سیناتۆره‌كێ ئه‌مریكا:  دڤێت ئه‌م هه‌رده‌م هه‌رێما كوردستانێ ب پارێزین

سیناتۆره‌كێ ئه‌مریكا:  دڤێت ئه‌م هه‌رده‌م هه‌رێما كوردستانێ ب پارێزین

ب، سه‌رجان مه‌حمود:

سیناتۆره‌كێ ئه‌مریكا راگه‌هاند كو گه‌لێ كورد د شه‌رێ ل دژی دكتاتور و تیرۆرستان دا هه‌ڤپه‌یمانێ ئه‌مریكا بوویه‌ و كوردان بۆ ئازادیا خوه‌ گه‌له‌ك قوربانی داینه‌، ژ به‌ر هندێ ژی دڤێت ئه‌مریكا هه‌رده‌م هه‌رێما كوردستانێ ب پارێزیت و كوردان ب تنێ نه‌هێلیت.

ب هه‌لكه‌فتا سی سالیا راگه‌هاندنا ده‌ڤه‌را ئارام و دژه‌ فڕینێ ل هه‌رێما كوردستانێ ژ ئالیێ ئه‌مریكا و هه‌ڤپه‌یمانێن وێ ڤه‌، مایك والتز سیناتۆرێ كۆماریخوازان ل كۆنگرێسێ‌ ئه‌مریكا ئاخڤتنه‌ك پێشكێش كر و تێدا داخواز ژ سیناتۆران كر كو بۆ پاراستن و ب هێزكرنا په‌یوه‌ندیێن ل گه‌ل هه‌رێما كوردستانێ د ئاسته‌كێ بلند دا كار بكه‌ن و گۆت: (گه‌لێ كورد د شه‌رێ ل دژی دكتاتوران و تیرۆرستان دا ل گه‌ل مه‌ بوویه‌ و دڤێت ئه‌م وه‌ك ئه‌ندامێن كۆنگرێسی رێزگرتن و حه‌زكرنا خوه‌ نیشا كوردان بده‌ین و بۆ وان راگه‌هینن كو مه‌ ئه‌و رۆژێن دژوار ژبیر نه‌كرینه‌، چونكو دڤێت ئه‌م ب كریاری بۆ كوردان بسه‌لمینین كو دێ پشته‌ڤانیێ ل وان كه‌ین، نها ژی گه‌له‌ك مه‌ترسی ل سه‌ر كوردان هه‌نه‌ و دڤێت ئه‌م بۆ پاراستنا كوردان پێكڤه‌ كار بكه‌ین).

سیناتۆرێ ئه‌مریكی هه‌روه‌سا پرۆژه‌یه‌ك  بۆ پاراستنا كوردان، پێشڤه‌برن و پشته‌ڤانیكرنا كوردان دا كۆنگرێسی و راگه‌هاند كو دڤێت دیرۆك نه‌هێته‌ ژبیر كرن و گۆت: (سالا 1991 و به‌ری وێ سه‌دامێ دكتاتۆر ب سه‌دان گوندێن كوردان سوتاند و ب هزاران وه‌لاتیێن كورد بێ سه‌روشین كر لێ كوردان ده‌ست ژ خه‌باتا ئازادی و دیموكراسیێ به‌رنه‌دان و د وان سالێن دژوار دا ل گه‌ل ئه‌مریكا جه گرتن و د ژناڤبرنا ده‌ستهه‌لاتا دكتاتوری دا رۆله‌كا گه‌له‌ك مه‌زن گێران و ژ به‌ر هندێ ژی ئه‌ز دبێژم گه‌لێ كورد گه‌له‌ك هێژایه‌ و هه‌رده‌م هێژایی دۆستیی و پشته‌ڤانیێ نه‌، گرنگه‌ ئه‌مریكا قاره‌مانیا گه‌لێ كورد ژبیر نه‌كه‌ت، چونكو گه‌له‌ك مه‌ترسی ل سه‌ر كوردان هه‌نه‌ و كورد هه‌رده‌م پێدڤی ب پشته‌ڤانیا ئه‌مریكا نه‌، گرنگه‌ ئه‌مریكا ژی ل گۆر راستیا نها سیاسه‌ته‌كا راست برێڤه‌ ببه‌ت، چونكو پاراستنا به‌رژه‌وه‌ندیێن ئه‌مریكا د هندێ دایه‌ كو كورد ل هه‌رێما كوردستانێ هه‌رده‌م ب هێز بن).

سیناتۆرێ ناڤهاتی ئه‌و یه‌ك ژی دیار كر كو كو هه‌ری دووماهیێ گه‌لێ كورد ب قاره‌مانیه‌كا مه‌زن ل هه‌مبه‌ر تیرۆرستان راوه‌ستیان و ب دلسۆزانه‌ ل گه‌ل ئه‌مریكا بۆ دروستكرنا ئارامیێ كار كرینه‌ و بۆ ڤێ چه‌ندێ ئه‌ركێ كۆنگریسی و ده‌ستهه‌لاتێ ته‌ كو ب هه‌موو ره‌نگه‌كێ هه‌ڤكاریا گه‌لێ كورد بكه‌ن و د رۆژێن دژوار دا وان ب تنێ نه‌هێلن و گۆت: (دڤێت ب هه‌موو هێز و شیانێن خوه‌ ڤه‌ بۆ جیهانێ نیشا بده‌ین كو گه‌لێ كورد گه‌له‌ك ئازادیخوازن و بۆ ئازادیا خوه‌ گه‌له‌ك قوربانی داینه‌، ژ به‌ر هندێ ژی دڤێت ئه‌مریكا په‌یوه‌ندیێن خوه‌ ل گه‌ل هه‌رێما كوردستانێ باشتر لێ بكه‌ت).

ده‌زگه‌هێن راگه‌هاندنا ئه‌مریكا ژی دیار دكه‌ن كو د ئیدارا نوو یا ئه‌مریكا دا گه‌له‌ك كه‌س هه‌نه‌ كو پشته‌ڤانیێ ل مافێن كوردان دكه‌ن و دخوازن په‌یوه‌ندیێن ئه‌مریكا ل گه‌ل هه‌رێما كوردستانێ باشتر لێ بهێت و داخواز ژ جۆ بایدن ژی دكه‌ن كو پتر ژ جاران پشته‌ڤانیێ ل هه‌رێما كوردستانێ بكه‌ت.

هه‌ژی ئاماژه‌پێدانێ یه‌ كو به‌ری نها سه‌رۆك بارزانی ژی دیار كربوو كو مه‌ترسی ل سه‌ر هه‌رێما كوردستانێ هه‌نه‌ و دڤێت ئه‌مریكا و هه‌ڤپه‌یمانێن وێ بۆ پاراستنا گه‌لێ كوردستانێ كار بكه‌ن.

کۆمێنتا تە