لیبیا و فره‌نسا: دڤێت روسیا و توركیا هێزێن خوه‌ ژ لیبیا ڤه‌كێشن

لیبیا و فره‌نسا: دڤێت روسیا و توركیا هێزێن خوه‌ ژ لیبیا ڤه‌كێشن

5

ب، سه‌رجان مه‌حمود:

ئیمانوێل ماكرۆن سه‌رۆك كۆمارێ فره‌نسا و عه‌بدولحه‌مید دیبه‌یبه‌ سه‌رۆك وه‌زیرێن لیبیا ل باژێرێ پاریس یێ پایته‌ختێ فره‌نسا كۆمبوونه‌ك ساز كرن و تێدا ره‌وشا نها یا لیبیا و قۆناغا دانوستاندنان و هه‌بوونا هێزێن بیانی و په‌یوه‌ندیێن دو قۆلی گه‌نگه‌شه‌ كرن و پشتی كۆمبوونێ هه‌ر دو ئالیان ژی راگه‌هاندن كو دڤێت هه‌موو هێزێن بیانی ب تایبه‌تی كۆمێن چه‌كدارێن سه‌ر ب توركیا و روسیا ژ ئاخا لیبیا ده‌ركه‌ڤن.

ئیمانوێل ماكرۆن سه‌رۆك كۆمارێ فره‌نسا راگه‌هاند كو ئارامیا لیبیا هه‌م بۆ باكورێ ئه‌فریقیا و ده‌ریا سپی و هه‌م ژی بۆ ئورۆپا گه‌له‌ك گرنگه‌ و گۆت: (ئه‌م وه‌ك فره‌نسا پشته‌ڤانیا قۆناغا دیالۆگێ د ناڤبه‌را هه‌موو ئالیێن لیبیا دا دكه‌ین و ئاماده‌ینه‌ هه‌م د وارێ ساخله‌میێ و هه‌م ژی د وارێ سیاسی و ئابووری دا  هه‌ڤكاریا حوكمه‌تا نوو یا لیبیا بكه‌ین و مافێ گه‌لێ لیبیا یه‌ د ناڤ ئاشتیێ، ئارامیێ و ئازادیێ دا بژیت و بۆ ڤێ چه‌ندێ چ بكه‌ڤیته‌ سه‌ر ملێ مه‌ بێگۆمان ئه‌م دێ كه‌ین).

ماكرۆنی هه‌روه‌سا راگه‌هاند ژی مافێ چو ئالیه‌كێ بیانی یان ده‌وله‌ته‌كا دی نینه‌ ده‌ستێوه‌ردانێ د كارێ ناڤخوه‌ یێ لیبیا دا بكه‌ت و گۆت: (دڤێت توركیا و روسیا رێزێ ل سه‌روه‌ریا لیبیا بگرن و هێزێن خوه‌ ژ لیبیا ڤه‌كێشن ژ به‌ر كو سه‌ده‌مێ سه‌ره‌كی یێ ئالۆزیێن ل لیبیا هه‌بوونا كۆمێن چه‌كدار و هێزێن بیانی نه‌).

ژ ئالیێ خوه‌ ڤه‌ سه‌رۆك وه‌زیرێن لیبیا ژی راگه‌هاند كو ئه‌و گرنگیێ دده‌نه‌ په‌یوه‌ندیێن ل گه‌ل فره‌نسا و ئێكه‌تیا ئورۆپا و گۆت: (هێڤیدارم د كۆنفرانسێ ل به‌رلینێ پشته‌ڤانیه‌كا باش بۆ وه‌لاتێ مه‌ ده‌ركه‌ڤیت و ئورۆپا بۆ ئارامیێ و سه‌ركه‌ڤتنا قۆناغا دیالۆگێ هه‌ڤكاریا مه‌ بكه‌ت و نها ل وه‌لاتێ مه‌ پرسا هه‌ری مه‌زن هه‌بوونا هێزێن بیانی یه‌ و بۆ ڤێ چه‌ندێ داخواز ژ توركیا و روسیا دكه‌م هێزێن خوه‌ ژ ئاخا مه‌ ڤه‌كێشن، ژ به‌ر كو پێدڤیا وه‌لاتێ مه‌ ب هه‌بوونا هێزێن بیانی نینه‌ لێ پێدڤی ب پشته‌ڤانیا سیاسی و هه‌ڤكاریا ئابووری هه‌یه‌ و هێڤیدارم د ڤان واران دا هاریكاریا مه‌ بكه‌ن).

کۆمێنتا تە