ئیسماعیل سه‌یرانی: 30% ژ خه‌لكێ‌ باكورێ‌ كوردستانێ‌ گوهداریا سترانێن فلكلۆری دكه‌ن

ئیسماعیل سه‌یرانی: 30% ژ خه‌لكێ‌ باكورێ‌ كوردستانێ‌ گوهداریا سترانێن فلكلۆری دكه‌ن

3

زنار تۆڤی:

ده‌نگبێژ ئیسماعیل ئۆگلۆ، خه‌لكێ‌ جۆله‌مێرگێ‌ یه‌ و نوكه‌ ل باژێرێ‌ وانێ‌ یێ‌ باكورێ‌ كوردستانێ‌ دژیت، د دیداره‌كێ‌ دا بۆ رۆژناما ئه‌ڤرۆ دبێژیت: د ژیێ‌ 10 سالییێ‌ وی ده‌ست ب گۆتنا سترانێن فۆلكلۆری كریه‌ و هه‌تا نوكه‌ ژی ب ره‌نگه‌كێ‌ به‌رده‌وام دبێژیت، هه‌روه‌سا ژبه‌ركو باپیرێ‌ وی ته‌یفۆرێ‌ كه‌رداش ده‌نگبێژه‌كێ‌ ناڤدار یێ‌ ده‌ڤه‌را جۆله‌مێرگێ‌ بوویه‌، دیسان دایكا وی و هه‌ر سێ‌ خاله‌تێن وی ژی سترانێن فۆلكلۆری دگۆتن، ئه‌ڤه‌ بوویه‌ هوكار كو ئه‌و ژی سترانێن فۆلكلۆری بێژیت.

ناڤهاتی گۆت ژی: سترانا فۆلكلۆری وه‌كو خوه‌ نه‌مایه‌، هنده‌ك كه‌س هاتینه‌ ب ره‌نگه‌كێ‌ نه‌باش سترانێن فۆلكلۆری دبێژن و گه‌له‌ك ئاوازێن وان ژی گوهارتینه‌، ڤێ‌ چه‌ندێ‌ زیان گه‌هاندیه‌ سترانا مه‌ یا فۆلكلۆری، دیسان هنده‌ك سترانبێژێن گه‌نج هه‌نه‌، هنده‌ك په‌یڤێن نوو ل دووڤ حه‌زا دلێ‌ خوه‌، د ئێخنه‌ د ناڤ هنده‌ك سترانێن فۆلكلۆری دا و وان سترانان دبێژن، ئه‌ڤه‌ ژی كاره‌كێ‌ گه‌له‌ك خه‌له‌ته‌ و ئه‌ڤ چه‌نده‌ خزمه‌تا سترانا مه‌ یا فۆلكلۆری ناكه‌ت، دیسان دڤێت ب ره‌نگه‌كێ‌ باشتر ڤه‌كۆلین ل سه‌ر سترانا فۆلكلۆری بهێته‌ كرن و دڤێت په‌یڤێن سترانێن فۆلكۆری وه‌كو خوه‌ بهێنه‌ گۆتن و نابیت په‌یڤێن وان سترانان بهێنه‌ گوهۆرین، هه‌روه‌سا نوكه‌ ل باژێرێ‌ وانێ‌ من دیوانخانه‌ك ڤه‌كریه‌ و تێدا ئه‌ز شێوازێ‌ گۆتنا سترانێن فۆلكلۆری یێن به‌رێ‌ نیشا گه‌نجان دده‌م.

ئیسماعیل هێشتا دبێژیت: د ناڤ سترانێن فۆلكلۆری یێن كوردی یێن ده‌ڤه‌را سه‌رحه‌دێ‌ گه‌له‌ك په‌یڤێن توركی تێدا هاتینه‌ بكارئینانن ئه‌م بزاڤێ‌ دكه‌ین وان په‌یڤێن توركی ژ ناڤا وان سترانان بینینه‌ده‌ر و ل جهێ‌ وان په‌یڤێن كوردی یێن ره‌سه‌ن د دانین، دیسان مه‌ لبه‌ره‌ هنده‌ك كلیپان ژی بۆ وان گه‌نجان دروست بكه‌ین، هه‌روه‌سا هه‌تا نوكه‌ من پتری هزار سترانێن داوه‌ت دیلانان یێن فۆلكلۆری پاراستینه‌ و دیسان من پتری 250 سترانێن كوچك و دیوانان پاراستینه‌ و ب ره‌نگه‌كێ‌ به‌رده‌وام ئه‌ز وان سترانان دبێژم و دیسان مه‌ گه‌له‌ك سترانێن فۆلكلۆری ژی نڤێسینه‌ و هنده‌ك مه‌ ب ده‌نگ تۆماركرینه‌ و مه‌ پاراستینه‌.

ئه‌و هونه‌رمه‌نده‌ هێشتا دبێژیت: گرتنا كه‌نالێن كوردی ل باكورێ‌ كوردستانێ‌ ژ ئالیێ‌ ده‌وله‌تا توركی ڤه‌، زیانه‌كا مه‌زن گه‌هشتیه‌ ستران و هونه‌رێ‌ كوردی، لێ‌ دیسان ژی مه‌ ده‌ست ژ كارێ‌ خوه‌ به‌رنه‌دا و ئه‌م هه‌ر د به‌رده‌وام بووین، هه‌روه‌سا نوكه‌ ژی گه‌له‌ك خه‌لكێ‌ مه‌ قه‌ستا دیوانخانه‌یا من یا فۆلكۆری دكه‌ن، دخوازن فێری سترانێن فۆلكلۆری یێن كوردی ببن، دیسان د نوكه‌ ژماره‌كا كێم یا سترانبێژێن گه‌نج ب ره‌نگه‌كێ‌ باش سترانێن فۆلكلۆری دبێژن، نوكه‌ ب تنێ‌ ستران گۆتن بۆ هنده‌كان بوویه‌ ده‌رخستنا ناڤی و مه‌ره‌ما وان نه‌ خزمه‌تكرنا هونه‌رێ‌ كوردی یه‌، له‌وما گه‌له‌ك جاران من بزاڤ كرینه‌، كو ئه‌وگه‌نجه‌ ب ره‌نگه‌كێ‌ باش سترانان بێژن و نه‌ ل دووڤ حه‌زا دلێ‌ خوه‌ بێژن، به‌لكو دڤێت په‌یڤێن سترانان ب ره‌نگه‌كێ‌ راست و دروست بێژن.

ئیسماعیلی ئه‌و ژی ئاشكرا كر: نوكه‌ ل باكورێ‌ كوردستانێ‌ 30% یا خه‌لكێ‌ گوهداریا سترانێن فۆلكلۆری دكه‌ن، دیسان گه‌له‌ك جاران ئه‌ز ل مالا ده‌نگبێژه‌كێ‌ بوویمه‌ مێهڤان، ل ده‌مێ‌ وی ده‌نگبێژی ستران بۆ مه‌ دگۆتن، دا زارۆیێن وی بێژنێ‌ شه‌رمه‌ سترانێن فۆلكۆری نه‌بێژه‌ و بلا فلان كه‌س ل گه‌ل مۆزیكێ‌ بۆ مه‌ سترانان بێژیت، ب راستی ژی ئه‌ڤه‌ كاره‌كێ‌ حێبه‌تی یه‌ بۆ من، دیسان ئه‌ڤ چه‌نده‌ ڤه‌دگه‌ریت بۆ هه‌بوونا سۆشیال میدیایێ‌ د ڤی سه‌رده‌می دا، هه‌ر چه‌نده‌ گۆتنا سترانێن فۆلكۆری دناڤا كوردان دا تایبه‌تمه‌ندیا خوه‌ هه‌یه‌ و تشته‌كێ‌ تایبه‌ته‌ ب ملله‌تێ‌ كورد ڤه‌، چونكی ئه‌و سترانه‌ مێژوو و سه‌ربۆرێن ژیانێ‌ و ره‌سه‌ناتییا كوردان دده‌نه‌ دیار كرن، هه‌روه‌سا ل باكورێ‌ كوردستانێ‌ نوكه‌ گه‌نجێن مه‌ پتر گوهدارییا سترانێن توركی دكه‌ن، ئه‌ڤه‌ ژی ڤه‌دگه‌ریت بۆ هندێ‌ كو خه‌لكێ‌ مه‌ یێ‌ كورد ل مال ب كوردی ل گه‌ل زارۆیێن خوه‌ نائاخڤن، ئه‌ڤ چه‌نده‌ ژی ڤه‌دگه‌ریت بۆ خه‌مساریا پارت و ئالیێن كوردی ل باكورێ‌ كوردستانێ‌، چونكی زارۆیێن وان ب توركی د ئاخڤن و ئه‌ڤه‌ بوویه‌ ئه‌گه‌ر كو ئه‌و گوهداریا سترانێن فۆلكلۆری نه‌كه‌ن، له‌وما دچن گوهداریا سترانێن توركی دكه‌ن، هه‌روه‌سا دڤێت زارۆیێن مه‌ خوه‌ فێری زمانێ‌ كوردی بكه‌ن و هه‌ر ده‌مێ‌ زارۆیێن كوردان فێری زمانێ‌ كورد ببن، دێ‌ حه‌ز ژ سترانێن كوردی كه‌ن و ب ڤی ره‌نگی دێ‌ هونه‌رێ‌ كوردی ژی به‌ر ب پێشڤه‌ چیت.

کۆمێنتا تە