NO IORG
زنار توڤى/داخۆیانی

ئه‌ڤرۆ ، زنار تۆڤى:

زه‌رده‌شت بابان شیره‌تكارێ كۆماریان ل ئه‌مریكا بۆ رۆژناما ئه‌ڤرۆ دیاركر: ستراتیجیه‌تا نوكه‌ یا ئه‌مریكا ل عیراقێ به‌رده‌وامبوونا پرۆسا سیاسى و هه‌بوونا سه‌قامگیریێ و ئارامبوونا عیراقێ و ڤێ ده‌ڤه‌رێ یه‌، هه‌روه‌سا ژناڤبرنا گرۆپێن تیرورستى و كێمكرن و نه‌هێلانا هه‌ژمۆنا ئیرانێ یه‌ ل عیراقێ، ئه‌مریكا پشتا خوه‌ نه‌دایه‌ كوردان، لێ ژبه‌ركو عیراق ده‌وله‌ته‌ ئه‌مریكا پتر مامه‌لێ ل گه‌ل حوكمه‌تا عیراقێ دكه‌ت، هه‌روه‌سا لدووڤ قانوونێن نێڤده‌وله‌تى ژى مامه‌لا ئه‌مریكا ل گه‌ل حوكمه‌تان دایه‌ و دیسا ل عیراقێ حوكمه‌ت د ده‌ستێ كێ دابیت، ئه‌مریكا دێ مامه‌لێ ل گه‌ل وى دا كه‌ت، دیسا ده‌رباره‌ى ریفراندۆمێ ژى ئه‌مریكا وه‌كو كێشه‌كا نافخوه‌ به‌رێ خوه‌ دایێ و پشتگیریا چو لایه‌نان نه‌كر دڤى وارى دا، ژبه‌ركو نابیت ئه‌مریكا مایتێكرنێ تێدا بكه‌ت، چونكى عیراق وه‌لاته‌كێ سه‌ربه‌خۆیه‌، دیسا ئه‌مریكا نه‌ڤیا هاریكاریا لایه‌نه‌كێ بكه‌ت و هاریكاریا لایه‌نێ دیتر نه‌كه‌ت، واشنتۆن ژى بابه‌تێ ریفراندۆمێ ب بابه‌ته‌كێ نافخۆیا عیراقێ ددانا، نه‌ وه‌كو كێشه‌كێ به‌رێ خوه‌ ددایێ كو په‌یوه‌ندى ب به‌رژه‌وه‌ندیا ئه‌مریكا ڤه‌ هه‌بیت، له‌وما ئه‌مریكا مایێ خوه‌ دڤى بابه‌تى نه‌كر.

ناڤهاتى دیاركر ژى: بۆ دروستكرنا حوكمه‌تا عیراقێ یا ڤێ جارێ ئه‌مریكا پشتگیریا چو لایه‌نان نه‌كر و ڤیتۆ ژى هه‌مبه‌رى كه‌سێ بكار نه‌ئینا، لێ ئه‌مریكا ل عیراقێ لدووڤ ئێك تشت دا دگه‌ریت، ئه‌و ژى هه‌بوونا ئارامیێ و سه‌قامگیریێ یه‌، ژ پێخه‌مه‌ت بشێت به‌رژه‌وه‌ندێن خوه‌ یێن له‌شكه‌رى و سیاسى ل عیراقێ و ڤێ ده‌ڤه‌رێ بپارێزیت، له‌ما یا پێدڤى ئه‌وه‌ كو هه‌ر كه‌سێ ببیته‌ سه‌رۆك وه‌زیر بشێت به‌رژه‌وه‌ندیێن ئه‌مریكا بپارێزیت.

هێشتا دیاركر: دڤێت ده‌مێ په‌رله‌مانتارێن كورد دچنه‌ به‌غدا ل سه‌ر به‌رژه‌وه‌ندیا وى خه‌لكێ ده‌نگێ خوه‌ دایێ كار بكه‌ن، هه‌ر چه‌نده‌ هنده‌ك جاران دبیت به‌رژه‌وه‌ندیێن نه‌ته‌وه‌یى ببنه‌ به‌رژه‌وه‌ندیێن حزبى و ناڤچه‌یى ژى، كو ئه‌ڤ چه‌نده‌ ل ئه‌مریكا ژى هه‌یه‌، لێ دڤێت هه‌ر نوونه‌ریا خه‌لكێ ده‌ڤه‌را خوه‌ بكه‌ت، هه‌روه‌سا هنگێ دێ سیاسه‌تا كوردان ل هه‌مبه‌رى عیراقێ یا سه‌ركه‌فتى بیت، ده‌مێ هژمارا كورسیێن كوردان ل په‌رله‌مانێ عیراقێ دا زێده‌ ببن و بشێن داخوازیێن خوه‌ ب سه‌پینیت ب سه‌ر حوكمه‌تا عیراقێ دا، هه‌روه‌سا ب ڤێ هژمارا نوكه‌ یا په‌رله‌مانتارێن كورد، هه‌كه‌ هه‌موو د ئێك ده‌نگ بن ژى نه‌شێن وێ كاریگه‌ریا هندا مه‌زن ل سه‌ر حوكه‌تا عیراقێ دا دروست بكه‌ن.

زه‌رده‌شتى ئه‌و ژى دیاركر: لدووڤ راپۆرتێن نه‌ته‌وێن ئێكگرتى و ئه‌مریكا ژى عیراق ب وه‌لاته‌كێ شكستخوارى دهێته‌ نیاسین، له‌وما دێ گه‌له‌ك یا ب زه‌حمه‌ت بیت كو كورد ب چنه‌ به‌غدا و داخوازا مافێ خوه‌ ژ وه‌لاته‌كێ رووخیاى و خودانا ئابووره‌كێ بێ هێز بكه‌ن، دیسا گه‌له‌ك گه‌نده‌لى ل عیراقێ هه‌یه‌ و ره‌وشا ئێمناهیێ گه‌له‌كا خرابه‌، هه‌روه‌سا هه‌ر ده‌مێ عیراق ئارام و سه‌قامگیر بیت و داعش و هه‌ژمۆنا ئیرانێ ل سه‌ر عیراقێ نه‌مینیت، هنگێ دێ به‌رژه‌وه‌ندیێن كوردان ژى پێشكه‌فتنێ ب خوه‌ڤه‌ بینن، لێ هندى ب ڤى ره‌نگێ نوكه‌ بیت، كورد نه‌شێن ل به‌غدا چو ب ده‌ست خوه‌ڤه‌ بێخن.

د به‌رده‌اوامیا ئاخفتنا خوه‌ دا ئه‌و ژى خویاكر: حوكمه‌تا نوكه‌ عیراقێ یا سه‌ركه‌فتیتر نابیت ژ یێن به‌رى خوه‌، چونكى ئه‌و ئاریشێن به‌رى نوكه‌ هه‌ین، هێشتا ئه‌و ئاریشه‌ هه‌موو ماینه‌ و چاره‌نه‌بووینه‌، ل داهاتى ژى دێ هه‌بن، چونكى هێشتا عیراقێ كێشا ئاڤێ و كاره‌بێ و ئێمناهیێ هه‌یه‌، دیسا عیراقێ كێشا گرۆپێن تیرۆرستى و توندره‌و و داعشێ و كێشا سوننه‌ و شیعه‌یان و هه‌ژمۆنا ئیرانێ هه‌یه‌، دیسا كێشا به‌رژه‌وه‌ندیێن ئه‌مریكا هه‌یه‌، ئه‌ڤ كێشه‌ هه‌موو وه‌كو خوه‌ ماینه‌ و هندى ئه‌ڤ كێشه‌ چاره‌سه‌رنه‌بن، هه‌ر كه‌سێ ببیته‌ سه‌رۆك وه‌زیرێ عیراقێ نه‌شێت ئه‌ڤان كێشان چاره‌سه‌ر بكه‌ت، له‌وما عیراق به‌ره‌ف پێشڤه‌ ناچیت.

ل دووماهیێ ئه‌و ژى دیاركر: ئه‌مریكا دبلۆماسیه‌تێ ل سه‌ر بنه‌مایێ به‌رژه‌وه‌ندیێن خوه‌ دكه‌ت، له‌وما نابیت كورد ل گه‌ل ئه‌مریكا ل سه‌ر بنه‌مایێ هندێ سیاسه‌تێ بكه‌ن، كو ئه‌مریكا بگه‌هیته‌ ئارمانجێن خوه‌ و كورد نه‌گه‌هنێ، دیسا ده‌مێ كورد به‌رژه‌وه‌ندیێن خوه‌ دبه‌ستن ل گه‌ل یێن ئه‌مریكا و هه‌ر ده‌مێ به‌رژه‌وه‌ندیێن وان هاتنه‌ جه و دڤێت یێن كوردان ژى بهێنه‌ بجهئینان و هه‌ر چه‌نده‌ هه‌كه‌ كورد وه‌كهه‌ڤ ژى نه‌بن ل گه‌ل وێ هه‌ڤپه‌یمانیێ، لێ دڤێت كورد گه‌له‌ك دنزم ژى نه‌بن، بۆ هندێ د داهاتى دا بشێین دبلۆماسیه‌ته‌كا باشتر ل گه‌ل ئه‌مریكا بكه‌ین، دڤێت ئه‌م گه‌له‌ك د هشیار بین كو كارێ مه‌ یێ سیاسى و ره‌فتارێن مه‌ یێن دبلۆماسى ل سه‌ر بنه‌مایێ تێگه‌هشتنا كه‌لتۆرێ ئه‌مریكا بیت، ژ پێخه‌مه‌ت بشێین ره‌فتارێن دبلۆماسى ل گه‌ل وان دا بكه‌ین، هه‌روه‌سا نوكه‌ سیاسه‌تا تره‌مپى ب تنێ د به‌رژه‌وه‌ندا ئه‌مریكا دایه‌ و د به‌رژه‌وه‌ندا كه‌سێ دیتر دا نینه‌، دیسا چو حوكمه‌ت و ئیدارێن ئه‌مریكا د به‌رژه‌وه‌ندا خه‌لكێ دیتر دا كار ناكه‌ن، له‌وما دڤێت كوردان شاره‌زایى د كه‌لتۆر و دبلۆماسیه‌تا ئه‌مریكا هه‌بیت، ژ پێخه‌مه‌ت بشێت بۆ خوه‌ مفاى ژ سیاسه‌تا وێ وه‌ربگرن.

ئەڤرۆ نیوز ، زنار تۆڤی:

د نوکە دا کەرتێ گەشتیاری بوویە ئێک ژ کەرتێن هەرە گرنگ ل سەرانسەری جیهانێ و گەلەک وەلاتێن جیهانێ خوە ب داهاتێ گەشتیاریێ خودان دکەن و ئێکە ژ ژێدەرێن گرنگ بۆ داهاتێ وان وەلاتان.

عەبدولرزاق نهێلی گەشتیارناسەکە بۆ ئەڤرۆ نیوز دبێژیت: جۆگرافی و سروشتێ کوردستانێ گەلەک یێ گونجایی و جوانە، چونکی هەر چار وەرزێن سالێ ب ئێکسانی لێ دهێنە دیتن بێی دەستێوەردانا مرۆڤان، ئەڤ وەلاتە ژ جهێن شاهانەیە بۆ کەرتێ گەشتوگوزارێ، لەوما پاراستنا ڤێ ژینگەهێ ئەرکێ مە هەموویا نە.

هەروەسا دبێژیت ژی: تێکدانا ژینگەهێ دێ ڤان کارتێکرنا ل کەرتێ گەشتیاری ل کوردستانێ کەت کەت: چونکی دێ بیتە ئەگەرێ پیسبوونا ئاخێ وئاڤێ و سەقایێ کوردستانێ، هەروەسا دێ کارتێکرنێ کەتە سەر ژیانا گیانەوەران و بالندە تەرشوکەوالێ خەلکێ مە، دێ بیتە ئەگەرێ کێمبوونا هاتنا گەشتیاران بو هەرێما کوردستانێ و ڤێ و دەڤەرا ئەم لێ دژین.

ناڤهاتی زێدەتر دبێژیت: پیسبوونا ژینگەهێ دێ زیانەکا مەزن گەهینیتە کەرتێ چاندنێ ژی، هەروەسا دێ زیانەکا مەزن ل سەر ساخلەمیا مروڤێ پەیدا کەت، دیسا دێ کارتێکرنێ ل سەر داهاتێ تاکێ کوردستانێ کەت، دێ رەوشا ئابووری یا وەلاتی و خەلکێ کوردستانێ لاواز کەت.

لەوما دڤێت هەر ئێک ژ لایێ خوەڤە ڤێ ژینگەهێ پاقژ راگریت، دڤێت پاراستن و پاقژ راگرتنا ژینگەها ڤی وەلاتی ب ئەرکێن خوە بزانين.

received_504454253393553

ئه‌ڤرۆ نیوز ، زنار تۆڤى:

سوبەهێ ل دەمژمێر سێی ئێڤاری كورته‌ فلمێ زڤرۆك ، كو ئه‌ڤ كورته‌ فلمه‌ ل باژێرێ دهۆكێ و ل تلسقۆفێ ل چه‌په‌رێن شه‌رى دا هاتیه‌ وێنه‌كرن، كو ژ ده‌رهێنانا محەمەد ژۆری یە و به‌رهه‌مهێنه‌رێ ڤى فلمى ژى رێبه‌ر محه‌مه‌ده‌،هه‌روه‌سا دو ئه‌كته‌رێن سه‌ره‌كى پشكدارى د ڤى فلمى دا كریه‌، كو ئه‌كته‌را كچ خه‌لكا سلێمانیێ یه‌ ب ناڤێ كارڤینا هێمن و ئه‌كته‌رێ كور ژى ناڤێ وى فه‌رسه‌ت عزه‌ت ه‌، د هه‌مان ده‌مدا ناڤه‌رۆكا ڤى فلمى ل سه‌ر مالباته‌كا كورده‌ كو دو زارۆیێن بچووك هه‌ردو ژى خوشك و برایێن ئێكن، دێ ل شەشەمین فلمە فیستەڤالا دهۆک و ل هولا سینەما مال ئێک دێ هێتە نیشاندان.

ئەڤرۆ نیوز ، زنار تۆڤی:

زەردەشت بابان شیرەتکارەکێ کۆماریانە ل واشنتۆن بۆ ئەڤرۆ نیوز دایه دیارکرن، وەکو پەیمانەکا د جەنگێ سەر دا سەرۆک تڕامپی، سەرۆکێ ئەمریکا ئەڤرۆ بڕیار دایە کو ژ گرێبەستەکا سالا ١٩٨٧ کو ل گەل ئێکەتیا سۆڤیەتی یا وی دەمی هاتبوو کرن، کو رووسیا ژی پابەندببوو ھەل بوەشینیت، هەروەسا ئەڤ گرێبەستە پێکهاتبوو ژ کێمکرنا مووشەکێن ئەتومی یێن مەدایێ ناڤەراست کو وی دەمی د جەنگێ سار دا ل ئورۆپا هاتبوونە بەلاڤەکرن.

هەروەسا گۆتیە، ئەڤە ژی دێ بیتە ئەگەرێ نووبوونا هەڤرکیا مووشەکێن چەکێ ئەتۆمی جارەکا دیتر دناڤبەرا ئەمڕیکا و رووسیا دا کو سەرۆک تڕامپی گووتیە، کو دەمەکە ئەو چاڤەرێی ڤێ خەلەتیێ دکەت.

 

ئەڤرۆ نیوز ، زنار تۆڤی:

ل رۆژا شه‌مبیێ 20 چریا ئێکێ یا سالا 2018 شەشەمین فلمە فیستەڤالا دهۆکێ یا نێڤده‌وله‌تی ل ل هۆلا کۆنفرانسان ل زانکۆیا دهۆکێ ل دەمژمێر پێنجی ئێڤارێ ده‌ست پێکر و بۆ ماوێ حه‌فت رۆژان دێ یا به‌رده‌وام بیت.

ئه‌ڤ سالە ژ سەرجەمێ 600 فلمان یێن کو گه‌هشتینە ‌‌ ده‌ستێ لیژنێن فیستەڤالێ، 105 فلم ژ 50 وەلاتان هاتینە هه‌لبژارتن بۆ هه‌موو پشکێن فیستەڤالێ، د‌ چارچۆڤێ به‌رنامێن فیستەڤالێدا دێ 40 فلمێن كوردی و 65 فلمێن نێڤده‌وله‌تی هێنە نیشاندان.

پێشتر رێڤەبەرا به‌رنامێن نێڤده‌ولە‌تی یێن فیستەڤالێ لیسا گول د‌ كۆنفرانسەکێ رۆژنامه‌ڤانیدا ئاماژە ب تایبه‌تمه‌ندیێن فیستیڤالێ دا كریە و گوتیە ئەڤ ساله فۆكس د فیستەڤالێدا‌ دێ ل ‌سه‌ر ژنان بیت و كار دێ له سه‌ر وان بابه‌تان هێتتە كرن یێن كو‌ پەیوە‌ندیدارن ب ژنان ڤه، هەروەسا پێنج فیچه‌ر و دو فلمێن دكیۆمێنتاری و پێنج كورته‌ فلمێن تایبه‌ت ب ژنان ڤە د فێستیڤالێدا دێ هێنە نیشاندان.

هەروەسا بریاره‌ سێ پەنەلێن تایبه‌ت ب سینه‌مایێ ڤە برێڤە بچیت، پەنەلێ ئێکێ ل سه‌ر به‌رپرسیاریەتا حوکمه‌تێ ل سەر به‌رهه‌مئینانا فلمانە و پەنەلێ دویێ ده‌رباره‌ی به‌رهه‌مئینانا فلمانە ل ‌گه‌ل پەنەلەکێ تایبه‌ت ب‌ ژنێ و سینه‌مایێ و سینه‌ما و ژنێ ڤە.

هەروەسا فلمێ ڤەکرنا فیستیڤالا هۆکێ فلمێ زاگرۆس یێ دەرهێنەرێ کورد سەهیم عومەر خەلیفەی بوویە، دیسا هژمارەکا زۆر یا خەلکێ بەرهەڤی ڤەکرنا رۆژا ئێکێ یا شەشەمین فلمە فستیڤالا دهۆکێ یا نێڤدەولەتی بوویە.
ل دەستپێکێ دا فەرهاد ئەترۆشی پارێزگارێ دهۆکێ و سەرۆکێ فلمە فیستەڤالا دهۆکێ گۆت: ل سالا بهێت دێ فلمە فیستەڤالا دهۆکێ ل دەمێ خوە دا و ل هەیڤا 9 دێ هێتە ئەنجامدان، مە ل بەرە سال بۆ سالێ ڤێ فیستەڤالێ پێش بێخین و بگەهینینە ئاستێن بلند و سالا بهێت دێ پتر پشتەڤانیێ لێ کەین، چونکی ئەڤە دەستکەفتەکێ مەزنە بۆ دهۆکێ و کوردستانێ و دیسا نێچیرڤان بارزانی پشتەڤانی ل ڤێ فیستیڤالێ کریە، ئەم ژی دێ ب هەموو شیانێن خوە پشتەڤانیێ لێکەین.

هەروەسا سەفین دزەیی نوونەرێ سەرۆکێ حوکمەتا هەرێمێ پەیڤەک پێشکێشکر و تێدا گۆت: دێ پشتەڤانیا حوکمەتا هەرێمێ بۆ فلمە فیستەفالا دهۆکێ یا بەردەوامبیت و ب هەموو رەنگان دێ پشتەڤانیێ لێکەین.
شەوکەت ئەمین کورکی رێڤەبەرێ هونەری یێ فلمە فیستیڤالا دهۆکێ: ئەڤ سالە گەلەک فلمێن باش گەهشتینە فلمه فیستەڤالا دهۆکێ.

٢٠١٨١٠٢٠_١٧١٣٣٢
ئەیوب رەمەزان رێڤەبەرێ گشتی یێ رەوشەنبیری هۆنەری ل دهۆکێ و نوونەرێ وەزارەتا رەوشەنبیری گۆت…فلمە فیستیڤالا دهۆکێ دێ بەردەوامبیت و دیسا سۆپاسیا هەموو وان لایەنانکر یێن پشتەڤانی ل فیستەڤالێ کرین و خوە وەستاندین، ژ پێخەمەت ئەڤ فیستەڤالە بهێتە ئەنجامدان.
پاشی تیپا هونەرێ مللی چەندین کەڤالێن هونەرێ یێن دیلان و گۆڤەندێن کوردی نیشاندان و لدووڤدا فلمێ زاگرۆس هاتە نیشاندان.

٢٠١٨١٠٢٠_١٨٠١٣٧

٢٠١٨١٠٢٠_١٨٣٢٥٢

٢٠١٨١٠٢٠_١٨٣٩٠٩

ئەڤرۆ نیوز ، زنار تۆڤی:

موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن: کو ئەڤرۆ د روودانەکا ترافیکێ دا دو کەسان گیانێ خوە ژ دەستدا.

ناڤهاتی زێدەتر دا دیارکرن: ئەڤرۆ پێنجشەمبی 18/10/2018ل دەمژمێر(3:00)ئێڤاری ل سەر جادا گشتی یا دناڤبەرا قەزا بەردەرەش بۆ پرا حسێنیێ و ل نێزیک مفرەقا گوندێ دولێجانێ روودانەک ژ جۆرێ لێگدان روودایە و د وێ رووانێدا دو کەسان گیانێ خوە ژ دەستدایه و هندەک کەس ژی بریندار بووینە.

ئەڤرۆ نیوز ، زنار تۆڤی:

فلمەکێ کوردی دێ پشکداریێ د فێستیڤالەکا سینەمایی یا نێڤدەولەتی ل وەلاتێ یۆنانێ پشکداریێ کەت و دێ هەڤرکیا برنا خەلاتێ وێ فیستیڤالێ کەت.

جبرائیل ئەبۆبەکرم دەرهێنەرێ فلمێ ئەیلان بۆ ئەڤرۆ نیوز دیارکر: کو فیلمی ئەیلان دێ پشکداریێ ل فیستیڤالا سالۆنیك دا بۆ فلمێن ئەنیمەیشن دا کەت، کو دێ ل وەلاتێ یۆنانێ برێڤە چیت ‌و د پشکا مافێن مرۆڤیدا دێ هەڤرکیا برنا خەلاتێ فیستیڤالێدا کەت، هەروەسا ئەڤ فیستیڤالە دێ ل رۆژانێن 18_21 ڤێ هەیڤێ دەستپێکەت.

چیرۆكا ڤی فلمی بەحسێ ئەیلانێ كوردی دکەت کو ل گەل خێزانا خوە بەرەف توركیا برێ دکەڤن، بەلێ بەری بگەهنە ئورۆپا دناڤا شەپۆلێن دەریایێ دا دبیتە قوربانی، فلمێ سینەمایی یێ (ئەیلان) ژ دەرهێنانا جبرائیل ئەبوبەكری ڤه هاتیە چێکرن، ئومێد رۆژی كارێ مۆزیکێ کریە و هەروەسا ئالان رۆژبەیانی كارێ گرافیكێ و دیزاینا ڤی فلمی جێبەجێ‌ كریە.

جبرائیل ئەبوبەكر رەحمان ژ دایکبوویێ سالا 1983 یە ل باژێرێ هەولێرێ، ل سالا 2001 دەست ب کارێن سینەمایی کریە و د نێزیكی 40 كورتە فلمان دا هاریکارێ وێنەگری بوویە و د 13 فلمێن سینەمایی یێن درێژ دا هاریکارێ وێنەگری بوویە.

ئەڤرۆ نیوز ، زنار تۆڤی:

ژ ئەگەرێ نە پێگیریا وان ب رێنمایێن هاتنوچوونێ دو ترۆمبێلا لێکدا و دو کەس ژی د وێ روودانێ دا برینداربوون.

ل دوور ڤێ روودانێ موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن: کو ئەڤرۆ د روودانەکا ترافیکێ دا دو کەس برینداربوون.

ناڤهاتی زێدەتر دا دیارکرن: ئەڤرۆ سێشەمبی 16.10.2018 ل سەر جادا کۆمەلگەها باگێرا بۆ ناحیا مانگششکێ روودانەکا هاتنوچوونێ روودایە ژ جورێ لێگدان دناڤبەرا دو ترومبێلان دا، کو ترۆمبێلەک ژ وان دهۆک بارهەلگر ژ جورێ کیا دو تەن و ترومبێلەکا دهۆک یا بارهەلگر ژ جورێ ( بیک ئاب نیسان ).

ئەو ژی گۆت: ژبەر نەپێگریا وان شۆفێران ب رێنمایێن هاتنوچوونێ ئەڤ روودانە پەیدابوویه، د ئەنجامێ ڤێ روودانێ دا دو کەس برینداربوون و هەردو هاتنە ڤەگۆهاستن بۆ نەخۆشخانا تەنگاڤیا، هەروەسا زيان ب هەردو ترومبێلان کەفتینە، دیسا ئەگەرێ ڤێ روودانێ دزڤریت بۆنە پێگریا شوفێران ب رێنمایێن هاتنوچوونێ.

ئەڤرۆ نیوز:

 

دەقێ بەیانناما بارزانی:

 

بناڤێ خودایێ بەخشندە و میهرەبان

 

16 ئۆكتۆبەرێ ڕۆژەکا تاریە د مێژوویا میللەتێ مەدا. د وێ ڕۆژێ دا بوو كو خیانەتا نەمەردانە، ل ئومێد و هیڤیێن گەلەکێ مەزلووم هاتە كرن، ب ئەگەرێ دەستەکێ نافخۆیی ڤە یاریەكا بێویژدانانە ب چارەنڤیسێ گەلێ مە هاتە كرن و ئەو ئاخا ب خوینا هزاران کورێن ڤی نیشتیمانی یا پاراستی بوو، د چارچۆڤێ پیلانەكێدا كەفتە ژێر داگیركاریێ و كاڤلكاریێ و سفکاتی ب پیرۆزیێن گەلێ كوردستانێ هاتە کرن.

ئەو پیلانا نەگریسە، سفكایەتی بوو ب 100 سالێن خەبات و قوربانیدانا گەلێ مە. سفكاتیكرن بوو ب خوینا شەهیدان و ئەو پێشمەرگێن قارەمان یێن ل شەڕێ تیرۆریستێن داعشدا كەركووك و دەڤەرێن كوردستانی یێن دی یێن دەرڤەی ئیدارا هەرێمێ پاراستی و ژ پێش هەموو مرۆڤاتیێ ڤە شەرێ تیرۆرێ دكر، هەروەسا سفكایەتی بوو ب دەنگێ ڕەوا و ئاشتییانە یێ گەلێ كوردستانل کو ب تنێ تاوانا وان ئەو بوو، کو دەنگێ راستەقینەیێ خوە د گەهاندە گوهێ جیهانی.
مە پێشبینییا هەموو ئەگەران كربوو، بەلێ چو جاران ئەم چاڤەرێی هندێ نەبووین دەستەکێ نافخۆیی ب ڤی شێوەی خەنجەرێ ل پشتا گەلێ كوردستانێ بدەت.

ئەوان دڤیا ب نەپاكی و داگیركاریێ و زەبروزەنگێ، ئیرادا گەلێ مە بشكێنن كو ئازادیخوازی و پەیاما ئاشتی و پێكڤەژیانێ یە، بەلێ ئیرادا گەلێ مە ب زیندوویی ما و ب دلنیایی ڤه ئازادیخوازی و پەیاما ئاشتیێ، سەربەرزیە، نەپاكی و داگیركاری ژی سەرشۆری و شوورەییە.

ئارمانجا 16 ئۆكتۆبەرێ، نەهێلانا كیانێ هەرێما كوردستانێ و بێماناكرنا مافێن گەلێ كوردستانێ بوون، ئەو ژی ب هەڤكاری و چاڤساغی یا دەستەکێ نەپاكێ نافخۆیی، پیلانەکا گەلەک مەزن ل دژی گەلێ مە د ئارادا بوو، بەێ پێشمەرگەی بریارا بەرگریێ و كۆلنەدانێ دا، هاوكێشە گوهۆین و سەربەرزی بۆ گەلێ كوردستانێ ما.

دڤێ یادا تەحل دا، داخوازێ ژ هەموو لایەكی دكەم رێزێ ل مێژوو و مافێن گەلێ كوردستانێ بگرن، سیاسەتا شۆڤینی و ئینكاركرنێ هیچ ئەنجامەک نینە و ب تنێ شەر و پاشکەفتن لێ دکەڤیت.

هەمووگاڤا مە داخواز كریە كو كەركووك ببیتە نموونا پێکڤە ژیانێ، بەلێ مساومێ ل سەر ناسناما كوردستانیبوونا كەركووكێ ناهێتە کرن، داخوازێ ژ وەلاتیێن كوردستانێ دكەم ب ئومێد و هێزڤە بەرێ خوە بدەنە داهاتی، دۆزا گەلێ مە یا رەوایە و ب شەر و پیلان و نەپاكیێ، ب دووماهی ناهێت.

16 ئۆكتۆبەر ئەو رۆژا تارییە د مێژوویا گەلێ مە دا كو چو جاران ناهێتە ژبیرکرن و دڤێت ببیتە وانەک بۆ تاك تاکێن گەلێ كوردستانێ.

سلاڤ بۆ شەهیدێن كورد و كوردستانێ و هەموو شەهیدێن رێیا ئازادیێ.

سلاڤ بۆ پێشمەرگێن قارەمان.

سلاڤ بۆ تێكۆشەران و نیشتیمانپەروەران.

مەسعود بارزانی

16ـی 10ـی 2018

website security