرتی ل عیراقێ هاتبووکرن، تەئکید ل سەر سەقایەکێ ئارام بۆ برێڤەچوونا هەلبژارتنێن پاقژ ل عیراقێ.

ئەڤرۆ:

رۆژانە 274 حالەتێن ژێکڤەبوونا هەڤژینان ل عیراقێ دهێتەتومارکرن، دوماهیا سالا بوری زێدەتری هەشت هزار ژێکڤەبوون هاتبوونە تومارکرن.
لگۆری ئامارەکا جڤاتا بلندا دادوەریا عیراقی، ل هەیڤا تشرینا دووێ یا سالابووری 8245 حالەتێن ژێکڤەبوونا هەڤژینان هاتیەتومارکرن، ل چاڤ هەر ئەوێ هەیڤا سالا 2019 حالەتێن ژێکڤەبوونێ زێدەتری 3181 زێدەبووینە.
لگوری ئەوێ ئامارا جڤاتا دادوەریا عیراقی ئاشکرا کری، رۆژانە 274 حالەتێن ژێکڤەبوونێ دهێنە تومارکرن کو د هەر دەمژمێرەکێ دا 11 ژێکڤەبوونێن هەڤژینان دهێنە تومارکرن، کو بلندترن رێژەیە د دیرۆکا عیراقێ دا.
هەروەسا هەیڤا تشرینا دووێ یاسالا 2020 نێزیکی38هزار گرێبەستێن هەڤژینیێ هاتینەتومارکرن، هەمان دهەمان دەمدا، سالا 2019 نێزیکی 25 هزار گرێبەست ل دادگەهان هاتینە تومارکرن.

ئه‌ڤرۆ نیوز:

جڤاتا وه‌زیران ئه‌ڤرۆ دێ ب سه‌رپه‌رشتیا مه‌سرور بارزانی سه‌رۆكێ حكومه‌تا هه‌رێما كوردستانێ بۆ دانوستاندنێ ل سه‌ر سێ مژاران كۆم دبیت.

فه‌رمانگه‌ها میدیا و زانیاریان د راگه‌هاندنه‌كێ دا مژارێن كۆمبوونا ئه‌ڤرۆ یا جڤاتا وه‌زیران ئاشكراكریه‌ ئه‌و ژی مژارێن:

  • ده‌رئه‌نجامێن كومبوونا جڤاتا ئابووری سه‌باره‌ت ب ره‌شنڤیسێ پرۆژه‌یێ بودجا هه‌رێما كوردستانێ بۆ سالا 2021.
  • پرسا رێكخستنا ئه‌وان خزمه‌تگۆزاریێن كۆ ل خالێن سنوری ژلایێ كه‌رتێ تایبه‌تڤه‌ دهێنه‌ پێشكێشكرن.
  • راپۆرتا فه‌رمنگه‌ها میدیا و زانیاریان سه‌باره‌ت ب هه‌وا به‌رهنگاربوونا كۆرۆنایێ.
website security
WP Facebook Auto Publish Powered By : XYZScripts.com