NO IORG
Twitter

ئەڤرۆ نیۆز ، زنار تۆڤی:

ئەڤرۆ ئەینیێ 29.12.2017 ل گرێ بارۆخێ ل ناحیا کانی ماسێ یێ سەر ب قەزا ئامێدیێ ڤە شەر دناڤبەرا گەریلایێن پەکەکێ و سۆپایێ تورکیا دا روودایە.
کەسەکێ ژ ناحیا کانی ماسێ نە ڤیا ناڤێ خۆ ئاشکەرا بکەت بۆ ئەڤرۆ نیۆز گوتیە:ئەڤرۆ ئەینیێ و ل دەمژمێر 12:30 نیڤرۆ گەریلایێن پەکەکێ دو میلانۆ گرتینە تانک و زریپۆشێن سۆپایێ تورکی ل بارۆخێ،د هەمان دەمدا سۆپایێ تورکی ب چەکێن گران و سڤک دەردورا خۆ داینە بەر گولە تۆپان رەمیا هوور ژی کریە،دیارکر ژی:ل دەمژمێر 1 نیڤرۆ فرۆکێن f16 یێن سۆپایێ تورکی زنجیرا چیایێ گابنێرکی دایە بەر بۆمبان و دیسا جارەکادی ل دەمژمێر 2:45  فرۆکێن f16 یێن سۆپایێ تورکی دەردورا گابنێرکی و بارۆخێ ب دژواری بۆمبەبارانکرینە ڤە.
هەروەسا گوت ژی:دەربارەی زیانێن سۆپایێ تورکی هەتا نوکە چو زانیاری نە گەهشتینە مە.

ئه‌ڤرۆنيوز:

ئه‌ميندارێ گشتيێ حزبا ئيسلامى يا عيراقى داخوازێژ كوردان دكه‌ت، ده‌ستپێشخه‌ريێ ل گه‌ل سونه‌يان بكه‌ن بۆ پێكئينانا هه‌ڤپه‌يمانيه‌كا نيشتمانى بۆ گوهۆرينا هه‌ڤكێشێن سياسى ل عيراقێ.

ئه‌ياد سامه‌رائى، ئه‌ميندارێ گشتيێ حزبا ئيسلامى يا عيراقى دگۆتاره‌كێ دا كو ل سه‌ر تۆرا جڤاكى يا فه‌يسبووكێ به‌لاڤكره‌ بێژيت” هه‌لويستێ نه‌ جێگير يێ كوردان، وه‌كريه‌ كو سه‌رۆك وه‌زيرێن عيراقێ له‌زێ دچاره‌سه‌ررنا كێشان ل گه‌ل هه‌رێما كوردستانێ نه‌كه‌ت، له‌وما ب پێدڤى دزانم برايێن كورد چاره‌سه‌ريا وان كێشه‌ وناكۆكيان بكه‌ن يێن كه‌فتينه‌ دناڤبه‌را واندا”.

دپشكه‌كا دى يا گۆتارا خوه‌ دا، ئه‌ميندارێ گشتيێ حزبا ئيسلامى يا عيراقى، دبێژيت” من پێزانين يێن هه‌ين كو هنده‌ك وه‌لاتێن جيهانێ شيره‌ت ل حه‌يده‌ر عه‌بادى كرينه‌ وداخواز ژێ كريه‌ له‌زێ دلێك تێگه‌هشتنێ ل گه‌ل هه‌رێما كوردستانێ بكه‌ته‌، وه‌لاته‌كێ ئورۆپى يێ گرنگ ژى گه‌فێن راگرتنا پشته‌ڤانيا دارايى ل عيراقێ كرينه‌، هه‌كه‌ ل گه‌ل هه‌رێما كوردستانێ رێك نه‌كه‌ڤيت”.

ئه‌ياد سامه‌رائى دوێ نڤيسينا خوه‌ دا ئاماژێ دكه‌ت كو” دبيت عه‌بادى سياسه‌ته‌كا تايبه‌ت ب په‌يوه‌نديان ل گه‌ل كوردان ب رێڤه‌ببه‌ت ونه‌ڤێت چو كه‌سه‌ك ده‌ستێوه‌ردانێ دكارێن وى دا بكه‌ت”.

سامه‌رائى دووپاتى ل وێ چه‌ندێ كر كو” نابيت كورد چاڤه‌رێى وێ چه‌ندێ بن كو شاندێ سونه‌يان بچن لايێ وان، داخوازێ ژێ دكه‌م ئه‌وژى ده‌ستپێخه‌ريێ بكه‌ن، چونكى هه‌بوونا هه‌لويسته‌كێ هه‌ڤپه‌يمانانه‌ دناڤبه‌را كورد وسونه‌يان دا وپاشى گوهۆرينا وى بۆ هه‌لويسته‌كێ نيشتمانى وگرێدانا هێزێن دى پێڤه‌، دێ هه‌تا ئاسته‌كێ مه‌زن ودوور هه‌ڤكێشان گوهۆريت”.

ئەڤرۆ نیۆز، تۆڤی:

وەزیرێ ساخلەمیێ یێ حوکمەتا هەرێما كوردستانێ دیارکر،دێ هەموو هەماهەنگی و ئاسانكاریان کەین بۆ هنارتنا لیستێن مووچێ فەرمانبەران بۆ بەغدا.

چەند رۆژن پشتی كۆنگرێ رۆژنامەڤانی یێ حەفتیانە ی حەیدەر عەبادی سەرۆك وەزیرێ عێراقێ دەنگۆیێ هندێ بەلاڤبوویە،کو بەغدا هووربینی د لیستا مووچێن دو وەزارەتێن هەرێمێ كوردستانێ دا كریە ب مەبەستا هنارتنا مووچێن وان.

دکتۆر رێكەوت حەمەرەشید وەزیرێ ساخلەمیێ ل حوکمەتا هەرێما كوردستانێ راگەهاندیه، پرسیارەکا زۆر ژ وان دهێتە کرن،ل سەر ئەگەرێ هنارتنا مووچێ نۆشدارو كارمەندێن ساخلەمیێ ژلایێ حوکمەتا عێراقێ ڤە، بەلێ ل سەر فەرمانا سەرۆكێ جڤاتا وەزیران و جێگرێ وی دێ هەموو هەماهەنگی و ئاسانكاریەكێ كەن بۆ وێ بریارێ و دێ لیستێن مووچێن فەرمانبەران هنێرنە بەغدا،هەروەسا گوتیە،ئەو لیستە هاتینە هووربینی کرن و د پڕۆسا سەركەفتی یا بایۆمەتریدا هاتینە بژاردەکرن و د ئامادەنە.

هەروەسا دوهی نێچیرڤان بارزانی سەرۆكێ حوکمەتا هەرێما كوردستانێ د كۆنگرەیێ رۆژنامەڤانیێ خۆ یێ حەفتیانە دا راگەهاند، ئەو پێشەوازیێ ل هەر دەسپێشخەریەكێ دكەن بۆ هنارتنا مووچێ فەرمانبەران و د ئامادەنە كو لیستێن مووچەی ل دووڤ سیستەمێ بایۆمەتری بێخنە بەر دەستێ لایەنێن شۆلەژێ.

ئەڤرۆ نیوز، لەزگین جوقی:‏

رێڤەبەرێ نڤیسینگەھا رزگارکرنا رەڤاندیێن کوردێن ئێزدی ل دھۆکێ دیارکر کو ئەڤ ‏سالە ھەتا 28ى كانوونا ئێكێ 2017ێ 349 رەڤاندیێن ئێزدی یێن ھاتینە رزگارکرن ژ بەر ‏حەشدا شەعبی و ھەڤکارینەکرنا بەغدا 3173 رەڤاندیێن ئێزدی ھێشتا نەھاتینە ‏رزگارکرن.‏

حسێن قائیدی، رێڤەبەرێ نڤیسینگەھا رزگارکرنا رەڤاندیێن کوردێن ئێزدی ل دھۆکێ ‏‏28ى كانوونا ئێكێ پرێس کونفرانسەکی دا ئامارا رزگارکرنا رەڤاندیێن ئێزدی راگەھاند و گۆت: ‏‏”تەباخا سالا 2014 ل قەزا شنگال 6417 کەس ھاتبوونە گرتن و رەڤاندن ھەتا نھا ‏‏3244 رەڤاندیێن ئێزدی یێن ھاتینە رزگارکرن و ھیشتا 3173 رەڤاندیێن ئێزدی د ‏دەستێ تیرۆرستێن داعش دانە، ھەتا ئێک رەڤاندیێ ئێزدی مابیت ل دەڤ ئێزدیان ‏تیرۆرستێن داعش ژ عیراقی ب دووماھی نەھاتینە، ئەڤ سالە ب تنی 349 رەڤاندیێن ‏ئێزدی یێن رزگار بووین ژ وان ژی 102 کچ و ژنن و 9 زەلام و 238 زارۆ بووینە.‏

ئەو ژی دیارکر کو حوکمەتا عیراقی چو سوزێن خوە ل گەل ئێزدیان بجە نەئینان بۆ ‏رزگارکرنا رەڤاندیێن ئێزدی، “ئەڤ ژمارا ئێزدیێن ژ دەستێ داعش رزگار بووین ھەموو ب ‏ھەڤکاری و پشتەڤانیا نڤیسینگەھا سەرۆکێ حوکمەتا ھەرێما کوردستانێ بووینە”.‏

ئەڤرۆ نیۆز،زنار تۆڤی:

بریارە ل 2018 عێراق بچیتە ناڤ قۆناغەکا نوو ژ چەند روویان ڤە،ژ روویێ سیاسی ب رێڤەچوونا هەلبژارتنێن گشتی و جڤاتێن پارێزگەهان و دروستبوونا پەرلەمانی و حوکمەتێ و جڤاتێن نوو پارێزگەهان،ژ روویێ ئابووریڤە ئاڤەدانكرن و ڤەگەراندنا ئاواران و نەهێلانا گەندەلیێ و بێكاریێ، بەلێ سیناریۆیێن چاڤەرێکری بۆ پشتی پێكهاتنا حوکمەتا نوێ دێ د چاوا بن؟.

1- سیناریۆیا پێشبینیکری،ئەو پرۆژێ نوکە دهێته دیتن ب هەڤپەیمانیا دناڤبەرا حەیدەر عەبادیێ سەرۆك وەزیر و رەوتێ سەدر و رەوتێ حیكمە یێ نیشتیمانی کو زەمینەکا ل بار هەیە،کو ئەو پرۆژە هەکە سەربگریت، هەروەسا دهێتە چاڤەرێکرن ل دەمێ دروستبوونا زۆرینەیا هێزێن شیعی پەوەندیێ پێڤە بكەن،ل پێشیا وان بەدر و جڤاتا بلند یا ئیسلامی و فەزیلە و یێن سەربەخۆ ژی،ب واتایەکا دیتر،تاكە لایەنێ ڤەدەر كو د وی پرۆژەی دا نەبیت،هەڤپەیمانیا دەولەتا یاسایە و ئەو ژی دێ بنە ئۆپۆزسیۆن دناڤا پەرلەمانێ عێراقێ دا،ئەو هەڤپەیمانیا د دناڤا كورد و سوننەیان دا دێ ئەوان هەلبژێریت كو ل گەل وان د نێزیكن و ب ئاسانی دشێن حوکمەتێ پێك بینن،بۆ زانین ئەڤ هەڤپەیمانیە ژلایێ ئەمریكا و نەتەوێن ئێكگرتی و وەلاتێن دەڤەرێ پالپشتی لێ دهێتە کرن، ئیران دژایەتیێ ناكەت، بەلێ یا ب دلێ وێ ژی نابیت.

2-سیناریۆیا خواستی،رێكخراوا بەدر دێ بێتە هژمارەکا رووگەش و گرنگ دهەر پرۆژەکێدا، سەرەرای خواستا روون یا هادی عامری ئەمیندارێ گشتی یێ وێ رێكخراوێ بۆ ب دەستڤەئینانا هژمارەکا زۆر یا كورسیێن پەرلەمانی و پێكئێنانا حوکمەتا داهاتی ل عێراقێ،لێ ڤی پرۆژێ نوکە هوکارێن سەخت ل پێشیێ نە،ب ئەگەرێ راپرسیان،کو وێ گرانیێ نادەنە بەدر،بۆ هندێ کو ببیتە زەمینەکێ ل بار بۆ دروستبوونا وێ،بەلێ بەدر و هێزێن دیتر یێن ناڤ حەشدا شەعبی نەڤێت ئەو دەستكەفتێن عەبادی بدەستڤە ئیناین بۆ بەرژەوەندیا سەدری و حیكمە بكار بینن،وان ئەو بژارە ل پێشە كو هەول بدەن بۆ دروستكرنا هەڤپەیمانیێ ل گەل عەبادی،لەورا هەکە ئەو پرۆژێ دویێ سەربگریت،ل وی دەمی دشێن جڤاتا بلند یا ئیسلامی و سەربەخۆیان و رەوتێ حیكمە بۆ خۆ رابكێشن و ب تنێ رەوتێ سەدر دێ بیتە ئۆپۆزسیۆن دناڤ پەرلەمانیدا،ئەڤ سیناریۆیە دێ گەلەک ل دەف ئیرانێ یا پەسند بیت و ئەمریكا و وەلاتێن كەنداڤی ری رەت ناكەن،هەر چەندە ئەڤە ب دلێ وان نابیت.

3-سیناریۆیا شۆك،هەکە هەر ئێك ژ نوری مالكی و حەیدەر عەبادی د ئێک لیستا حزبی دا پشتی هەلبژاردنان ئێک بگرن،ئەو ژی هەکە دروست بیت،ئەڤە هەر ئێک ژ رەوتێ حیكمە و جڤاتا بلند یا ئیسلامی و بەدر و فەزیلە و سەربەخۆ دێ چنە پال وان و دیسا رەوتێ سەدر دێ وەك ئۆپۆزسیۆن مینیت و وێ گەلەک ترس ژی ژڤێ هەپەیمانیێ هەیە،چونکی ئەمریكا و ئیران دژایەتیێ ناكەن و دێ پێشوازیێ لێكەن،بەلێ دێ تەنگژێن سیاسی د نافخۆدا زێدەتر لێ هێن، هەروەسا رەوتێن حیكمە و سەدر و لایەنێن سوننی ب ئاسانی خۆ نادەنە دەست ڤێ سیناریۆیێ.

4-سیناریۆیا وێرانبوونێ، سەیرە كو ئێك ژ هەڤپەیمانیێن هاتینە پێشبینیكرن، سەرەرای زەحمەتی و مەترسیداریێ بۆسەر دۆخێ عێراقێ،بەلێ گەلەک ئاخفتن دڤی باریدا دهێنە کرن،کوهندەك پێشبینیا هەڤپەیمانیا دەولەتا یاسا و بەدر و هێزێن حەشدا شەعبی و فەزیلە و جڤاتا بلند یا ئیسلامی و لایەنگرێن وان دكەن،کو زۆرینەیەكا سیاسی نە نێزیكی ئیرانێ نە،کو هەڤپەیمانیا بەرگریێ پێك بینن،د بەرامبەر دا زۆرینەکا دیتر کو لایەنێن عەبادی و سەدری و حەكیمی و سەربەخۆ و مەدەنینە، كە زۆرینەکا نێزیكی ئەمریكا و وەلاتێن كەنداڤی پێك بینن،د وی دۆخی دا گۆرەپان بۆ زۆرینەکا ئیرانی و خودان چەكێ رەتكرنێ و بەرگری و حەشدێ،ل بەرامبەر زۆرینەکا چەكدار ب سوپا و یاسا و هێزێن تەناهییێ دێ دابەش بیت،ئەوێ ئێکێ دێ یێ دویێ ب داردەستێ ئەمریكا و وەهابیەتێ تۆمەتبار کەت و دێ یێ دویێ یێ ئێکێ ب دەرچوون ژ قانوونێ و پێدڤی بۆ روو ب روو بوونێ ل قەلەم دەت.

لەورا هەردو لایەنێن ڤێ سیناریۆیێ دێ بنە مایێ راكێشانا لایەنێن كوردی و سوننی و ل دووڤ تێپەربوونا دەمی عێراق دێ بۆ دو پشکێن سەر ب ئەمریكا و ئیرانێ ڤە دابەش بیت،ئەڤە ژی مانایا وێرانبوونەکا سەرانسەری یا سیاسی ل عێراقێ،یان ژی دروستبوونا شەرەکێ وێرانكار كو دێ سەرانسەری ئەزموونا عێراقا نوو ژناڤ بەت،لەورا پێدڤیە هێزێن شیعی ب خۆ رەت بكەن و پەنایێ بۆ سیناریۆیێن دیتر ببەن،راستە دێ هندەك لایەن ژ دەرڤەی ڤێ یاریێ مینن، بەلێ عێراقێ دابەش ناكەن و ناكەنە گۆرەپانا شەرەکێ ب وەكالەت.

ئه‌ڤرۆ نيوز:

12 كه‌سان گيانێ خوه‌ ژ ده‌ست دا و 15 ژى بريندار بوون، ژ ئه‌گه‌رێ ئاگربه‌ربوونا ئاڤاهيه‌كێ ئاكنجيبوونێ ئه‌ڤرۆ رۆژا ئه‌ينى ل ويلايه‌تا نيويورك يا ئه‌مريكا.

ب گۆره‌ى پێزانينان د ناڤ وان كه‌سێن گيانێ خوه‌ ژ ده‌ست داين زارۆ يێن هه‌ين و 15 كه‌س ژى ب ره‌نگێن جودا بريندار بووينه‌، ئاگر ل تاخێ برۆنكس ل باژێرى روودايه‌.

تيفانى فيليبس، فه‌رمانده‌كێ پۆليسايه‌، راگه‌هانديه‌ كو 160 كارمه‌ندێن به‌ره‌ڤانيا باژێرى بۆ كونترۆلكرنا ئاگرى ل جهێ روودانێ هاتبوونه‌ به‌لاڤكرن.

ئاماژه‌ ب وێ چه‌ندێ كريه‌ كو كارمه‌ندێن هه‌وارهاتنێ 12 كه‌س ژ ناڤ ئاگرى ل قاتێ ئێكێ رزگاركربوون.

 
ئەڤرۆ نیۆز ، زنار تۆڤى:

ئه‌ڤه‌ ماوێ سێ سالانه‌ كوردستان كه‌فتیه‌ ناڤ چه‌ندین قه‌یرانێن دژوار و هه‌روه‌سا كه‌فتیه‌ ناڤ ململانه‌كا سیاسى ل گه‌ل حوكمه‌تا عێراقێ و هه‌تاكو نوكه‌ پرانیا وان قه‌یران و ئاریشێن كوردستانێ ل گه‌ل عێراقێ هه‌ین نه‌هاتینه‌ چاره‌كرن و ماینه‌ هه‌لاویستى،سه‌ره‌راى ڤان هه‌موو ئالۆزى و نه‌خۆشیان لێ ملله‌تێ ژ ژیانێ مه‌ بێ هیڤى نه‌بوویه‌ و به‌رگرى ژ ئاخا وه‌لاتێ خوه‌ كریه‌،له‌ورا خه‌لكێ مه‌ د سالا نوو دا دخوازیت،كو ئه‌ڤ ئالۆزیه‌ ب دوماهى بهێن و جاره‌كادى خۆشى ئارامى ڤه‌گه‌ریته‌ كوردستانێ.

هه‌ژار نێروه‌یى ماموستایه‌كه‌ بۆ ئه‌ڤرۆ دبێژیت:ل گه‌ل چوونا هه‌ر ساله‌كێ و هاتنا ساله‌كا دیتر،هیڤێن خه‌لكێ ژى نوو دبن،هه‌روه‌سا ئه‌م پێشوازیێ ل سالا نوو دكه‌ین،وه‌كى مێهڤانه‌كێ نوو،دیسا هیڤیه‌ك ژى ل ده‌ف مه‌ په‌یدا دبیت،به‌لێ ل گه‌ل بورینا رۆژان ئه‌م وان هیڤیان ژ ده‌ست دده‌ین،لێ داكو ئه‌م رۆژێن ره‌ش نه‌بینین،دێ مه‌ هه‌ر هیڤى بۆ پاشه‌رۆژه‌كا گه‌ش هه‌بن،هه‌روه‌سا نوكه‌ چاڤێ مه‌ هه‌موو یان ل سالا نوویه‌،ژ پێخه‌مه‌ت ببیته‌ سالا بجهئینانا هه‌موو هیڤیێن ملله‌تێ مه‌ و ببیته‌ سالا خۆشیێ و شادیێ و سه‌ربه‌خۆیا كوردستانێ و بلند كرنا ئالایێ كوردستانێ ل هه‌موو ده‌ڤه‌رێن كوردستانێ،هه‌روه‌سا دیاركر ژى:ل ده‌ف من هه‌ر ده‌مێ سه‌ركرده‌ و سیاسه‌تمه‌دار و پارتیێن كوردستانى ئێكبگرن و دوور بن ژ ناكۆكیێ و ململانێ و كار بكه‌ن ژبۆ به‌رژه‌وه‌ندیا ڤى ملله‌تى،ل وى ده‌مى دێ هه‌ست ب ساله‌كا نوو كه‌ین،هه‌كه‌ ئه‌و رۆژ رۆژا دوماهیا سالێ ژى بیت ل جیهانێ،لێ ل ده‌ف ملله‌تێ مه‌ ئه‌و رۆژ دێ بیته‌ ساله‌كا نوو،دێ بیته‌ سالا بجهئینانا هیڤى و ئۆمێدێن گه‌لێ مه‌،له‌ورا ئه‌م چو جار بێ هیڤى نابین و هه‌رده‌م هیڤیێن مه‌ بۆ ژیانێ دگه‌شن.

خانمه‌كا گه‌نج ب ناڤێ هیڤى عه‌بدولا دبێژیت:ل سالا بورى گه‌له‌ك نه‌خۆشى و ده‌رده‌سه‌رى ب سه‌رێ ملله‌تێ مه‌ هاتینه‌ و مه‌ گه‌له‌ك قوربانى داینه‌،له‌ورا دخوازم سالا 2018 ببیته‌ سالا به‌خته‌وه‌ریێ بۆ ته‌ڤایا ملله‌تێ كورد و ببیته‌ سالا ب دوماهى هاتنا شه‌رى و خوین رشتنێ بۆ هه‌موو كوردستانیان،دیسا ببیته‌ سالا ب دوماهى هاتنا ڤان قه‌یرانێن نوكه‌ ئه‌م تێدا دژین و ئێدى خه‌لكێ مه‌ چاڤه‌رێى مووچه‌ى نه‌بیت،هه‌روه‌سا ئێدى چو كاره‌ساتێن دیتر ب سه‌رێ ملله‌تێ مه‌ نه‌هێن و كورد بگه‌هنه‌ هه‌موو مافێن خوه‌ یێن ره‌وا و گوت ژى:د خوازم د سالا نوو دا هه‌موو كێشێن نافخۆیى یێن كوردستانێ ب دوماهى بهێن و هه‌موو حزبێن كوردستانى ببنه‌ ئێك هه‌لویست و ئارمانجا وان ئێكگرتنا كوردستانێ بیت و مه‌ره‌ما وان هه‌موو یان پێكڤه‌ باشكرنا بارێ ژین و ژیارا خه‌لكێ كوردستانێ بیت.

هێرش ئیسكان رۆژنامه‌ڤانه‌كه‌ دبێژیت:باشتره‌ د سالا نوو دا حوكمه‌تا هه‌رێما كوردستانێ ده‌لیڤێن كارى په‌یدا بكه‌ت،ب تایبه‌تى بۆ ته‌خا گه‌نجان،ژ پێخه‌مه‌ت چاڤێ گه‌نجێن مه‌ ئێدى نه‌مینیته‌ ل هیڤیا دامه‌زراندنێ،چونكى هه‌رده‌م چاڤێ گه‌نجان ل هندێ یه‌ كو ده‌لیڤه‌كا كارى بۆ خوه‌ په‌یدا بكه‌ن،داكو بشێن پێدڤیێن ژیانا خوه‌ یا رۆژانه‌ پێ دابین بكه‌ن،هه‌روه‌سا پێدڤیه‌ حوكمه‌تا هه‌رێمێ د سالا نوو دا ده‌ست ب نوویاتیان بكه‌ت و پتر رۆلى بده‌ته‌ گه‌نجان و دیاركر ژى:حه‌زا من ئه‌وه‌ سالا نوو ببیته‌ سالا خێر و به‌ره‌كه‌تێ ژ هه‌موو روویان ڤه‌ بۆ خه‌لكێ كوردستانێ،هه‌وره‌سا هه‌موو قه‌یران و كێشه‌ و ئالۆزیێن ل سه‌ر هه‌رێما كوردستانێ نه‌مینن و ئێدى ئه‌م ته‌نا و ئارام ل سه‌ر ئاخا خوه‌ ب ژین،دیسا سالا نوو نه‌ ب تنێ سالا گوهۆرینا هژمارێ بیت،به‌لكو ببیته‌ سالا سه‌ربه‌خۆیا كوردستانێ،چونكى مه‌ ب هزاران قوربانى داینه‌،هه‌روه‌سا ئه‌ز ناخوازم ئه‌ڤ ساله‌ وه‌كى سالێن بورى بیت،ژبه‌ركو بۆ من هه‌ردو سالێن بورى د نه‌خوش و پرى ئاسته‌نگ بوون.

عه‌بدولجه‌بار عه‌بدولرەحمان شاره‌زا و ڤه‌كۆله‌ره‌كێ جڤاكیه‌ بۆ ئه‌ڤرۆ دبێژیت:گوهۆرینا سالان ل كوردستانێ بارا پتر ب شێوازه‌كێ كلاسیكیه‌ و ب تنێ هژمار دهێنه‌ گوهۆرین،هه‌روه‌سا مرۆڤ نه‌شێت بێژیت خه‌لكێ چو پلان نینه‌،لێ ئه‌و پلانا هه‌ى ژى د ئاسته‌كێ لاواز دایه‌،چو ئه‌و پلان ل سه‌ر ئاستێ تاكه‌ كه‌سى،یان ژى ل سه‌ر ئاستێ خێزانێ ،یان ژى ل سه‌ر ئاستێ حوكمه‌تێ دا بیت،له‌ورا پێدڤیه‌ تاكه‌ كه‌سى پلانا خوه‌ یا سالانه‌ هه‌بیت و دڤێت ل دووڤ وێ پلانێ بچیت،هه‌روه‌سا ب گشتى خه‌لكێ مه‌ وه‌ك رێكخستن یێ گرێدایه‌ ب هه‌رێما كوردستانێ ڤه‌،له‌وما دڤێت ئه‌م ره‌وشه‌نبیریه‌كێ ل ده‌ف خوه‌ په‌یدا بكه‌ین و ئه‌م هه‌موو خودان پلان و به‌رنامه‌ بین،هه‌روه‌سا هه‌كه‌ ئه‌م خودان پلان بین،دێ شێین گوهۆرینان ژى ئه‌نجام ده‌ین و دیاركر ژى:دو جۆرێن پلانان هه‌نه‌،پلانه‌ك ژ وان ژ سه‌رى دگه‌هیته‌ ژێرى و ئێك ژى ل ژێرى دگه‌هیته‌ سه‌رى،ئه‌و پلانا ل ژێر دگه‌هیته‌ سه‌رى ئه‌وه‌ كو خه‌لك دێ پێشنیارێن خوه‌ كه‌ن و و دێ وان پێشنیاران ده‌نه‌ حوكمه‌تێ،كا حوكمه‌ت بۆ وان چو بكه‌ت،هه‌روه‌سا ئه‌و پلانا ژ سه‌رى دگه‌هیته‌ ژێر ئه‌وه‌،كو پلانا حوكمه‌تێ بۆ وێ سالێ چیه‌،ژ لایێ سیاسه‌تا جڤاكى و ئابوورى و ئێناهیێ و هه‌موو جۆرێت دیتر،ژ پێخه‌مه‌ت بشێن خزمه‌تگوزاریا بگه‌هیننه‌ خه‌لكێ و دڤێت حوكمه‌ت هه‌ول بده‌ت،كو خه‌لكێ ره‌وشه‌نبیر ژى بكه‌ت.

684

ئه‌ڤرۆ نيوز:

كه‌نالێ دياريو گول يا ئسپانى به‌لاڤكريه‌ كو پشتى خوساره‌تيا ريال مه‌دريد د ياريا كلاسيكو دا به‌رامبه‌ر به‌رشه‌لونه‌ ب 3-0، فلۆرێنتینۆ پێرێز سه‌رۆكێ يانا ريال مه‌دريد په‌يوه‌ندى ب خوسى مورينيو كريه‌ ، بۆ دانوستاندنان ل دۆر ئه‌نجامێن ياريێ و ئاستێ ريال مه‌دريد، مورينيو گوتيه‌ فلۆرێنتینۆ پێرێز، هه‌لبژارتنا زێدان بۆ ماتیۆ کۆڤاچیچ وه‌كو ياريكه‌ره‌كێ سه‌ره‌كى ل شوونا ئيسكو ئه‌گه‌رێ شكه‌ستنا ريال مه‌دريد بوو د ياريا كلاسيكو دا.

 

ئه‌ڤرۆ نيوز:

پشتى كو سه‌رۆك وه‌زيرێن عيراقێ حه‌يده‌ر عه‌بادى د گوتارا خوه‌ يا رۆژا سێ شه‌مبى دا راگه‌هاندى كو دێ هويربينيێ د ليستا مووچه‌خورێن وه‌زاره‌تێن ساخله‌ميێ و په‌روه‌ردێ يا حوكمه‌تا هه‌رێما كوردستانێ دا كه‌ن، د. رێكه‌وت وه‌زيرێ ساخله‌ميا هه‌رێمێ راگه‌هاند: ب زووترين ده‌م دێ ليستا مووچه‌خورێن وه‌زاره‌تا خوه‌ ره‌وانه‌ى به‌غدا كه‌ين داكو به‌غدا مووچێ فه‌رمانبه‌رێن وان دابين بكه‌ت.

عه‌بادى رۆژا سێ شه‌مبى راگه‌هاندبوو ئه‌و دێ بزاڤێ كه‌ن مووچێن وه‌زاره‌تێن ساخله‌ميێ و په‌روه‌ردێ يێن حوكمه‌تا هه‌رێمێ بده‌ن.

ئه‌ڤرۆ نێچيرڤان بارزانى سه‌رۆك وه‌زيرێن هه‌رێمێ دياركر كو به‌غدا لژنه‌يه‌ك يا پێكئيناى بۆ پێداچوونێ د ليستا مووچه‌خورێن وه‌زاره‌تێن په‌روه‌ردێ و ساخله‌ميا هه‌رێمێ.

 

582

ئەڤرۆ نیۆز ، زنار تۆڤی:

ل سالا بوری سامانێ ٥٠٠ ده‌وله‌مه‌ندترین كه‌سێن جیهانێ ٤.٤ ترلیۆن دۆلار بوون،لێ ئەڤ سالە ئه‌و گوژمە بۆ ٥.٣ ترلیۆن دۆلاران بلند بوویە.
ل دووڤ وێ ئامارا ئاژانسا بلومبێرگ بەلاڤکری،سامانێ ٥٠٠ ژ‌ ده‌وله‌مه‌نترین كه‌سێن جیهانێ بۆ سالا ٢٠١٦ دا ٤.٤ ترلیۆن دۆلار بوون،لێ وێ رێژێ ٢٣% ‌ زێدەکریە‌ و گه‌هشتیه‌‌ ٥.٣ ترلیۆن دۆلاران.

ئەو ٥٠٠ ده‌وله‌مه‌ندێن جیهانێ رۆژانه‌ ٢.٧ ملیار دۆلار دچیتە سەر سامانێ وان و ب ڤێ چەندێ هەکە ب هێتە به‌راوردکرن ب سالا ٢٠١٦ قازانجێ وان چار هنده‌ زێدە کریە‌.
دامه‌زرێنه‌رێ كۆمپانیا بازرگانی یا ئامازۆن یا ئه‌مریكی، جیف بیزۆس ب‌ زێدەبوونا گوژمێ ٣٤.٢ ملیار دۆلار، سامانێ وێ گه‌یشتیە‌ ٩٩.٦ ملیار دۆلاران کو دناڤ وێ لیستێ دا‌ بلندترین رێژه‌یه‌ ل سه‌ر ئاستێ وان ده‌وله‌مه‌ندێن سامانێ وان زێدەکری،ب ڤی رەنگی جیف بیزۆسی ناسناڤێ ده‌وله‌مه‌نترین كه‌س ل جیهانێ ژ دامه‌زرێنەرێ كۆمپانیا میكرۆسۆفت، بیل گێتسی وه‌رگرت و گه‌هشته‌ لووتكه‌یا وی لیستێ‌.

ناڤێ ٤٩ وەلاتان د وێ لیستێ دا هاتیە‌ و ٣٨ ملیاردێرێن چینی سامانێ وان ٦٥% زێدەبوویە و گەهشتیە‌ ١٧٧ ملیار دۆلاران و ١٥٩ ملیاردێرێن ئه‌مریكی ژی ١٨% سامانێ ون زێدەبوویە و گه‌هشتیه‌ ٣١٥ ملیار دۆلاران.
سالا ٢٠١٧ بوویه‌‌ سالا ده‌وله‌مه‌ندێن وارێ ته‌كنۆلۆجیایێ و د وێ‌ لیستێ دا‌ ٥٧ ملیاردێرێن وارێ ته‌كنۆلۆجیایێ سامانێ وان ٣٥% زێدەبوویە‌ و تێكرایا سامانێ وان گه‌هشتیە‌ ٢٦٢ ملیار دۆلاران.

دامه‌زرێنەرێ كۆمپانیا فێسبووكی مارك زوكه‌ربێرگ ٤٥% سامانێ وی زێدەکریە و تێكرایا سامانێ وی گه‌هشتیه‌ ٢٢.٦ ملیار دۆلاران.
ھەڤدەم ٦٠ ملیاردێرێن جیھانی یێن کو ل سالا بوری دناڤا وێ لیستێ دابوون‌، ب ئەگەرێ ژ ده‌ستدانا به‌شەکێ ژ  سامانێ خۆ ناڤێ وان نە ئێخستیە ناڤا وێ لیستێ.

website security
WP Facebook Auto Publish Powered By : XYZScripts.com