سه‌یرانگه‌ها بیاوێ‌ ژ بێی خزمه‌تگۆزاری دناڵیت

سه‌یرانگه‌ها بیاوێ‌ ژ بێی خزمه‌تگۆزاری دناڵیت

11

مه‌حمود نهێلی

هاڤینگه‌ها بیاوێ‌ ئێك ژ سه‌یرانگه‌هێن سنورێ‌ ناحیا دێره‌لۆكێ‌ و جهه‌كێ‌ بێ‌ هاوتایه‌ ژلایێ‌ گوزاری ڤه‌، لێ‌ ژ به‌ر نه‌بوونا خزمه‌تگوزاریا و رێك و ئاڤ و كاره‌بێ‌ ده‌ستێ‌ گه‌شتیاران ب دروستی ناگه‌هیتێ‌.

 

موحه‌مه‌د عه‌بدوللا، خودانێ‌ ئێك ژ جهێن گوزاری یه‌ ل بیاوێ‌ بۆ رۆژناما ئه‌ڤرۆ دیار كر، هه‌ر دكه‌ڤن دا بیاوێ‌ جهه‌كی گوزاری بوویه‌، لێ‌ ژ به‌ر كو تا نوكه‌ جاده‌یه‌كا باش نه‌گه‌هشتیێ‌ نه‌شیاینه‌ ب دروستی خزمه‌ته‌كا باش یا گه‌شت و گوزارێ‌ بكه‌ت و گۆت: ل ڤان سالێن داویێ‌ وان  چه‌ند جهێن گوزاری ل ڤێ‌ هاڤینگه‌هێ‌ دروست كرینه‌ و خه‌لكه‌كی زۆر قه‌ست دكه‌نێ‌ لێ‌ ژ خرابیا رێكان ئاریشه‌ بو گه‌شتیاران دروست دبیت .

و ته‌كه‌ست كر ، هه‌ر گه‌شتیاره‌كی جاره‌كی قه‌ست كره‌ ڤان هاڤینگه‌ها ئه‌و جاره‌كا دی نه‌شێت قه‌ست بكه‌نێ‌ و ئه‌گه‌رێن وی ژی ڤه‌گه‌راندن بو خرابیا رێكێ‌ و ئاسته‌نگێن ل هه‌مبه‌ری هاتن و چونێ‌ و گۆت: هیڤی ژی خوه‌ستن كو حكومه‌ت پتر چاڤێ‌ خوه‌ ب جهێن گوزاری بده‌ت و پتر گرنگی ب ڤان جهان بهێته‌ دان، چونكو ئه‌ڤ رێكه‌ یا سه‌ره‌كی یه‌ بۆ چه‌ندین گوندێن دن ژی یێن ده‌ڤه‌رێ‌.

به‌هدین تاها ئێك ژ گه‌شتیاران بو رۆژناما ئه‌ڤرۆ دیار كر، وی سه‌ره‌دانا هاڤینگه‌ها بیاوێ‌ كریه‌ بو مه‌به‌ستا بوراندنا ده‌مێن خوه‌ش و گۆت: هه‌رچه‌نده‌ ئه‌ڤ دڤه‌ره‌ جهه‌كی گه‌له‌ك خوه‌شه‌ و جهه‌كی گوزاری یێ‌ به‌ركه‌فتیه‌ لێ‌ مخابن پرۆژێن خزمه‌تگوزاری نه‌گه‌هشتینێ‌ وه‌ك جاده‌ و كاره‌بێ‌ لێ‌ ژ به‌ر خرابیا رێكێ‌ ئه‌و نه‌شیانه‌ چ خوه‌شیێ‌ ل ڤان جهان ببینن.

ناڤهاتی داخاز ژی كر، كو رێكێن ڤێ‌ هاڤینگه‌هێ‌ بهێنه‌ چێكرن داكو وه‌لاتی و گه‌شتیار ب ساناهی بشێن قه‌ستا ڤان جهێن گوزاری بكه‌ن.

ل سه‌ر ڤێ‌ یه‌كێ‌ سامی ئوشانه‌ رێڤه‌به‌رێ‌ ناحیا دێره‌لۆك بو رۆژناما ئه‌ڤرۆ دیاركر، چێكرنا رێكا گوندێ‌ بیاوێ‌ و هاڤینگه‌هێن وێ‌ ئێكه‌ ژ وان پرۆژه‌یێن بو سالانا 2021 هاتینه‌ بلندكرن و گۆت: نوكه‌ رازیبوون ل سه‌ر چێكرنا به‌شه‌ك ژ وێ‌ رێكێ‌ هاتیه‌ كرن كو دورێن چار كیلومه‌تران نه‌ و ئه‌و به‌شێ‌ مایێ‌ كو ژ هاریكا ده‌سپێ دكه‌ت بو گوندێن زێباریا ژ پرۆژه‌یێن سالا 2021 نه‌ و یێ‌ هاتیه‌ بلند كرن لێ‌ هێشتا رازیبوون ل سه‌ر وان چ پرۆژه‌یان نه‌هاتیه‌ كرن و ته‌كه‌ز كر، كو هه‌رده‌مه‌كی ئه‌ڤ پرۆژه‌ زاریبوون ل سه‌ر هاته‌ كرن و ژلایێ‌ كومپانیا یان به‌لێنده‌ران ڤه‌ هاته‌ گرتن دێ‌ ب زووترین ده‌م ده‌ست ب كارێ‌ چێكرنا وێ‌ هێته‌ كرن.

ئاشكراكر، د نوكه‌ ئه‌و پتر گرنگیی ب پرۆژێن خزمه‌تگوزاری دده‌ن كو ل ده‌ڤه‌رێ‌ بهێنه‌ بجهئینان  تایبه‌ت ژی پرۆژێن خزمه‌تگوزاری ل گوندان و هه‌روه‌سا گه‌هاندنا رێك و كاره‌بێ‌ بۆ جهێن گوزاری.

کۆمێنتا تە