د. رێبین سەلام: مەرەما مادا دستووری ل دۆر ھەرێمبوونا پارێزگەھان، ئەو پارێزگەھێن...

د. رێبین سەلام: مەرەما مادا دستووری ل دۆر ھەرێمبوونا پارێزگەھان، ئەو پارێزگەھێن ژ دەرڤەی ھەرێما کوردستانێ یە

7

ئەڤرۆ، عەزیز ھەورامی:

شارەزایەکێ دستووری د دیدارەکێ دا ل گەل رۆژناما ئەڤرۆ راگەھاند، ب درێژیا دیرۆکێ رستەیەک یا ھەی دھێتە بەرچاڤێن مە و بۆ مە دبێژیت، ئەوا ل مەیدانا شەری ب دەستڤەدئینین ژ ئەگەرێ نە تەباییێ ل دانوستاندناندا ژ دەست ددەین، ھەکە ب لەز ئەڤ رستەیە بھێتە بەرچاڤێن مە، ئێکسەر دو رەھندێن ھەین، یا ئێکێ: ئازایەتی و جامێری. یا دوویێ: کالفامی و نەزانین، ھەکە ھەتا نوکە وێ چەندێ نەزانین کو حەلەقا د گوھێ بیانی دا دێ مە بچووک کەت، نەکو گوە ل بۆچوونێن ھەڤدوو.

رێبینی گۆت ژی” یا ئاشکرایە ١٥ پەرلەمانتارێن کورد ل بەغدا دژی کوردستانێ نە و ب زمانێ کوردی بەرگریێ ژ شوفینیێن دژی کوردستانێ دکەن” ھەروەسا گۆت” بزاڤەکا نەزۆکە و گاڤەکا لەرزۆکە دۆژمنێن ریفراندۆما ٢٠١٧ ھەر جارەکێ ب جۆرەکی دخوازن ئێکرێزیا مە تێک بدەن و ئەو ب خوە ژی دزانن کو ئەو چەندە بۆ پەیدا نابیت”.

دیارکر ژی” ب گۆرەی مادێ ١١٩ ژ دستوورێ عیراقێ، بۆ پارێزگەھان ھەیە داخواز بکەن ببنە ھەرێم، ئەڤ چەندە ژی ل سەر داخوازا ( ئێک ل سەر دەھێ) یا دەنگدەران، یان ژی (ئێک ل سەر سیێ) یا جڤاتێن پارێزگەھان، بھێتە پێشکێشکرن، بەلێ مەبەستا وێ مادا دستووری یا رۆھن و ئاشکرایە ئەوژی پارێزگەھێن دەرڤەی ھەرێما کوردستانێ یە”.

رێبین سەلام خویاکر ژی” سەبارەت لامەرکەزیێ، د بنەرەتدا ھەبوون بۆ لامەرکەزیا ئیداری و دارایی یا ھەی و ٨٥% ژ داھاتێ سلێمانیێ دچیتە د بەریکا حوکمرانێن سلێمانیێ دا، سەبارەت گرێدانا سلێمانیێ ب بەغدا ژی، سلێمانی پشکەکە ژ ھەرێما کوردستانێ و ھەرێم ژی ب گۆرەی مادێ ١١٧ ژ دستوورێ عیراقێ، ھەرێمەکا دانپێدانکری و شەرعی یە و خودانا دەستھەلاتێن قانوون دانانێ و بجھئینانێ و دادوەری یێن شەرعی و فەرمی یە”.

کۆمێنتا تە