نۆشدارەک بەحسێ کارتێکرنا سۆنەتکرنێ د حەفتیا ئێکێ دا ل سەر زارۆی دکەت

نۆشدارەک بەحسێ کارتێکرنا سۆنەتکرنێ د حەفتیا ئێکێ دا ل سەر زارۆی دکەت

157

دھۆک، لەزگین جۆقی:

نۆشدارەکێ زارۆیان ل پارێزگەھا دھۆکێ دیارکرکو د حەفتیا ئێکی دا دەمێ زارۆک دھێتە سەر دونیایێ باش نینە بھێتە سۆنەتکرن، چونکو ئاریشەیێن ساخلەمیێ بۆ ھندەک ژوان زارۆیان دروست دبن یێن حەفتیا ئێکی دا دەمێ ژدایک بن دھێنە سۆنەتکرن.

د. سەردار  غازی پێداوی، تایبەتمەندێ نەخۆشێن زارۆیان ل نەخۆشخانا ھیڤی یا زارۆیان دھۆکێ ئاشکەرا کر کو:” سۆنەتکرنا د حەفتیا ئێکێ دا ژ دایکبوونا زارۆی تشتەکێ زۆر شاشە دھێتە کرن و ئەم حەز دکەین خەلکێ مە زارۆیێن خوە حەفتیا ئێکێ دا سۆنەت نەکەن، ھندەک کەس ھەنە ھزر دکەن ھەکە د حەفتیا ئێکێ دا زارۆی سۆنەت بکەن زارۆک نا ئێشیت و سۆنەتکرنا وی زوو دێ ساخ بیت و  زەرکا زارۆی ژی دێ بەت، و گۆت: چو پەیوەندیا سۆنەتکرنا زوو یا زارۆی ب زەرکێ ڤە نینە، ئەو زەرکا ب سۆنەتکرنێ بچیت ئەو ب خوە دێ چیت و نە گرێدای سۆنەتکرنێ یە و چو ئاریشە دناڤ خوینا زارۆی دا نینن، لەورا ئەو زەرک زوو چارەسەردبیت و ھەکە ئاریشەک د خوینا زارۆی دا ھەبیت ئەو زارۆ بھێتە سۆنەتکرن و نەھێتە سۆنەتکرن ئەو زەرک دێ ھەر مینیت، ژبەر ڤێ چەندێ ئەم دبێژین سۆنەتکرن دحەفتیا ئێکێ دا ژ دایکبوونا زارۆی چو پەیوەندی ب زەرکێ ڤە نینە.

گۆتژی:” سۆنەتکرن گەلەک یا خەلەتە دھەیڤێن ئێکێ دا ژ دایکبوونا زارۆی بھێتەکرن، چونکو ئەڤە گەلەک حالەت مە دیتن ب تایبەتی ژی من دیتینە زارۆ  ژیێ وی چار سال و پێنج سال بووینە ھەردەم گازندە ژ زکێ خوە کرینە دبێژن زکێ من دئێشیت پشتی ئەم پشکنینا وی زارۆی دکەین دێ بینین کونکا وی یا بەرتەنگە و گەلەک یا بچووکە و دەمێ ئەو زارۆک دچیتە دەستئاڤا زراڤ وی دەمی راست و راست ناچیت، بەلکو یا دەرڤە یا بھێزە بۆ سەری دچیت، ژبەرکو سەرکێ ئەندامێ وی یێ نێرینە یێ تەنگە و ئەم دێ پسیار کەین دێ دایک بێژن مە حەفتیا ئێکێ دا یێ سۆنەتکری .

د. سەردار ئەوژی دیارکر کو بەھرا پتر یا وان زارۆیان ژی ئەون یێن حەفازە گەلەک بەردا دمینن ئەوژی کارتێکرنێ دکەت، چونکو دەمێ زارۆ دھێنە سۆنەتکرن و حەفازە بۆ دەمەکێ درێژ ل بەر زارۆی دا بمینیت فشار ل سەر سەرێ ئەندامێ وی یێ نێرینە دروست دبیت وەکو ھەودانێ بیت وتەنگ د بیت ، لەورا ئەم بەردەوام دبێژینە نەساخێن خوە پێدڤیە حەفازە گەلەک بەر زارۆی نەمینیت ھەر چەند دەمژمێران بێ حەفازە بمینیت باشترە داکو فشار ل سەر لەشێ وی کێم ببیت و باشترە زارۆ زوو بھێتە فێرکرن بۆ دەستئاڤێ، ھندەک زارۆ ھەنە ژیێ وان سێ سال وچار سالن ھیشتا دایکێن وان فێری دەستئاڤێ نەکرینە ئەڤە تشتەکێ باش نینە.

ناڤھاتی تەکەز کرکو پشتی سێ ھەیڤیێ باشترە زارۆک بھێتە سۆنەتکرن داکو تووشی ئاریشەیێن ساخلەمیێ نەبیت دەمێ مەزن دبیت ھەتا جل وبەرگێن تەنگ ژی بۆ زارۆی دباش نینن.

کۆمێنتا تە