كه‌مال كه‌ركووكێ: ئه‌گه‌ر عیراق پشت به‌ستنێ ب دستووری نه‌كه‌ت دێ به‌ر ب...

كه‌مال كه‌ركووكێ: ئه‌گه‌ر عیراق پشت به‌ستنێ ب دستووری نه‌كه‌ت دێ به‌ر ب ناڤچوونێ چیت

10

ئه‌ڤرۆ:

سه‌ركرده‌كێ پارتی دیموكراتی كوردستان راگه‌هاند، كه‌ركووك یا پاراستی بوو و هێزا پێشمه‌رگه‌ی شیابوو كه‌ركووكێ و كه‌ركووكیان بپارێزیت، ته‌ناهی و ئاسایش یا به‌رقه‌رار بوو، به‌لێ شوڤینیه‌تا هنده‌ك لایه‌نان و خیانه‌تا 16 ئوكتۆبه‌رێ وه‌كر ره‌وشا كه‌ركووكێ ئالۆز ببیت.

كه‌مال كه‌ركووكێ دیاركر” بزاڤ یا هه‌ی ره‌وشا كه‌ركووكێ بهێته‌ ئاساییكرن، به‌لێ دیاره‌ لژنه‌ك یا هاتیه‌ پێكئینان بۆ ڤێ مه‌به‌ستێ، ب چاڤدێریا نه‌ته‌وێن ئێكگرتی كه‌ركووك بهێته‌ پاقژكرن و چه‌كدار دناڤدا نه‌مینن و پۆلیس ره‌وشا ئه‌منی وه‌ربگریت، پاشی مه‌له‌فێ سیاسی و باره‌گایێن پارتی دیموكراتی كوردستان بهێنه‌ راده‌ستكرن، ئه‌و خاله‌ ژی به‌رنامێ پارتی و حوكمه‌تا هه‌رێما كوردستانێ یه‌ ل گه‌ل حوكمه‌تا فیدرالی هێشتا نه‌كه‌هشتینه‌ بریاره‌كێ و رێككه‌فتنا تمام نه‌هاتیه‌ كرن، به‌لێ حوكمه‌تا هه‌رێما كوردستانێ و حوكمه‌تا فیدرال د رژدن ل سه‌ر وان خالان”.

سه‌باره‌ت وان تۆمه‌تێن راكان جبووری پارێزگه‌رێ سه‌پاندیێ كه‌ركووكێ به‌رامبه‌ر پارتی، گۆت” ئه‌و تۆمه‌ته‌ د دوورن ژ راستیێ و پێدڤیه‌ په‌نا بۆ دادگه‌هێ بهێته‌ برن و ئه‌و بابه‌ته‌ كو ته‌رم ل ناڤ باره‌گایێ پارتی هاتیه‌ دیتن ڤه‌كۆلینه‌كا هوور ل سه‌ر بهێته‌ كرن ب سه‌رپه‌رشتیا نه‌ته‌وێن ئێكگرتی و ئه‌و لایه‌نه‌ ئه‌و تاوانه‌ ئه‌نجامدای بهێته‌ دادگه‌هكرن”.

گۆت ژی” زێده‌تر ژ 163 دۆسیێن گه‌نده‌لیێ ل سه‌ر پارێزگه‌رێ سه‌پاندیێ كه‌ركووكێ یێن هه‌ین و هه‌تا ل ده‌ف عه‌ره‌بێن كه‌ركووكێ ب خوه‌ ژی یێ پسه‌ندكری نینه‌ ب تایبه‌تی عه‌شیره‌تا جبوور كو ئه‌و ب خوه‌ وه‌كو عه‌ره‌به‌كێ جبوور خوه‌ دده‌ته‌ نیاسین”.

كه‌مال كه‌ركووكێ راگه‌هاند ژی” ئه‌گه‌ر عیراق پشت به‌ستنێ ب دستووری نه‌كه‌ت، دێ ئه‌و وه‌لاته‌ به‌ر ب ژناڤچوونێ چیت و كه‌ركووك یان ب ئاشتی ره‌وشا وێ ئاسایی ببیت، یان خه‌لكێ كه‌ركووكێ وێ ره‌وشێ قه‌بوول ناكه‌ن”.

کۆمێنتا تە