ده‌مێ په‌رله‌مانتارێن دهۆكێ ئاریشه‌كێ دگه‌هینن پارێزگه‌ری ئێكسه‌ر دوڤچوون بۆ دهێته‌كرن

ده‌مێ په‌رله‌مانتارێن دهۆكێ ئاریشه‌كێ دگه‌هینن پارێزگه‌ری ئێكسه‌ر دوڤچوون بۆ دهێته‌كرن

هه‌ولێر، قائید میرۆ

سه‌رۆكا نڤیسینگه‌ها په‌رله‌مانێ كوردستانێ ل پارێزگه‌ها دهۆكێ راگه‌هاند، رۆلێ هه‌بوونا نڤیسینگه‌ها په‌رله‌مانی ل دهۆكێ یێ كێم نینه‌ بۆ چاره‌سه‌ركرنا ئاریشه‌یین وه‌لاتیێن دهۆكێ و دوڤچوونا پرۆژه‌یان و دبێژیت، ئه‌م ناڤه‌شێرین به‌ری نوكه‌ دهۆك یا مه‌غدوور بوویه‌ د هنده‌ك بیاڤان دا، بۆ نموونه‌ په‌سه‌ندكرنا پرۆژه‌یان، به‌لێ نوكه‌ ئه‌ف غه‌در نه‌مایه‌ و چه‌ندین پرۆژه‌ بۆ دهۆكێ هاتینه‌ بجهئینان.

ژیان تاهر، سه‌رۆكا نڤیسینگه‌ها په‌رله‌مانێ كوردستانێ ل دهۆكێ بۆ رۆژناما ئه‌ڤرۆ دیاركر” ب گۆره‌ی په‌یره‌وێ ناڤخوه‌ یێ په‌رله‌مانێ كوردستانێ، ل پتریا هه‌موو پارێزگه‌ه و پتریا قه‌زایێن هه‌رێما كوردستانێ نڤیسینگه‌هێن په‌رله‌مانی هاتینه‌ ڤه‌كرن بۆ دوڤچوونا ئاریشه‌ و گازنده‌یێن وه‌لاتیێن هه‌ر سنوره‌كی، ل رۆژانێن ئێك شه‌مبی په‌رله‌مانتار ل نڤیسینگه‌ها سنورێ خوه‌ ده‌وامێ دكه‌ن بۆ وه‌رگرتنا ئاریشه‌یێن وه‌لاتیان و دوڤچوونا وان، راسته‌ په‌رله‌مانتاری ماف یێ هه‌ی ل هه‌ر ده‌ڤه‌ره‌كێ دووڤچوونێ بكه‌ت، به‌لێ وه‌كی ئاسانكاری هه‌ر په‌رله‌مانتاره‌ك ل سنورێ خوه‌ دێ دووڤچوونێ كه‌ت، مرۆڤ ب وژدان ڤه‌ بێژیت ئه‌م ل سه‌ر سۆزا خوه‌ینه‌ ئه‌وا مه‌ دایه‌ وه‌لاتیێن خوه‌ و ل هه‌موو رۆژێن ئێك شه‌مبی ئه‌م ل نڤیسینگه‌ها دهۆكێ د به‌رهه‌ڤین و هه‌تا نوكه‌ چه‌ندین ئاریشه‌ مه‌ گه‌هاندینه‌ لایه‌نێن په‌یوه‌ندیدار و ب رێیا نڤیسارێ ژی لیژنه‌یێن په‌رله‌مانی یێن په‌یوه‌ندیدار هاتینه‌ ئاگه‌هداركرن و لیژنه‌یێن په‌رله‌مانی دووڤچوونێ بۆ دكه‌ن”.

سه‌رۆكا نڤیسینگه‌ها په‌رله‌مانی ل دهۆكێ ئاماژه‌كر” گه‌له‌ك وه‌لاتیێن پارێزگه‌ها دهۆكێ د ئاگه‌هدار نینن كو نڤیسینگه‌ها په‌رله‌مانی ل پارێزگه‌ها دهۆكێ هه‌یه‌ و چه‌ندین جاران وه‌لاتیێن دهۆكێ هاتینه‌ ئاڤاهیێ په‌رله‌مانی ل هه‌ولێرێ، له‌ورا چ جوداهی نینه‌ وه‌لاتی بچیته‌ نڤیسینگه‌ها دهۆكێ یان ژی ئاڤاهیێ په‌رله‌مانی ل هه‌ولێرێ، گه‌له‌ك جاران مه‌ ئاریشه‌یێن وه‌لاتیان ب ته‌له‌فۆنه‌كێ چاره‌سه‌ر كرینه‌ و رۆژانه‌ ئه‌م ئاریشه‌یێن وه‌لاتیان دگه‌هینینه‌ لایه‌نێن په‌یوه‌ندیدار، ئه‌ڤرۆ تۆرێن جڤاكێ رۆله‌كێ مه‌زن هه‌یه‌ بۆ گه‌هاندنا ئاریشه‌یان، له‌ورا ئه‌ز به‌رده‌وام دوفچوونا تۆرێن جڤاكی دكه‌م و هه‌ر تشته‌كێ ئه‌م بزانین روودایه‌ ئێكسه‌ر دوڤچوون بۆ دهێته‌كرن”.

ژیان تاهر گوت ژی” به‌ری نوكه‌ غه‌در ل دهۆكێ دهاته‌كرن بۆ وه‌رگرتنا ره‌زامه‌ندیا پرۆژان د سالێن بۆری دا، به‌لێ د ڤێ خۆلا په‌رله‌مانی دا مه‌ وه‌كی هه‌موو په‌رله‌مانتارێن دهۆكێ ب هه‌موو فراكسیۆنان ڤه‌ هه‌ست ب وێ چه‌ندێ كر بوو كار بكه‌ین بۆ نه‌هێلانا ڤێ مه‌غدووریه‌تا پارێزگه‌ها دهۆكێ، سوپاس بۆ سه‌رۆكێ حوكمه‌تا هه‌رێما كوردستانێ ئاریشه‌ هاتیه‌ چاره‌سه‌ركرن و ئه‌م دبینین چه‌ندین پرۆژه‌یێن خزمه‌تگوزاری ل سنورێ پارێزگه‌ها دهۆكێ كه‌فتینه‌ د بیاڤێ بجهئینانێ دا، راسته‌ ئه‌گه‌ر به‌رێ خه‌لكه‌كی گوتبیت دهۆك یا مه‌غدووره‌، به‌لێ نوكه‌ ئه‌ف مه‌غدووریه‌ته‌ ب دوماهی هاتیه‌، بتایبه‌تی پارێزگه‌رێ نوكه‌ یێ دهۆكێ گه‌له‌ك یێ هاریكاره‌ بۆ چارسه‌ركرنا ئاریشه‌یێن خه‌لكێ دهۆكێ و بۆمه‌ ژی وه‌كی په‌رله‌مان هاریكاری هه‌یه‌ ده‌مێ ئه‌م ئاریشه‌یه‌كێ دگه‌هینین پارێزگه‌رێ دهۆكێ ئێكسه‌ر دوڤچوون بۆ دهێته‌كرن”.

کۆمێنتا تە