ئاخفتنێن جودا د رۆژا رۆژنامه‌گه‌ریا كوردی دا

ئاخفتنێن جودا د رۆژا رۆژنامه‌گه‌ریا كوردی دا

9

محه‌مه‌د چه‌لكی
ل رۆژا ٢٢ نیسانێ ١٢٣ ساڵ ب سه‌ر ده‌ركه‌فتنا رۆژناما كوردستانێ ده‌ربازبوون، وه‌ك هه‌ر ساڵ ئه‌ڤ رۆژه‌ وه‌ك جه‌ژنا رۆژنامه‌گه‌ریا كوردی دهێته‌ پیرۆزكرن. هه‌لبه‌ت د رۆژه‌ك هۆسا گرنگ دا، دیرۆكا چووی ته‌ڤ جاره‌ك دن دكدڤیته‌ به‌ر ئاخفتن و ڤه‌كۆلینێ دگه‌ل ره‌وشا هه‌نوكه‌یا رۆژنامه‌گه‌ریا كوردی و ئاسته‌نگ و خوه‌سته‌ك ته‌ڤ دبنه‌ مژارێن گه‌رم. ئه‌ڤه‌ وێ چه‌ندێ دیار دكه‌ت كو رۆلێ رۆژنامه‌گه‌ریێ پر گرنگه‌ و هێشتا رۆناهیا چرایێ مالا به‌درخانیان د شه‌ڤ ڕه‌وشا كوردستانێ دا هه‌لكری یێ گه‌شه‌ و ره‌ونه‌ق و باندۆرا خوه‌ ژ ده‌ستنه‌دایه‌.
تشتێ سه‌یرێ ئه‌ڤ ساڵه‌ د ئه‌ڤێ رۆژێ دا(٢٢نیسانێ) روودای و ژ ئاخفتن و گۆتارێن به‌ڵاڤبووی، ئه‌ز وان گۆتاران نابێژم یێن دووباره‌بووی و هه‌ر ساڵ ب هه‌مان مانشێت و په‌یڤ و بۆچوون دهێنه‌ به‌رسینگێ خوانده‌ڤانێن كورد، وێ چه‌ندێ دئینیت زمان كو ره‌وشا رۆژنامه‌گه‌ریا كوردی نه‌ ل گۆر داخواز و دیدێن بسپۆر و لایه‌نێن سیاسی و كولتۆری دایه‌ و هه‌ر ئێك ل گۆڕه‌ی ئاراسته‌ و به‌رژه‌وه‌ندیێن خوه‌ گازندا ژ شێوێ (ئه‌ڤ پیشه‌یا ب سه‌رگێژی) سه‌ره‌ده‌ریا رۆژنامه‌گه‌ریا كوردی بۆ كێش و بێش و بێی به‌رپرسیاری دگه‌ل ره‌وشا هه‌نوكه‌یا كوردستانێ و ب تایبه‌ت یا هه‌رێما كوردستانێ دكه‌ن. ئه‌رێ ڕاسته‌ رۆژنامه‌گه‌ریا كوردی (مه‌دیا كوردی) وه‌سا سه‌ربه‌ردایی بوویه‌ و هه‌تا بچیته‌ د خانا تاپۆڕێ پێنجێ یێ دژی خواسته‌كێن گه‌لێ كورد یان ژی ئه‌ڤه‌ بزاڤه‌كه‌ دهێته‌كرن بۆ ئاراسته‌كرنا مه‌دیا كوردی بۆ ئاوایه‌ك خوه‌سته‌گه‌ری!
ره‌وشا نوكه‌ نه‌وه‌ك وێ ره‌وشێیه‌ یا یه‌كه‌مین رۆژناما كوردستان پێ ل شه‌ڤ ڕه‌شا كوردستانێ دانای و ده‌نگ و خوه‌سته‌كێن كوردان گه‌هاندینه‌ كوردان و ده‌ستهه‌ڵاتا داگیركه‌را كوردستانێ چونكو سه‌رده‌مێ مه‌ دبێژنێ: سه‌رده‌مێ زانیاریا ئه‌له‌كترۆنی و ب چ شێوه‌یا ناهێته‌ كونترۆلكرن ئانكو وه‌ڵاتی هه‌ر وه‌ڵاتیه‌ك بوویه‌ رۆژنامه‌ڤان و ب چركه‌كێ د گۆگلی دا هه‌ر پێزانینه‌ك ب ده‌ست دكه‌ڤت، هه‌روه‌سا شیانا به‌ڵاڤكرنێ بێی به‌ربه‌ست ل به‌ر ده‌سته‌، ئه‌ڤجا سه‌ره‌ده‌ریكرن د گه‌ل ڤێ ره‌وشێ ب هه‌مان مه‌تۆدێن سۆلتان عه‌بدل حه‌میدی ل دژی رۆژنامه‌ڤان و ده‌سته‌یا بژاره‌ (نوخبه‌) بكار ئیناین چ بها نه‌مایه‌ و قۆچانا دگه‌ل كه‌ڤریه‌! یا ژ وێ كمباختر بزاڤێن د ئه‌ڤێ رۆژێ دا هاتینه‌كرن ب تایبه‌ت ژ لایێ هنده‌ك كه‌سێن خوه‌ ب رۆژنامه‌ڤان و ته‌خا بژاره‌ دهه‌ژمێرن بۆ ده‌رچوواندنا قانوونه‌كه‌ێ بۆ رێكخستنا بیاڤێ مه‌دیایێ (ب هه‌موو چه‌قێن وێڤه‌) ل هه‌رێما كوردستانێ جهێ پێكه‌نینی و تڕانێ یه‌، چونكو مه‌دیا ئه‌ڤرۆ شێوه‌یه‌كی وه‌ڵاتیبوونێ وه‌رگرتیه‌ ئانكو هه‌ر وه‌ڵاتیه‌ك بوویه‌ مه‌دیاكار و رۆژنامه‌ڤان ژ بلی نه‌كانیا كونترۆلكرنا مه‌دیا ئه‌له‌كترۆنی زێده‌باری به‌رخۆردێن ژ هزره‌كا هۆسا په‌یدا دبن بۆ نموونه‌ به‌ڵاڤه‌بوونا توندوتیژیێ چ دژی ده‌ستهه‌ڵاتێ و چ دژی جڤاكێ بخوه‌ ئانكو دبیته‌ ده‌ستپێكا لێكتارازانا جڤاكی كو زیانا ڤێ چه‌ندێ بۆ ئاساییشا نه‌ته‌وی و جڤاكی، چونكو جڤاك پارڤه‌ دبیت بۆ چه‌ند به‌ره‌یێن دژ هه‌ڤ.
د ئه‌ڤێ ره‌وشا وه‌ڵاتی بوویه‌ مه‌دیاكار دا و چه‌وانیا سه‌ره‌ده‌ریكرنێ گه‌له‌ك گرنگه‌ بۆ ڤێ چه‌ندێ رۆژنامه‌ڤانێ ئه‌مریكی بیل مویر دبێژیت: “به‌رده‌ستكرنا ئازادیێ بۆ رۆژنامه‌ڤانان (مه‌دیاكاران) ب دل ئارامی بشێن ئه‌نجامێن ب به‌لگه‌ بدسه‌ت كه‌فتین بگه‌هیننه‌ خه‌لكی”. ده‌ما ئه‌ڤ كه‌شێ ئارام هه‌بیت ئێدی چ مه‌ترسی د به‌ڵاڤكرنا ئاگه‌هیان دا نامینیت و شێوێ توندڕه‌ویێ بهایێ خوه‌ نامینیت و بانگینا وان دێ بیته‌ گۆڤه‌ندا هرچێ!

کۆمێنتا تە