نەتەوێن ئێکگرتی ل دۆر ب ھێزبوونا داعشێ ھۆشداریێ ددەت

نەتەوێن ئێکگرتی ل دۆر ب ھێزبوونا داعشێ ھۆشداریێ ددەت

33

ئەڤرۆ:

ڤیلادەمیر ڤۆرۆنکۆڤ بەرپرسێ پشکا شەرێ ل دژی تیرۆرێ یا سەر ب نەتەوێن ئێکگرتی راگەھاند کو رێکخراوا تیرۆرستی یا داعشێ رۆژ ب رۆژێ خوە پتر رێکخستن دکەت و ب ھێز دکەڤیت و ب تایبەتی ژی د ماوەیێ چەند حەفتیێن بۆری دا داعشێ ل چەندین دەڤەرێن جودا جودا ل عیراقێ و سووریێ دەست ب کریارێن تیرۆرستی کریە و ژ بەر ھندێ ژی دڤێت شەرێ ل دژی داعشێ و گرۆپێن دی یێن تیرۆرستی ب ھەموو رەنگەکێ بەردەوام بیت.

ناڤھاتی راگەھاند کو داعشێ شیایە د ماوەیێ چار مەھێن بۆری دا ھژمارا چەکدارێن خوە ل عیراقێ و سووریێ زێدەتر بکەت و ب زۆرێ پارە ژ خەلکی وەردگرن، ترسەکا مەزن ل دەف وەلاتیان دروست بوویە و داعش دشێت جارەکا دی ژ بەر رەوشا ئالۆز یا ل سووریێ و عیراقێ دەست ب کریارێن مەترسیدار ل دژی وەلاتیێن سڤیل بکەت.

ھەمان بەرپرسی ئەو یەک ژی دیار کر کو ژ بەر قەیرانا ئابووری و بابەتێ کۆرۆنایێ داعشێ شیا ل گەلەک دەڤەران خوە ب ھێز بکەت و ھەکە رێگری ل داعشێ نەھێتە کرن چەکدارێن تیرۆرست دشێن وەکو سالێن بۆری ل عیراقێ، سووریێ و گەلەک وەلاتێن دی یێن جیھانێ دەست ب کریارێن تیرۆرستی بکەن.

ڤیلادەمیر ڤۆرۆنکۆڤ داخواز ژ ھەڤپەیمانیا نێڤدەولەتی یا شەرێ ل دژی داعشێ ژی دکەت کو دەست ب کۆمبوونێن خوە بکەت و ل سەر ستراتیژیەکا نوو کار بکەت، چونکو ب ھێزبوونا داعشێ دێ بیتە ئاریشەکا گەلەک مەزن بۆ رۆژھەلاتا ناڤین و ھەموو جیھانێ، ھەری زێدە ژی وەلاتیێن سڤیل دێ بنە قوربانی، ژ بەر ھندێ ژی گرنگە ھەموو وەلاتێن جیھانێ ھەست ب مەترسیا داعشێ بکەن و ژ بۆ ژناڤبرنا داعشێ و گرۆپێن دی یێن تیرۆرستی پتر ژ ھەر دەمەکێ ھاریکاریا ئێکتر بکەن.

کۆمێنتا تە