دیلان رۆژئاڤا: پشتی شووكرنێ‌ دێ‌ ده‌ست ژ ستران گۆتنێ‌ به‌رده‌م

دیلان رۆژئاڤا: پشتی شووكرنێ‌ دێ‌ ده‌ست ژ ستران گۆتنێ‌ به‌رده‌م

9

ئه‌ڤرۆ، زنار تۆڤی:

خانما سترانبێژ دیلان رۆژئاڤا، كو ناڤێ‌ وێ‌ دروست دیله‌ك ئه‌رسه‌لانه‌، خه‌لكا گه‌ڤه‌رێ‌ یه‌ ل باكورێ‌ كوردستانێ‌، لێ‌ ژبه‌ر حه‌زا وێ‌ بۆ رۆژئاڤا وێ‌ ناڤێ‌ خوه‌ كریه‌ (دیلان رۆژئاڤا) د دیداره‌كێ‌ دا بۆ رۆژناما ئه‌ڤرۆ گۆت: ده‌مێ‌ ل زارۆكاتیا خوه‌ دا من ستران دگۆتن، دایك و بابێن من گه‌ف لمن دكرن و نه‌دهێلا ئه‌ز ستران بێژم و وان دگۆته‌ من هه‌كه‌ تو سترانان بێژی ئه‌م دێ‌ ته‌ ئێشینین، ده‌مێ‌ ئه‌ز دچوومه‌ قوتابخانێ‌ رۆژانه‌ بابێ‌ من هنده‌ك پاره‌ ددانه‌ من، ئه‌و پارێ‌ رۆژانه‌ بابێ‌ من ددانه‌ من، من خوه‌ پێ‌ فێری مۆزیكێ‌ دكر و لده‌ف مامۆستایه‌كێ‌ من كورسێن مۆزیكێ‌ دخواندن، ژ به‌ر كو من گه‌له‌ك حه‌ز ژ هونه‌ری و ستران گۆتنێ‌ دكر، دیسان بابێ‌ من ژی وه‌سا هزر دكر، كو ئه‌ز دچمه‌ قۆتابخانێ‌ و دخوینم، لێ‌ رۆژه‌كێ‌ بابێ‌ من ئه‌ز دیتم، كو سازه‌ك یافمن، گۆته‌ من ئه‌ڤ سازه‌ یا كێیه‌؟، من ژی گۆتێ‌ یا هه‌ڤالا منه‌، ب ڤێ‌ رێكێ‌ ل مال من ساز دژه‌نی، ده‌مێ‌ بابێ‌ من ئه‌ز هوسا دیتیم، گۆته‌ من تۆ حه‌ز دكی بۆ ته‌ سازه‌كێ‌ بكرم، من گۆتێ‌ بۆ من نه‌كره‌ و ئه‌ڤ سازه‌ یا منه‌، ئێدی وی ژی هێلا ئه‌ز سترانان بێژم.

ناڤهاتیێ‌ ئه‌و ژی گۆت: نوكه‌ ئه‌ز دژیێ‌ 24 سالییێ‌ دامه‌ و ئه‌ڤه‌ 12 ساله‌ سترانان دبێژم و ل ده‌ستپێكێ‌ ئه‌ز دچوومه‌ داوه‌تان و ب ڤی ره‌نگی ئه‌ز شیام به‌رده‌وامیێ‌ بده‌مه‌ كارێ‌ خوه‌ و ب ره‌نگه‌كێ‌ باش فێری ستران گۆتنێ‌ و مۆزیكێ‌ بووم، هه‌ر چه‌نده‌ خه‌لكی لۆمه‌یی من دكر و دگۆت تۆ كچی و چێنابیت سترانان بێژی، لێ‌ من گوهدارییا وان نه‌كر و ل سه‌ر كارێ‌ خوه‌ یا به‌رده‌وام بووم، پشتی هنگێ‌ ئه‌م چووینه‌ ئیسته‌نبۆلێ‌ و نوكه‌ ل وی باژێری دژیم.

دیلانێ‌ گۆت ژی: ل ئیسته‌نبۆلێ‌ ب هاریكاریا هنده‌ك هه‌ڤالێن خوه‌ ئه‌ز د چوومه‌ چه‌ندین به‌رنامه‌یان و ب ڤێ‌ چه‌ندێ‌ ئه‌ز شیام خوه‌ باشتر بده‌مه‌ نیاسین و من هنده‌ك كلیپ و ستران چێكرن و پاشی ئه‌ز چوومه‌ چه‌ندین داوه‌ت و ئاهه‌نگان كوردان و ب ڤێ‌ چه‌ندێ‌ ئه‌ز شیام بۆ خوه‌ داهاته‌كێ‌ په‌یدا بكه‌م، دیسان ئه‌ز گه‌له‌ك ب هونه‌ری ڤه‌ هاتیمه‌ گرێدان و لده‌ف من هونه‌ر و ستران گۆتن كاره‌كێ‌ گه‌له‌ك جۆدایه‌.

وێ‌ خانما سترانبێژ گۆت ژی: چه‌ندین جاران ئه‌ز هاتیمه‌ هه‌رێما كوردستانێ‌ و من ستران ل داوه‌ت و ئاهه‌نگان گۆتینه‌، ب ڤێ‌ رێكێ‌ ئه‌ز شیام هنده‌ك كارێن نوو یێن هونه‌ری ئه‌نجام بده‌م، دیسان ئه‌ز شیام بۆ خوه‌ سپۆنسه‌ران په‌یدا بكه‌م، هه‌روه‌سا ل سالا 2015 من كلیپا خوه‌ یا ئێكێ‌ ب ناڤێ‌ ” یارێ‌ ” به‌لاڤ كریه‌، دیسان هه‌تا نوكه‌ من دو ئه‌لبۆم چێكرینه‌ و ئه‌لبۆما خوه‌ یا ئێكێ‌ من ل سالا 2017 چێكرییه‌ ب ناڤێ‌ ” سێ‌ تشت هه‌نه‌ “، كو ژ شه‌ش تراكان پێك دهات و یا دویێ‌ ژی من ل سالا 2019 چێكریه‌، كو ژ 10 تراكان پێك دهێت و من ستران ب هه‌ر دو زمانێن كوردی و توركی تێدا گۆتینه‌.

دیلان هێشتا دبێژیت: نوكه‌ ئه‌ز مژوولی تۆماركرنا سترانه‌كا نوومه‌ ب ناڤێ‌” دێ‌ وه‌ره‌ “، كو ئه‌ڤ سترانه‌ ل سه‌ر چه‌ندین باژێرێن كوردانه‌ و ل ڤان نێزیكان دێ‌ كلیپ كه‌م و به‌لاڤ كه‌م، ل دووڤ دا من لبه‌ره‌ سترانه‌كا هونه‌رمه‌ند كازۆی بێژم و دیسان دێ‌ سترانا ” ئاخ بۆ دلێ‌ من” بێژم وكلیپ كه‌م، لێ‌ نوكه‌ ره‌وشا هونه‌رێ‌ كوردی ل باكوور نه‌ یا باشه‌، چونكی د نوكه‌ دا گه‌له‌ك سترانبێژ ده‌ركه‌فتینه‌ و ب ره‌نگه‌كێ‌ نه‌باش سترانان دبێژم و هه‌ر كه‌سێ‌ ژ مالا خوه‌ رابوو، دێ‌ بێژیت ئه‌ز هونه‌رمه‌ندم و ئه‌ڤ دیارده‌ گه‌له‌ك زێده‌بوویه‌، دیسان ئه‌و كه‌سه‌ په‌یڤێن سترانان ژی ب ره‌نگه‌كێ‌ خه‌له‌ت ژی دبێژن.

ناڤهاتیێ‌ ئه‌و چه‌ند ژی گۆت: ئه‌ز وه‌كو دیلان شوو ب چو هونه‌رمه‌ندان ناكه‌م، چونكی ژیانا هونه‌رمه‌ندان گه‌له‌ك ب وه‌ستیان و زه‌حمه‌ت ده‌رباز دبیت، له‌وما هه‌ر ده‌مێ‌ من شووكر، ئێدی ئه‌ز سترانان نابێژم و دێ‌ ده‌ست ژ ستران گۆتنێ‌ به‌رده‌م، چونكی ستران گۆتن بۆ خانمان كاره‌كێ‌ ب زه‌حمه‌ته‌ و یێ‌ ب ساناهی نینه‌، له‌وما پشتی شووكرنێ‌ ئه‌ز حه‌ز دكه‌م ل گه‌ل زارۆیێن خوه‌ بژیم و ژ هونه‌ری دووربم و ئه‌ڤه‌ هزرا منه‌ و لێڤه‌ نابم.

کۆمێنتا تە