NO IORG
نوزاد هلورى/داخۆیانی

ئه‌ڤرۆ نیوز ، نه‌وزاد هلۆرى:

ل ده‌ڤه‌را ئامێدیێ ب گشتى و سه‌نته‌رێ ناحیا شێلادزێ ب تایبه‌تى بازارێ توتنا خومالى یا گه‌رمه‌ و نێزیكێ 50 جۆرێن توتنێ تنێ ل شێلادزێ دهێنه‌ فرۆتن، بازرگانه‌ك دیاردكه‌ت ژبه‌ر نه‌بوونا چو كارگه‌هێن تایبه‌ت ب وه‌به‌رهێنانا تووتنێ، ئه‌و بزاڤان دكه‌ت ئامیره‌كێ تایبه‌ت يێ چێكرنا جگاران‌ بینیته‌ شێلادزێ.

مونیر توڤى ، بازرگانێ تووتنێ ل شێلادزێ بۆ ئه‌ڤرۆ نیوز گۆت: (ئه‌م تووتنێ ژ هه‌موو ده‌ڤه‌رێن كوردستانێ دكرین و ل بازارێن شێلادزێ و ده‌ڤه‌را ئامێدیێ دفرۆشین و ره‌وانه‌ی ده‌رڤه‌ی قه‌زا ئامێدیێ ژى دكه‌ین، نوكه‌ ل سه‌نته‌رێ ناحیا شێلادزێ نێزیكێ 50 جۆرێن تووتنێ دهێنه‌ فرۆتن كو پتريا وان هه‌ر  ل ده‌ڤه‌رێن هه‌رێما كوردستانێ دهێته‌ وه‌به‌رئینان ب تایبه‌تى ل ده‌ڤه‌را به‌رێ گارێ و سیده‌كان وپشكه‌كێ تووتنا ده‌ڤه‌رێ ل باكوورێ كوردستانێ ژى دهێته‌ ئینان ب تایبه‌تى جوله‌مێرگ و شه‌مزینان).

زێده‌تر گۆت: (گرانترین تووتن ب 140 دۆلاران و ئه‌رزانترین تووتن ژى ب 20 دۆلاران ل بازارێن شێلادزێ دهێته‌ فرۆتن، و پتريا كه‌سێن تووتنێ دكرن و بكاردئینن ته‌خا گه‌نجایه‌ ، ژبه‌ركو تووتنا ده‌ڤه‌رێ یا ب تام و بێهنداره‌ و هنده‌ك جۆرێن پاكیتێن ڤالا ژى ده‌ركه‌فتینه‌ و پێچانا وان ب ساناهیه‌).

 ناڤبرى دیاركر ژى كو تووتن ل كوردستانێ ل هه‌یڤا پێنج دهێته‌ چاندن و ل هه‌یڤا نه‌هێ و ده‌هێ دهێته‌ چنین و زێده‌تر گۆت: (پێدڤیه‌ لایه‌نێن شوله‌ژێ كارگه‌هه‌كا تایبه‌ت بۆ وه‌به‌رهێنانا تووتنێ ل ده‌ڤه‌رێ بدانن ، ژبه‌ركو رێژه‌یه‌كا زۆر یا زه‌ڤیێن تایبه‌ت ب چاندنێ و جوتیارێن چاندنا تووتنێ ل ده‌ڤه‌رێ يێن هه‌ين و ب چێكرنا وێ كارگه‌هێ دێ ب ده‌هان گه‌نج و وه‌لاتى تێدا كاركه‌ن و بیته‌ ئه‌گه‌ر كو بێكارى كيم ببيت و هژماره‌كا خێزانان ل سه‌ر بژین، به‌لێ ب مخابنی ڤه‌ هه‌تا نها چو كارگه‌هـ نینن، ژبه‌رڤێ من بزاڤكریه‌ ئامیره‌كێ تایبه‌ت بو چێكرنا جگاران بینمه‌ شێلادزێ و چاڤه‌رێ مه‌ بگه‌هیت و ب گه‌هشتنا وى ئامیرى دێ خزمه‌ته‌كا باش بۆ ده‌ڤه‌رێ هێته‌كرن).

ئەڤرۆ نیوز، نەوزاد ھلۆری:

پرانیا زاروکێن سەنتەرێ ناحیا شێلادزێ و کومەلگەھا سیریێ یا سەر ب دەڤەرا ئامێدیێ پایسکلا دھاژون، و ئەڤە زێدەباری کو مەترسی بو سەر ژیانا وان ھەیە ، دھەمان دەم دا بێزارییەکا زور ژی بو مال و شوفێر و بازاران درۆست دکەن.

نەسروللا عەبدوللا ئێکە ژ وان زاروکێن کو پایسکل ب چەند شێوازێن سەرنجراکێش دھاژوت بۆ ئەڤرۆ نیوز گۆت: (ئەڤە سێ سالە ئەز پایسکلێ دھاژوم، و دەستپێکێ ئەز گەلەک دکەفتم ،بەلێ نھا ئەز فێربویمە و ناکەڤم، و ئەم پایسکلێ لسەر جاددە و کولانێن نێزیک مالا خوە دھاژوین ، و ب شەڤ و رۆژ ژی دھاژون ، و ھندەک جاران ھەتا نێزیکێ دەمژمێر 3:00ێ ب شەڤ لسەر جادداینە).

38743221_2276364275835819_9211687647045484544_n

زێدەتر گۆت: (بێگومان مال و وەلاتی و شوفێر گەلەک گازندا ژ مە دکەن، بەلێ پا ئەم ژی قوتابی نە و ب ھەلکەفتا دوماھی ھاتنا خواندنێ ئەم ژی دەمێن خوە ب پایسکلان د بورینین).

نیھاد بێوار ئەو ژی زاروەکێ دی یە و پایسکل دھاژوت بۆ ئەڤرۆ نیوز گۆت: (زێدەتر ژ 80% زاروکێن دەڤەرا مە پایسکلا دھاژون ، و نیڤا وان ژی نوزانن لێبخورین بەلکو خوە فێر دکەن، و زور جاران بویە سەدەم کو مرۆڤ بکەڤیت و ترومبێل بێزاریەکا تەمام ژ مە ببینن ، بەلێ ئەم ژی نەچارین و چوو جھێن تایبەت نینن بو ھاتژوتنا پایسکلا).

38683882_965345213647617_5973190393561350144_n

زێدەتر گۆت: (ھاژوتنا پایسکلا لدەڤ مە بتنێ زەوقە و خوشی یە، و پتریا ئەو پایسکلێن کو ژلایێ زاروکان دھێنە بکارئینان ، ب ھەکلەفتا دەرچون ژ قوتابخانێ بو کرینە ، و کوالێتی و جورێ وان باش نینە و ب بچوکترین کەفتن مروف بریندار دبیت چونکی چوو مەرجێن سلامەتیێ تێدا نینن).

نزار عومەر بابێ ئێک ژ وان زاروکایە ئەو بو ئەڤرۆ نیوز دبێژیت: (ب ھەلکەفتا دەرچون ل قوتابخانێ و مەزن بوون و چاڤلێکرنا زاروکێن دن ، بابێن زاروکا پایسلا بو زاروکان دکرن ، داکو دەمێن خو یێن ھاڤینێ ببورینن، ئەڤ یەک مەزنترین شاشیە ژ بەرکو ئەڤ زاروکە ژبەر نەبوونا چو جھێن تایبەت بو ھاژوتنا وان ، نەچارن دناڤ مال و بازار و سەر جاددا پایسکلا ب ھاژون ، و زێدەباری کو مەترسی بو سەر ژیانا وان دروست دبیت دھەمان دەم دا بێزاری ژی ل وان درۆست دبیت).

زێدەتر گۆت: (پێدڤی یە دایبابێن زاروکان ژیێن زاروکان ل گەل چەوانیا ھاژوتنێ ل بەر چاڤ بگرن پاشان پایسکلێ بو زاروکێ خو بکرن، و ب ھزرا من دڤێت دایک و باب زاروکێن خوە فێر بکەن ئاستێ زانستیێ وان بلند بکەن داکو ل ئایندە بشێن ببنە کەسانێن رەوشەنبیر و تێگەھشتی و خودان کار و پێشە و باوەرنامەیێن بلند ب تایبەتی د وەرزێ ھاڤینێ دا کو زاروکان دەمەکێ زور ھەیە).

ئه‌ڤرۆ نیوز، نه‌وزاد هلۆرى:

هه‌ر دكه‌ڤن دا هه‌تا نها چێكرنا گێسكێ پاقژكرنا ناڤمالێ كو ب گێسكێ كوردى دهێته‌ نیاسین، رۆله‌كێ به‌رچاڤ هه‌بوویه‌ و كوردان زۆر بكارئینایه‌، به‌لێ هاتنا گێسكێ بیانى و گه‌هشتنا ته‌كنولوژیایێ بوویه‌ ئه‌گه‌ر كو گێسكێ كوردى  زۆر ب كێمى بهێته‌ بكارئینان ، خودانێ كۆمپانیه‌كا بازرگانى دیاردكه‌ت كو هه‌یڤانه‌ نێزیكێ 30 هزار گێسكێن بیانى دگه‌هنه‌ دهۆكێ.

نه‌سره‌ت ئه‌حمه‌د، ژنه‌كا شێلادزێ یه‌ دبێژيت كو هه‌ر دكه‌ڤن دا هه‌تا نوكه‌ ئه‌و گێسكێ خومالى و كوردى بۆ پاقژكرنا ناڤمالێ بكاردئینيت و بۆ ئه‌ڤرۆ نیوز گۆت : (هه‌ر چه‌نده‌ بكارئینانا گێسكێ كوردى یان بێژین گێسكێ ده‌ستى ئه‌وێ ژ گیای دهێته‌ درۆستكرن ب زه‌حمه‌ته‌، به‌لێ هێشتا ره‌واج و بهایێ خوه‌ یێ كه‌لتورى هه‌یه‌ و ئه‌م بكاردئینین ب تایبه‌تى بۆ پاقژكرنا حه‌وش و سه‌ربان و به‌رده‌رگه‌هێن مالان، چونكى ب چو شێوه‌یان گێسكێن كاره‌بێ نه‌شێن وان جهان پاقژ بكه‌ن).

زێده‌تر گۆت: (دو جۆره‌ گێسك دژیانا كوردان دا هاتینه‌ بكارئینان، ئه‌و ژى گێسكێ گیای و گێسكێ دارا میتكى،  گێسكێ گیای بۆ  سه‌ر مه‌حفیر و ژۆرڤه‌ دهاته‌ بكارئینان و گێسكێ میتكى ژى بۆ ده‌رڤه‌ی مالێ ، ب تایبه‌تى بۆ نه‌هێلانا به‌را دحه‌وشێ دا و دنهادا ده‌ستكه‌فتنا هه‌ردو گێسكا ب زه‌حمه‌ت كه‌فتیه‌ و دڤێت بكرین).

ئیدریس هلورى، خودانێ دوكانه‌كێ یه‌ ل گوندێ بالندا و پێشتر بۆ ده‌مێ چه‌ند سالان گێسكێن میتكى و گیاى دفرۆتن بۆ ئه‌ڤرۆ نیوز گۆت: (به‌رى چه‌ند سالان رۆژانه‌ زێده‌ترى 10 گێسكا من د فرۆتن و زۆر داخوازى ل سه‌ر هه‌بوو ، به‌لێ ئه‌ڤه‌ دو و سێ سالن‌ رۆژێ گێسكه‌كێ ژى نافرۆشم، له‌وما نه‌چاربووم ئێدى نه‌ئینم دوكانێ).

زێده‌تر گۆت: (مه‌ گیا و دارا میتكى ل ئاقارى دئینا و هنده‌ك جاران ژى مه‌ گێسك ب رێیا توفكى د چاندن وپاشى ژنان ل مال درۆستكرن و ددانانه‌ جهێن تایبه‌ت و تژى ل سه‌ر به‌ر دكرن هه‌تاكو قالبێ خوه‌ گرتبایه‌ وپاشى دفرۆتن، به‌لێ نوكه‌ هه‌كه‌ كه‌سه‌كێ ڤیا ئه‌و ب خوه‌ دچیته‌ ئاقارى و بۆ خو درۆست دكه‌ت، كو ئه‌ڤ یه‌ك ژى بۆ قه‌یرانا دارایى و پێشكه‌فتنا زانستى و ده‌ركه‌فتنا گێسكێن كاره‌بێ دزڤریت).

جه‌گه‌رخوين غلبیشى، چاڤدێرێ ئێك ژ كۆگه‌هێن كۆمپانیا باهیف یا بازرگانیا گشتى ل دهۆكێ دیاركر كو هه‌یڤانه‌ دناڤبه‌را 27 بۆ 30 هزار گێسكێن ده‌ستى ل وه‌لاتێن ئوكرانیا و رووسیا و چه‌ند ده‌وله‌تێن دى دگه‌هن‌ دهۆكێ و بۆ ئه‌ڤرۆ نیوز گۆت: (گێسكێ كوردى یان بێژین گێسكێ ده‌ستى ، ئێكه‌ ژ كار و پێشه‌یێن كوردان  و هه‌ر دكه‌ڤن دا هه‌تا نها دهێته‌ بكارئینان و چێكرن، به‌لێ پشتى گێسكێن كاره‌بێ ده‌ركه‌فتين و كارزانێن مه‌ژى ل چێكرنا گێسكێ خومالى دویركه‌فتى، كه‌س گێسكێن خومالى و كوردى بكارنائینیت و گێسك ل وه‌لاتێن بیانى دگه‌هیته‌ دهۆكێ).

زێده‌تر گۆت: (مه‌ ب خوه‌ زێده‌تر حه‌ز ل سه‌ر فرۆتنا گێسكێ كوردى هه‌یه‌، به‌لێ ژبه‌ركو چێكرنا گێسكێ كوردى يێ ب وه‌ستيان و ب مه‌سره‌فه‌ و ده‌رنائینین، نه‌چارین كو گێسكى ل ده‌رڤه‌ بینین، و ئه‌و گێسكێ كو دگه‌هیته‌ دهۆكێ ، زێده‌بارى كو ل بازارێن ناڤخوه‌یێن دهۆكێ دهێته‌ فروتن، دهه‌مان ده‌م دا بۆ بازارێن هه‌ولێر و سلێمانى و هه‌له‌بچه‌ و رانیا و به‌غدا ژى دهێته‌ ره‌وانه‌كرن  و نها ئه‌م یێ كار دكه‌ین كو ل پتریا بازارێن عیراقێ و كوردستانێ هه‌موویێ به‌لاڤ بكه‌ین، چونكى گێسك تنێ دهێته‌ دهۆكێ و پاشى ره‌وانه‌ى بازارێن دى دبیت).

ناڤبرى دیاركر ژى هه‌كه‌ حوكمه‌ت و لایه‌نێن شوله‌ژێ هه‌ڤكاریا وان بكه‌ن ئه‌و دێ وه‌به‌رهێنانێ ل سه‌ر گێسكێ خومالى و كوردى كه‌ن و ب ده‌هان گه‌نج و وه‌لاتیان ده‌نه‌ كارى و زێده‌تر گۆت: (دشیاندایه‌ كو ل كوردستانێ وه‌به‌رهێنانه‌كا زۆر ل سه‌ر گێسكێ خومالى بهێته‌كرن، چونكى هێشتا خه‌لكه‌كێ زۆر گێسكێ ده‌ستى بكاردئینیت ، چونكى هه‌موو جه ب گێسكێن كاره‌بێ ناهێنه‌ پاقژكرن ب تایبه‌تى به‌رده‌رگه‌ه و حه‌وش و ده‌رڤه‌ی خانى و نها ب ره‌نگه‌كێ گشتى خه‌لكێ گوند و باژێران بكاردئینن و چو جاران ژى ناهێته‌ هێلان).

ئه‌ڤرۆ نیوز، نه‌وزاد هلۆرى:

 نه‌بوونا پشته‌ڤانیێ و هاورده‌كرنا به‌رده‌وام  بوویه‌ ئه‌گه‌ر كو هنده‌ك جوتيار ل سنورێ ناحیا شێلادزێ ده‌ستبه‌ردارێ چاندنێ و ده‌رامه‌تى ببن ، جوتیاره‌كى دياركر كو وى پارسال رۆژانه‌ 100 سندوقێن باجانان ره‌وانه‌ى بازارى دكرن، به‌لێ نها چو ده‌رامه‌ت نینه‌.

 عه‌بدولخالق زاده‌، جوتیاره‌كێ ده‌ڤه‌را شێلادزێ یه‌ بۆ ئه‌ڤرۆ نیوز گۆت: (من و چه‌ند جوتیارێن دى سالانه‌ زه‌ڤیێن باجانان وه‌كو پرۆژه‌ دچاندن و رۆژانه‌ 100 سندوقێن باجانان ره‌وانه‌ى بازارێن شێلادزێ و دێره‌لوكێ و ده‌ڤه‌را بارزان دكرن ، هه‌ر چه‌نده‌ بوهایێ وان ئه‌رزان بوو ، به‌لێ باشتر بوو ژ نه‌چاندنێ و تشته‌ك دگه‌هشته‌مه‌ ، به‌لێ ژبه‌ركو هاورده‌یه‌كا زۆر دهێته‌ بازارێن ده‌ڤه‌رێ و حوكمه‌ت ژى چو هاریكاریا ناكه‌ت، نه‌چاربوم ئه‌ڤ ساله‌ چاندنێ نه‌كه‌م)

 عه‌گید شاجى، جوتیاره‌كێ ده‌ڤه‌رێ یه‌ بو ئه‌ڤرۆ نیوز گۆت: (نێزیكێ 10 سالایه‌ ئه‌ز به‌رده‌وام باجان و خیار و بامى و فلفل و چه‌ندین ده‌رامه‌تێن دى دكه‌م و نێزیكێ سێ سالایه‌ مه‌ هزر د پرۆژێن زانستى دا كریه‌، به‌لێ ژ به‌ركو مه‌زاختيێن زۆر دچن و چو ناهێته‌ جهێ وان ، نه‌چاربووين ده‌ستبه‌ردارێ چاندنێ ببین و ئه‌ڤ ساله‌ تنێ من زه‌ڤیه‌كا بچووك یا باجانان ل ده‌ڤه‌را نێروه‌ورێكان كریه،‌ به‌لێ ژبه‌ر مه‌ترسیێن بوردومانا فرۆكێن توركی نه‌شێين زوو ب زوو بچنه‌ دناڤ دا).

زێده‌تر گۆت: (هه‌كه‌ حوكمه‌ت تنێ هاورده‌یا باجان و ده‌رامه‌تى د وه‌رزێ پێگه‌هشتنا وان دا رابگریت، بلا چو هاریكاریێن دى نه‌كه‌ت، ئه‌م دێ شێن تێرا پێدڤى یا شێلادزێ ده‌رامه‌تى چینین، چونكى شێلادزێ ئێكه‌ ژ وان ده‌ڤه‌رێن كو زه‌ڤیێن زور هه‌نه‌ و رووباره‌كێ مه‌زن هه‌یه‌ و ب رێیا پرۆژێن زانستى دشێين مفاى ژ رووبارى وه‌ربگرین و چاندنێ پێ بكه‌ین).

ئەڤرۆ نیوز، نەوزاد ھلۆری:

ب بەرھەڤبوونا سەروک بارزانی کونگرێ ھەشتێ یێ ئێکەتیا لاوێن دیموکراتا کوردستانێ لژێر دۆريشمێ پێشمەرگە ل ھەولێرێ ب رێڤەچوو، سەروک بارزانی د کونگرەی دا دیارکر کو پاشەرۆژا کوردستانێ د دەستێ لاوان دایە و لاوان دێ ھەر مینن شیرێن پولاین ، و شانازیە کو لاوان ئەندامێن ئێکەتیا لاوێن جیھانی نە ، و دیسان بارزانی بەحس ل ریفراندوم و ھەلبژاردنێن عیراقێ و دەنگویێن پاشئێخستنا ھەلبژاردنێن کوردستانێ کر.

سەرۆک بارزانی د دەستپێکا دەست بکاربوونا کونگرێ ھەشت یێ ئێکەتیا لاوێن دیموکراتا کوردستانێ دیارکر کو ئەو دلخوشە د کونگرێ ھەشت یێ لاوان پشکدارە و گۆت: (ل دەما شورشا ئیلونێ و پشتی شورەشا ئیلونێ لاوان رولەکێ بەرچاڤ و کارا ھەبویە د پەروەردەکرنا لاوان دا لسەر بنەمایەکێ دیموکراسی ، و بەشەکێ زور ل سەرکردەیێن کوردستانێ دناڤ لاوان دا دەرچوینە، و بەردەوامبوونا خەباتا لاوان بویە سەدەم کو ببنە ئەندام د ئێکەتیا لاوێن جیھانی دا کو ئەڤ یەک ژی شانازیە ، و بارزانی نەمر پێشتر ل بارا لاوان گوتە لاوان شورایی پولاین و قوتابی سەرێ رومێ نە، وەکو پارتی ئەم بەرھەڤین بو ھەر کارەکێ لاوان بڤێت).

بارزانی زێدەتر گۆت: (دبوری دا مە چوو ھێرش و شەر نەکرینە کەسێ، و کار و خزمەتا مە تنێ بەرەڤانی کرن بوویە ل گەلێ کوردستانێ و خاکا کوردستانێ و مافێت وان ، و ئارمانجا مە بتنێ ئازادی بوویە ، و ئەم ب خەبات و قوربانیدانا خوە سەربلندین، د بوری دا مە چوو کێشە نەبوینە و کێشە بو کەسێ ژی درۆست نەکرینە بەلکو ھەر دوژمنان ڤیایە کێشە و نەخوشیان بو مە درۆست بکەن ، مە ھەردەم ڤیایە کو وەکو برا خوە ئەگەر برایێ بچوک ژی بیت ل عیراقێ بژین و پشکدارێ عیراقێ بین بەلێ وان نە ھەڤپشکی قبولە و نەژی جیرانی ، و مە ژی نەڤێت ببینە پاشکویێن کەسێ، و پێدڤی یە گەلێن جیھانێ و عیراق ژی ھزر بکەت کو گەلێ کوردستانێ ب ئاگر و ئاسن و کومکوژیان ژ ناڤ ناچیت ، و دڤێت ئەو ھزرێ د چارەسەرکرنا کێشەیان ب دانوستاندن و دەستوور بکەن ، بەروڤاژی ئەم و ئەو چوو خوشیان نابەن).

بارزانی ل بارا ریفراندۆمێ گوت: (پشتی سالا 2003 و ئازادیا عیراقێ ئەم چوینە بەغدا، و مە ڤیا ھەڤپشکێ راستەقینەیێ عیراقێ بین و مە زور بزاڤ ژی کرن کو لسەر بنەمایەکێ راستەقینە بین ،بەلێ ب لێبورین ڤە بومە دیاربوو کو نەک تنێ ھەڤپشکی بەلکو ھەڤوەلاتی بوون بو کوردان ژلایێ وان یا قبولکری نینە، بەری کو ریفراندوم بھێتەکرن ل ھەیڤا ئیلو یا سالا 2016 ئەم چوینە بەغدا و دووبارە داخوازا ھەڤپشکی کر و دەستوور بھێتە بجھکرن ئەو دەستوورێ کو خەلکێ عیراقێ ب کورد ڤە دەنگ بو دایی، و عیراقەکا راستەقینە بھێتە درۆستکرن، بەروڤاژی وەرن دا ھزرێ د وێ یەکێ دا بکەین کو ببنە دوو جیرانێن باش ، ب چوو شێوەیان ژی مە نەڤیایە کێشەیان درۆست بکەین ، پشتی کو ریفراندۆم ھاتیە کرن و خەلکێ کوردستانێ سەرکەفتن ئینایی و زێدەتر ژ 92% دەنگ بودایی ، ب لێبورین ڤە ئەگەر 16ێ ئوکتوبەرێ نەبایە ئەڤ رەوشا نھا ب سەرێ مە نەدھات ، و مافێ سەربخوەیێ مافەکێ سرۆشتی یە خودێ دایە مە ، و ھەر ژ روژا کاوەیێ ئاسنگەر زوحاک ژ ناڤبری داخوازا ئازادی و سەربخوەیێ دکەت و ھەموو لایەک دڤێت بزانیت کو کورد دەستبەردارێ سەربخوەیێ نابن و ئەو خەیالەکە تێدا دژین ، و پێشمەرگەیان بو ھەموو لایەکێ سەلماند کو بەرەڤانێ ئاخا کوردستانێ یە و پشتراستم ئەڤرۆ یان سوبەھی سەربخوە دێ ھەرھێتە بجھئینان).

مەسعود بارزانی سەرۆکێ پارتی دیموکراتێ کوردستانێ ل بارا دوماھی گورانکاریێن پشتی ریفراندۆمێ دیارکر ژی کو پشتی چەندین قوربانی و نەخوشیان کورد ب چوو شێوەیان پاشکویی قبول ناکەت و زێدەتر گۆت: (نھا پەیوەندیێن مە ل گەل عیراقێ و وەلاتێن جیھانێ ئاسایی بوویە ، و بزاڤێن خورت دکەین کو پەیوەندیێن نافخوەیێن لایەنێن سیاسیێن کوردستانێ ئاسای ببن، و د ھەلبژاردێن بوری یێن عیراقێ پارتی سەلماند کو داکوکیکارێ مافێ گەلێ کوردستانێ یە و بویە یا ئێکێ ، ئەڤە سەرەرای کو ستەمەکا زور ل پارتی ھاتیەکرن و 4 بو 6 کورسیێن پارتی ھاتینە برن ، بەلێ مە چوو کێشە نەکرن ، و پارتی بەرھەڤە د ھەلبژاردنێن بھێت یێن کوردستانێ ژی پشکداربیت و ئەم وەکو پارتی دێ ھەموو بزاڤان بو سەرئێخستنا پارتی کەین ژبەرکو چەند پارتی یا بھێز بیت دێ کوردستان یا ب ھێز بیت ، و لسەر سێ بنەمایێن سەرەکی دێ دانوستاندنێ ل گەل بەغدا کەین کو ئەو ژی ھەڤپشکی و تەوافق و ھەڤسەنگی یە).

ل باری دەنگویێن ھاتنا برێت مەکگور و 48 ملیار دیناران ژی بارزانی گۆت: (ب چوو شێوەیان برێت مەکگورک داخوازا پاشئێخستنا ھەلبژاردنان ل من نەکریە ، و ئەڤ یەک مافێ پارتی یە کو بریارێ بدەت ، و دیسان چوو راستی بو سامانێ من نینە کو دبێژن 48 ملیار دولار ھەنە، و ئەگەر من ئەو پارە ھەبایە دا گەلەک گورانکاریان کەم).

ئەڤرۆ نیوز، نەوزاد ھلۆری:

وەلاتیەکێ رۆژئاڤایێ کوردستانێ ئەڤە شەش رۆژە ب پیا بەر ب گوندێ بارزان دھێت ، و ئەڤرۆ سپێدێ گەھشتە گوندێ بارزان و سەرەدانا گورا بارزانی نەمر کر، و ژلایێ خەلات بارزانی نوونەرێ سەروک بارزانی ھاتە پێشوازیکرن.

عەبدولغەنی کو ب بابێ لورانس دھێتە نیاسین بۆ ئەڤرۆ نیوز گۆت: (سوپاس بو خودێ پشتی ماندوبوونەکا زور ئەڤرۆ سپێدێ پشتی شەش رۆژێن ب پیا ھاتن، ئەز گەھشتمە گوندێ بارزان ، و مەرەما من ژی ئەو بوو کو ژ نێزیک سەرەدانا گورا بارزانیێ نەمر بکەم و پارچەکا شعرێ کو دەربرینێ ژ قارەمانی و ئێکرێزی و ئێکگرتنا کوردان دکەت بخوونم).

زێدەتر گۆت: (دڤێت کورد شانازیێ بکەن کو کەسەکێ وەکو بارزانی نەمر ھەبوی و خودان پەیرە و رێبازەک گرنگ و ستراتیجی بویە ، و گەلەک گرنگە کو کورد رێبازا وی بخوە بکەن پروگرام بو ژیانا خوە یا سیاسی و جڤاکی و ئابووری و ئاینی، و ب دتنا من بارزانی مەرجەعەکێ ھەری گرنگە و سەرەدانا خوە بو بارزان و مەزارێ نەمران وەکو حەج دبینم).

دھێتە زانین کو عەبدولغەنی خەلکێ باژێرێ قامشلو یێ رۆژئاڤایێ کوردستانێ یە و زێدەتر ژ شەش سالایە ژ بەر رژێما بەعس ل کەمپا دومیز دژیت.

38513914_462612040872674_814935757692076032_n

ئەڤرۆ نیوز، نەوزاد ھلۆری:

پتری 300 سالایە وەلاتیێن سەنتەرێ ناحیا پیران ژبەر ھەبوونا بیرەکا ئاڤێ کو ھەموو خوێ یە ، خوێ ناکرن بەلکو ئەو بخوە ، خوێ ل وێ کانیێ دەردئینن و بکاردئینن ، بەلێ ژبەر زوربوونا ھژمارا خەلکێ پیران و کێمبوونا ئاڤا بیرێ و سەخبێری نەکرنا وێ ژلایێ حوکمەتێ ، ئێدی خەلک ژی نەچارن خوێ بکرن.

یوسف پیرانی ، وەلاتیەکێ ناحیا پیرانە بۆ ئەڤرۆ نیوز گۆت: (پتری 300 سالایە وەلاتیێن سەنتەرێ ناحیا پیران کو ل وی دەمی تنێ چەند مالەک بوون، خوێ ژ بیرەکا ئاڤێ دەردئینن و بکاردئینن کو ل نێزیک پیران ھەیە ، و ھەتا نوکە ژی ئەو بیر ژلایێ خەلکی دھێتە بکارئینان بو دەرئینانا خوێ).

زێدەتر گۆت: (ئەو دەما کو خەلکی خوێ ژ بیرا ئاڤێ درۆست دکر و ھەتا چەند سالێن بوری ژی تێرا ھەمووان دکر بەلێ ژبەرکو نھا خەلکێ پیران زوروبویە و داخوازیێن وان بو دەستکەفتا خوێ پتر بوونە ، و دیسان ئاڤا بیرێ کێمتر بوویە ، و حوکمەت و لایەنێن شولەژێ چوو کار و خزمەت بو وێ بیرا ئاڤێ نەکرینە ، ئاڤا بیرێ رۆژ بو رۆژێ کێم دبیت و تێرا ھەمووان ناکەت، و ئەڤە یەک بویە سەدەم کو بەشەک ژ وەلاتیان پشتی چەندین سالان خوێ بکرن).

ناڤبری د درێژاھیا ئاخفتنێن خودا دیارکر ژی کو ئەگەر نھا لایەنێن شولەژێ کار بکەن بو دەرئینانا ئاڤێ و دەزگەھێن باش لسەر بدانن بو ڤاڤارتنا خوێ ، دێ جارەکا دی خەلکێ دەڤەرێ بو دەستکەفتنا خوێ پەنایێ بو ئەوێ بیرا ئاڤێ بەن و گوت ژی: (ھەر چەندە خوێیا بیرا پیران یا ساخلەمە و ب شێوەیەکێ باش دھێتە بەرھەمئینان، بەلێ ژبەرکو ئامیرێن سادە و دەستی تێدا دھێنە بکارئینان، خەلک نەچاردبیت کو پەنایێ بو خوێیا کارگەھان ببەن بەلێ ئەگەر کارگەھەکا ھەڤپشک ل دەڤەرێ بھێتە درۆستکرن و خەلک ل وێ کارگەھێ خوێ دەستخوڤە بینن دێ گەلەک باشتر بیت ب تایبەتی ژ روویێ ساخلەمیێ ڤە).

ئه‌ڤرۆ نیوز، نه‌وزاد هلۆرى:

 ئه‌ڤه‌ چار رۆژه‌ په‌نابه‌ره‌كێ رۆژئاڤایێ كوردستانێ ل كه‌مپا دۆمیز ب پیا دچیته‌ گوندێ بارزان، ئارمانجا وى ئه‌وه‌ كو سه‌را گۆرا بارزانى نه‌مر بده‌ت  و شعره‌كێ بخوينيت، وه‌كو ئه‌و دده‌ت دیاركرن كو بارزانى نه‌مر سه‌ركێشێ بزاڤا رزگاريخوازا كوردى بوو و پێدڤیه‌ كورد ل سه‌ر رێبازا وى بچن.

عه‌بدولغه‌نى كو ناسیاره‌ ب بابێ لورانسى بۆ ئه‌ڤرۆ نیوز گۆت: (ل رۆژا 1/8/2018 ل سه‌نته‌رێ باژێرێ دهۆكێ ب پیا به‌ر ب ده‌ڤه‌را بارزان و گوندێ بارزان ب رێكه‌فتیمه‌ و نها گه‌هشتیمه‌ شێلادزێ و سه‌ر رووبارێ ئاڤا شین، ئارمانجا من ئه‌وه‌ كو سه‌را گۆرا بارزانى نه‌مر بده‌م و ل وێرێ پارچه‌ شعره‌كێ بخوينم).

ئه‌ڤرۆ نیوز، نه‌وزاد هلۆرى
جڤاتا ئاسایشا هه‌رێما كوردستانێ دانپێدانانا گرۆپه‌كێ تیرورستى به‌لاڤكر كو تاوانبارن ب هێرشا تیرورستى یا سه‌ر پارێزگه‌ها هه‌ولێر و به‌یعه‌تدان ب ئه‌بوبه‌كر به‌غدادى خه‌لیفه‌یێ ده‌وله‌تا ئیسلامى ل عیراق و شامێ ناسیار ب داعش، كو ئێك ژ وان مه‌لا ئیسماعیل سوسه‌یى یه‌.

ئه‌ڤا ل خوارێ ده‌قا دانپێدانانا وایه‌.

ئه‌ڤرۆ نیوز، نه‌وزاد هلۆرى:

 ده‌ڤه‌را به‌رێ گاره‌ى ل قه‌زا ئامێدیێ ئێكه‌ ژ وان ده‌ڤه‌رێن كوردستانێ كو ناڤ و ده‌نگیه‌كا تایبه‌ت هه‌یه‌ بو هه‌بوونا هه‌موو جۆرێن ده‌رامه‌ت و خودانكرنا ته‌رش  و كه‌والى و هه‌بوونا هژماره‌كا زۆر یا مێشێن هنگڤینى یێن خومالێ و چیایى، وه‌لاتیه‌كێ ده‌ڤه‌رێ  دیار دكه‌ت كو سالانه‌ هه‌تا 200 مێشێن هنگیڤنى ل چیایى دهێنه‌ دیتن و ب بهایه‌كێ گران دهێته‌ فروتن.

سه‌گڤان به‌رگاره‌ى، وه‌لاتيه‌كێ به‌رێ گاره‌يه‌ ل چه‌ند روژێن بۆرى مێشه‌كا هنگڤینى ل وێ ده‌ڤه‌رێ دیتیه‌ و 16 كیلۆیێن هنگڤینێ ئه‌سلى و سرۆشتى تێدا ده‌رئینان، بۆ ئه‌ڤرۆ  نیوز گۆت: (ده‌ڤه‌را به‌رێ گاره‌ى ژ وان ده‌ڤه‌رێن كوردستانێ يه‌ كو زۆرترین مێشێن هنگڤینى یێن سرۆشتى و چیایى تێدا هه‌نه‌ و سالانه‌ هژماره‌كا زۆر یا مێشان دهێنه‌ دیتن و هنگڤینێ وان دهێته‌ ده‌رئینان و ب بهایێن گران ژى دهێنه‌ فروتن).

زێده‌تر گۆت: (سالانه‌ ل به‌رێ گاره‌ى هه‌تا 200  مێشێن هنگڤینى دهێنه‌ دیتن  و هه‌ر مێشه‌ك ژ وان مێشان دناڤبه‌را چار بۆ 20 كیلۆیێن هنگڤینى تێدایه‌ و كیلۆ دناڤبه‌را 70 بۆ 120 هزار دیناران دهێته‌ فرۆتن و بكرێن وان ژى زۆرن).

ناڤبرى دیاركر ژى كو پتريا ئه‌و كه‌سێن هنگڤینێ چیایى دكرن بۆ  نه‌خوه‌شیان بكاردئینن و گۆت ژى: (هنگڤینێ چیایى ژبلى كو يێ ساخله‌مه‌ و بۆ نه‌خوه‌شیان دهێته‌ بكارئینان و ره‌نگ و شێوێ وى يێ جوانه‌ ، د هه‌مان ده‌م دا تامه‌كا خوه‌ش و جودا ژ هنگڤینێ مێشان ل مال هه‌یه‌ ئه‌وێ كو ژلایێ مرۆڤان دهێـته‌ خودانكرن ، ژبه‌ركو پتريا مێشه‌ڤانان شه‌كرێ بكاردئینن و دشاره‌زا نینن د خودانكرنا وان دا ، ئه‌ڤه‌ سه‌ره‌راى كو چو ژ وان مێشه‌ڤانان مێشێن خوه‌ نابه‌ن ده‌ڤه‌رێن چیایى و زۆزانان، نها ده‌ڤه‌را به‌رێ گاره‌ى ژبه‌ر هه‌بوونا سرۆشت و زوزان و گل و كولیلكان ل پتريا وه‌رزێن سالێ ب هه‌بوونا مێشان ب ناڤوده‌نگه‌ و گه‌له‌ك مێش ژى هه‌نه‌ كو ناهێنه‌ دیتن ژلایێ وه‌لاتیان ڤه‌ و هنده‌ك ژى دجهێن ئاسێ و زه‌حمه‌ت دانه‌ ودیتنا وان یا ب ساناهى نينه‌).

نه‌زیر چاربوتى ئه‌و ژى وه‌لاتیه‌كێ به‌رێ گاره‌یه‌ دیاركر كو برینا مێشێن هنگڤینى ل چیایى شاره‌زایه‌كا باش پێدڤێت داكو كارتێكرن ل ژینگه‌هێ نه‌هێته‌كرن و بۆ ئه‌ڤرۆ نیوز گۆت: (بۆ برینا مێشێ مرۆڤ پێدڤى ب داس و بڤر دبيت و نها ژى هنده‌ك جاران ماتورێن داران دهێنه‌ بكارئینان، و ئه‌و كه‌سێن مێشا دبرن ب چو شێوه‌یان نابیت دارێ ببرن، به‌لكو دڤێت دارێ كون بكه‌ن و هنگڤینى بینن ده‌رێ و دارێ وه‌كو خوه‌ بهێلن و پشتى ساله‌كێ دار بخوه‌ دێ وه‌كو به‌رێ لێ هێت ڤه‌).

زێده‌تر گۆت: (ئه‌ڤ ساله‌ نێزیكێ 10 مێشێن به‌رهه‌مدار من و هنده‌ك هه‌ڤالێن خوه‌ ل چیایى دیتینه‌ و هنگڤینه‌كێ باش و ئه‌سلى و ب تام و خوه‌ش لێ ده‌رئینایه‌ و هه‌موویێ ژى دفرۆشینه‌ خه‌لكى و كیلۆ هه‌تا 120 هزار دیناران ژى دهێته‌ فرۆتن و  گه‌له‌ك داخوازى ل سه‌ر هه‌یه‌).

سه‌گڤانى دیاركر ژى كو ژبه‌ر مه‌ترسیا فرۆكێن توركیا، وه‌لاتى نه‌شێن ل هه‌موو ده‌ڤه‌را به‌رێ گاره‌ى بگه‌ریێن بۆ كۆمكرنا هنگڤینێ سرۆشتى و گۆت: (پێدڤیه‌ ئه‌و كه‌سێن ب مه‌ره‌ما لێگه‌ریان و كۆمكرنا هنگڤینێ سرۆشتى قه‌ستا چیایى دكه‌ن ، زێده‌بارى كو دڤێت د شاره‌زابن ژ روویێ هاتنوچوون و گه‌ریانێ دا، دهه‌مان ده‌م دا دڤێت خودان وژدان و ره‌وشته‌ك بلند بن و ب چو شێوه‌یان ژینگه‌هێ تێك نه‌ده‌ن، ژبه‌ركو پشكه‌ك ژ خه‌لكى نه‌ شاره‌زانه‌ و رادبن ب رینا داران و ئاگربه‌ردانێ كو ئه‌ڤ یه‌ك ژى تشته‌كێ نه‌رێنى یه‌ و كارتێكرنێ ل ژینگه‌هێ‌ و مێشان دكه‌ت).

ب گۆره‌ى ئاخڤتنێن ‌وى وه‌لاتى پشكه‌ك ژ وه‌لاتیان پشتى برینا مێشێ و ده‌رئینانا هنگڤینى، مێشان بخوه‌ ژى دئینن مال و دفرۆشن یان ب خودان دكه‌ن كو ئه‌ڤ چه‌نده‌‌ ژى كاره‌كێ گرنگ و به‌رهه‌مداره‌.

38242727_290823035011341_3945337596393029632_n 38218430_290823005011344_2817385996558008320_n 38256486_290822995011345_5156900733328556032_n

website security