خوه‌نیشادانێن كوردێن مه‌ ل ئه‌وڕۆپا دڤێت ل بن سه‌یوانا ئالا كوردستانێ بن

خوه‌نیشادانێن كوردێن مه‌ ل ئه‌وڕۆپا دڤێت ل بن سه‌یوانا ئالا كوردستانێ بن

8

ئیسماعیل عه‌لی/ڵندن
پشتی ڤه‌كێشانا هێزێن ئه‌مریكا ژ باكۆرێ سووریێ و هێرشێن دوژمنانه‌ یێن هێزێن ئارتێشا تورك ل سه‌ر گه‌لێ كورد ل ڕۆژاڤای، بۆ ئه‌گه‌را هه‌وایه‌كا نه‌ڕازیبوونێ یا مه‌زن ب ڕێیا خوه‌نیشادانان ل جاددێن باژێرێن ئه‌وڕۆپا ب هه‌ماهه‌نگی ل گه‌ل چالاكڤانێن دۆستێن كورد ل وان وه‌ڵاتان ب ته‌نشت ئه‌و رێكخڕاوێن به‌رگریێ بۆ پاراستنا مافێن گه‌لێن بنده‌ست دكه‌ن. لێ خاڵا باڵكێش من ڤیا ئاڤڕه‌شینكه‌كێ لێبكه‌م، هنده‌ك ئه‌و خوه‌نیشادانێن ل باژێرێ له‌نده‌ن هاتینه‌ ئه‌نجامدان ژلایێ ڕه‌ڤه‌ندا كوردی ل وێرێ كو ژمارا زێده‌تر كوردێن ڕۆژهه‌لاتن تو دا شێی ب تبلێن ده‌ستان ئاڵایێ كوردستانێ هه‌ژمێری، كو دشێم ب نێزیكی بێژم پتر ژ ڕێژا نۆت ژ سه‌دێ درووشمێن حزبایه‌تی بووینه‌ و به‌رگریكرن ژ ئایدیۆلۆژیا حزبێن وان بوویه‌، وه‌كو بلندكرنا ئاڵایێن حزبێن په‌كه‌كێ و یه‌په‌ژێ و وێنێن سه‌رۆك ئاپۆ. یا ڕه‌وایه‌ و هه‌ر كه‌سه‌ك ئازاده‌ هه‌ر درووشمێ بڤێت بلند بكه‌ت به‌لێ د ڤی كاودانی دا و ل سه‌ر جاددێن وه‌ڵاتێن بیانی دڤێت ئه‌م ئاڵایه‌كی نیشا وان بده‌ین كو ئه‌م ئێك نه‌ته‌وه‌ و ئێك ئاخ و ئێك نیشتیمانین.
هه‌كه‌ تێبیی بكه‌ین د ڤان ڕۆژان دا، مه‌زنترین خۆنیشادان ل سه‌ر ئاستێ جه‌ماوه‌ری ل هه‌ردو وه‌ڵاتێن عیڕاق و لبنانێ بۆ نه‌هێلانا نه‌دادپه‌روه‌ری و نه‌هێلانا گه‌نده‌لیێ ڕووداینه‌، لێ ژبلی ئاڵایێ عیڕاق و لبنانێ، چ ئاڵایێن دی مه‌ نه‌دیتن، یان مه‌ وێنێن چ لیده‌ر و سه‌ركرده‌ و سه‌رۆك حزبان نه‌ دیتن. ڕاستی ئه‌و تێبینی یا من كری به‌هرا شێری ل باژێرێ له‌نده‌ن بوویه‌، به‌روڤاژی باژێڕێن ستۆكهۆڵم و به‌رلین و هنده‌كێن دی كو ئاڵایێن سه‌ره‌كی هاتینه‌ بلندكرن یێ كوردستانێ بۆ. بۆچی ژ هه‌میان ڕا له‌نده‌ن، كو ژ لایێ سیاسی ڤه‌ باژێره‌ك گرنگه‌ بۆ كێشێن مه‌یێن سیاسیێن كوردی وه‌كو هه‌ر سیاسیێن وی باژێری بووینه‌ به‌ری پتر ژ سه‌د ساڵان ئه‌م ب خاجا ڕیچاردێ دلێ شێری چار پارچه‌كرین. له‌وا گرنگ بوو ژلایێ ڕێكخه‌رێن ڤان چه‌ند خوه‌نیشادانه‌كێن له‌نده‌ن ب هووری هزرا ئارمانج و درووشمێن خوه‌ كربانه‌ د ناڤ ڕێزێن خوه‌نیشاده‌ران دا و پتر ته‌كه‌زا خوه‌ ل سه‌ر زێده‌كرنا ژمارا ئاڵایێن كوردستانێ كربا ب ته‌نشت وێنێن شه‌هید و ئه‌و وه‌ڵاتیێن بووینه‌ قوربانیێ هێرشێن ئاڕتێشێن ده‌وله‌تا تورك. نه‌خاسمه‌ وه‌كو مه‌ د ناڤ خوه‌نیشاده‌ران دا دیتی ژماره‌یه‌كا چالاكڤانێن بریتانی یێن پشكدار د خوه‌نیشادانا دا وه‌كو دۆستێن ڕه‌ڤه‌ندا كوردی ب ته‌سه‌لی د گۆتارێن خوه‌دا ب توندی نه‌كامیا هێرشێن ده‌وله‌تا تورك كرینه‌ و دیسا حه‌تا نه‌كامیا ده‌سهه‌ڵاتا بریتانیا ژی كرینه‌ ژبۆ بێ ده‌نگیا وان ل هه‌مبه‌ر ڕوودانێن دژی كوردێن ڕۆژئاڤا و هه‌ڵویستێ دوژمنانه‌ یێ ده‌وله‌تا تورك. ژ لایه‌كێ دی ئه‌ڤان چالاكڤانێن بریتانی داخواز ژگه‌لێ بریتانی ب گشت كریه‌ بۆ هه‌لبژارتنێن گشتی ل مه‌ها كانوونا ئێكێ ل دووماهیا ڤێ ساڵێ، ده‌نگێن خوه‌ بده‌نه‌ پارتا ئوپوزسیۆن یا كرێكاران و بشێن بزڤرنه‌ سه‌ر ده‌سهه‌ڵاتێ دا پتر د خزمه‌تا ڕه‌ڤه‌ندێن بیانی دا بن ژوان ڕه‌ڤه‌ندا كوردی و خزمه‌تا دۆزا گه‌لێ كورد بكه‌ن د سیاسه‌تا بریتانیا یا ده‌رڤه‌ دا.
ئه‌ڤرۆ هه‌ر كورده‌ك ل هه‌ر وه‌ڵاته‌كێ بیانی ل سه‌ر وی ئه‌ركه‌كێ نه‌ته‌وه‌ییه‌ وی ئاڵای ل هه‌مبه‌ر گه‌لێن بیانی بلند بكه‌ت كو خواندنا وی ئاڵای مه‌ره‌ما ئێك چاره‌نڤیس بیت، ئه‌وژی ئێكرێزیا ملله‌تی و ئێكگرتنا هه‌می هێزێن سیاسی بۆ ئێك ئاخ و ئێك نه‌ته‌وه‌، ئه‌وژی ئاڵایێ كوردستانێ و هه‌می پارچێن لێكڤه‌كری ل بن سه‌یوانا وی ئاڵای كۆمڤه‌ ببن، ژبۆ پاراستنا ناسنامه‌ و ئیڕادا گه‌لی كورد.

کۆمێنتا تە