NO IORG
په‌یامنێر/داخۆیانی

ئەڤرۆ نیوز ، سەباح زوھێر:

ئەڤرۆ ل رێکەفتی ١١/١١/٢٠١٨ل ھولا کونفرانسا ل قەزا ئاکرێ ل ژێر دروشمێ( زانستەکێ بھێز کوردستانەکا بھێز ئاڤا دکەت) ئاھەنگا دەرچوونا قوتابیێن پەیمانگەھا تەکنیکی یا تایبەت ب رەواندز لقا ئاکرێ ڤە ھاتە گێران و تێدا ١٥٢ قوتابیان باوەرنامە وەرگرتن.

رەمەزان ئەحمەد رەشید جێگرێ راگرێ پەیمانگەھا تەکنیکی تایبەت رەواندز ل ئاکرێ بۆ روژناما ئەڤرۆ دا دیارکرن کو گەرا دووێ یا دەرچوونا قوتابیێن سالا(٢٠١٧ــ٢٠١٨)ێ پەیمانگەھێ ھاتە گێران کو ژ سێ پشکێن زانستی پێک دھێت ئەو ژی پشکێن( ئینگلیزی و ژمێریاری و کارگێری یاسانە) کو سەرجەمێ قوتابیێن دەرچووی دڤێ گەرێ دا دبنە ١٥٢ قوتابی ل ھەرسێ پشکێن زانستی.

زێدەتر گۆت کو ئەڤ قوتابیێن دەرچووی مینا ھەر قوتابیەکێ دی دشێن دەلیڤێن کاری ب دەستخۆڤە بینن ل جھێن تایبەت و گشتی دا و خوشبەختانە کو ھژمارەکا قوتابیێن دەرچووی ل سالێن چووی ھاتینە دامەزراندن و خودان کارن ل دام و دەزگەھێن حکومەتێ و داخازا مە ئەوە ئەڤ ھەمی قوتابیە ژی ببنە خودان کار چ ل جھێن حکومی یان تایبەتی بن.

ئەڤرۆنيوز ، سالار دۆسكی:

رێڤەبەرێ‌ فەرمانگەها ژینگەها دهۆكێ‌ ئاشكراكر كو ده‌مێ‌ پێنچ سالانە پارە بناڤێ‌ ژینگەهێ‌ دهێتە وەرگرتن ل رێڤەبەریا هاتنوچوونێ‌ و هەتا نوكە وەك ژینگە نوزانیت ئەو پارە چەندە و مفا ژوی پارەی نەهاتیە وەرگرتن.

محەمەد تاهر سەلاحەدین، بریفكانی رێڤەبەرێ‌ فەرمانگەها ژینگەها دهۆكێ‌ بۆ ئەڤرۆنیوز گۆت: پارێ‌ بناڤێ‌ ژینگەهێ‌ ل رێڤەبەریێن هاتنوچوونێ‌ دهێتە وەرگرتن 10% بۆ وەزارەتا نافخو دچیت و پارێ‌ دی بۆ سندوقا ژینگەهێ‌ دمینیت، پارە هاتیە خرڤەكرن ل وەزارەتا دارایی و گەلەك جاران مە بزاڤ ب نڤیسارا فەرمی كر و مە خواست مفایی ژ ڤی پارەی وەربگرین، لێ‌ وەزارەتا دارایی دیاركر كو نە ددەستهەلاتا وان دایە و پێدڤیە جڤاتا‌ وەزیران بریارێ‌ ل سەر بدەت  و ژینگەه وی پارەی ب مەزێخیت، هەتا نوكە ژینگەهێ‌ ئەو دەستهەلات نەبوویە وی پارەی ب مەزێخیت و مفا ژێ‌ بهێتە وەرگرتن و نڤیسار چووینە جڤاتا وەزیران و گەنگەشە ل سەر وی پارەی دهێـتەكرن  و بریار ل وێرێ‌ دهێتەدان كا ئەو پارە چەوا بهێتە مەزاختن، كا دێ‌ شێن مفایی ژ پارەی وەرگرین و هەتا نوكە پارە ل سندوقا ژینگەهێ‌ دایە و مە چو مفا ژێ‌ وەرنه‌گرتیە و نە دبن دەستهەلاتا مەدایە.

رێڤەبەرێ‌ ژینگەها دهۆكێ‌ ئاماژە كرە وێ‌ چەندێ‌ كو ده‌مێ‌ پێنچ سالانە پارە ژ شوفێران ل رێڤەبەریا هاتنوچوونێ‌ دهێتە وەرگرتن بناڤێ‌ ژینگەهێ‌ و هایدارین كو سالانە گوژمەكێ‌ باش یێ‌ پارەی دهێتە كۆمكرن، به‌لێ‌ مە دەست هەلات نەبوویە دەستكاریێ‌ تێدا بكەین.

محەمەد تاهر بریفكانی، ئەو ژی ئاشكراكر كو ئەو پارێ‌ دهێتە وەرگرتن ل دووڤ جۆرێ‌ ترۆمبێلێ‌ یە، ترۆمبێلێن بچووك 50 هزار دینار دهێنە وەرگرتن و ترۆمبێلێن مەزن ل دووڤ پستنێن ترۆمبێلێ‌ یە و هەتا 150 هزار دیناران ژی ژ ترۆمبێلێن مەزن دهێنـە وەرگرتن و رێنما ل رێڤەبەریا هاتنوچوونێ‌ یێن هه‌ین ل سەر چاوانیا وەرگرتنا پارەی ژ شوفێران.

رێڤەبەرێ‌ ژینگەها پارێزگەها دهۆكێ ئەو ژی دیاركر كو هەكە نیڤا ڤی پارەی بگەهیتێ‌ دێ‌ شێن گەلەك كارێن بەرچاڤ كەن و شوفێر ژی هەست پێ‌ بكەن كو ئەو پارێ‌ ژێ‌ هاتیە وەرگرتن كارەك پێ‌ هاتیە ئەنجام دان و یێ‌ دلخوه‌ش بیت ب دانا وی پارەی ب ناڤێ‌ ژینگەهێ‌ بۆ هاتنوچوونێ‌.

گۆت ژى: پرۆژەك بۆ ده‌مێ 60 رۆژان مە ب دووماهی ئینایە ب هەڤكاری ل گەل رێكخراوا ئەلمانی jiz و 40 كرێكاران كاردكر ل بێسرێ‌ هەتا دگەهیتە سیارەتیكا جادە هاتیە پاقژكرن ژ پیش و پەلەخى و گەلەك جاران ئاگر بەربوون لێ په‌یدابوویه‌‌ ژ ئەگەرێ‌ جگارە كێشانێ‌ بوویە وجادە هاتیە پاقژكرن.

دیاركر نوكە مژوولی پرۆژەكێ‌ دی نە ئه‌وژى پاقژكرنا باغچانە و دروستكرنا دولخانەكێ‌ یە ل زانكۆیا دهۆكێ‌ ب هەڤكاری ل گەل هەمان رێكخراو و ب پشكداریا 80 كرێكاران كو سالانە زانكۆیا دهۆكێ‌ ل دووڤ پێدڤیا خوە گولان ژ وێ‌ گولخانێ‌ وەربگریت و دیسا سالانە رێڤەبەریا ژینگەها دهۆكێ‌ ژی ب رێژا 20% داروباران ژ وێ‌ گولخانێ‌ وەربگریت و مفایی ژێ‌ ببینیت.

ئەو ژی گۆت: پرۆژەكێ‌ مەزنتر كارێ‌ ل سەر دهێتەكرن كو زنجیرا چیایێ‌ زاوا نێزیكی پێنج هزار داران ل سەر بهێنە چاندن وەك سومبۆلەك نموونە بهێتە دروستكرن و هه‌كه‌ سەركەفتی بوو بەردەوامیێ‌ بدەینە ڤی كاری، دیسا سەرەراری ڤی كاری نوكە پشكنینا ئاڤا دهۆكێ‌ یا دهێتەكرن و رۆژانە چەندین نموونە دهێنە وەرگرتن و رۆژانە دووڤچوون دهێتەكرن و هه‌كه‌ بزانین ل جهەكی ئاڤ نە ل ئاستێ‌ پێدڤیە، پەیوەندی ب فەرمانگەهێن پەیوەندار دهێـتەكرن و ئەو ئاریشە ب زووترین دەم دهێتە چارەسەركرن.

ئەڤرۆنیوز،ڕەزوان ڕۆژبەیانی

ئاوازدانەرێ کورد هەلکەوت زاهیر بۆ ئەڤرۆنیوز راگه‌هاند،  دوهى پێنج شه‌مبى کارێ من  یێ نوو کو کلیپە سترانه‌‌  ل سەر زانایێ مەزن یێ ئاینی سەعید نورسی  من به‌لاڤكر.

 گوت ژی   ئەڤ سترانە ب زمانێ عەرەبی يه‌  ل سەر زانایێ مەزنێ کورد سەعید نورسی ژلایێ هونەرمەند میرا  ڤه‌ هاتیە گۆتن

دياركر كو  ستران ژپەیڤێن خۆشناو تیلۆ یە و ئاوازا وێ ژلایێ من ب خوه‌ڤه‌ هاتیە دانان و کارێ ديرۆكى و ئاینیە ل سەر رۆل وخەباتا زانایێ کورد یێ ئاینی سەعید نورسی.

ئه‌ڤرۆ نيوز، له‌زگين جۆقى:

بەرپرسا سەنتەرێ وێ یێ ساخلەمیێ و جڤاکی بۆ ئافرەتان دیارکر کو ل رۆژا ٧-١١-٢٠١٨ ل ژێر دوريشمێ “چو جاران بێ ھیڤی نەبە”، رێڤەبەریا کاروبارێن خوەپاراستنا ساخلەمیێ يا سەر ب رێڤەبەریا گشتی یا ساخلەمیێ ڤە د گەل رێکخراوا ئافرەتان پێخەمەت ھوشیاریا وەلاتیان ژ پەنچەشێرا مەمکی رووپیڤانەک بۆ ھژمارەکا قوتابیان رێکخست.

د. لوما حازم بەرپرسا سەنتەرێ وێ یێ ساخلەمی و جڤاکی بۆ ئافرەتان گۆت: “مە ڤیا ب ریێا رووپیڤانەکێ پتر رەوشەنبیریا خوە پاراستنێ بگەھینينە د ناڤ خەلکێ خوە دا ب تایبەتی ژی تاخا قوتابیان ل زانکۆيا دھۆک دا کو پتر خوە بپارێزن ژ نەخۆشیا پەنچەشێرا مەمکی، چونکو ئه‌ڤ نه‌خۆشيه‌ بەر ب زێدەبوونێ دچیت ل دھۆکێ.

ب گۆره‌يى ئامارێن ساخه‌ميا پارێزگه‌ها دهۆكێ سالا بورى ل پارێزگەھا دھۆکێ ١٨٨ حالەتێن پەنچەشێرا مەمکی ھاتبوونە تومار کرن.

ئاشکەرا کر ژى کو سالانە ل جیھانێ ملیۆنەک و پێنچ سەد ھزار کەس گیانی خو ژ بەر ڤی نەخۆشیا مەترسیدار ژ دەست ددەن ب ریێا ئەنجامدانا وەرزشێ و راھێنان و خوارنا ساخلەم و نەکێشانا جگارا ھەموو کەس دشێن پاراستنا خوە بکەن.

ئەڤرۆنیوز، مەحمود نهێلی:

بەرپرسێ لیژنا موەلیدەیان ل قەزا ئامێدیێ بۆ ئەڤرۆ نیوز دیارکر، کو بهایێ کارەبا موەلیدان بۆ هەر ئەمپیرەکی ل سەرانسەرێ قەزائامێدیێ گهورنکاری کەفتە تێدا.

ئەندازیار هەکار ئامێدی بەرپرسێ لیژنا موەلیدەیان ل قەزا ئامێدیێ بۆ ئەڤرۆ نیوز دیار کر، د کومبوونا لژنەیا موەلیدان دا ل دهوکی بریار هاتە دان بۆ هەیڤا 10 یا ئەڤ سالە بۆ هەر ئەمپیرەکی کارەبا موەلیدان ل هەموو قەزا ئامێدیێ بڤی رەنگێ خوارێ یە.
ل سەنتەرێ قەزا ئامێدیێ و دێرەلۆکێ 11 هزار و 500 دینارن و ل شێلادزێ 11 هزار و 750 دینارن و ل سەرسنکێ و بامەرنێ و چەمانکێ 12 هزار دینارن. و دیار کر بەرنامێ کارکرنا موەلیدێ ژی بو هەیڤا یازدە دێ 24 دەمژمێری بیت وهەر دەمەکی کارەبا نیشتیمانی هاتە برین دێ موەلیدە د کاری دا بیت.

ئەڤرو نیوز، سەباح زوھێر:

کاوە زوھێر رێڤەبەرێ رەوشەنبیری و ھونەری ل ئاکرێ بۆ ئەڤرۆ نیوز دیارکر: کو ڤەکرنا پەرتوکخانا تایبەت ب نڤیسەرێن ئاکرێ ئێک ژ پرۆژێن رێڤەبەریا ھونەری و رەوشەنبیری یە ل ئاکرێ، ئەڤ پروژە ل تەڤایا نڤیسەرێن ئاکرێ بخۆڤەدگریت، تا نھا مە قوناغەکا باش دەرباس کریە کو چەندین بەرھەم گەھشتی نە مە و ھاتینە پاراستن تا نھا ٢٥٠ ژێدەر گەھشتی نە مە و بەردەوام بەرھەمێن نڤیسەرا یێ زێدەدبن، ب شێوەکێ سەردەمانە ئەڤ پەرتوکخانە بۆ وان بەرھەما ھاتیە دروستکرن.

رێڤەبەرێ رەوشەنبیری و ھونەری ئاماژە دا وێ چەندێ کو مەرەما مە ژ ڤەکرنا پەرتوکخانێ پاراستنا بەرھەمێن نڤیسەرێن دەڤەرێ بھێنە پاراستن و دکیۆمێنت کرن، بۆ وێ ئێکێ ل داھاتی ئەڤ بەرھەمە ب ساناھی دەست ب خاندەڤانی بکەڤیت و مفای لێ ببینیت، خالا دی یا گرنگ گەلەک جاران قوتابیێن زانکویێ پێدڤی ژێدەرا دبن، ئەڤ چەندە ژی دێ بیتە پالدەرەک و پشتەڤانەک بۆ وان قوتابیا و دێ مفای لێ بینن بۆ ڤەکولینێن خوە.

ئەڤرۆ نیوز، شەهلا رێكانی:

سوئات ئوستا، ئەكتەرێ‌ بەرنیاسێ‌ باكورێ‌ كوردستانێ‌  بۆ ئەڤرۆنيوز گۆت: (ئەڤە جارا چارێ‌ یە ئەز پشكداریێ‌ د فلمە ڤیستەڤالا دهوكێ‌ یا نیڤدەولەتی دا دكەم، گەلەكێ‌ كەیف خوه‌شم ب ئەنجامدانا ڤێ‌ ڤیستەڤالێ‌ ل باژێرێ‌ دهوكێ‌).

سوئات ئەو ژی گۆت: (نێزیكبۆنا من و هونەری هوسا چێبو ل دەستپێكێ‌ من تەمبور دژەنی پاشی دەست ژ تەمبورێ‌ بەردا و دەست ب شانویێ‌ كر و پاش درامایێ‌ و پاش سینەمایێ‌).

سوئات گۆت ژی: (من پشكداری د چەندین فلمێن سینەمایا كوردیدا كریە ژ وان ژی ( زاگرۆس، چاردەی تیرمەهێ‌، وەلاتێ‌ منێ‌ تەعل و شرین، بیرئانینا ل سەر كەڤرا، ئالان، پانتور…) و ئەڤ فلمە د ڤیستەڤالێن نیڤ دەولەتی دا هاتینە نیشان دان و خەلات ژی ڤان فلما وەرگرتینە، هەروەسا ئەڤە 17 سالە ئەز د ناڤا سینەمایێ‌ دا كار دكەم).

دياركر: (هەتا نها من یەك خەلات د وارێ‌ سینەمایێ‌ دا وەرگرتیە).

ل دۆر شەشەمین فلمە ڤیستەڤالا دهۆكێ‌ گۆت: (سینەمایێ‌ سنور نینە، ئاستێ‌ ڤیستەڤالێ‌ باش د هەلسەنگینم، ژبەركو ئەڤ سالە فلمە ڤیستەڤالا دهوكێ‌ پێشڤەچۆنەكا باشتر ب خۆڤە دیتیە ژ سالێن بوری).

بۆ زانین فلمێ‌ (زاگرۆس) د شەشەمین فلمە ڤیستەڤالا دهوك یا نیڤدەولەتی دا هاتیە نیشان دان.

ئه‌ڤرۆ نیوز، مه‌حمود نهێلى:

ژ ئه‌نجامێ بارینا بارانێن زۆر و رابوونا رووبارێ زێ و دروست بوونا له‌هیان زیان گه‌هشتینه‌ پرۆژیێ هایدروپاوه‌رێ دێره‌لۆك و كارێ چێكرنا پرۆژه‌ى راوه‌ستاندیه‌.

سائیر ئامێدى ئه‌ندازیارێ سه‌رپه‌رشتێ پرۆژه‌ى بۆ ئه‌ڤرۆ نیوز دیاركر، كو ئه‌ڤه‌ بارینا باراێن زۆر بوویه‌ ئه‌گه‌رێ دروست بلند بوونا ئاستێ رووبارێ زێ و ب ڤێ یه‌كێ چه‌ند زیانێن بچووك گه‌هشتینه‌ پرۆژه‌ێ هایدروپاوه‌رى و گۆت: ( ئه‌ڤ بارانه‌ بوویه‌ ئه‌گه‌رێ خراب بوونا جاده‌یه‌كا هاتن و چوونا ئامیرێن كارى یێن پرۆژه‌ى و هه‌روه‌سا ئاڤ چوویه‌ جهێ سه‌بكرنێ یا كارى كو دێ بیته‌ ئه‌گه‌رێ گیروبوونا كارى).
ناڤهاتى دیار ژى كر، كو ئامیره‌كى كونكرنا كه‌ڤران ژى مایه‌ د ئاڤێ دا لێ زیان نه‌گه‌هشتینێ و دشیان دا یه‌ بیننه‌ ده‌ر

 

ئه‌ڤرۆنیۆز، سالار دۆسكى:

قائیمقامێ قه‌زا دهۆكێ ئاشكراكر كو مه‌ترسى ل سه‌ر ئه‌وا خێزانا نینه‌ ئه‌وێن سالا بوورى ژ ئه‌گه‌رێ لافا ل سه‌نته‌رێ قه‌زا دهۆك زیان ڤێ كه‌فتین و ئه‌ڤ ساله‌ چه‌ندین پێنگاڤ بۆ رێگریكرن ل لافاوا هاتیه‌ هاڤێتن.

جه‌هوه‌ر عه‌زیز، قائیمقامێ قه‌زا دهۆكێ، ئه‌ڤرۆ رۆژا ئه‌ینى 26/10/2018 بۆ ئه‌ڤرۆ نیۆز گۆت: هه‌تا ده‌مژمێر دو پشتى نیڤرۆ یا ئه‌ڤرۆ هه‌ر چ روودانێن لافا وا ل سه‌نته‌رێ پارێزگه‌ها دهۆك دروست نه‌بووینه‌، جهێن سالا بورى روودان لێ دروست بووین ئه‌ڤ ساله‌ هاتینه‌ دیواركرن، تایبه‌ت دناڤبه‌را مزگه‌ڤتا صه‌لاحه‌دین و پرا نێزیك ناوچا شورش و مه‌ترسیا سالا بورى ئه‌ ساله‌ دروست نابیت، دیسا ل تاخێ شێلێ ژى كارێ به‌رده‌وام ل سه‌ر وى جهێ سالا بورى روودان لێ دروست بووى كو ئه‌ڤ ساله‌ دروست نه‌بیت.

جه‌هوه‌ر عه‌لى، ئه‌ڤ جهێن هاتینه‌ دروستكرن هه‌ر سال روودان لێ دروست بوون تایبه‌ت ده‌مێ ئاڤ رابوونان، سالا بوورى جه‌نابێ پارێزگه‌رێ و نێچیرڤان بارزانى سه‌رۆكێ حوكمه‌تێ سه‌ردانا ڤى جهى كربوو، ب وێ مه‌ره‌مێ كو مه‌ترسى ل ئه‌ڤان خێزانا نه‌مینت، هه‌ر سالا بوورى ئه‌و خه‌لك هاتنه‌ قه‌ره‌بووكرن ئه‌وێن زیان ژ ئه‌گه‌رێ لاوفا وا گه‌هشتینێ.
ناڤبرى ئه‌و ژى ئاشكراكر كو بتنێ چاره‌سه‌رى بۆ ئه‌وان جهان هاتیه‌كرن ئه‌وێن سالا بورى لافاو لێ دروست بووین، لێ هه‌موو ریبارێ هشكه‌ روو ره‌نگ ئه‌ڤ ساله‌ مه‌ترسى ل سه‌ر هه‌بن، هه‌ر جهه‌كێ پێشبینیا دروست وبوونا لافاوا دهێـه‌كرن كه‌فتیه‌ پلانا مه‌دا، لێ باشتر ئه‌وه‌ ئه‌و پلانا بۆ هشك رووى هاتیه‌دانان و پشكه‌ك ژوێ هاتیه‌ جێبه‌جێكرن و وێ كومپانیێ ژ به‌ر قه‌یرانا دارایى بجه هێلایى هیڤدارین ئه‌و پلان بكه‌ڤیته‌ دبیاڤێ بجهئینانێ دا و مه‌ترسیا هشك روو ب ته‌مامى ل سه‌ر وه‌لاتیێن ده‌ر دورى خوه‌ نه‌مینت.

قائیمقامێ دهۆكى، ئاماژه‌ كره‌ وێ چه‌ندێ كو باران بارینا به‌رده‌وامه‌ لێ هه‌تا نوكه‌ چ رودان دروست نه‌بووینه‌، به‌رامبه‌ر هه‌موو فه‌رمانگه‌هێن حوكمه‌تێ د ئاماده‌باشیێ دانه‌ بۆ هه‌ر روودانه‌كا نه‌ چاڤه‌رێكرى.هه‌ڤده‌م بێوار عه‌بدوالعزیز، رێڤه‌به‌رێ په‌یوه‌ندى و راگه‌هاندنێ ل رێڤه‌به‌ریا به‌رگێریا شترستانى بۆ ئه‌ڤرۆ ئاشكراكر كو ژ ئه‌گه‌رێ هاتنا بارانا ل شه‌ڤا بورى هه‌تا نوكه‌ چ روودان و لافاو سه‌نته‌رێ دهۆك دروست نه‌بووینه‌.

website security