شرۆڤه‌كاره‌ك: ئه‌ركێ‌ دهۆكێ‌ بزه‌حمه‌ته‌ و نابیت چو خالان ژ ده‌ست بده‌ن

شرۆڤه‌كاره‌ك: ئه‌ركێ‌ دهۆكێ‌ بزه‌حمه‌ته‌ و نابیت چو خالان ژ ده‌ست بده‌ن

18

ل حه‌فتیا بوری پشككێشانا وه‌رزێ‌ نوو ب پشكداریا 28 یانێن خولا پلا ئێكا عیراقێ‌ یا ته‌پا پێ‌ ل باژێرێ‌ به‌غدا هاته‌ ئه‌نجامدان و ئه‌وێن هاتینه‌ به‌لاڤكرن لسه‌ر دو كۆمان یاریێن وان دێ‌ ب شێوێ‌ خول ئێك قۆناغ هێنه‌ كرن، قاره‌مانێ‌ هه‌ر كۆمه‌كێ‌ ئێكسه‌ر ده‌ربازبیته‌ پلا نایاب و باشترین تیما رێزا دویێ‌ دێ‌ یاریه‌كا ڤه‌بڕ هه‌مبه‌ر تیما رێزا 18ێ‌ یا پلا نایاب كه‌ت ژبۆ مسوگه‌ركرنا پلێتا سیێ‌، ژ هه‌رێما كوردستانێ‌ پێنچ یانه‌ پشكدارن ئه‌وژی، دهۆك، پێشمه‌رگا سلێمانی، برایه‌تی، نه‌وروز و گازا باكور، نوونه‌را پارێزگه‌هێ‌ كه‌فتیه‌ د كۆما دویێ‌ دا و یاریا خوه‌ یا ئێكێ‌ دێ‌ ل یاریگه‌ها خوه‌ ل سێ‌ شه‌مبیا بهێت مێڤانداریا پێشمه‌رگا سلێمانی كه‌ت، لدور ئه‌ركێ‌ یانا دهۆكێ‌ و ئارمانج و به‌رهه‌ڤیێن وێ‌ بۆچوونێن جودا هاتینه‌ وه‌رگرتن.

عادل ناسر راهێنه‌رێ‌ تیما یانا دهۆك بۆ رۆژناما ئه‌ڤرۆ گوت: وه‌رگرتنا پۆستێ‌ راهێنه‌راتیا یانا دهۆك ب شانازی دبینم و هه‌موو هیڤی و ئۆمێدین من دیرۆكه‌كێ‌ تۆماربكه‌م و تیما خوه‌ بۆ جهێ‌ وێ‌ یێ‌ دروست ڤه‌گه‌ڕینم ئه‌وژی پلا نایاب و من باوه‌ری هه‌یه‌ ژبه‌ركو كارگێریا یانێ‌ ب رژدی هاریكاره‌ و هه‌ر تشته‌كێ‌ پێدڤی لدویڤ شیانا بوو مه‌ ته‌رخان دكه‌ن، دبیت ئه‌و ده‌مێ‌ هاتنا من و هه‌تا ئه‌ڤرۆ یێ‌ كێم بیت بۆ به‌رهه‌ڤیان لێ‌ لدیڤ پلان و نه‌خشێن تایبه‌ت ل گه‌ل كادرێ‌ راهێنانێ‌ و پشتی چه‌ند یاریێن هه‌ڤالینی تا راده‌كێ‌ باش مه‌ تیم به‌رهه‌ڤ كریه‌ و دێ‌ به‌رده‌وامبیت و كار لسه‌ر هونه‌ر و ته‌كتیكا یاریزانا بن و دیسان بۆ خواندنا هه‌ر یاریه‌كێ‌ ژی دیڤچوونێ‌ دكه‌ین، كاروانێ‌ خولێ‌ یێ‌ درێژه‌ و كۆما مه‌ بهێزتره‌ ژ یا ئێكێ‌ تایبه‌ت یاریێن مه‌ ئه‌وێن ژ ده‌رڤه‌یی یاریگه‌ها مه‌، ئه‌نجامدانا هه‌ر یاریه‌كێ‌ بۆ مه‌ یا دووماهیێ‌ یه‌ و قه‌ربوو یا بزه‌حمه‌ته‌ له‌ورا یا دشیان دا بیت دێ‌ كاركه‌ین بۆ ئارمانج و هیڤیێن كارگێریا یانێ‌ و جه‌ماوه‌ری.

وه‌حید ره‌شید شرۆڤه‌كارێ‌ وه‌رزشی ل پارێزگه‌ها دهۆكێ‌ گوت: ب دیتنا من به‌رهه‌ڤیێن دهۆكێ‌ د ئاستێ‌ پێدڤی دانینن و تا راده‌كی یێن گیرۆبووین تایبه‌ت ئینانا راهێنه‌ره‌كی به‌ری ده‌ستپێكرنا خولێ‌ نێزكی سێ‌ حه‌فتیان، ژبه‌ركو ده‌م یێ‌ به‌رده‌ست نابیت كو دروستی راهێنه‌ر لسه‌ر تیما خوه‌ كاربكه‌ت و ئینان و دوورئێخستنا یاریزانان ژی كارتیكرن دێ‌ هه‌بیت، لێ‌ هه‌رچه‌وابیت راهێنه‌ر ژ حه‌ز دكه‌ت باشترین به‌رهه‌ڤی هه‌بیت ودێ‌ بزاڤێ‌ كه‌ت لدیڤ شاره‌زاهیا خوه‌ سه‌ره‌ده‌ریێ‌ بكه‌ت دبیت پێنچ یاریێن هه‌ڤالینی دا راهێنه‌ر نه‌ گه‌هیته‌ یا پێدڤی لێ‌ ب هه‌بوونا یاریزانێ‌ باش یێ‌ یه‌ده‌ك و پشته‌ڤانیا كارگێریا یانێ‌ و ناڤێ‌ دهۆكێ‌ پالده‌ره‌كێ‌ مه‌زنه‌ بۆ پێشكه‌فتنا ئاستێ‌ وێ‌، ئه‌و یانێن د كۆما وێ‌ دا پرانیا وان سه‌ربۆرا هه‌یی و به‌رهه‌ڤیێن باش كرینه‌ و ب ئارمانجن، له‌ورا ئه‌ركێ‌ دهۆكێ‌ بزه‌حمه‌ته‌ و ب هێزترین كۆم دایه‌ و ژده‌ستدانا خالان قه‌ربوو نینه‌ و دڤێت كاربكه‌ت خالان ژ ده‌ست نه‌ده‌ت تایبه‌ت دناڤ ئه‌ردێ‌ خوه‌ دا و ل یاریگه‌ها هه‌ڤڕكێ‌ خوه‌ ئه‌نجامی نه‌ ژ ده‌ست نه‌ده‌ت ئه‌گه‌ر ب خاله‌كێ‌ ژی ده‌ركه‌فت باشه‌.

ژلایه‌كێ‌ دیڤی ناڤهاتی گوت: ترسا مه‌ ئه‌گه‌ر ده‌ستكاری د ئه‌نجامدێن یاریێن دی بهێته‌ كرن دێ‌ هه‌موو هیڤی و ئۆمێدین یانا دهۆكێ‌ ژ ده‌ستده‌ن و ئه‌ڤه‌ خولا عیراقێ‌ یه‌ تایبه‌ت ئه‌و یانێن پشتی بۆرینا چار یاریان هیڤیێن هه‌ڤڕكیێ‌ نه‌ مینن، له‌ورا دڤێت كارگێریا یانا دهۆكێ‌ یا هوشیار بیت و ته‌سلی دیڤچوونا هه‌موو یاریا بكه‌ت و ژلایه‌كێ‌ دیڤه‌ هه‌ر كێماتیه‌كا دناڤ رێزێن تیمێ‌ دا هه‌بیت چاره‌سه‌ر بكه‌ت به‌ری په‌شیمان بیت، هیڤییا من ئه‌وه‌ یانا دهۆكێ‌ دووباره‌ ڤه‌گه‌ڕیێته‌ پلا نایاب و ئه‌م هه‌موو پشته‌ڤانین وه‌كو ئێك ژ تیمه‌ مه‌زنێن كوردستانێ‌ و عیراقێ‌.

بۆ زانین هه‌ر پێنچ رۆژا یاریه‌ك دێ‌ هێته‌كرن و دهۆك دێ‌ یاریێن خوه‌ بڤی شێوه‌یی كه‌ت.

کۆمێنتا تە