ئیران و چین رێککەفتنەکا ٢٥ سالی ئیمزا دکەن

ئیران و چین رێککەفتنەکا ٢٥ سالی ئیمزا دکەن

23

ئەڤرۆ:

سەعید خەتیب زادە پەیڤدارێ وەزارەتا دەرڤە یا ئیرانێ راگەھاند کو وانگ یی وەزیرێ دەرڤە یێ چینێ بۆ ھەڤدیتنان و ئیمزاکرنا رێککەفتنا ستراتیژی یا ٢٥ سالی د ناڤبەرا ئیرانێ و چینێ دا گەھشتیە تەھرانێ و دێ بۆ ماوەیێ دو رۆژان ل ئیرانێ بیت.

بەری نھا وەزیرێ دەرڤە یێ ئیرانێ محەمەد جەواد زەریف دیار کربوو کو ئیران و چین دێ رێککەفتنەکێ بۆ ماوەیێ ٢٥ سالان ئیمزا کەن کو رێککەفتنەکا گەلەک مەزن و ستراتیژیە و ئەو یەک دێ بیتە ئەگەرێ ب ھێزبوونا پێگەھێ ئیرانێ ل دەڤەرێ.

ل ئالیێ دی ھەر یەک ژ وەلاتێن ئەمریکا و وەلاتێن ئێکەتیا ئورۆپا بەری نھا دژبەریا خوە ل ھەمبەر رێککەفتنا ئیرانێ و چینێ دیار کربوون و پرانیا ھێزێن ئۆپۆزسیۆنا ئیرانێ ژی دیار دکەن کو رێککەفتنا ٢٥ سالی یا ل گەل چینێ دێ بیتە ئەگەرێ ھندێ کو چین ببیتە مفادارێ سەرەکی یێ وزێ و پەترۆلا ئیرانێ و چو مفایێن وێ رێککەفتنێ بۆ گەلێن ئیرانێ نابیت.

چاڤدێرێن سیاسی ژی دیار دکەن کو ئیرانێ دڤێت ب رێیا رێککەفتنا ٢٥ سالی یا ل گەل چینێ پێگەھێ خوە ل رۆژھەلاتا ناڤین ب ھێز بکەت و ھەروەسا ئیرانێ دڤێت ب رێیا وێ رێککەفتنێ کارتێکرنا سزایێن ئابووری یێن ئەمریکا ژی نەھێلیت، لێ ئەو یەک ژی ب ساناھی نابیت و رەنگە چینێ داخوازیێن گەلەک زێدەتر ژی ژ ئیرانێ ھەبن.

کۆمێنتا تە