مان ستی و سانجێرمان دیدارا شكاندنا ئاسته‌نگا بۆ دووماهیا چامپیونزێ‌

مان ستی و سانجێرمان دیدارا شكاندنا ئاسته‌نگا بۆ دووماهیا چامپیونزێ‌

7

چاڤه‌ڕێ‌ یه‌ ئه‌ڤرۆ ل ده‌مژمێر 10ی شه‌ڤ حه‌ز ژێكه‌رێن یاریا ته‌پا پێی ب ژڤانن بۆ دیتنا دیداره‌كا دی یا پری هه‌ڤڕِكی و هێز دناڤبه‌را دو زلهێزێن ئورۆپایێ‌ دا ده‌مێ‌ یانا پاریس سانجێرمان مێڤانداریا یانا مانچسته‌ر ستی یا ئه‌نگلێزی ل یاریگه‌ها باخچێ‌ شاهان پایته‌ختێ‌ فره‌نسا پاریسێ‌ ژ چارچووڤێ‌ هه‌ڤڕكیێن قۆناغا پێش دووماهیا قاره‌مانیا چامپیونز لیگ بۆ یاریێن هاتنێ‌ دكه‌ت.

خودانێن ئه‌ردی دێ‌ ب زاخه‌كا بلند هێنه‌ دناڤ یاریێ‌ دا ژبۆ نێزكبوونا ئارمانجا خوه‌ بۆ ده‌ستڤه‌ئینانا ناسناڤی تایبه‌ت پشتی شیایی دو مه‌زنه‌ یانێن ئورۆپا ژ رێكا خوه‌ دووربێخیت ئه‌وژی بایرن میونخ یا ئه‌لمانی و به‌رشه‌لونا یا ئسپانی، لێ‌ هه‌مبه‌ری وێ‌ مان ستی ب سه‌ركێشیا راهێنه‌رێ‌ خوه‌ پیب گۆاردیولایی چاڤ ل یاریا دووماهیێ‌ بیت و ئاسته‌نگا 47 سالان بشكێنیت كو نه‌شیایه‌ بگه‌هیته‌ ڤێ‌ قۆناغێ‌ و دێ‌ بزاڤێ‌ كه‌ت ناسناڤێ‌ ئێكێ‌ یێ‌ چامپیونزێ‌ بده‌ستڤه‌بینت و ئه‌نجامێ‌ وه‌رزێ‌ 2015- 2016 ل گه‌ل پاریسێ‌ دووباره‌ بكه‌ته‌ڤه‌ ده‌مێ‌ ل چارێك دووماهیا قاره‌مانیێ‌ دا شیایی سه‌رجه‌مێ‌ هه‌ردو یاریا وه‌كهه‌ڤی و سه‌ركه‌فتنێ‌ تۆماربكه‌ت و ده‌ربازبیته‌ قۆناغا دووماهیێ‌، لێ‌ یانا فره‌نسی یا رژده‌ لسه‌ر هیڤیێن خوه‌ و دێ‌ پشت به‌ستنێ‌ ب ستێرێن خوه‌ یێن نوكه‌ كه‌ت ژوانا ممبایی، نیمار، دی ماریا، فیراتی، كیلور ناڤاس و ئیدریسا جایی، ژلایێ‌ خوه‌ڤه‌ مان ستی ژی دێ‌ ب له‌شكه‌رێ‌ پری شاره‌زاهی و شیانێن هونه‌ری بیت كو پێكهاتیه‌ ژ سێرجیو ئه‌گوێرۆ، ره‌حیم سترلینگ، ریاز موحرز، كیڤێن دی برۆین، ماركۆس راشفۆرد و بێرناردۆ سیلڤا و دیسان ب زاخا ده‌ستڤه‌ئینانا ناسناڤێ‌ جاما ئنگلیزی ئه‌وا به‌ری سێ‌ رۆژان شیایی د یاریا دووماهیێ‌ دا سه‌ركه‌فتن لسه‌ر تۆتنهام تۆماركری ب گۆله‌كێ‌ بێی به‌رامبه‌ر دێ‌ بیته‌ پالده‌ر بۆ ئارمانجا چامپیونزێ‌ و ژلایه‌كێ‌ دی بتنێ‌ ده‌م یێ‌ مایی بۆ ناسناڤێ‌ خولا ئنگلیزی ئه‌وێ‌ ژی بده‌ستڤه‌بینت، ئانكو ره‌وشا ده‌رونی یا هه‌ردو یانه‌ به‌رهه‌ڤه‌ بۆ دیداره‌كا هه‌ڤڕكی ئه‌وا دێ‌ دادڤانێ‌ ئه‌لمانی فلیكس بریش بڕێڤه‌به‌ت.

هه‌ردو یانێن هه‌ڤڕك خودان خه‌ون و ئارمانجێن  مه‌زنن و هیڤی و ئۆمێدێن جه‌ماوه‌رێ‌ وان بده‌ستڤه‌ئینانا ناسناڤێ‌ ئێكێ‌ یه‌ پشتی چه‌ندین داكه‌فتنان ل وه‌رزێن بوری یێن چامپیونزێ‌، خالێن سه‌ركه‌فتنێ‌ دناڤ هه‌ردو تیمان دا به‌رده‌سته‌ ئه‌و ناڤێن ئه‌وان یاریزانا مه‌ دیاركرین ژ هێلا گۆلپارێزیێ‌ هه‌تا ب گه‌هیته‌ هێرشبه‌ری كو هه‌موو ستێرن و شاره‌زانه‌، ژلایه‌كێ‌ دیڤه‌ هه‌ردو یانه‌ دێ‌ ب سه‌رپه‌رشتیا دو راهێنه‌رێن سه‌ربۆر و خودان پلان و ته‌كتیكێن سه‌رده‌مانه‌ بن، هه‌رچه‌نده‌ هه‌ردو راهێنه‌ران به‌ری نوكه‌ د خولێن ئسپانیا و ئنگلیز دا بۆ 18 جاران كه‌فتینه‌ هه‌مبه‌ری ئێك، ده‌مێ‌ بۆچیتینو راهێنه‌رێ‌ ئسپانیول و یێ‌ تۆتنهام و سپیرز بوو، هه‌مبه‌ری وی گۆاردیولا یێ‌ به‌رشه‌لۆنا و مان ستی بوون، 10 سه‌ركه‌فتن بۆ راهێنه‌رێ‌ ئسپانی و سێ‌ جاران بۆ یێ‌ ئه‌رجه‌نتینی و پێنچ جاران وه‌كهه‌ڤبووینه‌، پێشبینیا یاریا ئه‌ڤ شه‌ڤه‌ دێ‌ یا بزه‌حمه‌ت بیت و دبیت یاریا دویێ‌ یا بهێت یا ڤه‌بڕبیت .

کۆمێنتا تە