نه‌دا مێرگه‌سۆری: پشتی هه‌لبژارتنان دێ گۆهۆرینێن مه‌زن ل عیراقێ په‌یدا بن

نه‌دا مێرگه‌سۆری: پشتی هه‌لبژارتنان دێ گۆهۆرینێن مه‌زن ل عیراقێ په‌یدا بن

115

هه‌ولێر، قائید میرۆ

لڤینێن لایه‌نێن سیاسی بۆ هه‌لبژارتنێن داهاتی ل عیراقێ یێن ده‌ستپێكرین و بریاره‌ هژماره‌كا سه‌ركرده‌یێن سیاسی یێن عیراقێ سه‌ره‌دانا هه‌رێما كوردستانێ بكه‌ن، په‌رله‌مانتاره‌كا به‌رێ یا عیراقێ ژی دبێژیت، سه‌ره‌دانێن لایه‌نێن سیاسی بۆ پێكئینانا هه‌ڤپه‌یمانیانه‌ ژبۆ هه‌لبژارتنێن داهاتی و گۆت ژی، گۆهۆرینێن مه‌زن و به‌رچاڤ ل عیراقێ دێ په‌یدا بن.

نه‌دا مێرگه‌سۆری، ئه‌نداما خۆلا بۆری یا جڤاتا نوونه‌رێن عیراقێ ژ فراكسیۆنا پارتی دیموكراتی كوردستان  بۆ رۆژناما (ئه‌ڤرۆ) گۆت” هه‌ر ده‌مێ ئه‌م نێزیكی هه‌لبژارتنێن جڤاتا نوونه‌رێن عیراقێ دبین، لڤینێن سیاسی دهێنه‌ ده‌ستپێكرن و بریاره‌ ل هه‌یڤا چریا ئێكێ 2021 هه‌لبژارتنێن پێشوه‌خت بهێنه‌ ئه‌نجامدان و هه‌ر ژنوكه‌ لڤین و سه‌ره‌دانێن لایه‌نێن سیاسی هاتینه‌ ده‌ستپێكرن، هه‌موو بزاڤێن لایه‌نێن سیاسی ئه‌ون پێكڤه‌ هه‌ڤپه‌یمانیا پێكبینن بۆ ناڤا هه‌لبژارتنان و پشتی هه‌لبژارتنان ژی، یا دیاره‌ هه‌لبژارتنێن ڤێ جارێ یێن عیراقێ كو هه‌لبژارتنێن پێشوه‌ختن، گرنگیا خوه‌ یا هه‌ی، چونكه‌ هه‌ڤكێشێن سیاسی ل عیراقێ گۆهۆرین ب سه‌ردا دهێن، ب تایبه‌تی ده‌وله‌تێن زلهێز لڤینێن خوه‌ ل دۆر ره‌وشا عیراقێ ده‌ستپێكرینه‌، سه‌ره‌دانا سه‌رۆكێ هه‌رێما كوردستانێ بۆ فه‌ره‌نسا و د ددوڤدا بۆ به‌غدا ئاماژه‌یێن رۆهنن ل دۆر ره‌وشا نوكه‌ یا عیراقێ كو یا به‌ر ب  گۆهۆرینان دچیت و پێدڤیه‌ عیراق به‌ر ب گۆهۆرینێن زێده‌تر بچیت و گاڤێن رژد ب هاڤێژیت بۆ ئه‌نجامدانا ڤان گۆهۆرینان، ئه‌ز باوه‌رم پشتی هه‌لبژارتنێن عیراقێ دێ گۆهۆرینێن زۆر مه‌زن ل عیراقێ هێنه‌ ئه‌نجامدان و بزاڤ دهێنه‌كرن عیراق جاره‌كادی ب شێوه‌یه‌كی بهێته‌ دامه‌زراندن كو د به‌رژه‌وه‌ندیا پرۆسا سیاسی یا عیراقێ دا بیت”.

ل دۆر رۆلێ هه‌رێما كوردستانێ د پرۆسا سیاسی دا ل عیراقێ، نه‌دا مێرگه‌سۆری ئاماژه‌كر”كورد و هه‌رێما كوردستانێ مه‌رجێ سه‌ره‌كیێ مانا عیراقا فیدرالی نه‌ و هه‌رێما كوردستانێ كیانه‌كێ سیاسی یه‌ ل ده‌ڤه‌رێ و پشتی سالا ٢٠٠٥ێ دستوورێ عیراقێ دانپێدان ب كیانێ سیاسی یێ هه‌رێما كوردستانێ كریه‌، هه‌ر ئه‌ڤه‌ ژی بۆ ئه‌گه‌ر عێراق ل سه‌ر بنه‌مایێ ده‌وله‌ته‌كا فیدرال بهێته‌ دامه‌زراندن، به‌لێ كورد پشكدارێن سه‌ره‌كی یێن پرۆسا سیاسی نه‌ ل عیراقێ، ب تایبه‌تی ژی ئه‌و هێزێن پێگه‌هه‌كێ مه‌زن هه‌ی مینا پارتی دیموكراتی كوردستان، پارتی وه‌ك حزبه‌كا سیاسی یا مه‌زن ل سه‌ر ئاستێ عیراقێ و كوردستانێ دێ رۆله‌كێ ئێكلاكه‌ر بۆ زۆر ئاریشێن عیراقێ هه‌بیت، هه‌موو لایه‌نێن سیاسی ل عیراقێ ژی ڤێ راستیێ باش دزانن بێی رۆلێ پارتی عیراق ته‌ناهیێ بخوه‌ڤه‌ نابینیت و پێگه‌هێ پارتی بخۆ ئه‌گه‌ره‌كه‌ بۆ چاره‌سه‌ركرنا گه‌له‌ك پرسێن گرنگ ل عیراقێ”.

کۆمێنتا تە