بۆ ساخله‌میه‌كا باشتر ل ره‌مه‌زانێ‌ ڤان شیره‌تان به‌رچاڤ وه‌رگرن

بۆ ساخله‌میه‌كا باشتر ل ره‌مه‌زانێ‌ ڤان شیره‌تان به‌رچاڤ وه‌رگرن

17

مفایێن روژیگرتنێ‌:‏

  • رۆژیگرتن ئارامیێ‌ دده‌ته‌ له‌شی و ب تایبه‌ت ئارامیێ‌ بۆ كوئه‌ندامێ‌ هه‌رسكرنێ‌ په‌یدادكه‌ت.‏
  • سیسته‌مێ‌ خوارنێ‌ ل هه‌یڤا ره‌مه‌زانێ‌ پێدڤیه‌ وەكو رۆژێن سروشتی بیت كو سیسته‌مه‌كێ‌ هه‌ڤسه‌نگ بیت و ‏هه‌موو پێدڤیێن له‌شی ژ خوارنێ‌ دابین بكه‌ت.‏

* هه‌یڤا ره‌مه‌زانێ‌ ده‌لیڤه‌یه‌كا زێرینه‌ بۆ هێلانا جگاره‌یان.

شیره‌تێن گرنگ ل دور فتارێ‌:‏

* پێدڤیه‌ خوارنا فتارێ‌ و پاشیڤێ‌ یا پێكهاتی بیت ژ خوارنه‌كا هه‌مه‌ره‌نگ و هه‌ڤسه‌نگ كو هه‌ر چار كومێن ‏خوارنێ‌ بخوڤه‌بگریت وه‌كو گوشتێ‌ سپی و سۆر، فێقی و زه‌رزه‌واتێن گه‌هشتیی و نان و دانك، شیر و ‏به‌رهه‌مێن وی.‏

  • باشتره‌ فتارێ‌ ب خوارنه‌كا سڤك ده‌ستپێ‌ بكه‌ی داكو مه‌عیدا مرۆڤی ئاماده‌یا خوه‌ وه‌ربگریت بۆ ‏پێشوازیكرنێ‌ ل خوارنێ‌، بۆ نموونه‌ دشیاندایه‌ ب خوارنا خورمێ‌ و قه‌سپا یان شوربه‌كا گه‌رم، خوشاڤه‌كا ‏نه‌جه‌مه‌د گرتی یان ئاڤه‌كا نه‌گه‌له‌ك ته‌زی ده‌ستپێ‌ بكه‌ی داكو زوو له‌ش ژێ‌ قورتال ببیت كو نه‌بنه‌ ‏ئه‌گه‌رێ‌ تێكچوونا كوئه‌ندامێ‌ هه‌رسكرنێ‌ و په‌یداكرنا ئاریشه‌یان.‏

* باشتره‌ پشتی نڤێژكرنێ‌ ده‌ست ب خوارنا سه‌ره‌كی بكه‌ی و باشتره‌ جوره‌كێ‌ ب تنێ‌ خوارنا سه‌ره‌كی بیت ‏دناڤ سفرا خوارنێ‌ دا.‏

* باشتره‌ رۆژانه‌ شوربه‌كا گه‌رم بهێته‌ خوارن و ئه‌وژی جوره‌كێ‌ سه‌ره‌كیێ‌ خوارنێ‌ بیت.‏

  • دیسان باشتره‌ تو رۆژانه‌ زه‌لاتێ‌ بخۆی.‏
  • نابیت حه‌فتیێ‌ پتر ژ دو جاران خوارنێن قه‌لاندی بخۆی.‏
  • خوه‌ ژ خوارنێن ب چه‌وری و پری روین دوور بكه‌.‏
  • گه‌له‌ك خوارنێ‌ ل ده‌مێ‌ فتارێ‌ نه‌خۆ، ژبه‌ركو ئه‌و دبیته‌ ئه‌گه‌رێ‌ وه‌ستیانا له‌شی و باوه‌شكێن مروڤی ‏زێده‌دبن و خوین كێم دگه‌هیته‌ زه‌ڤله‌كێن له‌شی دگه‌ل سه‌رێ‌ مرۆڤی\ و مرۆڤ هه‌ست ب گێژبوونێ‌ دكه‌ت.‏

* پێدڤیه‌ خوارنا خوه‌ باش بجووی و ب له‌ز خوارنێ‌ نه‌خۆ داكو چ ئاریشه‌یێن هه‌رسكرنێ‌ بۆ ته‌ په‌یدانه‌بن.‏

  • یا ژ هه‌میێ‌ باشتر ئه‌وه‌ ئاڤێ‌ و شله‌مه‌نیان دگه‌ل خوارنێ‌ كێم بكه‌ی و باشتره‌ دناڤبه‌را فتارێ‌ و پاشیڤێ‌ دا ‏ده‌م بۆ ده‌می ب كێماتی ڤه‌خوین.‏

* چ جاران به‌قلاوێ‌ و شریناهیان پشتی فتارێ‌ نه‌خۆ، به‌لكو یا باشتر ئه‌وه‌ ل شوونا وان فێقی بهێته‌ خوارن.‏

* هنده‌ك هه‌نه‌ هه‌ر ژ فتارێ‌ و هه‌تا دبیته‌ ده‌مێ‌ پاشیڤێ به‌رده‌وام خوارنێ‌ دخوون، ئه‌ڤه‌ ره‌فتاره‌كا خه‌له‌ته‌ و ‏باشتره‌ خوه‌ ژێ‌ دوور بكه‌ین.‏

* رێڤه‌چوونا پشتی فتارێ‌ دێ‌ هاریكاریا له‌شی كه‌ت بۆ هه‌رسكرنا خوارنێ‌ و چالاككرنا له‌شی و خولا ‏خوینێ‌ و دێ‌ بیته‌ رێگر كو مرۆڤ ژ قه‌بزبوونێ‌ بهێته‌ پاراستن.

هنده‌ك شیره‌تێن گرنگ ل دور پاشیڤێ‌:‏

  • پاشیڤ ته‌ڤاڤكه‌را فتارێ‌ یه‌ بۆ دابینكرنا پێدڤیێن له‌شی ژ خوارن و ڤه‌خوارنێ‌ یه‌.‏

* باشتره‌ پاشیڤ بهێته‌ گیروكرن داكو له‌شی شیان هه‌بن ب رۆژێ‌ مفای ژێ‌ وەربگریت و هێزا پێدڤی بۆ ‏له‌شی دابین ببیت.‏

  • باشتره‌ خوارنا پاشیڤێ‌ یا پێكهاتی بیت ژ: پتات، نان، به‌رهه‌مێن سپییاتی و شرینیێن سڤك بۆ ‏هه‌رسكرنێ‌.‏

 

* دێ‌ گه‌له‌ك باش بیت خوه‌ ژ خوارنێن سویر وه‌كو مخلله‌ و په‌نیرێن خوێكری و زه‌یتوونا ب پارێزی.‏

* ژبه‌ركو رێژه‌یه‌كا زور ژ ئاڤێ‌ دناڤ فێقی و زه‌رزه‌واتی دا هه‌یه‌ گه‌له‌ك باشه‌ مرۆڤ بخۆت.‏

  • باشتره‌ ئێكسه‌ر پشتی پاشیڤێ‌ نه‌نڤی و ده‌لیڤێ‌ بده‌یه‌ له‌شێ‌ خوه‌ بۆ هه‌رسكرنا خوارنێ‌.‏
  • ب چ ره‌نگه‌كی گوشتی و ماسیان نه‌خۆ، ژبه‌ركو ب خوارنا وان دێ‌ هه‌ست ب تێهنیبوونێ‌ كه‌ی.

کۆمێنتا تە