NO IORG
نووترين نووچه

ئەڤرۆ نیۆز، سالار دۆسكی:

درۆژانێن فلمە فیستەڤالا دهۆكێ‌ دا، ئەڤرۆ ئێڤاری هەر دو فلمێن(مرن بۆ ژیانێ‌) ژ دەرهێنانا (محەمەد ژووری) وفلمێ‌ (قوربان) ژ دەرهێنانا (رزگارحسێن) هاتنە نیشادان، فلمێ‌ پێشتر فلمێ‌ (مرن بۆ ژیانێ‌) بەحسێ‌ رۆلێ‌ مرۆڤاتیێ‌ نوشدارەكی دكەت كو دەمێ‌ هێرشێن داعشێ بۆ سەر شنگالێ‌ و ئاسێبوونا هندەك وەلاتیان ل چیایێ‌ شنگالێ، ئەو نوشدار قەستا وی جهی دكەت بۆ ئەنجامدانا كارێ‌ خوە یێ‌ مرۆڤاتیێ‌، فلمێ‌ (قوربان) بەحسێ‌ هندەك روودانێن جڤاكی دكر و كاریگەریا ئەوان روودانا و رەنگڤەدان ل سەر خێزانێ‌، پشتی ب دووماهی هاتنا هەر دو فلمان ئەڤرۆ نیۆز بۆچوونێ، چەند بەرهەڤبوویان وەرگرتن.

هونەرمەند شاهین كیفورك، بەحسێ‌ فلمێ‌ قوربانی كر وبۆ ئەڤرۆ نیۆز گۆت: هەلبژارتنا زارڤەكەران گەلەك یا جهێ‌ خوە دا بوو و تایبەت قارەمانێ‌ فلمی (حسێن حەسەن) بگشتی هەموویان رۆلێ‌ خوە دیت و كێشە هەیە دناڤ جڤاكێ‌ كوردی دا و ئەڤ چیرۆكە ل كەتوارێ‌ كوردی دا هەیە و دەست خوەش و هیڤی دارم فیستەڤال بەردەوام بیت ل دهۆكێ‌، پێشنیارا من ئەوە بەری فلمە فیستەڤالێ‌ راگەهاند رۆلەكێ‌ مەزن بگێریت و ئەو فلمێن فیستەڤالێ‌ پرۆپاكندە بەردەوام بۆ بهێتەكرن و دیاركەن كا ل كیش وەلاتی یە و چیرۆك چەوایە و ئەكتەر كی نە دێ‌ خەلك پتر حەزێ‌ كەت و دەست خوش بۆ ستافێ‌ فیستەڤالێ‌.

پارێزەر كاوار حەمید باڤی، بەحسێ‌ فلمێ‌ قوربانی كر دیاركر وەك بینەرەك خوەشیەك ژێ‌ دیت گۆت: گرنگە ئەڤ جورە فلمە بۆ جڤاكێ‌ مە بهێنە نیشادان و روودان گرێدایی بن زەلال بن و بابەتێ‌ گرنگ بوو و ئەڤ كێشە ل جڤاكێ‌ مە هەنە و دڤێت بهێنە چارەسەركرن، دیمەن بۆ دیمەنی گرێدانێن جوان تێدا هەبوون.

نیهاد سەعدۆللا، بۆ ئەڤرۆ نیۆز گۆت: مێژوویا مللەتێ‌ كورد بتنێ‌ تشتێ‌ خراب تێدا نینە و بەلكو تشتێ‌ باش ژی تێدا هەیە و پێدڤی یە روویێ‌ جوانێ‌ جڤاكی بهێتە نیشادان و هەتا دەسپێكا فیستەسڤالێ‌ ژی فلمەك هاتە نیشادان نێزیكی هەمان چیرۆكا فلمێ‌ قوربانی بوو مخابن هەر دەم ئەم كێماسیێن خوە نیشا خەلكی دەین.

سەعدوللا ئەو ژی گۆت: زارۆك هەردەم كەساتیەك دڤێت گەلەك نەرەم و حەلیم ل گەل دابی،  پێدڤی یە كەسەكێ‌ دەرنووسا ل گەل دەرهێنەری هەبا، زارۆك نوزاینت بابێ‌ وی یێ‌ ب كارە و دەست خوەش بۆ ستافێ‌ فیستەڤالێ‌.

وەحید سەعید چیچو، بینەرێ‌ دیتنا هەر دو فلمان بوو، بۆ ئەڤرۆ نیۆز گۆت: فلمێ‌ محەمەد ژووری دیمەنێن جوان تێدا هەبوون و خزمەتا ساخلەمیێ‌ وی تیمێ‌ كو خزمەتا خەلكی و پێشمەرگەهێ‌ قەهرەمان دكر ل چیایێ‌ شنگال و تشتەكێ‌ نموونە بوو.

وەحیدى بەحسێ‌ فلمێ‌ قوربانی ژی كۆ كو هەر ئەڤرۆ بینەرێ‌ وی فلمی بوو گۆت: فلم هەموو روودانێن جڤاكی بوو و شیا گەلەك گرێكێن جڤاكی ڤەكەتن و پێكڤە گرێدەت و كارەكێ‌ نموونە بوو و حەز فیستەڤالێ‌ دكەم و سال بۆ سالێ‌ فیستەڤالا دهۆك یا باشترە و فلمێن باش تێدا هەنە و رۆژ بۆ رۆژێ‌ بینەرێ‌ سینەمایێ‌ زێدەبیت و ئەڤرۆ هول هەموو تژی بوون.

جهێ‌ ئاماژەكرنێ‌ یە كو فلمێ‌ ( قوربان) ژ قارەمانیا هونەرمەند (حسێن حەسەن) ژ دەرهێنانا (رزگار حسێن) ئەڤرۆ بۆ جارا ئێكێ‌ ل دهۆكێ‌ هاتە نیشادان، دەرهێنەرێ‌ فلمی پێشتر ژی ئاشكراكر بوو كو فلمێ‌ (قوربان) ل (35) مین فلمە فیستەڤالا نیڤدەولەتی یا بۆگوتا ل وەلاتێ‌ كولومپیا ل گەل شەش فلمێن دی یێن وەلاتێن (بەرازیل، پیرۆ، مەكسیك، كوریا باشور، ئیگوادور) دبەریكانێ‌ دایە، دیسا ل پشكا بەریكانێ‌ یا فیستەڤالا (بەیرۆتێ‌)  وفیستەڤالا نیڤدەولەتی یا (جاگارتا) ل ئەندنوسیا ول فیستەڤالا نیڤدەولەتی Film Festival Luchezarny Angel ل وەلاتێ‌ روسیا پشكدارە.

دەرهێنەرێ‌ فلمی دیاركر كو ماوێ‌ فلمی (63) خولەكن و ئەكتەرێ‌ سەرەكیێ‌ فلمی هونەرمەندێ‌ كورد(حسێن حەسەن) وگەلەك هونەرمەندێن دەڤەرا بەهدینان تێدا دپشكدارن وەكو (عەمەر توڤی، ماجد وەیسی، عادل عەبدوالرحمان، عەبدوالسلام سلێمان) وبەرهەمهێنەرێ‌ فلمی، خودێ‌ ژێ‌ رازی(یوسف حسێن)ە، كامیرە (مەنسور زوهوری) هاریكارێ‌ دەرهێنەری(حەسەن حسێن)ە مونتێر( مەیسەم كەمالی) مۆزیك(روزبە موسلح) دیزاین(هاشم شاجی) دەنگ(سەردار بابەكر) رەنگ(هوتەن حەقشناس) رێڤەبەرێ‌ بەرهەمی (رزگار عەبدۆللا).

هەڤدەم، فلمێ‌ دوكومێنتاری (مرن بۆ ژیانێ‌) كو ژ دەرهێنانا (محەمەد ژووری) بوویە ماوێ‌ وی (54) خولەك بوون، دەرهێنەرێ‌ فلمی بۆ ئەڤرۆ نیۆز ئاشكراكر كو ب رێكا كومپانیەكێ‌ ل وەلاتێ‌ ئەلمانیا ل چەندین فیستەڤالێن جیهانێ‌ دهێتە بەلاڤەكرن، ئەڤرۆ بۆ جارا ئێكێ‌ ل فلمە فیستەڤالا دهۆك یا شەشێ‌ دا هاتە نیشادان

محەمەد ژووری دەرهێنەرێ‌ فلمێ‌(مرن بۆ ژیانێ‌) گۆت ژی: فلم بەرهەمێ‌ هەر دو وەلاتێن(كوردستانێ‌ و ئەلمانیا)یە و قارەمانێن فلمی پتری دكتورن، قارەمانێ‌ فلمی(د.هشیار عیسا) یە كا چەوا ل شەرێ‌ داعش هاریكاریا خەلكی و پێشمەرگەی كریە و هەمان دەم ئمبلانسان، خەلاتەكێ‌ مەزنە ل فیستەڤالا دهوكێ‌ دا هاتیە وەرگرتن

هەر ژ دەسپێكا سالا 2014 ئانكو هاتنا داعش هەتا ب دووماهی هاتنا داعش فلم هاتیە وێنەكرن كو دبیتە نێزیكی چار سال و نیڤان، هەموو قوناغێن هەر چار سالێن سەخت هاتینە دیاركرن، فلم ل سەر ژیانا دكتورەكی یە كو ل دەسپێكا روودانێن داعش چوویە چیایێ‌ شنگالێ‌ بۆ خزمەتكرنا خەلكی و تووشی گەلەك مەترسیا دبیت، (رێبەر محەمەد) پشتەڤانیا فلمی كریە و تایبەت ل دەمێ‌ مونتاژكرنێ‌ دا،

دەرهێنەرێ‌ فلمی ئەو ژی ئاشكراكر كو (محەمەد ژووری، چەكڤان ئامێدی) ب كارێ‌ وێنەگرتنێ‌ رابووینە، مونتاژ (هەكار عەبدالقادر) دەنگ و رەنگ ل كومپانیا (پرێت فلم) ل هەولێرێ‌ هاتیە دروستكرن.

جهێ‌ ئاماژەكرنێ‌ یە كو ئەڤ بەرهەمە دبیتە بەرهەمێ‌ پێنجێ‌ كو محەمەد ژووری ب  دەرهێنانێ‌ رادبیت، هەتا نوكە ب بەرهەمێن بوری هەشت خەلات ل وەلاتێن جودا ل سەر ئاستێ‌ جیهانێ‌ وەرگرتینە.

ئه‌ڤرۆ ، زنار تۆڤى:

زه‌رده‌شت بابان شیره‌تكارێ كۆماریان ل ئه‌مریكا بۆ رۆژناما ئه‌ڤرۆ دیاركر: ستراتیجیه‌تا نوكه‌ یا ئه‌مریكا ل عیراقێ به‌رده‌وامبوونا پرۆسا سیاسى و هه‌بوونا سه‌قامگیریێ و ئارامبوونا عیراقێ و ڤێ ده‌ڤه‌رێ یه‌، هه‌روه‌سا ژناڤبرنا گرۆپێن تیرورستى و كێمكرن و نه‌هێلانا هه‌ژمۆنا ئیرانێ یه‌ ل عیراقێ، ئه‌مریكا پشتا خوه‌ نه‌دایه‌ كوردان، لێ ژبه‌ركو عیراق ده‌وله‌ته‌ ئه‌مریكا پتر مامه‌لێ ل گه‌ل حوكمه‌تا عیراقێ دكه‌ت، هه‌روه‌سا لدووڤ قانوونێن نێڤده‌وله‌تى ژى مامه‌لا ئه‌مریكا ل گه‌ل حوكمه‌تان دایه‌ و دیسا ل عیراقێ حوكمه‌ت د ده‌ستێ كێ دابیت، ئه‌مریكا دێ مامه‌لێ ل گه‌ل وى دا كه‌ت، دیسا ده‌رباره‌ى ریفراندۆمێ ژى ئه‌مریكا وه‌كو كێشه‌كا نافخوه‌ به‌رێ خوه‌ دایێ و پشتگیریا چو لایه‌نان نه‌كر دڤى وارى دا، ژبه‌ركو نابیت ئه‌مریكا مایتێكرنێ تێدا بكه‌ت، چونكى عیراق وه‌لاته‌كێ سه‌ربه‌خۆیه‌، دیسا ئه‌مریكا نه‌ڤیا هاریكاریا لایه‌نه‌كێ بكه‌ت و هاریكاریا لایه‌نێ دیتر نه‌كه‌ت، واشنتۆن ژى بابه‌تێ ریفراندۆمێ ب بابه‌ته‌كێ نافخۆیا عیراقێ ددانا، نه‌ وه‌كو كێشه‌كێ به‌رێ خوه‌ ددایێ كو په‌یوه‌ندى ب به‌رژه‌وه‌ندیا ئه‌مریكا ڤه‌ هه‌بیت، له‌وما ئه‌مریكا مایێ خوه‌ دڤى بابه‌تى نه‌كر.

ناڤهاتى دیاركر ژى: بۆ دروستكرنا حوكمه‌تا عیراقێ یا ڤێ جارێ ئه‌مریكا پشتگیریا چو لایه‌نان نه‌كر و ڤیتۆ ژى هه‌مبه‌رى كه‌سێ بكار نه‌ئینا، لێ ئه‌مریكا ل عیراقێ لدووڤ ئێك تشت دا دگه‌ریت، ئه‌و ژى هه‌بوونا ئارامیێ و سه‌قامگیریێ یه‌، ژ پێخه‌مه‌ت بشێت به‌رژه‌وه‌ندێن خوه‌ یێن له‌شكه‌رى و سیاسى ل عیراقێ و ڤێ ده‌ڤه‌رێ بپارێزیت، له‌ما یا پێدڤى ئه‌وه‌ كو هه‌ر كه‌سێ ببیته‌ سه‌رۆك وه‌زیر بشێت به‌رژه‌وه‌ندیێن ئه‌مریكا بپارێزیت.

هێشتا دیاركر: دڤێت ده‌مێ په‌رله‌مانتارێن كورد دچنه‌ به‌غدا ل سه‌ر به‌رژه‌وه‌ندیا وى خه‌لكێ ده‌نگێ خوه‌ دایێ كار بكه‌ن، هه‌ر چه‌نده‌ هنده‌ك جاران دبیت به‌رژه‌وه‌ندیێن نه‌ته‌وه‌یى ببنه‌ به‌رژه‌وه‌ندیێن حزبى و ناڤچه‌یى ژى، كو ئه‌ڤ چه‌نده‌ ل ئه‌مریكا ژى هه‌یه‌، لێ دڤێت هه‌ر نوونه‌ریا خه‌لكێ ده‌ڤه‌را خوه‌ بكه‌ت، هه‌روه‌سا هنگێ دێ سیاسه‌تا كوردان ل هه‌مبه‌رى عیراقێ یا سه‌ركه‌فتى بیت، ده‌مێ هژمارا كورسیێن كوردان ل په‌رله‌مانێ عیراقێ دا زێده‌ ببن و بشێن داخوازیێن خوه‌ ب سه‌پینیت ب سه‌ر حوكمه‌تا عیراقێ دا، هه‌روه‌سا ب ڤێ هژمارا نوكه‌ یا په‌رله‌مانتارێن كورد، هه‌كه‌ هه‌موو د ئێك ده‌نگ بن ژى نه‌شێن وێ كاریگه‌ریا هندا مه‌زن ل سه‌ر حوكه‌تا عیراقێ دا دروست بكه‌ن.

زه‌رده‌شتى ئه‌و ژى دیاركر: لدووڤ راپۆرتێن نه‌ته‌وێن ئێكگرتى و ئه‌مریكا ژى عیراق ب وه‌لاته‌كێ شكستخوارى دهێته‌ نیاسین، له‌وما دێ گه‌له‌ك یا ب زه‌حمه‌ت بیت كو كورد ب چنه‌ به‌غدا و داخوازا مافێ خوه‌ ژ وه‌لاته‌كێ رووخیاى و خودانا ئابووره‌كێ بێ هێز بكه‌ن، دیسا گه‌له‌ك گه‌نده‌لى ل عیراقێ هه‌یه‌ و ره‌وشا ئێمناهیێ گه‌له‌كا خرابه‌، هه‌روه‌سا هه‌ر ده‌مێ عیراق ئارام و سه‌قامگیر بیت و داعش و هه‌ژمۆنا ئیرانێ ل سه‌ر عیراقێ نه‌مینیت، هنگێ دێ به‌رژه‌وه‌ندیێن كوردان ژى پێشكه‌فتنێ ب خوه‌ڤه‌ بینن، لێ هندى ب ڤى ره‌نگێ نوكه‌ بیت، كورد نه‌شێن ل به‌غدا چو ب ده‌ست خوه‌ڤه‌ بێخن.

د به‌رده‌اوامیا ئاخفتنا خوه‌ دا ئه‌و ژى خویاكر: حوكمه‌تا نوكه‌ عیراقێ یا سه‌ركه‌فتیتر نابیت ژ یێن به‌رى خوه‌، چونكى ئه‌و ئاریشێن به‌رى نوكه‌ هه‌ین، هێشتا ئه‌و ئاریشه‌ هه‌موو ماینه‌ و چاره‌نه‌بووینه‌، ل داهاتى ژى دێ هه‌بن، چونكى هێشتا عیراقێ كێشا ئاڤێ و كاره‌بێ و ئێمناهیێ هه‌یه‌، دیسا عیراقێ كێشا گرۆپێن تیرۆرستى و توندره‌و و داعشێ و كێشا سوننه‌ و شیعه‌یان و هه‌ژمۆنا ئیرانێ هه‌یه‌، دیسا كێشا به‌رژه‌وه‌ندیێن ئه‌مریكا هه‌یه‌، ئه‌ڤ كێشه‌ هه‌موو وه‌كو خوه‌ ماینه‌ و هندى ئه‌ڤ كێشه‌ چاره‌سه‌رنه‌بن، هه‌ر كه‌سێ ببیته‌ سه‌رۆك وه‌زیرێ عیراقێ نه‌شێت ئه‌ڤان كێشان چاره‌سه‌ر بكه‌ت، له‌وما عیراق به‌ره‌ف پێشڤه‌ ناچیت.

ل دووماهیێ ئه‌و ژى دیاركر: ئه‌مریكا دبلۆماسیه‌تێ ل سه‌ر بنه‌مایێ به‌رژه‌وه‌ندیێن خوه‌ دكه‌ت، له‌وما نابیت كورد ل گه‌ل ئه‌مریكا ل سه‌ر بنه‌مایێ هندێ سیاسه‌تێ بكه‌ن، كو ئه‌مریكا بگه‌هیته‌ ئارمانجێن خوه‌ و كورد نه‌گه‌هنێ، دیسا ده‌مێ كورد به‌رژه‌وه‌ندیێن خوه‌ دبه‌ستن ل گه‌ل یێن ئه‌مریكا و هه‌ر ده‌مێ به‌رژه‌وه‌ندیێن وان هاتنه‌ جه و دڤێت یێن كوردان ژى بهێنه‌ بجهئینان و هه‌ر چه‌نده‌ هه‌كه‌ كورد وه‌كهه‌ڤ ژى نه‌بن ل گه‌ل وێ هه‌ڤپه‌یمانیێ، لێ دڤێت كورد گه‌له‌ك دنزم ژى نه‌بن، بۆ هندێ د داهاتى دا بشێین دبلۆماسیه‌ته‌كا باشتر ل گه‌ل ئه‌مریكا بكه‌ین، دڤێت ئه‌م گه‌له‌ك د هشیار بین كو كارێ مه‌ یێ سیاسى و ره‌فتارێن مه‌ یێن دبلۆماسى ل سه‌ر بنه‌مایێ تێگه‌هشتنا كه‌لتۆرێ ئه‌مریكا بیت، ژ پێخه‌مه‌ت بشێین ره‌فتارێن دبلۆماسى ل گه‌ل وان دا بكه‌ین، هه‌روه‌سا نوكه‌ سیاسه‌تا تره‌مپى ب تنێ د به‌رژه‌وه‌ندا ئه‌مریكا دایه‌ و د به‌رژه‌وه‌ندا كه‌سێ دیتر دا نینه‌، دیسا چو حوكمه‌ت و ئیدارێن ئه‌مریكا د به‌رژه‌وه‌ندا خه‌لكێ دیتر دا كار ناكه‌ن، له‌وما دڤێت كوردان شاره‌زایى د كه‌لتۆر و دبلۆماسیه‌تا ئه‌مریكا هه‌بیت، ژ پێخه‌مه‌ت بشێت بۆ خوه‌ مفاى ژ سیاسه‌تا وێ وه‌ربگرن.

ئه‌ڤرۆنيوز:

رۆژنامه‌كا ئيسپانى به‌لاڤكر كو راهێنه‌رێ به‌رێ يێ ريال مه‌دريد زێندين زێدان رێككه‌فتنه‌ك ل گه‌ل فلورينتينۆ بيرێز سه‌رۆكێ يانێ هه‌بوو بۆ فرۆتنا ياريكه‌رێ ويلزى گاريس بيل ل ده‌مێ ڤه‌گوهاستنا هاڤينێ يێ ياريكه‌ران.

رۆژناما ( باييس) يا ئيسپانى دياركر كو بيرێز ژ وێ رێككه‌فتنا ل گه‌ل زێدانێ لێڤه‌بوو ژئه‌گه‌رێ رۆلێ ئێكلاكه‌ر يێ گاريس بيلى ل ياريا دووماهيێ ژخۆلا قاره‌مانێن ئورۆپا ل به‌رامبه‌ر لێڤه‌رپۆل كو تێدا ريال ب ئه‌نجامێ 3-1 ب سه‌ركه‌فتى.

دياركر ژى كو پشتى كاريس بيل گۆله‌كا په‌هله‌وانى دوێ ياريێ دا تۆماركرى، بيرێزى گۆت كو گاريس بيل ژ رونالدۆى باشتربوو ژبه‌ركو بيل ل ياريێن ئێكلاكه‌ر گۆلان تۆمار دكه‌ت.

رۆژنامێ ئاماژه‌ كر كو زێدانى هه‌ست ب بێزاريێ كر پشتى بيرێز لێڤه‌بووى ژ فرۆتنا ياريكه‌رێ ويلزى.

ئه‌ڤرۆ نیوز ، نه‌وزاد هلۆرى:

ب مه‌ره‌ما به‌رچاڤكرنا خوارنێن كورده‌وارى و خومالى ، كولیژا چاندنێ ل زانكویا سه‌لاحه‌دین ل هه‌ولێرێ ، رابوو ب ڤه‌كرنا ڤیسته‌ڤاله‌كا تایبه‌ت دڤى بیاڤى دا و هژماره‌كا زور یا خوارن و شیریناهیێن كورده‌وارى و خومالى هاتنه‌ به‌رچاڤكرن.

دكتور رابه‌ر فه‌تاح، ماموستایێ زانكویا سه‌لاحه‌دین و كولیژا چاندنێ بو ئه‌ڤرۆ نیوز گۆت: (ب مه‌ره‌ما به‌رچاڤكرنا خوارنێن كورده‌وارى و خومالى ، كولیژا چاندنێ ل زانكویا سه‌لاحه‌دین ل هه‌ولێرێ ، رابوو ب ڤه‌كرنا ڤیسته‌ڤاله‌كا تایبه‌ت دڤى بیاڤى دا و هژماره‌كا زور یا خوارن و شیریناهیێن كورده‌وارى و خومالى هاتنه‌ به‌رچاڤكرن).

زێده‌تر گۆت: (د ڤیسته‌ڤالێ دا هه‌ر قوتابیه‌كێ ب گوره‌ى شیانێن خوه‌ خوارن و شیریناهیێن خومالى درۆستكرن ، و ئه‌ڤ یه‌ك ژى كاره‌كێ باشه‌ و قوتابى دێ زێده‌تر پالده‌ت كو ب شێوازه‌كێ زانستى و ل په‌ى باوه‌رنامه‌یێن خوه‌ بنه‌ خودانكار و پێشه‌ و كه‌سه‌كێ به‌رهه‌مدار نه‌ك بتنێ بو خوه‌ به‌لكو بو ده‌روبه‌رێن خوه‌ ژى ، و ژلایه‌كێ دى ڤه‌ ئه‌ڤ یه‌ك ده‌رفه‌ته‌كا باشه‌ كو دڤێت به‌رپرس و ده‌ستهه‌لاتدار كار لسه‌ر ڤێ یه‌كێ بكه‌ن و ب گرنگى ڤه‌ سه‌حا كولیژا چاندنێ بكه‌ن و گرنگیێ پێ بده‌ن و كادرێن شاره‌زا پێ بگه‌هینن و بڤێ یه‌كێ هژماره‌كا گه‌نجان دێ بنه‌ خودانكار و پێشه‌ ، و هه‌ڤده‌م به‌رهه‌مێن خومالى و كورده‌وارى ژى دێ زێده‌تر به‌ر ب پێشڤه‌ چن).

44559392_404451356757752_6610470412511870976_n 44579018_311335093015387_6921781560660197376_n 44611076_248616575821045_7553952338055004160_n (1) 44652788_338173836958250_5809072683794563072_n 44693892_424327168100077_1848377023085412352_n

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ مه‌سرور بارزانى ئه‌ڤرۆ سێشه‌مبى 23/10/2018 پێشوازى ل رامۆن بلاكوا باليۆزێ ئێكه‌تيا ئه‌ورۆپى ل عيراقێ كر.

دديداره‌كێ دا زێده‌بارى به‌حسكرنا بزاڤ وپێنگاڤێن پێكئينانا كابينا نوو يا حوكمه‌تا عيراقێ وپێشڤه‌چوونێن سياسى وله‌شكرى يێن ده‌ڤه‌رێ، دانوستاندن ل دۆر په‌يوه‌نديێن هه‌رێما كوردستانێ وئێكه‌تيا ئه‌ورۆپى وهه‌لبژارتنێن ڤێ دووماهيێ يێن هه‌رێما كوردستانێ هاته‌ كرن.

سه‌باره‌ت بزاڤێن پێكئينانا حوكمه‌تا عيراقى يا نوو، مه‌سرور بارزانى ئاماژه‌ كر كو پشته‌ڤانيێ ل پێنگاڤێن عادل عه‌بدولمه‌هدى دكه‌ين و ل سه‌ر بنه‌مايێ پشكداريكرنا ئێكسان دناڤبه‌را پێكهاتێن سه‌ره‌كى ددانوستاندنێن خوه‌ دا دبه‌رده‌وامين وراگه‌هاند” پێدڤيه‌ هه‌رێما كوردستانێ رۆلێ پشكداريا راسته‌قينه‌ دبريارێن سياسى وله‌شكرى وئێمناهى دا هه‌بيت”.

دپشكه‌كا دى يا ديدارێ دا به‌حس ل رۆلێ دستوورى دچاره‌كرنا كێشان، ب تايبه‌تى ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ هاته‌ كرن، ل دۆر وێ چه‌ندێ شيره‌تكارێ جڤاتا ئاسايشا هه‌رێما كوردستانێ گۆت” مادێ 140 يێ دستوورى كليلا چاره‌سه‌ركرنا كێشێن دناڤبه‌را به‌غدا وهه‌رێما كوردستانێ يه‌ وئه‌ڤ چاره‌سه‌ريه‌ دێ بيته‌ بنه‌مايه‌ك بۆ چاره‌سه‌ركرنا پرسێن هه‌لاويستى وه‌كو قانوونا په‌ترۆلێ وغازێ وبودجا پێشمه‌رگه‌ى”.

ل دۆر پێكئينانا حوكمه‌تا نوو يا هه‌رێما كوردستانێ، مه‌سرور بارزانى رۆهنكر كو دخوازن ل سه‌ر بنه‌مايێ ئه‌نجامێن هه‌لبژارتنان حوكمه‌ته‌كا ب هێز دروست بكه‌ن.

باليۆزێ ئێكه‌تيا ئه‌ورۆپى پيرۆزباهيا سه‌ركه‌فتنا ئه‌نجامدانا پرۆسا هه‌لبژارتنێن په‌رله‌مانێ كوردستانێ ل مه‌سرور بارزانى كر وراگه‌هاند كو ئه‌نجام دێ بنه‌ چارچۆڤه‌كێ قانوونى بۆ كوردستانه‌كا ب هێز وسه‌قامگير، هه‌روه‌سا ئاماژه‌ ب بزاڤێن ئێكه‌تيا ئه‌ورۆپى كر بۆ هاريكاريا هه‌رێما كوردستانێ ودياركر كو ئێكه‌تيا ئه‌ورۆپى ددانوستاندنه‌كا به‌رده‌وام دايه‌ بۆ هاريكاريا كوردستانێ ژ روويێ پرۆسا چاكسازيێ ورێكخستنا هێزێن له‌شكرى وئێمناهيێ يێن كوردستانێ.

ئه‌ڤرۆنيوز:

رۆژناما (ئيسرائيل هيوم) يا ئيسرائيلى ئه‌ڤرۆ سێشه‌مبى 23/10/2018 دراپۆرته‌كێ دا ئاشكراكر كو ده‌زگه‌هێ هه‌والگيريا ئيسرائيلێ (مۆساد) ته‌ئكيد كريه‌ كو عيراق دكه‌ڤيته‌ هێلا روو ب رووبوونێ دناڤبه‌را ئيسرائيلێ وئيرانێ.

وێ رۆژناما ئيسرائيلى دياركر كو مۆسادێ پێزانين بده‌ستخوه‌ خستينه‌ كو ئيران كارگه‌هه‌كا دروستكرنا مووشه‌كێن باليستى ل عيراقێ ژى دروست دكه‌ت نه‌كو تنێ ل سووريێ ولوبنانێ.

دراپۆرتا وێ رۆژنامێ دا هاتيه‌”ئيرانێ مووشه‌ك راده‌ستى هێزێن شيعى يێن عيراقى كرينه‌ وهاريكاريا وان ژى كريه‌ كو دناڤ ئاخا عيراقێ دا كارگه‌ها دروستكرنا مووشه‌كان دابمه‌زرينن”.

ئه‌ڤرۆنيوز:

سه‌رۆك مه‌سعود بارزانى ئه‌ڤرۆ سێشه‌مبى 23/10/2018 پێشوازى ل شانده‌كێ جڤاتا مه‌ده‌نى يا رزگاركرنا عه‌فرينێ ل ده‌رڤه‌ كر.

ددياره‌كێ دا شاندێ مێهڤان پيرۆزباهيا سه‌ركه‌فتنا ليستا پارتى ديموكراتى كوردستان ل هه‌لبژارتنێن په‌رله‌مانێ كوردستانێ ل سه‌رۆك بارزانى كر وراگه‌هاند كو ب سه‌ركه‌فتنا پارتى دسه‌ر بلندن وسه‌ركه‌فتنا پارتى جهێ ئومێدا هه‌موو لايه‌كى يه‌.

هه‌ر دوێ كۆمبوونێ دا ره‌وشا سياسى ومرۆڤايه‌تى ل عه‌فرينێ وره‌وشا ئاكنجيێن عه‌فرينێ وئاواران وهه‌روه‌سا گه‌فێن گوهۆرينا ديموگرافيا وى باژێرى ژلايێ هێزێن جۆراوجۆر ڤه‌ هاته‌ به‌حسكرن وشاندێ مێهڤان سه‌رۆك بارزانى ل هوورده‌كاريێن ئازاردانا خه‌لكى وپێشێلكاريێن ل دژى كوردان ل وێ ده‌ڤه‌رێ ئاگه‌هداركر وگازنده‌ ژى ژ جڤاكێ نێڤده‌لوه‌تى كر كو چاڤپۆشى ل وان پێشێلكاريان كريه‌ كو دژى خه‌لك وسروشتێ عه‌فرينێ دهێنه‌ كرن.

سه‌رۆك بارزانى نێگه‌رانيا خوه‌ ل سه‌ر پاشه‌رۆژا رۆژئاڤايێ كوردستانێ وره‌وشا عه‌فرينێ دياركر ورۆهنكر كو عه‌فرين ژى پشكه‌كا وان زنجيره‌ كاره‌سات وسته‌مكاريايه‌ كو دژى گه‌لێ كوردستانێ ل ده‌مێن بۆرى هاتيه‌ كرن،

ئه‌ڤرۆنيوز:

رێڤه‌به‌ريا ئاڤێ ل پارێزگه‌ها سلێمانيێ گرێدانا پيڤه‌رێن ئاڤا مالان راگرت.

ل دووڤ مالپه‌ێ كوردستان تى ڤى، رێڤه‌به‌ريا ئاڤێ ل پارێزگه‌ها سلێمانيێ ب برياره‌كا رێڤه‌به‌ريا گشتى يا ئاڤێ بۆ ده‌مه‌كێ به‌روه‌خت گرێدانا پيڤه‌رێن ئاڤا مالان راگرت.

رێڤه‌به‌ريا ئاڤا سلێمانيێ دياركريه‌ كو ل ده‌مێ ده‌ستپێكرنا كاركرنێ د گريدانا پيڤه‌رێن ئاڤا مالان، دێ وه‌لاتيان ئاگه‌هداركه‌ت.

ئه‌ڤرۆنيوز:

وه‌زاره‌تا كاره‌بێ ل هه‌رێما كوردستانێ راگه‌هاند، ڤه‌كۆلينه‌كا زانستى يا نوشدارى په‌يوه‌نديێ دناڤبه‌را نه‌خوه‌شيا په‌نجه‌شێرێ وكاره‌بێ ئاشكرا دكه‌ت.

وه‌زاره‌تا كاره‌بێ دبه‌رپه‌ري خوه‌ دا ل سه‌ر تۆرا جڤاكى يا فه‌يسبووكى به‌لاڤكر” دڤه‌كۆلينه‌كا زانستى دا هاتيه‌ كو په‌يوه‌نديه‌كا كاريگه‌ر يا خراب يا هه‌ى دناڤبه‌را كاره‌بێ ونه‌خوه‌شيا په‌نجه‌شێرێ ودياركريه‌ كو بكارئينانا زۆر يا كاره‌بێ دێ بيته‌ ئه‌گه‌رێ زێده‌بوونا بكارئينانا موه‌ليدان وويستگه‌هێن به‌رهه‌مئينانا كاره‌بێ وب ڤێ چه‌ندێ ژى ژينگه‌ پيس دبيت وئه‌و دوكێله‌ دبيته‌ هوكاره‌ك بۆ تێكچۆوونا ساخله‌ميێ”.

وه‌زاره‌تا كاره‌بێ دياركر ژى” هه‌ڤده‌م بكارئينانا زێده‌ ژپێدڤيا مرۆڤى يا ئاميرێن كاره‌بێ ئه‌گه‌ره‌كه‌ بۆ ده‌ركه‌فتنا تيشكا زێده‌ وكاريگه‌ريه‌كا راسته‌وخوه‌ يا خراب ل سه‌ر ساخله‌ميا مرۆڤى دبيت ووێ ڤه‌كۆلينێ داخواز كريه‌ كاره‌با زێده‌ ژپێدڤێ دناڤ مالان دا بهێته‌ كێمكرن وئه‌و گلۆپێن دهێنه‌ بكارئينان كو ب led دناڤدارن ول ده‌مێ نڤستنێ ته‌له‌ڤزيۆن وكۆمپيۆته‌ر ولاپتۆب بهێنه‌ ڤه‌مراندن”.

ئه‌ڤرۆنيوز:

سەرۆکێ فراکسیۆنا پارتی دیموکراتی کوردستان ل پەرلەمانێ کوردستانێ راگەهاند، پۆستێن سه‌رۆكێ حوكمه‌تا هه‌رێما كوردستانێ وسه‌رۆكێ په‌رله‌مانێ كوردستانێ يێن پارتى نه‌ وئه‌وێ هه‌ڤپه‌يمانيێ ژى ل گه‌ل مه‌ بكه‌ت، تنێ دێ جێگرێن وان به‌ركه‌ڤيت.

ئومێد خوشناو، سەرۆکێ فراکسیۆنا پارتی دیموکراتی کوردستان ل پەرلەمانێ کوردستانێ كو بۆ خۆلا نوو يا په‌رله‌مانى ژى هاته‌ هه‌لبژارتن گۆت” ئه‌م يێن ل گه‌ل ته‌وافوقێ ولێكتێگه‌هشتنا هه‌ڤپشك دا، به‌لێ ده‌مه‌كى هێزا ئێكێ دو جاران هندى هێزا دويێ زێده‌تر بيت وئه‌و جوداهيا مه‌زن درێژا ده‌نگێن وان دا هه‌بيت، دڤێت ب گۆره‌ى خالبه‌نديێ وهژمارا كورسيان پۆست بهێنه‌ به‌لاڤكرن”.

خوشناو د داخۆيانيه‌كا رۆژنامه‌ڤانى دا ل دۆر ئۆپوزسيۆنا هنده‌ك لايه‌نێن سياسى، گۆت ” ئه‌م رێزێ ل بۆچوونێن وان دگرين  وئه‌و دێ بيته‌ پشكه‌كا گرنگ ژجوان نيشادانا پرۆسا سياسى، بۆ وێ چه‌ندێ بشێين ب شێوه‌كێ ساخله‌م ره‌فتارێ بكه‌ين”.

خوياكر”هه‌كه‌ پارتى زێده‌تر ژ 45 كورسيێن په‌رله‌مانێ كوردستانێ ژى بده‌ستڤه‌ئينابان، هه‌ر بزاڤ نه‌دكر ب تنێ حوكمه‌تێ پێك بينيت، چونكى مه‌ به‌رژه‌وه‌نديێن خوه‌‌ يێن گشتى ل به‌رى هه‌موو ده‌ستكه‌فتێن خوه‌ داناينه‌ ول جيهانا پێشكه‌فتى دا به‌رده‌وام هێزا سه‌ركه‌فتى يا ئێكێ دهه‌لبژارتنان دا پۆستێ ئێكێ دبه‌ت، ئانكو مافێ مه‌يه‌ بێژين سه‌رۆكێ حوكمه‌تێ وسه‌رۆكێ په‌رله‌مانى بۆ مه‌نه‌، له‌وما هه‌كه‌ ل گه‌ل هه‌ر لايه‌نه‌كى هه‌ڤپه‌يمانيێ بكه‌ين، دێ پۆستێ دويێ ئانكو جێگرێن وان به‌ركه‌ڤيت”.

website security