NO IORG
گشتپرسی

ئه‌ڤرۆ نیوز:
ئالتان تان، پەرلەمانتارێ ھەدەپێ ئیران و تورکیا و حکومەتا ئیراقێ ب دژوارترین رەنگ رەخنە کرن و گۆت: دەما ئەو بەحسا ئێکپارچەییا ئیراقێ دکەن ئەو ب رەنگەکێ گالتەجاری ڤە ل وان دنێریت.
ئالتان تانی ل پەرلەمانێ تورکیا گۆت: ئێکپارچەییا ئیراقێ ھەبوونا خوە نینە و دەمەکە یا پارچەکرییە، ھەرن سکۆتینا ژاپۆنی ژی بینن ھەکەر خوە پێکڤە گرت و بۆ ئێکپارچە بلا ئێکچارچە بیت.
وی پەرلەمانتارێ ھەدەپێ پێشنیاز كر كو باشترین چاره‌سه‌ری بۆ قۆناغا پشتی رێفراندۆما سه‌رخوه‌بوونا كوردستانێ “ده‌وله‌تا فێدرال یا كوردستانێ” یه‌ كو كورد و توركمان و عه‌ره‌ب پێكڤه‌ تێدا بژین.
ناڤهاتی بەحسێ داخویانیێن بەرپرسێن تورکیا ل سەر کەرکووکێ کر و گۆت: ئەز چەندین جاران چوویمە کەرکووکێ و ل هه‌می كولانێن وێ گه‌ریامه‌، لێ ئەوێن بەحسێ کەرکووکێ دکەن هه‌روه‌سا ئەوێن بەری وان، نە ل ڤی سەردەمی و نە ل سەر دەمێ سەدامی و نە ل سەردەمێ غازی سەرا وی باژاری نەدایە و چ ژێ نزانن بتنێ دئاخڤن، هوون بۆچی هه‌ما ژیانا خوه‌ نه‌چووینه‌ وێرێ؟
“بلا به‌رپرسێن ئاكه‌پێ و مه‌هه‌پێ بێژن كا چ چاره‌سه‌ری بۆ هه‌رێما كوردستانێ هه‌یه‌ و پرۆژه‌یێ خوه‌ پێشكێش بكه‌ن.”

ئه‌ڤرۆ نیوز:
سه‌رۆككۆمارێ توركیا و سه‌رۆكێ رۆسیا پشتی ل توركیا كۆم بووی د پرێسكۆنفرانسه‌كی دا ئاماژه‌ كره‌ رێفراندۆما سه‌رخوه‌بوونا كوردستانێ و دیار كر كو هه‌ردو ئالییان ئه‌و مژار گۆتوبێژ كر، لێ ڤلادیمێر پۆتینی چ گۆتنین راسته‌راست و ره‌تكرنێ نه‌گۆتن.
ره‌جه‌ب ته‌یب ئه‌ردۆغانی گۆت: توركیا د گه‌ل ئێكپارچه‌ییا ئیراقێ یه‌.
ڤلادیمێر پۆتین ژی گۆت: هه‌لوه‌ستی رۆسیا ل دۆر ریفراندۆمێ یێ دیاره‌ و هه‌مان ئه‌و هه‌لوه‌سته‌ یێ وه‌زاره‌تا مه‌ یا ده‌رڤه‌ ئاشكرا كری.
وه‌زاره‌تا ده‌رڤه‌ یا رۆسیا راگه‌هاند بوو: هه‌رچه‌نده‌ ئه‌و دخوازن كورد د چارچووڤه‌یێ ئیراقێ دا بمینن لێ د هه‌مان ده‌م دا رێزێ ل خواستا نه‌ته‌وه‌یی یا كوردان دگرن.

ئه‌ڤرۆ نیوز:
رۆژنه‌مه‌یا ئه‌لنه‌هار یا ئیراقێ بۆ نیشاندانا دینامیك و قۆناغا پشتی رێفراندۆما سه‌رخوه‌بوونا كوردستانێ وێنه‌یه‌ك د به‌رپه‌رێ ده‌ستپێكێ یێ رۆژنامه‌یێ دا به‌لاڤ كرییه‌ كو دوور ژ هه‌می ستانده‌رێن رۆژنامه‌ڤانییه‌ و نزمترین ئاستێ ره‌وشتی نیشان دده‌ت.
ئه‌لنه‌هار وێنه‌ك به‌لاڤ كرییه‌ كو ژ فلمه‌كێ بێپه‌رده‌یێ وه‌رگرتییه‌ پێنج زه‌لام نیشان دانه‌ د گه‌ل ژنه‌كێ دا كو ل گۆری دیاركرنا وان ئه‌و ژن كوردستانه‌ و زه‌لام ژی ئیراق و جیرانێن وێ نه‌.
گه‌له‌ك رۆژنامه‌ڤانێن كار بۆ وێ رۆژنامه‌یێ كار دكه‌ن وه‌ك پشته‌ڤانێن مالكی دهێنه‌ نیاسین.
پشتی به‌لاڤبوونا وێ رۆژنامه‌یێ گه‌له‌ك شرۆڤه‌كاران دیار كرییه‌ كو ئه‌و یه‌ك وه‌سا نیشان دده‌ت كو ئه‌قلێ رۆژنامه‌ڤانێن به‌لاڤكه‌رێن وێ رۆژنامه‌یێ ب بابه‌تێن بێپه‌رده‌یێ ڤه‌ هاتییه‌ داگیركرن و میدیایا هنده‌ك ئالیێن ئیراقی هه‌می سنۆران ده‌رباز دكه‌ن بۆ مه‌ره‌مێن به‌رته‌نگ دژی هه‌رێما كوردستانێ.
ئه‌و بابه‌ت د هه‌ژمارا 1644 یا رۆژا سێشمه‌بی 2017 هاتییه‌ به‌لاڤـ كرن و ل سه‌ر مالپه‌رێ وێ ژی هه‌یه‌.

alNahar

ئه‌ڤرۆ نیوز:
مه‌سرور بارزانی، راوێژكارێ جڤاتا ئاساییشا هه‌رێما كوردستانێ د په‌یامه‌كێ دا ل دۆر ئه‌نجامێن رێفراندۆما سه‌رخوه‌بوونا كوردستانێ پیرۆزباهی ل خه‌لكێ كوردستانێ كرن و ره‌خنه‌ ل هه‌لوه‌ستێ په‌رله‌مانێ ئیراقێ گرت.
مه‌سرور بارزانی: ئه‌ز پیرۆزباهییا گه‌لێ كوردستانێ ل سه‌ر وێ سه‌ركه‌فتنا مه‌زن یا د رێفراندۆما سه‌رخوه‌بوونێ دا بده‌سڤه‌ئینای دكه‌م، نها لاپه‌ره‌یه‌كی نوو بۆ مه‌ ڤه‌بوو.”
“كوردستان بزاڤا دانوستانان ب باوه‌رییه‌كا باش ڤه‌ دكه‌ت ل سه‌ر بنه‌مایێ رێزگرتنا هه‌ڤپشك، بریارێن ئه‌ڤرۆ یێن په‌رله‌مانی ئیراقێ د ئازرینه‌ر، نه‌هاریكار و نه‌به‌رپرسیارانه‌نه‌.”
“ئه‌ڤ ئه‌قلییه‌تا حكومه‌تا ئیراقێ نیشانا دژایه‌تیكرنا خه‌لكێ كوردستانێ یه‌، هه‌ر ئه‌ڤ ئه‌قلیه‌ته‌ و ته‌همیشكرنه‌ بوو كو به‌رێ مه‌ دایه‌ رێفراندۆمێ.”
“پێدڤییه‌ به‌غدا بزانیت كو ب ره‌تكرنا دانوستان و رێككه‌فتنێ ئه‌و كوردستانێ پتر ژ خوه‌ دوور دكه‌ت.”

ئه‌ڤرۆ نیوز:
پشتی دو كونگرێسمانێن ئه‌مریكا پشته‌ڤانییا خوه‌ بۆ سه‌رخوه‌بوونا كوردستانێ نیشان دای و بریاره‌ك ل دۆر وێ مژارێ پێكێشی كۆنگرێسی كری، سه‌ركرده‌یێ سیناتۆرێن دیمكۆراتان ژی ل ئه‌مریكا داخوازا پشته‌ڤانییا سه‌رخوه‌بوونا كوردستانێ ژ كۆچكا سپی كر.
سیناتۆر چه‌ك شومه‌ری د به‌یانه‌كێ دا راگه‌هاند: رێفراندۆما سه‌رخوه‌بوونا كوردستانێ گاڤه‌كا دیرۆكی یه‌ و پێدڤییه‌ رێز ل ئه‌نجامێ وێ كو ده‌نگێ به‌لێ پتری نۆت و دو سه‌دێ یه‌، بهێته‌ گرتن و بهێته‌ ناساندن.
شومه‌ری گۆت ژی: پێدڤییه‌ د زووترین ده‌م دا كوردستان ببیته‌ ده‌وله‌ت و ئه‌مریكا ژی پشته‌ڤانییا پرۆسه‌یه‌كا سیاسی بكه‌ت كو ئیراده‌یا كوردان بۆ سه‌رخوه‌بوونی بجهـ بینیت.
” د ده‌هـ سالێن بۆری دا ئێك ژ بهێزترین هه‌ڤپه‌یمانێن مه‌بوویه‌ ل سه‌ر ئه‌ردی د شه‌رێ دژی تیرۆرێ دا و مه‌ پتر ژ جاره‌كێ پشتبه‌ستن ب پێشمه‌رگه‌ی كرییه‌، هه‌روه‌سا وان كه‌مینه‌یێن ئایینی و نه‌ته‌وه‌یی ژی پاراستینه‌… كوردان گه‌له‌ك خه‌باته‌كا بزه‌حمه‌ت و درێژ بۆ ده‌وله‌تبوونێ كرییه‌، لێ ب به‌رده‌وامی رێككه‌فتنێن بێ رامان د گه‌ل وان دهێنه‌ كرن و ب وان دهێته‌ گۆتن كو خوه‌ ل سوبه‌هی بگرن، له‌ورا ده‌مێ وێ بۆری یه‌ و پێدڤییه‌ ئێدی ئه‌مریكا و جیهانا ئه‌مریكا سه‌ركێشییێ لێ دكه‌ت پرۆسه‌كا سیاسی پێكبینن كو كار بۆ بجهئینانا وێ داخوازا كوردان بگریت.”
“د مه‌هێن بهێت دا پێدڤییه‌ هه‌می ئالیێن ئیراقێ بكه‌ڤنه‌ د دانوستانان دا ب ئاشتییانه‌ خوه‌ د گه‌ل داخوازێن كوردان بگونجینن، هه‌ڤكارییا هێزێن كوردی و ئیراقی به‌رده‌وام بیت، ب تایبه‌ت ل دژی تیرۆرێ كو بۆ هه‌ر گوهرینه‌كێ یا گرنگه‌.”
“جیرانێن ئیراقێ ژی ئیراقێ ژی كو هه‌می دژی ده‌وله‌تا كوردی نه‌ ژبه‌ركو وه‌ك گه‌ف بۆ ره‌وشا خوه‌ یا سه‌لماندی و به‌رژه‌وه‌ندیێن خوه‌ یێن تایبه‌ت دبینن، پێدڤییه‌ رێزێ ل پێویستییا كوردان و ئیراقییان ب بریاردانا چاره‌نڤیسێ خوه‌ بگرن.”

ئەڤرۆ نیوز، نەوزاد ھلوری:
دەمەکى بەریا نھا ل دەمژمێر ل ده‌مژمێر 8:00ى سپێدێ سندوقێن دەنگدانێ بەرامبەر دەنگدەرێن ھەرێما کوردستان و دەڤەرێن كوردستانى يێن ده‌رڤه‌ى ئيدارا ھەرێما کوردستانێ دەستپێکر و بڕیاره‌ ھەتا دەمژمێر ٦:٠٠ێ ئێڤاری یا بەردەوام بیت.
عه‌لى بەندی رێڤەربەرێ گستيێ کومسیوونا بلندا سەربخوەی یا کوردستانێ ل دھۆکێ بو ئەڤرۆ نیوز گۆت: (ھەموو بەرھەڤی ھاتینەکرن و ئەڤرۆ ھەموو بنگەهـ ھاتینە ڤەکرن و ل گورەی ئەو بەرنامەیێ َکو ھاتیە دانان پرۆسە دێ ھەتا دەمژمێر 6:00ێ ئێڤاری یا بەردەوام بیت).
زێدەتر گۆت: (ل ھەموو سنورێ پارێزگەھا دھۆک 744 ھزار و 736 دەنگدەرێن گشتى و چار ھزار و 497 دەنگدەرێن تايبه‌ت ھەنە، 256 بنگەھێن دەنگدانێ و ھزار و575 وێستگەھێن دەنگدانێ ھاتینە دانان.

دناڤا 15 کەمپان ژی دا ھەموو بەرھەڤیێن دەنگدانێ ھاتینەکرن و ل ھەر کەمپەکێ ژی بنگەھەک یان دو بنگەهـ بهێنه‌ دانان و 175 ھزار و 24 ئاوارەیان مافێ دەنگدانێ د ناڤ کەمپان دا ھەیە و 140 ھزار و 155 ئاوارەیان ژی ل دەرڤەى کەمپان مافێ دەنگدانێ ھەیە و 24 بنگەھێن دەنگدانێ بو ئاوارەیان ل دەرڤەیێ کەمپان ھاتینە دانان).

ئەڤرۆ نیوز ، ھلوری:
نێچیرڤان بارزانی سەرۆکێ حکومەتا ھەرێما کوردستانێ پەیامەک بەلاڤکر و تێدا دیارکر کو دەنگێ ھەوە دێ ھێزەکا زێدەتر ب کوردستانێ دەت و بو ئایندەیەکێ باشتر بو خوە و نەڤێن خوە بێژن بەلێ بو سەربخوەی یا کوردستانێ

ئەڤا ل خوارێ دەقا وێ یە

کوردستانیێن خوشتڤی
سوبەھی ٢٥ ئیلونێ رۆژا ریفراندۆم بو سەربخوەی یا کوردستانێ یە ، رۆژا دیارکرنا چارەنڤسی یە و رۆژا بریاردانێ یە ل ئایندەیەکێ باشتر بو ھەوە و نەڤیێن ھەوە ، رۆژا پێنگاڤ ھاڤێتنێ یە بەر ب دەستڤەئینانا خەونا ھزاران شەھید و ئەنفال و کێمیاباران و رەڤاندنیان ، روژا سەرئێخستنا کوردستان و گەلێ کوردستانێ یە ب ھەموو پێکھاتەیێن نەتەوەیی و ئاینی ڤە ، رۆژا بجھکرنا ئەرکێن نیشتمانی و نەتەوەیی یە ، روژەکە دڤێت تێدا ھەموو ناکوکیی و ململانێ و نیگەرانیێن خوە بدەینە لایەکێ و ب گەرما و گەرم بچنە سەر سندوقێن دەنگدانێ و بێژین بەلێ بو سەربخوەی یا کوردستانێ.

کوردستانیێن ھێژا
سوبەھی ھەتاکو پشکداری و دەنگێ بەلێ یا ھەوە ل ریفراندۆمێ بو سەربخوەیێ زێدەتر بیت ، دێ ھێزەکا زێدەتر ب کوردستانێ دەتن و گەرنتیەکا مەزنتر بو ب دەستڤەئینانا ماف و درۆستکرنا کوردستانەکا سەربخوەی ب ھێز دەست ڤە ئینیت ، ژ بەرڤێ بلا ئەم ھەموو سوبەھی پێکڤە ب بەرپرسیارانە ، و ب ئارامی و ل کەش و ھەوایەکێ شارستانی و ئازاد و دیموکراسی دا بێژین بەلێ بو سەربخوەی یا کوردستانێ و بەلێ بو ژیان و ئانیدەیەکێ نوو و بەلێ بو پەیوەندیەکا دوستانە لگەل ھەڤسویان و جیھانێ.

ئەڤرۆ نیوز ، نەوزاد ھلوری:
وەکو پشتەڤانی ژ بوو ھوشیارکرنا دەنگدەران و پالدانا وان ژ بو دەنگدان لسەر ریفراندۆم بو سەربخوەی یا کوردستانی ئەڤ شەڤە و سوبەھی سپێدێ دێ تەکبیرات ل ھەموو مزگەفتێن سنوورێ پارێزگەھا دھۆک ھێنە لێدان.
دڤی واریدا مەلا دلشاد بێسکفی بەرپرسێ لژنا دھۆک یا ئێکەتیا زانایێن ئاینێ ئیسلامێ بۆ ئەڤرۆ نیوز گۆت: ( ژلایێ ئێکەتیا زانایێن ئاینێ ئیسلامێ ل کوردستانێ فەتوایەک وەکو بریار ھاتیە دەرکرن بو لێدانا تەکبیراتان ل ھەموو مزگەفتێن کوردستانێ ، و مەژی ھەموو مزگەفتێن سنوورێ پارێزگەھا دھوکێ ئاگەھدارکرینە کو ب رێیا بلندگویان ئەڤ شەڤە و سوبەھی سپێدێ دەمژمێر ٨:٠٠ ل گەل ڤەکرنا دەرگەھێن سندوقێن دەنگدانێ تەکبیراتێن اللە اکبر ، اللە اکبر ، لا الە الا اللە ، اللە اکبر ، اللە اکبر ، واللە الحمد بھێنە بلندکرن )
زێدەتر گۆت : ( ل گورەی شەریعەتێ ئیسلامێ درۆستە کو ژ بوو خوشیان تەکبیران بھێنە بلندکرن ، بو مە وەکو گەلێ کوردستانێ خوشترین رۆژ سەربخوەی بوونە ، و مزگەفت ھەر ژ دەستپێکا ھەوبونا خوە ھەتا نھا روولەکێ بەرچاڤ ھەبوویە د ھوشیارکرنا خەلکی دا و ھەر ب مەرەما ھوشیارکرنا خەلکی و وەکو ئەرکەکێ نیشتمانی مزگەفتێن مە دێ ب ئەرکێ ھوشیارکرنا خەلکی رابرن)

ئەڤرۆ نیۆز، عەزیز ھەورامی :
کومسیوونا بلند یا ھەلبژاردن و راپرسیێ ل ھەلەبچە دیارکر کو ھەموو بەرھەڤی ژ بوو ئەنجامدانا پرۆسەیا ریفراندۆمێ ل سنوورێ پارێزگەھا ھەلەبچە ھاتینەکرن.
حەمەسەعید ئەحمەد رێڤەبەرێ کومسیوونا بلند یا ھەلبژاردن و راپرسیێ ل ھەلەبچە بۆ ئەڤرۆ نیوز گۆت: ( ھەموو بەرھەڤیێن ریفراندۆمێ بو سوبەھی ھاتینەکرن و ھەموو پێدڤیێن دەنگدانێ یێن لوجستی لسەر بنگەھێن دەنگدانێ ل سنوورێ پارێزگەھا ھەلەبچە ھاتینە بەلاڤکرن)
زێدەتر گۆت: (ل سنوورێ پارێزگەھا ھەلەبچە ٧٦ ھزار دەنگدەر ھەنە ، و ٢٧ بنگەھێن دەنگدانێ و ١٦٤ وێستگەە بو ھاتینەدانان )

ئەڤرۆ نیوز ، ھلوری:
ھەر ئێک ژ تەڤگەرا گۆڕان و کومەلا ئیسلامی یا کوردستانێ ب رێیا راگەھاندێن خوە جەماوەر و لایەنگیرێن خوە راسپاردن کو ب بەلێ دەنگی بو پروسەیا ریفراندۆما سەربخوەی یا کوردستانێ بدەن.

جڤاتا نیشتمانیا گۆڕان ل سلێمانیێ ئەڤرۆ ل سەر داوی ھەلویستێ خوە لسەر پرۆسەیا ریفراندۆما سەربخوەی یا کوردستانێ کومبوو و ل گورەی ئەوان زانیاریێن کو دەست ئەڤرۆ نیوز کەفتین گۆڕانێ جەماوەر و لایەنگیرێن خوە راسپاردینە کو ب بەلێ دەنگی بو پرۆسەیا ریفراندۆما سەربخوەی یا کوردستانێ بدەن.

ژلایەکێ دنڤە کومەلا ئیسلامی یا کوردستانێ د راگەھاندنەکێ دا کو ئاراستەیێ جەماوەر و لایەنگیرێن خوە کریە و دانەیەک دەست ئەڤرۆ نیوز کەفتیە دیارکر کو دەنگێ وان بو ریفراندۆما سەربخوەی یا کوردستانێ دێ ب بەلێ بێت ژبەرکو ئەگەر ژ ھەر کوردەکێ دلسووز پرسیار بکەی ئەرێ ھەوە دەولەتا سەربخوە دڤێت ، بێگومان دێ بێژیت بەلێ.

website security
Facebook Auto Publish Powered By : XYZScripts.com