ئه‌ندامه‌كا لژنا ده‌ڤه‌رێن كوردستانی: هه‌رێم كاری ل سه‌ر دادگه‌هكرنا داعشێ دكه‌ت له‌وما...

ئه‌ندامه‌كا لژنا ده‌ڤه‌رێن كوردستانی: هه‌رێم كاری ل سه‌ر دادگه‌هكرنا داعشێ دكه‌ت له‌وما هێرشی پێشمه‌رگه‌ی دكه‌ت

ئه‌ندامه‌كا لژنا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ، راگه‌هاند، ئه‌گه‌رێ هێرشا تیرۆرستێن داعشێ ل سه‌ر پێشمه‌رگه‌ی، ئه‌وه‌ كو هه‌رێما كوردستانێ ل سه‌ر ئاستێ نێڤده‌وله‌تی كار بۆ دادگه‌هكرنا تیرۆرستێن داعشێ دكه‌ت.

لیزا فه‌له‌كه‌دین كاكه‌یی، ئه‌نداما لژنا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ، گۆت” هێرشا ڤێ دووماهیێ یا تیرۆرستێن داعشێ ل سه‌ر هێزێن پێشمه‌رگه‌ی جهێ دلته‌نگیێ یه‌، كو بوو ئه‌گه‌رێ شه‌هیدبوون و برینداربوونا هژماره‌كا پێشمه‌رگان، ئه‌ڤه‌ د ده‌مه‌كی دایه‌ كو تیرۆرستێن داعشێ ل ڤی سنوری خوه‌ رێكخستیه‌ و دخوازن زیانێ ب هێزێن پێشمه‌رگه‌ی بگه‌هینن”.

لیزایێ گۆت ژی” نوكه‌ هه‌رێما كوردستانێ كار ل سه‌ر پرۆژه‌كێ گه‌له‌ك گرنگ دكه‌ت، كو دادگه‌هكرنا تیرۆرستێن داعشێ یه‌، ئه‌ڤێ چه‌ندێ ژی وه‌كریه‌ داعش هێرشێ بكه‌ته‌ سه‌ر هه‌رێما كوردستانێ، ئه‌ڤ پرۆژه‌ تنێ یێ هه‌رێما كوردستانێ نینه‌، به‌لكو یێ عیراقێ و گه‌له‌ك وه‌لاتان ژی یه‌، كو وان وه‌لاتان هه‌رێما كوردستانێ هه‌لبژارتیه‌، چونكه‌ هه‌رێما كوردستانێ ده‌ڤه‌ره‌كا ئارامه‌ و پێدڤیه‌ عیراق و ئه‌و وه‌لاتانه‌ كو پشته‌ڤانیێ ل ڤێ دادگه‌هكرنێ دكه‌ن، هه‌رێما كوردستانێ بپارێزن و هاریكار بن ل گه‌ل هێزا پێشمه‌رگێ كوردستانێ بۆ پاراستنا ڤێ ده‌ڤه‌رێ”.

دووپات كر ژی” پشتی روودانێن 16 ئووكتۆبه‌را 2017 و هه‌تا نوكه‌، هێزێن له‌شكری و ئه‌منی یێن عیراقی د سه‌ركه‌فتی نه‌بوون د پاراستنا ته‌ناهیا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ و ب دووماهی ئینانا لڤینێن داعشێ ل وان ده‌ڤه‌ران، هه‌بوونا ڤالاهیا ئه‌منی ژبلی كو بوویه‌ مه‌ترسی بۆ ئاكنجیێن ده‌ڤه‌رێ، هه‌روه‌سا گه‌فه‌كا جدی یه‌ بۆ سه‌ر ته‌ناهیا هه‌رێما كوردستانێ”.

کۆمێنتا تە