نه‌ته‌وێن ئێكگرتی ژ ره‌وشا لیبیا دلگرانه‌

نه‌ته‌وێن ئێكگرتی ژ ره‌وشا لیبیا دلگرانه‌

9

ئه‌ڤرۆ:

نه‌ته‌وێن ئێكگرتی راگه‌هاند كو مخابن هه‌تا نها ژی چه‌كدارێن بیانی و گرۆپێن دی یێن چه‌كدار ل لیبیا ماینه‌ و پێگیریێ ب رێككه‌فتنا به‌ری نها ناكه‌ن كو بریار بوو هه‌موو هێزێن بیانی ژ لیبیا ده‌ركه‌ڤن و هه‌بوونا هێزێن بیانی ژی مه‌ترسیه‌كا مه‌زن بۆ ئاشتی و ئارامیێ ل لیبیا دروست دكه‌ت، ژ به‌ر هندێ ژی دڤێت هه‌موو وه‌لاتێن كو چه‌كدارێن وان ل لیبیا هه‌نه‌ رێزێ ل سه‌روه‌ریا لیبیا بگرن و هێزێن خوه‌ ژ وی وه‌لاتی ڤه‌كێشن.

نه‌ته‌وێن ئێكگرتی ئه‌و یه‌ك ژی دیار كریه‌ كو چه‌كدارێن ب پاره‌ ل لیبیا كار بۆ ژناڤبرنا حوكمه‌تا به‌روه‌خت دكه‌ن، ئه‌و یه‌ك ژی پێشهاته‌كا گه‌له‌ك مه‌ترسیداره‌ و دێ كارتێكرنا خوه‌ ل پاشه‌رۆژا لیبیا كه‌ت، دڤێت هه‌موو هێزین بیانی ئاخا لیبیا بجه بهێلن و ده‌ستێوه‌ردانێ د كاروبارێن ناڤخوه‌یی یێ وی وه‌لاتی دا نه‌كه‌ن، چونكو گه‌لێ لیبیا ژ شه‌ر و ئالۆزیان بێزار بووینه‌ و وان دڤێت پێكڤه‌ هه‌موو پرسێن هه‌ی د ناڤبه‌را خوه‌ دا چاره‌سه‌ر بكه‌ن و دڤێت هه‌موو ئالی ژی رێزێ ل داخوازیا گه‌لێن لیبیا بگرن.

نه‌ته‌وێن ئێكگرتی ئاماژه‌ ب هندێ ژی كریه‌ كو چه‌كدارێن بیانی تاوانێن شه‌ری ل لیبیا ئه‌نجام داینه‌ و گه‌له‌ك وه‌لاتیێن سڤیل ل لیبیا ب ده‌ستێ وان گرۆپێن چه‌كدار هاتینه‌ كوشتن، ژ به‌ر هندێ ژی دڤێت هه‌موو چه‌كدارێن بیانی ژ لیبیا ده‌ركه‌ڤن.

کۆمێنتا تە