ل دهۆكێ‌ پلان بۆ دانانا 431 كارگه‌هێن پێشه‌سازی هاتیه‌ دانان

ل دهۆكێ‌ پلان بۆ دانانا 431 كارگه‌هێن پێشه‌سازی هاتیه‌ دانان

دهۆك، له‌زگین جوقی:

رێڤه‌به‌را گه‌شه‌پێدانا پیشه‌سازی ل پارێزگه‌ها دهۆكێ‌ دیار كر، ئه‌ڤ ساله‌ پلان هاتیه‌ دانان ل پارێزگه‌ها دهۆكێ‌ 431 كارگه‌هێن نوو یێن پیشه‌سازی بهێنه‌ دانان.

نازدار عه‌بدولقادر، رێڤه‌به‌را گه‌شه‌پێدانا پیشه‌سازی ل پارێزگه‌ها دهۆكێ‌ بۆ رۆژناما ئه‌ڤرۆ دیار كر، ئه‌ڤ ساله‌ پلان هه‌یه‌ 431 كارگه‌هێن پیشه‌سازی ل دهۆكێ‌ بهێنه‌ دانان، ئه‌و ژی هه‌كه‌ خه‌لك داخواز بكه‌ن دێ‌ ل گۆر داخوازیا خه‌لكێ‌ هێنه‌ دانان و گۆت: “ئه‌م حه‌ز دكه‌ین خه‌لكێ‌ مه‌ ده‌ست ب چێكرنا پرۆژێن پیشه‌سازی بكه‌ن كو سالا 2020ێ‌ ب تنێ‌ ل دهۆكێ‌ 6% پلانا پیشه‌سازی یا دانانا كارگه‌هان بجه هات، له‌ورا ژی ئه‌م دبێژین ئه‌ڤ ساله‌ مه‌رج نینه‌ چه‌ند ژ پلانی بجه بهێت ل گۆری پلانێ‌ هه‌تا 431 كارگه‌هێن پیشه‌سازی دێ‌ هێنه‌ دانان”.

ئاشكه‌را كر كو نوكه‌ ل پارێزگه‌ها دهۆكێ‌ 369 كارگه‌هێن پیشه‌سازی هه‌نه‌، ژ وانا ژی 258 كارگه‌ه كار دكه‌ن و 111 كارگه‌ه هاتینه‌ راوه‌ستاندن، ئه‌و ژی پتریا ئامیرێن وان یێن سالێن هه‌شتێیان و نۆتانن و كه‌ڤن بووینه‌.

نازدار خانێ‌ گۆت: “هه‌ر كه‌سه‌كێ‌ حه‌ز بكه‌ت پرۆژه‌كێ‌ پیشه‌سازی یێ‌ خوارنێ‌ و پاقژكرنێ‌ و بیناسازی و چه‌ندین جۆرێن دی یێن پرۆژێن پیشه‌سازی دروست بكه‌ت، ئه‌م دێ‌ پشته‌ڤانیێ‌ لێ‌ كه‌ین”.

کۆمێنتا تە