شانۆیێ‌ گوهۆڕین د ژیانا وی دا كریه‌

شانۆیێ‌ گوهۆڕین د ژیانا وی دا كریه‌

9

ئه‌ڤرۆ، رێوار محه‌مه‌د ره‌شید:

ره‌یان ره‌مزی ئاده‌م، شانۆڤانه‌كێ‌ پارێزگه‌ها دهۆكێ‌ یه‌ كو د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ ئاشكرا كر كو ده‌مێ‌ ئه‌و قوتابی ل قووناغا هه‌شتێ‌ بنه‌ره‌ت حه‌زا كارێ‌ هونه‌ری ل ده‌ف وی په‌یدابوو و پشتی قووناغا نه‌هێ‌ بنه‌ره‌ت ب دووماهی ئینای قه‌ستا په‌یمانگه‌ها هونه‌رێن جوان ل دهۆكێ‌ كر و نوكه‌ قوتابیێ‌ قووناغا چارێ‌ یه‌ ل پشكا شانۆیێ‌ یا په‌یمانگه‌ها ناڤهاتی و گۆت: “مرۆڤ هه‌می بوارێن ژیانێ‌ د ناڤ شانۆیێ‌ دا د بینیت ژ به‌ر ڤێ‌ چه‌ندێ‌ د ناڤ هه‌می بوارێن هونه‌ری دا من شانۆ هه‌لبژارتیه‌ و من دڤێت ئه‌و ئازارێن د ناڤ ناخێ‌ من دا ب شێوه‌یێ‌ جوانتر ل سه‌ر ده‌پێ‌ شانۆیێ‌ نیشان بده‌م، چونكو شانۆیێ‌ گه‌له‌ك گوهۆڕین د ژیانا وی دا په‌یداكرینه‌ و ژ كه‌سه‌كێ‌ بێهن ته‌نگ و توره‌ كریه‌ كه‌سه‌كێ‌ بێهن فره‌ه، به‌لێ‌ سه‌ره‌رایی ڤێ‌ چه‌ندێ‌ كارێ‌ شانۆیێ‌ گه‌له‌ك تشت پێشكێشی وی كرینه‌”.

ناڤهاتی ئاماژه‌ دا وێ‌ چه‌ندێ‌ كو هه‌تا نوكه‌ من پشكداری د پێنج شانۆگه‌ریان دا ب كارێن جودا وه‌كو ئه‌كته‌ر و مۆزیك و دیكور و هتد.. كریه‌، به‌لێ‌ مخابن ل پارێزگه‌ها دهۆكێ‌ وه‌كو پێدڤی پشته‌ڤانی ژ لایێ‌ جهێن په‌یوه‌ندیدار ڤه‌ ل بزاڤا شانۆیێ‌ ناهێته‌كرن، هه‌روه‌سا گرنگی ب شانۆڤانان ژی ناهێته‌ دان كو بشێن پتر رۆلێ‌ خوه‌ ببینن و گۆت: “د كارێ‌ شانۆیێ‌ دا ئه‌ز حه‌ز ژ هه‌می رۆلان دكه‌م و ژ چو رۆلان ناره‌ڤم و من ل به‌ره‌ ژ بلی كارێ‌ شانۆیێ‌ وه‌كو ئه‌كته‌ر د فلمێن سینه‌مایی و درامایان ژی دا پشكداربم، ژ به‌ر كو به‌ری نوكه‌ من هنده‌ك كارێن بچووك د ڤان هه‌ر دو بواران د اژی كرینه‌”.

ل دووماهیێ‌ ره‌یانی خویا كر كو ژبلی كارێ‌ شانۆیێ‌ ئه‌و حه‌ز ژ هونه‌رێ‌ راپ مۆزیكێ‌ دكه‌ت، هه‌روه‌سا كارێ‌ شانۆیێ‌ بۆ ئه‌گه‌ره‌ك كو ئه‌و دگه‌ل بابێ‌ خۆ ل سه‌ر كارێ‌ خوه‌ یێ‌ فرۆتنا باقلكان ژی یێ‌ به‌رده‌وام بیت بۆ ب رێڤه‌برنا ژیانا خوه‌.

کۆمێنتا تە